Lesona 181: Fausiaina o le Ola Tutoatasi

Faatuatua ia Iesu Keriso e Fausia ai le Ola Tutoatasi

Faatoilaloina o Faafitauli e ala i le Alii

E faaopoopo atu i le faamanuiaina o i tatou i le faamagaloga ma le faamalologa mai agasala, e mafai e le Faaola ona faamanuiaina i tatou i tulaga e pei o le aoga, galuega, ma mafutaga. Pe a tatou faatinoina le faatuatua ia Iesu Keriso, tatou te valaaulia o Ia e fesoasoani ia i tatou ia ola tutoatasi atili i vaega uma o o tatou olaga. O lenei lesona ua faamoemoe e fesoasoani i tagata aoga e faatino ai le faatuatua ia Iesu Keriso e fausia ai le ola tutoatasi.

Gaoioiga E Ono Mafai Ona Aoao Ai

Aveesea o mauga

Mafaufau e tusi se mauga i luga o le laupapa ma valaaulia tagata aoga e tusi se mauga talitutusa ia latou api faamaumau mo suesuega, ma ufiufi le afa pito i luga o le itulau e tasi. Ta’u i tagata aoga e mafaufau faapea o le mauga e tu i lo latou va ma le fausiaina o le ola tutoatasi faaleagaga ma faaletino. (Afai e manaomia e tagata aoga se fesoasoani e malamalama ai po o le a le uiga o le ola tutoatasi, faasoa atu e aofia ai mea e pei o le mauaina o lo latou lava malosi faaleagaga, mauaina o se aoaoga, ma le lava o tupe e maua e taulima ai o latou manaoga.)

I totonu o le mauga, fai atu ia i latou e tusi nisi o mea faalavefau o loo latou feagai lea e faigata ai ona fausia le ola tutoatasi i vaega eseese o o latou olaga. (O faataitaiga e ono aofia ai le leai o ni galuega o avanoa, avanoa faaleaoaoga, soifua maloloina, po o le manaomia o le lagolago mai e pele.) Valaaulia volenitia e tusi nisi o mea faalavefau o loo latou feagai i le mauga na e tusia i luga o le laupapa.

• E mafai faapefea e mea faalavefau i le olaga i nisi taimi ona pei o ni mauga?

• O a ni auala eseese e tali atu ai tagata i nei ituaiga o luitau?

E mafai ona e valaaulia tagata aoga e mafaufau loloto pe faapefea ona latou fuafua e taulima o latou faafitauli i le mauaina o le ola tutoatasi. Valaaulia i latou i le lesona atoa e saili ma le agaga tatalo pe faapefea ona maua le malosi mai le Faaola e faatoilalo ai luitau o feagai ma i latou.

Valaauliaina o le mana o le Faaola i o tatou olaga

Sa tuuina mai e Peresitene Russell M. Nelson le fautuaga lenei ia i latou o e feagai ma luitau faigata i o latou olaga.

Ua Toetu Keriso; O le Faatuatua ia te Ia O Le A Aveesea ai Mauga

O’u uso e ma tuafafine pele, o la’u valaau ia te outou … o le, ia amata i le aso nei ona faateleina lou faatuatua. E ala i lou faatuatua, o le a faateleina ai e Iesu Keriso lou tomai e aveese ai mauga i lou olaga, e ui i ni ou lu’itau patino e ono tetelē e pei o le telē o le Mauga o Evaresi. …

O le a eseese lava au mauga, ae o le tali i ou lu’itau taitasi o le faateleina lea o lou faatuatua. (Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 102–3)

• E faapefea ona e aoteleina mea o loo aoao mai e Peresitene Nelson?

  Atonu e maua mai e tagata aoga ni aotelega loloto eseese. O le upumoni taua e tasi o le a o faateleina lo tatou faatuatua ia Iesu Keriso, o le a Ia faateleina lo tatou gafatia e faatoilalo ai luitau.

• E mafai faapefea ona faatatau nei aoaoga mai ia Peresitene Nelson i a tatou taumafaiga ia maua le ola tutoatasi i o tatou olaga?

Vaai faalemafaufau e i ai sau uo e manaomia sina fesoasoani itiiti e talitonu ai o le a fesoasoani moni lava Iesu Keriso ia i latou i mea faalavefau i o latou olaga. Sue se fuaitau o le atamai i aoaoga faavae mai soo se tusi o tusitusiga paia e mafai ona fesoasoani ia i latou e lagona ai le finagalo ma le mana o Iesu e fesoasoani mai.

O fuaitau o le atamai i aoaoga faavae e ono maua e tagata aoga e aofia ai le:

• Faataoto 3:5–6: “Faalagolago i le Alii ma lou loto atoa … ma o le a Ia taitaia ou ala.”

• Mataio 11:28–30: “Ia outou o mai ia te au outou uma o e tigaina ma mafatia i avega o au foi e malolo ai outou.”

• Iakopo 1:5–6: “A e afai ua leai se poto i so outou, ina ole atu ia i le Atua.”

• 1 Nifae 3:7: “O le a ou alu ma faia mea ua poloaiina ai au e le Alii.”

• 2 Nifae 28:30: O le a “tuu atu e le Atua i le fanauga a tagata lea fuaitau i luga o lea fuaitau, ma lea mataupu i luga o lea mataupu.”

• Eteru 12:27: “Afai e o mai tagata ia te au … ona ou faia lea o mea vaivai ia avea ma mea malolosi ia te i latou.”

• Mataupu Faavae ma Feagaiga 6:36: “Vaai mai ia te a’u i mafaufauga uma; aua le masalosalo, aua le fefe.”

• O a fuaitau na e filifilia? E mafai faapefea e lena fuaitau ona fesoasoani i lau uo ia malamalama i le finagalo ma le mana o le Faaola e fesoasoani ai ia i latou?

• O le a se aafiaga patino e mafai ona e faasoa atu e fesoasoani ai i lau uo ia iloa e naunau Iesu ma mafai ona fesoasoani ia i tatou?

Mafaufau e valaaulia tagata aoga e fatu ni koluma se lua i lalo o le mauga i a latou itulau o api talaaga. I le pito i luga o le tasi koluma, e mafai ona latou tusia ai le “O la’u vaega i le fausiaina o le ola tutoatasi.” I le pito i luga o le isi koluma, e mafai ona latou tusia ai “Pe faapefea ona faamanuiaina au e le Faaola.”

E mafai ona e faaali atu pe tufatufa atu ni kopi o le faamatalaga lenei. Valaaulia tagata aoga e faitau, ma vaavaai mo mea e mafai ona latou faaopoopo i koluma uma e lua. E mafai e tagata aoga ona galulue taitoatasi, i ni paga, po o vaega toalaiti.

Sa faamalamalama mai e Epikopo W. Christopher Waddell o le Au Epikopo Pulefaamalumalu le ala e galulue faatasi ai a tatou taumafaiga ma le faatuatua i le Alii.

Mai le amataga o taimi, na saunia lava e le Alii le taitaiga mo Lona nuu e fesoasoani ai ia i latou e sauniuni, faaleagaga ma faaletino, mai mala Na te silafia o le a oo mai o se vaega o lenei aafiaga faaletino. O nei mala atonu e patino pe lautele foi i le natura, ae o le taitaiga a le Alii o le a maua ai le puipuiga ma le lagolago i le tulaga tatou te gauai atu i ai, galulue i ai, i Lana fautuaga.…

E le o faamoemoe mai le Alii tatou te faia e sili atu nai lo mea tatou te mafaia, ae o loo faamoemoe mai o Ia e fai le mea e mafai ona tatou fai, i le taimi e mafai ona tatou faia ai. …

O le saunia faaletino ma le ola tutoatasi o lona uiga “o le talitonu e ala i le alofa tunoa, po o le mana gafatia, o Iesu Keriso ma lo tatou lava taumafaiga, e mafai ona tatou maua mea uma e manaomia faaleagaga ma faaletino o le olaga tatou te mananao ai mo i tatou lava ma o tatou aiga.” (W. Christopher Waddell, “Sa Iai le Areto,” Liahona, Nov. 2020, 42–43, 44)

Vaevae tagata aoga i ni vaega taitoalua pe taitoatolu ma faamaea le gaoioiga lenei ma le talanoaga. O nisi faataitaiga e faailoa mai e tagata aoga e mafai ona aofia ai le manaomia e Iosefa Samita o tali ina ia maua atili ai le malosi faaleagaga (tagai Iosefa Samita—Talafaasolopito 1:8–20) ma le uso o Iareto o loo manaomia ona tausia manaoga faaletino o lona aiga a o malaga atu i le nuu folafolaina (tagai Eteru 2:18–3:6).

Faailoa mai se tala mai tusitusiga paia po o le talafaasolopito o le Ekalesia o se tasi na faaaogaina uma a latou lava taumafaiga ma le faatuatua ia Iesu Keriso e faatoilalo ai faafitauli i lo latou alualu i luma.

• O a faafitauli na latou fetaiai?

• O a ni taumafaiga patino na latou faia e faatoilalo ai le faafitauli?

• Na faapefea ona fesoasoani le Alii ia i latou ona o le latou faatuatua?

  A uma ona talanoaina e tagata aoga le talanoaga faavaega, valaaulia se sui o vaega taitasi e tusi i luga o le laupapa le igoa o le tagata mai tusitusiga paia po o le talafaasolopito o le Ekalesia sa latou mafaufau i ai i luga o le mauga.

  Talanoaina nei fesili o se vasega.

• O le a se mea na e aoaoina mai nei tagata e mafai ona e faaaogaina i au lava taumafaiga e fausia le ola tutoatasi faatasi ai ma le fesoasoani a le Faaola?

E mafai faapefea ona aoga lenei tulaga i le olaga i aso uma?

Fesoasoani i tagata aoga ia malamalama pe faapefea ona latou faia ni faatinoga aoga a o faalagolago i le Tama Faalelagi ma le Faaola e faamanuia a latou taumafaiga. E mafai ona e valaaulia tagata aoga e filifili se tasi o tulaga nei ma mafaufau pe mafai faapefea e le tagata ona faaaoga le faatuatua ia Iesu Keriso a o latou galulue agai atu i le ola tutoatasi atili.

1. Ua manao se alii talavou e auauna atu i se misiona ma maua se aoaoga ae e le lava foi se tupe e fai ai.

2. O loo i ai i se tamaitai talavou ni faafitauli tau le soifua maloloina e faasa ai o ia mai le tele o galuega o loo avanoa mo isi.

3. Sa feagai se alii talavou ma se popolega ogaoga. O tulaga faaagafesootai, e aofia ai le aoga ma lana galuega, e matua faigata lava mo ia.

4. O se tamaitai talavou e manao ia faamanuiaina i le aoga ae e le mafai ona ia aoao e faapena foi i le toatele o ana uo i le vasega. O le mea lea, ua popole o ia nei le taliaina o ia i le iunivesite lea e faamoemoe o ia e aoga ai.

Atonu e te faaaogaina ni fesili e pei o nei e fesoasoani ai i tagata aoga e talanoaina ai nei vaaiga faataitai:

• O a ni faatinoga e ono faia e lenei tagata e tali atu ai i lo latou faafitauli i se auala e mafai ai e le Alii ona fesoasoani ia i latou?

• O le a se latou mea e faia e faatino ai le faatuatua ia Iesu Keriso?

• O ai e mafai ona latou fefautuaai faatasi? E mafai faapefea e le faia o lenei mea ona valaaulia ai le fesoasoani a le Alii?

Afai e manaomia e tagata aoga se fesoasoani i le taliina o le fesili mulimuli, mafaufau e fautua atu e mafai e i latou o loo i vaaiga faataitai ona fefautuaai ma matua, taitai, ma tagata e i ai tomai faapitoa. E le gata i lea, e mafai ona latou fefautuaai ma le Tama Faalelagi e ala i le tatalo i le auala sili e tali atu ai i o latou tulaga.

Faaaoga i lou olaga

E mafai ona e valaaulia tagata aoga e mafaufau loloto pe mafai faapefea e le filifili e faaaoga le faatuatua ia Iesu Keriso ona aafia ai o latou tulaga o i ai nei ma le lumanai. E mafai ona e valaaulia tagata aoga e tomanatu filemu ma tali le fesili lenei i a latou api talaaga:

• O le a se vaega i lou olaga e te manao ia ola tutoatasi atili ai?

• O le a se mea e mafai ona e faia e faatoilalo ai faafitauli e ono feagai ma oe?

• E mafai faapefea ona e galue ma le faatuatua ia Iesu Keriso a o e sailia le fesoasoani o loo e manaomia?

Punaoa Faaopoopo

A o ou taumafai e faatino le faatuatua ia Iesu Keriso, e mafai faapefea ona ou faapaleniina ou manaoga ma le finagalo o le Atua?

Na saunoa mai Elder D. Todd Christofferson o le Korama a Aposetolo e Toasefululua:

O Lo Tatou Sootaga ma le Atua

E le tatau ona tatou mafaufau i le fuafuaga a le Atua o se masini faifaatau lea tatou te (1) filifili ai se faamanuiaga moomia, (2) tuu i totonu se aofaiga o galuega lelei, ma (3) vave ai loa ona tiliva mai le oka.

O le a faamamaluina lava e le Atua Ana feagaiga ma folafolaga ia i tatou taitoatasi. Tatou te lē tau popole i lena mea. O le mana togiola a Iesu Keriso—o lē na afio ifo i lalo o mea uma ona toe afio a’e ai lea i le mea maualuga ma ua umia le mana uma i le lagi ma i le lalolagi—ua faamautinoa mai ai e mafai e le Atua ma o le a faataunuuina Ana folafolaga. E tatau ona tatou faamamalu ma usitaia Ana tulafono, ae e le o faamanuiaga uma na muai folafola mai i luga o le usiusitai i le tulafono ua fatuina, mamanu, ma faatulagaina taimiina e tusa ai ma o tatou faamoemoega. Tatou te faia le mea sili ae e tatau ona tuu atu ia te Ia le pulega o faamanuiaga, i le faaletino ma le faaleagaga. (D. Todd Christofferson, “O Lo Tatou Sootaga ma le Atua,” Liahona, Me 2022, 78)

O le a se mea e mafai ona ou faia ia tutoatasi atili ai?

Sa aoao mai Peresitene Dieter F. Uchtdorf, a o avea ma uso o le Au Peresitene Sili:

[O] tagata taitoatasi e i ai le matafaioi mo le ola faalagolago ia te ia lava. O a tatou punaoa e aofia ai tatalo patino, o a tatou lava taleni ma tomai na tuuina mai e le Atua, o aseta ua tatou maua e ala mai i o tatou lava aiga ma tagata o o tatou aiga lautele, o punaoa eseese mai le nuu, atoa ai ma le lagolago agaalofa a korama o le perisitua ma le Aualofa. O le a taitai atu i tatou e lenei mea i le mamanu musuia o le ola faalagolago o le tagata ia te ia lava. …

I le faaiuga, e ao ona e faia … mea na faia e soo o Keriso i tisipenisione uma: fefautuaai faatasi, faaaoga uma punaoa o loo maua, saili atu i le musumusuga a le Agaga Paia, ole atu i le Alii mo Lana faamautinoaga, ona afe lea i luga o lima o lou ofu, ma alu e galue. (Dieter F. Uchtdorf, “O Le Faia i le Ala a le Alii,” Liahona,, Nov. 2011, 54)

Na fautua mai Elder Hugo E. Martinez o le Au Fitugafulu:

Ua tatou ola-tutoatasi i o tatou olaga atoa e ala i le tuputupu a’e i le malosiaga faaleagaga, faaleleia lo tatou soifua maloloina faaletino ma le mafaufau, tulituliloaina o a tatou aoaoga ma galuega, ma le sauniaina faaletino. Pe muta ea lenei mea i le gasologa o o tatou olaga? Leai, o se faagasologa lea o le aoaoina, tuputupu ae ma galue. E le taitai muta; o se faagasologa faifai pea i aso taitasi. …

[Ia] tatou mulimuli i lo tatou Faaola, o Iesu Keriso, ma Lana talalelei e ala i le ola tutoatasi i o tatou olaga atoa. (Hugo E. Martinez, “Aoao Atu o le Ola Tutoatasi i Tamaiti ma le Autalavou,” Liahona, Me 2022, 96)

E mafai faapefea ona tatou faatino le faatuatua ia Iesu Keriso?

O le tala i Autu ma Fesili e uiga i le faatuatua o loo ta’ua ai:

O le i ai o le faatuatua ia Iesu Keriso o lona uiga o le faalagolago atoa atu lea ia te Ia—faalagolago i Lona mana, atamai, ma le alofa e faavavau. E aofia ai le talitonu i Ana aoaoga. O lona uiga o le talitonu e tusa lava pe tatou te le malamalama i mea uma, e malamalama i ai o Ia. Ona sa oo o Ia i o tatou tiga, mafatiaga, ma lē atoatoa uma, ua Ia silafia ai le ala e fesoasoani ai ia tatou tutu i luga a’e o o tatou faafitauli i aso taitasi (tagai i le Alema 7:11–12; Mataupu Faavae ma Feagaiga 122:8). Ua Ia “manumalo i le lalolagi” (Ioane 16:33) ma sauniaina le ala mo i tatou e maua ai le ola e faavavau. Ua le aunoa ona saunia o Ia e fesoasoani mai ia i tatou pe a tatou manatua Lana valaau mai: “Vaai mai ia te aʼu i mafaufauga uma; aua le masalosalo, aua le fefefe” (Mataupu Faavae ma Feagaiga 6:36).

… Tatou te faaali atu lo tatou faatuatua e ala i faatinoga—i le ala tatou te ola ai. (Autu ma Fesili, “Faatuatua ia Iesu Keriso,” ChurchofJesusChrist.org)

Gaoioiga Faaopoopo e Aoao Ai

O le faatuatua o se mataupu faavae o le faatino

Ina ia fesoasoani i tagata aoga ia malamalama atili i le faatinoga lea e sau mai le faatuatua ia Iesu Keriso, e mafai ona e faaali atu le vitio “Exercise Faith in Christ.” I totonu o le vitio, ua aoaoina ai e Elder David A. Bednar o le Korama a Aposetolo e Toasefululua e uiga i auala e taitaiina atu ai le faatuatua i faatinoga. Valaaulia tagata aoga e mafaufau po o a ituaiga o faatinoga e afua mai i le faatuatua ia Iesu Keriso.

Faatinoga o le Faatuatua ia Keriso

A uma le vitio, e mafai ona e valaaulia tagata aoga e tomanatu i o latou lava luitau faaletino. Atonu e te fai atu le fesili lenei:

• O a ni faatinoga e mafai ona faia e se tasi e taumafai ai e faatoilalo nei ituaiga o luitau?

• E faapefea e le faia o se faatinoga faapenei ona faaalia ai le faatuatua ia Iesu Keriso?

Ae faapefea pe afai e foliga mai e le faaleleia e lou faatuatua ou tulaga?

Atonu e lagona e tagata aoga le popole faapea e ui lava ina latou faatuatua ia Iesu Keriso, ae o loo faaauau pea ona latou feagai ma tofotofoga. Ina ia fesoasoani i tagata aoga ia lagona le faamoemoe i le faaauau pea ona faatino le faatuatua ia Iesu Keriso, mafaufau e faaali le vitio “Daily Bread: Experience” (3:12). Sa faasoa mai Elder D. Todd Christofferson Elder se aafiaga o lona lava tofotofoga faaletino lea sa le mafai ona ia faatoilaloina mo le tele o tausaga. E mafai ona e fai atu i tagata aoga e vaavaai mo mea na faia e Elder Christofferson na faaalia ai lona faatuatua faifai pea i lenei taimi faigata. A uma le vitio, e mafai ona e fai atu ia i latou e faasoa mai pe aisea latou te manatu ai e lei alu ese le faatuatua o Elder Christofferson ia Iesu Keriso i lea taimi.

Mea e Ai e Tatau ma le Aso: Aafiaga