Leksiyon 183: Pag-ugmad og Pagbarog pinaagi sa Kinaugalingong Paningkamot

Ang Pagbarog pinaagi sa Kinaugalingong Paningkamot Makapahimo Natong Mas Maayong Moatiman sa Uban

Pagpangandam sa Pagserbisyo sama sa Manluluwas

Gitudloan sa Manluluwas ang Iyang mga disipulo sa “[pag]tabang sa maluyahon … ug lig-una ang mga tuhod nga mahuyang” (Doktrina ug mga Pakigsaad 81:5). Mas mahimo natong sundon kini nga instruksiyon kon kita mismo mahimong mas makabarog pinaagi sa kinaugalingong paningkamot sa atong kaugalingon. Kini nga leksiyon makatabang sa mga estudyante nga masabtan kon sa unsang paagi ang pagkahimong makabarog pinaagi sa kinaugalingong paningkamot makapahimo nilang mas makasunod sa ehemplo sa Manluluwas sa pagtabang sa uban.

Posibleng mga Kalihokan sa Pagkat-on

Ang abilidad sa pagtabang sa uban

Aron matabangan ang mga estudyante nga masabtan nga ang pagbaton og katakos sa pagbarog pinaagi sa kinaugalingong paningkamot makaapektar sa atong abilidad sa pagtabang sa uban, ikonsiderar ang pagdapit sa tulo ka estudyante nga matag usa mobasa sa mosunod nga sitwasyon. Hunong human mabasa ang kada sitwasyon ug hangyoa ang klase nga ipakigbahin ang lainlaing mga butang nga makatino kon unsa kadako ang matabang nila ni Mindy, Nathan, o Jayda. (Kon gusto nimo, pwede kang maghimo og alternatibong mga senaryo nga mas may kalabotan sa imong mga estudyante.)

1. Ang higala ni Mindy naglisod og sabot sa iyang asaynment sa math ug nangayo og tabang kang Mindy.

2. Isip bag-ong misyonaryo, nahimamat ni Nathan ang usa ka tawo nga adunay daghang pangutana bahin sa Pagpahiuli sa Simbahan sa Manluluwas.

3. Nahibaloan ni Jayda nga ang usa ka pamilya sa iyang ward dili makasangkap og sinina nga mopainit sa lawas para sa ilang mga anak.

Ikonsiderar ang pagpakita o paghatag og kopya sa mga estudyante sa mosunod nga pamahayag ni Elder Robert D. Hales (1932–2017) sa Korum sa Napulog Duha ka Apostoles. Dapita sila nga ilhon ug hisgotan sa ginagmayng grupo ang dili moubos sa usa ka hugpong sa mga pulong gikan sa kada parapo nga magamit sa mga senaryo sa ibabaw. (Kon gikinahanglan, tabangi ang mga estudyante nga masabtan nga ang pulong nga temporal nga gigamit diha sa pamahayag mahimongmaglakip sa daghang aspeto sa kaayohan, sama sa pinansyal, edukasyonal, emosyonal, ug pisikal.)

Ang pagbarog pinaagi sa kinaugalingong paningkamot mao ang pag-angkon og responsibilidad alang sa atong kaugalingon nga espiritwal ug temporal nga kaayohan ug alang niadtong mga gisalig kanato sa Langitnong Amahan nga atong ampingan. Diha lamang kon kita nakabarog sa pinaagi sa kinaugalingon nga paningkamot nga kita mahimong matinud-anon nga makasunod sa Manluluwas sa pagpangalagad ug pagpanalangin sa uban.

Importante nga masabtan nga ang pagbarog pinaagi sa kinaugalingon nga paningkamot usa ka pamaagi aron makab-ot ang usa ka katuyoan. Ang atong kataposang tumong mao ang pagkahimong sama sa Manluluwas, ug kana nga tumong gipadako pinaagi sa atong dili hinakog nga pagserbisyo ngadto sa uban. Ang atong abilidad sa pag-alagad mahimong mapadako o mapagamay pinaagi sa matang sa atong pagka mapaningkamoton sa kaugalingon.

Sama sa giingon ni Presidente Marion G. Romney sa makausa: “Ang pagkaon alang sa gigutom dili maggikan sa walay sulod nga mga estante. Ang kwarta aron sa pagtabang sa nanginahanglan dili maggikan sa walay sulod nga pitaka. Ang pagsuporta ug pagpasabot dili maggikan sa mga tawong naglisod sa emosyonal nga paagi. Ang pagpanudlo dili maggikan sa tawo nga walay kahibalo. Ug ang labing importante sa tanan, ang espirituhanong paggiya dili maggikan sa huyang sa espirituhanong paagi” (sa Conference Report, Oct. 1982, 135; o Ensign, Nov. 1982, 93). (Robert D. Hales, “A Gospel Vision of Welfare: Faith in Action,” diha sa Basic Principles of Welfare and Self-Reliance [worldwide leadership training meeting, 2009], 1–2; tan-awa usab sa ChurchofJesusChrist.org)

• Unsa nga mga kamatuoran ang imong nakat-onan gikan ni Elder Hales?

  Samtang tubagon sa mga estudyante ang nag-unang pangutana, seguroa nga nasabtan nila nga samtang atong gipalambo nga makabarog pinaagi sa kinaugalingong paningkamot, mas mahisama kita sa Manluluwas ug mas makatabang ug makaserbisyo sa uban.

  Pwede nimong tabangan ang mga estudyante nga makita ang personal nga kalabotan sa leksiyon pinaagi sa paghangyo nila nga irekord ang ilang mga gihunahuna ug mga tubag sa mga pangutana nga sama sa mosunod:

• Sa unsang paagi ka nakatabang sa uban gamit ang mga abilidad o mga paagi nga gitabangan ka Dios nga molambo?

• Unsang mga aspeto sa pagbarog pinaagi sa kinaugalingong paningkamot ang gusto sa Langitnong Amahan nga imong mabatonan karon aron mas maatiman nimo ang imong kaugalingon ug ang uban sa umaabot?

Pagkahimong mas sama sa Manluluwas

Ikonsiderar ang pagpakita sa mosunod nga mga instruksiyon ug pangutana. Dapita ang mga estudyante sa pagkompleto sa kalihokan ug hisgoti ang pangutana uban sa ilang kapares.

Basaha ang Lucas 2:40, 52 ug markahi ang lainlaing aspeto sa pag-uswag nga nahimo ni Jesus sa Iyang pagkabatan-on.

• Sa unsang paagi ang abilidad sa Manluluwas sa pagserbisyo sa uban naapektohan dihang Siya milambo ug miuswag panahon sa Iyang pagkabatan-on?

  Pagkahuman sa pagpakigbahin sa mga kapares, dapita ang klase sa pagpakigbahin og mga paagi nga ang mga tin-edyer karon makaugmad og pagbarog pinaagi sa kinaugalingong paningkamot sa kada aspeto nga gihisgotan sa Lucas 2:40, 52.

  Ikonsiderar ang paghatag og panahon sa mga estudyante nga pamalandongan sa hilom ang mga pangutana nga sama sa mosunod:

• Kinsa kaha ang imong matabangan sa umaabot kon ikaw mahimong mas makabarog pinaagi sa kinaugalingong paningkamot sa usa niini nga mga aspeto? Sa unsang paagi ka makatabang?

• Sa unsang paagi ang pag-ugmad og pagbarog pinaagi sa kinaugalingong paningkamot makatabang nato aron mas mahisama sa Manluluwas?

Mga ehemplo sa Kristohanong pagserbisyo pinaagi sa pagbarog pinaagi sa kinaugalingong paningkamot

Pagpakigbahin og mga ehemplo sa mga tawo sa kasaysayan sa Simbahan nga nakaserbisyo sa Dios ug sa uban. Mahimo nimo kini pinaagi sa pag-organisar sa klase ngadto sa mga grupo sa pagtuon ug sa paghatag sa kada grupo og usa sa mga ehemplo gikan sa handout nga “Mga Ehemplo sa Pagbarog pinaagi sa Kinaugalingong Paningkamot gikan sa Kasaysayan sa Simbahan.” Dapita ang mga grupo sa pagbasa sa gisugyot nga mga bersikulo ug hisgotan ang pangutana sa kataposan sa ilang parapo.

Mga Ehemplo sa Pagbarog pinaagi sa Kinaugalingong Paningkamot gikan sa Kasaysayan sa Simbahan

Martin Harris: Niadtong 1827, si Joseph Smith nag-atubang og pagpanglutos ug nag-antos sa kakabos samtang naningkamot siya sa paghubad sa Basahon ni Mormon gikan sa bulawan nga mga palid. Nasayran ni Martin Harris, usa ka malamposong mag-uuma, ang kahimtang ni Joseph. Basaha ang Joseph Smith—Kasaysayan 1:61–62, nga mangita kon sa unsang paagi natabangan ni Martin si Joseph Smith. Basaha ang Doktrina ug mga Pakigsaad 19:26, 34–35; 104:26 aron mahibaloan ang lain pang mga paagi nga si Martin Harris nakaserbisyo sa Ginoo ug nakapanalangin sa uban. Naugmad ni Martin ang pinansyal nga makabarog pinaagi sa kinaugalingong pagpaningkamot nga gikinahanglan sa pagserbisyo sa Ginoo ug sa uban sa makahuloganong mga paagi. Unsay mahimo karon sa mga tin-edyer aron makapalambo og mga kahanas, edukasyon, ug mga paagi nga makatabang nila sa pagserbisyo sa Ginoo ug sa uban sa umaabot?

Emma Hale Smith: Dihang nahimamat niya si Joseph Smith, si Emma Hale usa ka batid nga magbabasa, magsusulat, magtutudlo, ug musikero. Basaha ang Doktrina ug mga Pakigsaad 25:5–7, 11, nga mangita sa mga responsibilidad nga gisangon sa Ginoo kang Emma. Napalambo ni Emma ang mga kahanas ug edukasyon nga nakatabang niya sa pagserbisyo sa Ginoo ug sa uban sa makahuloganong mga paagi. Unsay mahimo karon sa mga tin-edyer aron makapalambo og mga kahanas, edukasyon, ug mga paagi nga makatabang nila sa pagserbisyo sa Ginoo ug sa uban sa umaabot?

William W. Phelps: Gisugo sa Ginoo si William W. Phelps, nga bag-ohay lang nga miyembro sa Simbahan, nga mobalhin sa Missouri. Basaha ang Doktrina ug mga Pakigsaad 55:4 ug 57:11–13, nga mangita sa talagsaong mga buluhaton nga gihatag sa Ginoo kang William sa pagserbisyo sa Iyang Simbahan. Napalambo ni William ang mga kahanas ug edukasyon nga nakatabang niya sa pagserbisyo sa Ginoo ug sa uban sa makahuloganong mga paagi. Unsay mahimo karon sa mga tin-edyer aron makapalambo og mga kahanas, edukasyon, ug mga paagi nga makatabang nila sa pagserbisyo sa Ginoo ug sa uban sa umaabot?

Ikonsiderar ang pagdapit sa kada grupo nga ipakigbahin sa klase ang ilang nakat-onan.

Pwede nimong tabangan ang mga estudyante sa paghunahuna og modernong mga ehemplo sa mga tawo nga nakapalambo og pagbarog pinaagi sa kinaugalingong paningkamot ug dayon nakaserbisyo sa uban sa Kristohanong paagi. Pwede nimong ipasalida ang bidyo nga “Lig-ona ang Imong Kaigsoonan” (3:50) o “Sa Buluhaton sa Ginoo: Ang Kinabuhi ni Thomas S. Monson” gikan sa time code nga 19:54 hangtod 24:18, ang duha anaa sa ChurchofJesusChrist.org.

Ikonsiderar ang pagpakigbahin kon giunsa nimo pagserbisyo sa uban o giunsa ka pagserbisyo sa uban pinaagi sa mga kahanas, mga kahinguhaan, ug mga kinaiya nga napalambo nimo ug sa uban sa tibuok kinabuhi.

Sa pagtapos sa leksiyon, pwede nimong hatagan og panahon ang mga estudyante nga mainampoong pamalandongan o isulat ang unsay ilang gihunahuna nga ipabuhat kanila sa Langitnong Amahan sa unsay ilang nakat-onan ug gibati karon. Mahimong ipakigbahin sa mga boluntaryo ang pipila sa ilang mga gihunahuna diha sa klase.

Dugang nga mga Kapanguhaan

Angay ba nakong atimanon una ang akong kaugalingong mga panginahanglan sa dili pa motabang sa uban?

Si Elder Jeffrey R. Holland sa Korum sa Napulog Duha ka Apostoles mipahinumdom nato:

Alang kaninyo kinsa nagtinguha sa pagtambayayong sa usag usa nga mga alantuson, importante nga inyong lig-unon ang inyong kaugalingon ug maghimo og back up kon ang uban magdahum og maayo gikan kaninyo ug mikuha gayud og daghan gikan kaninyo. Walay usa nga lig-on kaayo nga dili sila mobati og kakapoy o makahibalo sa panginahanglan sa pag-atiman sa ilang kaugalingon. Nakasinati gayud si Jesus niana nga kakapoy, mibati nga nawala ang Iyang kusog. Sige lang Siya og hatag, apan adunay bili nga nakataput niini, ug gibati Niya ang mga epekto sa daghan kaayo nga nagsalig Kaniya. Sa dihang ang babaye nga gitalinug-an mihikap Kaniya diha sa panon sa katawhan, giayo Niya siya, apan nakahibalo usab Siya “nga may gahum nga migula gikan kaniya” (tan-awa sa Marcos 5:25–34).

Kanunay akong natingala nga Siya makahimo sa pagkatulog taliwala sa unos sa Dagat sa Galilea nga seryuso kaayo ug grabe nga ang Iyang eksperyensyado nga mangingisda nga mga disipulo nagtuo nga malunod na ang barko. Gikapoy gayud Siya pag-ayo? Pila ka wali ang inyong mahatag ug mga panalangin nga mapangalagad nga dili gayud kapuyon? Ang mga tig-atiman kinahanglan usab og pag-atiman. Dili ka makatabang sa uban kon ikaw walay kalagsik sa pagbuhat sa ingon. (Jeffrey R. Holland, “Pagtambayayong sa Usag Usa nga mga Alantuson,” Liahona, Hunyo 2018, 27–28)

Sa unsang paagi nato giatiman ang uban sa pamaagi sa Manluluwas?

Si Presidente Dieter F. Uchtdorf, kaniadto sa Unang Kapangulohan, mipasabot:

Adunay daghang buotan nga mga tawo ug mga organisasyon sa kalibutan nga naningkamot sa pagtubag sa dinaliang mga panginahanglan sa mga kabus ug timawa sa tanang dapit. Mapasalamaton kita niini, apan ang pamaagi sa Ginoo sa pag-amuma sa mga timawa lahi sa pamaagi sa kalibutan. Ang Ginoo miingon, “Kini kinahanglan nga pagahimoon sa akong kaugalingon nga pamaagi” [Doktrina ug mga Pakigsaad 104:16; tan-awa usab sa bersikulo 15]. Dili lamang kay interesado Siya sa dinalian natong panginahanglan; nahingawa usab Siya sa atong mahangturon nga kalamboan. Tungod niini, ang pamaagi sa Ginoo naglakip sa pagbarog sa kaugalingon ug pagserbisyo sa atong silingan agi og dugang sa pag-amuma sa mga kabos. (Dieter F. Uchtdorf, “Pagsangkap pinaagi sa Pamaagi sa Ginoo,” Liahona, Nob. 2011, 54)

Si Elder Joseph B. Wirthlin (1917–2008) sa Korum sa Napulog Duha ka Apostoles mipasabot:

Ang Simbahan ni Jesukristo sa mga Santos sa Ulahing mga Adlaw ug ang mga miyembro niini naningkamot sa pagsunod sa Iyang ehemplo samtang nagtinguha kita sa paghupay sa nag-antos ug pagpalambo sa pagbarog pinaagi sa kinaugalingong paningkamot. …

Ang Ginoo mipahayag sa usa ka pagpadayag ngadto kang Propeta Joseph Smith, “Mao kini ang akong katuyoan sa paghatag sa akong mga santos. … Apan kini kinahanglan pagahimoon sa akong kaugalingon nga pamaagi; ug tan-awa kini ang pamaagi nga Ako, ang Ginoo, nagtakda sa paghatag sa akong mga santos, aron ang mga kabos ipataas, pinaagi niana ang mga adunahan ipaubos” [D&P 104:15–16]. Ang pamaagi sa Ginoo naglangkob sa pagtabang sa mga tawo sa pagtabang sa ilang kaugalingon. Ang kabos mapataas tungod kay gitrabahoan nila ang temporaryo nga tabang nga ilang nadawat, gitudloan sila sa sakto nga mga baroganan, ug nakahimo sila sa pagbayaw sa ilang mga kaugalingon gikan sa kakabos ngadto sa pagbarog pinaagi sa kinaugalingong paningkamot. And mga adunahan mapaubos tungod kay nagmapainubsanon sila sa ilang kaugalingon sa paghatag og madagayaon sa ilang mga kahinguhaan alang niadtong nanginahanglan. (Joseph B. Wirthlin, “Inspired Church Welfare,” Ensign, May 1999, 76–77)

Dugang nga mga Kalihokan sa Pagkat-on

Alternatibo nga pagsugod sa leksiyon

Ikonsiderar ang paghangyo og usa ka boluntaryo nga moapil sa usa ka leksiyon nga mogamit og butang. Hangyoa ang boluntaryo sa paghatag og usa ka butang nga wala siya o dili andam nga ihatag. Pananglitan, pwede nimo siyang hangyoon sa paghatag sa matag estudyante og green nga bolpen, pagkaon, o kantidad sa kwarta. Kon dili niya kini mahatag, pangutan-a siya kon nganong wala siya motabang. (Dayon pasaligi sila nga okay ra ug pasalamati sa pag-apil sa leksiyon nga naggamit og butang.)

Aron tabangan ang mga estudyante nga masabtan nga maapektahan ang atong abilidad sa pagtabang sa uban pinaagi sa atong pagkaandam ug pagbarog pinaagi sa kinaugalingong paningkamot, ipadayon gamit ang materyal diha sa leksiyon nga magsugod sa pamahayag ni Elder Robert D. Hales.

Ang pag-atiman sa kaugalingon mag-andam nato sa pagserbisyo sa uban

Aron matabangan ang mga estudyante nga masabtan kon sa unsang paagi ang pag-atiman sa kaugalingon makapahimo nato nga mas makaserbisyo sa uban, ikonsiderar ang pagpakita og litrato sa usa ka dakong pundohanan og tubig [reservoir] (o magpahinumdom nila sa tinubdan sa tubig sa inyong lugar). Pangutan-a ang mga estudyante kon unsay mahitabo niadtong nagsalig sa dakong pundohanan og tubig kon mahutdan nig tubig.

Dapita ang mga estudyante nga tan-awon ang bidyo nga “Pag-atiman sa Kaugalingon Gihimong Yano [Self-Care Made Simple]” (3:40), nga mangita kon sa unsang paagi ang atong mga paningkamot sa pag-atiman sa atong kaugalingon mahimong ikatandi sa pagbutang og tubig sa usa ka dakong pundohanan og tubig nga magamit sa pagserbisyo sa uban.

Human matan-aw sa mga estudyante ang bidyo, pwede nimo silang hangyoon nga tun-an ang mosunod nga mga tudling ug hisgotan ang unsay ilang nakat-onan bahin sa pagserbisyo sa uban.

• Mosiah 4:26–27 (Mga pagtulun-an ni Hari Benjamin bahin sa pagtabang sa kabos ug nanginahanglan)

• Lucas 22:31–32 (Tambag ni Jesukristo kang Pedro bahin sa pag-andam sa iyang kaugalingon nga tabangan kadtong nagpalibot kaniya)