Lesona 169: Suesue i Tusitusiga Paia

Taulai atu ia Iesu Keriso i Tusitusiga Paia

Suesueina o Suafa o le Faaola, Faalagiga, ma Uiga Paia

O se tasi o faamoemoega autu o tusitusiga paia o le fesoasoani lea ia i tatou e aoao e uiga i le Tama Faalelagi ma Iesu Keriso. O le tele o lo tatou aoao e uiga ia i Laua, o le tele foi lea o le tuputupu ae o lo tatou faatuatua ia i Laua. O lenei lesona ua faamoemoe e fesoasoani ia te oe e taulai atu ai i le Faaola a o suesue i tusitusiga paia, aemaise lava le Mataupu Faavae ma Feagaiga.

Gaoioiga E Ono Mafai Ona Aoao Ai

O a mea ua e vaaia?

Mafaufau e fai le gaoioiga lenei po o se tasi o au lava gaoioiga e faailoa atu ai le tomai o le suesueina o tusitusiga paia o le taulai atu i le Faaola. Ina ia faalauiloa le saunia o le tagata aoao, e mafai ona e faaali atu le lomiga nenefu o le ata mo tamaiti aoga e vaai i ai a o latou taunuu mai.

Vaai i le ata nenefu o loo i lalo ma taumafai e faamatala le mea e te manatu o loo tupu.

Ona sosoo lea ma le vaai i le ata lava lea e tasi ua manino mai.

A o suesueina e tamaiti aoga le ata o le Faaola o loo auauna atu i tagata o Amerika anamua, mafaufau e fai atu fesili e pei o nei. A o tali mai tamaiti aoga i au fesili, faailoa atu ia i latou e te faatauaina o latou malamalamaaga ma le auai.

• O a ni faamatalaga o e matauina i le taimi nei ina ua manino le ata?

• A o e tilotilo i lenei ata, o a ni ou mafaufauga po o ni lagona o i ai e uiga i le Faaola?

Mafaufau e faasoa atu faamatalaga e pei o nei e fesoasoani ai i tamaiti aoga ia malamalama atili i le faamoemoega mo le aso.

O le upu taulai e mafai ona faauigaina o le faia o se mea ia manino atili, ia avea ma totonugalemu o le fiafia, po o le vaavaai faapitoa atu i ai.

• O a nisi o auala e mafai ona tatou taumafai ai e taulai atu i le Faaola a o tatou suesue i tusitusiga paia?

• Aisea tatou te ono mananao ai e taulai atu ia te Ia?

A o e suesue i lenei lesona, saili le taitaiga mai le Agaga Paia ma vaavaai mo mafuaaga atonu o se faamanuiaga mo oe le taulai atu i le Faaola i lau suesuega o tusitusiga paia. Mafaufau loloto i auala e mafai ona e avea ai o Ia ma taulaiga o au suesuega.

Faamatala: Faailo mai suafa ma faalagiga o Iesu Keriso

O se tasi o tomai e mafai ona fesoasoani ia te oe e taulai atu ai i le Faaola o le vaavaai lea i le tele o Ona suafa ma faalagiga a o suesue i tusitusiga paia. O nei suafa ma faalagiga ua faailoa mai ai matafaioi ua tuuina mai e le Tama Faalelagi ia te Ia.

Faataitaiga

Mafaufau e faataitai le tomai lenei mo tamaiti aoga e ala i le faaaogaina o fuaitau o mau nei po o se isi o au filifiliga. E mafai foi ona e faaali atu le ata mai le amataga o le lesona po o se isi ata o le Faaola i luga o le laupapa. A o faailoa mai igoa ma faalagiga eseese i le lesona atoa, e mafai ona valaaulia tamaiti aoga e tusi mea nei faataamilo i le ata o le Faaola i luga o le laupapa ma faamatala pe aisea e taua ai le igoa po o le faalagiga ia i latou.

Faitau le Mataupu Faavae ma Feagaiga 6:21 ma vaavaai mo se igoa po o ni faalagiga se tasi pe sili atu na faaaoga e Iesu e faamatala ai o Ia lava.

• O le a se mea na e mauaina?

  O tali talafeagai i lenei fesili e mafai ona aofia ai “Iesu Keriso,” “o le Alo o le Atua,” po o le “O Au o le malamalama.” Atonu e fia iloa e tamaiti aoga o faalagiga faaPeretania “Keriso” ma le “Mesia” e sau mai le faa-Eleni ma le faaEperu o le “o lē ua faauuina.” I aso anamua, o tupu ma faitaulaga o e sa i ai tiute faapitoa e faatino sa faauuina i le suauu (tagai Taiala i Tusitusiga Paia, “Faauuina,” scriptures.ChurchofJesusChrist.org). O le mea lea, o le Faaola, o lē sa faatinoina le tiute aupito sili ona taua o mea atoa, o “le Perofeta faauuina, o le Ositaulaga, Tupu, ma le Laveai” mo fanau uma a le Atua (Taiala i Tusitusiga Paia, “Mesia,” scriptures.ChurchofJesusChrist.org).

• O le a se mea e mafai ona tatou aoaoina e uiga ia Iesu mai nei suafa po o faalagiga eseese?

• Aisea e taua ai lenei faalagiga ia te oe? O a ni auala e mafai ai e lenei malamalama e uiga ia Iesu Keriso ona fesoasoani ia te oe i le taimi nei i lou olaga?

Mo se faataitaiga, pe a tatou lagona tatou te manaomia se malamalama sili atu i o tatou olaga, e mafai ona tatou manatua o le Faaola o lena malamalama. E mafai ona Ia taialaina i tatou i lo tatou ala e toe foi atu ai i lo tatou Tama Faalelagi.

Ina ia fesoasoani ia te oe e mafaufau loloto i le taua o igoa ma faalagiga, matamata le vitio “Nombre’—What Should We Name Him?” (1:47) o loo i le ChurchofJesusChrist.org.

Faataitai

Mafaufau i manaoga o au tamaiti aoga a o e filifili pe tatau ona latou faia taitoatasi le gaoioiga lenei pe i ni vaega toalaiti. Ma le isi, e mafai e tamaiti aoga ona faasoa mai ni faalagiga na latou maua mai a latou suesuega faaletagata lava ia e taua ia i latou.

Faaauau pea ona faataitai le faailoaina o suafa ma faalagiga eseese o Iesu i le Mataupu Faavae ma Feagaiga. O nisi fuaitau e te suesueina atonu e sili atu ma le tasi le igoa po o le faalagiga. Afai e te manaomia se fesoasoani e malamalama ai i le uiga o se igoa po o se faalagiga, mafaufau i punaoa e pei o le Taiala i Tusitusiga Paia po o le Bible Dictionary, lea o loo maua i scriptures.ChurchofJesusChrist.org.

Faitau nisi po o fuaitau uma o mau nei ma faamaumau soo se igoa po o faalagiga e te mauaina i lau api talaaga mo suesuega. Mafaufau loloto i mea e mafai ona e aoaoina e uiga ia Iesu mai le suafa po o le faalagiga ma pe mafai faapefea ona Ia fesoasoani ia te oe i lou olaga.

1. Mataupu Faavae ma Feagaiga 10:70

2. Mataupu Faavae ma Feagaiga 19:1

3. Mataupu Faavae ma Feagaiga 38:22

4. Mataupu Faavae ma Feagaiga 45:3

5. Mataupu Faavae ma Feagaiga 50:44

A uma ona tuu atu i tamaiti aoga se taimi e suesue ma mafaufau loloto ai, valaaulia i latou e faasoa mai mea sa latou aoaoina ma lagonaina mai le gaoioiga. Vaavaai mo ni auala e faamamafa ai pe faapefea ona ogatusa suafa o le Faaola ma Ana taumafaiga e fesoasoani ia i tatou.

Faamatala: Vaavaai mo uiga paia o le Faaola

O le isi lea auala lea e taulai atu ai i le Faaola a o suesue i tusitusiga paia. Afai e lava se taimi i lau lesona, e mafai ona e faataitaia ma valaaulia tamaiti aoga e faataitai foi lenei tomai.

O le isi auala e taulai atu ai i le Faaola a o suesueina tusitusiga paia o le vaavaai lea mo Ona uiga paia. O se uiga auaumama o se uiga lelei po o se uiga e i ai i se tagata pe ua atiina ae, e pei o le faamaoni po o le agalelei.

Faataitaiga

Afai e manaomia, mafaufau e faataitai ma tamaiti aoga pe faapefea ona faailoa mai se uiga o le Faaola e faaaoga ai se tasi o fuaitau i le vaega e sosoo ai po o se fuaitau o lau filifiliga. O se tasi o auala e faia ai le gaoioiga lenei o le tusi lea o fuaitau mai le Mataupu Faavae ma Feagaiga i ni fasipepa eseese ma tuu i ni nofoaga eseese i le potu atoa. E mafai e tamaiti aoga ona galulue i ni vaega toalaiti e o i fasipepa taitasi ma saili le fuaitau mo se uiga paia o le Faaola.

Faataitai

Faitau nisi po o fuaitau uma nei ma vaavaai mo uiga paia o le Faaola. Filifili se uiga se tasi e taua ia te oe ma faamatala faapuupuu pe mafai faapefea e le iloaina o lena uiga i le Faaola ona fesoasoani ia te oe e alofa ma talitonu atili ai ia te Ia.

1. Mataupu Faavae ma Feagaiga 19:24

2. Mataupu Faavae ma Feagaiga 61:2

3. Mataupu Faavae ma Feagaiga 62:6

4. Mataupu Faavae ma Feagaiga 101:9

5. Mataupu Faavae ma Feagaiga 133:52

Mo se faataitaiga, atonu e faailoa mai e tamaiti aoga le naunau o Keriso e faia le finagalo o le Tama Faalelagi i le vaega 19. Afai na tusia e tamaiti aoga ni igoa ma ni faalagiga faataamilo i se ata o le Faaola i luga o le laupapa, faaamalosiau i latou e tusi ai foi uiga latou te mauaina. Vaavaai mo ni auala e faafetai atu ai i tamaiti aoga mo lo latou auai ma faamamafa atu pe aisea e tatau ai ona tatou alolofa ma talitonu i le Faaola.

Taulai atu i le Faaola i vaega uma

• E faavae i mea sa e aoaoina ma faataitaia i le aso, e mafai faapefea e le taulai atu ia Iesu Keriso ona faia se eseesega i lau suesuega o tusitusiga paia?

Mafaufau e faasoa atu lau lava molimau e faatatau i le taua o le taulai atu i le Faaola pe a suesue i tusitusiga paia. Valaaulia tamaiti aoga e taulai atu i le Faaola i vaega uma o le Mataupu Faavae ma Feagaiga.

I le vasega e sosoo ai, mafaufau e valaaulia tamaiti aoga e faasoa mai mea na latou maua i a latou suesuega faaletagata lava ia pe faaleaiga e uiga i le Faaola. Vaavaai mo avanoa i lesona i le lumanai e faamalosia ai tamaiti aoga e faataitai lenei tomai i le vasega.

Punaoa Faaopoopo

Aisea e tatau ai ona ou taulai atu i le Tama Faalelagi ma Iesu Keriso pe a ou suesue i tusitusiga paia?

Na aoao mai Elder D. Todd Christoffferson o le Korama a Aposetolo e Toasefululua:

I le taunuuga, o le faamoemoega tutotonu o tusitusiga paia uma o le faatumuina lea o ō tatou agaga i le faatuatua i le Atua le Tama, ma Lona Alo o Iesu Keriso—faatuatua o loo soifua i La’ua; faatuatua i le fuafuaga a le Tama mo lo tatou tino ola pea ma le ola e faavavau; faatuatua i le Togiola ma le Toetu o Iesu Keriso, lea e galueaiina lenei fuafuaga o le fiafia, faatuatua e avea le talalelei a Iesu Keriso ma o tatou olaga, ma le faatuatua e oo ina iloa “le Atua moni e toatasi, atoa ma Le [ua Ia] auina mai, o Iesu Keriso lea” (Ioane 17:3). (D. Todd Christofferson, “O Le Faamanuiaga o Tusitusiga Paia,” Liahona, Me 2010, 34)

E mafai faapefea e le suesueina o suafa ma faalagiga eseese o Iesu Keriso ona faamanuiaina ai lo’u olaga?

Sa faasoa mai Peresitene Russell M. Nelson mea nei i se faigalotu i le lalolagi atoa mo talavou matutua:

Suesue i mea uma e uiga ia Iesu Keriso e ala lea i le saili ma le agaga tatalo ma le filiga ia malamalama po o a uiga o Ona faalagiga ma suafa taitasi eseese mo oe lava ia. Mo se faataitaiga, o Ia moni o lou Fautua i le Tama. O le a Ia tu i lou itu. O le a Ia tu atu mo oe. O le a Ia fetalai atu mo oe , i taimi uma, pe a e filifili ia avea atili e faapei o Ia. (Russell M. Nelson, “Prophets, Leadership, and Divine Law” [faigalotu i le lalolagi atoa mo talavou matutua, 8 Ian., 2017], broadcasts.ChurchofJesusChrist.org

Na aoao mai Elder Jonathan S. Schmitt o le Fitugafulu:

O se tasi o auala e mafai ona iloa atili ai Iesu o le aoaoina lea o Ona mau suafa. … O suafa o Iesu o faalagiga e fesoasoani tatou te malamalama ai i Lana misiona, faamoemoega, amioga, ma uiga auaumama. A oo ina tatou iloa le mau suafa o Iesu, o le a sili ona tatou malamalama i Lana misiona paia ma Ana amioga lē faapito’au. O le iloa o ona mau suafa e musuia ai foi i tatou ia avea atili e faapei o Ia—e atia’e uiga faaKeriso ia e aumaia ai le olioli ma le faamoemoe i o tatou olaga.

I ni nai tausaga ua mavae, sa suesue ai e Peresitene Russell M. Nelson ia mau uma e faatatau ia Iesu Keriso i le Taiala o Autu. Ona ia valaaulia lea o talavou matutua e suesue mau lava nei. …

I le mulimuli ai i le valaaulia a Peresitene Nelson, sa amata ai ona ou atia’e la’u lava lisi o le mau suafa o Iesu. O la’u lava lisi i le taimi nei ua silia ma le 300 igoa, ma ou te talitonu e tele atu isi ou te le’i mauaina.

…Ou te valaaulia outou e atia’e sa oe lava lisi pe a oo ina e iloa Iesu i Ona mau suafa. O le faia o lena mea, o le a e iloa ai e tele isi suafa—faatasi ai ma o latou uiga faaKeriso e o faatasi ai—o le a e manao e tauave i ou lava luga o se soo o le feagaiga a Iesu. (Jonathan S. Schmitt, “Ina Ia Latou Iloa Oe,“ Liahona, Nov. 2022, 104–5)

Gaoioiga Faaopoopo e Aoao Ai

Igoa faaopoopo, faalagiga, ma uiga paia o Iesu Keriso

Atonu e mananao tamaiti aoga e faaauau pea ona suesue i suafa ma faalagiga eseese o le Faaola ina ua uma le gaoioiga o loo otooto atu i le lesona. E mafai ona e valaaulia tamaiti aoga e faaauau pea ona sailiili i le Mataupu Faavae ma Feagaiga pe faaali atu ia i latou ni punaoa faaopoopo e pei o le Taiala i Autu po o le “50 Igoa ma Faalagiga o Iesu Keriso,” lea o loo maua i le ComeuntoChrist.org.

Mafaufau foi e filifili se mau mai le poloka faitau o le Sau, Mulimuli Mai ia te A’u i lenei vaiaso ma valaaulia tamaiti aoga e suesue le fuaitau ma vaavaai mo igoa, faalagiga, po o uiga paia o Iesu Keriso. Fesoasoani i tamaiti aoga ia latou mauaina pe a manaomia. E mafai ona e valaaulia tamaiti aoga e tusi pe faapefea ona latou faaumaina faamatalaga taitasi nei e faavae i a latou suesuega:

• O se igoa, faalagiga, po o se uiga auaumama o Iesu Keriso ou te vaai i ai i lenei fuaitau o le …

• O le iloaina o lenei mea e uiga i le Faaola e fesoasoani ia te au ona …

Mauaina o le Faaola i vaega uma

Afai e mafai ona aoga i tamaiti aoga le vaai i se faataitaiga o se vaega e foliga mai e le taulai sa’o atu i le Faaola, mafaufau e faaali atu ia i latou se vaega e pei o le Mataupu Faavae ma Feagaiga 89, lea na faaali mai ai e le Alii le Upu o le Poto. O lenei faaaliga na faatonuina ai le Au Paia e aloese mai ni mea patino e pei o le ava malosi po o le tapaa ma aai i isi mea maloloina o le lalolagi “ma le faautauta ma le faafetai” (Mataupu Faavae ma Feagaiga 89:11; tagai foi Mataupu Faavae ma Feagaiga 89:4–9, 11–17; Aoao Atu i le Ala a le Faaola [2022], 6). E mafai e tamaiti aoga ona suesue i le folafolaga a le Alii mo le ola ai i le Upu o le Poto i le Mataupu Faavae ma Feagaiga 89:18–21 ma valaaulia e mafaufau loloto i mea ua latou aoaoina e uiga i le Alii. O le faia o fesili e pei o nei e mafai ona fesoasoani i tamaiti aoga e mafaufau loloto atili ai:

• Aisea e te manatu ai o le a saunia e le Alii se tulafono o le soifua maloloina mo Lona nuu? O le a se mea o aoao atu e lenei mea ia te oe e uiga ia te Ia?

• O le a se mea e mafai ona tatou aoaoina e uiga i le Alii mai Ana folafolaga? E mafai faapefea e le faatinoina o le faatuatua i Lana fautuaga ona faamanuiaina ai o tatou olaga?