Lesona 183: Fausiaina o le Ola Tutoatasi

O Le Ola Tutoatasi e Mafai ai e i Tatou ona Tausia Lelei Isi

Saunia e Auauna Atu e Pei o le Faaola

Na aoao atu e le Faaola Ona soo e “fesoasoani i e vaivai … ma faamalosi tulivae ua vaivai” (Mataupu Faavae ma Feagaiga 81:5). E sili atu ona mafai ona tatou mulimuli i lenei faatonuga pe a tatou ola tutoatasi atili i tatou lava. O lenei lesona e mafai ona fesoasoani i tagata aoga ia malamalama pe faapefea e le ola tutoatasi ona mafai ai e i latou ona mulimuli atili i le faataitaiga a le Faaola o le fesoasoani atu i isi.

Gaoioiga E Ono Mafai Ona Aoao Ai

O le tomai e fesoasoani ai i isi

Ina ia fesoasoani i tagata aoga ia malamalama o le mauaina o le ola tutoatasi e aafia ai lo tatou gafatia e fesoasoani atu i isi, mafaufau e valaaulia ni tagata aoga se toatolu e faitau se tasi o tulaga nei. Taofi pe a uma ona faitau tulaga taitasi ma fai atu i le vasega e faasoa mai ni vaega eseese e mafai ona iloa ai le tele o le mafai e Mindy, Nathan, po o Jayda ona fesoasoani. (Afai e manaomia, e mafai ona e saunia ni ata faataitai e sili atu ona talafeagai i au tagata aoga.)

1. O loo tauivi le uo a Mindy ia malamalama i lana meaaoga i le numela ma fesili atu ia Mindy mo se fesoasoani.

2. I le avea ai ma se faifeautalai fou, ua feiloai Natano i se tasi e tele ana fesili e uiga i le Toefuataiga o le Ekalesia a le Faaola.

3. Ua iloa e Jayda e le mafai e se aiga i lana uarota ona tuuina atu ni laei mafanafana mo a latou fanau.

Mafaufau e tuu atu i tagata aoga se kopi o le saunoaga lenei a Elder Robert D.Hales (1932-2017) o le Korama a Aposetolo e Toasefululua. Valaaulia i latou e faailoa ma talanoaina i ni vaega toalaiti ia le itiiti ifo ma le tasi se fasifuaitau mai parakalafa taitasi e mafai ona faatatau i tulaga o i luga. (Afai e manaomia, fesoasoani i tagata aoga ia malamalama o le upu faaletino e pei ona faaaogaina i le faamatalaga e mafai ona aofia ai le tele o vaega o le soifua manuia, e pei o mea tautupe, aoga, lagona, ma le faaletino.)

O le ola faalagolago o le tagata ia te ia lava, o le tauaveina lea o le tiutetauave mo o tatou lava uelefea faaleagaga ma le faaletino, ma mo i latou ua tuuina mai e le Tama Faalelagi i la tatou tausiga. Seiloga lava ua tatou faalagolago ia i tatou lava ona mafai lea ona tatou faaa’aoa’o i le Faaola i le auauna atu ma faamanuiaina isi.

E taua le malamalama o le faalagolago o le tagata ia te ia lava o se auala e ausia ai se sini. O la tatou sini laualuga lava o le avea e faapei o le Faaola, ma e faalauteleina lena sini e ala i la tatou auaunaga lē manatu faapito i isi. E faateleina pe faaitiitia lo tatou tomai e auauna atu ai e ala i le maualuga o i ai lo tatou faalagolago ia i tatou lava.

E pei ona saunoa Peresitene Marion G. Romney i se tasi taimi: “E le mafai ona maua mai ni meaai mo e fia aai mai fata e le o i ai ni meaai. E le mafai ona maua mai ni tupe e fesoasoani ai i e le tagolima, mai ni ato tupe e le o i ai ni tupe. E le mafai ona maua mai se fesoasoani ma se malamalamaaga mai se tasi ua mativa i lagona. E le mafai ona maua mai se aoaoga mai se ua le aoaoina. A o le mea e sili ona taua o na mea uma, e le mafai ona maua mai se taitaiga faaleagaga, mai i se ua vaivai le faaleagaga”(Lipoti mai le Fono, Oke. 1982, 135; poo le Ensign, Nov. 1982, 93). (Robert D. Hales, “A Gospel Vision of Welfare: Faith in Action,” i le O Mataupu Faavae Autu o le Soifua Manuia ma le Faalagolago o le Tagata ia te Ia Lava [fonotaga faaleaoaoga a le au taitai i le lalolagi atoa, 2009], 1–2; tagai foi i le ChurchofJesusChrist.org)

• O a upumoni na e aoaoina mai ia Elder Hales?

  A o tali mai tagata aoga i le fesili na muamua atu, ia mautinoa ua latou malamalama a o tatou atiina ae le ola tutoatasi, e mafai ona tatou avea atili e faapei o le Faaola ma mafai ona fesoasoani lelei atu ma auauna atu i isi.

  E ono mafai ona e fesoasoani i tagata aoga ia iloa le taua patino i le lesona e ala i le fai atu ia i latou e tusifaamaumau o latou manatu ma tali i fesili e pei o nei:

• Na faapefea ona mafai ona e fesoasoani i isi e ala i tomai po o auala ua fesoasoani ai le Atua ia te oe e atiina ae?

• O a vaega o le ola tutoatasi e ono tuu atu e le Tama Faalelagi ia oe e galuea ai i le taimi nei ina ia mafai ona e tausia lelei oe lava ma isi i le lumanai?

Avea atili e pei o le Faaola

Mafaufau e faaali atu faatonuga ma fesili nei. Valaaulia tagata aoga e faaauma le gaoioiga ma talanoaina ma se paga le fesili.

Faitau le Luka 2:40, 52 ma maka vaega eseese o le alualu i luma na faia e Iesu i Lona talavou.

• E mafai faapefea e le tomai o le Faaola e auauna atu ai i isi ona aafia i Lona tuputupu ae ma le atinaeina i le taimi o Lona talavou?

  A uma ona faasoa mai paga, valaaulia le vasega e faasoa mai ni auala e mafai ai e se talavou i aso nei ona fausia le ola tutoatasi i vaega taitasi o loo ta’ua i le Luka 2:40, 52.

  Mafaufau e tuu atu i tagata aoga se taimi e mafaufau loloto ai ma le filemu i fesili e pei o nei:

• O ai e mafai ona e fesoasoani i ai i le lumanai pe afai e te ola tutoatasi atili i se tasi o nei vaega? E faapefea ona mafai ona e fesoasoani atu?

• E faapefea e le galue agai i le ola tutoatasi ona fesoasoani ia i tatou ia avea atili ai e faapei o le Faaola?

Faataitaiga o auaunaga faaKeriso e ala i le ola tutoatasi

Faasoa atu ni faataitaiga o tagata i le talafaasolopito o le Ekalesia o e sa mafai ona auauna atu i le Atua ma isi. E mafai ona e faia lenei mea e ala i le faatulagaina o le vasega i ni vaega suesue ma tuuina atu i vaega taitasi se tasi o faataitaiga mai le pepa e tufa atu “O Faataitaiga o le Ola Tutoatasi mai le Talafaasolopito o le Ekalesia.” Valaaulia vaega taitasi e faitau fuaiupu ua fautuaina ma talanoa i fesili i le faaiuga o le palakalafa.

Faataitaiga o le Ola Tutoatasi mai le Talafaasolopito o le Ekalesia

Matini Harisi: I le 1827, sa feagai ai Iosefa Samita ma sauaga ma le mativa a o ia taumafai e faaliliu le Tusi a Mamona mai papatusi auro. Sa iloa e Matini Harisi, o se faifaatoaga faamanuiaina, le tulaga o Iosefa. Faitau le Iosefa Samita—Talafaasolopito 1:61–62, ma vaavaai pe na mafai faapefea e Matini ona fesoasoani ia Iosefa Samita. Faitau le Mataupu Faavae ma Feagaiga 19:26, 34–35; 104:26 e vaai ai i isi auala na mafai ai e Matini Harisi ona auauna atu i le Alii ma faamanuia ai isi. Na atiina ae e Matini le ola tutoatasi i mea tautupe na manaomia e auauna atu ai i le Alii ma isi i ni auala aoga. O le a se mea e mafai e talavou ona fai i le taimi nei e atiina ae ai tomai, aoga, ma auala e fesoasoani ai ia i latou e auauna atu i le Alii ma isi i le lumanai?

Ema Hale Samita: Ina ua ia feiloai ia Iosefa Samita, o Ema Hale o se tagata ausia le maualuga i le faitau, tusitala, faiaoga, ma se tagata musika. Faitau le Mataupu Faavae ma Feagaiga 25:5–7, 11, ma vaavaai mo tiutetauave na tuuina atu e le Alii ia Ema. Sa atiina ae e Ema tomai ma aoaoga ia na fesoasoani ia te ia e auauna atu ai i le Alii ma isi i ni auala aoga. O le a se mea e mafai e talavou ona fai i le taimi nei e atiina ae ai tomai, aoga, ma auala e fesoasoani ai ia i latou e auauna atu i le Alii ma isi i le lumanai?

Viliamu W. Phelps: Sa faatonuina e le Alii ia Viliamu W. Phelps, o se tagata faatoa liliu mai i le Ekalesia, e siitia atu i Misuri. Faitau le Mataupu Faavae ma Feagaiga 55:4 ma le 57:11–13, vaavaai mo se tofiga uigaese na tuu mai e le Alii ia Viliamu e tautua ai i lana Ekalesia. Faaaoga le “Tusitala ma Fatu Pese” faasino upu i le tusipese e saili ai mo viiga na tusia e Viliamu W. Phelps o loo faaauau pea ona faamanuiaina ai le Ekalesia i aso nei. Sa atiina ae e Viliamu ia tomai ma aoaoga ia na fesoasoani ia te ia e auauna atu ai i le Alii ma isi i ni auala aoga. O le a se mea e mafai e talavou ona fai i le taimi nei e atiina ae ai tomai, aoga, ma auala e fesoasoani ai ia i latou e auauna atu i le Alii ma isi i le lumanai?

Mafaufau e valaaulia vaega taitasi e faasoa mai i le vasega mea sa latou aoaoina.

E ono mafai ona e fesoasoani i tagata aoga e mafaufau i faataitaiga faaonapo nei o tagata o e na atiina ae le ola tutoatasi ona mafai lea ona auauna atu i isi i se ala faaKeriso. E mafai ona e faaalia le vitio “Strengthen Thy Brethren” (3:50) po o le “On the Lord’s Errand: The Life of Thomas S. Monson” mai le faailo taimi 19:54 i le 24:18, o loo maua uma i le ChurchofJesusChrist.org.

Mafaufau e faasoa atu pe na faapefea ona e auauna atu i isi po o auala na auauna ai ia te oe e ala i tomai, uiga aoga, ma uiga lelei na e atiina ae po o nisi tagata i le olaga atoa.

Ina ia faaiuina le lesona, atonu e te manao e tuu atu i tagata aoga se taimi e mafaufau loloto ai ma le agaga tatalo pe tusi mea latou te manatu e finagalo le Tama Faalelagi latou te faia i mea sa latou aoaoina ma lagonaina i le aso. E mafai ona faasoa mai e tagata aoga nisi o a latou manatunatuga i le vasega.

Punaoa Faaopoopo

Pe talafeagai le tausia o o’u lava manaoga a o lei fesoasoani atu i isi?

Sa faamanatu mai e Elder Jeffrey R. Holland o le Korama a Aposetolo e Toasefululua ia i tatou:

Mo outou o e saili ma le naunautai e tauave avega a le tasi ma le isi, e taua ona e toefaamalosia oe lava ma toe faatulaga oe lava pe a ua tele naua mea e faamoemoe mai e isi mai ia te oe, ma faapea ona tele naua ai lou malosi e alu ai. E leai se tagata e malosi naua e faapea ona latou le lagona ai le vaivai po o le le fiafia pe iloa ai le manaomia ona vaai faalelei i latou lava. Sa mautinoa lava le oo o Iesu i lena vaivai, lagona le alu ai o Lona malosi. Sa Ia tuuina atu ma tuuina atu, ae e i ai se tau e pipii atu ai i lena mea, ma sa Ia lagonaina le mamafa o le toatele e faalagolago atu ia te Ia. Ina ua papai atu le fafine sa i ai se faafitauli o le punatoto ia te Ia i le mano o tagata, sa Ia faamaloloina o ia, ae sa Ia matauina foi “ua alu atu le mana na ia te ia” (tagai Mareko 5:25–34).

Sa ou ofo lava ona o le mafai ona Ia tofa ao agi i le Sami o Kalilaia se matagi malosi ma ogaoga lea sa faapea ai Ona au soo o ni faifaiva atamamai, o le a goto le vaa. Oka se maoae o lena lelava? E fia ni lauga e mafai ona e tuuina atu ma ni faamanuiaga e mafai ona e faia e aunoa ma se matuai lelava lava? E tatau foi ona tausi faalelei i latou e tausia isi tagata. E tatau ona lava lou malosi ona faatoa mafai lea ona e fesoasoani atu i isi. (Jeffrey R. Holland, “Bearing One Another’s Burdens,” Ensign, Iuni 2018, 27–28)

E faapefea ona tatou tausia isi i le ala a le Faaola?

Sa faamatala mai e Peresitene Dieter F. Uchtdorf, a o i ai i le Au Peresitene Sili:

E toatele tagata lelei ma faalapotopotoga i le lalolagi o loo taumafai e faafetaia’ia ia manaoga faavavave o e matitiva ma e le tagolima i soo se mea. Tatou te faafetai mo lea mea, ae o le ala a le Alii e tausia ai ē le tagolima e ese lava mai le ala a le lalolagi. Ua fetalai le Alii “E tatau ona faia i la’u lava ala” [Mataupu Faavae ma Feagaiga 104:16; tagai foi fuaiupu 15]. E le gata ina gauai mai o Ia i o tatou manaoga vave; ae o lo o Ia popole foi mo lo tatou alualu i luma e faavavau. Mo lenei mafuaaga, ua i ai pea i le ala a le Alii le ola faalagolago o le tagata ia te ia lava ma o le auauna atu i o tatou tuaoi o se faaopoopoga lea i le tausia o e matitiva. (Dieter F. Uchtdorf, “O Le Faia i le Ala a le Alii,” Liahona,, Nov. 2011, 54)

Na aoao mai Elder Joseph B. Wirthlin (1917–2008) o le Korama a Aposetolo e Toasefululua:

O le Ekalesia a Iesu Keriso o le Au Paia o Aso e Gata Ai ma ona sui e taumafai e faataitai i Lana faataitaiga a o tatou saili e tuumamaina mafatiaga ma faafailele le ola tutoatasi. …

Na tautino mai e le Alii i se faaaliga i le Perofeta o Iosefa Samita: “O lo’u faamoemoe o le foai atu lea mo la’u au paia. … Ae e tatau ona faia i laʼu lava ala; ma faauta o le ala lenei ua folafola e Aʼu, o le Alii, e faia ai mea mo laʼu au paia, e faaea ai e matitiva, i le faamaulaloina o e mauʼoa” [MF&F 104:15–16]. O le auala a le Alii e aofia ai le fesoasoani i tagata ia fesoasoani ia i latou lava. E faaeaina e matitiva aua latou te galulue mo le fesoasoani le tumau latou te maua, e aoaoina i latou i mataupu faavae tonu, ma latou mafai ona faaeaina i latou lava mai le tulaga mativa, i le faalagolago ia i latou lava. E faamaulaloina e e mauoa aua ua latou lotomaualalo e tufatufa atu ma le limafoai a latou mea uma i e ua le tagolima. (Joseph B. Wirthlin, “Faagaeetiaina e le Soifua Manuia a le Ekalesia,” Ensign, Me 1999, 76–77)

Gaoioiga Faaopoopo e Aoao Ai

O se isi filifiliga mo le amataga o le lesona

Mafaufau e fai atu i se tagata volenitia ia auai i se lesona faatino. Fai atu i le volenitia e tuuina atu se mea latou te le o maua pe e lei saunia e tuuina atu. Mo se faataitaiga, e mafai ona e fai atu ia i latou e tuuina atu i tagata aoga taitasi se peni lanumeamata, se meaai, po o se aofaiga tautupe. A le mafai ona latou faia, fesili atu ia i latou pe aisea na latou le fesoasoani ai. (Ona faamautinoa atu lea ia i latou e le afaina ma faafetai atu ia i latou mo le auai i le lesona faatino.)

Ina ia fesoasoani i tagata aoga ia malamalama o lo tatou tomai e fesoasoani ai i isi e aafia i a tatou lava sauniuniga ma le ola tutoatasi, faaauau i anomea o i le lesona e amata i le saunoaga a Elder Robert D. Hales.

O le tausiga faaletagata lava ia e saunia ai i tatou e tautua atu i isi

Ina ia fesoasoani i tagata aoga ia malamalama i le ala e mafai ai e le tausiga faaletagata lava ia ona tatou auauna lelei atu i isi, mafaufau e faaali atu se ata o se faatanoa (pe faamanatu atu ia i latou le puna o le vai i la outou eria). Fesili i tagata aoga po o le a le mea e tupu ia i latou o e faalagolago i le faatanoa pe afai ua mūtū.

Valaaulia tagata aoga e matamata i le vitio “Self-Care Made Simple” (3:40), ma vaavaai pe mafai faapefea e a tatou taumafaiga e tausia i tatou lava ona faatusatusa i le faatumuina o se faatanoa i le vai e mafai ona faaaoga e tautua atu ai i isi.

A uma ona matamata e tagata aoga le vitio, e mafai ona e fai atu ia i latou e suesue fuaitau nei ma talanoaina mea ua latou aoaoina e uiga i le auauna atu i isi.

• Mosaea 4:26–27 (Aoaoga a le Tupu o Peniamina e uiga i le fesoasoani i e matitiva ma e le tagolima)

• Luka 22:31–32 (O le fautuaga a Iesu Keriso ia Peteru e uiga i le sauniaina o ia lava e fesoasoani ia i latou o siomia o ia)