Leksiyon 184: Pisikal ug Emosyonal nga Kahimsog

Pag-atiman sa Atong Pisikal nga mga Lawas

Pagsunod sa mga Balaod sa Pisikal nga Kahimsog

Ang atong pisikal nga mga lawas usa ka talagsaon nga gasa gikan sa usa ka mahigugmaong Langitnong Amahan. Atong gipasidunggan kini nga gasa pinaagi sa paghimo og maalamon nga mga pagpili nga atimanon ang atong mga lawas. Kini nga leksiyon makatabang sa mga estudyante nga mapakita ang pagkamapasalamaton ngadto sa Langitnong Amahan ug kang Jesukristo pinaagi sa pag-atiman sa ilang pisikal nga mga lawas.

Posibleng mga Kalihokan sa Pagkat-on

Ang atong pisikal nga mga lawas

Hinumdomi: Samtang magtudlo niini nga leksiyon, importante nga hinumdoman nga kini nga hisgotanan mahimong lisod alang sa pipila ka estudyante. Ang pag-atiman sa ilang pisikal nga mga lawas labihan ka mahagiton alang niadtong dunay mga problema sa pagkaon, mga kakulangan, grabe nga sakit, ug uban pang mga kahimtang.

Tabangi ang mga estudyante nga mangandam sa pagtuon niini nga leksiyon pinaagi sa pagdapit nila nga ipakigbahin ang mga pagpamugos [pressures] nga gibati sa mga tawo ug ang mga kinaiya sa mga tawo mahitungod sa ilang pisikal nga mga panagway. Usa ka paagi sa paghimo niini mao ang pagsulat sa mga pulong nga Pisikal nga lawas diha sa pisara ug pagdapit sa mga estudyante nga ipakigbahin ang ilang hunahuna bahin sa mosunod nga mga pangutana:

• Unsa ang pipila ka lain-laing pagpamugos ang mahimong bation sa mga tawo bahin sa ilang mga lawas?

• Unsa ang pipila ka lain-laing mga kinaiya nga aduna ang mga tawo bahin sa ilang mga lawas?

  Dapita ang mga estudyante sa pagtubag sa mosunod nga mga pangutana diha sa ilang journal sa pagtuon:

• Unsay imong gibati bahin sa imong lawas? Ngano man?

• Unsa ka maayo ang imong gibati sa imong pag-atiman sa imong lawas? Ngano man?

Samtang imong tun-an kini nga leksiyon, tinguhaa ang inspirasyon gikan sa Espiritu Santo aron mahibalo kon unsaon nimo pag-atiman ang imong pisikal nga lawas.

Kamatuoran bahin sa atong mga lawas gikan sa Ginoo

Basaha ang unang parapo sa seksiyon nga “Ang Inyong Lawas Sagrado” diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili ([2022], 23).

• Unsay mipatigbabaw diha kanimo?

  Samtang mopakigbahin ang mga estudyante, isulat sa pisara ang bisan unsang mga kamatuoran nga ilang nahisgotan. Ikonsiderar ang paghangyo sa mga estudyante nga ipasabot kon nganong gibati nila nga ang kamatuoran importante sa mga tin-edyer karon.

  Kon dili kini hisgotan sa mga estudyante, idugang ang mosunod nga kamatuoran diha sa lista nga naa sa pisara: Ang imong lawas talagsaon nga gasa gikan sa Langitnong Amahan.

• Sa unsang paagi nga ang pagkahibalo nga ang atong mga lawas gasa sa Dios makaapektar sa atong kinaiya mahitungod niini?

• Sa unsang paagi ang pagkahibalo niini nga kamatuoran makaapektar sa atong pag-atiman sa atong mga lawas?

Aron matabangan ang mga estudyante nga masabtan kini nga baroganan ug kon unsaon pag-atiman ang gasa sa atong pisikal nga mga lawas, pwede nimong bahinon sa upat ka estasyon sa pagkat-on ang handout nga “Pag-atiman sa atong Pisikal nga mga Lawas.” Pwede nimong bahinon ang klase sa gagmayng grupo nga molibot sa kada kalihokan sa pagkat-on. Pwede kang mohatag og usa ka pirasong papel nga ibilin sa kada estasyon aron makompleto sa mga estudyante ang bahin nga sulatan diha sa kataposan sa matag seksiyon. Dayon ang mga estudyante mahimong mobasa sa unsay gisulat sa ubang grupo ug modugang niini

Pag-atiman sa atong Pisikal nga mga Lawas

Imahe sa Atong Lawas

• Sa unsang paagi nga ang opinyon sa uban makaimpluwensiya sa atong pagbati bahin sa atong mga lawas?

• Sa unsang paagi ang mga kamatuoran nga gusto sa Ginoo nga atong mahibaloan diha sa Genesis 1:26–27 ug 1 Mga Taga-Corinto 6:19–20 lahi sa mga mensahe nga mahimo natong makuha gikan sa uban?

Tun-i ang mosunod nga tambag nga gihatag sa Ginoo pinaagi kang Presidente Russell M. Nelson ug Elder Jeffrey R. Holland sa Korum sa Napulog Duha ka Apostoles nga mangita kon unsay makatabang sa imahe sa atong lawas:

Kada higayon nga motan-aw kamo sa samin, tan-awa ang inyong lawas isip inyong templo. Kana nga kamatuoran—angayng pasalamatan kada adlaw—positibong makaimpluwensya sa inyong mga desisyon unsaon ninyo sa pag-atiman sa inyong lawas ug unsaon ninyo kini sa paggamit. Ug kadto nga mga desisyon motino sa inyong destinasyon. (Russell M. Nelson, “Mga Desisyon alang sa Kahangturan,” Liahona, Nob. 2013, 107)

Mohangyo ako kaninyo … nga palihog lang magmahimong mas madawaton sa inyong mga kaugalingon, lakip na sa porma ug estilo sa inyong lawas, nga dili kaayo maghandom nga tan-awon nga unta pareha sa laing tawo. Managlahi kitang tanan. Ang uban taas, ug ang uban mubo. Ang uban tambok, ug ang uban niwang. Ug hapit tanan sa matag karon ug unya gusto nga mahimong sama sa usa ka tawo nga sila dili ra ba gayod ingon niana! Pero sama sa gisulti sa usa ka tigtambag ngadto sa mga babayeng tin-edyer: “Dili kamo pwedeng magpakabuhi nga mabalaka nga ang kalibotan nagtutok kaninyo. Kon tugotan ninyo nga ang mga opinyon sa mga tawo nga maoy makapahimo kaninyo sa pagsige na lang og matngon sa inyong kaugalingon, inyong giusikan ang inyong gahom. … Ang yawe sa pagbati og [pagsalig] mao ang kanunay nga pagpaminaw sa inyong kanahiladman—[ang tinuod nga pagka-ikaw.]” Ug sa gingharian sa Dios, ang tinuod nga kamo “mas bililhon pa kay sa mga rubi” [Mga Panultihon 3:15]. (Jeffrey R. Holland, “Ngadto sa mga Batan-ong Babaye,” Liahona, Nob. 2005, 29)

• Unsay imong nakat-onan gikan niini nga mga pamahayag?

Pagsulat og usa ka butang nga sa imong hunahuna gusto sa Ginoo nga isulti nimo ngadto sa usa ka tawo nga nanlimbasog nga mobati nga positibo bahin sa ilang lawas.

Pagkatulog

Basaha ang Doktrina ug mga Pakigsaad 88:124, nga mangita sa unsay gitudlo sa Ginoo bahin sa pagkatulog.

• Ngano sa imong hunahuna nga importante ang pagkatulog?

Ang dili igo nga pagkatulog mahimong usa ka hinungdan sa dakong problema sa kahimsog. Kadaghanan sa mga eksperto nagrekomendar sa mga tin-edyer nga matulog tali sa 8–10 ka oras magabii (tan-awa sa National Sleep Foundation, “How Much Sleep Do You Really Need?,” Oct. 1, 2020, thensf.org). Ang dili igo nga pagkatulog makapaluya sa usa ka tawo, dili maayo nga molihok, ug daling maapektohan sa mga isyu sa pisikal ug mental nga kahimsog. Ang pagbati sa kakapoy makahimo nato nga mas daling madala sa mga tentasyon.

• Sa unsang paagi nakaapektar sa imong kinabuhi ang mga batasan sa pagkatulog?

• Sa unsang paagi mapalambo sa maayong batasan sa pagkatulog ang atong abilidad sa pagserbisyo sa Ginoo?

Hisgoti sa inyong grupo ang tambag nga imong ihatag ngadto sa usa ka tawo nga gustong palamboon ang ilang mga batasan sa pagkatulog o kinsa imong irekomendar nga ilang adtoon alang sa tambag. Isulat ang imong mga hunahuna diha sa gihatag nga papel.

Pag-ehersisyo ug Aktibo nga Pagkinabuhi

Ang pagkawalay gibuhat nagtumong sa pag-usik sa atong panahon, pagtinapolan, o paglikay sa mga buluhaton. Basaha ang usa o duha sa mosunod nga mga bersikulo, nga mangita kon unsay gibati sa Ginoo kon walay buhaton ang Iyang mga anak: Doktrina ug mga Pakigsaad 42:42; 60:13; 75:3.

• Ngano sa imong hunahuna nga gusto sa Ginoo nga kita mahimong aktibo ug kugihan imbes walay buhaton?

• Sa unsang paagi ka gipanalanginan sa Ginoo dihang naningkamot kang mahimong aktibo ug kugihan?

• Sa unsang paagi ang pag-ehersisyo ug ang aktibo nga pagkinabuhi makapalambo sa atong mental nga kahimsog? Sa unsang paagi kini makatabang nato sa pagserbisyo sa Ginoo?

Isulat ang imong tambag alang sa usa ka tin-edyer nga nagtinguha nga palamboon ang iyang pag-ehersisyo ug mga lebel sa aktibidad.

Maayong mga Batasan sa Pagkaon

Basaha ang mosunod nga mga bersikulo, nga mangita sa tambag sa Manluluwas bahin sa maayong mga pagpili og pagkaon: Doktrina ug mga Pakigsaad 59:16–20; 89:10–16.

• Unsay epekto sa atong pagpili og pagkaon diha sa atong mga kinabuhi?

Hisgoti ang pipila ka babag sa himsog nga pagkaon. Ipakigbahin ang pipila ka paagi nga mapangayo nato ang tabang sa Ginoo ug mabuntog kini nga mga babag.

• Unsa ang malungtaron nga mga kaayohan sa pagsunod sa tambag sa Manluluwas mahitungod sa pagkaon og maayo nga mga pagkaon samtang bata pa ka?

Isip usa ka grupo, pagsulat og tulo ka lista nga giulohan og, “Likayan,” “Usahay Lang,” ug “Himsog.” Magtinabangay, pagpili og pipila ka komon nga mga pagkaon nga makita ninyo kada adlaw. Hisgoti kon asa nga kategoriya tingali haom ang maong pagkaon.

Human makalibot, dapita ang mga estudyante nga ipakigbahin ang ilang nakat-onan ug ang bisan unsang gikabalak-an nila. Ang mosunod nga mga pangutana mahimong mapuslanon:

• Ngano kaha nga mahagiton ang pagpalambo og maayong mga kinaiya ug ang hustong pag-atiman sa atong mga lawas?

• Sa imong hunahuna, sa unsang paagi makatabang ang paghinumdom nga ang atong mga lawas gasa gikan sa Dios?

• Giunsa ka pagtabang sa Ginoo o ang imong kaila aron makapalambo og maayong mga batasan sa kahimsog?

Dapita ang klase nga mopakigbahin sa mga kamatuoran o mga kasinatian nga makatabang sa mga hagit o mga kabalaka nga gihisgotan sa mga estudyante.

Sa pagtapos, dapita ang mga estudyante nga isulat sa ilang journal sa pagtuon kon unsay ilang gibati nga gusto sa Ginoo nga ilang himoon aron mas maatiman ang ilang mga lawas.

Dugang nga mga Kapanguhaan

Alang sa unsa nga katuyoan nga kita gihatagan og pisikal nga mga lawas?

Si Presidente Russell M. Nelson, kanhi surgeon sa kasingkasing, mitudlo:

Mas nagkadugay ko nga nagpakabuhi, mas nakaangkon ko og dugang kahibalo. Kana nga kahibalo nakatabang nako nga makasabut nga ang gasa sa atong pisikal nga mga lawas usa ka dili ordinaryo nga milagro. Usa ka talagsaon nga lawas gihatag sa matag usa kanato sa atong mahigugmaong Langitnong Amahan. Gilalang Niya kini isip usa ka tabernakulo alang sa atong mga espiritu, sa pagtabang sa matag usa nato sa atong pagpaningkamot nga makatuman sa hingpit sa atong katuyoan sa pagkalalang. Ang atong mga lawas motugot sa matag usa kanato sa pagsinati sa mahinungdanon nga plano sa kaluwasan nga Iyang giplano alang sa Iyang tanang bililhong mga anak. Siya gusto nga kita sa katapusan mahimong mas sama Kaniya ug mobalik sa pagpuyo uban Kaniya. Kanang importante nga panalangin dili posible kon kita wala pa makadawat og una sa pisikal nga lawas niining kahimtang sa pagsulay. (Russell M. Nelson, “Ang Inyong Lawas: Usa ka Talagsaong Gasa nga Angay Mahalon,” Liahona, Ago. 2019, 2)

Si Elder D. Todd Christofferson sa Korum sa Napulog Duha ka Apostoles mipasabot:

Ang usa ka gipahinungod nga kinabuhi motahud sa dili matupngan nga gasa sa pisikal nga lawas sa usa ka tawo, usa ka balaan nga nilalang subay sa panagway gayud sa Dios. Usa sa mahinungdanong katuyoan sa mortal nga kasinatian mao nga ang matag espiritu kinahanglang makadawat sa ingon nga lawas ug makakat-on sa pagbansay sa moral nga kabubut-on diha sa usa ka tabernakulo nga lawas. … Niining napukan nga kalibutan, ang ubang mga kinabuhi puno sa kasakit nga kadiyot lang, ang pipila sa mga lawas wala maporma og husto, nabali, o dili kaayo paigo sa pagpatunhay sa kinabuhi; apan ang gidugayon sa kinabuhi paigo alang sa matag espiritu, ug ang matag lawas mahimong takus sa pagkabanhaw. (D. Todd Christofferson, “Mga Hulagway sa Gipahinungod nga Kinabuhi,” Liahona, Nob. 2010, 17)

Naa bay koneksiyon tali sa pisikal nga kahimsog ug uban pang aspeto sa akong kinabuhi?

Si Elder Adrián Ochoa sa Seventy mipasabot:

Ang kinabuhi malisod, ug usahay kita dunay mga pagbati sa kabalaka, depresyon, o kakulang sa pagtamud sa kaugalingon. Apan hinumdumi nga alang sa pisikal ug emosyonal nga kahimsog, ang pag-ehersisyo ug kakugi makatabang nga magpadayon ang positibong panglantaw. Ang pag-atiman sa inyong lawas makapanalangin usab sa inyong hunahuna ug makatabang ninyo nga mahinumdom nga kamo anak sa Dios ug mahimong masaligon ug malipayon. Ang atong emosyonal, pisikal ug espiritwal nga mga aspeto sumpay ang tanan. (Adrián Ochoa, “Magmalig-on, Magmalagsik, Magmaigmat,” Liahona, Okt. 2013, 42)

Si Bishop Gérald Caussé sa Presiding Bishopric miingon:

Ang mga batasan nga inyong naestablisar karon kalabot sa inyong personal nga kaayohan, makaapektar kaninyo sa temporal ug espirituwal nga paagi sa tibuok ninyong kinabuhi. Ang inyong tumong kinahanglan dili sa pagsunod sa kawang nga uso sa kalibotan. Dili lang kini usa ka pangutana sa pagkawala sa pipila ka tambok sa inyong lawas o pag-alsa og dugang nga baynte libras aron mas matso nga tan-awon kay sa inyong kauban sa kwarto! Ang tumong mao nga mas momaayo ang pamati ug mabalanse sa inyong temporal ug espirituwal. Mohatag kini ninyo sa labing maayo nga higayon nga makabaton og tibuok kinabuhi nga himsog nga panglawas, nga mohatag ninyo og kalipay ug pagsalig sa inyong mortal nga mga abilidad ug mas maayong pagsabot sa inyong mahangtorong potensyal. (Gérald Caussé, “Harmony of Body and Spirit: A Key to Happiness” [Brigham Young University devotional, Oct. 13, 2020], 5, speeches.byu.edu)

Dugang nga mga Kalihokan sa Pagkat-on

Kinsa kita ug unsay atong kapalaran?

Aron matabangan ang mga estudyante nga masabtan kon sa unsang paagi makatabang nila ang mahangtorong panglantaw sa ilang balaanong pagkatawo sa imahe sa ilang lawas, pwede nimong ipasalida ang bidyo nga “Ang Atong Tinuod nga Pagkatawo [Our True Identity]” (3:39). Si Elder Dieter F. Uchtdorf sa Korum sa Napulog Duha ka Apostoles mipakigbahin sa istorya sa maot nga gamayng itik aron tabangan kita nga masabtan kon kinsa gyod kita, ilabina ngadto sa atong Langitnong Amahan. (Kini nga bidyo naa usab sa leksiyon nga giulohan og “Balaang Pagkatawo ug Katuyoan.”)

Personal nga kahinlo

Mahimong makatabang ang paghisgot bahin sa personal nga kahinlo sa imong klase, nga hinumdoman nga dili tanang bahin sa kalibotan adunay parehas nga mga pamatasan o pag-akses sa mga produkto nga panghinlo. Kon pilion nimo kini nga kalihokan, pwede nimong dapiton ang mga estudyante nga basahon ang Doktrina ug mga Pakigsaad 42:41, nga mangita sa mga pulong sa Ginoo bahin sa kahinlo. Usa ka paagi nga maatiman nato ang talagsaon nga gasa sa atong lawas mao ang pagbansay og maayo sa personal nga kahinlo.

Sa sukod nga 1 (usahay ra kaayo) hangtod 5 (kanunay) dapita ang mga estudyante nga pamalandongan sa hilom kon unsa ka maayo ang ilang pag-atiman sa ilang personal nga kahinlo. Kini mahimong maglakip sa mosunod:

• Manghugas kanunay sa imong mga kamot gamit ang sabon ug tubig.

• Mogamit og floss ug magsepilyo kada adlaw.

• Maligo ug hugasan ang imong buhok kanunay.

• Labhan ang imong mga sinina kanunay.

Dapita ang mga estudyante sa paghunahuna nga gihangyo sila sa pag-organisar og personal nga kahinho nga booth o presentasyon para sa kalihokan sa Simbahan. Dapita sila nga hisgotan ang mga panalangin sa personal nga kahinlo ug kon sa unsang paagi kini makatabang kanato aron makapasalamat ngadto sa Langitnong Amahan.