Fausiaina o le Ola Tutoatasi

Fausiaina o le Ola Tutoatasi

Vaaiga Aoao

Ua folafola mai e le Faaola, “o lo’u faamoemoe o le faia lea o mea mo la’u au paia. … Peitai e tatau ona faia i laʼu lava ala” (Mataupu Faavae ma Feagaiga 104:15–16). Pe a tatou faatinoina le faatuatua ia Iesu Keriso, tatou te valaaulia o Ia e fesoasoani ia i tatou ia ola tutoatasi atili i vaega uma o o tatou olaga. E fesoasoani Iesu Keriso i Lana Au Paia e fausia le ola tutoatasi ina ia mafai ona latou saunia mea mo i latou lava ma aoao e faamanuia isi e pei ona Ia faia.

Fautuaga o le saoasaoa: Atonu e sili atu ona aoga le aoao atu o nei lesona i le faasologa o loo i ai i lenei pepa o faamatalaga. O lesona muamua e lua e faailoa atu ai tagata aoga i mataupu faavae o le ola tutoatasi ma o le a fesoasoani ia i latou e malamalama atili ai i lesona mulimuli e lua. O le aoaoina atu o lesona muamua e lua o le “Fausiaina o le Ola Tutoatasi” i le amataga o le tausaga e mafai foi ona fesoasoani e saunia ai tagata aoga ia malamalama i mataupu faavae o le a latou suesueina i lesona o le “Aoaoga ma Galuega” ma lesona o le “Soifua Maloloina Faaletino ma Faalelagona”.

Ia Saunia e Aoao Atu

O lenei faamatalaga e tuuina atu ai ia te oe ni manatu o mea atonu e manaomia ona muai saunia ai mo lesona taitasi.

Fausiaina o le Ola Tutoatasi i le Ala a le Alii

Faamoemoega o le lesona: Ina ia mafai ona fesoasoani i tagata aoga ia malamalama i le manaomia ona fausia o le ola tutoatasi i le ala a le Alii.

• Sauniuniga a le tagata aoga: Valaaulia tagata aoga e mafaufau pe mafai faapefea ona latou faamatalaina le faaupuga ola tutoatasi ma mafaufau i auala e mafai ai e le Alii ona fesoasoani ia i latou e fausia le ola tutoatasi i o latou olaga.

• Ata e faaali atu: O se meaai o i’a; o ni isi o mea fagota; O Iesu o loo galue i Lona talavou

• Pepa e tufa atu: “Fausiaina o le Ola Tutoatasi i le Ala a le Alii”

Faatuatua ia Iesu Keriso e Fausia ai le Ola Tutoatasi

Faamoemoega o le lesona: Ina ia fesoasoani i tagata aoga e aoao e ala i le faatuatua ia Iesu Keriso e fausia ai le ola tutoatasi.

• Sauniuniga a le tagata aoga: Valaaulia tagata aoga e faia se tatalo a le tagata lava ia e ole atu ai i le Tama Faalelagi e fesoasoani ia i latou e faailoa mai se vaega o o latou olaga lea e mafai ona latou ola tutoatasi atili ai.

• Vitio: “Ua Toetu Keriso; O Le Faatuatua ia te Ia O Le A Aveesea ai Mauga” (16:22; matamata mai le faailo taimi 5:24 i le 6:08)

• Anomea e faaali atu: Faamatalaga mai ia Epikopo W. Christopher Waddell

Puleaina ma le Atamai o Punaoa Tautupe

Faamoemoega o le lesona: Ina ia fesoasoani i tagata aoga ia malamalama i le auala e faaaoga ai le faatuatua i le Atua a o latou fausia le ola tutoatasi i mea tautupe.

• Sauniuniga a le tagata aoga: Valaaulia tagata aoga e tusi i lalo mea taua latou te faamoemoe e ausia i lo latou lumanai o le a manaomia ai punaoa tautupe. Valaaulia i latou e mafaufau i a latou fuafuaga ina ia saunia i mea tautupe mo nei mea po o ni a latou fesili atonu o i ai e uiga i a latou sauniuniga tautupe.

• Faamatalaga mo tagata aoga: Tau masani e auauna atu ai i se misiona ma maua ai se aoaoga i le maea ai o le aoga maualuga, faapea ai foi ma tupe faaalu masani mo e o soifua i la outou nofoaga

• Anomea: Kopi o le ata o loo faaalia ai mataupu faavae o le faasologa o mea tautupe

• Vitio: “O le Gagana o le Talalelei” (12:27; matamata mai le faailo taimi 6:10 i le 7:40); “Malaga a Sedrick” (2:32)

O le Ola Tutoatasi e Mafai ai e i Tatou ona Tausia Lelei Isi

Faamoemoega o le lesona: Ina ia mafai ona fesoasoani i tagata aoga ia malamalama pe faapefea e le ola tutoatasi ona mafai ai e i latou ona mulimuli atili i le faataitaiga a le Faaola o le fesoasoani atu i isi.

• Sauniuniga a le tagata aoga: Valaaulia tagata aoga e mafaufau i ni auala e mafai ai ona moni le faamatalaga lenei i le faaletino ma le faaleagaga: “E le mafai ona e sii ae se isi agaga sei vagana ua e tu i luga o se tulaga maualuga atu nai lo ia” (Harold B. Lee, “Stand Ye in Holy Places,” Ensign, Iulai 1973, 123).

• Anomea: Kopi o le saunoaga a Elder Robert D. Hales o le Korama a Aposetolo e Toasefululua mo vaega toalaiti e talanoaina

• Pepa e tufa atu: “Faataitaiga o le Ola Tutoatasi mai le Talafaasolopito o le Ekalesia”

• Vitio: “Faamalosi i Ou Uso” (3:50); “I Le Feau a le Alii: O Le Soifuaga o Thomas S. Monson” (1:00:10; matamata mai le faailo taimi 19:54 i le 24:18)