Leksiyon 182: Pagtukod og Pagbarog pinaagi sa Kinaugalingong Paningkamot

Maalamong Pagdumala sa Pinansyal nga mga Kapanguhaan

Pagpaningkamot sa Pagtukod og Pinansyal nga Pagbarog pinaagi sa Kinaugalingong Paningkamot

Ang kabatan-onan naay daghang umaabot nga mga oportunidad nga moabot nga dunay pinansyal nga responsibilidad, sama sa pagserbisyo og usa ka misyon, pag-angkon og edukasyon, o pagsugod og pamilya. Samtang modangop sila kang Jesukristo ug mosunod sa maalamong pinansyal nga mga baroganan, ilang gidapit ang panalangin sa Dios sa paghatag sa ilang mga panginahanglan (tan-awa sa Doktrina ug mga Pakigsaad 104:15). Kini nga leksiyon makatabang sa mga estudyante nga masabtan kon unsaon pagpakita og hugot nga pagtuo sa Dios samtang sila nagtukod og pinansyal nga pagbarog pinaagi sa kinaugalingong paningkamot.

Posibleng mga Kalihokan sa Pagkat-on

Pagtan-aw sa umaabot

Magkapares man o ginagmayng grupo, dapita ang mga estudyante nga ipakigbahin ang dagkong mga tumong nga tingali aduna sila para sa sunod nga 10 o 15 ka tuig. Pananglitan, pwede nilang ipakigbahin kon nagplano ba sila nga moserbisyo og misyon, kon asa nila gustong ipadayon ang ilang pag-eskwela, o ilang mga tinguha bahin sa kaminyoon ug pamilya. Human makapakigbahin ang mga estudyante, ikonsiderar ang paghisgot sa mosunod nga mga pangutana isip usa ka klase:

• Hain sa inyong mga tumong ang nagkinahanglan og pinansyal nga pagpangandam?

• Kanus-a sa inyong hunahuna ang labing maayo nga panahon sa pagsugod sa paghimo og pinansyal nga mga plano para sa inyong kaugmaon? Ngano man?

  Mahimong andam ka nga mopakigbahin og kadiyot sa komon nga gasto sa pagserbisyo og misyon, pag-angkon og edukasyon, o pagpuyo sa inyong lugar. (Hinumdomi nga ang tumong niini nga leksiyon dili ang pag-outline kon pila ang tanang magasto apan sa pagtabang sa mga estudyante nga matinud-anong modangop kang Jesukristo ug mahibalo sa pipila ka sukaranang mga baroganan sa pinansyal nga pagkatinugyanan.)

  Dapita ang mga estudyante sa pagtubag sa mosunod nga pangutana diha sa ilang mga journal sa pagtuon:

• Unsa ka kamasaligon sa imong pinanasyal nga kaugmaon? Ngano man?

Sa tibuok leksiyon, mainampoong tinguhaa ang tabang sa Langitnong Amahan aron masabtan ang mga baroganan nga makatabang nimo karon ug sa umaabot aron maalamon nimong madumala ang imong mga panalapi.

Mga saad gikan sa Ginoo

Sa 1834, naglisod sa pinansyal ang Simbahan tungod sa, usa sa mga rason, pagtukod sa Kirtland Temple ug uban pang matarong nga mga paningkamot. Ang Ginoo mihatag kanila og tambag nga mahimong magamit usab kanato samtang nag-atubang kita og pinansyal nga mga obligasyon aron makab-ot ang atong matarong nga mga tinguha.

Basaha ang Doktrina ug mga Pakigsaad 104:13–17, 78–79. Hunahunaa kon sa unsang paagi may kalabotan ang mga pagtulun-an sa Ginoo sa imong panalapi.

• Unsay imong nakat-onan nga pwedeng magamit sa atong pinansyal nga mga panginahanglan?

• Unsa nga mga pulong o hugpong sa mga pulong ang makatabang sa usa ka tawo sa pagsalig sa Ginoo samtang ilang gidumala ang ilang panalapi?

  Ang mga estudyante mahimong mopakigbahin og lainlaing mga hunahuna, lakip na ang mosunod nga kamatuoran: Ang Ginoo mosangkap sa atong mga panginahanglan kon matinud-anon kitang mosunod sa Iyang tambag.

• Ngano kaha nga kini nga kamatuoran makapadasig samtang naningkamot ka nga mangandam sa pinansyal para sa imong kaugmaon?

Kon gikinahanglan, tabangi ang mga estudyante nga masabtan nga wala magsaad ang Ginoo nga dili na maglisod sa pinansyal o uban pang mga kalisdanan. Apan, ang Ginoo nasayod kon unsa ang atong gikinahanglan; samtang kita nagmatinud-anon, Siya mohatag kanato sumala sa Iyang kabubut-on ug panahon.

Ang mga baroganan sa Ginoo bahin sa pinansyal

Ipasabot nga pinaagi sa mga kasulatan ug mga lider sa Iyang Simbahan, ang Ginoo mihatag og tambag aron sa pagtabang kanato nga makahimo og maalamong paggamit sa atong yutan-ong mga panalangin, lakip na ang atong panalapi. Aron matabangan ang mga estudyante nga masabtan ang tambag sa Ginoo, ikonsiderar ang pagdapit nila nga magpili og usa sa mosunod nga mga tudling nga tun-an. Kon mahuman na sila, pwede silang makigpundok sa mga estudyante nga nagtuon sa laing mga tudling ug ipakigbahin ang ilang nakat-onan.

Basaha ang mosunod nga mga bersikulo ug ilha ang mga baroganan nga gitudlo sa Ginoo nga makatabang sa usa ka tin-edyer nga makapangandam alang sa ilang pinansyal nga kaugmaon.

• Malaquias 3:8–10

• 1 Timoteo 6:10

• 2 Nephi 9:51

• Jacob 2:18–19

• Doktrina ug mga Pakigsaad 48:4 (Niining higayona, kinahanglang mopalit og yuta ang mga Santos, pero pwede nato kining ipahisama sa kaugalingon natong mga responsibilidad sa umaabot.)

Kon mahuman na og pakigbahin ang mga estudyante sa usag usa, ikonsiderar ang pagpangutana sama sa mosunod:

• Sa unsang paagi ang mga baroganan niini nga mga kasulatan makatabang ninyo sa pagpakita og hugot nga pagtuo kang Jesukristo samtang nangandam kamo para sa inyong pinansyal nga mga panginahanglan?

• Ngano sa inyong hunahuna ang pagbayad og ikapulo importante nga bahin sa pagdumala sa atong panalapi? (tan-awa sa Malaquias 3:8–10).

• Gawas sa pagbayad sa ikapulo, unsa ang pipila ka paagi nga atong mauna ang pagpangita sa gingharian sa Dios kay sa pagpangita og mga kabtangan?

• Sa unsang paagi ang pagpalambo sa kinaiya sa pagtigom og kwarta isip usa ka batan-on makapanalangin ninyo sa tibuok ninyong kinabuhi?

Pinansyal nga mga prayoridad

Ang mosunod nga mga imahe nag representar sa mga hitabo o mga desisyon nga may kalabotan sa panalapi. Ang pagtugot sa mga estudyante nga ikonsiderar ang pagkasunod-sunod niini nga mga hitabo o mga desisyon makatabang nila sa pag-ila sa mga prayoridad kon maghimo og mga pinansyal nga desisyon. Ikonsiderar ang pagprinta sa mga imahe, paggunting sa matag usa sa lima ka kategoriya, ug pagpapilit niini diha sa pisara sa sinalagma nga pagkahan-ay. Dapita ang mga estudyante nga hisgotan ang pagkahan-ay nga para nila kinahanglan nga anaa sa sakto nga mga kategoriya. Ang laing opsiyon mao ang pagprinta ug paggunting og igo nga mga kopya niini nga graphic alang sa gagmay nga mga grupo sa mga estudyante aron ihan-ay og sakto ug dungan nga hisgotan. Makatabang tingali ang pagpasabot nga bisan og ingon ka klaro nga ang pagdawat og kinitaan kinahanglang mauna sa tinuod nga kinabuhi, daghang tawo ang manghulam ug mogasto og kwarta sa dili pa makaangkon niini. Gitawag kini og utang, ug atong paningkamotan nga likayan kini.

Sa laing paagi, pwede nimong dapiton ang mga estudyante nga ilista diha sa pisara ang komon nga mga galastohan nga naa tingali sila karon o sa umaabot. Isip usa ka klase o diha sa mga grupo, pwedeng dapiton ang mga estudyante nga unahon ang mga galastohan gikan sa labing importante ngadto sa dili kaayo importante, gamit ang mga baroganan nga bag-o lang nilang nakat-onan sa miaging kalihokan sa kasulatan.

• Unsaon nimo pag-una niini nga mga pinansyal nga mga hitabo o mga desisyon? Unsay imong nakat-onan gikan sa pagtulun-an sa Ginoo diha sa mga kasulatan aron suportahan ang imong tubag?

• Unsa nga mga hagit ang mahimong resulta tungod kay wala mahan-ay ang atong pinansyal nga mga prayoridad?

• Unsa kaha ang imong isulti sa usa ka tawo nga mibati nga ang ilang kasamtangan nga mga galastohan sa kinabuhi kinahanglang unahon kay sa pagbayad sa ikapulo?

Ikonsiderar ang paghangyo sa mga estudyante nga ipakigbahin kon giunsa sila pagpanalangin sa Ginoo o ang mga sakop sa ilang pamilya dihang giuna nila ang pagbayad sa ikapulo kay sa uban pang galastohan. Isip laing pananglitan, pwede nimong ipakigbahin ang kasinatian ni Elder Valeri V. Cordón sa Seventy sa iyang pakigpulong nga “Ang Pinulongan sa Ebanghelyo” gikan sa time code nga 6:10 hangtod 7:40, nga anaa sa ChurchofJesusChrist.org.

Ikonsiderar ang paghisgot sa pamahayag sa ubos gikan kang Elder Stanley G. Ellis.

Kon makatabang, ikonsiderar ang paggahin og panahon sa pagtudlo sa mga estudyante kon unsaon pagbayad sa ikapulo ug mga halad gamit ang tithing slip o sa online diha sa donations.ChurchofJesusChrist.org.

Gipangutana ni Elder Stanley G. Ellis sa Seventy ang mosunod bahin sa pagbayad sa ikapulo:

Aduna ba kitay hugot nga pagtuo sa pagsalig sa mga saad [sa Ginoo] kalabut sa ikapulo nga sa 90 porsyento sa atong tubo uban sa tabang sa Ginoo, mas maayo pa kaysa 100 porsyento nga nagkinaugalingon? (Stanley G. Ellis, “Misalig ba kita Kaniya? Ang Kalisud Makaayo,” Liahona, Nob. 2017, 114)

Aron ipakita sa mga estudyante ang ehemplo sa mga tawo nga nagkinabuhi sumala sa mga baroganan niini nga leksiyon, ikonsiderar ang pagpakigbahin sa “Ang Panaw ni Sedrick” (2:32) nga anaa sa ChurchofJesusChrist.org.

Pwede nimong tabangan ang mga estudyante nga masabtan nga ang Ginoo naghatag ogmga paagi aron tabangan kita sa atong pinansyal nga kaugmaon nga wala mahulagway niini nga leksiyon. Pananglitan, Siya makadasig kanato sa ubang mga paagi aron makakita o makatigom og kwarta. Pwedeng makig-istorya ang kabatan-onan sa ilang bishop o mga lider bahin sa pinansyal nga tabang para sa misyon o barato nga mga paagi aron makapadayon og taas nga edukasyon.

Panapos

Pwedeng dapiton ang mga estudyante nga tubagon ang mosunod nga mga pangutana diha sa ilang mga journal sa pagtuon o hisgotan kini uban ang usa ka pares:

• Unsaon nimo pag-summarize ang imong nakat-onan bahin sa maalamong pagdumala sa imong panalapi?

• Unsa ang usa ka butang nga gibati nimo nga gusto sa Ginoo nga makat-onan nimo karong adlawa?

Ikonsiderar ang pagdapit sa pipila ka mga estudyante sa pagpakigbahin sa ilang mga tubag. Ipakigbahin ang imong pagpamatuod bahin sa tinguha sa Ginoo sa pagsangkap sa Iyang mga Santos (tan-awa sa Doktrina ug mga Pakigsaad 104:15). Awhaga ang mga estudyante nga modangop sa Ginoo ug iapil Siya sa pinansyal nga mga desisyon sa tibuok nilang kinabuhi.

Dugang nga mga Kapanguhaan

Asa ko makakat-on og dugang bahin sa maalamong pagdumala sa panalapi?

• Personal nga Panalapi alang sa pagbarog sa kinaugalingong paningkamot (2016), ChurchofJesusChrist.org

• “Mga Panalapi,” ChurchofJesusChrist.org

• Mga Hilisgotan ug mga Pangutana, “Mga Panalapi sa Pamilya,” topics.ChurchofJesusChrist.org

Ako ba ang mobayad sa mga galastohan sa pagserbisyo og misyon nga layo sa pinuy-anan?

Ang pinansyal nga sakripisyo kabahin sa misyonaryo nga pagserbisyo (tan-awa sa Marcos 1:17–18; Alma 15:16). Ang mga misyonaryo ug ang ilang mga pamilya adunay nag-unang responsibilidad sa pagtampo sa pinansyal ngadto sa misyonaryo nga pagserbisyo. Sila kinahanglan nga mohimo sa angay nga pagpangandam ug sakripisyo. Sila kinahanglang makabarog pinaagi sa kinaugalingong paningkamot sa pinansyal nga paagi kutob sa mahimo sa pagtuman sa gipasalig nga kontribusyon. …

Kadtong kinsa nagkinahanglan og tabang sa pinansyal aron makahatag sa gipaabot nga mga pasalig nga kontribusyon makadawat niini gikan sa kabanay ug mga higala.

Kon ang panginahanglan anaa gihapon, ang bishop o presidente sa stake mahimong mohangyo sa mga miyembro sa ward ug stake sa paghatag og kontribusyon ngadto sa pundo sa misyonaryo sa ward. (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 24.3.4, 24.3.4.1, ChurchofJesusChrist.org)

Unsaon nako paggasto sa mas maalamong paagi ang akong kwarta?

Si Elder Robert D. Hales (1932–2017) sa Korum sa Napulog Duha ka Apostoles mitudlo:

Sa higayon nga kita buot makasinati o makaangkon og mga butang nga makaapekto kanato ug sa atong mga kapanguhaan, mahimong mangutana kita sa atong mga kaugalingon, “Ang kaayohan temporaryo lang ba, o kini aduna bay mahangturong bili ug kahulugan?” Ang matinud-anong pagtubag niini nga mga pangutana makatabang kanato nga makalikay sa sobra nga pagpangutang ug uban nga makaadik nga kinaiya. (Robert D. Hales, “Pagkahimong Madaginuton nga mga Tigsangkap sa Temporal ug Espirituhanong Paagi,” Liahona, Mayo 2009, 10)

Si Presidente Gordon B. Hinckley (1910–2008) mitudlo:

Tan-awa ang kahimtang sa inyong mga panalapi. Awhagon ko kamo sa paghinay-hinay sa inyong mga galastuhan, disiplinaha ang inyong mga kaugalingon sa inyong mga pagpamalit aron kutob sa mahimo makalikay sa utang. Bayari ang utang sa labing daling panahon, ug himoa ang inyong kaugalingon nga gawasnon gikan sa pagkaulipon. (Gordon B. Hinckley, “To the Boys and to the Men,” Ensign, Nob. 1998, 54)

Naa bay mga panahon nga angay nakong ikonsiderar ang pagpangutang?

Depende sa mga kahimtang, mahimo ra ang pagpangutang para sa mosunod nga mga galastuhan:

• Usa ka kasarangan, barato ra nga balay

• Makatarongan nga paggasto sa edukasyon nga mosangput sa mas maayong panarbaho

• Kasarangan, basic nga pang-transportasyon (kon gikinahanglan lang)

Kinahanglang likayan nimo ang pagpangutang og mga butang gawas niini. Imbes mangutang, pagtigom para maoy gastohon. (Personal nga Panalapi para sa Katakos sa Pagtagana sa Kaugalingon [2016], 114)

Dugang nga mga Kalihokan sa Pagkat-on

Pagsabot sa utang

Dapita ang mga estudyante nga hinumdoman ang mga detalye sa unang pagmantala sa Basahon ni Mormon. Kon kinahanglan, pahinumdomi sila nga nanghulam og kwarta si Martin Harris aron makatabang sa pagbayad sa pagprinta sa Basahon ni Mormon.

Dapita ang mga estudyante nga basahon ang Doktrina ug mga Pakigsaad 19:35, nga pangitaon ang mga instruksiyon nga gihatag sa Ginoo kang Martin Harris niining panahona.

• Sa imong hunahuna, sa unsang paagi ang utang nagbutang kanato sa pagkaulipon?

Kon kinahanglan, tabangi ang mga estudyante nga masabtan nga ang utang mao ang pagpanghulam og kwarta nga dili imoha. Sa kasagaran kini adunay bugti sa kantidad, nailhan nga tubô. Ang tubô mao ang porsyento sa kantidad nga nautang. Ang mga utang moabot tungod sa wala dahumang mga bayranan ug sa tanang ekspektasyon sa pagbayad sa tanan nga imong gihulaman og dugangan sa tubô. Ang resulta makabayad ka og mas dako kay sa kantidad nga imong gihulam—usahay mas dako pa. Dihang mabayran na ang mga utang, duna kitay kagawasan sa pagpili kon unsaon paggasto ang atong kwarta ug ana sa mas dako nga posisyon nga tabangan ang atong kaugalingon, atong pamilya, o uban pang nanginahanglan.

Ikonsiderar ang pagpakigbahin sa mosunod nga istorya gikan kang Elder Ulisses Soares sa Korum sa Napulog Duha ka Apostoles:

Sulod sa pipila ka bulan sa among kaminyoon, ang akong pinalanggang asawa mipahayag sa iyang tinguha nga magtuon og musika. Aron malipay siya, nakadesisyon ko sa pagpasiugda og dako, kinasingkasing nga surprisa alang sa akong minahal. Ako miadto sa tindahan og instrumento nga pangmusika ug gipalitan siya og pyano isip usa ka regalo. Ako naghinamhinam nga mibutang sa resibo diha sa usa ka kahon nga adunay nindot nga laso ug gihatag kini ngadto niya, nagdahom og grabeng reaksyon sa pasalamat alang sa iyang sobra ka mapinanggaon ug mahunahunaon nga bana.

Sa dihang iyang giablihan ang gamayng kahon ug nakita ang sulod niini, siya mahigugmaong mitan-aw nako ug miingon, “O, mahal ko, kanindot nimo! Apan mangutana ko nimo: Regalo ba kini o utang?” Human sa pakigtinambagay mahitungod sa surprisa, kami nakadesisyon nga ikanselar ang pagpalit. Kami nagpuyo nga limitado kaayo ang badyet samtang nag-eskwela usab, sama sa kadaghanan sa bag-ong mga gikasal. (Ulisses Soares, “Diha sa Panag-uban sa Ginoo,” Liahona, Nob. 2022, 42–43)

• Unsa nga mga pagpili ang pwedeng himoon sa kabatan-onan karon aron matabangan sila nga makalikay sa wala kinahanglana nga utang sa umaabot?

Ang Ginoo mag-andam og paagi

Kon dili segurado ang mga estudyante bahin sa ilang pinansyal sa umaabot, ikonsiderar ang pagdapit nila nga basahon ang 1 Nephi 3:7.

• Sa unsang paagi ang mga pagtulun-an niini nga bersikulo magamit sa gikinahanglang panalapi aron matuman ang unsay gisugo sa Ginoo kanato?

Ikonsiderar ang pagpakigbahin sa imong pagpamatuod o ang usa ka istorya nga naghulagway sa abilidad sa Ginoo sa pag-andam og paagi para matubag ang atong pinansyal nga mga responsibilidad.