“Lesona 180: Manorina fizakan-tena araka ny fomban’ny Tompo: Ny fanorenana fizakan-tena dia mitahy antsika ara-nofo sy ara-panahy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Manorina fizakan-tena araka ny fomban’ny Tompo,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 180: Manorina fizakan-tena
Manorina fizakan-tena araka ny fomban’ny Tompo
Ny fanorenana fizakan-tena dia mitahy antsika ara-nofo sy ara-panahy
Ny Mpamonjy dia nanambara hoe: “Ny tanjoko dia ny hamatsy ny olomasiko. … Saingy tsy maintsy ilaina ny hanaovana izany araka ny fombako” (Fotopampianarana sy Fanekempihavanana 104:15–16). Manampy ny Olomasiny hanorina fizakan-tena i Jesoa Kristy mba hahafahan’izy ireo mamelona ny tenany sy mianatra hitahy ny hafa tahaka Azy. Ity lesona ity dia afaka manampy ireo mpianatra hahatakatra ny ilana ny fanorenana fizakan-tena araka ny fomban’ny Tompo.
Ireo sahanasa fianarana azo atao
Fizakan-tena
Hevero ny hanomboka ny lesona amin’ny alalan’ny fikarohana ny zavatra efa takatr’ireo mpianatra mikasika ny fizakan-tena. Azonao atao ny manoratra ny hoe Fizakan-tena eny amin’ny solaitrabe ary angataho ny mpianatra mba hamaritra ny dikan’izany sy ny antony maha-zava-dehibe ny fiezahana.
Azonao atao ny manampy azy ireo hifanakalo hevitra mikasika ny zavatra fantany momba ny fizakan-tena amin’ny alalan’ny fampisehoana sarina trondro iray atao sakafo sy fitaovana fanjonoana vitsivitsy. Asao ny mpianatra hifanakalo hevitra hoe iza amin’ireo sary ireo no ahitana ireo zavatra tena manampy indrindra ho an’ny olona iray mba hanorenana fizakan-tena amin’ny famatsiana sakafo ho an’ny fianakaviany. Azonao atao ny mampiseho ireo fanambarana roa etsy ambany ho anisan’ny ao anatin’ny fifanakalozan-kevitra.
Ny Filoha Gordon B. Hinckley (1910–2008) dia nanazava ny lanjan’ny fianarana mamelona ny tenantsika:
Misy fomba fiteny taloha milaza fa raha manome trondro ny olona iray ianao, dia hihinana iray andro izy. Fa raha ampianarinao manarato izy, dia hihinana mandritra ny androm-piainany. (Gordon B. Hinckley, “The Perpetual Education Fund,” Ensign, May 2001, 52)
Ny Fiadidiana Voalohany dia nampianatra izao manaraka izao momba ny fizakan-tena:
Ny Tompo dia nanambara hoe, “Ny tanjoko dia ny hamatsy ny olomasiko” [Fotopampianarana sy Fanekempihavanana 104:15]. Io fanambarana io dia fampanantenana avy amin’ny Tompo fa hanome antsika fitahiana ara-nofo Izy ary hanokatra ny varavarana mba hananana fizakan-tena, izay fahafahana ho antsika mba hamatsy ny zavatra ilaina eo amin’ny fiainana ho an’ny tenantsika sy ho an’ny olona ao amin’ny fianakaviantsika. …
Matokia fa zanaky ny Raintsika any An-danitra ianao. Tiany ianao ary tsy handao anao na oviana na oviana Izy. Fantany ianao ary Izy dia vonona ny hanome ireo fitahiana ara-panahy sy ara-batana entin’ny fizakan-tena. (The First Presidency, in My Foundation for Self-Reliance [2016], 3)
-
Inona no ianaranao avy amin’ireo fanambarana mikasika ny fizakan-tena ireo?
Rehefa avy nifanakalo hevitra momba ireo fanambarana teo aloha ny mpianatra dia asao ireo mpianatra hamintina ny fahatakarany ny fizakan-tena amin’ny namana iray. Mety hanampy ny fanohizana ny fampisehoana ilay fanambarana teo aloha nataon’ny Fiadidiana Voalohany mba ho fanovozan-kevitra. Avy eo dia manasà mpilatsaka an-tsitrapo hizara ny famintinana nataony amin’ny iray kilasy.
Ataovy izay hahatakaran’ny mpianatra fa afaka manorina fizakan-tena isika miaraka amin’ny fanampian’ny Tompo mba hanomezana ireo zavatra ilaina eo amin’ny fiainana ho an’ny tenantsika sy ho an’ny fianakaviantsika.
-
Nahoana araka ny eritreritrao no zava-dehibe ny fanorenana fizakan-tena raha mbola tanora ianao?
-
Raha misy olona mahatsapa ho sahirana amin’ny fieritreretana ny fomba hahatongavana any amin’ny fizakan-tena, inona no azonao ampahatsiahivina azy momba ny Ray any An-danitra sy an’i Jesoa Kristy izay afaka manome fanantenana azy ireo?
Mba hanampiana ny mpianatra hahita ny fomba mora hampiharana ny fitsipiky ny fizakan-tena eo amin’izy ireo dia soraty eny amin’ny solaitrabe ireto lohahevitra manaraka ireto: fanabeazana, fahasalamana, asa, fitantanam-bola, hery ara-panahy. Zarao ho vondrona ireo mpianatra ary omeo lohahevitra iray ny vondrona tsirairay. Asao ny mpianatra mba hiresaka momba izao manaraka izao ao amin’ny vondrona misy azy ary avy eo hizara amin’ny iray kilasy ny zavatra noresahiny.
Valio ireto fanontaniana manaraka ireto izay mifototra amin’ny iray amin’ireto lohahevitra ireto: fianarana, na fahasalamana, na asa, na fitantanam-bola, na ny hery ara-panahy:
-
Ahoana no hamaritanao ny olona iray izay mizaka tena amin’io sehatra io?
-
Ahoana no ahafahan’ny zatovo iray manomboka manorina fizakan-tena amin’izany sehatra izany? Ahoana no ahafahan’izy ireo manasa ny Tompo mba hanampy azy ireo?
-
Inona no soa azo avy amin’ny fianarana manao zavatra bebe kokoa ho an’ny tenantsika amin’io sehatra io?
Amporisiho ny mpianatra hifantoka amin’ireo bitsika avy amin’ny Fanahy Masina mikasika ny fomba ahafahan’izy ireo mamelona ny tenany. Ampio ny mpianatra hahatakatra fa na dia afaka manao zavatra samirery aza izy ireo dia mbola mila miantehitra amin’ny Tompo ihany. Mety ho tsara koa indraindray ny mangataka fanampiana amin’ny hafa.
Fizakan-tena araka ny fomban’ny Tompo
Mba hanampiana ireo mpianatra hahatakatra ireo fitsipika momba ny fizakan-tena izay azontsika ianarana avy amin’ny Tompo sy ny mpanompony dia diniho ny iray amin’ireto safidy manaraka ireto:
-
Zarao ho vondrona kely ny mpianatra ary zarao ilay taratasy zaraina hoe “Manorina fizakan-tena araka ny fomban’ny Tompo.” Ny vondrona tsirairay dia afaka mizara ireo andinin-tsoratra masina sy ireo teny nambara eo anivon’ireo mpikambana ao amin’ny vondrona mba hohalalinina. Avy eo dia afaka mifampizara ny zavatra nianarany izy ireo ary miara-mamaly ireo fanontaniana.
-
Raha manana ny loharanom-pahalalana sy traikefa hitadiavana samirery ireo andinin-tsoratra masina sy fanambarana avy amin’ireo mpitarika ao amin’ny Fiangonana ny mpianatra dia asehoy eny amin’ny solaitrabe ireo fanontaniana avy amin’ilay taratasy zaraina. Asao ny mpianatra hikaroka ao amin’ny soratra masina sy ny tenin’ireo mpaminany ny valin’ny fanontaniana tsirairay. Loharanom-pitaovana iray azon’ny mpianatra halalinina ny fizarana ao amin’ny Sujets et questions mitondra ny lohateny hoe “Autonomie.” Izany dia hita ao amin’ny application Mediathèque de l’ Évangile sy ao amin’ny ChurchofJesusChrist.org.
Manorina fizakan-tena araka ny fomban’ny Tompo
Halalino ireo andinin-tsoratra masina sy teny nambara etsy ambany, ka tadiavo ny valin’ireto fanontaniana roa manaraka ireto:
-
Inona no nampianarin’ny Tompo ao amin’ny soratra masina sy amin’ny alalan’ireo mpaminaniny izay afaka manampy antsika hanorina fizakan-tena?
-
Inona avy ireo sakana mety hatrehin’ny olona iray ka hilan’izy ireo fanampiana avy amin’ny Ray any An-danitra?
Nampianatra ny Filoha Ezra Taft Benson (1899–1994) hoe:
Miasa avy ao anaty mankaty ivelany ny Tompo. Miasa avy aty ivelany mankao anaty izao tontolo izao. Manaisotra ny olona avy ao amin’ny toerana mahantra izao tontolo izao. Manaisotra ny toerana mahantra avy ao anatin’ny olona i Kristy ary avy eo dia manaisotra ny tenan’izy ireo avy ao amin’ny toerana mahantra izy ireo. Mamolavola ny olona amin’ny alalan’ny fanovana ny tontolo iainany izao tontolo izao. Manova ny olona i Kristy, ary ireo olona ireo no manova ny tontolo iainany avy eo. Mamolavola ny fitondran-tenan’ny olombelona izao tontolo izao, fa afaka manova ny fitondran-tenan’ny olombelona kosa i Kristy. (Ezra Taft Benson, “Born of God,” Ensign, Nov. 1985, 6)
Nanazava ny Filoha Dieter F. Uchtdorf fony izy tao amin’ny Fiadidiana Voalohany hoe:
Ny fomban’ny Tompo dia tsy ny mijanona eo amoron’ny koriandrano ary miandry ny rano mba ho tapitra izay vao miampita. Fa miara-miasa kosa, mampiakatra ny tanan’akanjo, mandeha miasa, ary manamboatra tetezana na sambo ahafahana miampita ny ranon’ny olantsika. (Dieter F. Uchtdorf, “Manome araka ny fomban’ny Tompo,” Liahona, nôv. 2011, 54)
Omeo fahafahana ny vondrona hizara amin’ny iray kilasy ny valinteniny sy ny hevi-baovao azony nandritra ny fandalinany. Mety hizara ohatra momba ny fomba nitahian’ny Tompo azy ireo ihany koa izy ireo tamin’ny ezaka nataony mba hiaina ireo fitsipiky ny fizakan-tena.
Nivoatra tao anatin’ny fahasoavana niampy fahasoavana ny Mpamonjy
Mety ho tsapan’ny mpianatra fa mety ho sarotra ny miezaka manorina fizakan-tena amin’ny sehatra maro samihafa ao anatin’ny indray mipi-maso. Hazavao fa afaka mianatra avy amin’ny ohatra nasehon’ny Mpamonjy isika fa mitaky fotoana ny fanorenana ny fizakan-tena. Hevero ny hampiseho ity sary manaraka ity rehefa mamaky ity andinin-tsoratra masina manaraka ity ny mpianatra.
Vakio ny Fotopampianarana sy Fanekempihavanana 93:11–13, ka tadiavo ny zavatra nampianarin’i Jaona Mpanao Batisa momba ny fivoaran’ny Mpamonjy. (Ny ampahany amin’ny asa soratr’i Jaona Mpanao Batisa dia nambara tamin’i Joseph Smith ary voarakitra ao amin’ny fizarana 93.)
Raha mila fanampiana amin’ny famaliana ireto fanontaniana manaraka ireto ny mpianatra dia azonao atao ny manazava fa ny fanohizana ny fahasoavana miampy fahasoavana dia midika hoe mivoatra tsikelikely miaraka amin’ny fanampian’ Andriamanitra. Azonao atao ny manasa ny mpianatra hamaky ny 2 Nefia 28:30 mba hanampiana azy ireo hahita ny fomba ilantsika koa mivoatra “andalan-tsoratra anampy andalan-tsoratra.”
-
Araka ny eritreritrao, dia inona ny dikan’ny hoe ny Mpamonjy dia “nanohy ny fahasoavana niampy fahasoavana”? (andininy 13).
-
Amin’ny fomba ahoana no ahafahan’ny ohatra nasehon’ny Mpamonjy amin’ny fanohizana ny fahasoavana miampy fahasoavana hanampy anao amin’ny ezaka ataonao mba hanorenana fizakan-tena ara-panahy sy ara-nofo?
Manorina fizakan-tena eo amin’ny fiainanao manokana
Asao ny mpianatra hisaintsaina ny zavatra mety ho nampianarin’ny Fanahy Masina azy ireo mikasika ny fanorenana fizakan-tena. Mba hanampiana azy ireo hisaintsaina dia azonao atao ny mampiseho ireto fanontaniana manaraka ireto. Asao ny mpianatra hanombantombana ny toetry ny fizakan-tenany amin’izao fotoana izao amin’ny alalan’ny fisaintsainana na famaliana ireto fanontaniana manaraka ireto ao anatin’ny diary fandalinany.
-
Manao ahoana ny fahatokian-tenako eo amin’ny fanorenana fizakan-tena eo amin’ny sehatra samihafa eo amin’ny fiainako?
-
Nahoana no manampy ny manomboka mampivoatra ny fahaizako mamelona ny tenako amin’ireo sehatra ireo?
-
Ahoana no ahafahako mampandray anjara ny Tompo amin’ny fanorenana fizakan-tena bebe kokoa eo amin’ny fiainako?
Asao ny mpianatra handinika fomba manokana izay mety hanombohan’izy ireo hanorina fizakan-tena eo amin’ny fiainany. Azonao atao koa ny mizara ny eritreritrao sy ny fijoroana ho vavolombelona anananao momba ny herin’ny fananana fizakan-tena sy ny fomba nitahian’izany ny fiainanao.