Leksiyon 181: Pagtukod og Pagbarog pinaagi sa Kinaugalingong Paningkamot

Hugot nga Pagtuo diha kang Jesukristo sa Pagtukod og Pagbarog pinaagi sa Kinaugalingong Paningkamot

Pagbuntog sa mga Babag pinaagi sa Ginoo

Agig dugang sa pagpanalangin kanato sa kapasayloan ug pagkaayo gikan sa sala, mapanalanginan kita sa Manluluwas sa mga sitwasyon nga parehas diha sa eskwelahan, trabahoan, ug mga relasyon. Kon magpakita kita og hugot nga pagtuo kang Jesukristo, gidapit nato Siya nga tabangan kita nga mahimong mas makabarog pinaagi sa kinaugalingong paningkamot sa tanang bahin sa atong kinabuhi. Kini nga leksiyon gituyo sa pagtabang sa mga estudyante sa pagpakita og hugot nga pagtuo diha kang Jesukristo sa pagtukod og pagbarog pinaagi sa kinaugalingong paningkamot.

Posibleng mga Kalihokan sa Pagkat-on

Makabalhin og mga bukid

Ikonsiderar ang pagdrowing og bukid diha sa pisara ug pagdapit sa mga estudyante nga magdrowing og parehas nga bukid diha sa ilang mga journal sa pagtuon, nga sakopon ang halos katunga sa ibabaw nga bahin sa usa ka pahina. Sultihi ang mga estudyante nga hunahunaon nga nagbabag ang bukid tali nila ug sa pagtukod sa ilang espirituwal ug temporal nga pagbarog pinaagi sa kinaugalingong paningkamot. (Kon nagkinahanglan og tabang ang mga estudyante kon unsay ipasabot sa pagbarog sa kinaugalingong paningkamot, ipakigbahin nga apil niini ang mga butang nga sama sa pagbaton og ilang kaugalingong espirituwal nga kalig-on, pagkuha og edukasyon, ug pagpangita og igo nga kwarta aron matagan-an ang ilang panginahanglan.)

Sa sulod sa bukid, hangyoa sila nga ipasulat ang pipila sa mga babag nga ilang giatubang nga nakapalisod sa pagtukod og pagbarog pinaagi sa kinaugalingong paningkamot sa lainlaing bahin sa ilang kinabuhi. (Ang mga ehemplo tingali maglakip sa kawalay trabaho, mga kahigayonan sa edukasyon, panglawas, o gikinahanglang suporta gikan sa mga minahal.) Dapita ang mga boluntaryo nga gustong magsulat og pipila sa mga babag nga ilang giatubang diha sa bukid nga imong gidrowing sa pisara.

• Sa unsang paagi ang mga babag diha sa kinabuhi usahay morag sama sa mga bukid?

• Unsay lainlaing mga paagi sa pagtubag sa mga tawo sa ingon niini nga mga hagit?

Pwede nimong dapiton ang mga estudyante nga pamalandongan kon unsaon nila pagplano ang pag-atubang sa ilang mga babag aron makabaton og pagbarog pinaagi sa kinaugalingong paningkamot. Dapita sila nga mainampoong tinguhaon sa tibuok leksiyon kon unsaon pagdawat sa kusog nga gikan sa Manluluwas aron mabuntog ang mga hagit nga ilang giatubang.

Pagdapit sa gahom sa Manluluwas diha sa atong kinabuhi

Gihatag ni Presidente Russell M. Nelson ang mosunod nga tambag alang niadtong nag-atubang og mga hagit sa ilang kinabuhi.

Minahal kong kaigsoonan, ang akong panawagan kaninyo … sugdi karon ang pagpalambo sa inyong hugot nga pagtuo. Pinaagi sa inyong hugot nga pagtuo, si Jesukristo mopalambo sa inyong abilidad sa pagbalhin sa mga bukid diha sa inyong kinabuhi, bisan og ang inyong personal nga mga hagit pareha kadako sa Bukid sa Everest. …

Ang inyong mga bukid managlahi, ug bisan pa ang tubag sa matag usa sa inyong mga hagit mao ang pagpalambo sa inyong hugot nga pagtuo. (Russell M. Nelson, “Si Kristo Nabanhaw: Ang Hugot nga Pagtuo diha Kaniya Makabalhin og mga Bukid,” Liahona, Mayo 2021, 102–3)

• Unsaon ninyo sa pag-summarize ang gitudlo ni Presidente Nelson?

  Makahunahuna tingali ang mga estudyante og lainlaing maayong mga summary. Usa sa importanteng kamatuoran mao nga samtang nagkadako ang atong hugot nga pagtuo diha kang Jesukristo, Iyang padak-on ang atong abilidad sa pagbuntog sa mga hagit.

• Sa unsang paagi kini nga mga pagtulun-an gikan kang Presidente Nelson magamit sa atong mga paningkamot nga makabaton og pagbarog pinaagi sa kinaugalingong paningkamot diha sa atong kinabuhi?

Hunahunaa nga naa kay higala nga nagkinahanglan og gamayng tabang sa pagtuo nga si Jesukristo motabang gayod kanila sa mga babag sa ilang kinabuhi. Pangita og tudling sa doktrinal nga kahanas gikan sa bisan unsang basahon sa kasulatan nga makatabang nila nga mabati ang tinguha ug gahom ni Jesus sa pagtabang.

Ang mga tudling sa doktrinal nga kahanas nga makita sa mga estudyante mahimong maglakip sa:

• Proverbio 3:5–6: “Sumalig ka sa Ginoo sa bug-os mong kasingkasing … ug siya magamando sa imong mga alagianan.”

• Mateo 11:28–30: “Umari kanako, kamong tanan nga nabudlay ug nabug-atan, ug papahulayon ko kamo.”

• Santiago 1:5–6: “Kon aduna man kaninyoy nakulangan og kaalam, papangayoa siya sa Dios.”

• 1 Nephi 3:7: “Ako moadto ug mobuhat sa mga butang nga ang Ginoo nagsugo.”

• 2 Nephi 28:30: Ang Dios “mopadayag ngadto sa mga katawhan og pagtulun-an human sa usa ka pagtulun-an, lagda human sa usa ka lagda.”

• Ether 12:27: “Kon ang mga tawo moduol ngari kanako … niana Ako mohimo sa mahuyang nga mga butang nga mahimo nga malig-on ngadto kanila.”

• Doktrina ug mga Pakigsaad 6:36: “Paghunahuna ngari kanako sa matag hunahuna; ayaw pagduha-duha ayaw kahadlok.”

• Unsa nga tudling ang imong napili? Sa unsang paagi kana nga tudling makatabang sa imong higala nga masabtan ang tinguha ug gahom sa Manluluwas sa pagtabang niya?

• Unsang personal nga kasinatian ang imong mapakigbahin sa imong higala aron mahibalo nga andam ug makahimo si Jesus sa pagtabang kanato?

Ikonsiderar ang pagdapit sa mga estudyante nga maghimo og duha ka kolum ubos sa bukid diha sa ilang pahina sa journal. Sa ibabaw sa usa ka kolum, pwede nilang isulat ang “Akong bahin sa pagtukod og pagbarog pinaagi sa kinaugalingong paningkamot.” Sa ibabaw sa laing kolum, pwede nilang isulat ang “Unsang paagi ang Manluluwas makapanalangin kanako.”

Pwede kang magpakita o mag-apod-apod og mga kopya sa mosunod nga pamahayag. Dapita ang mga estudyante sa pagbasa niini, nga pangitaon kon unsay pwede nilang idugang sa duha ka kolum. Ang mga estudyante mahimong magtinagsa, magkapares, o sa gagmayng grupo.

Gipasabot ni Bishop W. Christopher Waddell sa Presiding Bishopric kon sa unsang paagi ang atong mga paningkamot ug hugot nga pagtuo sa Ginoo magtinabangay.

Gikan sa sinugdanan sa panahon, ang Ginoo mihatag og direksyon aron tabangan ang Iyang katawhan nga makaandam sa espirituhanon ug sa temporal nga paagi batok sa mga kalamidad ug mga pagsulay nga Siya nasayud nga moabut isip kabahin niining mortal nga kasinatian. Kini nga mga kalamidad mahimo nga sa kaugalingon o sa kinatibuk-ang kahimtang, apan ang giya sa Ginoo makahatag og proteksyon ug suporta ngadto sa punto nga kinahanglan kitang mopatalinghug ug molihok sa Iyang tambag. …

Wala paabuta sa Ginoo nga mobuhat kita og labaw pa kay sa atong mahimo, apan gipaabut Niya nga kita mobuhat sa unsay atong mahimo, kon ato kanang mahimo. …

Ang pagkahimong andam sa temporal nga paagi ug pagkahimong makabarug sa kinaugalingong paningkamot nagpasabut sa “pagtuo nga pinaagi sa grasya, o sa gahum ni Jesukristo nga makapahimo, ug pinaagi sa kaugalingon natong paningkamot, maangkon nato ang tanan nga espiritwal ug temporal nga panginahanglan sa kinabuhi nga gikinahanglan nato sa atong kaugalingon ug sa atong mga pamilya.” (W. Christopher Waddell, “Dihay Tinapay,” Liahona, Nob. 2020, 42–43, 44)

Bahina ang mga estudyante nga magtinagurha o tinagutlo ka grupo ug kompletoha ang mosunod nga kalihokan ug panaghisgot. Pwedeng apil sa pipila ka ehemplonga makit-an sa mga estudyante ang pagkinahanglan og tubag ni Joseph Smith aron makaangkon og dugang espirituhanon nga kalig-on (tan-awa sa Joseph Smith—Kasaysayan 1:8–20) ug ang igsoong lalaki ni Jared nga nagkinahanglan sa pagsangkap sa temporal nga mga panginahanglan sa iyang pamilya samtang nagbiyahe paingon sa gisaad nga yuta (tan-awa sa Ether 2:18–3:6).

Pangita og asoy nga gikan sa mga kasulatan o kasaysayan sa Simbahan sa tawo nga migamit sa ilang kaugalingong mga paningkamot ug naay hugot nga pagtuo kang Jesukristo sa pagbuntog sa mga babag sa ilang pag-uswag.

• Unsa nga babag ang ilang giatubang?

• Unsa nga personal nga mga paningkamot ang ilang gihimo aron mabuntog ang mga babag?

• Giunsa sila pagtabang sa Ginoo tungod sa ilang hugot nga pagtuo?

  Kon mahuman na ang mga estudyante sa panaghisgotan sa grupo, dapita ang usa ka sakop sa kada grupo nga isulat sa pisara ang ngalan sa tawo gikan sa mga kasulatan o kasaysayan sa Simbahan nga sa ilang hunahuna naa sa tumoy sa bukid.

  Hisgoti ang mosunod nga mga pangutana isip klase.

• Unsay inyong nakat-onan gikan niining mga tawhana nga inyon magamit sa inyong mga paningkamot nga makatukod og pagbarog pinaagi sa kinaugalingong paningkamot uban ang tabang sa Maluluwas?

Sa unsang paagi kini magamit sa inadlawng pagkinabuhi?

Tabangi ang mga estudyante nga masabtan kon unsaon nila paghimo og praktikal aksiyon samtang nagsalig sa Langitnong Amahan ug sa Manluluwas sa pagpanalangin sa ilang mga paningkamot. Pwede nimong dapiton ang mga estudyante nga mopili og usa sa mosunod nga mga senaryo ug hunahunaon kon sa unsang paagi ang indibidwal makapakita og hugot nga pagtuo kang Jesukristo samtang naningkamot sila nga mahimong mas makabarog pinaagi sa kinaugalingong paningkamot.

1. Usa ka batan-ong lalaki gustong moserbisyo og usa ka misyon ug mokuha og edukasyon apan walay igong kwarta aron mahimo kini.

2. Usa ka batan-ong babaye adunay problema sa panglawas nga nakapugong kaniya aron makakuha og mga trababo parehas sa uban.

3. Usa ka batan-ong lalaki nagsagubang og grabe nga kabalaka. Ang soyal nga mga sitwasyon, lakip ang pag-eskwela ug iyang pagpanarbaho, ang labing mahagiton alang kaniya.

4. Usa ka batan-ong babaye gustong magmalamposon sa eskwelahan apan dili makakat-on sama sa kadaghanan sa iyang mga klasmeyt. Tungod ini, nabalaka siya nga dili siya madawat sa unibersidad diin gusto niyang moeskwela.

Ikonsiderar ang pagpangutana sama sa mosunod aron tabangan ang mga estudyante nga hisgotan kini nga mga senaryo:

• Unsay aksiyon ang angayng buhaton niini nga tawo para matubag ang iyang problema sa paagi nga nagtugot sa Ginoo nga motabang kaniya?

• Unsa kaha ang ilang buhaton aron makapakita og hugot nga pagtuo kang Jesukristo?

• Kang kinsa kaha sila magpatambang? Sa unsang paagi ang paghimo niini makadapit sa tabang sa Ginoo?

Kon nagkinahanglan og tabang ang mga estudyante sa kataposang pangutana, ikonsiderar ang pagsugyot nga kadtong naa sa mga senaryo pwedeng mangayo og tambag sa ilang mga ginikanan, mga lider, ug mga propesyonal. Agig dugang, pwede silang magpatambag sa Langitnong Amahan pinaagi sa pag-ampo kon unsa ang labing maayo nga pagtubag sa ilang situwasyon.

Gamita sa imong kinabuhi

Pwede nimong dapiton ang mga estudyante nga pamalandongan kon sa unsang paagi ang pagpakita og hugot nga pagtuo kang Jesukristo makaapektar sa ilang mga kahimtang karon ug sa umaabot. Dayon, dapita sila nga pamalandongan ug tubagon ang mosunod nga mga pangutana diha sa ilang mga journal:

• Unsang bahin sa inyong kinabuhi diin gusto ninyong mahimong mas makabarog pinaagi sa kinaugalingong paningkamot?

• Unsay inyong mahimo aron mabuntog ang mga babag nga inyong giatubang?

• Unsaon ninyo paglihok uban ang hugot nga pagtuo kang Jesukristo samtang magtinguha kamo sa tabang nga inyong gikinahanglan?

Dugang nga mga Kapanguhaan

Samtang naningkamot ko sa pagpakita og hugot nga pagtuo kang Jesukristo, unsaon nako pagbalanse ang akong mga tinguha ngadto sa kabubut-on sa Dios?

Si Elder Todd Christofferson sa Korum sa Napulog Duha ka Apostoles mipahayag:

Kita kinahanglan nga dili maghunahuna sa plano sa Dios nga sama sa cosmic vending machine diin kita (1) mopili sa gitinguha nga panalangin, (2) mosuksok sa gikinahanglan nga gidaghanon sa maayong mga buhat, ug (3) ang gi-order moabot dayon.

Ang Dios motuman gayod sa Iyang mga pakigsaad ug mga saad sa matag usa kanato. Kita dili kinahanglan nga mabalaka niana. Ang makatubos nga gahom ni Jesukristo—kinsa mikunsad ubos sa tanang butang ug dayon mikayab sa kahitas-an ug kinsa aduna sa tanang gahom sa langit ug sa yuta makasiguro nga ang Dios makatuman ug motuman sa Iyang mga saad. Importante nga atong tahuron ug sundon ang Iyang mga balaod, apan dili ang tanang panalangin nga pinasikad base sa kamasulundon sa balaod giporma, gidesinyo, ug may tagal sumala sa atong mga gilaoman. Kita maningkamot sa atong labing maayo apan kinahanglan nga itugyan ngadto Kaniya ang pagdumala sa mga panalangin, temporal man o espirituwal. (D. Todd Christofferson, “Ang Atong Relasyon sa Dios,” Liahona, Mayo 2022, 78)

Unsay akong mahimo aron mahimong mas makabarog pinaagi sa kinaugalingong paningkamot?

Si Presidente Dieter F. Uchtdorf, kanhi sa Unang Kapangulohan, mitudlo:

Ang mga indibidwal maoy responsable sa ilang personal nga pagbarog pinaagi sa kaugalingong paningkamot. Ang atong mga kapanguhaan naglakip sa personal nga pag-ampo, sa kaugalingon natong hinatag sa Dios nga mga talento ug mga abilidad, sa mga butang nga anaa atong magamit pinaagi sa kaugalingon natong mga pamilya ug mga kaliwat, sa nagkadaiyang mga kapanguhaan sa komunidad, ug siyempre sa maamumahon nga pagsuporta sa mga korum sa priesthood ug Relief Society. Mogiya kini kanato ngadto sa dinasig nga sundanan sa pagbarug sa kaugalingon. …

Sa katapusan kinahanglan ninyong buhaton … [kon] unsay gibuhat sa mga disipulo ni Kristo sa matag dispensasyon: pagtinambagay, gamita ang tanang kapanguhaan nga anaa, tinguhaa ang inspirasyon sa Espiritu Santo, pangayo sa Ginoo alang sa Iyang pagtugot, ug dayon ihulho ang buktunan sa inyong mga sinina ug pagtrabaho. (Dieter F. Uchtdorf, “Pagsangkap pinaagi sa Pamaagi sa Ginoo,” Liahona, Nob. 2011, 54)

Si Elder Hugo E. Martinez sa Seventy mitambag:

Kita mamahimo nga makabarog pinaagi sa kinaugalingong paningkamot sa tibuok natong kinabuhi pinaagi sa espirituhanon nga kalig-on, pagpalambo sa atong pisikal ug emosyonal nga kahimsog, pagpadayon sa atong edukasyon ug panarbaho, ug pagkaandam sa temporal nga paagi. Kini nga tahas matapos ba gayod dinhi sa atong kinabuhi? Dili, tibuok kinabuhi nga proseso kini sa pagkat-on, paglambo, ug pagbuhat. Dili gayod kini matapos, usa kini ka padayon, inadlaw nga proseso. …

Sundon nato ang atong Manluluwas, nga si Jesukristo, ug ang Iyang ebanghelyo pinaagi sa pagkahimong makabarog pinaagi sa kinaugalingong paningkamot sa tibuok natong kinabuhi. (Hugo E. Martinez, “Pagtudlo sa Atong Kabataan ug Kabatan-onan sa Pagbarog pinaagi sa Kinaugalingong Paningkamot,” Liahona, Mayo 2022, 96)

Unsaon nato pagpakita og hugot nga pagtuo kang Jesukristo?

Ang essay sa mga hilisgotan ug mga pangutana bahin sa hugot nga pagtuo nag-ingon:

Ang pagbaton og hugot nga pagtuo diha ni Jesukristo nangahulogan og pagsalig sa hingpit diha Kaniya—pagsalig sa Iyang walay kinutobang gahom, kahibalo, ug gugma. Naglakip kini sa pagtuo sa Iyang mga pagtulun-an. Nangahulogan kini sa pagtuo nga bisan og kita wala makasabot sa tanang mga butang, Siya nakasabot. Tungod kay Iyang nasinati ang tanan natong mga sakit, mga kasakit, ug mga kahuyang, Siya nahibalo kon unsaon sa pagtabang kanato sa pagbarug labaw sa atong inadlaw nga mga kalisud (tan-awa sa Alma 7:11–12; Doktrina ug mga Pakigsaad 122:8). Iyang “gibuntog ang kalibotan” (Juan 16:33) ug miandam sa agianan alang kanato aron makadawat og kinabuhing dayon. Kanunay Siya nga andam sa pagtabang kanato samtang kita naghinumdom sa Iyang pakilooy: “Paghunahuna ngari kanako sa matag hunahuna; ayaw pagduha-duha; ayaw kahadlok” (Doktrina ug mga Pakigsaad 6:36).

… Kita mopakita sa atong hugot nga pagtuo diha sa paagi sa atong pagpakabuhi. (Mga Hilisgotan ug mga Pangutana, “Hugot nga Pagtuo diha kang Jesukristo,” ChurchofJesusChrist.org)

Dugang nga mga Kalihokan sa Pagkat-on

Ang hugot nga pagtuo isip usa ka baroganan sa lihok

Aron tabangan ang mga estudyante nga dugang masabtan ang lihok nga naggikan sa hugot nga pagtuo kang Jesukristo, pwede nimong ipasalida ang bidyo nga “Pagpakita og Hugot nga Pagtuo kang Jesukristo.” Niini nga bidyo, gitudlo ni Elder David A. Bednar sa Korum sa Napulog Duha ka Apostoles kon sa unsang paagi ang hugot sa pagtuo mosangpot sa paglihok. Dapita ang mga estudyante sa paghunahuna bahin sa mga matang sa mga aksyon nga resulta sa hugot nga pagtuo kang Jesukristo.

Human sa bidyo, pwede nimong dapiton ang mga estudyante nga pamalandongan ang kaugalingon nilang temporal nga mga hagit. Mahimo nimong ipangutana ang mga mosunod:

• Unsay pwedeng himoon sa usa ka tawo aron sulayan sa pagbuntog kini nga mga matang sa mga hagit?

• Sa unsang paagi ang paghimo og aksiyon nga sama niini nagpakita og hugot nga pagtuo kang Jesukristo?

Unsa kaha kon ang imong pagtuo dili makapalambo sa imong mga kahimtang?

Ang mga estudyante mahimong mobati og kabalaka nga bisan og naa silay hugot nga pagtuo kang Jesukristo, makaatubang gihapon sila og mga pagsulay. Aron tabangan ang mga estudyante nga molaom sa padayong pagpakita og hugot nga pagtuo kang Jesukristo, ikonsiderar ang pagpasalida sa bidyo nga “Inadlawng Tinapay: Kasinatian” (3:12). Gipaambit ni Elder D. Todd Christofferson ang kaugalingon niyang temporal nga pagsulay nga wala niya mabuntog sulod sa daghang tuig. Pwede nimong hangyoon ang mga estudyante nga pangitaon kon unsay gihimo ni Elder Christofferson nga nagpakita sa iyang padayon nga hugot nga pagtuo niining lisod nga panahon. Human sa bidyo, puwede nimo silang hangyoon nga ipakigbahin kon nganong para nila wala mawad-i sa hugot nga pagtuo kang Jesukristo si Elder Christofferson atol niining panahona.