“181-р хичээл—Бие даах чадвартай болохын тулд Есүс Христэд итгэлтэй байх нь: Их Эзэнээр дамжуулан саад бэрхшээлийг даван туулах,” Сургаал ба Гэрээнүүдийн семинарын багшийн гарын авлага (2025)
“Бие даах чадвартай болохын тулд Есүс Христэд итгэлтэй байх нь,” Сургаал ба Гэрээнүүдийн семинарын багшийн гарын авлага
181-р хичээл: Бие даах чадвартай болох
Бие даах чадвартай болохын тулд Есүс Христэд итгэлтэй байх нь
Их Эзэнээр дамжуулан саад бэрхшээлийг даван туулах
Аврагч гэм нүглийг маань уучилж, эдгээж биднийг адислахаас гадна сургууль, ажил, бусадтай харилцах харилцаа гэх мэт нөхцөл байдалд маань биднийг адислах боломжтой. Бид Есүс Христэд итгэх итгэлээ хэрэгжүүлэх үедээ амьдралынхаа бүхий л хүрээнд илүү бие даах чадвартай болоход Түүнийг туслуулахаар урьдаг. Энэ хичээл нь бие даах чадвартай болохдоо Есүс Христэд итгэх итгэлээ хэрэгжүүлэхэд суралцагчдад туслах зорилготой.
Боломжит суралцах үйл ажиллагаа
Уулсыг нүүлгэх
Самбарт уул зураад, судлах тэмдэглэлийнхээ хуудасны дээд хагасыг хамруулан үүнтэй төстэй уул зурахад суралцагчдыг урих талаар бодож үзээрэй. Уг уул нь сүнслэг, материаллаг байдлын хувьд бие даах чадвартай болох болон суралцагчид гэсэн хоёр талын дунд садаа болж байна гэж төсөөлөхийг тэднээс хүс. (Бие даасан байдал гэдэг нь ямар утгатайг ойлгоход суралцагчдад тусламж хэрэгтэй бол үүнд өөрсдийн сүнслэг хүч чадлыг олж авах, боловсрол эзэмших, хэрэгцээгээ хангах хангалттай мөнгө олох зэрэг нь багтдаг тухай хуваалц.)
Амьдралын төрөл бүрийн талбарт бие даах чадвараа хөгжүүлэхэд саад болж буй зарим саад бэрхшээлийг уулын дотор талд бичихийг тэднээс хүс. (Жишээнүүдэд ажил олох, боловсрол эзэмших, эрүүл мэндийн үйлчилгээ авах боломж хомс байх эсвэл хайртай хэн нэгнээсээ шаардлагатай дэмжлэг авч чадахгүй байх зэрэг нь багтаж болно.) Тулгарч буй зарим саад бэрхшээлээ сайн дураараа бичих хүсэлтэй суралцагчдыг самбар дээр зурсан уулын дотор талд бичихэд урь.
-
Заримдаа амьдралын саад бэрхшээлүүд яагаад энэ уул шиг санагддаг вэ?
-
Хүмүүс эдгээр сорилт бэрхшээлд ямар арга замаар хариу үйлдэл үзүүлдэг вэ?
Бие даах чадвартай болохын тулд тулгарч буй саад бэрхшээлээ хэрхэн даван туулахаар төлөвлөж буй тухай тунгаан бодоход суралцагчдыг урьж болно. Тулгарч буй саад бэрхшээлээ даван туулахын тулд хэрхэн Аврагчаас хүч чадал авах талаар хичээлийн туршид залбиран байж эрэлхийлэхэд тэднийг урь.
Аврагчийн хүч чадлыг амьдралдаа урих
Ерөнхийлөгч Рассэлл М.Нэлсон амьдралдаа хүнд хэцүү сорилт бэрхшээлтэй тулгарч буй хүмүүст дараах зөвлөгөөг өгчээ.
Хайрт ах, эгч нар аа, би та бүгдийг өнөөдрөөс эхлэн итгэлээ өсгөхийг уриалж байна. Таны хувийн асуудлууд Эверест уул шиг том байсан ч итгэлээр тань дамжуулан Есүс Христ амьдрал дахь уулсаа нүүлгэх чадварыг тань хүчирхэгжүүлнэ. …
Та нарын уул хоорондоо адилгүй ч хүн нэг бүрийн асуудлуудын хариулт итгэлийг тань нэмэгдүүлэх болно. (Рассэлл М.Нэлсон, “Христ амилсан бөгөөд Түүнд итгэх итгэлээр уулсыг нүүлгэж чадна,” Лиахона, 2021 оны 5-р сар, 102–103)
-
Та ерөнхийлөгч Нэлсоны заасан сургаалыг хэрхэн дүгнэх вэ?
Суралцагчид янз бүрийн гүн гүнзгий дүгнэлтүүдийг гаргаж болно. Биднийг Есүс Христэд итгэх итгэлээ гүнзгийрүүлэхэд Тэр бидний сорилт бэрхшээлийг даван туулах чадварыг нэмэгдүүлнэ гэдэг нь нэг чухал үнэн юм.
-
Бид ерөнхийлөгч Нэлсоны эдгээр зааврыг бие даах чадварыг амьдралдаа хөгжүүлэх хүчин чармайлттайгаа хэрхэн холбож болох вэ?
Амьдралд тулгарч буй саад бэрхшээлүүдэд Есүс Христ үнэхээр тусалж чадна гэдэгт итгэхэд бага зэрэг тусламж хэрэгтэй найз танд байна гэж төсөөл. Есүсийн туслах хүсэл, хүч чадлыг мэдрэхэд тэдэнд туслах төгс эзэмших сургаалын хэсгийг судрын аль нэг номоос хайж ол.
Суралцагчид дараах төгс эзэмших сургаалын судрын хэсгүүдийг олж болно. Үүнд:
-
Сургаалт үгс 3:5–6: “Бүх зүрхээрээ ЭЗЭНд итгэ … Тэрээр зам харгуйг чинь шулуутгана.”
-
Матай 11:28–30: “Зүдэж зүтгэгсэд хийгээд хүнд ачаа үүрсэн бүгд ээ, Над дээр ир. Би та нарыг амраая.”
-
Иаков 1:5–6: “Харин та нарын хэн нэг нь мэргэн ухаанаар дутвал … Бурханаас гуйг.”
-
1 Нифай 3:7: “Би явж бас Их Эзэний зарлигласан зүйлсийг хийх болно.”
-
2 Нифай 28:30: Бурхан “хүмүүсийн үрсэд шат шатаар, дүрэм дүрмээр … өгөх болно.”
-
Ифер 12:27: “Хэрэв хүмүүс надад ирэх аваас … тэгвэл би тэдний төлөө сул дорой зүйлсийг нь хүчирхэг болгож өгнө.”
-
Сургаал ба Гэрээнүүд 6:36: “Санаа бодол болгондоо над уруу харагтун; бүү эргэлз, бүү ай.”
-
Та ямар судрын хэсгийг сонгосон бэ? Аврагчийн тэдэнд туслах хүсэл эрмэлзэл, хүч чадлыг ойлгоход энэ судрын хэсэг найзад тань хэрхэн тусалж болох вэ?
-
Есүс бидэнд туслахыг хүсдэг ба туслах боломжтой гэдгийг мэдэхэд нь найздаа туслахын тулд та ямар хувийн туршлагаа хуваалцаж болох вэ?
Тэмдэглэл дээрх хуудасныхаа уулын доод хэсэгт хоёр багана зурахад суралцагчдыг урих талаар бодож үз. Нэг баганын дээд талд “Бие даах чадвараа хөгжүүлэхэд оролцох миний оролцоо” гэж бичиж болно. Нөгөө баганын дээд талд “Аврагч намайг хэрхэн адисалж болох вэ” гэж бичиж болно.
Та дараах мэдэгдлийг харуулах юм уу хуулбаруудыг тарааж өгч болно. Үүнийг уншаад, хоёр баганад юу нэмж болохоо олж мэдэхэд суралцагчдыг урь. Суралцагчид бие даан, хоёр хоёроороо эсвэл жижиг бүлгээр ажиллаж болно.
Тэргүүлэх бишопын зөвлөлийн бишоп В.Кристофэр Ваддэлл Их Эзэнд итгэх итгэл, хүчин чармайлт хоёр маань хэрхэн нэгдэн нийлж болохыг тайлбарлажээ.
Цаг хугацааны эхлэлээс Их Эзэн мөнх бус амьдралын нэг хэсэг болох гай зовлон, сорилт бэрхшээл учрах болно гэдгийг мэдэж байсан болохоор сүнслэг, материаллаг байдлын хувьд эдгээрт бэлтгэлтэй байхад Өөрийн хүмүүст туслах удирдамжаар хангасаар ирсэн. Эдгээр гай зовлон нь хувийн эсвэл нийтийг хамарсан чанартай байж болох ч биднийг Их Эзэний зөвлөгөөг анхааран сонсож, үүний дагуу үйлдэх тусам Түүний удирдамж биднийг хамгаалалт, дэмжлэгээр хангах болно. …
Их Эзэн биднийг өөрсдийн хийж чадахаас илүүг хийхийг шаарддаггүй. Гэхдээ Тэрээр хийж чадах зүйлээ хийж чадах үедээ хийхийг биднээс хүсэн хүлээдэг. …
Материаллаг байдлын хувьд бэлтгэлтэй байж, бие даасан байна гэдэг нь “Есүс Христийн ач ивээл буюу боломжтой болгогч хүч, өөрсдийн хүчин чармайлтаар дамжуулан бид өөрсдөдөө болон гэр бүлдээ шаардлагатай амьдралын бүхий л сүнслэг болоод материаллаг хэрэгцээт зүйлсийг олж авна гэдэгт итгэх явдал юм” (В.Кристофэр Ваддэлл, “Талх тариатай байжээ,” 2020 оны 10-р сарын Ерөнхий чуулган, 46–48)
Суралцагчдыг хоёроос гурван хүнтэй бүлгүүдэд хуваагаад, дараах үйл ажиллагааг гүйцэтгүүлж, ярилцлага өрнүүл. Суралцагчдын тодорхойлж болох зарим жишээнд, илүү их сүнслэг хүч чадал олж авахын тулд Иосеф Смитэд хариулт хэрэгтэй байгаа (Иосеф Смит—Түүх 1:8–20-ийг үзнэ үү) болон Жаредын ах амлагдсан нутаг руу явах зуураа гэр бүлийнхээ материаллаг хэрэгцээг хангах хэрэгтэй болсон (Ифер 2:18–3:6-г үзнэ үү) зэрэг багтаж болно.
Өсөж хөгжихөд тулгардаг саад бэрхшээлийг даван туулахын тулд Есүс Христэд итгэх итгэл, хичээл зүтгэл хоёрын аль алиныг ашигласан хэн нэгний тухай судрууд дээрх түүх эсвэл Сүмийн түүхийг олж мэд.
-
Тэд ямар саад бэрхшээлтэй тулгарсан бэ?
-
Тухайн саад бэрхшээлийг даван туулахын тулд тэд хувьдаа ямар хичээл зүтгэл гаргасан бэ?
-
Их Эзэн итгэлийнх нь улмаас тэдэнд хэрхэн тусалсан бэ?
Суралцагчдыг бүлгээрээ ярилцаж дууссаны дараа, судруудад болон Сүмийн түүхэд гарсан, өөрсдийн бодсон хүний нэрийг зурсан уулынхаа орой дээр самбар дээр бичихэд бүлэг бүрээс нэг гишүүнийг урь.
Дараах асуултын дагуу ангиараа ярилц.
-
Та Аврагчийн тусламжтайгаар бие даах чадвараа хөгжүүлэхээр чармайхдаа хэрэгжүүлж болох ямар зүйлийг энэ хүмүүсээс суралцсан бэ?
Энэ нь өдөр тутмын амьдралд хэрхэн хэрэгжиж болох вэ?
Тэнгэрлэг Эцэг, Аврагч хоёр хичээл зүтгэлийг нь адисална гэдэгт итгэхээс гадна ямар бодит үйлдэл гаргаж болохыг ойлгоход суралцагчдад тусал. Та дараах жишээний аль нэгийг сонгоод, хэн нэгэн илүү бие даах чадвартай болохыг хичээх үедээ Есүс Христэд итгэх итгэлээ хэрхэн хэрэгжүүлж болох талаар бодож үзэхэд суралцагчдыг урьж болно.
-
Нэгэн залуу эрэгтэй номлолд үйлчилж, боловсрол эзэмшихийг хүсдэг боловч аль алинд нь хэрэглэх хангалттай мөнгөгүй байв.
-
Нэгэн залуу эмэгтэйд бусад хүний хийх боломжтой олон ажлыг хийхэд эрүүл мэндийн асуудал нь саад болдог байв.
-
Нэгэн залуу эрэгтэй хүнд хэлбэрийн сэтгэл түгших өвчинтэйгөө тэмцэж байна. Сургуульд сурах, ажил эрхлэх зэрэг нийгмийн нөхцөл байдлууд түүнд маш хүндрэлтэй байдаг.
-
Нэгэн залуу эмэгтэй сургуульдаа амжилттай суралцахыг хүсдэг ч ангийнхаа ихэнх сурагч шиг сайн сурч чаддаггүй. Улмаар тэр сурахыг хүсэж буй сургуульдаа орж чадахгүй байх гэдэгт санаа зовсон.
Эдгээр жишээний талаар ярилцахад нь суралцагчдад туслахын тулд дараахтай адил асуултуудыг ашиглахыг бодож үз.
-
Өөрт нь туслах боломжийг Их Эзэнд олгохын тулд тухайн хүн тулгарсан асуудлаа даван туулах ямар үйлдлүүдийг гаргаж болох вэ?
-
Тэд Есүс Христэд итгэх итгэлээ хэрэгжүүлэхээр юу хийж болох вэ?
-
Тэд хэнтэй зөвлөлдөж болох вэ? Ийнхүү үйлдэх нь Их Эзэний тусламжийг хэрхэн урих вэ?
Хэрэв сүүлийн асуултад хариулахад нь суралцагчдад тусламж хэрэгтэй бол жишээн дээр гарч буй хүмүүс эцэг эх болон удирдагч, мэргэжилтнүүдтэй зөвлөлдөж болно гэдгийг санал болгохыг бод. Түүнчлэн тэд нөхцөл байдлаа хэрхэн хамгийн сайнаар зохицуулах талаар залбирлаар дамжуулан Тэнгэрлэг Эцэгтэй зөвлөлдөж болно.
Амьдралдаа хэрэгжүүлэх
Есүс Христэд итгэх итгэлээ хэрэгжүүлэхийг сонгох нь тэдний одоогийн болон ирээдүйн нөхцөл байдлын аль алинд хэрхэн нөлөөлж болох тухай эргэцүүлэн бодоход та суралцагчдыг урьж болно. Дараа нь дараах асуултуудыг эргэцүүлж, тэмдэглэл дээрээ хариултаа бичихэд тэднийг урь.
-
Та амьдралынхаа ямар талбарт илүү бие даах чадвартай болохыг хүсэж байна вэ?
-
Та тулгарч болох саад бэрхшээлийг даван туулахын тулд юу хийж чадах вэ?
-
Та шаардлагатай тусламжийг эрэлхийлэхдээ хэрхэн Есүс Христэд итгэх итгэлээр үйлдэж болох вэ?