Lesona 182: Fausiaina o le Ola Tutoatasi

Puleaina ma le Atamai o Punaoa Tautupe

Taumafai e Fausia le Ola Tutoatasi i Mea Tautupe

E tele avanoa i le lumanai e o mai faatasi ma tiutetauave tautupe, e pei o le auauna atu i se misiona, mauaina o se aoaoga, po o le amataina o se aiga. A o latou vaavaai atu ia Iesu Keriso ma mulimuli i mataupu faavae o le atamai i mea tautupe, latou te valaaulia faamanuiaga a le Atua e tuuina atu mea latou te manaomia (tagai Mataupu Faavae ma Feagaiga 104:15). O lenei lesona e mafai ona fesoasoani i tagata aoga ia malamalama i le auala e faaaoga ai le faatuatua i le Atua a o latou fausia le ola tutoatasi i mea tautupe.

Gaoioiga E Ono Mafai Ona Aoao Ai

Vaavaai atu i le lumanai

I ni paga po o ni vaega toalaiti, valaaulia tagata aoga e faasoa mai ni sini tetele latou te ono vaai agai i ai i le isi 10 po o le 15 tausaga. Mo se faataitaiga, e mafai ona latou faasoa mai pe afai latou te fuafua e auauna atu i se misiona, po o fea latou te mananao e faaauau ai a latou aoga, po o o latou manaoga e faatatau i le faaipoipoga ma le aiga. A uma ona faasoa mai tamata aoga, mafaufau e talanoaina fesili nei o se vasega:

• O le fea o au sini e manaomia ai sauniuniga tautupe?

• O le a le taimi sili e amata ai ona faia fuafuaga tautupe mo lou lumanai? Aisea?

  Atonu e te manao e saunia e faasoa faapuupuu atu tau masani e auauna atu ai i se misiona, maua se aoaoga, pe nofo i la outou eria. (Ia manatua o le faamoemoega o lenei lesona e le o le otootoina o le tau o mea uma ae ia fesoasoani i tagata aoga e vaavaai atu ma le faamaoni ia Iesu Keriso ma faamasani i nisi o mataupu faavae autu o le tausimea i mea tautupe.)

  Valaaulia tagata aoga e tali le fesili lenei i a latou api faamaumau mo suesuega:

• O le a lou to’a lelei e uiga i mea tautupe i le lumanai? Aisea?

I le gasologa o lenei lesona, saili ma le agaga tatalo le fesoasoani a le Tama Faalelagi ia malamalama ai i mataupu faavae ia e mafai ona fesoasoani ia te oe i le taimi nei ma le lumanai e pulea ai ma le atamai au tupe.

Folafolaga mai le Alii

I le 1834, sa tauivi le Ekalesia ma faigata tautupe, i se vaega, i le fausiaina o le Malumalu o Katelani ma isi taumafaiga amiotonu. Na tuuina mai e le Alii ia i latou le fautuaga e mafai foi ona faatatau ia i tatou a o tatou feagai ai ma matafaioi tautupe i le ausiaina o o tatou manaoga amiotonu.

Faitau le Mataupu Faavae ma Feagaiga 104:13–17, 78-79. Mafaufau pe faapefea ona faatatau ia te oe ia aoaoga a le Alii e fesootai i au mea tautupe.

• O le a se mea na e aoaoina e mafai ona faatatau i o tatou manaoga tautupe?

• O a upu po o fasifuaitau e mafai ona fesoasoani i se tasi e faalagolago i le Alii a o latou puleaina a latou tupe?

  Atonu e faasoa mai e tagata aoga ni mafaufauga eseese, e aofia ai le upumoni lenei: O le a saunia e le Alii mea tatou te manaomia pe afai tatou te mulimuli ma le faamaoni i Lana fautuaga.

• Aisea e ono faamalosiau ai lenei upumoni a o e taumafai e sauni i mea tautupe mo lou lumanai?

Afai e tatau ai, fesoasoani i tagata aoga ia malamalama e le folafola mai e le Alii le saolotoga mai mea tautupe po o isi faigata. Peitai, e silafia e le Alii mea tatou te manaomia; a tatou faamaoni, o le a Ia saunia mea mo i tatou e tusa ai ma Lona finagalo ma ]Lana] taimi.

O mataupu faavae tautupe a le Alii

Faamalamalama atu e ala i tusitusiga paia ma taitai o Lana Ekalesia, ua tuuina mai ai e le Alii le fautuaga e fesoasoani ai ia i tatou ia faaaoga ma le poto o tatou faamanuiaga faalelalolagi, e aofia ai a tatou tupe. Ina ia fesoasoani i tagata aoga ia malamalama i le fautuaga a le Alii, mafaufau e valaaulia i latou e filifili se tasi o fuaitau nei e suesue i ai. A uma, e mafai ona latou potopoto faatasi ma tagata aoga o e sa suesue i fuaitau eseese ma faasoa mai mea sa latou aoaoina.

Faitau fuaiupu nei ma faailoa mai mataupu faavae ua aoao mai e le Alii e mafai ona fesoasoani i se talavou e saunia ai mo lo latou lumanai i mea tautupe.

• Malaki 3:8–10

• 1 Timoteo 6:10

• 2 Nifae 9:51

• Iakopo 2:18–19

• Mataupu Faavae ma Feagaiga 48:4 (I le taimi lea, sa manaomia e le Au Paia ona faatau mai ni fanua, ae atonu tatou te faatatauina lenei mea i o tatou lava tiutetauave i le lumanai.)

A uma ona fefaasoaai tagata aoga i le tasi ma le isi, mafaufau e fai atu fesili e pei o nei:

• E mafai faapefea e mataupu faavae o i nei mau ona fesoasoani ia te oe e faatino ai le faatuatua ia Iesu Keriso a o e sauni mo ou manaoga tautupe?

• Aisea e te manatu ai o le totogiina o le sefuluai o se vaega taua o le puleaina o a tatou tupe? (tagai Malaki 3:8–10).

• E ese mai le totogiina o le sefuluai, o a nisi o auala e mafai ona tatou faamuamua ai le sailia o le malo o le Atua nai lo le sailia o oa?

• E mafai faapefea e le atinaeina o se amioga masani o le sefeina o tupe a o e talavou ona faamanuiaina oe i lou olaga atoa?

Mea tautupe e faamuamua

O ata nei e faatusa i mea na tutupu po o faaiuga e faatatau i mea tautupe. O le faatagaina o tagata aoga e mafaufau i le faasologa o nei mea na tutupu po o faaiuga e mafai ona fesoasoani ia i latou e iloatino ai mea e faamuamua pe a faia faaiuga tautupe. Mafaufau e lolomi ia ata, oti ese vaega taitasi e lima, ma faapipii i le laupapa i soo se faasologa. Valaaulia tagata aoga e talanoaina le faasologa latou te manatu e tatau ona i ai vaega. O le isi filifiliga o le lolomi ma tipi ia lava ni kopi o lenei ata mo vaega toalaiti o tagata aoga e faatulaga lelei ma talanoaina faatasi. Atonu e aoga le ta’u atu faapea e ui lava e foliga manino mai o le mauaina o tupe maua e tatau ona faamuamua i le olaga moni, ae e toatele tagata latou te nono ma faaalu tupe ae latou te lei mauaina. Ua ta’ua lenei mea o le aitalafu, ma e tatau ona tatou taumafai e aloese mai ai.

I se isi itu, e mafai ona e valaaulia tagata aoga e lisi mai ni tupe faaalu masani i le taimi nei poo i le lumanai i luga o le laupapa. I le avea ai o se vasega po o ni vaega, e mafai ona valaaulia tagata aoga e tuu le faamuamua i tupe faaalu mai le matuai taua e oo i le itiiti le taua, e faaaoga ai mataupu faavae na faatoa latou aoaoina i le gaoioiga o mau na muamua atu.

• E faapefea ona e faamuamua nei mea tautupe po o faaiuga? O le a se mea na e aoaoina mai aoaoga a le Alii i tusitusiga paia e lagolago ai lau tali?

• O a luitau e ono tulai mai ona o le le faatulagaina lelei o a tatou mea tautupe?

• O le a sau tala e fai atu i se tasi e lagonaina o a latou tupe faaalu o loo ola ai i le taimi nei e tatau ona faamuamua i le totogiina o le sefuluai?

Mafaufau e fai atu i tagata aoga e faasoa mai pe na faapefea ona faamanuiaina i latou po o tagata o o latou aiga e le Alii a o latou faamuamuaina le sefuluai nai lo isi tupe faaalu. O se isi faataitaiga, e mafai ona e faasoa atu le aafiaga o Elder Valeri V. Cordón o le Fitugafulu i lana saunoaga “O Le Gagana o le Talalelei” mai le faailo taimi 6:10 i le 7:40, o loo maua i le ChurchofJesusChrist.org.

Mafaufau e talanoaina le faamatalaga lenei mai ia Elder Stanley G. Ellis.

Afai e aoga, mafaufau e faaalu se taimi e aoao ai tagata aoga i le auala e totogi ai sefuluai ma taulaga i se lisiti o le sefuluai po o luga o le initoneti donations.ChurchofJesusChrist.org.

Na fesili Elder Stanley G. Ellis o le Fitugafulu e uiga i le totogiina o le sefuluai:

Pe o i ai so tatou faatuatua e faatuatuaina ai folafolaga a le [Alii] e faatatau i le sefuluai e faapea o le 90 pasene o a tatou tupe faasili faaopoopo i ai ma le fesoasoani a le Alii, ua sili atu ai nai lo le 100 pasene ae na o i tatou? (Stanley G. Ellis, “Pe Ua Tatou Faatuatuaina Ea o Ia? O Le Faigata E Lelei,” Liahona, Nov. 2017, 114)

Ina ia faaali atu i tagata aoga se faataitaiga o tagata o loo ola i mataupu faavae o i lenei lesona, mafaufau e faasoa atu le “Malaga a Sedrick” (2:32) o loo maua i le ChurchofJesusChrist.org.

E ono mafai ona e fesoasoani i tagata aoga ia malamalama ua saunia e le Alii ni auala e fesoasoani ai i lo tatou lumanai tautupe e le o faaalia i lenei lesona. Mo se faataitaiga, e mafai ona Ia musuia i tatou i isi auala e maua ai pe sefe ai tupe. E mafai e le autalavou ona talanoa atu i o latou epikopo po o taitai e uiga i fesoasoaniga tautupe mo se misiona po o ni auala taugofie e tulitulimatagauina ai se aoaoga maualuga atu.

Faaiuga

E mafai ona valaaulia tagata aoga e tali i fesili nei i totonu o a latou api faamaumau mo suesuega pe talanoaina foi ma se paga:

• E faapefea ona e aoteleina mea ua e aoaoina e uiga i le puleaina ma le atamai o au tupe?

• O le a se mea se tasi e te lagona e finagalo le Alii e te aoaoina i le asō?

Fuafua e valaaulia ni nai tagata aoga e faasoa mai a latou tali. Faasoa atu lau molimau i le finagalo o le Alii e saunia mea mo Lana Au Paia (tagai i le Mataupu Faavae ma Feagaiga 104:15). Uunaia tagata aoga e vaavaai atu i le Atua ma faaaofia o Ia i faaiuga tautupe i o latou olaga atoa.

Punaoa Faaopoopo

O fea e mafai ona ou aoao atili ai e uiga i le puleaina ma le atamai o tupe.?

• Tupe Patino mo le Ola Tutoatasi (2016), ChurchofJesusChrist.org

• “Tupe,” ChurchofJesusChrist.org

• Autu ma Fesili, “Tupe a le Aiga,” topics.ChurchofJesusChrist.org

Pe o faamoemoeina ou te totogia le tau o le auauna atu i se misiona e alu ese mai le aiga?

O le ositaulaga i mea tautupe o se vaega o le galuega faafaifeautalai (tagai i le Mareko 1:17–18; Alema 15:16). Ua i ai i faifeautalai ma o latou aiga le tiutetauave taua muamua o le foai atu i mea tautupe i le auaunaga faafaifeautalai. E tatau ona latou faia tapenaga talafeagai ma le osigataulaga. E tatau ona tutoatasi i latou i mea tautupe ina ia mafai ona latou ausia tautinoga mo saofaga. …

O i latou e manaomia le fesoasoani tautupe ina ia faafetaia’ia ai tautinoga mo saofaga, e mafai ona maua mai i aiga lautele ma uo.

Afai o totoe pea se tulaga manaomia, e mafai e le epikopo po o le peresitene o le siteki ona talosaga atu i tagata o le au paia i le uarota po o le siteki e foai atu i le tupe mo faifeautalai a le uarota. (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 24.3.4, 24.3.4.1, ChurchofJesusChrist.org)

E mafai faapefea ona ou faaaluina ma le atamai atili a’u tupe?

Na aoao mai Elder Robert D. Hales (1932–2017) o le Korama a Aposetolo e Toasefululua:

Soo se taimi lava tatou te mananao ai ia tupu pe umia se mea o le a faapea ona aafia ai i tatou ma a tatou punaoa, atonu o le a tatou mananao e fesili ifo ia i tatou lava, “Pe o lona aoga ea e na o se taimi puupuu, pe o le a i ai ea sona taua ma aoga e faavavau?” O le tali ma le faamaoni i nei fesili e fesoasoani ia i tatou e aloese ai mai aitalafu soona fai ma isi amioga ua fai ma vaisu. (Robert D. Hales, “Becoming Provident Providers,” Liahona, Me 2009, 10)

Na aoao mai Peresitene Gordon B. Hinckley (1910–2008):

Vaavaai i tulaga o a outou mea tautupe. Ou te uunaia outou ina ia faautauta i a outou tupe faaalu; ia pulea lelei outou lava i a outou faatauga ina ia aloese ai mai le aitalafu i le tele e mafai ai. Ia totogi faauma aitalafu i se vave e te mafaia ai, ma ia faasaoloto outou mai saisaitiaga. (Gordon B. Hinckley, “To the Boys and to the Men,” Ensign, Nov. 1998, 54)

Pe i ai ni taimi e tatau ai ona ou mafaufau e fai se aitalafu?

E faalagolago i tulaga, e mafai ona talia aitalafu mo mea nei e faaalu ai tupe:

• O se fale tauagafau, ma gafatia ona totogi

• Tupe faaalu mo aoaoga talafeagai o le a faapea ona taitai atu ai i se galuega lelei atu

• Auala o feoaiga masani ma tauagafau (pe afai lena e manaomia)

E tatau lava ona e aloese mai le faia o aitalafu mo aitema e ese mai nai loo ia mea. Nai lo o lena, ia sefe mo mea e faaalu ai tupe. (Tupe Patino mo le Ola-Tutoatasi [2016], 114)

Gaoioiga Faaopoopo e Aoao Ai

Malamalama i le aitalafu

Valaaulia tagata aoga e toe faamatala auiliili le uluai lomiga o le Tusi a Mamona. Afai e manaomia, faamanatu atu ia i latou na nono mai e Matini Harisi se tupe e fesoasoani ai e totogi le lolomiina o le Tusi a Mamona.

Valaaulia tagata aoga e faitau le Mataupu Faavae ma Feagaiga 19:35, ma vaavaai mo faatonuga na tuu atu e le Alii ia Matini Harisi i le taimi lea.

• O le a sou manatu i le auala e tuu ai e le aitalafu i tatou i le noanoataga?

A manaomia, fesoasoani i tagata aoga ia malamalama o le aitalafu o le nono mai lea o tupe e le o sau tupe. E masani lava e sau ma se tau, e ta’u o le tului. O le tului o se pasene o le aofai na aitalafu ai. O aitalafu e o mai faatasi ma peimeni faatulagaina, ma se faamoemoe aotele e toe totogi atu atoa le mea na e nonoina faatasi ma le tului. E iu ane ua e totogia le sili atu nai lo le aofai na e nonoina, o nisi taimi e matuai tele lava. A uma ona totogi aitalafu, ua ia i tatou le saolotoga e filifili ai pe faapefea ona faaalu a tatou tupe ma ua i ai i se tulaga sili atu e fesoasoani ai ia i tatou lava, o tatou aiga, po o isi o loo manaomia le fesoasoani.

Mafaufau e faasoa atu le tala lenei mai ia Elder Ulisses Soares o le Korama a Aposetolo e Toasefululua:

I totonu o ni nai masina talu ona ma faaipoipo, sa ta’u mai e si o’u toalua pele lona manao e a’oga faamusika. I le faamoemoe e faafiafia o ia, sa tonu ai ia te a’u e fuafua se faaofo telē mai le loto mo si a’u manamea. Sa ou alu i se faleoloa e faatau ai mea faimusika ma faatau mai sana piano e fai ma meaalofa. Sa ou tuuina ma le fiafia tele le lisiti na faatau mai ai i totonu o se atigipusa ma se lipine matagofie ma tuu atu ia te ia, ma le faamoemoe e vaaia se malena a’e o sana tali fiafia o le lotofaafetai mo lona toalua ua matuai gauai atu ma le alofa.

Ina ua ia tatalaina lena tamai pusa ma vaaia mea sa i ai, sa ia tilotilo mai ia te a’u ma le alofa ma faapea mai, “Oi, la’u pelē, ese lou lelei! Ae se’i ou fesili atu: o se meaalofa lenei po o se aitalafu?” I le mae’a ai ona ma fefautuaa’i faatasi e uiga i le mea na faaofo ai, sa tonu ia i ma’ua e faaleaoga le faatauga. Sa ma ola i se paketi faatamaiti a’oga, e pei o le tulaga o i ai le toatele o le autalavou faatoa faaipoipo. (Ulisses Soares, “Faapaaga ma le Alii,” Liahona, Nov. 2022, 42)

• O a filifiliga e mafai e le autalavou ona faia nei e fesoasoani ai ia i latou e aloese mai aitalafu le manaomia i le lumanai?

O le a saunia e le Alii se ala

Afai e lagona e tagata aoga le le mautonu e uiga i lo latou lumanai tautupe, mafaufau e valaaulia i latou e faitau le 1 Nifae 3:7.

• E mafai faapefea ona faaaoga aoaoga o lenei fuaiupu i mea tautupe e manaomia e faataunuu ai mea ua poloaiina ai i tatou e le Alii?

Mafaufau e faasoa atu lau molimau po o se tala e faapupula ai le tomai o le Alii e saunia ai se ala mo i tatou e ausia ai o tatou tiutetauave tautupe.