Lesona 180: Fausiaina o le Ola Tutoatasi

Fausiaina o le Ola Tutoatasi i le Ala a le Alii

O le Fausiaina o le Ola Tutoatasi e Faamanuiaina ai i Tatou i le Faaletino ma le Faaleagaga

Ua folafola mai e le Faaola, “O lo’u faamoemoe o le faia lea o mea mo la’u au paia. … Peitai e tatau ona faia i laʼu lava ala” (Mataupu Faavae ma Feagaiga 104:15–16). E fesoasoani Iesu Keriso i Lana Au Paia e fausia le ola tutoatasi ina ia mafai ona latou saunia mea mo i latou lava ma aoao e faamanuia isi e pei ona Ia faia. O lenei lesona e mafai ona fesoasoani i tagata aoga ia malamalama i le manaomia ona fausia le ola tutoatasi i le ala a le Alii.

Gaoioiga E Ono Mafai Ona Aoao Ai

Ola tutoatasi

Mafaufau e amata le lesona i le sailia po o a mea ua uma ona malamalama i ai tagata aoga e uiga i le ola tutoatasi. E mafai ona e tusia le ola tutoatasi i luga o le laupapa ma fai atu i tagata aoga e faamatala mai le uiga ma pe aisea e taua ai le tauivi i ai.

E mafai ona e fesoasoani ia i latou e talanoaina mea latou te iloa e uiga i le ola tutoatasi e ala i le faaali atu o ata o se taumafataga o i’a ma ni mea fagota . Fai atu i tagata aoga e talanoaina po o le fea ata o loo i ai mea e sili ona aoga mo se tasi e fausia ai le ola tutoatasi i le sauniaina o meaai mo o latou aiga. Atonu e te manao e faaali atu ia faamatalaga e lua o loo i lalo o se vaega o le talanoaga.

Sa faamalamalama mai e le Peresitene Gordon B. Hinckley (1910–2008) le taua o le aoao e tausia i tatou lava:

E i ai se faaupuga ua leva e faapea, afai e te avatu i se tagata se i’a, o le a maua lana meaai mo se aso. Ae afai e te aoao o ia e fagota, o le a maua lana meaai i aso uma o totoe o lona olaga. (Gordon B. Hinckley, “O le Tupe Faaagaga mo Aoga,” Ensign, Me 2001, 52)

Na aoao mai e le Au Peresitene Sili mea nei e uiga i le ola tutoatasi:

Ua folafola mai e le Alii, ‟O lo’u faamoemoe o le faia lea o mea mo la’u au paia” [Mataupu Faavae ma Feagaiga 104:15]. O lenei faaaliga o se folafolaga mai le Alii o le a Ia saunia ni faamanuiaga faaletino ma tatala faitotoa o le ola tutoatasi, o le mafai lea e i tatou ona saunia mea e manaomia o le olaga mo i tatou lava ma tagata o o tatou aiga. …

Faamolemole ia e mautinoa o oe o se atalii po o se afafine o lo tatou Tama i le Lagi. E alofa o Ia ia te oe ma o le a lē tuulafoaia lava oe. Na te silafia oe ma ua sauni e tuuina atu ia te oe faamanuiaga faaleagaga ma faaletino o le ola tutoatasi. (O Le Au Peresitene Sili, i le O Lo’u Faavae mo le Ola Tutoatasi [2016],3)

• O le a le mea ua e aoao mai i nei fuaiupu e uiga i le ola tutoatasi?

  A uma ona talanoaina e le vasega ia faamatalaga na muamua atu, mafaufau e valaaulia tagata aoga e aotele lo latou malamalama i le ola tutoatasi i se paga. E ono fesoasoani le faaauau pea ona faaali atu le saunoaga talu ai a le Au Peresitene Sili mo se faamatalaga. Ona valaaulia lea o ni au tauofo e faasoa mai a latou tali i le vasega.

  Ia mautinoa ua malamalama tagata aoga faapea faatasi ai ma le fesoasoani a le Alii, e mafai ai ona tatou fausia le ola tutoatasi e saunia ai mea e manaomia o le olaga mo i tatou lava ma o tatou aiga.

• Aisea e te manatu ai o le fausiaina o le ola tutoatasi e taua le malamalama iai a o e talavou?

• Afai e lagona e se tasi le lofituina i le manatu o le ola tutoatasi, o le a se mea e mafai ona e faamanatu atu ia i latou e uiga i le Tama Faalelagi ma Iesu Keriso e mafai ona avatu ai ia i latou le faamoemoe?

Ina ia fesoasoani i tagata aoga ia iloa auala aoga e faatatau ai mataupu faavae o le ola tutoatasi ia i latou, mafaufau e tusi autu nei i luga o le laupapa: aoga, soifua maloloina, galuega, tupe, malosi faaleagaga. Vaevae tagata aoga i ni vaega ma atofa atu se autu se tasi i vaega taitasi. Valaaulia tagata aoga e talanoaina mea nei i a latou vaega ona faasoa mai lea i le vasega mea sa latou talanoaina.

Tali fesili nei e faavae i se tasi o autu nei: aoga, soifua maloloina, galuega, mea tautupe, po o le malosi faaleagaga:

• E faapefea ona e faamatalaina se tasi o loo ola tutoatasi i lena vaega?

• E mafai faapefea e se talavou ona amata fausiaina le ola tutoatasi i lena vaega? E mafai faapefea ona latou valaaulia le Alii e fesoasoani ia i latou?

• O a faamanuiaga o le aoaoina e faia nisi mea mo i tatou lava i lenei vaega?

Uunaia tagata aoga e gauai atu i uunaiga mai le Agaga Paia e uiga i auala e mafai ona latou saunia ai mea mo i latou lava. Fesoasoani i tagata aoga ia malamalama e tusa lava pe mafai ona latou faia na o i latou ni mea, e manaomia lava ona latou faalagolago i le Alii. E mafai foi ona talafeagai le fesili atu mo se fesoasoani mai isi i nisi taimi.

Ola-tutoatasi i le ala a le Alii

Ina ia fesoasoani i tagata aoga ia malamalama i mataupu faavae e uiga i le ola tutoatasi e mafai ona tatou aoao mai le Alii ma Ana auauna, mafaufau i se tasi o filifiliga nei:

1. Vaevae tagata aoga i ni vaega toalaiti, ma tufa atu le pepa e tufa atu “Fausiaina o le Ola Tutoatasi i le Ala a le Alii.” E mafai e vaega taitasi ona vaevae mau faasino ma faamatalaga i tagata o le vaega e suesue ai. Ona mafai lea ona latou faasoa atu o le tasi i le isi i mea sa latou aoaoina ma tali faatasi fesili.

2. Afai e maua e tagata aoga ia punaoa ma le poto masani e sue ai e i latou lava ia mau faasino ma saunoaga a taitai o le Ekalesia, faaali atu fesili mai le pepa e tufa atu i luga o le laupapa. Valaaulia tagata aoga e suesue i tusitusiga paia ma upu a perofeta mo tali i fesili taitasi. O se tasi o punaoa e mafai ona suesue e tagata aoga o le vaega o Autu ma Fesili ua faaautuina “Ola Tutoatasi.” E maua lenei punaoa i le Potutusi a le Talalelei ma i le polokalama o le Potutusi o le Talalelei ma i le ChurchofJesusChrist.org.

Fausiaina o le Ola Tutoatasi i le Ala a le Alii

Suesue mau faasino ma faamatalaga o i lalo, e saili ai mo tali i fesili e lua nei:

1. O le a se mea na aoao mai e le Alii i tusitusiga paia ma e ala mai i Ana perofeta e mafai ona fesoasoani ia i tatou e fausia ai le ola tutoatasi?

2. O a ni faafitauli e ono feagai ma se tasi o le a latou manaomia ai le fesoasoani a le Tama Faalelagi e faatoilalo ai?

• Mataupu Faavae ma Feagaiga 9:7–8

• Mataupu Faavae ma Feagaiga 58:26–28

• Mataupu Faavae ma Feagaiga 88:124

• Iosefa Samita—Talafaasolopito 1:55

Sa aoao mai Peresitene Ezra Taft Benson (1899–1994):

E galue le Alii mai totonu i fafo. E galue le lalolagi mai fafo i totonu. E ave ese e le lalolagi tagata mai tulaga eleelea. E ave ese e Keriso tulaga eleelea mai tagata, ona latou ave ese ai lea o i latou mai tulaga eleelea. E suia e le lalolagi tagata e ala i le suia o lo latou siosiomaga. E suia e Keriso tagata ona latou suia ai lea o lo latou siosiomaga. E mamanu e le lalolagi amioga a tagata, ae o Keriso e mafai ona suia le natura o le tagata. (Ezra Taft Benson, “Fanauina i la le Atua,” Ensign, Nov. 1985, 6)

Sa faamatala mai e Peresitene Dieter F. Uchtdorf, a o i ai i le Au Peresitene Sili:

O le ala a le Alii e le o le saofai i autafa o le vaitafe ma faatalitali i le taimi e pe ai le vai ona tatou kolosi lea. Ae e ala i le o mai faatasi, afe i luga lima o o tatou ofu, ma o e galulue, ma fausia se alalaupapa po o se vaa e kolosi ai le vai o o tatou luitau. (Dieter F. Uchtdorf, “O Le Faia i le Ala a le Alii,” Liahona, Nov. 2011, 54)

Tuu atu se avanoa mo vaega e faasoa mai ai i le vasega a latou tali ma malamalamaaga na latou maua i le taimi o a latou suesuega. E mafai foi ona latou faasoa mai ni faataitaiga i ala na faamanuiaina ai i latou e le Alii i a latou taumafaiga e ola i mataupu faavae o le ola tutoatasi.

Na atiina ae e le Faaola le alofa tunoa mo le alofa tunoa

Atonu e iloa e tagata aoga e mafai ona lofituina le taumafai e fausia le ola tutoatasi i le tele o vaega eseese uma i le taimi e tasi. Faamalamalama atu e mafai ona tatou aoao mai le faataitaiga a le Faaola faapea o le fausiaina o le ola tutoatasi e alu ai sina taimi. Mafaufau e faaali atu le ata lenei a o faitau e tagata aoga le fuaitau o mau lea.

Faitau le Mataupu Faavae ma Feagaiga 93:11–13, ma vaavaai mo mea na aoao mai e Ioane le Papatiso e faatatau i atinae a le Faaola. (O se vaega o tusitusiga a Ioane le Papatiso sa faaalia ia Iosefa Samita ma faamauina i le vaega 93.)

Afai e manaomia e tagata aoga se fesoasoani i le taliina o fesili nei, atonu e te manao e faamalamalama atu o le faaauauina o le alofa tunoa i le alofa tunoa o lona uiga o le faaleleia atili lea i sina mea itiiti ma sina fesoasoani faalelagi. E mafai ona e fai atu i tagata aoga e faitau le 2 Nifae 28:30 e fesoasoani ai ia i latou ia iloa pe faapefea foi ona tatou manaomia ona alualu i luma i “mai lea sitepu i lea sitepu.”

• O le a sou manatu i le uiga e faapea, “na faaauau le Faaola mai le alofa tunoa i lea alofa tunoa”?(fuaiupu 13).

• E mafai faapefea e le faataitaiga a le Faaola o le faaauau pea mai lea alofa tunoa i lea alofa tunoa ona fesoasoani ia te oe i au taumafaiga e fausia le ola tutoatasi faaleagaga ma le faaletino?

Fausiaina o le ola tutoatasi i lou lava olaga

Valaaulia tagata aoga e mafaufau i mea atonu na aoao atu e le Agaga Paia ia i latou e uiga i le fausiaina o le ola tutoatasi. Ina ia fesoasoani ia i latou e manatunatu, e mafai ona e faaali atu fesili nei. Valaaulia tagata aoga e iloilo lo latou tulaga o i ai nei o le ola tutoatasi e ala i le mafaufau loloto pe tali atu i fesili nei i a latou api talaaga mo suesuega.

• O le a lo’u mautinoa i le fausiaina o le ola tutoatasi i vaega eseese o lo’u olaga?

• Aisea e aoga ai le amata atiina ae o le tomai e saunia ai mea mo a’u lava i nei vaega?

• E mafai faapefea ona ou faaaofia le Alii i le fausiaina o le ola tutoatasi sili atu i lo’u olaga?

Valaaulia tagata aoga e mafaufau i ni auala faapitoa e mafai ona latou amata fausia ai le ola tutoatasi i o latou olaga. E mafai foi ona e faasoa atu ou manatu ma molimau e uiga i le mana o le ola tutoatasi ma pe na faapefea ona faamanuiaina ai lou olaga.

Punaoa Faaopoopo

Aisea e tatau ai ona ou atiina ae le ola tutoatasi?

Sa aoao mai Peresitene Dallin H. Oaks o le Au Peresitene Sili:

Po o le a lava le mafuaaga o lo tatou faalagolago atu i isi mo ni faaiuga po o ni punaoa lea e mafai ona tatou saunia mo i tatou lava, o le a faavaivaiina ai i tatou i le faaleagaga ma telegese ai lo tatou alualu i luma i le mea o lo o faamoemoe le fuafuaga o le talalelei mo i tatou ina ia oo i ai. (Dallin H. Oaks, “Salamo ma Suiga,” Liahona, Nov. 2003, 40)

Na aoao mai e Elder Hugo E. Martinez o le Au Fitugafulu:

O le taumafai ia ola tutoatasi o se vaega o la tatou galuega i luga o le ala o feagaiga e taitai atu ai i le Tama Faalelagi ma Lona Alo, o Iesu Keriso. O le a faamalosia ai lo tatou faatuatua ia Iesu Keriso ma fusia fiafia ai i tatou ia te Ia e ala i feagaiga ma sauniga o le faaolataga ma le faaeaga. O le ola-tutoatasi o se aoaoga faavae o le talalelei a Iesu Keriso, ae e le o se polokalama. O se faagasologa tumau mo le olaga atoa, ae le o se mea e faa-tasi ona tupu. (Hugo E. Martinez, “Aoao Atu o le Ola Tutoatasi i Tamaiti ma le Autalavou,” Liahona, Me 2022, 95)

Tagai foi “Ia Ola Tutoatasi e Auauna Lelei Atu ai i le Alii” saunia e Elder Alfred Kyangu o le Fitugafulu (Itulau a Aferika Tutotonu i le Lotoifale, Liahona, Iuni 2021).

O le a le uiga o le ola tutoatasi faaleagaga?

Na faamatala mai e Elder Kent F. Richards o le Fitugafulu:

[O le ola tutoatasi faaleagaga] o sina vaega foi lea e fai sina sese; o le mea moni e le o tu i ou lava vae ma fausia lou lava fiafia—o lona uiga o le faia o mea uma tatou te mafaia ona tuu atu lea o le alofa tunoa o le Tama, le Alo, ma le Agaga Paia e siitia i tatou i luga atu o lo tatou lava malosi. O lona uiga o le faia o mea uma tatou te mafaia mo lo tatou lava tuputupu ae faaleagaga ma le aoaoina, ma le iloaina e le mafai ona faamanuiaina i tatou e aunoa ma le fesoasoani lagolago a le mana faaleagaga ma meaalofa mai luga. …

O le ola tutoatasi faaleagaga e le faapea e tatau ona e faia na o oe—ae o lona uiga e tatau ona e pule ma amatalia lenei faagasologa. E ui e tatau ona e faia au lava filifiliga e ala i lou lava faitalia, ae e le mafai ona e maua le manuia na o oe lava. Sa silafia e le Tama Faalelagi lena mea ina ua Ia faia Lana fuafuaga. O le a Ia faamanuiaina i tatou i aso uma e ala i le Agaga Paia, pe a tatou faaagavaaina i tatou lava i aso taitasi. (Kent F. Richards, “Tutoatasi Faaleagaga” [Ensign College devotional, June 11, 2019], ensign.edu)

E faapefea ona atiina ae lo’u ola tutoatasi faaleagaga?

Na faamalamalamaina e Elder Robert D. Hales (1932–2017) o le Korama a Aposetolo e Toasefululua:

E liuaina i tatou ma avea ma tagata e ola faalagolago faaleagaga ia i tatou lava pe a tatou ola ma le agaga tatalo ia tatou feagaiga—e ala i le taumamafa ma le agavaa i le faamanatuga, ola agavaa mo se pepa faataga o le malumalu, ma le ositaulaga e auauna atu i isi. (Robert D. Hales, “O Le Manatuaina Pe O Ai i Tatou: O Le Faamanatuga, o le Malumalu, ma le Ositaulaga e Ala i le Auauna Atu,” Liahona, Me 2012, 34)

Gaoioiga Faaopoopo e Aoao Ai

Polokalama o le Potutusi o le Talalelei

Afai e maua, valaaulia tagata aoga e faaaoga le faailoga “Ola Tutoatasi” i luga o le polokalama o le Potutusi o le Talalelei. O loo maua i lalo o le vaega o le “Fesoasoani mo le Olaga”. Mafaufau e tuu atu ia i latou sina taimi e suesue ai vaega eseese o loo maua i le vaega o le “Ola Tutoatasi”. E mafai ona filifili tagata aoga e vaavaai i se tusi lesona o le ola tutoatasi e fiafia i ai i latou. E mafai ona latou amata i le faitauina o le savali mai le Au Peresitene Sili o loo maua i le amataga o tusi lesona taitasi. A uma ni nai minute o le suesuega i luga le initaneti, e mafai e tagataaoga ona faasoa atu i isi mea na latou mauaina.

Se isi amataga

Mafaufau e faaali le vitio “Solve Problems and Make Decisions” (1:55). E mafai e tagata aoga ona vaavaai i mea e fesoasoani ai mamoe i le puaa e aoao ai e uiga i le fausiaina o le ola tutoatasi. E mafai ona e faaaoga fesili e pei o nei e ta’ita’iina ai se talanoaga:

• E mafai faapefea ona e fesootai i le puaa? O a nisi o tulaga faaletino, faaleagaga, faaleaoaoga, po o isi tulaga e te feagai ai lea e matele ina e faalagolago atu ai i isi nai lo le fausia o le ola tutoatasi?

• O ai nisi o mamoe o aso nei e mafai ona fesoasoani ia i tatou e fausia ai le ola tutoatasi sili atu?

Vitiō

Afai o le a manuia tagata aoga mai le aoaoina o nisi lesona e uiga i le ola tutoatasi, e mafai ona e faaalia le vitio “He Polished My Toe” (2:02). A o latou matamata i le vitio, e mafai e tagata aoga ona fai se lisi o lesona latou te aoaoina mai i mea na tutupu ia Elder Enrique R. Falabella. A uma le vitio, e mafai e tagata aoga ona faasoa mai mea na latou aoaoina ma pe faapefea ona faatatau na lesona i le ola tutoatasi.