208-р хичээл: Сүмийн удирдагчдын зааврууд

Ерөнхий чуулганд бэлтгэх

Ерөнхий чуулганаар дамжуулан Аврагчийн үгсийг сонсох

Ерөнхий чуулганд зорилготойгоор бэлдэж, оролцох нь бидэнд хувийн илчлэлт хүлээн авах боломжийг олгодог. Их Эзэн сонгосон удирдагчдаараа дамжуулан Ерөнхий чуулган дээр сүнслэг өдөөлт, удирдамжийн захиаснуудыг өгдөг. Энэ хичээл нь Ерөнхий чуулган дээр Аврагчаас хувийн захиас сонсохоор бэлдэхэд суралцагчдад тусална.

Боломжит суралцах үйл ажиллагаа

Арга хэмжээнд бэлтгэх

Онцгой баяр, спортын тэмцээн, амралт зугаалга, өөр нэгэн үйл явдал зэрэг оролцох дуртай арга хэмжээнийхээ талаар бодоход суралцагчдыг урь. Эдгээр арга хэмжээнд хэрхэн оролцсон эсвэл оролцохдоо хэрхэн бэлдсэн талаар хуваалцахыг тэднээс хүс. Арга хэмжээнд бэлтгэх нь тухайн арга хэмжээний үеэр илүү утга учир бүхий туршлага олж авахад бидэнд хэрхэн тусалдгийг ярилц. Ярилцсаныхаа дараа Ерөнхий чуулган үзэж буй гэр бүлийн зургийг үзүүл.

• Та болон танай гэр бүл Ерөнхий чуулганд бэлдэж, оролцохдоо юу хийдэг вэ?

Ерөнхий чуулганы зорилго

1831 оны 2-р сард Иосеф Смит, Сидней Ригдон хоёр тухайн жилийн 6-р сард болсон чуулганд ахлагчдыг цуглуулахыг зааварласан илчлэлтийг Их Эзэнээс хүлээн авчээ.

Сургаал ба Гэрээнүүд 44:2-ыг уншаад, Их Эзэн энэ чуулган дээр юу хийхийг амласан талаар олж мэд.

• Энэ шүлэг дэх Их Эзэний амлалт бидэнд яагаад Ерөнхий чуулган болдгийг ойлгоход хэрхэн тусалж болох вэ?

Ерөнхийлөгч Рассэлл М.Нэлсоны дараах мэдэгдлийг уншаад, Ерөнхий чуулганы зорилгыг олж мэд.

Энэ болон бүх цаг үеийн Ерөнхий чуулганы зорилго бол бидэнд Түүнийг сонсоход туслах явдал юм. (Рассэлл М.Нэлсон, “Нээлтийн захиас,” 2020 оны 4-р сарын Ерөнхий чуулган, 4)

Суралцагчид ерөнхийлөгч Нэлсоны мэдэгдлийг Сургаал ба Гэрээнүүд 44:2-ын дэргэд судартаа бичиж эсвэл холбоосыг нь холбож болно.

Ерөнхий чуулганы зорилго бол Есүс Христийг сонсоход бидэнд туслах явдал юм гэсэн үнэнийг онцол.

• Есүс Христ танд юу хэлэхийг хүсэж байгааг мэдэх нь яагаад чухал вэ?

• Ерөнхий чуулган дээр Аврагчийг сонсож болох ямар ямар арга замууд байдаг вэ?

Ерөнхий чуулганд бэлтгэж буйгаа эргэцүүлэн бодоход нь суралцагчдад туслахын тулд дараах өөрийгөө үнэлэх асуултуудыг самбарт байрлуулахыг бод. Суралцагчид уг асуултуудыг тунгаан бодож, хариултаа судлах тэмдэглэлдээ бичиж болно.

• Ерөнхий чуулган дээрх захиаснуудаар дамжуулан өөртэй чинь ярих Аврагчийн үгийг сонсоход та хэр сайн бэлддэг вэ?

• Та Ерөнхий чуулганаас юу хүлээн авах хэрэгтэй эсвэл хүлээн авна гэж найдаж байна вэ?

Ерөнхий чуулганд бэлтгэх

Тараах материалын зорилго нь суралцагчдад Ерөнхий чуулганд бэлтгэх өөр өөр арга замуудыг олоход туслах явдал юм. Суралцагчид жижиг бүлгүүд болж, хоёр хоёроороо эсвэл бие даан гүйцэтгэж болно.

Ерөнхий чуулганд бэлтгэх

Есүс Христ нифайчууд дээр айлчлах үедээ Өөрийнх нь захиасыг сонсож, ойлгож болохын тулд оюун санаагаа бэлтгэхэд тэднийг урьсан (3 Нифай 17:3-ыг үзнэ үү). Та мөн ийн үйлдвэл Ерөнхий чуулганы туршлага тань ямар байхыг төсөөл.

1. Дараах эх сурвалжийг судлаад, Ерөнхий чуулганаар Их Эзэний захиасыг хүлээн авахын тулд өөрийгөө бэлтгэх арга замуудыг олж мэд. Та онцгой санагдсан үг, хэллэгүүдийг тэмдэглэж болно.

   Мозая 2:9; Сургаал ба Гэрээнүүд 88:63

   Ерөнхийлөгч Рассэлл М.Нэлсон ийн заасан.

   

   Өнөөдөр мөн маргааш та бүхэн энэ индэр дээрээс үргэлжлүүлэн үнэнийг сонсох болно. Анхаарлыг тань татаж буй, оюунд тань ирж байгаа, зүрх сэтгэлд тань үлдэж буй бодлоо бичиж тэмдэглэж аваарай. Сонссон зүйл тань үнэн эсэхийг баталж өгөхийг Их Эзэнээс залбирч асуу. (Рассэлл М.Нэлсон, “Юу үнэн бэ?,” Лиахона, 2022 оны 11-р сар, 30)

   Тэргүүн зөвлөлийн ерөнхийлөгч Хэнри Б.Айринг ийн заасан.

   

   Энэ чуулган дээр Бурханы үйлчлэгчид та нарт хандан үг хэлнэ гэдгийг би мэднэ. Бурхан Өөрийн хүүхдүүдэд захиасаа өгүүлэхээр тэднийг дуудсан юм. Их Эзэн тэдний талаар: “Их Эзэн миний бие ярьснаа би ярилаа, мөн би өөрийгөө зөвтгөх нь үгүй; мөн тэнгэр хийгээд газар үгүй болсон ч, миний үг алга болох нь үгүй, харин миний өөрийн дуу хоолой байна уу, эсвэл миний үйлчлэгчдийн дуу хоолой байна уу, энэ нь яг адил, бүгд биелэгдэх болно” [Сургаал ба Гэрээнүүд 1:38] гэж хэлжээ.

   Та нар сурч мэдэх, наманчлах зорилготойгоор сонсож мөн явж, Түүний хүссэн бүхнийг биелүүлснээр Түүнд итгэх итгэлээ харуулдаг. Хэрэв та нар энэ чуулганы илтгэл, дуулал, залбирал болгоныг анхааралтай сонсож, Бурханд итгэх юм бол Түүний хэлэх гэсэн үгийг олж сонсоно. Дараа нь явж, Түүний хий гэснийг хийж чадвал та нарын Түүнд итгэх итгэл өсөж, Түүнийг та нарт итгэж найддаг талаар өөрсдөө олж мэдэн талархах болно. (Хэнри Б.Айринг, “Бурханд итгэ, тэгээд явж, ажилла,” 2010 оны 10-р сарын Ерөнхий чуулган, 75–76)

   Тэргүүн зөвлөлийн ерөнхийлөгч асан Дийтр Ф.Угдорф ийн заажээ.

   

   Ерөнхий чуулганд бэлтгэхдээ хариулт авах хэрэгтэй байгаа асуултуудынхаа талаар тунгаан бодоход би уриалж байна. Жишээ нь: Магадгүй та нар тулгарсан саад бэрхшээлтэйгээ холбоотой Их Эзэний заавар, зөвлөгөөг хүсэж болох юм.

   Та нарын онцгой залбирлын хариулт тодорхой нэг хэлсэн үгээс эсвэл нэг өгүүлбэрээс ч шууд ирж болно. Бусад үед хариултууд ямар ч хамааралгүй мэт санагдах үг, өгүүлбэр эсвэл дуунаас ирж болно. Амьдрал дахь адислалууддаа талархсан талархлаар дүүрэн зүрх сэтгэл болон зөвлөгөө өгсөн үгсийг сонсож дагах чин сэтгэлийн хүсэл эрмэлзэл нь хувийн илчлэл авах арга замд бэлтгэх болно. (Дийтр Ф.Угдорф, “Ерөнхий чуулган—Энгийн адислал гэж байдаггүй,” Тэргүүн зөвлөлийн захиас, 2010 оны 9-р сар)

2. Сурч мэдсэн зүйлээ ашиглан Ерөнхий чуулганаар Их Эзэний дуу хоолойг сонсоход бэлтгэх арга замуудыг жагсааж бич.

3. Ерөнхий чуулганаар Их Эзэний дуу хоолойг сонсоход бэлтгэх бусад арга замыг жагсааж бич.

Ерөнхий чуулганд зориулсан миний бэлтгэл

Дараах асуултууд нь тараах материал дээрх ахлагч Угдорфын мэдэгдлийн зөвлөмжийг хэрэгжүүлэхэд суралцагчдад тусална. Суралцагчид гэртээ авч яван сануулж болох боломжтой байдлаар уг асуултуудад судлах тэмдэглэлдээ, цаасан дээр эсвэл тэмдэглэх карт дээр хариулж болно.

• Надад ямар асуулт байна вэ? Надад тулгарч буй сорилт бэрхшээлүүдэд ямар ямар удирдамж, заавар хэрэгтэй вэ?

• Ерөнхий чуулганаар надад зориулсан Их Эзэний зааврыг сонсоход бэлтгэхийн тулд би ямар тодорхой зүйл хийх вэ? (Тараах материал дээр жагсааж бичсэн нэг эсвэл хоёр арга замыг сонго.)

Суралцагчдад Ерөнхий чуулганы туршлагаа тайлагнахад тусална уу.

Ерөнхий чуулганы дараа, Ерөнхий чуулганд бэлтгэсэн байдал нь тэдний туршлагад хэрхэн нөлөөлснийг хуваалцахыг суралцагчдаас хүс. Зарим суралцагч чуулганд оролцоогүй байж магад. Та хэлсэн үгсийн хураангуйг давтах цагийг эдгээр суралцагчид гаргаж өг.

• Бэлтгэхийн тулд та юу хийсэн бэ? Энэ нь хэрхэн тус болсон бэ?

• Таны бэлтгэл Аврагчийн дуу хоолойг сонсож, Түүнээс заавар хүлээн авахад танд хэрхэн тусалсан бэ?

Суралцагчид мөн Ерөнхий чуулганы үеэр юу мэдэрсэн, сонссон талаар гэрчлэл, мэдрэмжээ хуваалцаж болно.

Нэмэлт эх сурвалж

Ерөнхий чуулганы захиаснууд юунд төвлөрч байна вэ?

Ерөнхийлөгч Рассэлл М.Нэлсон ийн заасан.

Ерөнхий эрх мэдэлтнүүдийн болон Сүмийн ерөнхий албан тушаалтнуудын өгөх захиас бидний Аврагч, Есүс Христэд болон Түүний нигүүлсэл, хязгааргүй гэтэлгэгч хүчинд төвлөрөх болно. Дэлхийн түүхийн цаг үеүдээс өнөө үед л бидний Аврагчийн тухай мэдлэг хүмүүний бодгаль бүрд илүү хамаатай, илүү зайлшгүй хэрэгтэй байна. Бид бүгдээрээ Есүс Христийг болон Түүний сургаалыг дагахыг сонговол, дэлхий даяарх хохирол сүйрэл дагуулдаг сөргөлдөөнүүд, хувь хүний амьдрал дахь асуудлууд ямар хурдан шийдэгдэж болохыг төсөөлөөд үз дээ. (Рассэлл М.Нэлсон, “Цэвэр үнэн, цэвэр сургаал, цэвэр илчлэлт,” Лиахона, 2021 оны 11-р сар, 6)

Ерөнхий чуулганы үеэр тэмдэглэл хөтлөх нэг арга зам юу вэ?

Арван хоёр төлөөлөгчийн чуулгын ахлагч Робэрт Д.Хэйлс (1932–2017) ийн заасан.

Би чуулганы үеэр тэмдэглэл хөтлөхдөө, үг хэлэгчийн юу хэлж буйг үргэлж бичих бус харин Сүнснээс надад өгч буй хувийн заавруудыг бичиж авдаг.

Хэлэгдэж буй зүйлс нь бидний сонсож, мэдэрч байгаа зүйлтэй адил чухал байдаггүй. (Робэрт Д.Хэйлс, “Ерөнхий чуулган: Итгэл ба гэрчлэлийг хүчирхэгжүүлэх нь,” Ерөнхий чуулган, 2013 оны 10-р сар, 5–8)

Би яагаад Ерөнхий чуулганд оролцох ёстой вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Би Есүс бол Христ гэдгийг, Тэр энэ ариун нандин ажлын албыг удирддаг бөгөөд Ерөнхий чуулган бол Их Эзэний Өөрийн Сүмд болон бидэнд удирдамж чиглүүлэг өгдөг … маш чухал үеүдийн нэг юм гэдгийг гэрчилж байна.

Ерөнхий чуулган дээр хэлэгдсэн үгс бол ирэх саруудад анхаараасай гэж Их Эзэний биднээс хүссэн зүйлс юм. (Нийл Л.Андэрсэн, “Их Эзэний дуу хоолой,” Ерөнхий чуулган, 2017 оны 10-р сар, 126–131)

Нэмэлт суралцах үйл ажиллагаа

Хичээлийг эхлүүлэх өөр хувилбар

Хичээлийг эхлүүлэх өөр нэг хувилбар болгож, суралцагчдаас гар утсан дээрх үйлдлийн системийг байнга шинэчлэх нь яагаад чухал болохыг асуугаарай. Энэ нь Ерөнхий чуулганд оролцохыг сонгохтой хэрхэн холбогдох вэ?

Сүмийн удирдагчдын олон нийтийн медиа хэрэгслийн аккаунтууд

Ерөнхий чуулган болохоос хэдэн өдөр, хэдэн долоо хоногийн өмнө Сүмийн удирдагчид олон нийтийн медиа хэрэгслийн аккаунтууд дээрээ ихэвчлэн Ерөнхий чуулганы тухай нийтэлдэг. Сүүлийн Ерөнхий чуулганаас хойших хэдэн долоо хоногийн дотор Сүмийн удирдагчдын олон нийтийн медиа хэрэгслээр нийтэлсэн зарим нийтлэлийг үзэхэд урь. Зарим жишээг үзүүлэхийг бодоорой. Ерөнхий чуулганд оролцохоор бэлтгэхэд туслах зөвлөгөөг хайж олоход суралцагчдыг урь. Та Сүмийн удирдагчдын амласан аливаа адислалуудын талаар ярилцаж болно.

Ерөнхий чуулганд бэлтгэх ахлагч Нийл Л.Андэрсэны урилга

2020 оны 10-р сарын Ерөнхий чуулганы өмнөхөн ахлагч Нийл Л.Андэрсэн Facebook дээр нэгэн видеог нийтэлжээ. Видеон дээр тэрээр Ерөнхий чуулганд хэрхэн бэлтгэх гурван санааг өгсөн. Видеог бүтнээр нь үзүүлэхийг бод. “Invitation to Prepare for General Conference” (Facebook, Sept. 30, 2020, facebook.com/neill.andersen; video, 3:01), эсвэл зөвхөн түүний санал болгож буй гурван санааг үзүүлж болно (цагийн код 1:27-оос 2:51 хүртэл). Түүний санаанууд Их Эзэний дуу хоолойг сонсохоор бэлтгэхэд хэрхэн тус болох талаар бодоход суралцагчдыг урь.

Өсвөр үеийнхний бат бөх байдлын төлөө сэтгүүлийг судал

Өсвөр үеийнхний бат бөх байдлын төлөө сэтгүүлийн 3 ба 9-р сарын дугааруудад Ерөнхий чуулганд оролцохдоо татаж аван, хэвлэж мөн ашиглах боломжтой “Ерөнхий чуулганы тэмдэглэл” хэсэг ихэвчлэн байдаг. Суралцагчдад харуулах “Ерөнхий чуулганы тэмдэглэл” дугаарын сүүлийн хэдэн хувийг авчир эсвэл Gospel Library аппликэйшн дээр үүнийг олоход тэднийг урамшуул. Ерөнхий чуулганд бэлтгэхэд нь суралцагчдад туслах “Ерөнхий чуулганы тэмдэглэл”-ээс олж мэдсэн зарим санааг хуваалцахыг тэднээс хүсэж болно.

Үг хэлэгчид Ерөнхий чуулганд хэрхэн бэлддэг вэ?

“Их Эзэний дуу хоолой” видеог цагийн код 3:07-оос 5:17 хүртэл үзүүлж болох юм. Ахлагч Нийл Л.Андэрсэн Ерөнхий чуулган дээр үг хэлэгчдийн захиасаа бэлтгэхэд гаргадаг хүчин чармайлтын тухай ярьсан. Үг хэлэгчид үгээ хэрхэн бэлддэг тухай мэдсэнээр бид үүнээс юу сурч болохыг ярилцахад суралцагчдыг урь. Дараах асуулт нь уг ярилцлагад тустай байж болох юм.

• Үг хэлэгчдийн хичээл зүтгэлийн талаар олж мэдэх нь таныг илүү их бэлтгэлтэй байхад хэрхэн урам өгч болох вэ?

Ерөнхий чуулганы давтах үйл ажиллагаа

Ерөнхий чуулган дээр сурч мэдсэн зүйлээ эргэж харах боломжийг суралцагчдад гаргаж өг. Та дараахтай адил асуултуудыг самбар дээр бичиж болно. Үүнд: Та юунаас болж инээв? Та аль үгийг дахин судлахаар догдолж байна вэ? Таны амьдралд тус болох юуг та олж мэдсэн бэ? Та Аврагчийн тухай юу олж мэдсэн бэ?

Та уг асуултуудад өгсөн хариултаа самбарт бичихэд суралцагчдыг урьж болно. Та Ерөнхий чуулганаас олж авсан өөрийн туршлагаас хуваалцах талаар бодож үз. Суралцагчид самбар дээрх зарим асуултыг сонгоод, ангийнхныгаа туршлагаа арай дэлгэрүүлж ярихад урьж болно.