Lesona 174: Mo Le Malosi o le Autalavou

TaialaMo Le Malosi o le Autalavou

“O Le a Faasaolotoina Oe e le Upumoni”

E alofa ma faatuatuaina e le Tama Faalelagi le tupulaga faia’e. Ua Ia tuuina mai le taitaiga faaperofeta e fesoasoani ai i talavou o aso nei e atiina ae le faatuatua ia Iesu Keriso ma tumau ai i luga o le ala o feagaiga. E mafai ona fesoasoani lenei lesona i tagata aoga e vaavaai atu ai ia Iesu Keriso pe a faia ni faaiuga e ala i le faaaogaina o le “Mo Le Malosi o le Autalavou: O Se Taiala mo le Faia o Filifiliga.”

Gaoioiga E Ono Mafai Ona Aoao Ai

O vaega muamua e lua o lenei lesona ua mamanuina e fesoasoani i tagata aoga e aoao atili ai e uiga i le Mo Le Malosi o le Autalavou: O Se Taiala mo le Faia o Filifiliga (2022) ina ia mafai ona latou faalagolago atili ia Iesu Keriso. O le vaega mulimuli o loo tuuina atu ai se gaoioiga e aoao ai o loo taulai atu i le vaega o loo i le tamaitusi ua faaautuina “O Le a Faasaolotoina Oe e le Upumoni” i itulau 30–33. O manatu e suesue ai autu faaopoopo mai le tusitaiala o loo aofia i isi tusi lesona a le faiaoga seminare. Filifili po o fea o vaega mai lenei lesona ma po o a autu mai le Mo Le Malosi o le Autalavou e sili ona fetaui ma manaoga o au tagata aoga.

O Iesu Keriso o le malosi o le autalavou

Mafaufau e tusi le upu malosi i luga o le laupapa ma valaaulia tagata aoga e faasoa mai po o ai pe o a foi ni o latou mafaufauga pe a latou vaai i lenei upu. Faaali atu se ata o Iesu Keriso, ma talanoa i fesili nei.

• Aisea ua avea ai Iesu Keriso o se faataitaiga lelei o le malosi? Na faapefea ona Ia faaalia le malosi i vaega uma o Lona soifuaga?

• O a nisi o tulaga e feagai ma le tupulaga lea e mafai ai e le malosi o le Faaola ona fesoasoani ia i latou?

Faitau le “Savali mai le Au Peresitene Sili” i le itulau e 2 i le Mo Le Malosi o le Autalavou, ma vaavaai pe mafai faapefea ona e maua le malosi.

• O le a sou manatu o le a le uiga o le, o Iesu Keriso o le “malosi o le autalavou”?

• Na faapefea ona e maua le fesoasoani ma le malosi mai ia te Ia?

Fai o ni filifiliga musuia

Valaaulia tagata aoga e fai gaoioiga nei i a latou api faamaumau mo suesuega.

Lisi nisi o filifiliga taua po o faaiuga atonu e manaomia ona e faia i le isi 10 tausaga. Fuafua po o le fea o nei filifiliga o le a sili ona aafia ai lou olaga atoa.

E mafai e tagata aoga ona faamamafa ia faaiuga latou te lagona o le a sili ona aafia ai o latou olaga e ala i le vaseina o na faaiuga. Mo le fesili e sosoo ai, e mafai ona latou tali le leoa e ala i le tusia o se foliga ataata, foliga le faaleogolua, po o se foliga faanonou i totonu o a latou api talaaga e faailoa mai ai lo latou mautinoa e uiga i le faia o faaiuga taitasi.

• O le a sou lagona mautinoa e uiga i le faia o nei filifiliga?

• O a punaoa ua saunia e le Tama Faalelagi e fesoasoani ia te oe e faia ai filifiliga musuia?

E mafai e tagata aoga ona faasoa mai pe na faapefea e le Mo Le Malosi o le Autalavou ona fesoasoani ia i latou e faia filifiliga musuia.

Faitau le vaega “Fai Filifiliga Musuia” i itulau 4–5 i le Mo Le Malosi o le Autalavou, vaavaai mo mea e mafai ona fesoasoani ia au filifiliga o loo i ai i le taimi nei ma o le a i ai i le lumanai.

Mafaufau e tuu tagata aoga i ni paga e suesue ai le vaega lenei. Tofi se tagata aoga se toatasi i paga taitasi e suesue parakalafa muamua e tolu a o le isi e suesue ia parakalafa mulimuli e tolu. Valaaulia i latou e faailoga upu ma fasifuaitau anoa ma faasoa mai mea na latou aoaoina ma a latou paga.

A uma ona talanoaina e tagata aoga i paga, mafaufau e faafoe se talanoaga a le vasega e ala i le fai atu o fesili nei.

• O a ni mea na e aoaoina e mafai ona fesoasoani ia te oe e faia ni filifiliga musuia?

• E faapefea ona aafia ou lagona i mea sa e aoaina e uiga i le Tama Faalelagi ma Iesu Keriso?

Faamalosiau i tagata aoga e faaaoga e le aunoa ia aoaoga ma mataupu faavae i le Mo Le Malosi o le Autalavou a o latou faia faaiuga ma taumafai e mulimuli i le Faaola. Faasino i latou i le ata i le faaiuga o le vaega “Fai Filifiliga Musuia” i le itulau e 5, pe faaali atu faamatalaga nei e fesoasoani ia i latou e iloa ai le ala o loo faatulagaina ai le Mo Le Malosi o le Autalavou .

O autu taitasi i le Mo Le Malosi o le Autalavou e taitolu vaega:

1. O upumoni e faavavau, po o aoaoga faavae o le talalelei toefuataiina a Iesu Keriso

2. Valaaulia e faatino na upumoni

3. Faamanuiaga folafolaina ua ofoina mai e le Alii ia i latou o e ola i Ana aoaoga

Valaaulia tagata aoga e mafaufau loloto i soo se fesili po o ni luitau o i ai nei atonu latou te manaomia ai se fesoasoani, aemaise lava a o latou tomanatu i filifiliga taua o le a latou faia i nai tausaga o sosoo ai. Tuu atu ia i latou se taimi e suesue ai Mo Le Malosi o le Autalavou, vaavaai mo upumoni e faavavau, valaaulia, ma faamanuiaga folafolaina e mafai ona fesoasoani i o latou atugaluga patino. Faamalosiau i le vasega e tusifaamaumau manatu ma uunaiga a o latou suesue. A uma, valaaulia ni nai tagata e faasoa mai mea na latou mauaina, ae faamanatu atu ia i latou e aua nei faasoa maia se mea e patino tele. Atonu e fesoasoani fesili nei.

• O le a se mea na e maua pe na fesoasoani a o e suesue?

• E mafai faapefea e le mamanu o le aoaoina o le upumoni e faavavau, galue i valaaulia faamalosiau, ma le manatuaina o faamanuiaga folafolaina ona fesoasoani ia te oe e maua ai le malosi mai ia Iesu Keriso e faia ai filifiliga musuia?

“O le a faasaolotoina oe e le upumoni”

O lenei vaega o le lesona o loo taulai atu i le vaega “O Le a Faasaolotoina Oe e le Upumoni” i itulau 30–33 i le Mo Le Malosi o le Autalavou. E mafai ona e aoaoina atu ia ogatusa ma isi vaega pe na o ia lava.

Tusi manuia ma faaletonu i luga o le laupapa. Mafaufau e faaali atu se telefoni feaveai, komepiuta feaveai, po o se isi masini e maua ai le initoneti ma ala o faasalalauga faaagafesootai. Fai i le vasega e faamatala mai ni itu lelei ma ni tulaga le lelei o le faaaogaina o le initoneti ma ala o faasalalauga faaagafesootai pe a saili mo le malamalama. Valaaulia i latou e lisi i luga o le laupapa punavai faatuatuaina latou te iloa ma faasoa mai pe aisea e taua ai le faaaoga o nei punavai pe a saili mo le upumoni.

Faitau le Ioane 8:31–32, ma vaavaai mo mea na aoao atu e Iesu e uiga i upumoni.

• O le a se mea na e aoaoina?

• E faapefea ona fesoasoani le faamaoni ia tatou saoloto ai?

  Mafaufau e faatulaga tagata aoga i ni vaega laiti. Tuu atu se fasi pepa i vaega taitasi. Valaaulia i latou e mafaufau i se tulaga faataitai talafeagai e aofia ai talavou e fesootai i mataupu i le vaega “O Le a Faasaolotoina Oe e le Upumoni” i itulau 30–33. Mo se faataitaiga, o le vaaiga faataitai e mafai ona faamatala ai se tasi e le o vaai i le taua o le aoaoina o le upumoni, se tasi o loo tauivi e ola ma le amiosa’o, po o se tasi o loo fefe e uiga i le talanoaina o lo latou faatuatua ma isi. A uma ona tusi e vaega a latou vaaiga faataitai, valaaulia i latou e fesuiai pepa ma se isi vaega.

  Valaaulia tagata aoga e faitau ia parakalafa 1–4 o le vaega “O Le a Faasaolotoina Oe e le Upumoni” i le itulau 31 ma faailoa mai se mataupu faavae. E mafai ona latou faailoa mai se mataupu faavae e pei o lenei: O le aoaoina ma le ola ai i upumoni e faavavau e fesoasoani tatou te avea atili ai e faapei o le Tama Faalelagi ma maua ai le filemu ma le fiafia i lenei olaga.

• E mafai faapefea e le aoaoina ma le ola ai i upumoni e faavavau ona fesoasoani ia i tatou ia avea atili e faapei o le Tama Faalelagi? E mafai faapefea ona fesoasoani Iesu Keriso ia te oe i lenei faagasologa?

• O anafea na e maua ai po o se tasi e te iloa le filemu ma le fiafia mai le ola ai i upumoni e faavavau o le talalelei a le Faaola?

  Fai i tagata aoga e tusi se tali i le tagata i le tulaga faataitai e faaaoga ai upumoni e faavavau, valaaulia, ma faamanuiaga folafolaina o loo aoaoina i le vaega “O Le a Faasaolotoina Oe e le Upumoni” i itulau 30–33. Valaaulia ni nai vaega e faasoa mai le tulaga faataitai na latou mauaina ma pe na faapefea ona latou faaaogaina le faamatalaga i le Mo Le Malosi o le Autalavou e fesoasoani ai.

  Ina ia faauma, mafaufau e valaaulia tagata aoga e tali fesili nei i totonu o a latou api faamaumau mo suesuega.

• O a ni suiga e mafai ona e faia i lou olaga ona o mea ua e aoaoina ma lagonaina i le aso?

A o suesueina e tagata aoga le “O Le a Faasaolotoina Oe e le Upumoni” i itulau 30–33 po o isi vaega i le Mo Le Malosi o le Autalavou, atonu na latou lagonaina le manaomia ona faia ni suiga i o latou olaga. Valaaulia tagata aoga e suesue le vaega “O Le A Fesoasoani Iesu Keriso ia Oe” i itulau 6–9, ma vaavaai pe mafai faapefea ona latou maua le malosi mai ia Iesu Keriso e sui ai.

Punaoa Faaopoopo

O a ni lagona o le Faaola e uiga i le autalavou o aso nei?

Na folafola mai e Peresitene Russell M. Nelson:

O’u uso e ma tuafafine pele, o outou o e aupito silisili ua auina mai e le Alii i lenei lalolagi. Ua ia te outou le gafatia e atamamai ma popoto atu ma tele atu ni aafiaga i le lalolagi nai lo se isi augatupulaga ua mavae atu! (Russell M. Nelson ma Wendy W. Nelson, “Faamoemoe o Isaraelu” [faigalotu a le autalavou i le lalolagi atoa, 3 Iuni, 2018], ChurchofJesusChrist.org)

Na molimai mai Elder Dieter F. Uchtdorf o le Korama a Aposetolo e Toasefululua:

A’u uo talavou pele, pe ana faapea o loo i ai iinei le Faaola i le taimi nei lava, o le a Sana fetalaiga ia te outou?

Ou te talitonu o le a Ia amata e ala i le faailoa atu o Lona alofa loloto mo outou. Atonu Na te fetalai atu i ni upu, ae o le a tafe atu foi ma le malosi tele—mai le tau na ona i ai o Ia iinei—lea o le a lē mafaaseseina, ae o le a oo atu i le ta’ele o lou loto, ma faatumulia ai lou agaga atoa! …

Ou te talitonu e finagalo le Faaola o Iesu Keriso ia te oe ia e vaai, lagona, ma iloa o Ia o lou malosiaga. O lena malosiaga faatasi ma Lana fesoasoani, e leai ai ni tapulaa i mea e mafai ona e ausiaina. O lou gafatia e lē faatapulaaina. E finagalo o Ia e te vaai ia te oe lava ia i le ala o loo Ia silasila mai ai ia te oe. Ma e ese tele lena mea mai le ala e vaai atu ai le lalolagi ia te oe. (Dieter F. Uchtdorf, “O Iesu Keriso o le Malosiaga o le Autalavou,” Liahona, Nov. 2022, 9)

E mafai faapefea e le Mo Le Malosi o le Autalavou ona fesoasoani ia te au e mulimuli ia Iesu Keriso?

Na aoao mai Elder Dieter F. Uchtdorf o le Korama a Aposetolo e Toasefululua:

Pe a i ai ni au filifiliga taua e faia, o Iesu Keriso ma Lana talalelei toefuataiina o le filifiliga aupito silisili lea. A i ai ni au fesili, o Iesu Keriso ma Lana talalelei toefuataiina o tali aupito silisili ia. Pe a e lagonaina le vaivai, o Iesu Keriso lou malosiaga. …

Ina ia matuā manino, o le taiala aupito silisili e mafai ona e maua gofie mo le faia o filifiliga, o Iesu Keriso. O Iesu Keriso o le malosi o le autalavou.

O le faamoemoega o le Mo Le Malosi o le Autalavou o le faasino atu lea o oe ia te Ia. E aoao ai oe i upumoni e faavavau o Lana talalelei toefuataiina—upumoni e uiga i le po o ai oe, po o ai o Ia, ma mea e mafai ona e ausiaina faatasi ma Lona malosiaga. E aoao ai oe i le auala e fai ai filifiliga amiotonu e fua i na upumoni e faavavau.

E taua foi le iloa o mea e le faia e le Mo Le Malosi o le Autalavou . Na te lē faia ni faai’uga mo oe. Na te lē avatua ia te oe se “ioe” po o se “leai” e uiga i filifiliga uma atonu e te feagai ai. E taulai atu leMo Le Malosi o le Autalavou i le faavae mo au filifiliga. E taulai atu i tulaga faatauaina, mataupu faavae, ma aoaoga faavae nai lo amioga patino uma. (Dieter F. Uchtdorf, “O Iesu Keriso o le Malosi o le Autalavou,” Liahona, Nov. 2022, 10–11)

Gaoioiga Faaopoopo e Aoao Ai

Fuaitau o mau mo autu taitasi

A o aoao tamaiti aoga e uiga i autu eseese i le Mo Le Malosi o le Autalavou, valaaulia i latou e saili fuaitau o mau e fesootai i ai mo se malamalamaaga faaopoopo. Ona mafai lea e tagata aoga ona faamatala mai pe mafai faapefea e le aoaoga faavae o loo aoao mai i nei fuaitau o mau ona fesoasoani i talavou ia mulimuli atili ia Iesu Keriso ma tumau ai i luga o le ala o feagaiga.

O se laau o faaiuga

Ina ia folasia atu i tagata aoga le autu “Fai Filifiliga Musuia” i le Mo Le Malosi o le Autalavou, mafaufau e valaaulia i latou e tusi i lalo nisi o faaiuga taua atonu latou te faia i nai tausaga e sosoo ai. E mafai ona latou fatuina se laau o faaiuga e ala i le filifilia o se tasi pe sili atu o a latou faaiuga ma tusi ni lala e tuuese ai le uluai filifiliga. E mafai ona fesoasoani lea i tagata aoga e vaai faalemafaufau ai i taunuuga o a latou filifiliga. Mo se faataitaiga, e mafai e se tagata aoga ona filifili le “auauna atu i se misiona talai” e fai ma a latou filifiliga autu. O lala faamoemoeina mo lena filifiliga e aofia ai le ”liua malosi atu i le Faaola ma Lana talalelei,” “faateleina le mautinoa e talanoa atu ai i isi,” “amio masani sili ona lelei e suesue ai,” “alofa faateleina mo fanau a le Atua,” ma le “olioli sili atu ma le faamalieina i le auauna atu.” A uma ona fatu e tagata aoga a latou laau o faaiuga, valaaulia i latou e suesue le vaega “Fai Filifiliga Musuia” i itulau 4–5, ma vaavaai mo upumoni ma fautuaga e taiala ai i latou i le taimi nei ma i le lumanai.