Leksiyon 180: Pag-ugmad og Pagbarog pinaagi sa Kinaugalingong Paningkamot

Pag-ugmad og Pagbarog pinaagi sa Kinaugalingong Paningkamot sa Pamaagi sa Ginoo

Ang Pag-ugmad og Pagbarog pinaagi sa Kinaugalingong Paningkamot Mopanalangin Nato sa Temporal ug Espirituwal nga Paagi

Ang Manluluwas mipahayag, “Mao kini ang akong katuyoan sa paghatag sa akong mga santos. … Apan kini kinahanglan pagahimoon sa akong kaugalingon nga pamaagi” (Doktrina ug mga Pakigsaad 104:15–16). Gitabangan ni Jesukristo ang Iyang mga Santos sa pag-ugmad og pagbarog pinaagi sa kinaugalingong paningkamot aron masangkapan nila ang ilang kaugalingon ug makakat-on sa pagpanalangin sa uban sama sa Iyang gihimo. Kini nga leksiyon makatabang sa mga estudyante nga masabtan ang panginahanglan sa pag-ugmad og pagbarog pinaagi sa kinaugalingong paningkamot sa pamaagi sa Ginoo.

Posibleng mga Kalihokan sa Pagkat-on

Pagbarog pinaagi sa Kinaugalingong Paningkamot

Ikonsiderar ang pagsugod sa leksiyon pinaagi sa pagkahibalo kon unsa nay nasabtan sa mga estudyante bahin sa pagbarog pinaagi sa kinaugalingong paningkamot. Pwede nimong isulat sa pisara ang Pagbarog pinaagi sa kinaugalingong paningkamot ug hangyoon ang mga estudyante nga ihulagway kon unsay ipasabot niini ug kon nganong importanteng paningkamotan kini.

Pwede nimo silang tabangan nga hisgotan ang ilang nahibaloan bahin sa pagbarog pinaagi sa kinaugalingong paningkamot pinaagi sa pagpakita og mga litrato sa usa ka sud-an nga isda ug pipila ka gamit sa pagpangisda. Pangutan-a ang mga estudyante kon hain sa mga litrato ang labing makatabang nga mga butang alang sa usa ka tawo nga makaugmad og pagbarog sa kinaugalingon nga paningkamot sa pagsangkap og pagkaon alang sa ilang pamilya. Pwede kang magpakita sa duha ka pamahayag nga naa sa ubos isip kabahin sa panaghisgotan.

Gipasabot ni Presidente Gordon B. Hinckley (1910–2008) ang kaimportante sa pagkat-on sa pagsangkap sa atong kaugalingon:

Adunay karaan nga panultihon nga kon imong hatagan ang usa ka tawo og isda, aduna siyay pagkaon sa usa ka adlaw. Apan kon imo siyang tudluan kon unsaon pagpangisda, siya makakaon sa tibuok niyang kinabuhi. (Gordon B. Hinckley, “The Perpetual Education Fund,” Ensign, May 2001, 52)

Ang Unang Kapangulohan mitudlo sa mosunod bahin pagbarog pinaagi sa kinaugalingong pagpaningkamot:

Ang Ginoo mipahayag, “Mao kini ang akong katuyoan sa paghatag sa akong mga santos” [Doktrina ug mga Pakigsaad 104:15]. Kini nga pinadayag usa ka saad gikan sa Ginoo nga Siya mosangkap sa temporal nga mga panalangin ug moabli sa mga oportunidad nga makabarog pinaagi sa kinaugalingong paningkamot, nga mao ang abilidad nga kita makasangkap sa mga kinahanglanon sa atong kinabuhi ug sa mga sakop sa atong pamilya. …

Palihog salig nga kamo anak sa atong Amahan sa Langit. Nahigugma Siya kaninyo ug dili gayod mobiya kaninyo. Nakaila Siya ninyo ug andam nga mopadangat diha ninyo sa espirituwal ug temporal nga mga panalangin sa pagbarog pinaagi sa kinaugalingong paningkamot. (Ang Unang Kapanguluhan, sa My Foundation for Self-Reliance [2016], 3)

• Unsay imong nakat-onan gikan niini nga mga pamahayag bahin sa pagbarog pinaagi sa kinaugalingong pagpaningkamot?

  Human maghisgot ang klase sa nag-unang mga pamahayag, ikonsiderar ang pagdapit sa mga estudyante nga i-summarize ang ilang pagsabot sa pagbarog pinaagi sa kinaugalingong pagpaningkamot ngadto sa usa ka pares. Mahimong makatabang nga padayong ipakita ang nag-unang pamahayag sa Unang Kapangulohan alang sa pakisayran. Dayon pagdapit og mga boluntaryo nga mopakigbahin sa ilang mga gi-summarize diha sa klase.

  Seguroa nga nasabtan sa mga estudyante nga uban sa tabang sa Ginoo, makaugmad kita og pagbarog pinaagi sa kinaugalingong paningkamot sa pagsangkap sa mga panginahanglan sa kinabuhi alang sa atong kaugalingon ug sa atong mga pamilya.

• Ngano sa imong hunahuna ang pag-ugmad og pagbarog pinaagi sa kinaugalingong paningkamot importante nga masabtan samtang bata pa ka?

• Kon ang usa ka tawo mobati nga nabug-atan sa paghunahuna nga mahimong makabarog pinaagi sa kinaugalingong paningkamot, unsay pwede nimong ipahinumdom nila bahin sa Langitnong Amahan ug kang Jesukristo aron makahatag kanila og paglaom?

Aron matabangan ang mga estudyante nga makakita og praktikal nga mga paagi nga ang mga baroganan sa pagbarog pinaagi sa kinaugalingong paningkamot magamit nila, ikonsiderar ang pagsulat sa mosunod nga mga hilisgotan diha sa pisara: edukasyon, kahimsog, pagpanarbaho, pinansyal, espirituwal nga kalig-on. Bahina ang mga estudyante ngadto sa mga grupo ug paghatag og usa ka hilisgotan sa kada grupo. Dapita ang mga estudyante nga hisgotan uban sa ilang grupo ang mosunod ug dayon ipakigbahin sa klase kon unsay ilang gihisgotan.

Tubaga ang mosunod nga mga pangutana base sa usa niini nga mga hilisgotan: edukasyon, kahimsog, pagpanarbaho, pinansyal, o espirituwal nga kalig-on:

• Unsaon nimo paghulagway ang usa ka tawo nga makabarog pinaagi sa kinaugalingong paningkamot niana nga aspeto?

• Sa unsang paagi ang usa ka tin-edyer magsugod sa pag-ugmad og pagbarog pinaagi sa kinaugalingong paningkamot niana nga aspeto? Unsaon nila pagdapit ang Ginoo aron motabang nila?

• Unsay mga kaayohan sa pagkat-on sa pagbuhat og daghang mga butang para sa atong kaugalingon niini nga aspeto?

Awhaga ang mga estudyante nga mohatag og pagtagad sa mga pag-aghat gikan sa Espiritu Santo bahin kon unsaon nila pagsangkap para sa ilang kaugalingon. Tabangi ang mga estudyante nga masabtan nga bisan og makahimo sila para sa ilang kaugalingon, kinahanglan gihapon sila nga mosalig sa Ginoo. Angay usab nga mangayo og tabang gikan sa uban.

Pagbarog pinaagi sa kinaugalingong paningkamot sa pamaagi sa Ginoo

Aron matabangan ang mga estudyante nga masabtan ang mga baroganan bahin sa pagbarog pinaagi sa kinaugalingong pagpaningkamot nga atong makat-onan gikan sa Ginoo ug sa Iyang mga sulugoon, ikonsiderar ang usa sa mosunod nga mga opsiyon:

1. Bahina ang mga estudyante sa gagmayng grupo, ug iapod-apod ang handout nga “Pag-ugmad og Pagbarog pinaagi sa Kinaugalingong Paningkamot sa Pamaagi sa Ginoo.” Ang matag grupo mahimong magbahin sa mga pakisayran sa kasulatan ug mga pamahayag ngadto sa mga sakop sa grupo aron tun-an. Mahimo dayon nilang ipakigbahin sa usag usa ang ilang nakat-onan ug dungan nga tubagon ang mga pangutana.

2. Kon naay mga kapanguhaan ug kasinatian ang mga estudyante sa pagpangita sa mga pakisayran sa kasulatan ug mga pamahayag sa mga lider sa Simbahan nga sila-sila ra, ipakita ang mga pangutana gikan sa handout diha sa pisara. Dapita ang mga estudyante sa pagpangita sa mga kasulatan ug mga pulong sa mga propeta alang sa mga tubag sa matag pangutana. Usa sa kapanguhaan nga pwedeng tun-an sa mga estudyante mao ang seksiyon sa Mga Hilisgotan ug mga Pangutana nga giulohan og “Pagbarog pinaagi sa Kinaugalingong Paningkamot.” Anaa kini sa Librarya sa Ebanghelyo nga app ug sa ChurchofJesusChrist.org.

Pag-ugmad og Pagbarog pinaagi sa Kinaugalingong Paningkamot sa Pamaagi sa Ginoo

Tun-i ang mga pakisayran sa kasulatan ug ang mga pamahayag sa ubos, nga pangitaon ang mga tubag sa mosunod nga duha ka pangutana:

1. Unsay gitudlo sa Ginoo diha sa mga kasulatan ug pinaagi sa Iyang mga propeta nga makatabang nato sa pag-ugmad og pagbarog pinaagi sa kinaugalingong paningkamot?

2. Unsang mga babag ang mahimong atubangon sa usa ka tawo diin gikinahanglan nila ang tabang sa Langitnong Amahan aron mabuntog?

• Doktrina ug mga Pakigsaad 9:7–8

• Doktrina ug mga Pakigsaad 58:26–28

• Doktrina ug mga Pakigsaad 88:124

• Joseph Smith—Kasaysayan 1:55

Si Presidente Ezra Taft Benson (1899–1994) mitudlo:

Ang Ginoo nag-usab sa mga tawo gikan sa sulod paingon sa gawas. Ang kalibotan nag-usab sa tawo gikan sa gawas paingon sa sulod. Ang kalibotan mohaw-as sa mga tawo gikan sa nagdasok nga mga pinuy-anan. Si Kristo nagkuha sa nagdasok nga ngil-ad nga mga pagbati sa mga tawo, ug unya sila mohaw-as sa ilang mga kaugalingon gikan niini nga pagdasok. Ang kalibotan moumol sa mga tawo pinaagi sa pag-usab sa ilang palibot. Si Kristo nag-usab sa mga tawo, kinsa dayon mousab sa ilang palibot. Ang kalibotan moumol sa tawhanong kinaiya, apan si Kristo makausab sa tawhanong kinaiyahan. (Ezra Taft Benson, “Born of God,” Ensign, Nov. 1985, 6)

Si Presidente Dieter F. Uchtdorf, kaniadto sa Unang Kapangulohan, mipasabot:

Ang pamaagi sa Ginoo dili mao ang paglingkod lang sa daplin sa sapa ug maghulat sa pag-agos sa tubig nga mahuman una kita molabang. Magkuyog gayud kini, ihulho ang buktunan sa imong sinina, pagtrabaho, ug paghimo og taytayan o sakayan aron makalabang sa katubigan sa atong mga hagit. (Dieter F. Uchtdorf, “Pagsangkap pinaagi sa Pamaagi sa Ginoo,” Liahona, Nob. 2011, 54)

Hatagi og higayon ang mga grupo nga ipakigbahin sa klase ang ilang mga tubag ug mga panghunahuna nga ilang nabatonan atol sa ilang pagtuon. Pwede usab silang mopakigbahin og mga pananglitan kon giunsa sila pagpanalangin sa Ginoo sa ilang mga paningkamot nga magkinabuhi uyon sa mga baroganan sa pagbarog pinaagi sa kinaugalingong pagpaningkamot.

Ang Manluluwas nagpalambo og grasya og dugang pa nga grasya

Mahimong makaamgo ang mga estudyante nga dili lalim ang pagsulay sa pag-ugmad og pagbarog pinaagi sa kinaugalingong paningkamot sa daghang lainlaing aspeto. Ipasabot nga makakat-on kita sa ehemplo sa Manluluwas nga ang pag-ugmad og pagbarog pinaagi sa kinaugalingong paningkamot nagkinahanglan og panahon. Ikonsiderar ang pagpakita sa mosunod nga litrato samtang basahon sa mga estudyante ang mosunod nga tudling sa kasulatan.

Basaha ang Doktrina ug mga Pakigsaad 93:11–13, nga mangita kon unsay gitudlo ni Juan Bautista bahin sa paglambo sa Manluluwas. (Ang usa ka bahin sa mga sinulat ni Juan Bautista gipadayag ngadto kang Joseph Smith ug girekord diha sa seksiyon 93.)

Kon nagkinahanglan og tabang ang mga estudyante sa pagtubag sa mosunod nga mga pangutana, pwede nimong ipasabot nga ang pag-angkon sa grasya og dugang pa nga grasya nagpasabot og anam-anam nga pag-uswag uban sa balaanong tabang. Pwede nimong ipabasa sa mga estudyante ang 2 Nephi 28:30 aron tabangan sila nga makakita kon sa unsang paagi usab kita nagkinahanglan nga mouswag “pagtulun-an human sa usa ka pagtulun-an.”

• Sa imong hunahuna, unsa kahay ipasabot nga ang Manluluwas “nakaangkon og grasya ug dugang pa nga grasya”? (bersikulo 13).

• Sa unsang paagi ang ehemplo sa Manluluwas sa pag-angkon sa grasya og dugang pa nga grasya makatabang nimo sa imong pagpaningkamot sa pag-ugmad og temporal ug espirituwal nga pagbarog pinaagi sa kinaugalingong paningkamot?

Pag-ugmad og pagbarog pinaagi sa kinaugalingong paningkamot sa imong kaugalingong kinabuhi

Dapita ang mga estudyante sa pagpamalandong kon unsay gitudlo kanila sa Espiritu Santo bahin sa pag-ugmad og pagbarog pinaagi sa kinaugalingong paningkamot. Aron matabangan sila sa pagpamalandong, pwede nimong iipakita ang mosunod nga mga pangutana. Dapita ang mga estudyante sa pagsusi sa ilang kasamtangan nga kahimtang sa pagbarog pinaagi sa kinaugalingong paningkamot pinaagi sa pagpamalandong o pagtubag sa mosunod nga mga pangutana diha sa ilang mga journal sa pagtuon.

• Unsa ko ka masaligon sa pag-ugmad og pagbarog pinaagi sa kinaugalingong paningkamot sa lainlaing aspeto sa akong kinabuhi?

• Nganong makatabang ang pagsugod sa pagpalambo og abilidad sa pagsangkap sa akong kaugalingon niini nga mga aspeto?

• Sa unsang paagi nako maapil ang Ginoo sa pag-ugmad og mas dako nga pagbarog pinaagi sa kinaugalingong paningkamot diha sa akong kinabuhi?

Dapita ang mga estudyante sa pagkonsiderar og piho nga mga paagi nga mahimo nilang sugdan aron makabarog pinaagi sa kinaugalingong paningkamot diha sa ilang kinabuhi. Mahimo usab nimong ipakigbahin ang imong hunahuna ug pagsaksi mahitungod sa gahom sa pagkahimong makabarog pinaagi sa kinaugalingong paningkamot ug kon sa unsang paagi kini nakapanalangin sa imong kinabuhi.

Dugang nga mga Kapanguhaan

Nganong kinahanglan nakong palamboon ang pagbarog pinaagi sa kinaugalingong paningkamot?

Si Presidente Dallin H. Oaks sa Unang Kapangulohan mitudlo:

Bisag unsa pay hinungdan sa atong pagsalig sa uban para sa mga desisyon o kapanguhaan nga atong mahimo sa atong mga kaugalingon kini makapaluya kanato sa esprituhanong paagi ug makapahinay sa atong pag-uswag sa unsay gitinguha sa plano sa ebanghelyo kanato. (Dallin H. Oaks, “Paghinulsol ug Kausaban,” Liahona, Nov. 2003, 40)

Si Elder Hugo E. Martinez sa Seventy mitudlo:

Ang tinguha nga makabarog pinaagi sa kinaugalingong paningkamot usa ka bahin sa atong buluhaton subay sa dalan balik sa Langitnong Amahan ug sa Iyang Anak, nga si Jesukristo. Molig-on kini sa atong hugot nga pagtuo kang Jesukristo ug makalipay nga mobugkos kanato ngadto Kaniya pinaagi sa mga pakigsaad ug mga ordinansa sa kaluwasan ug kahimayaan. Ang pagbarog pinaagi sa kinaugalingong paningkamot usa ka doktrina sa ebanghelyo ni Jesukristo, ug dili usa ka programa. Usa kini ka tibuok kinabuhi nga proseso, ug dili usa lang ka hitabo. (Hugo E. Martinez, “Pagtudlo sa Atong Kabataan ug Kabatan-onan sa Pagbarog pinaagi sa Kinaugalingong Paningkamot,” Liahona, Mayo 2022, 95)

Tan-awa usab sa “Mahimong Makabarog pinaagi sa Kinaugalingong Paningkamot aron Mas Makaserbisyo sa Ginoo” ni Elder Alfred Kyungu sa Seventy (Africa Central Local Pages, Liahona, Hunyo 2021).

Unsay buot ipasabot sa makabarog pinaagi kinaugalingong paningkamot sa espirituhanong paagi?

Si Elder Kent F. Richards sa Seventy mipasabot:

Ang [espirituhanong pagbarog pinaagi sa kinaugalingong paningkamot] medyo usa usab ka sayop nga paghulagway; sa pagkatinuod wala kini nagbarog sa imong kaugalingong mga tiil ug nagmugna sa imong kaugalingong kalipay—nagpasabot kini sa pagbuhat sa tanan nga atong makaya ug tugotan ang grasya sa Amahan, sa Anak, ug sa Espiritu Santo nga mobayaw nato lapas pa sa atong kaugalingong kapasidad. Nagpasabot kini nga himoon nato ang tanan para sa atong kaugalingong espirituhanong pag-uswag ug pagkat-on, nga nahibalo nga dili gayod kita molampos kon wala ang malahutayong tabang sa espirituhanong gahom ug mga gasa gikan sa kahitas-an. …

Ang espirituhanong pagbarog pinaagi sa kinaugalingong paningkamot wala magpasabot nga kinahanglan nimo kining himoon nga ikaw ra—apan nagpasabot kini nga kinahanglang ikaw ang modumala ug mosugod niini nga proseso. Samtang kinahanglan nimong mohimo og imong kaugalingong pagpili pinaagi sa imong kaugalingong kabubut-on, dili mahimong posible nga molampos ka sa kataposan nga ikaw-ikaw ra. Ang Langitnong Amahan nasayod niana sa dihang gihimo niya ang Iyang plano. Panalanginan kita niya kada adlaw pinaagi sa Espiritu Santo, samtang kita mosarang sa atong mga kaugalingon kada adlaw. (Kent F. Richards, “Spiritual Self–Reliance” [debosyonal sa Ensign College , June 11, 2019], ensign.edu)

Unsaon nako pagpalambo ang espirituhanong pagbarog pinaagi sa kinaugalingong paningkamot?

Si Elder Robert D. Hales (1932–2017) sa Korum sa Napulog Duha ka Apostoles mipasabot:

Makabig kita ug espirituhanong makabarog sa kaugalingon kon mainampoon kitang magsunod sa atong mga pakigsaad—pinaagi sa takos nga pag-ambit sa sakrament, takos sa rekomend sa templo, ug pagsakripisyo aron moserbisyo sa uban. (Robert D. Hales, “Pag-ila sa Kaugalingon: Ang Sakrament, ang Templo, ug Sakripisyo sa Pagserbisyo,” Liahona, Mayo 2012, 34)

Dugang nga mga Kalihokan sa Pagkat-on

Librarya sa Ebanghelyo nga app

Kon anaa, dapita ang mga estudyante sa pag-akses sa “Pagbarog pinaagi sa Kinaugalingong Paningkamot [Self-Reliance]” nga tab sa Librarya sa Ebanghelyo nga app. Makita kini ubos sa seksiyon nga “Tabang sa Kinabuhi”. Ikonsiderar ang paghatag nila og panahon sa pagsuhid sa lain-laing seksiyon nga anaa sa “Pagbarog pinaagi sa Kinaugalingong Paningkamot” nga porsyon. Pwedeng pilion sa mga estudyante nga tan-awon ang manwal sa pagbarog pinaagi sa kinaugalingong paningkamot nga nakapainteres nila. Pwede silang magsugod pinaagi sa pagbasa sa mensahe gikan sa Unang Kapangulohan nga makita sa sinugdanan sa kada manwal. Human sa pipila ka minuto sa pag-browse, pwedeng ipakigbahin sa mga estudyante ngadto sa uban ang ilang nakit-an.

Alternatibo nga pagsugod

Ikonsiderar ang pagpasalida sa bidyo nga “Solbara ang mga Problema ug Paghimo og mga Desisyon” (1:55). Pwedeng pangitaon sa mga estudyante kon unsay natabang sa karnero sa baboy bahin nga makat-on mahitungod sa pag-ugmad og pagbarog pinaagi sa kinaugalingong paningkamot. Mahimo nimong gamiton ang mga pangutana sama sa mosunod aron pangulohan ang panaghisgotan:

• Unsa ang imong nakita nga pagkapareha sa imong kaugalingon ug sa baboy? Unsa ang pipila ka pisikal, espirituwal, edukasyonal, o uban pang sitwasyon nga imong giatubang diin ikaw lagmit nga magsalig sa uban kay sa mougmad og pagbarog pinaagi sa kinaugalingong paningkamot?

• Kinsa ang pipila ka modernong-adlaw nga karnero nga makatabang nato sa pag-ugmad og mas dako nga pagbarog pinaagi sa kinaugalingong pagpaningkamot?

Bidyo

Kon makabenepisyo ang mga estudyante gikan sa pagkat-on og dugang nga mga leksiyon bahin sa pagbarog pinaagi sa kinaugalingong paningkamot, pwede nimong ipasalida ang bidyo nga “Iyang Gipasinaw ang Akong Tudlo sa Tiil” (2:02). Samtang nagtan-aw sila sa bidyo, pwedeng maghimo og lista ang mga estudyante sa mga leksiyon nga ilang nakat-onan gikan sa kasinatian ni Elder Enrique R. Falabella. Human sa bidyo, pwedeng ipakigbahin sa mga estudyante ang ilang nakat-onan ug kon sa unsang paagi magamit ang maong mga leksiyon aron mahimong makabarog pinaagi sa kinaugalingong paningkamot.