Lesona 171: Tomai e Suesue ai Tusitusiga Paia

Faamatalaga Faaopoopo o Mau

Faailogaina ma le Faaopoopoina o Faamatalaga

O lenei lesona e mafai ona fesoasoani i tagata aoga e faailoga ma faaopoopo ni faamatalaga i a latou tusitusiga paia i se auala e atili taua ai a latou suesuega ma faalatalata atili atu ai i latou i le Tama Faalelagi ma Iesu Keriso.

Sauniuniga a le tagata aoga: I le avea ai ma se vaega o a latou suesuega o tusitusiga paia i aso taitasi, valaaulia tagata aoga e faailoga mea e taua ia i latou, aemaise lava upu po o fasifuaitau e fesoasoani latou te malamalama ai pe lagona ai le alofa o le Tama Faalelagi ma Iesu Keriso. E mafai ona latou o mai saunia e faasoa mai mea na latou faailogaina ma pe aisea.

Gaoioiga E Ono Mafai Ona Aoao Ai

Faia o suesuega o tusitusiga paia ia sili atu ona anoa

Valaaulia tagata aoga e faasoa mai ni nai manatu o fatinoga atonu latou te faia faasamasamanoa ma, i se faatusatusaga, e sili atu ona anoa. O faataitaiga e mafai ona aofia ai le faafeiloai atu ma le talanoa atu i se tasi o le vasega, auina atu o se tusi faafetai po o se tesi, ma le suesueina o tusitusiga paia.

Na poloaiina i tatou e le Faaola ia aua nei faitauina faasamasamanoa ia tusitusiga paia ae ia “saili,” “suesue,” ma “taumamafa fiafia” i Ana afioga (Mataupu Faavae ma Feagaiga 1:37; 11:22; 2 Nifae 32:3). E ala mai i tusitusiga paia e mafai ai ona tatou iloa o Ia ma lagonaina Lona alofa (tagai Ioane 5:39; Iakopo 3:2).

Valaaulia tagata aoga e faaalu sina taimi e iloilo ai a latou suesuega o tusitusiga paia, e aofia ai pe o faapefea ona latou lagonaina o le fesoasoani ia i latou e latalata atili atu ai i le Tama Faalelagi ma Iesu Keriso.

O a nisi o mea na e faia (pe e mafai ona fai) ina ia atili taua ai le suesueina o mau mo oe?

Faalogo ma le toto’a i tali a tagata aoga ma tusi i luga o le laupapa. Mafaufau e faamatala atu mea nei i au lava upu:

Faamatala: Faailogaina o mau

O se tasi auala e taua ai le suesueina o mau o le faailoga ma faaopoopo ni faamatalaga i au tusitusiga paia. A o e suesueina lenei lesona, vaavaai mo ni auala atonu e te manao e maka ai au mau e fesoasoani ai i au suesuega o tusitusiga paia e faalatalata atili atu ai oe i le Tama Faalelagi ma Iesu Keriso.

Faataitaiga: Faailogaina o mau

Faaali atu i tagata aoga ni nai faataitaiga o auala e mafai ai e tagata ona faailoga a latou mau e pei o vitio po o ata o loo aofia ai iinei. E mafai foi e tagata aoga ona faasoa mai ni auala latou te faailogaina ai a latou tusitusiga paia. Valaaulia tagata aoga e faailoa mai ni mafuaaga talafeagai mo faailoga ua latou vaai i ai.

“O Se Faiga e Faailogaina Ai E Aoga mo Oe” (1:56). I lenei vitio, ua faailoaina ai e Elder David A. Bednar o le Korama a Aposetolo e Toasefululua auala e faailoga ai ana mau.

“Faailogaina o Mau” (1:45). I lenei vitio, o loo faaalia ai e Peresitene Dallin H. Oaks o le Au Peresitene Sili le auala na te faailogaina ai tusitusiga paia.

• O a nisi o mafuaaga e ala ai ona faailoga e tagata a latou mau?

• O le a sou manatu e mafai faapefea e le faailogaina o au mau ona fesoasoani ia te oe?

Faataitaiga: Faailogaina o mau

Mafaufau e tusi pe faaali atu le anotusi atoa o fuaiupu nei i luga o le laupapa. Pe, afai e maua, faaali le lomiga faaeletonika o nei fuaiupu mai le Gospel Library. E mafai ona e suia nei fuaiupu i se isi fuaitau o le atamai i aoaoga faavae po o se isi fuaiupu o lau filifiliga.

Mo tagata aoga o e faaaogaina tusitusiga paia faaeletonika, atonu e te manao e faaalu sina taimi e faamatala ai pe faapefea ona faailoga ia mau i le polokalama o le Gospel Library. Mo faatonuga i le auala e faia ai, tagai i le vaega o le “Fesoasoani” o le Gospel Library App, e aofia ai: Gospel Library User Guide (iOS) ma le Gospel Library User Guide (Android) i lalo o le ulutala “Marking Content.”

Ina ia faataitai le faailogaina, faitau le Mataupu Faavae ma Feagaiga 68:5–6 ma faailoga le mea e taua ia te oe. Atonu e te manao e vaai faapitoa atu i mea ua e aoaoina e uiga i le Faaola ma Ona lagona e uiga ia te oe.

Afai o loo faaalia ia fuaiupu i luga o le laupapa, mafaufau e valaaulia tagata aoga e faaaoga maka e toe fai ai a latou faailoga i luga o le laupapa ma fai i ai e faasoa mai pe aisea na latou faailogaina ai mea na latou faia.

• O a upu po o fasifuaitau na e faailogaina? Aisea na latou tulaga ese ai ia te oe?

• Pe o ese sou lagona e uiga i au tusitusiga paia ina ua uma ona e faailogaina? Pe na aafia ai ou lagona mo le Faaola? Afai e i ai, aisea?

Atonu e fesoasoani le ta’u atu i tagata aoga faapea a oo ina tulaga ese ia fasifuaitau faatusi paia ia i latou, e mafai ona avea o se tasi o auala e fesootai mai ai le Alii ia i latou e ala i le Agaga Paia.

Faamatala: Fesootaiga po o le faavasegaina o fuaiupu

E mafai foi ona aoga le suesue faatasi o fuaiupu faaopoopo i se autu ma soofaatasi po o se vaega o nei fuaiupu.

Faataitaiga: Faafesootaiga po o le faavasegaina o fuaiupu

• O a nisi o auala e mafai ona e faafesootaia ai pe tuufaatasia ai fuaiupu o le vaega e uiga i le alofa o le Faaola mo oe?

  Faalogo i tali a tagata aoga ma mafaufau e faaopoopo soo se avanoa nei. E mafai ona e faaaogaina le Mataupu Faavae ma Feagaiga 68:5–6 ma le Mataupu Faavae ma Feagaiga 18:10–11 o ni faataitaiga o fuaiupu e fesoasoani tatou te lagona ai le alofa o le Faaola. O le lisi lenei o loo i ai ni manatu e ono ta’ua e tagata aoga pe e mafai foi ona e faaopoopo atu i mea na faasoa mai e tagata aoga.

• Tusi mau faasino i itulau avanoa i le amataga po o le faaiuga o au tusitusiga paia, po o se api talaaga o tusitusiga paia.

• I autafa o se fuaiupu i totonu o le laina, tusi (ia) mau faasino i se fuaiupu e fesootai i ai.

• A faaaoga le polokalama o le Gospel Library, faaaoga le sootaga po o le faailoga.

Afai e tatau ai, faamalamalama atu o le fesootaiga o le a fesootai ai ni mau se lua, ae o le oomiina o le a mafai ai ona e tuuina i le vaega ni mau se tele i lalo o le autu lava e tasi. Mafaufau e faataitai le tomai lenei i luga o le polokalama o le Gospel Library po o le valaaulia o se tagata aoga e faia. Afai e mafai, o le a fesoasoani le faaali i luga o se lau e tele atu nai lo i luga o se telefoni ia mea o loo faia e oe po o se tagata aoga. Mo faatonuga i le auala e faia ai lenei mea, tagai i le vaega Fesoasoani o le polokalama o le Gospel Library. E mafai ona e mauaina lenei vaega e ala i le filifilia o togitogi e tolu i le tulimanu taumatau pito i luga. (Manatua: E mafai foi ona e faafesootaia pe faailoga parakalafa i lauga o le konafesi aoao po o soo se isi lava anomea i luga o le polokalama o le Gospel Library.)

Faataitai: Fesootaiga po o le faavasegaina o fuaiupu

O le gaoioiga lenei e mafai ona faamalosia ai tagata aoga e fai vaega ma faafesootai mau. Afai na e filifilia se fuaitau ese mo tagata aoga e suesue muamua i le lesona, atonu foi e te manao e filifili ni fuaiupu eseese i le mataupu lava e tasi e sui ai fuaiupu o loo i lalo.

Faitau ia le itiiti ifo ma le tolu o mau nei ma mafaufau e faafesootai pe faavasega i latou o ni fuaiupu e fesoasoani e te lagona ai le alofa o le Faaola: Mataupu Faavae ma Feagaiga 18:10–11; 34:1–3; 45:3–5; 49:26–27; 68:5–6; 138:3; Isaia 49:15–16; Ioane 15:13; Roma 8:35–39; 1 Ioane 4:19; 1 Nifae 19:9.

I le avea ai o se vasega po o ni vaega toalaiti, valaaulia tagata aoga e faasoa mai auala na latou faavasegaina ai fuaiupu ma pe aisea e ono taua ai ia i latou. E mafai foi ona latou faasoa mai ni manatu pe faapefea ona latou mananao e faaaoga le faavasega po o le fesootai i a latou lava suesuega o tusitusiga paia.

Faamatala: Faaopoopo i ai Faamatalaga

O le isi auala e latalata atili atu ai i le Alii e ala i le suesueina o tusitusiga paia o le faaopoopo lea o ni faamatalaga e uiga i mea o loo e aoaoina.

Na faamalamalama mai e Elder David A. Bednar o le Korama a Aposetolo e Toasefululua le taua o le faamaumauina o faamatalaga pe a aoaoina tusitusiga paia:

O le tusia i lalo o mea ua tatou aoaoina, mafaufau i ai, ma lagonaina a o tatou suesue i tusitusiga paia o se isi lea ituaiga o manatunatu loloto ma se valaaulia mamana i le Agaga Paia mo aoaoga faifai pea. (“Ona ua i ai Nei Mea i Luma o Tatou Mata,” New Era, Ape. 2006, 6–7)

Faataitaiga: Faaopoopoga o Faamatalaga

Faataitai pe fesoasoani i tagata aoga e manatua mai ata ma vitio i le amataga o le lesona e mafai ona latou faaopoopo i ai faamatalaga e ala i le tusia i autafa o a latou tusitusiga paia, i luga o ni fasipepa laiti latou te tuuina i totonu a latou mau, i se api talaaga o tusitusiga paia, po o le faaaogaina faaeletonika o le polokalama o le Gospel Library.

Faataitai: Faamatalaga Faaopoopo

Faaiu le lesona lenei i le tusia o ou manatu ma lagona e uiga i se tasi o fuaitau na e suesueina i le aso.

E mafai ona e faaalia le ala e faaopoopo ai faamatalaga i tusitusiga paia faaeletonika e ala i le faailogaina o se fasifuaitau, filifili le Faamatalaga, ma le taina i totonu o ni upu.

A uma ua lava se taimi e faataitai ai e tagata aoga le faaopoopoina o faamatalaga, valaaulia nisi e faasoa mai mea na latou tusia pe afai e le patino tele. E mafai foi ona e fesili atu pe faapefea ona mananao tagata aoga e faailoga a latou tusitusiga paia i le lumanai ma pe aisea foi.

Punaoa Faaopoopo

Aisea e tatau ai ona faailoga a’u tusitusiga paia?

Sa aoao mai Peresitene Boyd K.Packer (1924–2015) o le Korama a Aposetolo e Toasefululua:

E i ai le tele o fuafuaga mo le vaseina o mau. E eseese lava i latou ma e tatau ona fetaui ma le tagata. O le mea taua o le vasevase o i latou ma fai ni faamatalaga laiti o ni ituaiga ina ia mafai ai ona e toe mauaina. …

Ou te le iloa pe fia itula na ou faaaluina e toe taumafai ai e sue se mea e mafai ona vave ona ou maua pe ana ou fai ma faatino lenei faiga. E sili atu mea ua ou faia i le taimi nei nai lo le mea sa ou faia muamua. (Aoao Atu Ia Outou Filiga [1975], 166)

Gaoioiga Faaopoopo e Aoao Ai

O se isi amataga mo le lesona

Mafaufau e amata le vasega i le valaaulia o tagata aoga e iloilo e i latou lava a latou suesuega o tusitusiga paia. Atonu e te manao e faaali atu pe faitau mea nei. E mafai foi ona e tuu atu i tagata aoga e moeiini o latou mata ma faaali atu pe faapefea ona latou faatulagaina i latou lava e ala i le siiina lea o aofaiga talafeagai o tamatamailima.

I se fuafaatamatalaga o le 1–5 (1=e leai ma le 5=o taimi uma), mafaufau loloto i le moni o faamatalaga nei mo oe:

• O le suesueina o tusitusiga paia e aoga mo au.

• O le suesueina o tusitusiga paia e fesoasoani ou te malamalama ai ma lagonaina le alofa o le Tama Faalelagi ma Iesu Keriso.

• E mafai ona tumau la’u taulaiga pe a ou suesue i tusitusiga paia.

• E mafai ona ou manatua ma sue ni mau e taua ia te au.

E aunoa ma le faasoaina o soo se numera o se tagata aoga, mafaufau e faasoa atu, i se tulaga lautele, ni auala e faamanuiaina ai tagata o le vasega i le suesueina o tusitusiga paia ma auala atonu latou te mananao e faaleleia atili ai. Faamautinoa atu i tagata aoga e mafai ona latou aoaoina tomai o le a atili taua ai le suesueina o tusitusiga paia ma fesoasoani ai ia latou lagonaina le alofa o le Tama Faalelagi ma Iesu Keriso.

Manatu faaopoopo i auala e mafai ai e tagata aoga ona faailoga a latou mau

O auala faaopoopo nei e faailoga ai mau e mafai ona e faasoa atu i au tagata aoga:

Faaaoga lanu: Faaaoga lanu eseese e faailoga ai autu po o mamanu eseese, e pei o le faaaogaina o le lanu e tasi mo uiga o le Alii, o le isi lanu mo folafolaga Na te tuuina mai, ma le isi mo auala e mafai ona tatou faaaoga ai le faatuatua ia te Ia.

Faailoga lisi o mau: E i ai taimi e aofia ai i mau ni lisi e ono fesoasoani e faailoga. Mo se faataitaiga, o uiga lelei o se tamaitai filifilia i le Mataupu Faavae ma Feagaiga 25, o vaega o le ofutau atoaatoa o le Atua i le Mataupu Faavae ma Feagaiga 27:15–18, po o meaalofa a le Agaga i le Mataupu Faavae ma Feagaiga 46.

Tusi: Afai o le suesue i mau pepa, fai se ata faigofie e faapupula ai se fuaiupu po o se faatusa o loo faaaoga i se fuaiupu, e pei o se maa i autafa o le Helamana 5:12.

Manatu faaopoopo i auala e mafai ai e tagata aoga ona faailoga po o fuaiupu o vaega

E mafai e tagata aoga ona faavasega pe faailoga fuaiupu e tusa ai ma autu, e pei o le faatuatua, salamo, faamagaloga, ma faaaliga. Afai e aoga mo tagata aoga le faataitai o lenei tomai, valaaulia i latou e saili fuaiupu i se autu faaleaoaoga faavae i le Taiala i Tusitusiga Paia po o le Taiala mo Autu ma faavasega i latou.

E mafai foi e tagata aoga ona faavasega fuaiupu i autu patino, e pei o le “Fuaiupu E Fesoasoani Ia te A’u e Maua Ai Tali i A’u Fesili” (Mataupu Faavae ma Feagaiga 6:5, 8:2–3; 9:8–9; 88:63, 118; Ioane 7:17; Iakopo 1:5–6; 2 Nifae 32:3, 8–9; Mosaea 4:9; Moronae 10:4–5) po o “Fuaiupu Na Faamafanafanaina A’u i Taimi Faigata” (Mataupu Faavae ma Feagaiga 6:36; 10:4–5; 19:23; 58:4; 121:7–8; 122:5–8; 123:17; Mataio 11:28–30; Ioane 16:33; Filipi 4:13; Helamana 5:12; Alema 36:3, 27). Afai e aoga mo tagata aoga a le taumafai o se tasi o nei vaega, e ono aoga ia fuaiupu o loo faapuipui.

Faailogaina ma le faavasegaina o fuaiupu o le atamai i aoaoga faavae

Atonu e aoga le valaaulia o tagata aoga e faailoga ma faavasega ia fuaiupu o le atamai i aoaoga faavae. O mau nei: Iosefa Samita—Talafaasolopito 1:15–20; Mataupu Faavae ma Feagaiga 1:30, 37–38; 6:36; 8:2–3; 13:1; 18:10–11, 15–16; 19:16–19; 21:4–6; 29:10–11; 49:15–17; 58:42–43; 64:9–11; 76:22–24; 82:10; 84:20–22; 88:118; 89:18–21; 107:8; 121:36, 41–42; 130:22–23; 131:1–4; 135:3.