“Lesona 183—Ny fizakan-tena dia manome fahafahana antsika hikarakara tsara kokoa ny hafa: Miomana hanompo tahaka ny Mpamonjy,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Ny fizakan-tena dia manome fahafahana antsika hikarakara tsara kokoa ny hafa,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 183: Manorina fizakan-tena
Ny fizakan-tena dia mamela antsika hikarakara tsara kokoa ny hafa
Miomana hanompo tahaka ny Mpamonjy
Nampianatra ireo mpianany ny Mpamonjy mba “ []hamonjyny osa … ary [hampatanjaka] ny lohalika malemy” (Fotopampianarana sy Fanekempihavanana 81:5). Afaka manaraka tsara kokoa io torolalana io isika rehefa lasa mizaka tena bebe kokoa. Ity lesona ity dia afaka manampy ireo mpianatra hahatakatra ny fomba ahafahan’izy ireo manaraka tsara kokoa ny ohatra nasehon’ny Mpamonjy teo amin’ny fanampiana ny hafa.
Ireo sahanasa fianarana azo atao
Ny fahafahana manampy ny hafa
Mba hanampiana ireo mpianatra hahatakatra fa misy fiantraikany amin’ny fahafahantsika manampy ny hafa ny fahazoana fizakan-tena dia asao ny mpianatra telo hamaky ny iray amin’ireto toe-javatra manaraka ireto. Miatoa kely aorian’ny famakiana ny toe-javatra tsirairay ary angataho ny iray kilasy mba hizara lafin-javatra samihafa izay afaka mamaritra hoe hatraiza no ahafahan’i Mindy, na i Nathan, na i Jayda manampy. (Raha tianao, dia afaka mamorona rafi-tantara hafa izay mifanaraka kokoa amin’ny mpianatrao ianao.)
-
Ny naman’i Mindy dia sahirana amin’ny fahatakarana ny enti-mody iray ao anatin’ny taranja matematika ary mangataka fanampiana amin’i Mindy.
-
Nihaona tamin’ny olona iray izay manana fanontaniana maro mikasika ny famerenana amin’ny laoniny ny Fiangonan’ny Mpamonjy i Nathan amin’ny maha-misiônera vaovao azy.
-
Fantatr’i Jayda fa tsy afaka mampitafy akanjo mafana ho an’ny zanany ny fianakaviana iray ao amin’ny paroasiny.
Hevero ny hampiseho na hanome ny tahadikan’ity teny manaraka ity izay nambaran’ny Loholona Robert D. Hales (1932–2017) tao amin’ny Kôlejin’ny Apôstôly Roambinifolo. Asao izy ireo ao anatin’ny vondrona kely misy azy mba hitady farafahakeliny fehezan-teny iray avy amin’ny andiam-pehezan-teny tsirairay izay mety miantefa amin’ireo rafi-tantara etsy ambony ary hifanakalo hevitra momba izany. (Raha ilaina dia ampio ireo mpianatra hahatakatra fa ny teny hoe ara-nofo araka ny ampiasaina azy ao amin’ilay teny nambara dia mety hahitana sehatra maro ao anatin’ny fifanampiana, toy ny ara-bola, ny ara-panabeazana, ny ara-pihetseham-po, ary ny ara-batana.)
Ny fizakan-tena dia ny fandraisantsika andraikitra ho an’ny filaminantsika manokana ara-panahy sy ara-batana sy ho an’ny filaminana ara-panahy sy ara-batan’ireo olona izay napetrak’ Andriamanitra hokarakaraintsika. Rehefa manana fizakan-tena ihany isika vao afaka manaraka marina ny ohatra nasehon’ny Mpamonjy eo amin’ny fanompoana sy fitahiana ny hafa.
Zava-dehibe ny mahatakatra fa ny fizakan-tena dia fitaovana hanatratrarana tanjona iray. Ny tanjontsika faratampony dia ny ho lasa tahaka ny Mpamonjy ary ho tratra izany tanjona izany amin’ny alalan’ny fanompoantsika tsy misy tambiny ny hafa. Arakaraka ny halehiben’ny fizakan-tenantsika no hitomboan’ny fahafahantsika manompo na hihenan’izany.
Hoy ny Filoha Marion G. Romney indray mandeha hoe: “Tsy avy ao amin’ny fitoeran-tsakafo foana no hanomezana sakafo ireo noana. Tsy avy amin’ny paoketra foana no hahazoana vola hanampiana ireo sahirana. Tsy avy amin’ireo mosarena ara-pihetseham-po no hahazoana fanohanana sy fanehoam-pitiavana. Tsy ho avy amin’izay tsy nandia fianarana no hahazoana fampianarana. Ary ny zava-dehibe indrindra amin’izany rehetra izany, dia tsy avy amin’izay malemy ara-panahy no hahazoana fitarihana ara-panahy” (in Conference Report, Oct. 1982, 135; or Ensign, Nov. 1982, 93). (Robert D. Hales, “A Gospel Vision of Welfare: Faith in Action,” in Basic Principles of Welfare and Self-Reliance [worldwide leadership training meeting, 2009], 1–2; see also ChurchofJesusChrist.org)
-
Inona no fahamarinana nianaranao avy tamin’ny Loholona Hales?
Rehefa mamaly ilay fanontaniana teo aloha ny mpianatra dia ataovy izay hahatakarany fa rehefa mampitombo ny fizakan-tena isika dia lasa tahaka ny Mpamonjy ary afaka manampy sy manompo bebe kokoa ny hafa.
Azonao atao ny manampy ny mpianatra hahita ny fanomezan-danja ho an’ny tena manokana ao amin’ny lesona amin’ny alalan’ny fangatahana azy ireo hanoratra ny eritreriny sy ny valinteniny amin’ireo fanontaniana toy ireto manaraka ireto:
-
Ahoana no nahafahanao nanampy ny hafa tamin’ny alalan’ny fahaiza-manao na fomba azonao avy amin’ny fanampian’ Andriamanitra?
-
Inona avy ireo sehatry ny fizakan-tena mety hasain’ny Ray any An-danitra hanaovanao ezaka ankehitriny mba hahafahanao mikarakara tsara kokoa ny tenanao sy ny hafa any aoriana?
Lasa tahaka ny Mpamonjy bebe kokoa
Hevero ny hampiseho ireto torolalana sy fanambarana manaraka ireto. Asao ny mpianatra hamita ilay sahanasa sy hifanakalo hevitra momba ireo fanontaniana ireo miaraka amin’ny mpianatra iray miara-miasa aminy.
Vakio ny Lioka 2:40, 52 ary asio marika ireo sehatra samihafa mandrafitra ny fivoarana izay nataon’i Jesoa tamin’ny fahatanorany.
-
Inona no mety ho fiantraikan’ny fitomboan’ny Mpamonjy sy ny fivoarany nandritra ny fahatanorany teo amin’ny fahafahany nanompo ny hafa?
Rehefa vita ny fizarana ataon’ireo mpiara-miasa dia asao ny iray kilasy hizara ireo fomba ahafahan’ny zatovo iray amin’izao fotoana izao manorina fizakan-tena amin’ny sehatra tsirairay voalaza ao amin’ny Lioka 2:40, 52.
Hevero ny hanome fotoana ny mpianatra mba hisaintsainana amim-pahanginana fanontaniana toy ireto manaraka ireto:
-
Iza no azonao ampiana any aoriana raha lasa mizaka tena kokoa amin’ny iray amin’ireo sehatra ireo ianao? Ahoana no fomba azonao anampiana?
-
Ahoana no anampian’ny fiezahana hanorina fizakan-tena antsika ho tonga tahaka ny Mpamonjy bebe kokoa?
Ohatra maneho ny fanompoana tahaka ny an’i Kristy amin’ny alalan’ny fizakan-tena
Mizarà ohatra momba ny olona teo amin’ny tantaran’ny Fiangonana izay afaka nanompo an’ Andriamanitra sy ny hafa. Afaka manao izany ianao amin’ny alalan’ny fandaminana ny mpianatra ho vondrona fandalinana ary amin’ny alalan’ny fanomezana ny vondrona tsirairay ny iray amin’ireo ohatra avy ao amin’ilay taratasy zaraina “Ohatra maneho fizakan-tena avy amin’ny tantaran’ny Fiangonana.” Asao ireo vondrona hamaky ireo andininy natolotra ary hifanakalo hevitra momba ilay fanontaniana any amin’ny faran’ny andinin-tsoratra nosoratany.
Ohatra maneho fizakan-tena avy amin’ny tantaran’ny Fiangonana
Martin Harris: Tamin’ny 1827 dia niatrika fanenjehana sy fahantrana i Joseph Smith rehefa nanandrana nandika ny Bokin’i Môrmôna avy amin’ireo takela-bolamena. Nahafantatra ny momba ny toe-javatra niainan’i Joseph i Martin Harris, izay mpamboly nahomby. Vakio ny Joseph Smith—Tantara 1:61–62, ka tadiavo ny fomba nahafahan’i Martin nanampy an’i Joseph Smith. Vakio ny Fotopampianarana sy Fanekempihavanana 19:26, 34–35; 104:26 mba hahitana fomba hafa nahafahan’i Martin Harris nanompo ny Tompo sy nitahy ny hafa. Namolavola ny fizakan-tena ara-bola ilaina mba hanompoana ny Tompo sy ny hafa amin’ny fomba manan-danja i Martin. Inona no azon’ny zatovo atao ankehitriny mba hananana fahaiza-manao sy hahazoana fanabeazana ary fitaovana hanampiana azy ireo hanompo ny Tompo sy ny hafa any aoriana?
Emma Hale Smith: Tamin’i Joseph Smith nihaona tamin’i Emma Hale dia mpamaky, mpanoratra, mpampianatra, ary mpahay mozika mahay izy. Vakio ny Fotopampianarana sy Fanekempihavanana 25:5–7, 11, ka tadiavo ireo andraikitra nankinin’ny Tompo tamin’i Emma. Nampitombo ny fahaiza-manao sy ny fahazoana fanabeazana izay nanampy azy hanompo ny Tompo sy ny hafa amin’ny fomba manan-danja i Emma. Inona no azon’ny zatovo atao ankehitriny mba hananana fahaiza-manao sy hahazoana fanabeazana ary fitaovana hanampiana azy ireo hanompo ny Tompo sy ny hafa any aoriana?
William W. Phelps: Ny Tompo dia nanome toromarika an’i William W. Phelps, izay vao niova fo tao amin’ny Fiangonana, mba hifindra tany Missouri. Vakio ny Fotopampianarana sy Fanekempihavanana 55:4 sy ny 57:11–13, ka tadiavo ireo andraikitra miavaka nomen’ny Tompo an’i William mba hanompo ao amin’ny Fiangonany. Nampitombo ny fahaiza-manao sy ny fahazoana fanabeazana izay nanampy azy hanompo ny Tompo sy ny hafa tamin’ny fomba manan-danja i William. Inona no azon’ny zatovo atao ankehitriny mba hananana fahaiza-manao sy hahazoana fanabeazana ary fitaovana hanampiana azy ireo hanompo ny Tompo sy ny hafa any aoriana?
Hevero ny hanasa ny vondrona tsirairay hizara amin’ny iray kilasy ny zavatra nianarany.
Azonao atao ny manampy ny mpianatra hieritreritra ohatra maoderina momba ny olona izay nampitombo ny fizakan-tena ary avy eo dia afaka nanompo ny hafa tamin’ny fomba tahaka ny an’i Kristy. ChurchofJesusChrist.org
Zarao ny fomba nanompoanao ny hafa na ny fomba nanompoan’ny hafa anao tamin’ny alalan’ny fahaiza-manao, ny zavatra teo am-pelatanana, ary ny toetra izay notrandrahinao na notrandrahin’ny hafa nandritra ny fiainana.
Hamaranana ny lesona dia azonao atao ny manome fotoana ny mpianatra hisaintsainana ombam-bavaka na hanoratana ny zavatra heveriny fa tian’ny Ray any An-danitra hataon’izy ireo amin’ny zavatra nianarany sy tsapany androany. Afaka mizara ny eritreriny amin’ny iray kilasy ireo mpilatsaka an-tsitrapo.