Leksiyon 189—Pisikal ug Emosyonal nga Kahimsog

Pagkahimong Hingpit diha kang Jesukristo

Usa ka Proseso sa Pagkahimong Mas Sama sa Manluluwas

Daghang pagpamugos ug ekspektasyon sa kinabuhi nga maoy hinungdan nga mag-antos ta sa pagkaperpeksyonista o sayop nga maghunahuna nga kinahanglang hingpit ta sa atong kaugalingong paningkamot. Tungod sa dakong sakripisyo sa Manluluwas, kita “mahingpit diha [kaniya]” (Moroni 10:32). Kini nga leksiyon makatabang sa mga estudyante nga mailhan ang mga kasaypanan nga konektado sa pagkaperpeksyonista ug makatabang nila nga modangop sa Ginoo.

Posibleng mga Kalihokan sa Pagkat-on

Pagkaperpeksyonista

Ikonsiderar ang pagpakita sa pipila sa mosunod nga mga hunahuna diha sa pisara ug sa pagbasa niini uban sa klase. Mobati nga gawasnon sa pagpahaom o pag-usab niini ngadto sa uban pang perpeksiyonista nga mga hunahuna nga mas nahiangay sa imong mga estudyante.

• “Dili ko segurado kon igo ba ang akong kamaayo.”

• “Dili ko parehas niya kamaayo ini. Wala gani ko kasabot kon nganong naningkamot pa man ko.”

• “Paminaw nako kinahanglan kong magpakaaron-ingnong nga mas malipayon ug mas maayo kay sa akong tinuod nga kahimtang.”

Para sa pananglitan sa pipila niini nga mga panghunahuna, ikonsiderar ang pagpasalida sa bidyo nga “Kaluoy sa Kaugalingon” (2:58) gikan sa time code nga 0:00 hangtod 0:53.

Dapita ang mga estudyante nga mangita og pares ug tubagon ang mosunod nga mga pangutana.

• Unsa ka sagad nimong mabati ang ingon niini nga mga panghunahuna?

• Ngano kaha nga matental ang mga tawo nga maghunahuna niini nga paagi?

Pwede nimong ipasabot nga kini nga mga pamahayag pwedeng makonsiderar nga mga pananglitan sa panghunahuna nga pagkaperpeksyonista. Pwede nimong isulat sa pisara ang pagkaperpeksyonista ug dapita ang mga estudyante nga isulat ang posibleng mga deskripsiyon palibot niini.

Ikonsiderar ang pagpakita sa mosunod nga pamahayag. Awhaga ang mga estudyante nga mangita og dugang nga mga panglantaw nga pwede nilang idugang diha sa pisara.

Si Elder Vern P. Stanfill sa Seventy mipasabot:

Ang pagkamahingpiton nagkinahanglan og imposible, gipahamtang sa kaugalingon nga sumbanan nga nagtandi kanato ngadto sa uban. Kini makamugna og pagbati nga sad-an ug grabe nga kabalaka ug makahimo kanato nga gustong mopalayo ug ibulag ang atong kaugalingon. (Vern P. Stanfill, “Ang Dili Hingpit nga Ani,” Liahona, Mayo 2023, 113)

Aron matabangan ang mga estudyante nga masusi kon sa unsang paagi nila gitan-aw ang pagkaperpeksyonista diha sa ilang kinabuhi ug kon unsaon pagbuntog niini, pwede nimong ipakita ang mosunod nga mga pangutana ug dapita ang mga estudyante nga pamalandongan ang ilang mga tubag.

Hunahunaa kon sa unsang paagi dali kang madala sa perpeksyonista nga panghunahuna. Pwede nimong irekord ang imong mga tubag sa pipila sa mosunod nga mga pangutana diha sa imong journal sa pagtuon.

• Unsa ang dili reyalistikong mga sumbanan ang imong gitakda para sa imong kaugalingon?

• Sa unsang paagi nimo gitandi ang imong kaugalingon ngadto sa uban sa dili maayong mga paagi?

• Unsaon nimo pagdangop sa Ginoo aron masulbad ang ingon niini nga panghunahuna?

Awhaga ang mga estudyante nga tinguhaon ang pagpadayag gikan sa Langitnong Amahan pinaagi sa Espiritu Santo samtang ilang tun-an ang mga paagi nga makadangop sila sa Manluluwas aron mabuntog ang perpeksyonista nga panghunahuna.

Gihingpit diha ni Jesukristo

Gipaambit ni Elder Vern P. Stanfill kon unsa ang atong pwedeng tutokan aron mabuntog ang perpeksyonista nga panghunahuna:

Hinumdomi nga ang pagkamahingpiton dili sama sa pagkahimong hingpit diha ni Kristo….

Ang pagkahimong hingpit diha ni Kristo … mao ang proseso—mahigugmaon nga gigiyahan sa Espiritu Santo—sa pagkahimong mas sama sa Manluluwas. Ang mga sumbanan gitakda pinaagi sa usa ka mabination ug nasayod sa tanan nga Langitnong Amahan ug klaro nga gipasabot diha sa mga pakigsaad nga gidapit kita sa pagdawat. Kini mohupay kanato sa mga palas-anon sa pagbati nga sad-an ug kakulang, kanunay nga mohatag og gibug-aton kon kinsa kita sa panan-aw sa Dios. (Vern P. Stanfill, “Ang Dili Hingpit nga Ani,” Liahona, Mayo 2023, 113)

• Unsa ang imong nakita nga makahuloganon niini nga pamahayag?

Kon ang mga estudyante dili natural nga mopakigbahin, ikonsiderar ang pagdapit kanila nga i-summarize kon unsa ang gipasabot sa pagkahimong hingpit diha ni Kristo. Gamit ang mga pulong sa mga estudyante, pagsulat diha sa pisara og baroganan nga sama sa: Ang pagkahimong hingpit diha ni Jesukristo mao ang proseso—mahigugmaon nga gigiyahan sa Espiritu Santo—sa pagkahimong mas sama sa Manluluwas. Ikonsiderar ang pagsulat diha sa pisara sa Pagkahimong hingpit diha ni Kristo sunod sa pagkaperpeksyonista.

Samtang gibisita ang karaang mga lumulupyo sa Amerika, gipamatud-an pag-usab sa Manluluwas nga ang pagkahimong hingpit mao ang butang nga gitinguha Niya ug sa Iyang Amahan alang kanatong tanan. Basaha ang 3 Nephi 12:48 (tan-awa usab sa Mateo 5:48), nga mangita kon unsay giingon sa Manluluwas.

Ang ubang mga tawo nakigbisog tingali sa mga hunahuna sa pagkaperpeksyonista dihang ilang basahon kini nga bersikulo.

• Sa unsang paagi makatabang nato ang mga pamahayag ni Elder Stanfill nga mas masabtan kon unsay gitudlo sa Manluluwas niini nga bersikulo?

• Sa unsang paagi makatabang kini nato nga modangop sa Ginoo dihang nakigbisog sa panghunahuna sa pagkaperpeksyonista?

Pagkahimong mas sama sa Manluluwas

Aron matabangan ang mga estudyante nga mas masabtan ang baroganan, ikonsiderar ang pag-apod-apod sa handout nga “Pagkahimong Hingpit diha ni Jesukristo.”

Pwedeng tun-an sa mga estudyante ang mga pakisayran sa kasulatan ug mga pamahayag sa gagmayng grupo, diin tun-an sa kada tawo ang usa o duha ka pamahayag ug mga pakisayran sa kasulatan. O pwede nimong hatagan ang kada grupo og usa ka pamahayag ug pakisayran sa kasulatan nga tun-an.

Pagkahimong Hingpit diha ni Jesukristo

Basaha ang mosunod nga mga pakisayran sa kasulatan. Pangitaa ang mga hugpong sa mga pulong nga nakapadako sa imong kompiyansa nga ang Manluluwas makatabang kanato nga mabuntog ang atong mga pagkadili hingpit ug mahimong mas sama Kaniya. Pwede kang maghimo og lista sa unsay imong nakaplagan diha sa imong journal sa pagtuon o sa likod sa handout.

• Doktrina ug mga Pakigsaad 76:40–42

• Ether 12:27

• Moroni 10:32–33

Basaha ang mosunod nga pamahayag. Pangitaa kon unsay atong mahimo aron mabuntog ang perpeksiyonistang panghunahuna ug magtutok sa pagkahimong mas maayo pinaagi kang Jesukristo. Pwede nimong markahan ang mga hugpong sa mga pulong nga mipatigbabaw kanimo.

Si Elder Dieter F. Uchtdorf sa Korum sa Napulog Duha ka Apostoles mitudlo kon unsay gidahom ug wala dahoma sa Ginoo kanato:

Ang Dios wala magkinahanglan sa mga tawo nga walay lama. Siya nangita niadtong kinsa mohalad sa ilang “kasingkasing ug sa usa ka andam nga hunahuna” [Doktrina ug mga Pakigsaad 64:34], ug Siya mohimo nila nga “hingpit diha ni Kristo” [Moroni 10:32–33]. (Dieter F. Uchtdorf, “Five Messages That All of God’s Children Need to Hear” [Brigham Young University Education Week devotional, Aug. 17, 2021], 3, speeches.byu.edu)

Gipasabot ni Presidente Russell M. Nelson kon unsay atong mahimo dihang atong makita ang atong mga pagkadili hingpit:

Buhaton nato ang atong labing maayo ug maningkamot nga molambo matag adlaw. Kon motumaw ang atong mga pagkadili hingpit, makapadayon kita sa pagpaningkamot sa pagkorehir niini. Kita mahimong mas mapasayloon sa atong mga sayop ug niadtong atong mga gihigugma. (Russell M. Nelson, “Perfection Pending,” Ensign, Nov. 1995, 88)

Human makatuon ang mga estudyante, dapita sila nga ipakigbahin sa ilang grupo kon unsay ilang nakat-onan. Tabangi silang hisgotan kon sa unsang paagi kini nga mga kasulatan ug mga pamahayag may kalabotan ngadto kanila.

Hisgoti kon unsang mga hugpong sa mga pulong ang imong nakaplagan niini nga mga kasulatan o mga pamahayag nga:

• Nakatabang nimo kaniadto sa pagbati nga wala maabot ang mga gidahoman.

• Naa kay mga pangutana.

• Gusto nimong gamiton sa imong kinabuhi.

Pagpuli sa pagkaperpeksyonista ngadto sa pagkahimong hingpit diha kang Jesukristo

Ang mosunod nga kahanas makatabang nato nga walaon ang perpeksyonista nga panghunahuna ug magtutok sa pagpaningkamot nga mahimong mas maayo pinaagi kang Jesukristo.

Ipasabot: Seguroa nga klaro sa mga estudyante ang mosunod nga kahanas. Ikonsiderar ang pagsulat sa mga pangutana diha sa pisara.

Dihang mailhan nimo ang perpeksiyonista nga panghunahuna, pangutan-a ang imong kaugalingon sa mosunod:

• Unsa kahay gusto sa Manluluwas nga panglantaw nako sa akong kaugalingon uban ang kaluoy ug pailob?

• Imbes maningkamot nga himoon ang tanan sa akong kaugalingon, unsaon nako pag-ila ug pagsalig sa Manluluwas ug sa Iyang gahom sa pagtabang nako?

Modelo: Pagpili og usa ka perpeksiyonista nga panghunahuna gikan sa sinugdanan sa leksiyon, sama sa “Dili ko parehas niya kamaayo niini. Wala gani ko kasabot kon nganong naningkamot pa man ko.” Sa paghinumdom niini nga hunahuna, pangutan-a ang mga estudyante sa unang pangutana (“Unsa kahay gusto sa Manluluwas nga panglantaw nako sa akong kaugalingon uban ang kaluoy ug pailob?”). Aron makadungog og pipila ka posible nga mga tubag, tan-awa ang nahibiling bahin sa bidyo nga “Kaluoy sa Kaugalingon” (2:58) gikan sa time code nga 0:54 hangtod 2:58.

Ang mga estudyante mahimong mopakigbahin sa pipila sa mosunod: Walay bale sa Ginoo kon unsa ta kon itandi sa uban. Mahimong magpailob kita sa atong kaugalingon kon dili ta parehas sa uban ka paspas mouswag ug atong hinumdoman nga ang uban adunay kaugalingong gisagubang. Mahimo natong mahibaloan nga kadaghanan sa mga pag-uswag hinay-hinay. Pwede natong tinguhaon ang mga pag-aghat sa Espiritu nga modangop sa Ginoo ug nahibalo nga kita mouswag sa tukmang panahon sa Ginoo.

Ipangutana ang ikaduhang pangutana sa ibabaw (“Imbes maningkamot nga himoon ang tanan sa akong kaugalingon, unsaon nako pag-ila ug pagsalig sa Manluluwas ug sa Iyang gahom sa pagtabang nako?”). Mahimong ipakigbahin sa mga estudyante nga samtang maghinulsol ug modangop kita sa Manluluwas, Siya adunay gahom sa paglimpyo kanato gikan sa sala ug sa pagtabang kanato nga mouswag ug mahisama Niya. Gidapit kita Niya nga motutok Kaniya alang sa tabang, dili sa uban. Pwede kitang maningkamot sa pagsunod sa ehemplo sa Manluluwas ug mag-ampo nga panalanginan sa Langitnong Amahan ang atong mga paningkamot. Mainampoon kitang mangita og ebidensiya sa Iyang tabang ug mga paagi nga kita miuswagS.

Pagpraktis: Dapita ang mga estudyante nga himoon ang mosunod nga kalihokan uban sa ilang kapares, ug seguroa nga makabaton og kahigayonan ang mga estudyante nga magpraktis.

Pagpili og usa sa mga pananglitan sa perpeksiyonista nga panghunahuna diha sa sinugdanan sa leksiyon. Uban niini nga hunahuna, tubaga ang mga pangutana sa ibabaw.

Human sa igong panahon, dapita ang pipila ka magpares nga ipakigbahin ang unsay ilang nakat-onan gikan sa praktis. Mabantayan tingali sa uban nga ang pagdapit sa Manluluwas diha sa ilang mga hunahuna nakatabang nga mabati nila ang Iyang gugma ug pailob.

Awhaga ang mga estudyante nga mamalandong kon unsaon nila paggamit kini nga mga kahanas diha sa ilang kinabuhi. Dapita sila sa paglihok sa mga impresyon nga ila tingaling nadawat samtang ilang gitinguha ang tabang sa Manluluwas.

Pwede nimong taposon ang klase pinaagi sa pagpamatuod sa mga panalangin nga moabot gikan sa atong padayon nga mga pagpaningkamot nga mahimong sama kang Jesukristo.

Dugang nga mga Kapanguhaan

3 Nephi 12:48 (tan-awa usab sa Mateo 5:48). Unsay ipasabot sa “pagkahimong hingpit”?

Si Presidente Russell M. Nelson mipakigbahin:

Sa Mateo 5:48, ang pulong nga hingpit gihubad gikan sa Griyego nga teleios, nga nagpasabot nga “kompleto.” Ang teleios usa ka adhetibo [adjective] nga gikan sa pungan [noun] nga telos, nga nagpasabot “kataposan.” Ang infinitive nga porma sa verbo [verb] mao ang teleiono, nga nagpasabot nga “sa pag-abot niana nga gilay-on, aron hingpit nga molambo, sa pagtapos, o sa paghuman.” Palihog hinumdomi nga ang pulong wala magpasabot og “gawasnon gikan sa sayop”; kini nagpasabot og “pagkab-ot sa umaabot nga katuyoan.” (Russell M. Nelson, “Perfection Pending,” Ensign, Nob. 1995, 86)

Si Elder Jeffrey R. Holland sa Korum sa Napulog Duha ka Apostoles mitudlo:

Ang matag usa kanato nagtinguha og mas Kristohanon nga kinabuhi kay sa kasagaran natong makab-ot sa pagpuyo. Kon matinuoron kitang moangkon niana ug naningkamot nga molambo, dili kita mga hipokrito; kita tawhanon. … Kon kita magpadayon, nan diha sa kahangtoran ang paghashas kanato mahuman ug makompleto—nga mao ang kahulogan sa kahingpitan diha sa Bag-ong Tugon. (Jeffrey R. Holland, “Busa, Kamo Kinahanglan Magmahingpit—sa Kataposan,” Liahona, Nob. 2017, 42)

Sa unsang paagi posible ang pagkahingpit?

Si Presidente Russell M. Nelson mipasabot:

Dili kita angayang masagmuyo kon ang atong kinasingkasing nga mga paningkamot ngadto sa pagkahingpit karon daw makapaluya ug walay kataposan. Ang pagkahingpit naghulat. Moabot kini sa hingpit human lamang sa Pagkabanhaw ug pinaagi lamang sa Ginoo. Kini nagpaabot sa tanan kinsa nahigugma kaniya ug nagsunod sa iyang mga sugo. (Russell M. Nelson, “Perfection Pending,” Ensign, Nob. 1995, 88)

Tan-awa usab sa “Paghingpit diha Kaniya,” gikan sa time code nga 7:00 hangtod 7:57, ni Elder Paul V. Johnson sa Seventy.

Unsa ang pagkaperpeksyonista?

Si Elder Gerrit W. Gong sa Korum sa Napulog Duha ka Apostoles mipasabot:

Ang sayop nga pagsabot kon unsa ang gipasabot nga mahimong hingpit moresulta sa pagkaperpeksyonista—usa ka kinaiya o pamatasan nga nagkinahanglan og usa ka dalaygon nga mga tinguha nga mahimong maayo ug nahimong usa ka dili angay nga pagdahom nga mahimong hingpit karon. Ang pagkaperpeksyonista usahay moabot gikan sa pagbati nga kadto lamang hingpit ang angay nga higugmaon o nga kita dili angayan nga magmalipayon gawas kon kita hingpit. (Gerrit W. Gong, “Pagkahimong Hingpit diha kang Kristo, Liahona, Hulyo 2014, 17)

Ang katakos ug pagkahingpit pareho ba nga butang?

Tan-awa sa “Unsa ang kalainan tali sa pagkaperpeksyonista ug gusto nga mahimong takos?” (gikan sa “Mental nga Kahimsog: Tabang alang Kanako” nga pahina sa ChurchofJesusChrist.org).

Dugang nga mga Kalihokan sa Pagkat-on

Mga binuhatan ug mga kinaiya nga makatabang nako nga mabuntog ang pagkaperpeksyonista

Aron matabangan ang mga estudyante nga makita kon unsaon nila pagbalanse tali sa mga panginahanglan sa kinabuhi ug ang paglikay sa pagkaperpeksyonista, ikonsiderar ang pagpabasa nila sa mga bahin sa “Pagkahimong Hingpit diha kang Kristo” ni Elder Gerrit W. Gong sa Kurom sa Napulog Duha ka Apostoles (Liahona, Hulyo 2014, 14–19). Samtang magbasa ang mga estudyante, pwede silang maghimo og listahan sa mga binuhatan ug mga kinaiya nga makatabang nila sa pagbuntog sa mga kalagmitan sa pagkaperpeksyonista ug, sa kaulahian, mahimong hingpit diha kang Jesukristo.

Pagtandi ug pagsunod

Usa sa posibleng hinungdan sa pagkaperpeksyonista mao ang tinguha nga itandi ang atong kaugalingon sa uban. Mahimong makabenepisyo ang mga estudyante sa pagkat-on bahin sa kalainan tali sa pagtandi sa kaugalingon ug pagsunod. Ikonsiderar ang pagpakita sa mosunod nga pahayag ni Elder Vern P. Stanfill sa Seventy:

Akong nakat-onan … nga sama lang nga ang pagkamahingpiton dili pareha sa pagkahimong hingpit diha ni Kristo, ang pagtandi sa kaugalingon dili pareha sa pagsundog [emulation]. Kon atong itandi ang atong kaugalingon ngadto sa uban, adunay duha lang ka resulta. Atong makita atong kaugalingon nga mas maayo kay sa uban ug mahimong manghukom ug manaway kanila, o atong makita atong kaugalingon nga ubos kay sa uban ug mahimong mabalak-on, manaway sa kaugalingon, ug mawad-an og paglaom. Ang pagtandi sa atong kaugalingon ngadto sa uban talagsa ra kaayo nga mabungahon, dili makapabayaw, ug usahay makapasagmuyo gayod. Sa pagkatinuod, kini nga mga pagtandi mahimong espirituhanon nga makapalaglag, magpugong kanato nga makadawat sa espirituhanon nga tabang nga atong gikinahanglan. Sa laing bahin, ang pagsunod niadtong atong gitahod kinsa nagpakita og Kristohanon nga mga kinaiya mahimong makahatag og panudlo ug makapabayaw ug makatabang kanato nga mahimong mas maayo nga mga disipulo ni Jesukristo. (Vern P. Stanfill, “Ang Dili Hingpit nga Ani,” Liahona, Mayo 2023, 115)

Dayon pwede ninyong hisgotan ang mga pangutana nga sama sa mosunod:

• Nganong kinahanglan natong likayan ang pagkompara sa atong kaugalingon ngadto sa uban?

• Nganong kinahanglan natong tinguhaon nga sundogon kadtong nagpakita og Kristohanong mga hiyas?

• Unsay nakatabang nimo sa paglikay sa tentasyon nga ikompara ang imong kaugalingon ngadto sa uban?

Mga Senaryo

Aron tabangan ang mga estudyante nga mailhan ang mga sayop nga panghunahuna nga may kalabotan sa perpeksyonismo ug dayon magpraktis sa pag-ilis niini sa mga paagi nga makadangop kita kang Kristo, pwede nimong pahimoon og mga senaryo ang mga estudyante. Diha sa mga grupo, pwedeng maghimo ang mga estudyante og tinuod nga senaryo nga maglakip sa pipila ka elemento sa pagkaperpeksyonista nga panghunahuna. Ang mga grupo pwedeng magbayloay sa ilang mga senaryo. Pwede silang motubag sa mga senaryo pinaagi sa pagpakigbahin kon unsay ilang isulti aron maawhag ang mga indibidwal diha sa senaryo nga modangop kang Kristo aron mahimo silang hingpit diha Kaniya.

Mga kapilian sa Bbidyo

Diha sa “Pagkaperpeksyonista: Mahimo ba Akong Igo Kamaayo?,” gihulagway ni Olivia ang iyang kasinatian sa pagkaperpeksyonista. Samtang tan-awon sa mga estudyante kini nga bidyo, ilang mailhan ang mga paagi nga makita ang pagkaperpeksyonista ug kon sa unsang paagi kini makaapektar kaniya. Pwede usab nilang ilhon kon giunsa niya pagsulbad ang pagkaperpeksyonista. Pwede sab nimong ikonsiderar nga gamiton ang unang tulo ka minuto ug lima ka segundo sa bidyo isip laing paagi sa pagsugod sa leksiyon. Dayon, pwede ninyong tan-awon ang nahibiling bahin sa bidyo sa kataposan sa leksiyon.

Mahimong makabenepisyo ang mga estudyante sa pagtan-aw sa “Ang Katakos Dili ang Pagkawalay Tatsa” gikan sa time code 3:34 hangtod 7:03. Niini nga bidyo, giasoy ni Brother Bradley R. Wilcox sa Kinatibuk-ang Kapangulohan sa Young Men ang istorya bahin ni Damon ug kon sa unsang paagi ang pagdangop ngadto sa Dios nakatabang niya nga mabuntog ang iyang pagbati sa pagkapakyas.