“Lesona 182—Mitantana amim-pahendrena ny vola: Miezaka manorina fizakan-tena ara-bola,” Boky torolalana ho an’ny mpampianatra seminera: Fotopampianarana sy Fanekempihavanana (2025)
“Mitantana amim-pahendrena ny vola,” Boky torolalana ho an’ny mpampianatra seminera: Fotopampianarana sy Fanekempihavanana
Lesona 182: Manorina fizakan-tena
Mitantana amim-pahendrena ny vola
Miezaka manorina fizakan-tena ara-bola
Ny zatovo dia hanana fahafahana maro azo araraotina any aoriana izay ho tonga miaraka amin’ny andraikitra ara-bola, toy ny fanaovana asa fitoriana, na ny fianarana, na ny fanorenana tokantrano. Rehefa mibanjina an’i Jesoa Kristy sy manaraka fitsipika ara-bola feno fahendrena izy ireo dia manasa ny fitahian’ Andriamanitra mba hanome izay ilainy (jereo ny Fotopampianarana sy Fanekempihavanana 104:15). Ity lesona ity dia afaka manampy ny mpianatra hahatakatra ny fomba fampiharana ny finoana an’ Andriamanitra rehefa manorina fizakan-tena ara-bola izy ireo.
Ireo sahanasa fianarana azo atao
Mibanjina ny hoavy
Zarao tsiroaroa na ho vondrona kely ny mpianatra, dia asao hizara ireo tanjona lehibe mety hananany ho an’ny 10 na 15 taona manaraka. Ohatra, azon’izy ireo zaraina raha toa ka mikasa ny hanao asa fitoriana izy ireo, izay toerana tiany hanohizana ny fianarany, na ny faniriany mikasika ny fanambadiana sy ny fianakaviana. Rehefa avy nizara izany ny mpianatra dia hevero ny hifanakalo hevitra momba ireto fanontaniana manaraka ireto amin’ny mpianatra rehetra:
-
Iza amin’ireo tanjonao ireo no mitaky fiomanana ara-bola?
-
Rahoviana araka ny eritreritrao no fotoana tsara indrindra hanombohana fanaovana drafitra ara-bola ho an’ny hoavinao? Nahoana?
Azonao atao ny miomana vetivety hizara fohifohy ny vola ilaina mahazatra amin’ny fanaovana asa fitoriana, na handrantoana fianarana, na hiainana ao amin’ny faritra misy anao. (Tadidio fa ny tanjon’ity lesona ity dia tsy ny hamaritra ny vidin’ny zava-drehetra fa ny hanampy ireo mpianatra hibanjina amim-pahatokiana an’i Jesoa Kristy sy hampahafantatra ireo fitsipika fototra momba ny fitantanam-bola.)
Asao ireo mpianatra hamaly ity fanontaniana manaraka ity ao amin’ny diary fandalinan’izy ireo:
-
Manao ahoana ny fatokian-tenanao momba ny hoavinao ara-bola? Nahoana?
Mandritra ity lesona ity dia mitadiava ombam-bavaka ny fanampian’ny Ray any An-danitra mba hahatakarana ireo fitsipika izay afaka manampy anao amin’izao fotoana izao sy any aoriana mba hitantanana ny volanao amim-pahendrena.
Fampanantenana avy amin’ny Tompo
Tamin’ny 1834, ny Fiangonana dia sahirana ara-bola noho ny fananganana ny Tempolin’i Kirtland sy ireo fanatontosan-javatra tsara hafa. Nomen’ny Tompo torohevitra izy ireo izay afaka miantefa amintsika ihany koa rehefa miatrika adidy ara-bola isika amin’ny fanatratrarana ireo faniriantsika ara-drariny.
Vakio ny Fotopampianarana sy Fanekempihavanana 104:13–17, 78–79. Eritrereto hoe inona no mety hifandraisan’ny fampianaran’ny Tompo amin’ny fitantananao vola.
-
Inona no nianaranao izay azo ampiharina amin’ny zavatra ilaintsika ara-bola?
-
Inona ireo teny na andian-teny izay afaka manampy ny olona iray hatoky ny Tompo rehefa mitantam-bola izy ireo?
Afaka mizara hevitra samihafa ny mpianatra, anisan’izany ity fahamarinana manaraka ity: Hanome izay ilaintsika ny Tompo raha manaraka amim-pahatokiana ny toroheviny isika.
-
Nahoana no mety hampahery io fahamarinana io rehefa miezaka ny hiomana ara-bola ho an’ny hoavinao ianao?
Raha ilaina dia ampio ireo mpianatra hahatakatra fa ny Tompo dia tsy mampanantena fahafahana amin’ny fahasahiranana ara-bola na amin’ireo zava-tsarotra hafa. Fantatry ny Tompo anefa izay ilaintsika. Rehefa mahatoky isika dia hanome izay ilaintsika araka ny sitrapony sy ny fotoanany Izy.
Ireo fitsipika ara-bolan’ny Tompo
Hazavao fa tamin’ny alalan’ny soratra masina sy ireo mpitarika ao amin’ny Fiangonany no nanomezan’ny Tompo torohevitra mba hanampiana antsika hampiasa amim-pahendrena ireo fitahiana ananantsika eto an-tany, anisan’izany ny volantsika. Mba hanampiana ireo mpianatra hahatakatra ny torohevitry ny Tompo dia hevero ny hanasa azy ireo hisafidy ny iray amin’ireto andalan-tsoratra masina manaraka ireto mba hohalalinina. Rehefa vitan’izy ireo izany, dia afaka mivory miaraka amin’ireo mpianatra izay nandalina andalan-tsoratra masina hafa izy ireo ary mizara ny zavatra nianarany.
Vakio ireto andininy manaraka ireto ary fantaro ireo fitsipika ampianarin’ny Tompo izay afaka manampy ny zatovo iray hiomana amin’ny hoaviny ara-bola.
-
Fotopampianarana sy Fanekempihavanana 48:4 (Tamin’io fotoana io dia nila nividy tany ny Olomasina, saingy azontsika atao ny mampitaha izany amin’ireo andraikitra izay miandry antsika any aoriana.)
Rehefa avy nifampizara ny mpianatra, dia hevero ny hametraka fanontaniana toy ireto manaraka ireto:
-
Ahoana no ahafahan’ireo fitsipika ao amin’ireo soratra masina ireo manampy anao hampihatra finoana an’i Jesoa Kristy rehefa miomana amin’ny zavatra ilainao ara-bola ianao?
-
Nahoana araka ny eritreritrao no ampahany manan-danja ao anatin’ny fitantanana ny volantsika ny fandoavana fahafolonkarena? (jereo ny Malakia 3:8–10).
-
Ankoatra ny fandoavana fahafolonkarena, inona avy ireo fomba sasantsasany ahafahantsika manao ho laharam-pahamehana ny fikatsahana ny fanjakan’ Andriamanitra toy izay ny fikatsahana harena?
-
Ahoana no ahafahan’ny fampivelarana ny fahazarana manangona vola amin’ny maha-zatovo anao hitahy anao mandritra ny androm-piainanao?
Laharam-pahamehana ara-bola
Ireto sary manaraka ireto dia maneho ny zava-mitranga na ny fanapahan-kevitra mifandray amin’ny fitantanam-bola. Ny famelana ireo mpianatra handinika ny filaharan’ireo zava-mitranga na fanapahan-kevitra ireo dia afaka manampy azy ireo hanavaka ireo laharam-pahamehana rehefa mandray fanapahan-kevitra ara-bola. Hevero ny hanao printy ireo sary, ka tapaho tsirairay ireo sokajy dimy ary apetaho tsy mifanaraka amin’ny filaharany tena izy ireo eny amin’ny solaitrabe. Asao ny mpianatra hifanakalo hevitra momba izay heveriny fa tokony ho filaharan’ireo sokajy. Safidy anankiray hafa azo atao ny manao printy sy manapaka dika mitovy ampy tsara amin’ity sary ity mba hahafahan’ireo vondrona mpianatra mandahatra izany sy mifanakalo hevitra momba izany. Mety hanampy ny manamarika fa na dia toa miharihary aza fa ny fananana fidiram-bola no tokony ho voalohany eo amin’ny fiainana tena izy, dia maro ny olona mindrana sy mandany vola alohan’ny hananany izany. Izany no antsoina hoe trosa, ary tokony hiezaka ny hisoroka izany isika.
Ho solon’izany dia azonao atao koa ny manasa ireo mpianatra mba hanao lisitra ny fandaniana mahazatra izay ataony ankehitriny na mety ho ataony any aoriana eny amin’ny solaitrabe. Amin’ny maha-iray kilasy azy na amin’ny maha-ao anaty vondrona azy dia azo asaina ireo mpianatra mba hametraka laharam-pahamehana amin’ny fandaniana miainga avy amin’ny zavatra manan-danja indrindra ka hatrany amin’ny tsy manan-danja indrindra, amin’ny alalan’ny fampiasana ireo fitsipika izay vao nianarany tao amin’ny sahanasa mikasika ny soratra masina natao teo aloha.
-
Ahoana no hanaovanao ho laharam-pahamehana ireo zava-mitranga na fanapahan-kevitra ara-bola ireo? Inona no nianaranao avy amin’ny fampianaran’ny Tompo ao amin’ny soratra masina mba hanohanana ny valin-teninao?
-
Inona avy ireo olana mety hateraky ny fikorontanan’ny laharam-pahamehana ara-bola?
-
Inona no mety holazainao amin’ny olona iray izay mahatsapa fa ny vola laniany ara-pivelomana amin’izao fotoana izao no tokony ho laharam-pahamehana fa tsy ny fandoavana fahafolonkarena?
Hevero ny hanasa ny mpianatra hizara ny fomba nitahian’ny Tompo azy ireo na ny fianakaviany rehefa nanao ho laharam-pahamehana ny fahafolonkarena noho ny fandaniana hafa izy ireo. Ho ohatra iray hafa dia azonao atao ny mizara ny zavatra niainan’ny Loholona Valeri V. Cordón ao amin’ny Fitopololahy ao amin’ny lahateniny hoe “Ny fitenin’ny filazantsara” manomboka amin’ny mari-potoana 6:10 ka hatramin’ny 7:40, hita ao amin’ny ChurchofJesusChrist.org.
Hevero ny hifanakalo hevitra momba ny teny nambaran’ny Loholona Stanley G. Ellis etsy ambany.
Raha toa ka manampy, dia makà fotoana hampianarana ny mpianatra ny fomba handoavana ny fahafolonkarena sy ny fanatitra amin’ny alalan’ny taratasy fandoavana fahafolonkarena na an-jotra ao amin’ny donations.ChurchofJesusChrist.org.
Nanontany izao manaraka izao momba ny fandoavana fahafolonkarena ny Loholona Stanley G. Ellis ao amin’ny Fitopololahy:
Manana finoana mba hatoky ny fampanantenan’[ny Tompo] momba ny fahafolonkarena ve isika fa metimety kokoa ny fiainantsika miaraka amin’ny 90 isan-jaton’ny vola miditra amintsika miampy ny fanampian’ny Tompo toy izay miaraka amin’ny 100 isan-jaton’ny vola miditra amintsika isan-taona ary miady irery isika? (Stanley G. Ellis, “Matoky Azy ve isika? Tsara ny zavatra sarotra,” Liahona, nôv. 2017, 114)
ChurchofJesusChrist.org
Azonao atao ny manampy ny mpianatra hahatakatra fa ny Tompo dia nanome fomba hanampiana antsika amin’ny hoavintsika ara-bola izay tsy aseho ato amin’ity lesona ity. Ohatra, afaka manentana fanahy antsika amin’ny fomba hafa Izy mba hahazoana na hitahirizana vola. Afaka miresaka amin’ny evekan’izy ireo na amin’ny mpitarika azy ireo ny zatovo mikasika ny fanampiana ara-bola ho an’ny asa fitoriana na momba ireo fomba izay zaka ara-bola mba hanohizana fianarana ambony.
Fehin-kevitra
Azo asaina hamaly ireto fanontaniana manaraka ireto ao anatin’ny diary fandalinany ny mpianatra na hifanakalo hevitra momba izany amin’ny mpiara-mianatra iray:
-
Ahoana no hamintinanao ny zavatra nianaranao momba ny fitantanana amim-pahendrena ny volanao?
-
Inona no zavatra iray tsapanao fa tian’ny Tompo hianaranao androany?
Hevero ny hanasa mpianatra vitsivitsy mba hizara ny valin-teniny. Zarao ny fijoroana ho vavolombelona anananao momba ny fanirian’ny Tompo hamatsy ny Olomasiny (jereo ny Fotopampianarana sy Fanekempihavanana 104:15). Amporisiho ny mpianatra hitodika any amin’ Andriamanitra sy hampiditra Azy ao anatin’ireo fanapahan-kevitra raisin’izy ireo ara-bola mandritra ny androm-piainany.