Lesona 172: Tomai e Suesue ai Tusitusiga Paia

Meafaigaluega-mo le Suesueina o Tusitusiga Paia

Faaaoga fesoasoaniga mo suesuega

O lenei lesona e mafai ona fesoasoani ia te oe e faaleleia ai au suesuega patino o tusitusiga paia ma faamalosia ai lou sootaga ma le Tama Faalelagi ma Iesu Keriso e ala i le faaaogaina o meafaigaluega mo le suesueina o tusitusiga paia.

Sauniuniga a le tagata aoga: Valaaulia tagata aoga e o mai saunia e faasoa mai ni meafaigaluega o loo maua e fesoasoani ia i tatou i le lalolagi i aso nei e lei maua i le 50 tausaga ua mavae. Fai atu ia i latou ia saunia e faamatala mai po o le a le eseesega e faia e nei meafaigaluega i o tatou olaga.

Gaoioiga E Ono Mafai Ona Aoao Ai

Meafaigaluega

Mafaufau e faaali atu ata nei (po o isi ata talitutusa) ma valaaulia tagata aoga e tali mai i fesili nei.

• Na faapefea e nei meafaigaluega ona aafia o tatou tomai e malaga ma galulue?

• O a isi meafaigaluega ua atiina ae i le aluga o tausaga ua faateleina ai o tatou tomai e faia ai mea?

• O le a se eseesega o le olaga pe ana faapea tatou te le o nofouta i nei meafaigaluega po o le auala e faaaoga ai?

E pei lava o femalagaaiga ma galuega, e i ai foi meafaigaluega e fesoasoani ia i tatou e suesue ai tusitusiga paia ma latalata atili atu ai i le Tama Faalelagi ma Iesu Keriso.

Na faasoa mai foi Uso Tad R. Callister, o le sa avea ma Peresitene Aoao o le Aoga Sa, lenei mea:

O le tupulaga o i ai nei o loo mauaina upumoni, malamalamaaga, ma isi faamauga faaopoopo e le o iloa e le toatele o ona tuaa—e le faapea ona o le tupulaga o i ai nei ua sili atu ona amiotonu, pe ona o loo i ai se atamai sili atu, ae ona o loo i ai ni meafaigaluega e sili atu. O le faifaatoaga e sili ona atamai e i ai se solofanua ma suotosina e le fetaui mo se faifaatoaga lelei e iai se palau faaonaponei e faalogo mai i lana faatonuga. O le tagata matematika e i ai vase numera e le o se luitau i lana paaga e iai se komepiuta e maualuga le saoasaoa. O se Kalilio e i ai se meavaai e uu o le a le iloaina lava le atulaulau e pei o se Kalilio e iai le meavaai sili ona maoa’e. E tatau ona faamoemoeina e le Alii le tele o mea mai ia i tatou i le sikolasipi o le talalelei nai lo le mea sa ia faia i augatupulaga ua mavae, aua e tele naua mea ua tatou maua i soo se taimi. (Tad R. Callister, The Infinite Atonement [2000], 21)

Manatunatu loloto i fesili nei:

• E faapefea ona e nofouta i meafaigaluega mo le suesueina o tusitusiga paia e mafai ona fesoasoani ia te oe e maua ai tali i au fesili ma faalatalata atili atu ai i le Tama Faalelagi ma Iesu Keriso?

• O le a le lelei o lou lagona i lou faaaogaina?

A o e suesueina lenei lesona, saili ia malamalama atili i meafaigaluega mo le suesueina o tusitusiga paia ma pe mafai faapefea ona latou fesoasoani ia te oe.

Faamatala: Faaaogaina o meafaigaluega mo le suesueina o tusitusiga paia

Fai mea nei e fesoasoani ai i tagata aoga ia malamalama manino po o a meafaigaluega mo le suesueina o tusitusiga paia.

Valaaulia tagata aoga e o mai i luga ma tusi soo se meafaigaluega mo le suesueina o tusitusiga paia latou te iloa ua saunia e le Alii e fesoasoani ai ia i tatou e tali a tatou fesili ma faalatalata atili atu ai ia te Ia. Mafaufau e faaopoopo soo se meafaigaluega nei e le o ta’ua e tagata aoga.

Vaefaamatalaga

Taiala Mo Autu

Taiala i Tusitusiga Paia

Faasologa o Autu i le Tusi Fusi Tolu

O Faafanua

Atapue o le Talafaasolopito o le Ekalesia

Faasino atu i meafaigaluega eseese i luga o le laupapa ma fesili atu i tagata aoga po o a i latou ma pe o fea e mafai ona latou maua ai. Afai e le masani tagata aoga i soo se tasi o i latou, mafaufau e faaaoga faamalamalamaga nei ma faaali atu i tagata aoga po o fea o latou i ai.

Vaefaamatalaga—O vaefaamatalaga o loo faasino i ai ni mataitusi laiti, i se fuaiupu e faasino atu ai oe i le pito i lalo o le itulau lea o le a e maua ai ni mau po o ni autu faaopoopo e faatatau i le fuaiupu. I le polokalama o le Gospel Library, o le oomiina o le vaefaamatalaga o le a faaali mai ai le faamatalaga lava lea e tasi.

Taiala mo Autu—O lenei punaoa o loo i ai mau e faatatau i autu eseese ma mau faasino i isi autu talitutusa. E mafai ona maua i le faaiuga o le lomiga a le Au Paia o Aso e Gata Ai o le Tusi Paia po o le polokalama o le Gospel Library i lalo o Tusitusiga Paia, ma Fesoasoani mo Suesuega.

Taiala i Tusitusiga Paia—O lenei punaoa o loo i ai ni faauigaga pupuu, faigofie o faaupuga o mau faatasi ai ma ni nai mau faasino e fesootai i faaupuga taitasi. E mafai ona maua i le faaiuga o le Tusi a Mamona po o le polokalama o le Gospel Library i lalo o Tusitusiga Paia, sosoo ai ma le Fesoasoaniga mo Suesuega.

Faasologa o Autu i le Fusi Tolu—O lenei faasino upu o loo i ai mau faasino mo autu eseese o loo i ai i le Mataupu Faavae ma Feagaiga, Tusi a Mamona, ma le Penina Tau Tele. E mafai ona maua i le faaiuga o le fusitolu po o le polokalama o le Gospel Library i lalo o Tusitusiga Paia, sosoo ai ma le Fesoasoaniga mo Suesuega.

Faafanua ma Ata o le Talafaasolopito o le Ekalesia—O nei punaoa e mafai ona maua i le faaiuga o le fusitolu po o le polokalama o le Gospel Library i lalo o Tusitusiga Paia, ma Fesoasoaniga mo Suesuega.

Faataitaiga

Ina ia faataitai le faaaogaina o meafaigaluega mo le suesueina o tusitusiga paia o se vasega, fai le gaoioiga lenei:

Mafaufau i mea ua e iloa ma mea e te manao e iloa e uiga i le faamagaloga.

Faitau i le Mataupu Faavae ma Feagaiga 64:9–11, ma vaai mo upu moni e uiga i le faamagaloga.

• O le a se mea na e aoaoina? O a ni mea ua fesoasoani ai nei fuaiupu ia te oe e te malamalama atili ai e uiga i le Tama Faalelagi ma Iesu Keriso?

  Valaaulia nei tagata aoga e faasoa mai po o a meafaigaluega latou te ono faaaogaina e faalolotoina ai lo latou malamalama. A o faasoa mai e se tagata aoga se meafaigaluega, fai atu ia i latou pe faapefea ona faaaoga, ma valaaulia tagata aoga uma e mulimuli i la latou taitaiga. Mo se faataitaiga, atonu latou te sueina mau o loo maua i vaefaamatalaga i nei fuaiupu. E mafai foi ona latou suesue i le “Iesu Keriso” poo le “Faaola” i le Taiala i Tusitusiga Paia, “Faamagalo” i le faasino upu i le Fusi Tolu, po o le “Togiola” i le Bible Dictionary.

  Valaaulia tagata aoga e faasoa mai mea ua latou aoaoina ma pe aisea e taua ai ia i latou.

• E faapefea ona fesoasoani nei meafaigaluega i au suesuega?

Faataitai

Valaaulia tagata aoga e o mai i luga ma tusi i luga o le laupapa autu o le talalelei po o fesili latou te iloa po o isi latou te iloa e fia iloa atili pe na taliina. I se isi itu, e mafai ona e faaaogaina se meafaigaluega o faigapalota e le mailoa e maua ai a latou tali.

Afai e faigata i tagata aoga ona maua ni manatu, mafaufau e tusi autu nei i luga o le laupapa. Valaaulia tagata aoga e filifili se tasi o autu nei (po o se isi autu o la latou filifiliga) e i ai ni a latou fesili pe o latou lagona o le suesue e uiga i ai o le a latou latalata atili atu ai ia Iesu Keriso:

• Faamagaloga

• Mauaina o faaaliga

• Tama Faalelagi

• O le pogai tatou te manaomia ai Iesu Keriso

• Muai olaga

• Lalolagi o agaga

• Faamasinoga Mulimuli

• Faaipoipoga ma aiga

• O Le Afio Mai Faalua o Iesu Keriso

I se isi itu, e mafai e tagata aoga ona faatino se tala e faapea ua manao se uo ia iloa atili se tasi o autu o i luga.

I le faaaogaina o meafaigaluega mo le suesueina o tusitusiga paia, faaalu ni nai minute e suesue ai lenei autu po o le fesili. Vaavaai mo upumoni e taua ia te oe, tali au fesili, pe faalatalata atili atu ai oe i le Tama Faalelagi ma Iesu Keriso.

A uma ua lava se taimi, mafaufau e valaaulia tagata aoga e faasoa i ni paga po o ni vaega toalaiti mea sa latou aoaoina ma pe na faapefea ona latou aoaoina. Ona valaaulia lea o tagata aoga e tali mai le fesili lenei e faauma ai le vasega:

• E mafai faapefea e le faaaogaina e le aunoa o nei meafaigaluega i au suesuega faaletagata lava ia o tusitusiga paia ona aafia ai lou malamalama ma le sootaga ma le Tama Faalelagi ma Iesu Keriso?

Punaoa Faaopoopo

E faapefea e le suesueina o tusitusiga paia ona faamanuiaiaina ai lo’u olaga?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

O tusitusiga paia o loo i ai ki i le puipuiga faaleagaga. O loo i ai aoaoga faavae ma tulafono ma sauniga o le a faapea ona aumaia ai fanau taitoatasi a le Atua i se molimau ia Iesu Keriso o le Faaola ma le Togiola.

Faatasi ai ma le tele o tausaga o tapenapenaga, sa i ai se taumafaiga tele ina ia maua tusitusiga paia i gagana uma, faatasi ai ma vaefaamatalaga ma mau e faasino i ai. Matou te taumafai ia maua e i latou uma o e mananao ia aoaoina. Latou te aoao i tatou po o fea e o i ai ae o a foi mea e fai. Latou te ofoina mai le faamoemoe ma le malamalama.

I tausaga ua mavae, sa aoao mai ia te a’u e Elder S. Dilworth Young o le Fitugafulu se lesona e uiga i le faitauina o tusitusiga paia. Sa tauivi se siteki ma feteenaiga ma faigata i ona tagata auai, ma sa manaomia ona tuuina atu i ai se fautuaga.

Sa ou fesili atu ia Peresitene Young, “O le a sa’u tala e tatau ona fai atu?”

Na pau lava lana tali, “Ta’u atu ia i latou e faitau tusitusiga paia.”

Sa ou fesili, “O le fea tusitusiga paia?”

Na fai mai o ia, “E le afaina tele. Ta’u atu ia i latou e susue i le Tusi a Mamona, mo se faataitaiga, ma amata ona faitau. O le a le pine ae oo mai lagona o le toafilemu ma musumusuga, ma o le a oo mai ai lava se tali.” (Boyd K. Packer, “O Le Ki i le Puipuiga Faaleagaga,” Liahona, Nov. 2013, 26–27)

O Peresitene Packer, i le saunoa ai e uiga i vaefaamatalaga, Taiala mo Autu, ma isi meafaigaluega i tusitusiga paia, na aoao mai ai mea nei:

I le gasologa o tausaga, o le a fua mai i nei tusitusiga paia ni tupulaga faamanuiaina o Kerisiano faamaoni o ē e iloa le Alii o Iesu Keriso ma ua loto e usiusitai i Lona finagalo. …

… O le a tatalaina mai faaaliga ia i latou, e le pei o se isi lava i le talafaasolopito o le lalolagi. … O le a latou atiina ae se talalelei e aoao ai e sili atu nai lo mea na maua e o latou augatama. O le a ia i latou le molimau o Iesu o le Keriso, ma o le a latou agavaa e folafola atu o Ia ma puipuia o Ia. …

O nei mau mai voluma e fa o mau o loo i ai le tuufaatasiga sili ona atoatoa o faamatalaga faatusi paia e uiga i le misiona ma aoaoga a le Alii o Iesu Keriso ua tuufaatasia i le talafaasolopito o le lalolagi. (Boyd K. Packer, “Tusitusiga Paia,”i le Conference Report, Oct. 1982, 75–76; poo Ensign, Nov. 1982, 53)

O a meafaigaluega o loo maua i lomiga a le Au Paia o Aso e Gata Ai o tusitusiga paia?

Mafaufau e iloilo “Meafaigaluega mo le Suesueina o Tusitusiga Paia” i le Ensign o Oketopa 2006 e sue ai nisi faamatalaga i lenei fesili.

Gaoioiga Faaopoopo e Aoao Ai

Faataitai atili i meafaigaluega mo suesuega

Afai o le a manuia tagata aoga mai le aoao atili e uiga i le auala e faaaoga ai meafaigaluega mo suesuega o loo ta’ua i lenei lesona, mafaufau e valaaulia i latou e tagai i le “Faaaogaina o Tusitusiga Paia Fou” a Peresitene Boyd K. Packer (1924–2015), o le sa avea muamua ma Peresitene o le Korama a Aposetolo e Toasefululua, i le Ensigno Tesema 1985. Tuu tagata aoga i ni paga ma tuu atu i se tagata e toatasi i le paga e suesue le vaega “Taiala mo Autu” ae o le isi vaega “Vaefaamatalaga.” A uma ua lava se taimi, valaaulia le toalua lea e aoao e le tasi le isi i mea sa la aoaoina ma fai atu i le tasi ma le isi se fesili e mafai ona la sailia e faaaoga ai nei meafaigaluega. Ona mafai lea ona latou fesoasoani le tasi i le isi e saili tali.

O se isi manatu o le iloiloina lea o anotusi mai le “Fesoasoaniga mo Suesuega i Lomiga a le Au Paia oAso e Gata Ai o Tusitusiga Paia.” Toe faamanatu gaoioiga eseese ma saili i latou e sili atu ona taulai i le Mataupu Faavae ma Feagaiga po o gaoioiga o le a fesoasoani i au tagata aoga ia maua ni suesuega mamana o tusitusiga paia.

O se tasi o faataitaiga o le auala e faaaoga ai lenei anomea o le vaevae lea o tagata aoga i ni vaega taitoalima. Tofi se tagata se toatasi i vaega taitasi i ulutala taitasi nei i le lesona: “Vaefaamatalaga,” “Taiala mo Autu,” “Index to the Triple Combination,” “Bible Dictionary,” ma le “Church History Chronology, Maps, and Photographs.” E mafai ona latou suesue i anomea i la latou vaega ma ia saunia e aoao atu la latou vaega e uiga i a latou meafaigaluega ua tofia i ai.