“Leksiyon 188—Pagsagubang sa Kaguol ug Depresyon: Ang Langitnong Amahan ug ang Iyang Anak, si Jesukristo, Makatabang Nato sa Pagbuntog sa Emosyonal nga mga Hagit sa Kinabuhi,” Manwal sa Magtutudlo sa Seminary sa Doktrina ug mga Pakigsaad (2025)
“Pagsagubang sa Kaguol ug Depresyon,” Manwal sa Magtutudlo sa Seminary sa Doktrina ug mga Pakigsaad
Leksiyon 188: Pisikal ug Emosyonal nga Kahimsog
Pagsagubang sa Kaguol ug Depresyon
Ang Langitnong Amahan ug ang Iyang Anak, si Jesukristo, Makatabang Nato sa Pagbuntog sa Emosyonal nga mga Hagit sa Kinabuhi
Misaad ang Manluluwas nga diha Kaniya makabaton kita og hingpit nga kalipay (tan-awa sa Doktrina ug mga Pakigsaad 101:36). Apan, ang mga yugto sa kagul-anan ug pagkawala sa kadasig normal nga bahin sa mortal nga kasinatian. Usahay makasinati pa gani ta og mas grabeng pagbati sa kawalay paglaom ug depresyon. Gihatagan kita sa Langitnong Amahan ug ni Jesukristo og mga kapanguhaan nga makatabang nato nga mopadayon uban ang hugot nga pagtuo panahon sa emosyonal nga kalisdanan. Kini nga leksiyon makatabang sa mga estudyante nga masabtan ang mga paagi nga sila makakuha og tabang para sa mga pagbati sa kaguol ug depresyon.
Posibleng mga Kalihokan sa Pagkat-on
Ang mga emosyon sama sa mga balod sa dagat
Hinumdomi: Makatabang tingali ang pagkahibalo nga dili kinahanglang eksperto ka niini nga hilisgotan aron matudlo kini nga leksiyon. Pag-ampo alang sa giya sa Espiritu Santo, sunda ang mga materyal, ug salig sa imong mga estudyante. Kon mangutana ang mga estudyante nga wala ka makahibalo kon unsaon pagtubag o kon ipakigbahin nila ang personal nga mga pakigbisog nga ilang giatubang, dapita sila nga tinguhaon ang tabang sa Ginoo, ilang mga ginikanan, mga lider sa Simbahan, ug mga propesyonal sa mental nga kahimsog.
Sa pagsugod, ipakita ang imahe o bidyo sa mga balod sa dagat. Ipakigbahin o i-summarize ang mosunod nga parapo.
Hunahunaa nga nagtindog ka sa baybayon ug nagtan-aw sa mga balod sa kadagatan. Ang mga balod sama sa atong mga pagbati. Ang pipila ka balod hinay nga mohampak sa imong mga tiil samtang nagtindog o nag-ubog sa tubig. Sa ubang panahon naa tingali ka sa mas lawom nga tubig, ug mas kusog tingali ang hapak sa mga balod kanimo o wala gani nimo damha nga maigo ka niini, hinungdan nga mawad-an ka og balanse. Usahay ang dagkong mga balod mahimong kusog nga mohapak kanimo ug basin sunodsunod pa gani. Tungod ini, maglisod tingali kag tindog ug matuk-an pa gani sa tubig o dili makaginhawa.
Paggahin og panahon sa pagpamalandong kon sa unsang paagi magamit kini nga sambingay sa emosyonal nga mga pakigbisog sama sa kaguol, pagkawala sa kadasig, ug depresyon.
Aron matabangan ang mga estudyante nga masusi ang ilang pagsabot niini nga hilisgotan, pwede nimong ihatag ang mosunod nga mga pamahayag aron ikonsiderar sa mga estudyante.
Pamalandonga sa mainampoong paagi ang mosunod nga mga pamahayag. Irekord sa imong journal kon unsa ka dako ang matabang sa matag pamahayag diha kanimo (gamit ang mga tubag nga “oo,” “sagad,” “medyo,” ug “dili gyod”).
-
Nakahibalo ko sa kalainan tali sa kaguol, pagkawala sa kadasig, ug depresyon.
-
Nasayod ko sa mga sinyales sa depresyon.
-
Nasayod ko kon asa mangayo og tabang kon ma-depress ko.
-
Nakahibalo ko kon unsaon ko pagtabang sa Langitnong Amahan ug ni Jesukristo kon maguol o ma-depress ko.
Kaguol ug depresyon
Tabangi ang mga estudyante nga masabtan nga ang kaguol ug pagkawala sa kadasig lisod apan mahinungdanon nga mga elemento sa atong paglambo. Mora kinig mas gagmayng balod, normal nga mga reaksyon sa mga hagit ug mga pagkadismaya sa kinabuhi. Ipasabot nga ang depresyon labaw pa kay sa simpleng pagkaguol. Ang depresyon kanunay ug naay negatibong epekto sa panghunahuna, pagbati, ug binuhatan sa usa ka tawo (sama sa mas dagkong balod). Ang mga simtomas sa depresyon naglakip sa padayon nga kaguol, pagkawalay paglaom, mga pagbati nga walay pulos, walay kusog, walay gana sa mga kalihokan nga ganahan nimo sa una, pagbati nga nakapabug-at lang sa mga tawo sa imong palibot, ug paghunahuna og kamatayon ug paghikog. Dugang pa, kon ang uban ma-depress mahimong mobati sila nga nababagan ang ilang abilidad sa pag-ila sa Espiritu. (Tan-awa sa “Pagsabot sa Kaguol ug Depresyon,” sa Pagkaplag og Kalig-on diha sa Ginoo: Emosyonal nga Kalig-on [2021], 75.)
Ang paghunahuna sa kaugalingon nimong kinabuhi, pamalandongi kon unsang klase sa mga balod ang maghulagway sa imong emosyonal nga kahimtang karon.
Samtang magtuon ka karon, mainampoong tinguhaa ang mga pag-aghat sa Espiritu nga tabangan ka ug kadtong imong nailhan nga nakasinati og kaguol ug depresyon.
Gihulagway sa Isaias 61:1–3 ang daghang paagi nga makatabang nato ang Manluluwas. Basaha kini nga mga bersikulo, nga mangita sa mga hugpong sa mga pulong nga para nimo mahimong makatabang sa usa ka tawo nga naguol o na-depress. Ang pulong nga “ako” niini nga mga bersikulo nagtumong kang Jesukristo, ang Mesiyas.
-
Unsa nga mga pulong o mga hugpong sa mga pulong ang makahuloganon para nimo? Unsay imong nadiskobrehan nga makatabang sa usa ka tawo nga nakigbisog sa kaguol o depresyon?
Mahimong hisgotan sa mga estudyante ang abilidad sa Manluluwas sa pagtabang, paghupay, ug pagbayaw sa masulob-on nga kasingkasing, niadtong nabihag o mibati nga nabihag, niadtong nagbangotan, ug niadtong mibati og espiritu sa kaguol.
Human mahatagi og higayon ang mga estudyante sa pagpakigbahin, ipakita ang mosunod nga pahayag ni Sister Reyna I. Aburto. Ang iyang pamahayag makatabang sa mga estudyante nga mahibaloan kon unsay ilang mahimo aron makakita og kahupayan.
Si Sister Reyna I. Aburto, kanhi Ikaduhang Magtatambag sa Kinatibuk-ang Kapangulohan sa Relief Society, mitudlo:
Sa Dag-um ug Kahayag, Ginoo, Ubani Ako!
Si Sister Aburto mipamatuod nga ang Manluluwas makatabang sa tanan nga anak sa Dios nga makalahutay sa mental ug pisikal nga mga kasakit.
Sama sa bisan unsang parte sa lawas, ang utok makasinati og mga sakit, truma ug pagka dili balanse sa kemikal. Kon ang atong mga pangisip nag-antos, angay nga mangayo og tabang gikan sa Dios, niadtong anaa sa atong palibot, ug gikan sa mga propesyonal sa medikal ug mental nga kahimsog. …
… Normal lang nga sa panagsa mobati og kaguol o kabalaka. Ang kaguol ug kabalaka natural nga tawhanong mga emosyon. Hinoon, kon kanunay kita nga maguol ug kon ang atong kasakit mobabag sa atong abilidad nga mobati sa gugma sa atong Langitnong Amahan ug sa Iyang Anak ug sa impluwensya sa Espiritu Santo, tingali nag-antus na kita sa depresyon, kabalaka, o lain nga emosyonal nga kondisyon. (Reyna I. Aburto, “Sa Dag-um ug Kahayag, Ginoo, Ubani Ako!,” Liahona, Nob. 2019, 57)
-
Unsang mga kamatuoran ang atong makat-onan gikan sa mensahe ni Sister Aburto?
Tabangi ang mga estudyante nga masabtan ang kamatuoran nga kon ang atong mga hunahuna mag-antos, kinahanglan kitang mangayo og tabang sa Dios, niadtong anaa sa atong palibot, ug sa mga propesyonal sa medikal ug mental nga kahimsog.
Pangayo og tabang sa Dios, sa uban, ug sa mga propesyonal
Aron matabangan ang mga estudyante nga mas masabtan kini nga baroganan, dapita sila nga piloon ang usa ka papel ngadto sa tulo ka seksiyon aron makahimo og pamphlet. Sa pamphlet, pwede nilang irekord ang ilang nakat-onan bahin sa pagpangayo og tabang para sa kaguol o depresyon. Makatabang tingali kini karon o sa umaabot para nila o sa ilang hinigugma. Pwedeng butangan sa mga estudyante og label ang tulo ka seksiyon nga “Pangayo og tabang sa Dios,” “Pangayo og tabang sa uban,” ug “Pangayo og tabang sa mga propesyonal.” Dayon ihatag ang handout nga giulohan og “Pagpangayo og Tabang.” Pwede ning himoon nga tagsa-tagsa o sa ginagmayng grupo ug isulat ang ilang mga tubag sa mga pangutana sa handout diha sa ilang mga pamphlet.
Pagpangayo og Tabang
Pangayo og tabang sa Dios
Ang Langitnong Amahan misaad og balaanong tabang aron makalahutay kita sa tanang mortal nga mga kalisdanan. Misaad siya og daghang paagi nga ang Iyang tabang moabot. Kon dili nato makita ang Iyang tabang sa usa ka paagi, importante kanunay nga dili kita moundang. Padayon sa pagpangayo. Naa ra Siya.
-
Unsay imong nahibaloan bahin sa Langitnong Amahan ug ni Jesukristo nga makahatag nimo og pagsalig nga matabangan ka Nila sa kaguol ug depresyon?
Basaha ang Jacob 2:8; Alma 26:27–28; Doktrina ug mga Pakigsaad 6:36; 136:29. Pangita og mga paagi nga makapangayo kita og tabang sa Ginoo kon kita maguol o ma-depress.
-
Unsay gitudlo niini nga mga bersikulo nga atong buhaton kon kita maguol o ma-depress?
-
Unsa ang pipila sa ubang mga paagi nga makapangayo kita og tabang sa Langitnong Amahan ug kang Jesukristo?
Kon dili ra kaayo personal, ipakigbahin ang imong kasinatian sa pagpangayo og tabang sa Langitnong Amahan ug kang Jesukristo.
Pangayo og tabang sa uban
Si Presidente Spencer W. Kimball mitudlo:
Ang Dios makakita kanato, ug iya kita nga pagabantayan. Apan sa kasagaran ipaagi niya kini sa uban aron iyang mahatag ang atong mga panginahanglan. (Mga Pagtulun-an sa mga Presidente sa Simbahan: Spencer W. Kimball [2006], 82)
Dihang kita maguol o ma-depress, kita mahimong matental nga mopalayo o ilain ang atong kaugalingon gikan sa uban. Sa pagbuhat niini mahimong malimitahan ang atong abilidad nga makita sa gipadala nga tabang kanato sa Langitnong Amahan. Ang pagdangop sa uban mahimong maglakip sa ang pagpakig-istorya sa mga ginikanan, sinaligang mga sakop sa pamilya, o mga lider sa Simbahan.
Paglista og duha o tulo ka butang nga angayng himoon sa usa ka tawo nga nanlimbasog sa pagdangop sa uban o sa pagtugot sa uban nga tabangan sila.
Kon dili ra kaayo personal, pagpakigbahin og panahon dihang gitabangan ka sa usa ka sakop sa pamilya o higala atol sa mga panahon sa kaguol o depresyon.
Pangayo og tabang sa mga propesyonal
Usa ka importanteng tinubdan sa tabang nga pwede natong pangitaon mao ang kaalam sa kasaligang mga tigsangkap [provider] sa medikal ug mental nga kahimsog. Hunahunaa ang gihimong pagkompara sa kaguol ug depresyon ngadto sa mga balod sa dagat ganina. Kon maguol ta (nag-atubang og mas gagmayng balod), kinahanglan natong sundon ang paggiya sa Espiritu Santo aron mahibalo kon kanus-a mangayo og propesyonal nga tabang. Apan, kon ma-depress ta o gusto nang maghikog (nag-atubang og mas dagkong balod), importante kaayo ang pagpangayo og propesyonal nga tabang.
Basaha kini nga pamahayag ni Elder Jeffrey R. Holland sa Korum sa Napulog Duha ka Apostoles, nga mangita kon unsay gihatag sa Langitnong Amahan aron sa pagtabang nato kon kita maglisod:
Pagpatambag sa mga eksperto nga sertipikado sa pagbansay, propesyonal nga mga kahanas, ug maayong mga hiyas. Isulti kanila ang tinuod ninyong kaagi ug mga panlimbasog. Mainampoon ug mabinantayong ikonsiderar ang tambag ug mga solusyon nga ilang gihatag. Kon kamo may appendicitis, ang Dios nagpaabut nga kamo mangayo og panalangin sa priesthood ug magpa-check up sa pinakamaayong doktor. Mao usab sa mga problema sa emosyon. Ang atong Amahan sa Langit naglaum nga kita mogamit sa tanang talagsaong gasa nga Iyang gihatag niining mahimayaong dispensasyon. (Jeffrey R. Holland, “Sama sa Usa ka Sudlanan nga Nabuak,” Liahona, Nob. 2013, 41)
Diha sa imong pamphlet, isulat ang usa ka bahin sa pamahayag ni Elder Holland nga makahuloganon para nimo.
-
Ngano sa imong hunahuna nga importante alang sa usa ka tawo nga mangayo og propesyonal nga tabang alang sa depresyon?
Tabangi ang mga estudyante nga mailhan kon asa sila moduol aron mangayo og propesyonal nga tabang. Ang mga ideya parehas ra ka yano sa pagpakig-istorya sa magtatambag sa eskwelahan, ginikanan, o sinaligan nga lider sa Simbahan aron tabangan sila nga mangita og haom nga propesyonal. Pwede nimong dapiton ang mga estudyante nga ilhon ang mga helpline o website sa paglikay sa paghikog diha sa inyong lugar (tan-awa sa suicide.ChurchofJesusChrist.org para sa mga helpline ug mga kapanguhaan). Pwede nilang isulat kini nga mga kapanguhaan diha sa ilang pamphlet. Pwedeng i-bookmark sa mga estudyante ang pahina sa paglikay sa paghikog gikan sa website sa Simbahan diha sa electronic device.
Ang mga kapanguhaan nga naghisgot bahin sa paghikog makita diha sa suicide.ChurchofJesusChrist.org ug sa “Dugang nga mga Kalihokan sa Pagkat-on” niini nga leksiyon.
Ang uban nga nanlimbasog sa depresyon mahimong mobati nga nagpabug-at lang sila sa uban ug bisan gani sa Ginoo. Tabangi ang mga estudyante nga mahinumdoman ang hingpit nga gugma, pailob, ug gahom sa Ginoo diha sa ilang kinabuhi ug nga gitinguha Niyang tabangan kita sa atong mga gipas-an. Pwede nimong mahigugmaong pahinumdoman ang mga estudyante nga naa gyoy paglaom kanunay alang ni bisan kinsa nga nakasinati og depresyon o naghunahuna nga maghikog.
Irebyo ang unsay imong nakat-onan
Dapita ang mga estudyante nga hisgotan kon nganong importante ang pagpangayo og tabang sa Dios, sa uban, ug sa mga propesyonal kon magsagubang og kaguol ug depresyon. Pwedeng ipakigbahin sa pipila ka estudyante ang ilang nakat-onan ug gibati karon, kon dili ra kaayo kini personal.
Dapita ang mga estudyante nga tinguhaon ang paggiya sa Espiritu Santo samtang ilang kompletohon ang mosunod.
Isulat ang mosunod diha sa inyong journal sa pagtuon o sa inyong pamphlet:
-
Unsay imong buhaton aron mangayo og tabang sa Ginoo kon ikaw naguol o na-depress (kini mahimong maglakip sa mga kasulatan nga imong basahon o sagrado nga musika nga makahatag nimo og paglaom)
-
Unsay imong buhaton aron makadangop sa uban kon mobati ka nga naguol o na-depress
-
Unsay imong himoon aron tabangan ang usa ka tawo nga naguol o na-depress
-
Unsay imong isulti sa usa ka tawo nga nanlimbasog ug naghunahuna kon angay ba siyang mangita og usa ka magtatambag para sa kahimsog sa pangisip
Ikonsiderar ang pagpahinumdom sa mga estudyante nga ang Langitnong Amahan ug si Jesukristo “pahiran [ang atong mga] luha” (Pinadayag 21:4) ug “mogakos [kanato] sa mga bukton sa [Iyang] gugma.” (Doktrina ug mga Pakigsaad 6:20).