“Leksiyon 185—Pagtukod og Emosyonal nga Kalig-on diha sa Ginoo: Pagpalambo sa Atong Pagsalig sa Tabang sa Ginoo sa Atong Emosyonal nga mga Hagit,” Manwal sa Magtutudlo sa Seminary sa Doktrina ug mga Pakigsaad (2025)
“Pagtukod og Emosyonal nga Kalig-on diha sa Ginoo,” Manwal sa Magtutudlo sa Seminary sa Doktrina ug mga Pakigsaad
Leksiyon 185: Pisikal ug Emosyonal nga Kahimsog
Pagtukod og Emosyonal nga Kalig-on diha sa Ginoo
Pagpalambo sa Atong Pagsalig sa Tabang sa Ginoo sa Atong Emosyonal nga mga Hagit
Kay gimahal kita sa Langitnong Amahan, gipadala Niya ang Iyang Anak, si Jesukristo, aron palig-onon ug hupayon kita panahon sa mga kalisdanan sa kinabuhi. Kini nga leksiyon makatabang sa mga estudyante nga mosalig nga ang Manluluwas mosuporta nila sa pagtukod og emosyonal nga kalig-on.
Posibleng mga Kalihokan sa Pagkat-on
Emosyonal nga mahagiton nga mga sitwasyon
Timan-i: Kini nga materyal gituyo aron mahimong makatabang sa pagtuon bahin sa pagtukod og emosyonal nga kalig-on diha sa Ginoo, dili aron i-diagnose o tambalan ang mental ug emosyonal nga balatian. Ni ang kasinatian sa klase gituyo nga himoong therapy sa grupo.
Aron tabangan ang mga estudyante nga mangandam alang niini nga leksiyon, ikonsiderar ang pagdapit sa mga estudyante sa paghunahuna ug pagsulat diha sa pisara sa daghang emosyonal nga mahagiton nga mga sitwasyon nga maatubang tingali nila sa umaabot, o sa mga tin-edyer nga sama nila. Apil sa mga pananglitan ang pagbati nga giyagayagaan sa ilang mga kaedad, pagkanaa sa sitwasyon diin kinahanglan silang makig-istorya sa mga tawo nga dili nila kaila, o dihang mawala na ang usa ka makapalipay nga butang. Hangyoa ang mga estudyante nga himoong reyalistiko ug may kalabotan ang mga sitwasyon.
Dayon, dapita ang mga estudyante nga himoon ang mosunod diha sa ilang mga journal sa pagtuon:
Paghunahuna og emosyonal nga mahagiton nga sitwasyon nga imong giatubang o posibleng atubangon sa umaabot. Sa imong journal sa pagtuon, tubaga ang mosunod nga mga pangutana:
-
Unsa ka maayo ang imong gibati sa imong pagsanong sa mga situwasyon nga mahagiton sa emosyonal nga paagi? Ngano man?
-
Sa sukod nga 1 hangtod sa 10 (1 = dili gyod masaligon; 10 = masaligon kaayo), unsa ka kamasaligon nga ang Manluluwas makahimo ug motabang kanimo niini nga mga sitwasyon? Ngano man?
Sa tibuok leksiyon, awhaga ang mga estudyante nga mainampoong magtinguha nga mobati nga masaligon sa abilidad sa Manluluwas nga tabangan sila sa mga sitwasyon nga mahagiton sa emosyonal nga paagi ug mahimong mas lig-on sa emosyonal nga paagi.
Emosyonal nga kalig-on
Ikonsiderar ang pagsulat sa termino nga Emosyonal nga Kalig-on diha sa pisara. Pangutan-a ang mga estudyante kon unsay ilang nasabtan bahin ini. Pwede usab nimong ipakita ang mosunod nga impormasyon:
Isip kabahin sa plano sa Langitnong Amahan, kitang tanan mag-atubang og mga hagit ug mga kalisdanan atol niini nga kinabuhi. Apan, samtang modangop kita kang Jesukristo ug mosalig sa Iyang kaluoy ug grasya, tabangan kita Niya nga makatukod og emosyonal nga kalig-on. Ang emosyonal nga kalig-on mao:
-
Ang abilidad sa pagpahiangay ngadto sa emosyonal nga mga hagit uban sa kaisog ug hugot nga pagtuo nga nakasentro diha ni Jesukristo.
-
Pagtabang sa imong kaugalingon ug sa uban sa labing maayo kutob sa imong mahimo.
-
Pagpaningkamot alang sa dugang nga tabang kon gikinahanglan.
Ang ehemplo sa Manluluwas
Ipasabot nga panahon sa Iyang mortal nga pagkinabuhi, nasinati ni Jesus ang mga emosyon nga sama sa kasakit ug kasubo. Pwede kang mangutana sa mga estudyante kon makahunahuna ba sila og bisan unsang ehemplo. Para sa mosunod nga kalihokan, ikonsiderar ang pagpares-pares sa mga estudyante ug pagdapit nila sa pagdrowing sa kauban nga tsart diha sa ilang mga journal. Awhaga ang kada paresan nga tun-an ang usa sa mga tudling sa kasulatan nga nalista sa tsart. Inig kahuman nila, dapita sila nga ipakigbahin sa usag usa ang unsay ilang nakat-onan.
Basaha ang mosunod nga mga tudling sa kasulatan, nga mangita kon giunsa pagtubag sa Manluluwas sa kada sitwasyon. Irekord ang bisan unsang emosyon nga gipakita sa Manluluwas ug mga aksiyon nga Iyang gihimo.
|
Lisod nga sitwasyon sa emosyonal nga paagi |
Sa unsang paagi mitubag ang Manluluwas |
|---|---|
Lisod nga sitwasyon sa emosyonal nga paagi Si Juan Bautista gipatay ni Herodes Antipas. | Sa unsang paagi mitubag ang Manluluwas |
Lisod nga sitwasyon sa emosyonal nga paagi Mibyahe si Jesus aron makig-uban nila ni Maria ug Marta human mamatay ang ilang igsoon nga si Lazaro. | Sa unsang paagi mitubag ang Manluluwas |
-
Unsay imong nakat-onan o gibati bahin kang Jesukristo gikan niini nga mga asoy sa kasulatan?
-
Unsaon nimo pagsunod ang ehemplo sa Manluluwas panahon sa usa ka lisod nga sitwasyon sa emosyonal nga paagi?
“Tinuod gayod nga gipas-an niya ang atong kagul-anan, ug gidala ang atong mga kasub-anan”
Ipasabot nga dili lang si Jesukristo ang labing labaw nga ehemplo sa emosyonal nga kalig-on, apan hingpit usab Niyang nasabtan ang emosyon ug pakigbisog sa kada tawo. Kon posible, pagpakita og litrato sa Manluluwas diha sa pisara nga nag-antos sa Getsemane. Samtang himoon sa mga estudyante ang mosunod nga kalihokan, dapita sila sa pagsulat og makahuloganong mga pulong o hugpong sa mga pulong gikan sa Isaias 53:3–5 libot sa litrato. Pwede nimong ipasabot nga ang Isaias 53:3–5 maoy usa ka tudling sa doktrinal nga kahanas ug dapita ang mga estudyante nga markahan kini diha sa ilang mga kasulatan.
Basaha ang Isaias 53:3–5, nga pangitaon ang ebidensiya nga hingpit nga nasabtan sa Manluluwas ang atong emosyonal nga mga kalisdanan.
-
Hain sa mga pulong o hugpong sa mga pulong ang labing makahuloganon para nimo? Ngano man?
Aron matabangan ang mga estudyante nga mas mailhan ang abilidad ni Jesus nga hingpit nga makasabot ug makahupay nila, ikonsiderar ang pagpakigbahin sa mosunod nga pamahayag:
Si Elder Ulisses Soares sa Korum sa Napulog Duha ka Apostoles mipahayag:
Jesukristo: Ang Tig-atiman sa Atong Kalag
Si Elder Soares nagtudlo mahitungod ni Jesukristo, sa Iyang Pag-ula, ug sa gasa sa paghinulsol.
Dugang pa niining halangdong gasa sa kaluwasan, ang Manluluwas mitanyag usab nato og tabang ug kahupayan samtang atubangon nato ang atong mga kasakit, mga tentasyon, ug mga kahuyang sa mortal nga kinabuhi. … Ako mopaniguro kaninyo nga si Kristo nakahibalo kanunay sa mga kalisod nga atong nasinati dinhi sa pagka-mortal. Siya nakasabot sa tanan nga kapait, paghingutas, ug pisikal nga kasakit ingon man usab sa emosyonal ug espiritwal nga mga hagit nga atong giatubang. Ang kasingkasing sa Manluluwas napuno sa kalooy, ug Siya andam kanunay sa pagtabang kanato. Posible kini tungod kay Siya personal nga nakasinati ug midala sa Iyang Kaugalingon diha sa unod sa kasakit sa atong mga kahuyang ug mga kakulangan.
Uban sa kalumo ug kamapainubsanon sa kasingkasing, Siya mikunsad ubos sa tanang butang ug gidawat ang pagtamay, pagsalikway, ug pagpakaulaw sa mga tawo, nga nasamaran alang sa atong mga kalapasan ug mga kadaotan. Siya nag-antos niining mga butanga alang sa tanan, midala diha sa Iyang Kaugalingon sa mga sala sa kalibotan, ug Siya nahimong atong labing maayong espiritwal nga tig-atiman.
Samtang kita mopaduol ngadto Kaniya, motugyan sa atong kaugalingon sa espirituhanon nga paagi ngadto sa Iyang pag-atiman, kita makahimo sa pagdala diha sa atong kaugalingon sa Iyang yugo, nga sayon, ug sa Iyang salagubangon, nga magaan, sa ingon makakaplag nianang gisaad nga kahupayan ug kapahulayan. Dugang pa, kita makadawat sa kalig-on nga gikinahanglan natong tanan sa pagbuntog sa mga kalisod, mga kahuyang, ug mga kasubo sa kinabuhi, nga lisod kaayo sa paglahotay kon wala ang Iyang tabang ug makaayo nga gahom. (Ulisses Soares, “Jesukristo: Ang Tig-atiman sa Atong Kalag,” Liahona, Mayo 2021, 83–84)
-
Base sa atong pagtuon, unsang mga kamatuoran ang atong makat-onan kang Jesukristo ug sa Iyang abilidad nga motabang kanato?
Isulat sa pisara ang mga tubag sa mga estudyante. Usa sa mga kamatuoran nga mahimong mailhan sa mga estudyante mao ang mosunod: Si Jesukristo makahupay ug makalig-on kanato sa atong emosyonal nga mga hagit tungod kay nasinati usab Niya kini.
-
Sa unsang paagi ang pagdangop sa Manluluwas ug pagsunod sa Iyang ehemplo sa hugot nga pagtuo makatabang sa usa ka tawo nga makatukod og emosyonal nga kalig-on?
Paghanduraw sa tabang sa Manluluwas
Aron tabangan ang mga estudyante nga masabtan kon sa unsang paagi makatabang nila kini nga baroganan, ang mosunod nga kahanas mahimong makatabang. Himoa ang mosunod aron sa pagpasabot, pagmodelo, ug pagbansay sa kahanas:
-
Ipasabot ang kahanas: Ipasabot sa mga estudyante nga ang paghanduraw sa Manluluwas nga kauban nato ug nagtabang nato sa panahon sa atong emosyonal nga mahagiton nga mga sitwasyon makadapit sa Iyang tabang ug direksiyon.
-
Pagmodelo sa kahanas: Paghunahuna og emosyonal nga mahagiton nga sitwasyon nga imo nang naatubang o mahimong atubangon sa umaabot nga andam nimong ipakigbahin sa mga estudyante. Gamit ang mga lakang sa ubos, ipakigbahin kon giunsa nimo paghanduraw nga nag-uban kanimo ang Manluluwas, nga naglig-on kanimo, ug giunsa nimo pagtubag ang pipila sa mga pangutana sa ubos. Pwede nimong hunahunaon pag-ayo kini isip kabahin sa imong pagpangandam sa leksiyon.
-
Pagbansay: Aron tabangan ang mga estudyante sa pagbansay niini nga kahanas, ikonsiderar ang pag-organisar kanila sa gagmayng grupo ug pagdapit sa kada grupo nga maghunahuna og emosyonal nga mahagiton nga sitwasyon sa usa ka tin-edyer. Dihang makahunahuna na sila og may kalabotan nga senaryo, dapita sila nga himoon ang mosunod nga sila-sila ra ug dayon ipakigbahin ang ilang mga tubag sa ilang mga kagrupo. Pwede nimong pahimangnoan ang mga estudyante bahin sa pagpakigbahin og bisan unsa bahin sa ilang kinabuhi nga personal ra kaayo.
Ipiyong ang imong mga mata ug handurawa ang nabanhaw nga Manluluwas nga kauban nimo panahon sa imong kalisdanan. Tubaga ang mosunod nga mga pangutana:
-
Asa man ang Manluluwas nga adunay relasyon kanimo sa panahon sa imong kalisdanan? Unsa kahay Iyang gihimo kon nag-uban pa Siya nimo?
-
Unsa kahay imong gihunahuna o gibati samtang naa duol kang Jesukristo?
-
Sa unsang paagi ang Iyang presensiya, gugma, ug suporta makatabang nimo nga madumala ug mabuntog ang imong emosyonal nga kaugtas [stress]?
-
Base sa imong nahibaloan bahin sa Manluluwas, unsa kahay Iyang ikasulti nimo? (Pwede kang mogamit og mga hugpong sa mga pulong gikan sa mga kasulatan nga Iyang giingon sa uban.) Unsa kahay Iyang ipabuhat kanimo? Kinsa kahay Iyang hangyoon nga duolon nimo para sa dugang tabang?
Dapita ang daghang grupo nga ipakigbahin ang ilang nahisgotan ug kon sa unsang paagi kini makatabang. Pwede nimong ipasabot nga kon bahin sa dagko o dugay na nga emosyonal nga mga hagit, ang mga estudyante kinahanglang mangayo og tabang ug giya sa mga ginikanan, mga lider sa Simbahan, ug lisensyadong mga propesyonal.
Ikonsiderar ang pagpangutana sa mosunod ug pagpakigbahin sa kaugalingon nimong pagbati bahin sa anaa nga kalig-on ug kahupayan nga gikan sa Langitnong Amahan ug kang Jesukristo:
-
Kanus-a nimo gibati o sa imong kaila ang tabang sa Manluluwas panahon sa usa ka emosyonal nga lisod nga sitwasyon?
-
Ngano sa imong hunahuna nga ang pagdangop sa Ginoo makapahimo nato nga mas lig-on sa emosyonal nga paagi?
Sa pagtapos, dapita ang mga estudyante nga isulat ang bisan unsang mga pagbati o mga impresyon nga ilang nadawat bahin sa Langitnong Amahan ug kang Jesukristo ug sa Ilang abilidad nga tabangan sila ug ang ilang mga minahal nga makatukod og emosyonal nga kalig-on.
Awhaga ang mga estudyante nga mosalig ni Jesukristo alang sa tabang ug kalig-on panahon sa emosyonal nga mga kalisdanan ug mga kapakyasan. Ang umaabot nga mga leksiyon magpunting sa piho nga mga paagi nga makapangayo sila og tabang sa Ginoo sa ilang mga hunahuna, kaugtas, kabalaka, depresyon, ug uban pa.