“183-р хичээл—Бие даах чадвар нь бусдад илүү сайн анхаарал, халамж тавих боломжийг бидэнд олгодог: Аврагчийн адил үйлчлэхэд бэлтгэх нь,” Сургаал ба Гэрээний семинарын багшийн гарын авлага (2025)
“Бие даах чадвар нь бусдад илүү сайн анхаарал, халамж тавих боломжийг бидэнд олгодог,” Сургаал ба Гэрээний семинарын багшийн гарын авлага
183-р хичээл: Бие даах чадвараа хөгжүүлэх
Бие даах чадвар нь бусдад илүү сайн анхаарал, халамж тавих боломжийг бидэнд олгодог
Аврагчийн адил үйлчлэхэд бэлтгэх нь
Аврагч шавь нартаа “сул доройчуудад тусал … мөн сул дорой өвдөгнүүдийг хүчирхэг болгогтун” хэмээн заасан(Сургаал ба Гэрээ 81:5). Бид өөрсдөө бие даах чадвартай болохын хэрээр энэ зааврыг илүү сайн дагах боломжтой болдог. Энэ хичээл нь бие даах чадвартай болох нь хэрхэн тэдэнд Аврагчийн бусдад тусалдаг үлгэр жишээг илүү сайн дагах боломжийг олгодог гэдгийг ойлгоход суралцагчдад тусална.
Боломжит суралцах үйл ажиллагаа
Бусдад туслах чадвар
Бие даах чадвартай болох нь бусдад туслах боломжид маань нөлөөлдөг гэдгийг ойлгоход нь суралцагчдад туслахын тулд дараах нөхцөл байдлыг нэг нэгээр нь уншихад гурван суралцагчийг урих талаар бодож үз. Өгөгдсөн нөхцөл байдал бүрийг уншиж дууссаны дараа түр зогсоогоод, Минди, Нэйтан, Жэйда нар ямар хэмжээнд тусалж чадахыг тодорхойлох өөр өөр хүчин зүйлийг хуваалцахыг ангийн үлдсэн суралцагчдаас хүс. (Хүсвэл та илүү тохирсон өөр жишээг суралцагчдадаа зориулан зохиож болно.)
-
Миндигийн найз математикийн хичээлийн даалгавраа сайн ойлгохгүй байгаа тул Миндигээс тусламж хүсжээ.
-
Шинэ номлогч Нэйтан Аврагчийн Сүмийн сэргээлтийн талаар олон асуулт байгаа нэгэн хүнтэй уулзжээ.
-
Жэйда тойргийнх нь нэгэн гэр бүл хүүхдүүддээ дулаан хувцас авч өгч чадахгүй байгааг олж мэдэв.
Арван хоёр төлөөлөгчийн чуулгын ахлагч Робэрт Д.Хэйлсийн (1932–2017) хэлсэн дараах мэдэгдлийг үзүүлэх юм уу хувийг нь суралцагчдад тарааж өгөх талаар бодож үз. Дээр дурдсан жишээнүүдэд хамаатай байж болох хамгийн багадаа нэг үг хэллэгийг догол мөр бүрээс тодорхойлж, жижиг бүлэг болон ярилцахад суралцагчдыг урь. (Шаардлагатай гэж үзвэл, уг мэдэгдэлд хэрэглэсэн материаллаг гэдэг үг нь санхүү, боловсрол, сэтгэл хөдлөл, бие махбодын гэх зэрэг сайн сайхан амьдралын олон хүрээнд хамаатай гэдгийг ойлгоход нь суралцагчдад тусал.)
Бие дааж амьдрах чадвар гэдэг бол бид өөрсдийнхөө болон Тэнгэрлэг Эцэгийн бидэнд анхаарч халамжлуулахаар итгэл хүлээлгэн өгсөн хүмүүсийн сүнсний болон материаллаг сайн сайхан байдлын төлөө хариуцлага хүлээх явдал мөн. Бид гагцхүү бие даах чадвартай болсон үедээ л бусдад үйлчилж, тэднийг адислахдаа Аврагчийг даган дуурайж чадна.
Бие дааж амьдрах чадвар бол зорилгодоо хүрэх арга хэрэгсэл мөн гэдгийг ойлгох нь чухал. Бидний туйлын зорилго бол Аврагчтай адил болох явдал бөгөөд бусдад сэтгэл харамгүй үйлчилснээр зорилго маань өргөн цар хүрээтэй болдог. Бидний бие дааж амьдрах чадварын түвшнээс хамаарч үйлчлэх чадвар маань нэмэгддэг эсвэл буурдаг билээ.
Ерөнхийлөгч Марион Ж.Ромни нэгэн удаа ийн хэлсэн: “Өлссөн хүнд хоосон шүүгээнээс хоол авч өгч чадахгүй. Тусламж хэрэгтэй хүмүүст өгөх мөнгө хоосон хэтэвчнээс гардаггүй. Сэтгэл санааны хувьд өлсөж цангасан хүнээс дэмжлэг, ойлголт гарахгүй. Суралцаагүй хүн зааж чадахгүй. Хамгийн чухал нь сүнслэг байдлаараа сул дорой хүнээс сүнслэг удирдамж ирж чадахгүй” (Conference Report, Oct. 1982, 135; эсвэл Ensign, Nov. 1982, 93). (Robert D. Hales, “A Gospel Vision of Welfare: Faith in Action,” in Basic Principles of Welfare and Self-Reliance [worldwide leadership training meeting, 2009], 1–2; мөн ChurchofJesusChrist.org-ийг үзнэ үү.)
-
Та ахлагч Хэйлсээс ямар үнэнийг сурч мэдсэн бэ?
Суралцагчдыг дээрх асуултад хариулж байхад нь тэд бид бие даах чадвараа хөгжүүлэхийн хэрээр Аврагчтай илүү адил болж, бусдад илүү сайн тусалж, үйлчилж чаддаг гэдгийг ойлгосон байхад анхаар.
Та дараах асуултуудын талаарх бодол санаа, хариултаа бичихийг суралцагчдаас хүсэх замаар энэ хичээл хувь хүнийх нь хувьд тэдэнд хамаатай гэдгийг олж харахад нь тусалж болох юм. Үүнд:
-
Бурханы хөгжүүлэхэд танд тусалсан чадвар, арга хэрэгслээр дамжуулан та бусдад хэрхэн тусалж чадсан бэ?
-
Ирээдүйд өөртөө болон бусдыг илүү сайн харж халамжилж чадахын тулд аль тал дээрээ ажиллаасай хэмээн Тэнгэрлэг Эцэг танаас хүсэж байж болох вэ?
Аврагчтай илүү адил болох нь
Дараах заавар, асуултыг үзүүлэхийг бод. Үйл ажиллагаагаа хийж дуусгаад, асуултыг хамтрагчтайгаа ярилцахад суралцагчдыг урь.
Лук 2:40, 52-ыг уншаад, Есүс өсвөр насандаа аль аль талаараа өсөж, хөгжсөнийг тэмдэглэж ав.
-
Аврагчийн бусдад үйлчлэх чадварт нь хэрхэн өсвөр насны өсөлт, хөгжил нь нөлөөлсөн байж болох вэ?
Хамтрагчтайгаа хуваалцаж дуусмагц Лук 2:40, 52-т дурдсан тал бүрд өнөөгийн өсвөр үеийнхэн бие даах чадвараа хэрхэн хөгжүүлж болох арга замуудыг хуваалцахад суралцагчдыг урь.
Дараахтай адил асуултуудыг дотроо тунгаан бодоход цагийг суралцагчдад гаргаж өгөхийг бод.
-
Та аль нэгэн тал дээр илүү бие дааж чадвал ирээдүйд хэнд тусалж чадах вэ? Та хэрхэн тусалж чадах вэ?
-
Бие даах чадвартай болохын төлөө ажиллаж хөдөлмөрлөх нь хэрхэн биднийг Аврагчтай илүү адил болоход тусалдаг вэ?
Бие даах чадвараар дамжуулан Христийн адил үйлчлэхийн жишээ
Сүмийн түүхэн дэх Бурханд болон бусдад үйлчилж чадсан хүмүүсийн жишээг хуваалц. Та ангийн суралцагчдыг судлах бүлгүүдэд хуваагаад, бүлэг тус бүрд “Сүмийн түүхэн дэх бие даах чадварын жишээ” гарчигтай тараах материалаас авсан нэг жишээг өгч болно. Санал болгосон шүлгүүдийг уншаад, догол мөрийн төгсгөлд байгаа асуултын дагуу ярилцахад бүлгүүдийг урь.
Сүмийн түүхэн дэх бие даах чадварын жишээ
Мартин Харрис: 1827 онд Иосеф Смит алтан ялтаснуудаас Мормоны Номыг орчуулахыг хичээх явцдаа мөрдлөг хавчлага, ядууралтай тулгарч байжээ. Амжилттай фермийн эзэн Мартин Харрис Иосефын нөхцөл байдлын талаар олж мэдэв. Иосеф Смит—Түүх 1:61–62-ыг уншаад, Мартин Иосеф Смитэд хэрхэн тусалж чадсаныг олж мэд. Сургаал ба Гэрээ 19:26, 34–35; 104:26-г уншаад, Мартин Харрис хэрхэн Их Эзэнд үйлчилж, бусдыг адисалсан өөр арга замуудыг олж мэд. Мартин Их Эзэнд болон бусдад утга учиртай арга замаар үйлчлэх боломжийг олгохуйц санхүүгийн эрх чөлөөнд хүрсэн байсан. Өсвөр насны хүүхдүүд цаашид Их Эзэнд болон бусдад үйлчлэхэд туслах чадвар, боловсрол, боломж бололцоотой болохын тулд одооноос юу хийж чадах вэ?
Эмма Хэйл Смит: Эмма Хэйл Иосеф Смиттэй танилцах үедээ чадварлаг уран уншигч, зохиолч, багш, хөгжимчин байсан. Сургаал ба Гэрээ 25:5–7, 11-ийг уншаад, Их Эзэний Эммад даалгасан үүрэг хариуцлагыг олж мэд. Эммагийн эзэмшсэн чадвар, боловсрол нь Их Эзэнд болон бусдад утга учиртай үйлчлэхэд тусалсан. Өсвөр насны хүүхдүүд цаашид Их Эзэнд болон бусдад үйлчлэхэд туслах чадвар, боловсрол, боломж бололцоотой болохын тулд одооноос юу хийж чадах вэ?
Виллиам В.Фэлпс: Их Эзэн дөнгөж Сүмд хөрвөгдсөн Виллиам В.Фэлпсийг Миссури руу нүүхийг зааварлажээ. Сургаал ба Гэрээ 55:4, 57:11–13-ыг уншаад, Сүмдээ үйлчлэх Их Эзэний Виллиамд өгсөн онцгой даалгавруудыг олж мэд. Сүмийг өдгөө адисалсаар байгаа Виллиам В.Фэлпсийн бичсэн дууллуудыг хайж олохын тулд дууллын ном- дахь “Зохиолч ба хөгжмийн зохиолч” индексийг ашиглана уу. Виллиам Их Эзэнд болон бусдад утга учиртай үйлчлэхэд тус болох чадвар, боловсролтой болсон байв. Өсвөр насны хүүхдүүд цаашид Их Эзэнд болон бусдад үйлчлэхэд туслах чадвар, боловсрол, боломж бололцоотой болохын тулд одооноос юу хийж чадах вэ?
Сурч мэдсэн зүйлээ ангийнхантайгаа хуваалцахад бүлэг бүрийг урих талаар бодож үз.
Та бие даах чадвараа хөгжүүлж, улмаар Христийн адилаар бусдад үйлчилж чадсан хүмүүсийн орчин үеийн жишээг бодож олоход нь суралцагчдад тусалж болно. Та “Strengthen Thy Brethren” (3:50) эсвэл “On the Lord’s Errand: The Life of Thomas S. Monson” видеог цагийн код 19:54-өөс 24:18 хүртэл үзүүлж болно. Аль аль нь ChurchofJesusChrist.org дээр байгаа.
Та болон өөр хүмүүс хэрхэн амьдралынхаа туршид эзэмшсэн ур чадвар, хуримтлуулсан боломж бололцоо, төлөвшүүлсэн хандлагаараа дамжуулан хэрхэн танд болон бусдад үйлчилсэн талаар хуваалцахыг бодож үз.
Хичээлийн төгсгөлд өнөөдөр сурч, мэдэрсэн зүйл дээрээ үндэслэн Тэнгэрлэг Эцэг тэднийг юу хийгээсэй гэж хүсэж байгаа талаар залбиран тунгаан бодож, бодол санаагаа бичих цагийг суралцагчдад гаргаж өгч болно. Суралцагчид өөрийн хүсэлтээр зарим хариултаа ангийнхантай хуваалцаж болно.