180-р хичээл: Бие даах чадвараа хөгжүүлэх

Их Эзэний арга замаар бие даах чадвараа хөгжүүлэх

Бие даах чадвараа хөгжүүлэх нь биднийг материаллаг болон сүнслэг байдлын хувьд адисалдаг.

Их Эзэн “Өөрийн гэгээнтнүүдийг хангах нь миний зорилго болой. … Гэхдээ энэ нь миний өөрийн замаар хийгдэх ёстой” хэмээн тунхагласан(Cургаал ба Гэрээ 104:15–16). Есүс Христ гэгээнтнүүддээ бие даах чадвараа хөгжүүлэхэд нь тусалдаг бөгөөд ингэснээр тэд өөрсдийгөө бие даан авч явж, Түүний адил бусдыг ч адисалж сурах болно. Энэ хичээл нь Их Эзэний арга замаар бие даах чадвараа хөгжүүлэх хэрэгтэйг ойлгоход суралцагчдад тусална.

Боломжит суралцах үйл ажиллагаа

Бие даасан байдал

Суралцагчдын бие даах чадварын талаарх одоогийн ойлголтыг олж мэдэх замаар хичээлээ эхлүүлэхийг бод. Та самбарт Бие даах чадвар гэж бичээд, энэ нь юу гэсэн утгатай үг болох, ийм болохын төлөө хичээл зүтгэл гаргах нь яагаад чухал болохыг тайлбарлахыг суралцагчдаас хүс.

Та тэдэнд загасаар хийсэн хоол, загас барих хэрэгслийн зургийг үзүүлээд, бие даах чадварын талаар мэддэг зүйлээ ярилцахад нь тусалж болно. Гэр бүлээ тэжээж тэтгэхийн тулд бие даах чадвараа хөгжүүлэхэд нь эдгээр зураг дахь аль зүйл уг хүнд хэрэгтэйг ярилцахыг суралцагчдаас хүс. Та ярилцлагын хүрээнд доорх хоёр зүйлийг тэдэнд үзүүлж болно.

Ерөнхийлөгч Гордон Б.Хинкли (1910–2008) хүмүүс өөрсдийн хэрэгцээг хангах чадвартай болохын үнэ цэнийг тайлбарлав.

Хүнд загас өгвөл хоногийн л хоолтой байна. Харин загас барих аргыг нь зааж өгвөл тэр хүн насан туршдаа хоолтой байх болно гэсэн эртний үг бий. (Gordon B. Hinckley, “The Perpetual Education Fund,” Ensign, May 2001, 52)

Тэргүүн зөвлөл бие даах чадварын талаар дараах зүйлийг заасан.

Их Эзэн: “Өөрийн гэгээнтнүүдийн хэрэгцээг хангах нь миний зорилго болой хэмээн тунхагласан” [Сургаал ба Гэрээ 104:15]. Энэхүү илчлэл бидэнд өөрсдийн болон гэр бүлийнхээ гишүүдийн амьдралын хэрэгцээг хангах боломжийг олгохын тулд биднийг материаллаг адислалуудаар хангаж, бие даах чадвартай болох үүд хаалгыг нээж өгөх Их Эзэний амлалт юм. …

Та Тэнгэр дэх Эцэгийнхээ хүүхэд гэдэгт итгэлтэй байгаарай. Тэрээр танд хайртай бөгөөд таныг хэзээ ч орхихгүй. Тэрээр таныг мэддэг бөгөөд бие даах чадварыг хөгжүүлснээр таныг сүнслэг болон материаллаг байдлаар адислахад бэлэн байдаг. (Тэргүүн зөвлөл, Миний бие даах чадвартай болох суурь [2016], 3)

• Бие даах чадварын талаарх эдгээр мэдэгдлээс та юу сурч мэдсэн бэ?

  Суралцагчдыг дээрх мэдэгдлүүдийг ангиараа ярилцсаны дараа бие даах чадварын талаарх ойлголтоо хамтрагчдаа дүгнэн хэлэхэд суралцагчдыг урь. Тэргүүн зөвлөлийн өмнөх мэдэгдлийг самбраас авалгүй үлдээх нь суралцагчдад тус болж болох юм. Дараа нь өөрсдийн дүгнэлтийг ангийнхантайгаа сайн дураараа хуваалцахад суралцагчдыг урь.

  Их Эзэний тусламжтайгаар бид өөрийн болон гэр бүлийнхээ амьдралын хэрэгцээг хангахйн тулд бие даах чадвараа хөгжүүлэх боломжтой гэдгийг суралцагчдад ойлгуул.

• Залуудаа бие даах чадвараа хөгжүүлэх нь яагаад чухал гэж та бодож байна вэ?

• Хэрэв хэн нэгэн бие даах чадвараа хөгжүүлэх нь хэт хүнд гэж бодож байвал тэдэнд найдвар өгөх ямар зүйлийг Тэнгэрлэг Эцэг, Есүс Христ хоёрын талаар сануулж болох вэ?

Бие даах чадварын зарчмууд тэдэнд хамаатай гэдгийг олж харахад нь бодит арга замаар суралцагчдад туслахын тулд Боловсрол, Эрүүл мэнд, Ажил эрхлэлт, Санхүү, Сүнслэг хүч чадал зэрэг сэдвийг самбарт бичих талаар бодож үз. Суралцагчдыг бүлгүүдэд хуваагаад, бүлэг бүрд нэг сэдвийг оноож өг. Дараах зүйлсийг бүлгээрээ ярилцаад, ярилцсан зүйлсээ ангийнхантайгаа хуваалцахад суралцагчдыг урь.

Боловсрол, эрүүл мэнд, ажил эрхлэлт, санхүү эсвэл сүнслэг хүч чадал зэрэг сэдвүүдийн аль нэгэнд тулгуурлан дараах асуултуудад хариулна уу.

• Тэр тал дээр бие даасан хүнийг та хэрхэн дүрслэх вэ?

• Өсвөр насны хүүхэд тэр тал дээрээ хэрхэн бие даах чадвартай болж эхлэх вэ? Тэд хэрхэн Их Эзэнийг тусламжийг урьж болох вэ?

• Энэ тал дээр өөрөө илүү их зүйлийг хийж сурах нь бидэнд ямар тустай вэ?

Хэрэгцээгээ хэрхэн хангах тал дээр ирэх Ариун Сүнсний удирдамжид анхаарлаа хандуулахад суралцагчдыг урамшуул. Аливаа зүйлийг бие даан хийж чаддаг болсон ч Их Эзэнд цаашид ч найдах хэрэгтэй гэдгийг ойлгоход нь суралцагчдад тусал. Заримдаа бусдаас тусламж хүсэх нь зөв.

Их Эзэний арга замаар бие даах

Бидний Их Эзэнээс болон Түүний үйлчлэгчдээс суралцаж болох бие даах чадварын зарчмуудыг ойлгоход нь суралцагчдад туслахын тулд дараах сонголтуудын аль нэгийг бодож үз. Үүнд:

1. Суралцагчдыг жижиг бүлгүүдэд хуваагаад, “Их Эзэний арга замаар бие даах чадвараа хөгжүүлэх нь” тараах материалыг тэдэнд өг. Бүлэг бүр судлах судрын эшлэл, мэдэгдлүүдийг гишүүдийнхээ дунд оноож өгч болно. Дараа нь тэд сурсан зүйлээ нэг нэгэнтэйгээ хуваалцаж, асуултад хамтдаа хариулж болно.

2. Хэрэв суралцагчдад Сүмийн удирдагчдын хэлсэн судрын эшлэл, мэдэгдлүүдийг бие даан олох материал, туршлага байвал тараах материал дээрх асуултуудыг самбарт үзүүл. Асуулт бүрийн хариултыг судрууд болон бошиглогчдын үгсээс хайхад суралцагчдыг урь. Суралцагчдын судалж болох нэг материал бол “Бие даах чадвар” гэсэн гарчигтай Сэдэв ба асуулт гэх хэсэг юм. Энэ эх материалыг Gospel Library аппликэйшнаас болон ChurchofJesusChrist.org-оос авах боломжтой.

Их Эзэний арга замаар бие даах чадвараа хөгжүүлэх

Доорх судрын эшлэл, тайлбаруудыг судлаад, дараах хоёр асуултын хариултыг ол.

1. Их Эзэн судрууд болон бошиглогчдоороо дамжуулан бие даах чадвараа хөгжүүлэхэд туслах юуг бидэнд заасан бэ?

2. Тэнгэрлэг Эцэгээс тусламж авахад ямар саад бэрхшээл хүнд тулгарч болох вэ?

• Сургаал ба Гэрээ 9:7–8

• Сургаал ба Гэрээ 58:26–28

• Сургаал ба Гэрээ 88:124

• Иосеф Смит—Түүх 1:55

Ерөнхийлөгч Эзра Тафт Бэнсон (1899–1994) ийн заасан.

Их Эзэн дотроос гадагш чиглэж ажилладаг. Дэлхийн хандлага гаднаас дотогшоо чиглэдэг. Дэлхий хүмүүсийг ядуурлаас гаргадаг. Христ эхлээд ядуурлыг хүмүүсийн дотроос гаргаж, үүний дараа тэд өөрсдийгөө ядуурлаас гаргадаг. Дэлхий хүмүүсийн орчныг өөрчлөх замаар тэднийг төлөвшүүлдэг. Харин Христ эхлээд хүмүүсийг өөрчилж, дараа нь хүмүүс хүрээлэн буй орчноо өөрчилдөг. Дэлхий хүмүүсийн зан байдалд нөлөөлж болох ч Христ хүмүүсийн мөн чанарыг өөрчилдөг. (Ezra Taft Benson, “Born of God,” Ensign, Nov. 1985, 6)

Тэргүүн зөвлөлийн ерөнхийлөгч асан Дийтр Ф.Угдорф ийн тайлбарласан.

Гол гатлахгүйн тулд голын усыг дуусахыг хүлээн суух … нь Их Эзэний арга зам биш ээ. Нэгдэн нийлж, ханцуйгаа шамлан хөдөлмөрлөж, гүүр юм уу завь бүтээж өөрсдийн бэрхшээлийн голыг гатлах нь Их Эзэний арга зам мөн. (Дийтр Ф.Угдорф, “Их Эзэний замаар хангах нь,” 2011 оны 10-р сарын Ерөнхий чуулган, 67)

Суралцах явцад олж авсан хариулт, ойлголтоо ангийнхантайгаа хуваалцах боломжийг бүлгүүдэд олго. Мөн бие даах зарчмаар амьдрахын тулд гаргаж буй хүчин чармайлтынх нь төлөө Их Эзэн хэрхэн тэднийг адисалсан жишээг хуваалцаж болно.

Аврагч ач ивээлээс ач ивээлийг хөгжүүлсэн

Бие даах чадвараа олон талаар нэг зэрэг хөгжүүлэх гэж үзэх нь маш хэцүү гэдгийг суралцагчид ойлгож байж болох юм. Бие даах чадвараа хөгжүүлэхэд цаг хугацаа хэрэгтэйг Аврагчийн жишээнээс сурч болно гэдгийг суралцагчдад тайлбарла. Судрын дараах хэсгийг уншихдаа суралцагчдад дараах зургийг үзүүлэх талаар бодож үз.

Сургаал ба Гэрээ 93:11–13-ыг уншаад, Баптисч Иохан бидэнд Аврагчийн өсөлт хөгжлийн талаар юу гэж заасныг олж мэд. (Баптисч Иоханы бичвэрүүдийн зарим хэсгийг Иосеф Смитэд илчилсэн бөгөөд тэдгээр нь 93-р хэсэгт цэдэглэгдсэн байгаа.)

Хэрэв дараах асуултуудад хариулахад нь тусламж хэрэгтэй бол ач ивээлээс ач ивээлд үргэлжлүүлэх гэдэг нь тэнгэрлэг тусламжаар бага багаар сайжирна гэсэн үг гэдгийг суралцагчдад тайлбарлаж болно. Тэдэнд хэрхэн “шат шатаар” ахих хэрэгтэйг ойлгоход туслахын тулд суралцагчдаар 2 Нифай 28:30-ийг уншуулж болно.

• Аврагч “ач ивээлээс ач ивээлд үргэлжлүүл[дэг]” (13-р шүлэг) гэдэг нь ямар утгатай гэж та бодож байна вэ?

• Ач ивээлээс ач ивээлд үргэлжлүүлэхийн Аврагчийн жишээ нь сүнслэг болон материаллаг байдлын хувьд бие даах чадвараа хөгжүүлэхэд тань хэрхэн туслах вэ?

Амьдралдаа бие даах чадвараа хөгжүүлэх

Бие даах чадвараа хөгжүүлэх талаар Ариун Сүнс тэдэнд юу заасан байж болох талаар эргэцүүлэн бодоход суралцагчдыг урь. Эргэцүүлэн бодоход нь туслахын тулд та дараах асуултуудыг тэдэнд үзүүлж болно. Дараах асуултуудыг эргэцүүлэн бодох эсвэл судлах тэмдэглэлдээ хариулах замаар одоогийн бие даах чадвараа үнэлэхэд суралцагчдыг урь.

• Амьдралынхаа янз бүрийн талбарт бие даах чадвараа хөгжүүлж чадна гэдэгтээ би хэр итгэлтэй байна вэ?

• Амьдралынхаа тэдгээр талбарт өөрийн хэрэгцээг хангах чадвараа хөгжүүлэх нь яагаад тустай вэ?

• Амьдралдаа бие даах чадвараа илүү их хөгжүүлэхийн тулд би Их Эзэнийг хэрхэн оролцуулж болох вэ?

Амьдралдаа бие даах чадвараа хөгжүүлж эхлэх тодорхой арга замуудын талаар бодоход суралцагчдыг урь. Та мөн бие даах чадвартай болохын хүч, мөн энэ нь таны амьдралыг хэрхэн адисалсан талаарх бодол, гэрчлэлээ хуваалцаж болно.

Нэмэлт эх сурвалж

Би яагаад бие даах чадвараа хөгжүүлэх ёстой вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Өөрсдийнхөө төлөө гаргах шийдвэр, олж чадах эх үүсвэрүүдийг бусдаас авахад хүргэдэг аливаа учир шалтгаан нь биднийг сүнслэг байдлаар сулруулж мөн сайн мэдээний төлөвлөгөөний бидний төлөөх зорилгыг саатуулдаг. (Dallin H. Oaks, “Repentance and Change,” Liahona, Nov. 2003, 40)

Далын ахлагч Хюго Э.Мартинэз ийн заасан.

Бие даах чадвартай байхыг хичээх нь биднийг Тэнгэрлэг Эцэг болон Түүний Хүү Есүс Христ рүү чиглүүлэх гэрээний замд урагш ахих ажлын маань нэг хэсэг юм. Энэ нь Есүс Христэд итгэх бидний итгэлийг хүчирхэгжүүлж мөн аврал, өргөмжлөлийн ёслол, гэрээнүүдээр дамжуулан биднийг баяр хөөртэйгөөр Түүнтэй холбох болно. Бие даах чадвар нь Есүс Христийн сайн мэдээний сургаал бөгөөд хөтөлбөр биш юм. Энэ нь нэг үйл явдал биш, харин насан туршид үргэлжлэх үйл явц. (Хюго И.Мартинэз, “Хүүхэд, өсвөр үеийнхэнд бие даах чадварын талаар заах нь,” Лиахона, 2022 оны 5-р сар, 94–96)

Түүнчлэн Далын ахлагч Альфрэд Кюнгугийн хэлсэн “Become Self-Reliant to Better Serve the Lord” үгийг үзнэ үү (Africa Central Local Pages, Liahona, June 2021).

Сүнслэг байдлын хувьд бие даах чадвартай байна гэдэг нь юу гэсэн утгатай вэ?

Далын ахлагч Кэнт Ф.Ричардс ийн тайлбарласан.

[Сүнслэг байдлын хувьд бие даах] гэдэг нь бас жаахан буруу нэршил юм. Бодит байдал дээр энэ нь хөл дээрээ зогсож, өөрийн аз жаргалыг бүтээх гэсэн үг биш харин чадах бүхнээ хийснийхээ дараа Эцэг, Хүү, Ариун Сүнсний ач ивээлд өөрсдийн чадавхаас дээд түвшинд хүргэх боломж олгохыг хэлж байгаа юм. Энэ нь өөрсдийн сүнслэг өсөлт, сурч мэдэхийн төлөө чадах бүхнээ хийн, дээрээс тасралтгүй ирэх сүнслэг хүч чадал, тусламж дэмжлэггүйгээр амжилтад хүрч чадахгүй гэдгээ ухамсарлан ойлгох гэсэн үг. …

Сүнслэг байдлын хувьд бие даах гэдэг нь та үүнийг ганцаараа хийх ёстой гэсэн үг биш. Харин энэ нь та уг үйл явцыг хариуцаж, эхлүүлэх ёстой гэсэн үг юм. Хэдийгээр өөрийн сонгох эрхийн дагуу сонголтоо хийх ёстой ч эцэст нь та ганцаараа амжилтад хүрэх боломжгүй. Тэнгэрлэг Эцэг төлөвлөгөөгөө гаргаж байхдаа үүнийг мэдэж байсан. Биднийг өдөр тутамдаа сайжран чадавхжих үед Тэр биднийг Ариун Сүнсээр дамжуулан өдөр бүр адислах болно. (Kent F. Richards, “Spiritual Self–Reliance” [Ensign College devotional, June 11, 2019], ensign.edu)

Би сүнслэг байдлын хувьд хэрхэн бие даах чадвараа хөгжүүлж болох вэ?

Арван хоёр төлөөлөгчийн чуулгын ахлагч Робэрт Д.Хэйлс (1932–2017) ийн тайлбарласан.

Бид ариун ёслолоос зохистойгоор хүртэж, ариун сүмийн зөвшөөрлийн бичиг эзэмших зохистой байж, бусдад үйлчлэхийн тулд золиослол гаргаж, залбиралтайгаар гэрээнүүдийнхээ дагуу амьдарснаар хөрвөж, сүнслэгээр бие даадаг. (Робэрт Д.Хэйлс, “Өөрсдийгөө таньж мэдэх нь: Ариун ёслол, ариун сүм, үйлчлэлийн золиослол,” 2012 оны 4-р сарын Ерөнхий чуулган, 35)

Нэмэлт суралцах үйл ажиллагаа

Gospel Library аппликэйшн

Хэрэв боломжтой бол Gospel Library аппликэйшны “Бие даасан байдал” хэсэг рүү ороход суралцагчдыг урь. Энэ нь “Амьдралд зориулсан тусламж” хэсэгт байгаа. “Бие даасан байдал” хэсэгт байгаа өөр өөр хэсгийг судлах цагийг суралцагчдад гаргаж өгөх талаар бодож үз. Суралцагчид сонирхсон бие даах чадварыг хөгжүүлэх гарын авлагаа сонгон судлах боломжтой. Тэд гарын авлага бүрийн эхэнд байдаг Тэргүүн зөвлөлийн захиасыг уншин эхэлж болно. Хэдэн минут уншиж танилцсаны дараа суралцагчид олж мэдсэн зүйлээ бусадтайгаа хуваалцаж болно.

Хичээлийг эхлүүлэх өөр хувилбар

Суралцагчдад “Solve Problems and Make Decisions” (1:55) видеог үзүүлэх талаар бодож үз. Суралцагчид гахай хонинд бие даах чадвараа хөгжүүлэх талаар юу сурч мэдэхэд нь тусалсан хэсгийг үзэж болно. Та хэлэлцүүлгийг хөтлөн явуулахдаа дараах асуултуудыг ашиглаж болно.

• Та гахайтай ямар талаараа адил байж болох вэ? Бие даах чадвараа хөгжүүлэхийн оронд бусдад найдах үед та бие махбод, сүнслэг байдал, боловсролын хувьд ямар ямар нөхцөл байдалтай тулгардаг вэ?

• Бие даах чадвараа хөгжүүлэхэд бидэнд тусалж чадах орчин үеийн хоньд хэн бэ?

Видео

Хэрэв бие даах чадварын талаар илүү дэлгэрэнгүй суралцах нь суралцагчдад тустай гэж үзвэл та “He Polished My Toe” (2:02) видеог үзүүлж болно. Суралцагчид видеог үзэж байхдаа ахлагч Энрикэ Р.Фалабэллагийн туршлагаас олж мэдсэн зүйлсээ жагсаан бичиж болно. Видеог үзсэний дараа суралцагчид юу сурснаа мөн тэдгээр нь бие даах чадвартай хэрхэн хамаатай болох талаар хуваалцаж болно.