Lesona 170: Tomai o le Suesueina o Tusitusiga Paia

Sailiga o Upumoni o le Talalelei i Tusitusiga Paia

Aoao e Faailoa Aoaoga Faavae ma Mataupu Faavae

I tusitusiga paia, ua faasaosaoina ai e le Alii upumoni o le talalelei—o aoaoga faavae ma mataupu faavae e faavavau o Lana talalelei—lea e aumaia faalatalata atili ai i tatou ia te Ia ma e taua i lo tatou alualu i luma ma le faaolataga. O lenei lesona e mafai ona fesoasoani e faateleina ai lou tomai e saili upumoni o le talalelei i tusitusiga paia ma latalata atili atu ai i le Tama Faalelagi ma le Faaola.

Gaoioiga E Ono Mafai Ona Aoao Ai

O le faataoto i maa taua

Afai e le o maua le vitio lenei, mafaufau e amata le vasega i le faaali atu o ata o i luga ma fai atu i tagata aooga e vaai faalemafaufau i se tasi o saili ma sue ni maa taua i le oneone i luga o se matafaga. Fesili atu, “E mafai faapefea ona pei le suesueina o tusitusiga paia o le sailia o maa taua i le oneone?”

Matamata le vitio “The Parable of the Gems“ (6:47; matamata mai le faailotaimi 2:13 i le 4:20) ma mafaufau loloto pe mafai faapefea ona faatusatusa le tala i a tatou suesuega o tusitusiga paia.

O a Taeao e Faia ai e le Alii o Vavega i o Outou Luma

Elder Holland encourages Church members to do the best they can to live the gospel and testifies that God's love and help will be with them.

Afai e le mafai ona e faaali atu le vitio, faamisi le fesili muamua o fesili nei. E mafai foi ona e suia le fesili mulimuli i le “O le a se mea e ono fai e se tasi e suesue ma talisapaia ai maa taua?“

• O le a se mea o tulaga ese ia te oe i lenei vitio?

• O le a se mea e mafai ona faatusa i ai le oneone? O a mea e mafai ona faatusa i ai maa taua?

• O le a le mea na fai e le teineitiiti e aoao ai pe talisapaia maa taua sa ia mauaina?

Mafaufau e faamatala atu mea nei i au lava upu:

O aoaoga faavae ma mataupu faavae o le talalelei e mafai ona pei o maa taua i le talafaatusa. O se tasi o faamoemoega autu o tusitusiga paia o le aoao atu lea o aoaoga faavae ma mataupu faavae o le talalelei. O se aoaoga faavae o se vaega autu taua, o se upumoni e le masuia o le talalelei a Iesu Keriso. O se mataupu faavae o le talalelei o se taiala e faavae i aoaoga faavae e mafai e tagata taitoatasi ona faaaoga e fesoasoani ai ia i latou i le faia o faaiuga. O aoaoga faavae ma mataupu faavae e sili ona taua ua tatou aoao mai tusitusiga paia e fesoasoani tatou te iloa ai le Tama Faalelagi ma Iesu Keriso ma malamalama ai i le ala e toe foi atu ai i lo La’ua afioaga.

I lenei tusi lesona, o nisi taimi o le a e vaai ai i valaaulia mo tagata aooga e faailoa mai “upumoni.“ O se auala faigofie lenei o le fai atu o mataupu faavae po o faamatalaga o le aoaoga faavae. Valaaulia tagata aooga e iloilo pe mafai faapefea ona faigofie ona latou faailoa mai upumoni (mataupu faavae po o faamatalaga o le aoaoga faavae) mai tusitusiga paia.

• O le fea o faamatalaga nei e sili ona faatusa i lou lagona mautinoa i lou tomai e maua ai upumoni o le talalelei i tusitusiga paia?

  • E le mautinoa lava

  • Fai si mautinoa

  • Matuai mautinoa

Faalogologo ma le toto’a i tali a tagata aooga. Mafaufau e fesili pe aisea latou te lagona ai faapena. Vaavaai mo ni auala i le lesona atoa e fesoasoani ai ia latou lagona atili le mautinoa a o latou taumafai e saili upumoni o le talalelei.

Faamatalatala

Tuu atu i le vasega pepa tufa talafeagai. Faitau lenei mea faatasi o se vasega. Tuu atu soo se faamalamalamaga faaopoopo e te manatu atonu e manaomia e faamatala ai lenei tomai.

Aoao e Faailoa Aoaoga Faavae ma Mataupu Faavae

O nisi o aoaoga faavae ma mataupu faavae o le talalelei o loo manino ona ta’ua i tusitusiga paia. O isi aoaoga faavae ma mataupu faavae e mafai ona faaataata mai i le faasologa o tala ma e na o le suesueina o se tusi atoa o tusitusiga paia e maua ai, o se mataupu, po o se fuaiupu e tasi. E mafai ona e faataitaia laasaga taua nei i soo se taimi e te suesueina ai tusitusiga paia e fesoasoani ia te oe e faailoa mai upumoni o le talalelei:

1. Faitau lemu ma le faaeteete.

2. Vaavaai mo upumoni manino o ta’ua. O nisi taimi e faailoa mai ai pe a faaaoga e le tusitala upu e pei o le “ua faapea ona tatou vaai,” “ma o lea,” “o le mea lea,” po o le “faauta.”

3. Vaavaai mo upumoni e le o tuusaoina mai. E mafai ona e maua nei mea moni e ala i le fesili ifo ia te oe lava ia i fesili faapenei:

   1. Pe o i ai ni manatu taua, upu, po o fasifuaitau—aemaise lava soo se manatu e fesoasoani ia te oe e iloa atili ai le Tama Faalelagi ma Lana fuafuaga po o Iesu Keriso ma Lana talalelei?

   2. O a faiā o le mafuaaga-ma-aafiaga o i lenei tala?

   3. O le a le uiga po o le aano o le tala?

   4. Aisea e te manatu na faaaofia ai e le tusitala nei mea na tutupu po o fuaitau?

4. Tusi i au lava upu mea na e maua ma maka ia upu o loo i tusitusiga paia o loo aoao mai ai.

5. Mafaufau loloto pe aisea e taua ai ia te oe le mea moni. Na aoao mai Elder Jeffrey R. Holland o le Korama a Aposetolo e Toasefululua:

   

   Manatunatu loloto [ma] suesue i upu uma, o maataua uma. … Tuu i luga i le malamalama ma feliuliuai, vaavaai ia iloa le mea o atagia ma toe suia mai iina. … O se iloiloga faapena e mafai ona aveese ai se oa ua natia i se fanua: o se penina tau tele; o se penina e le mafaatauina. (“Students Need Teachers to Guide Them“ [address to Church Educational System religious educators, Iuni 20, 1992], 4)

Faataitaiga

Mafaufau e faataitai pe faapefea ona faia lenei mea o se vasega e ala i le mulimuli i laasaga o loo i le pepa e tufa atu. Faailoa atu i tagata aooga o le a latou maua se avanoa i se taimi mulimuli ane e faataitai ai e i latou lava. Mafaufau e tusi se ata o se maa taua i le laupapa. I autafa, tusi ai upumoni e faailoa mai e tagata aooga. O le faaaogaina o faaupuga a tagata aooga o se auala sili lea e fausia ai lo latou mautinoa i le auai i le vasega.

1. Faitau lemu ma toto’a le Mataupu Faavae ma Feagaiga 18:10–11 .

2. Vaavaai mo upumoni manino o ta’ua.

   E ono maua e tagata aooga aoaoga faavae e pei o le ua tele lava le taua o agaga i le silafaga a le Atua.

3. Vaavaai mo upumoni ua faaaogaina e ala i le fai atu o nisi o fesili o loo lisi atu i le pepa e tufa atu.

I le tali atu i le fesili muamua o loo i le pepa e tufa atu, atonu e maua ai e tagata aooga le upumoni lenei: E mafai ona tatou salamo ma o mai ia Keriso ona sa puapuagatia o Ia mo a tatou agasala ma tiga ma iu ai ina maliu mo i tatou.

Afai e matau e le vasega le mafuaaga ma le aafiaga i fuaiupu 10 ma le 11, atonu o le a mafai ona latou vaai i lenei upumoni: Ona ua matua tele lava le taua o ō tatou agaga i le silafaga a le Atua, sa puapuagatia ma le loto i ai Iesu Keriso ina ia mafai ona tatou salamo ma o mai ia te Ia

Afai e mafaufau tagata aooga i le fesili mulimuli, atonu latou te vaai i le upumoni lenei: O Iesu Keriso, lo tatou Togiola, e finagalo ia tatou iloa lo tatou taua ia te Ia.

Tusi le upumoni na e maua i se fasipepa, i autafa o au tusitusiga paia, po o se faamatalaga i le polokalama o le Gospel Library. Atonu foi e te manao e faailoga upu o loo aoao mai ai i tusitusiga paia.

Faaalu sina taimi e mafaufau loloto ai pe aisea e taua ai pe anoa ia te oe le upumoni na e maua. Faaaoga sina taimi e manatunatu loloto ai i upumoni ua e faaalia. E ono fesoasoani ia fesili nei e tolu:

1. Aisea e ono manatu ai o lenei upumoni o se maa taua?

2. O le a se mea ua ia aoao atu ia te oe e uiga i le Tama Faalelagi ma Iesu Keriso?

3. E faapefea ona fesoasoani ia te oe i le asō?

Valaaulia ni nai tagata aooga e faasoa mai o latou manatu. A o latou faalogo i manatu ma manatunatuga loloto o a latou uo i le vasega, e mafai ona uunaia i latou e mafaufau loloto atili e uiga i upumoni i tusitusiga paia.

Faataitai

Valaaulia tagata aooga e fai taitoatasi le gaoioiga lenei. E mafai e tagata aooga ona faamaea le gaoioiga i a latou api faamaumau mo suesuega pe, afai e te manao ia i latou e faasoa atu mea na latou maua i isi tagata aooga i le gaoioiga o loo i lalo, i ni fasipepa eseese. E mafai ona latou faaaogaina le pepa e tufa atu ua saunia e fesoasoani ai ia i latou.

Mo se faataitaiga, fai le gaoioiga lenei:

1. Tusi se ata o maa taua e lua.

2. A o e suesue ia le itiiti ifo ma le lua ni fuaitau nei, po o nisi fuaitau o lau filifiliga, lisi se “maa taua“ o le upumoni e te maua mo fuaitau taitasi: Mataupu Faavae ma Feagaiga 1:30; 8:2–3; 18:15–16; 19:16–19; 21:4–6; 49:15–17; 58:42–43; 76:22–24; 131:1–4; 135:3.

3. Tusi pe aisea ua avea ai upumoni taitasi o se maa taua faaleagaga ia te oe. Ia aofia ai mea o loo aoao mai ai oe e uiga i le Tama Faalelagi ma Iesu Keriso ma pe mafai faapefea ona fesoasoani ia te oe i lenei aso.

Afai e faamaea e tagata aooga le gaoioiga i ni fasipepa eseese, e mafai ona latou faafesuiaia a latou pepa ma isi tagata aooga ma faasoa mai mea na latou aoaoina mai le tasi ma le isi. E mafai foi e tagata aooga ona tofia maa taua faatusi paia latou te lagona e faapitoa le taua i le autalavou i aso nei ma fai se lisi o nei mea i luga o le laupapa.

E faavae i lou aafiaga i le aso, aisea atonu e te manao ai e saili ma mafaufau loloto i upumoni a o e suesue?

Tusi i lau api mo suesuega pe faapefea ona e manao e saili upumoni a o e suesue i le talalelei. O se tasi o auala e mafai ona e faia ai lenei mea o le faailoa ma mafaufau loloto ia le itiiti ifo ma le tasi se upumoni i se aso mai au suesuega faaletagata lava ia o tusitusiga paia. Atonu e te mafaufau e tusi upumoni e te maua i au tusitusiga paia po o se api faamaumau o tusitusiga paia.

Mafaufau e valaaulia se tagata aoga se toatasi i se aso mo isi lesona e sosoo ai e faasoa mai se maa taua faatusi paia se tasi na latou maua i a latou suesuega. E mafai e tagata aooga ona faia lenei mea e ala i le faasoa atu o se manatu faatusi paia o se vaega o se faigalotu. Vaavaai mo isi avanoa i lesona i le lumanai mo tagata aooga e faaauau ai ona faataitai lenei tomai taua.

Punaoa Faaopoopo

Aisea e tatau ai ona ou faailoaina upumoni o le talalelei mai tusitusiga paia?

Na aoao mai Elder Richard G. Scott (1928–2015) o le Korama a Aposetolo e Toasefululua:

A o e sailia le malamalama faaleagaga, saili mo mataupu faavae. Ia tuueseese ma le faaeteete i latou mai faamatalaga na faaaoga e faamatala ai. O mataupu faavae o upumoni mama, ua fuafuaina mo le faaaogaina i ni tulaga eseese e tele. O se mataupu faavae moni, e faamanino ai faaiuga ua faia, e tusa lava pe o a tulaga e sili atu ona le mautonu ua faigata ona faafitia. E aoga se taumafaiga e faatulaga upumoni i ni faamatalaga faigofie o mataupu. (Richard G. Scott, “Mauaina o le Malamalama Faaleagaga,” Ensign, Nov. 1993, 86)

Na molimau mai Elder David A. Bednar o le Korama Aposetolo e Toasefululua i le mea lenei:

O le aoaoina, malamalama, ma le ola ai i mataupu faavae o le talalelei e faamalolosia ai lo tatou faatuatua i le Faaola, e loloto ai lo tatou tuuto atu ia te Ia, ma valaaulia ai le tele o faamanuiaga ma meaalofa faaleagaga i o tatou olaga. …

O mataupu faavae tonu e mafai ai e i tatou ona maua lo tatou ala ma tutumau ai, mausali, ma le lē gaoia ina ia tatou lē sagatonu ma pauu ai i afa matamataita o aso e gata ai o le pogisa ma le fememea’i. (David A. Bednar, “O Mataupu Faavae o La’u Talalelei,” Liahona, Me 2021, 123–126)

Na faamatala e Peresitene Marion G. Romney:

E le mafai e se tasi ona suesue faamaoni i tusitusiga paia e aunoa ma le aoaoina o mataupu faavae o le talalelei ona ua tusia tusitusiga paia e faasaosao ai mataupu faavae mo lo tatou manuia. (“O le Savali o le Feagaiga Tuai” [Church Educational System symposium, Aug. 17, 1979], 3)

O le a le taua o le faaaluina o le taimi e tusi ai upumoni tatou te maua?

Na aoao mai Elder B. H. Roberts:

Ina ia iloa, e tatau ona ta’uina atu le upu moni, ma o le manino ma le atoatoa o le faamatalaga, o le lelei foi lena o le avanoa e maua e le Agaga Paia e molimau atu ai i agaga o tagata e moni le galuega [New Witnesses for God, 3 vols. (1909), 2:vii]. (B. H. Roberts, i le James E. Faust, “What I Want My Son to Know before He Leaves on His Mission,” Ensign, Me 1996, 41; Tala’i La’u Talalelei: O Se Taiala mo le Galuega Faafaifeautalai [2004], 182)

Gaoioiga Faaopoopo e Aoao Ai

Mataupu faavae manino

Afai o le a manuia tagata aooga mai le vaai i faataitaiga o upumoni e mulimuli i upu ma fasifuaitau e pei o le “ua faapea ona tatou vaai,” “ma o lea,” “o le mea lea,” po o le “faauta,” e mafai ona e fai atu ia i latou e vaai i mau nei ma taumafai e faailoa mai le mataupu faavae:

• Helamana 3:27: “Ua faapea ona mafai ona tatou vaai ai e alofa mutimutivale le Alii ia te i latou uma o ē e valaau atu i lona suafa paia, ma le faamaoni o ō latou loto.”

• Alema 12:10: “Ma o lea, o ia o le e faamaaa lona loto, o ia lava lea na te maua le vaega itiiti o Ana afioga; ae o ia o le e le faamaaaina lona loto, o ia lea e tuuina mai i ai le vaega tele o le afioga.”

• Efeso 6:13: “O le mea lea ia outou tago ai i ofutau atoatoa mai le Atua, ina ia outou mafaia ona tetee atu pe a oo i le aso vale, pe a uma ona outou faia o mea uma, tou te tutumau ai lava.”

• Alema 41:10: “Faauta, Ou te fai atu ia te oe, e lei avea lava le amioleaga ma fiafia.”

Taiala mo le iloiloina o upumoni

Pe a aoao pe faapefea ona faailoa mai upumoni mai tusitusiga paia, e faigofie lava ona faailoa faamatalaga pe tusi ni mataupu faavae e le moni ma e le o mea na faamoemoeina e le uluai tusitala. Atonu e aoga le tuuina atu i tagata aooga o fesili o loo lisi atu i lalo e fesoasoani ai ia i latou e iloilo le sa’olele o mataupu faavae latou te maua. A uma ona e faailoa maia se mataupu faavae o se vasega, e mafai ona e faataitaia pe faapefea ona faaaoga nei fesili a o lei faataitaia e le vasega e i latou lava.

• Pe o faamaonia mea na e faailoa mai e isi tusitusiga paia ma aoaoga o i ai nei a taitai o le Ekalesia?

• Pe o ogatusa mea na e faailoa mai ma le faamoemoega musuia o le uluai tusitala i le tele e mafai ona e iloaina? (E mafai ona e iloiloina fuaiupu ao lei amataina ma pe a uma le upumoni sa e faailoa mai ma mafaufau loloto i ai pe afai o loo ogatusa ma le mea e te manatu na fuafuaina e le uluai tusitala.)

• Pe o le mea ua e faailoa mai e moni i taimi uma, i tulaga uma, ma aganuu uma?

• Pe o le malamalama i mea na e faailoa mai e fesoasoani ia te oe e faataunuu ai lou taunuuga e faavavau i le fuafuaga a le Tama Faalelagi?

• Pe e te lagonaina le faamautu mai e le Agaga Paia o mea na e faailoa maia e moni?

O isi meafaigaluega e fesoasoani ai i tagata aooga e faailoa mai upumoni

Mafaufau e faailoa atu meafaigaluega faaopoopo nei e fesoasoani ai i tagata aooga e faailoa mai mataupu faavae.

Faamatalaga o le talaaga: O le tele o faaaliga i le Mataupu Faavae ma Feagaiga na faaalia ona sa fesili se tasi pe sa feagai le Au Paia ma se faafitauli po o se faigata. O le iloaina o lenei faamatalaga e mafai ona fesoasoani e te malamalama ai i le mafuaaga na faaali mai ai e le Alii mea sa Ia faia. Mo se faataitaiga, valaaulia tagata aooga e faitau le faaulutala o le vaega o le Mataupu Faavae ma Feagaiga ma sue tali i fesili nei:

• O ai e faatatau i ai lenei faaaliga?

• O le a le fesili po o le tulaga na muamua mai i lenei faaaliga?

Aotelega o faamatalaga: E mafai foi ona aoga le iloa o loo i lalo ifo o le faaulutala o le vaega i vaega taitasi o le Mataupu Faavae ma Feagaiga, o loo i ai se parakalafa e aotele ai vaega o fuaiupu. E mafai foi ona aoga lenei mea pe a taumafai e faailoa mai mataupu faavae. Mo se faataitaiga, faitau le parakalafa i lalo o le faaulutala o le vaega mo le vaega na e filifilia.

Faatasi ai ma lenei faamatalaga i le mafaufau, faitau le vaega po o se vaega o le vaega na e filifilia e saili mo upumoni o le talalelei.

Sailiga o upumoni i tusitusiga paia