“211-р хичээл—‘Мөнхийн ач холбогдолтой сонголтууд’: Сүмийн удирдагчдын сургаалыг судлах,” Сургаал ба Гэрээний семинарын багшийн гарын авлага (2025)
“Мөнхийн ач холбогдолтой сонголтууд,” Сургаал ба Гэрээний семинарын багшийн гарын авлага
211-р хичээл—Сүмийн удирдагчдын сургаал
“Мөнхийн ач холбогдолтой сонголтууд”
Сүмийн удирдагчдын сургаалыг судлах
Жилийн туршид семинараар Есүс Христийн Сүмийн хожмын үеийн сүнслэгээр өдөөгдсөн удирдагчдын сургаалаас судлах олон боломж суралцагчдад олдоно. Энэ хичээл нь тэдгээр захиасыг судлах үед нь сурагчдыг удирдан чиглүүлэхийн тулд “Загвар: Сүмийн удирдагчдын сургаалууд” гарчигтай материалыг багш нар хэрхэн ашиглаж болох жишээг өгнө. Энэ хичээлд ерөнхийлөгч Рассэлл М.Нэлсоны хэлсэн “Мөнхийн ач холбогдолтой сонголтууд” үгийг жишээ болгон ашигласан ([Залуучуудад зориулсан дэлхий даяарх онцгой цугларалт, 2022 оны 5-р сарын 15], broadcasts.ChurchofJesusChrist.org). Энэ хичээл мөнх амьдралд бэлтгэхэд нь туслах зарчмуудын талаарх суралцагчдын ойлголтыг гүнзгийрүүлнэ.
Боломжит суралцах үйл ажиллагаа
Тайлбар: Энэ хичээл нь Сүмийн удирдагчдын захиасыг судлахад нь суралцагчдад туслахын тулд“Загвар: Сүмийн удирдагчдын сургаалууд” гарчигтай материалыг багш нар хэрхэн ашиглаж болох жишээг харуулна. Та энэ хичээлийн санаануудыг тохируулан өөрчилж, загварын өөр өөр санааг нийлүүлэн ашиглах юм уу суралцагчдын тань хэрэгцээ шаардлагад илүү сайн нийцэх өөрийн санааг ашиглаж болно.
Хичээлийг эхлүүлэх
Суралцагчдын сонирхлыг татаж, оюун ухаан, зүрх сэтгэлийг нь суралцах туршлагад бэлтгэхэд туслах замаар хичээлийг эхлүүл. Ерөнхийлөгч Нэлсоны хэлсэн “Мөнхийн ач холбогдолтой сонголтууд” гэх үгийн мэдэгдэл эсвэл ойлголтыг ашиглах талаар бодож үзээрэй. Дараах нь хичээлийг хэрхэн эхлүүлэх нэг жишээ юм.
Дараах мэдэгдлийг самбарт бичээд, суралцагчдыг ирээдүйд энэ амьдралд болон мөнх байдалд ямар байх талаар бодож үзэхэд суралцагчдыг урь.
Залуучуудад хандан хэлсэн үгэндээ ерөнхийлөгч Рассэлл М.Нэлсон дараах зүйлийг илэрхийлсэн.
Би та бүхэнтэй ирээдүйн чинь талаар ярилцмаар байна. (Рассэлл М.Нэлсон, “Мөнхийн ач холбогдолтой сонголтууд,” [Залуучуудад зориулсан дэлхий даяарх онцгой цугларалт, 2022 оны 5-р сарын 15], broadcasts.ChurchofJesusChrist.org)
Судлах тэмдэглэлдээ дараах асуултуудад хариулж бич.
-
Ирээдүйд энэ амьдрал болон мөнх байдалд ямар байх талаар бодоход танд ямар бодол, мэдрэмж төрж байна вэ?
-
Хэрэв танд Бурханы бошиглогчтой ирээдүйнхээ талаар ярилцах боломж олдвол түүнээс юу гэж асуух байсан бэ?
Судлах тэмдэглэлдээ бичсэн зүйлээ хуваалцахад хэдэн суралцагчийг урих талаар бодож үзээрэй. Та мөн ирээдүйнхээ талаар өөрт байгаа зарим асуултаа самбарт бичихэд суралцагчдыг урьж болно. Эдгээр асуулт нь захиасыг судлахаар бэлтгэхэд нь суралцагчдад тусалж болох юм.
Захиасыг судлах
Суралцагчдыг судлах үеэр Тэнгэрлэг Эцэг, Есүс Христ хоёрын талаарх мэдлэгээ нэмэгдүүлж, гэрчлэлээ хүчирхэгжүүлэхэд анхаарлаа төвлөрүүлэхэд тэднийг урамшуул. Судлах явцдаа Ариун Сүнснээс ирэх бодол, мэдрэмжээг бичиж тэмдэглэхэд суралцагчдыг урь.
Хичээлийн энэ хэсэгт “Загвар: Сүмийн удирдагчдын сургаалууд” гарчигтай материалын “Захиасыг судлах” хэсгийн “Хайж олох” санааг ашиглана. Энэ хэсэг нь хэлсэн үгийг судлах дээр төвлөрөхөд нь суралцагчдад туслах зорилготой.
Хэрэв суралцагчид ерөнхийлөгч Нэлсоны хэлсэн “Мөнхийн ач холбогдолтой сонголтууд” гэх үгийг харах боломжгүй бол та түүний хэлсэн үгийн зарим хэсэг орсон гурван тараах материалыг өгч болно. Та ангийнхныг гурван бүлэгт хуваагаад, бүлэг тус бүрд нэг тараах материалыг оноож өгч, судлуулж болно. Эсвэл та хэлсэн үгийн хувийг бүтнээр нь өгч, суралцагчид жижиг бүлгээр үгийг судалж болно. Үйл ажиллагааг гүйцэтгэхдээ доорх зааврыг дагахад суралцагчдыг урь.
Ерөнхийлөгч Нэлсоны хэлсэн “Мөнхийн ач холбогдолтой сонголтууд” гэх үгийг судлахдаа ирээдүйд дэлхий дээрх болон Тэнгэрлэг Эцэг, Есүс Христ хоёртой хамт байх мөнх амьдралд нь бэлтгэхэд туслах үнэнүүдийг ол. Та мөн судлах тэмдэглэл эсвэл самбарт бичсэн танй ирээдүйтэй холбоотой асуултад хариулж болох сургаалуудыг хайж болно.
Мөнхийн ач холбогдолтой сонголтууд, 1-р хэсэг
Энэ үдшийн миний зорилго бол энэ амьдрал нь та нарын хувьд ямар амьдралаар мөнхөд амьдрахаа шийдэх цаг мөч гэдгийг ойлгож байгаа эсэхэд санаа тавих явдал юм. Энэ амьдрал бол та нарын “Бурхантай уулзахаар бэлтгэх” цаг үе юм [Алма 12:24; 34:32-ыг үзнэ үү]. …
Та нарын одоо сонгох зөв шударга сонголт бүр мөнх бус амьдралд ихээхэн ашиг тус авчрах болно. Түүнчлэн мөнх бус амьдралдаа хийсэн зөв шударга сонголт бүр чинь төсөөлшгүй мөнхийн ашиг тусыг өгөх болно. Хэрэв та нар Бурхантай гэрээ байгуулахыг сонгож, тэдгээр гэрээндээ итгэлтэй байвал, та нарын “[тэргүүнд] алдар суу үүрд мөн үргэлж мөнхөд нэмэгдэх болно” [Абрахам 3:26]. …
Дайсан чамайг маргаашийн тухай, тэр дундаа мөнх амьдралын талаар бодуулахыг хүсдэггүй нь мэдээж. Гэсэн ч мөнх бус амьдралын сорилт бэрхшээл, боломжуудын талаар мэдлэггүй, гэнэн байж болохгүй. Тиймээс та нар ирээдүйн аялалдаа бэлтгэхэд туслах гурван суурь үнэнийг ойлгох хэрэгтэй. …
Нэгдүгээрт: Өөрсдийгөө хэн болох талаарх үнэнийг мэдэж ав. Энэ орой Их Эзэн та нарт хандан шууд ярьж байсан бол Түүний хийх эхний зүйл нь та нарын жинхэнэ мөн чанарыг ойлгуулах явдал байх байсан. Хайрт найзууд минь, та нар бол Бурханы хүүхэд гэдэг нь чухамхүү үнэн зүйл юм шүү. Та нар “Би Бурханы хүүхэд” [Дуулал, ду. 301] дууллын үгийг сурсан үеэсээ л энэ үнэнийг дуулсаар ирсэн. Харин энэ мөнхийн үнэн та нарын зүрхэнд сийлэгдсэн үү? Уруу таталтыг даван туулахад энэ үнэн та нарт тусалсан уу?
Та нар энэ үнэнийг тэнгэрлэг үнэн гэхээсээ илүүтэй уриа лоозон мэт хүлээн авсан байх вий гэж би эмээж байна. Тиймээс та нар өөрсдийгөө хэн гэж бодох нь та нарын цаашдын шийдвэр бүрд нөлөөлөх болно. …
…Та хэн бэ?
Юуны түрүүнд та бол Бурханы хүүхэд.
Хоёрдугаарт: Сүмийн гишүүний хувьд та бол гэрээний хүүхэд. Гуравдугаарт: Та бол Есүс Христийн шавь юм.
Өнөө орой би та нараас хамгийн чухал, өөрчлөгдөшгүй энэ гурван таних тэмдгийг өөр ямар ч тэмдгээр орлуулахгүй байхыг гуйж байна. Хэрэв орлуулах аваас та нарын өсөлт хөгжил удааширч, мөнхийн өсөлт хөгжлөөс ангид байх нэгэн хэвийн нөхцөл байдалд та нар орох болно. …
Мэдээж, та нарын хувьд маш чухалд тооцогдох олон таних тэмдэг бий. Намайг буруугаар бүү ойлгоорой. Би бусад ялгарах шинж тэмдэг, загвар шийдлийг ач холбогдолгүй гэж хэлээгүй. Би зөвхөн өөр ямар ч шинж тэмдэг “Бурханы хүүхэд,” “гэрээний хүүхэд,” “Есүс Христийн шавь” гэсэн эдгээр гурван өөрчлөгдөшгүй загварын урдуур орох, орлох, үгүй болгох ёсгүй гэж хэлж байгаа юм.
Эдгээр үндсэн гурван загвартай нийцэхгүй аливаа онцлог шинж эцэстээ та нарын урмыг хугалах болно. Бусад таних тэмдэг яваандаа та нарын урмыг хугалдаг болох ба тэдгээр нь та нарыг Бурханы селестиел хаант улсад мөнх амьдрал өөд чиглүүлэх хүч чадалгүй юм. …
Үүнийг мартаж болохгүй. Та нарт тэнгэрлэг чадавх бий. Шаргуу эрэл хайгуулын үр дүнд Бурхан та нарт хэн болж чадахыг чинь зэрвэс харуулах болно. (Рассэлл М.Нэлсон, “Мөнхийн ач холбогдолтой сонголтууд” [Залуучуудад зориулсан дэлхий даяарх онцгой цугларалт, 2022 оны 5-р сарын 15], broadcasts.ChurchofJesusChrist.org)
Мөнхийн ач холбогдолтой сонголтууд, 2-р хэсэг
Хоёрдугаарт: Тэнгэрлэг Эцэг, Түүний Хүү хоёрын та нарт санал болгосон үнэнийг мэдэж ав.
Товчхондоо, Тэд та нарт бүхнийг санал болгосон.
Тэнгэрлэг Эцэгийн хүүхдүүддээ зориулсан авралын төлөвлөгөө нь бидэнд Түүний амьдарч буй газарт Түүнтэй адил амьдарч, эцэстээ Түүнтэй илүү адилхан болох боломжийг олгоно. “Христийн хамтран залгамжлагчид” [Ром 8:17] болох бидэнд байгаа чадавх зэрэг хамгийн баялаг мөнхийн адислалуудыг Түүний төлөвлөгөө бидэнд боломжтой болгодог.
Бурхан бүхнийг мэддэг, бүхнийг хардаг. Хэн ч хэзээ ч та нарыг Түүн шиг мэддэггүй эсвэл та нарт анхаарал тавьдаггүй. Хэн ч хэзээ ч та нарт Түүн шиг ойр байдаггүй. Тэр та нар луу Ариун Сүнсийг болон тэнгэр элч нараа илгээн, та нарыг харж хандаж болохын тулд, Түүнд зүрх сэтгэлээ уудалж мөн итгэж найдаж болно. Тэр цорын Ганц Хүүгээ та нарын Аврагч, Гэтэлгэгч байлгахаар илгээж, үхүүлэхээр илгээхдээ Өөрийн бүхий л хайрыг харуулсан юм.
Их Эзэн Есүс Христ Цагаатгалаараа дамжуулан дэлхийг ялсан [Иохан 16:33; Сургаал ба Гэрээ 50:41-ийг үзнэ үү]. Тиймийн тул, Тэр “[чамайг] зөв шударга бус бүхнээс цэвэрлэж мөн аврах чадалтай” [Алма 7:14]. Тэр та нарыг хамгийн хүнд нөхцөл байдлуудаас чинь Өөрийн арга замаар, Өөрийн цаг хугацаанд гаргах болно. Та нарыг Түүнд итгэлтэйгээр ирэх үед Тэр та нарыг чиглүүлж, харж хандаж, хамгаалах болно. Тэр та нарын шархалсан зүрх сэтгэлийг эдгээж, хэцүү үед чинь тайтгаруулах болно [Лук 4:18; Алма 7:10–12-ыг үзнэ үү]. Тэрээр та нарт Өөрийн хүчийг ашиглах эрхийг өгөх болно. Мөн Тэр та нарын амьдрал дахь боломжгүй зүйлсийг боломжтой болгох болно. …
Бурхан баптисмын усанд Өөртэй нь гэрээ байгуулах хүн бүрийг онцгойлон хайрладаг. Тэрхүү тэнгэрлэг хайр нь гэрээнүүд нэмж байгуулан, итгэлтэйгээр сахисан үед гүнзгийрдэг. Тэгээд мөнх бус амьдралын төгсгөлд гэрээ байгуулсан хүүхэд бүр Тэнгэрлэг Эцэгтэйгээ дахин нэгдэх нь эрхэм нандин үнэ цэнтэй байх болно [Дуулал 116:15-ыг үзнэ үү].
Мөн Тэр Өөрийнх нь бүх хүүхэд сэргээгдсэн сайн мэдээний баярт захиасыг сонсох боломжтой байгаа эсэхэд онцгойлон анхаардаг. Тэнгэрлэг Эцэг хүүхдүүдээ энэ дэлхий рүү зургаан мянга гаруй жилийн турш илгээсэн. Энэ хүмүүсийн ихэнх нь өөрсдийг нь мөнх амьдралд хүргэх ёслолуудыг хараахан хүлээн аваагүй байна. Чухам иймээс л ариун сүмүүд чухал ач холбогдолтой байдаг. Хөшигний хоёр талд Израилыг цуглуулах нь өнөөдөр дэлхий дээрх хамгийн чухал ажил болоод байна. Энэ ариун ажил дахь хамтран зүтгэгчид минь, та нарыг энэ цуглуулах ажилд нэн чухал үүрэг гүйцэтгэж байгаад би талархаж байна. (Рассэлл М.Нэлсон, “Мөнхийн ач холбогдолтой сонголтууд” [Залуучуудад зориулсан дэлхий даяарх онцгой цугларалт, 2022 оны 5-р сарын 15], broadcasts.ChurchofJesusChrist.org)
Мөнхийн ач холбогдолтой сонголтууд, 3-р хэсэг
Өөрсдийнхөө хөрвөлтийн талаарх үнэнийг мэдэж ав. Үнэндээ та нар өөрсдийнхөө хөрвөлтийн өмнө хариуцлага хүлээх ёстой. Өөр хэн ч үүнийг та нарын төлөө хийж чадахгүй.
Одоо би та нарыг хэдэн асуултыг эргэцүүлэн бодоход урьж болох уу? Та нар одоо өөрсдийг чинь зовоож буй асуудал, санаа зовоосон зүйлсээсээ ангижирч, амар амгаланг мэдрэхийг хүсэж байна уу? Та нар Есүс Христийг илүү сайн мэдэхийг хүсэж байна уу? Түүний тэнгэрлэг хүч та нарын шархалсан сэтгэл, сул дорой байдлыг хэрхэн эдгээхийг мэдэж авахыг хүсэж байна уу? Та нар Есүс Христийн Цагаатгалын тайвшруулагч, шинэ хүчийг амьдралдаа бодитоор мэдрэхийг хүсэж байна уу?
Эдгээр асуултад хариулахыг эрмэлзэх нь хичээл зүтгэл, бүр ихээхэн хүчин чармайлт шаардана. Би та нараас гэрчлэлээ хамгаалаарай хэмээн гуйж байна. Үүний төлөө зүтгэ. Үүндээ хариуцлага хүлээ. Үүнд анхаарал тавь. Гэрчлэл тань хүчирхэгжиж болохын тулд тэтгэ. Үүнийг үнэнээр хоолло. Гэрчлэл тань суларсныг дараа гайхаж суухгүйн тулд итгэлгүй хүмүүний хуурамч гүн ухаанаар үүнийг бүү булингартуул.
Өдөр бүр чин сэтгэлээсээ, даруухнаар залбир. Өөрийгөө эртний болон өнөө цагийн бошиглогчдын үгээр тэтгэ. Их Эзэнээс Өөрийг нь хэрхэн илүү сайн сонсохыг зааж өгөхийг гуй. Ариун сүм, гэр бүлийн түүхийн ажилд илүү их цаг гарга.
Гэрчлэлээ эн тэргүүнд тавих үедээ та нар амьдралд тань тохиолдож буй гайхамшгийг олж хараарай.
Хэрэв та нарт асуулт байвал, би та нарт асуулт байгаа гэж найдаж байна—хариултаа итгэх чин хүсэл эрмэлзэлтэйгээр эрэлхийл. Сайн мэдээний талаар чадах бүхнээ мэдэж авч, үнэнээр дүүрэн эх сурвалжууд бүхий удирдамжийг ашигла. Бид “өгөгдөх зүйл юу ч үгүй болох” [Сургаал ба Гэрээ 121:28] эрин үед амьдарч байна. Цаг нь ирэхэд Их Эзэн бидний бүх асуултад хариулах болно.
Энэ зуур хялбар олж авч болох илчлэлүүдэд өөрсдийгөө автуул. Ингэснээр та нарын зарим асуулт хариулагдахгүй байсан ч гэрчлэл тань хүчирхэгжинэ гэдгийг би амлаж байна. Та нарын итгэлээрээ асуусан чин сэтгэлийн асуулт илүү агуу итгэл, илүү их мэдлэг рүү үргэлж хөтлөх болно. …
Та нар гэрчлэлээ хамгаалж, хүчирхэгжүүлснээр Их Эзэний мутарт илүү хүчирхэг зэмсэг болох болно. Та нар “илүү дээр шалтгаанаас урам зориг авах болно.” [Алма 43:45] Энэ бол Есүс Христийн шалтгаан!
Түүнд энэ дэлхий дээр Израилыг цуглуулахаас илүү ямар ч чухал зүйл гэж үгүй. Туслахыг хүсэж байгаагаа Тэнгэрлэг Эцэгтээ мэдэгд. Энэхүү нэр хүндтэй ажилд оролцохыг Түүнээс хүс. Тэгээд амьдралдаа Бурханыг ялуулж байх үедээ түр амсхийж, болж байгаа зүйлсийг харан гайхшир.
Хайрт залуу найзууд аа, би та нарт хайртай. Та нарт баярладаг, Би та нарт итгэж байна. Их Эзэний бошиглогчийн хувьд та нарыг хэн гэдгээ таньж мэдэн, өөрийн тэнгэрлэг чадавхын талаарх үнэнийг нандигнадаг байхын тулд адисалж байна. Би та нарыг гэрчлэлээ хамгаалахын тулд адисалж байна. Мөн би та нарыг гэрээнүүдээ сахих хүсэл, хүч чадлаар адисалж байна.
Та нар ийн үйлдсэнээр сүнслэгээр өсөж хөгжин, айдсаас ангид байж, одоо төсөөлөхөд хэцүү ч итгэлтэй байдлыг мэдэрнэ гэдгийг би амлаж байна. Та нарт төрөлх чадавхаас чинь хамаагүй илүү эерэг нөлөө үзүүлэх хүч чадал байх болно. Та нарын ирээдүй одоо төсөөлж байгаагаас чинь ч аз жаргалтай байх болно гэдгийг би амлаж байна. (Рассэлл М.Нэлсон, “Мөнхийн ач холбогдолтой сонголтууд” [Залуучуудад зориулсан дэлхий даяарх онцгой цугларалт, 2022 оны 5-р сарын 15], broadcasts.ChurchofJesusChrist.org)
Ирээдүйн дэлхий дээрх болон мөнх амьдралд нь бэлтгэхэд туслах олж мэдсэн зүйлээ тунгаан бодоход суралцагчдыг урь. Тэд мөн ирээдүйтэй холбоотой аль асуултынхаа хариултыг, хэрхэн авснаа эргэцүүлэн бодож болно. Асуултынхаа хариултг хэрхэн авснаа хуваалцахыг хэдэн суралцагчаас хүсэх талаар бодож үзээрэй.
Ойлголтоо гүнзгийрүүлэх
Хичээлийн энэ хэсэгт “Загвар: Сүмийн удирдагчдын сургаалууд” гарчигтай материалын “Ойлголтоо гүнзгийрүүлэх” хэсгийн “Ямар нэгэн зүйл хий” санааг ашиглана.
Энэ хэсгийн зорилго бол ерөнхийлөгч Нэлсоны хэлсэн “Мөнхийн ач холбогдолтой сонголтууд” гэх үгийг эргэцүүлэн бодож, ярилцахад суралцагчдад туслах явдал юм.
Ерөнхийлөгч Нэлсоны захиасыг судлахдаа олж мэдсэн ойлголтуудаа тунгаан бод. Танд олж мэдсэн зүйлээ санахад туслах эсвэл утга учиртай ирээдүйд болон мөнх амьдралд бэлтгэхэд бусдыг сүнслэгээр өдөөх ямар нэг зүйл хий. Дараах нь хийж болох зарим нэг зүйлийн жишээ болно. Тухайлбал:
-
Зураг
-
Шүлэг
-
Мийм
-
Сошиал медиа дээрх нийтлэл
Боломжтой бол та цаас, бусад шаардлагатай хэрэгслээр хангаж болно. Дуусахад нь хийсэн зүйлээ хуваалцахад хэдэн суралцагчийг урих талаар бодож үзээрэй. Тэднийг хуваалцах үед та дараахтай адил бататгах асуултуудыг тавьж болно. Үүнд:
-
Ерөнхийлөгч Нэлсоны захиасны аль хэсэг танд үүнийг хийхэд өдөөсөн бэ? Энэ нь яагаад таныг өдөөсөн бэ?
-
Тэрхүү захиасыг санах нь хэрхэн таныг одоо болон ирээдүйд удирдан чиглүүлэх вэ?
-
Таны хийсэн зүйл хэрхэн Тэнгэрлэг Эцэгт болон Есүс Христэд хандах зурам зоригийг хэн нэгэнд өгч вэ?
Ерөнхийлөгч Нэлсоны захиасаас таныг сүнслэгээр өдөөсөн үнэнүүдийн талаарх гэрчлэлээ хуваалцахыг бодож үз. Мэдэрсэн сүнслэг удирдамжийнхаа дагуу үйлдэхэд суралцагчдыг урамшуулан дэмж.