Seminary
Pisikal ug Emosyonal nga Kahimsog: Kinatibuk-ang Pagpasabot

“Pisikal ug Emosyonal nga Kahimsog: Kinatibuk-ang Pagpasabot,” Manwal sa Magtutudlo sa Seminary sa Doktrina ug mga Pakigsaad (2025)

“Pisikal ug Emosyonal nga Kahimsog,” Manwal sa Magtutudlo sa Seminary sa Doktrina ug mga Pakigsaad

Pisikal ug Emosyonal nga Kahimsog

Pisikal ug Emosyonal nga Kahimsog

Kinatibuk-ang Pagpasabot

Samtang nagpakabuhi kita, nag-atubang kita og daghang mga sitwasyon nga makahagit sa emosyon. Pwede kitang modangop sa Ginoo alang sa tabang aron mas mahimong lig-on sa emosyonal nga paagi. Ang mosunod nga mga leksiyon moawhag sa mga estudyante nga atimanon ang ilang pisikal nga mga lawas; pag-ugmad og maayong mga sumbanan sa paghunahuna; tinguhaon ang tabang sa Ginoo kalabot sa kaugtas, grabeng kabalaka, kaguol, ug depresyon; ug paghimo ug pagpalig-on sa mga relasyon.

Sugyot sa gipaspason: Kini nga mga leksiyon pwedeng itudlo sa bisan unsang yugto sa panahon sa tuig sa pag-eskwela o atol sa bisan unsang semana sa Dali, Sunod Nako nga gipaspason. Pero, mas maayo tingali nga itudlo ang “Pagtukod og Emosyonal nga Kalig-on diha sa Ginoo” ug ang nagsunod nga mga leksiyon nga duol sa usag usa. Mas makatabang kini sa mga estudyante nga makakat-on ug makapraktis og mga kahanas nga piho niini nga mga leksiyon.

Pangandam sa Pagtudlo

Ang mosunod nga impormasyon naghatag og mga ideya kon unsa ang gikinahanglan nimong andamon daan alang sa matag leksiyon.

Pag-atiman sa Atong Yutan-on nga mga Lawas

Katuyoan sa leksiyon: Aron tabangan ang mga estudyante nga magpasalamat sa Langitnong Amahan ug ni Jesukristo pinaagi sa pag-atiman sa ilang pisikal nga mga lawas.

  • Pagpangandam sa estudyante: Dapita ang mga estudyante nga pamalandongan kon unsay ilang gibati bahin sa ilang mga lawas ug kon unsay ilang ginahimo sa pag-atiman niini. Pwede pod nilang pamalandongan kon sa unsang paagi ang ilang mga kinaiya ug mga aksyon bahin sa ilang pisikal nga lawas nakaapektar sa ilang kalipay, kusog, pagkamabungahon, ug mga relasyon sa Dios.

  • Handout: “Pag-atiman sa Atong Yutan-on nga mga Lawas”

Pagtukod og Emosyonal nga Kalig-on diha sa Ginoo

Katuyoan sa leksiyon: Aron tabangan ang mga estudyante nga mobati og pagsalig nga ang Manluluwas mosuporta kanila sa pagtukod og pisikal ug emosyonal nga kalig-on.

  • Pagpangandam sa estudyante: Dapita ang mga estudyante nga pamalandongan ang mahagiton nga mga sitwasyon sa emosyonal nga paagi nga ilang giatubang, o pwedeng maatubang sa umaabot, ug kon unsay ilang himoon niadto nga mga sitwasyon. Pwede nilang hisgotan ang ilang mga hunahuna sa ilang ginikanan o sakop sa pamilya. Pwede nimong ipasabot nga ang panglantaw sa gawas usahay makatabang sa pag-atubang sa emosyonal nga mga hagit.

Pag-ugmad og Maayong mga Sumbanan sa Panghunahuna

Katuyoan sa leksiyon: Aron tabangan ang mga estudyante nga maugmad ang pagkahibalo sa kaugalingon sa ilang mga hunahuna ug pagtukod og maayong mga sumbanan sa panghunahuna.

Pagpangandam sa estudyante: Ikonsiderar ang pagdapit sa mga estudyante sa paghatag og gibug-aton ug sa pagsulat sa mga matang sa ilang mga hunahuna kon motubag sa mahagitong mga sitwasyon o pagpakig-uban sa uban.

Handout: “Pagkorehir sa Dili Makatabang o Dili Sakto nga mga Panghunahuna”

Pagdumala sa Kaugtas ug Kabalaka

Katuyoan sa leksiyon: Aron tabangan ang mga estudyante nga mailhan ug praktison ang mga kahanas sa pagdangop sa Ginoo aron madumala ang kaugtas ug sobrang kabalaka.

  • Pagpangandam sa estudyante: Dapita ang mga estudyante nga hunahunaon ang bag-ohay lang nga panahon dihang gibati nila nga naugtas o sobrang kabalaka bahin sa usa ka butang. Awhaga sila nga pamalandongan kon unsang mga kalamposan ug mga hagit ang ilang nasinati sa pagsagubang sa kaugtas ug sobrang kabalaka.

  • Handout: “Upat ka Lebel sa Kaugtas [Stress]”

Pagsagubang sa Kaguol ug Depresyon

Katuyoan sa leksiyon: Aron tabangan ang mga estudyante nga masabtan ang mga paagi nga makapangayo sila og tabang sa mga pagbati sakaguol ug depresyon.

  • Pagpangandam sa estudyante: Aron andamon ang mga estudyante nga tun-an ang tukma nga mga paagi sa pag-atubang sa kaguol ug depresyon, ihatag ang mosunod nga pamahayag: “Nakaila ko kon sa unsang paagi ang Langitnong Amahan ug si Jesukristo makatabang nako kon mobati ko nga maguol o ma-depress.” Dapita ang mga estudyante nga mainampoong susihon kon sa unsang paagi magamit nila kini nga pamahayag ug kon unsa sila ka masaligon nga mapakigbahin kini ngadto sa uban.

  • Mga butang nga ipakita: Usa ka imahe o bidyo sa mga balod sa dagat

  • Handout: “Pagpangayo og Tabang”

Pagkahimong Hingpit diha kang Jesukristo

Katuyoan sa leksiyon: Aron tabangan ang mga estudyante nga makasabot sa mga sayop nga may kalabotan sa pagkaperpeksyonista ug sa unsang paagi makadangop sila sa Ginoo.

  • Pagpangandam sa estudyante: Dapita ang mga estudyante nga ikonsiderar kon unsaon nila paghulagway ang kalainan tali sa pagkaperpeksyonista ug pagkahimong hingpit pinaagi kang Kristo. Pwede nilang pamalandongan ang mga paagi nga matental tingali sila sa paghunahuna nga kaya nilang mahimong hingpit nga sila ra.

  • Bidyo: “Kaluoy sa Kaugalingon” (2:58); “Ang Dili Hingpit nga Ani” (11:01; tan-awa gikan sa time code nga 2:37 hangtod 3:04)

  • Handout: “Pagkahimong Hingpit diha ni Jesukristo”

Pagtukod og Maayong mga Relasyon

Katuyoan sa leksiyon: Aron tabangan ang mga estudyante nga tinguhaon ang tabang sa Ginoo sa pagtukod og mga relasyon nga makatampo sa ilang katibuk-ang kahimsog ug kaayohan.