Դաս 182. Զարգացնել ինքնապաhովում

Խելամիտ կառավարեք ֆինանսական միջոցները

Ձգտեք զարգացնել ֆինանսական ինքնապահովում

Երիտասարդներն ունեն ապագայի բազմաթիվ հնարավորություններ, որոնք կապված են ֆինանսական պարտականությունների հետ, օրինակ՝ միսիա ծառայելը, կրթություն ստանալը կամ ընտանիք կազմելը: Նայելով Հիսուս Քրիստոսին և հետևելով ֆինանսների խելամիտ կառավարման սկզբունքներին՝ նրանք հրավիրում են Աստծո օրհնությունը՝ իրենց կարիքներն ապահովելու համար (տես Վարդապետություն և Ուխտեր 104.15)։ Այս դասը կօգնի ուսանողներին հասկանալ, թե ինչպես հավատք գործադրել առ Աստված՝ զարգացնելով ֆինանսական ինքնապահովում:

Հնարավոր ուսումնական վարժություններ

Նայել դեպի ապագա

Առաջարկեք ուսանողներին զույգերով կամ փոքր խմբերով կիսվել այն հիմնական նպատակներով, որ իրենք կարող են ունենալ առաջիկա 10 կամ 15 տարվա ընթացքում: Օրինակ՝ նրանք կարող են կիսվել, թե արդյոք նախատեսում են միսիա ծառայել, որտեղ կցանկանային շարունակել իրենց կրթությունը կամ ինչ ցանկություններ ունեն ամուսնության և ընտանիքի հետ կապված: Երբ ուսանողները կիսվեն, դասարանով քննարկեք հետևյալ հարցերը․

• Ձեր նպատակներից ո՞րն է պահանջում ֆինանսական նախապատրաստություն:

• Ձեր կարծիքով, ե՞րբ է լավագույն ժամանակը ձեր ապագայի համար ֆինանսական պլաններ կազմելու համար: Ինչո՞ւ։

  Կարող եք պատրաստվել՝ համառոտ ներկայացնելու միսիա ծառայելու, կրթություն ստանալու կամ ձեր տարածաշրջանում ապրելու ընդհանուր ծախսերը։ (Հիշեք, որ այս դասի նպատակը ոչ թե նախահաշվարկ կատարելն է, թե որքան արժե այս կամ այն նպատակի իրագործումը, այլ օգնելն է ուսանողներին՝ հավատարմորեն նայել դեպի Հիսուս Քրիստոսը և ծանոթ լինել ֆինանսական տնտեսվարման հիմնական սկզբունքներին:)

  Ուսանողներին առաջարկեք սուրբ գրությունների ուսումնասիրության իրենց օրագրերում պատասխանել ստորև ներկայացվող հարցին.

• Որքանո՞վ եք վստահ ձեր ֆինանսական ապագայի վերաբերյալ։ Ինչո՞ւ։

Այս դասի ողջ ընթացքում աղոթքով փնտրեք Երկնային Հոր օգնությունը՝ հասկանալու այն սկզբունքները, որոնք կարող են օգնել ձեզ խելամտորեն կառավարել ձեր ֆինանսները ներկայումս և ապագայում:

Խոստումներ Տիրոջից

1834 թվականին Եկեղեցին ֆինանսական դժվարություններ ուներ՝ մասամբ Կիրթլենդի տաճարի կառուցման և այլ արդար ջանքերի պատճառով: Տերը նրանց խորհուրդ տվեց, որը կարող է կիրառվել նաև մեզ համար, երբ մենք ֆինանսական պարտավորությունների առաջ ենք կանգնում՝ մեր արդար նպատակներին հասնելու համար:

Կարդացեք Վարդապետություն և Ուխտեր 104․13–17, 78–79 հատվածները: Մտածեք, թե ինչպես են Տիրոջ ուսմունքներն առնչվում ձեր ֆինանսների հետ:

• Ի՞նչ սովորեցիք, որը կարող է կիրառվել մեր ֆինանսական կարիքներն ապահովելու համար:

• Ո՞ր բառերը կամ արտահայտությունները կարող են օգնել մարդուն վստահել Տիրոջը՝ իր ֆինանսները տնօրինելիս:

  Ուսանողները կարող են կիսվել տարբեր մտքերով, ներառյալ հետևյալ ճշմարտությունը. Տերը կապահովի մեր կարիքները, եթե մենք հավատարմորեն հետևենք Նրա խորհրդին:

• Ինչո՞ւ է այս ճշմարտությունը քաջալերող, երբ փորձում եք ֆինանսապես պատրաստվել ձեր ապագային:

Անհրաժեշտության դեպքում օգնեք ուսանողներին հասկանալ, որ Տերը չի խոստանում, որ դուք չեք ունենա ֆինանսական կամ այլ դժվարություններ: Սակայն, Տերը գիտի, թե դուք ինչի կարիք ունենք. երբ մենք հավատարիմ լինենք, Նա կապահովի մեզ՝ համաձայն Իր կամքի և Իր ժամանակի:

Տիրոջ ֆինանսական սկզբունքները

Բացատրեք, որ սուրբ գրությունների և Իր Եկեղեցու ղեկավարների միջոցով Տերը խորհուրդ է տվել մեզ, որպեսզի օգնի խելամիտ օգտագործել մեր երկրային օրհնությունները, այդ թվում՝ մեր ֆինանսները։ Որպեսզի օգնեք ուսանողներին հասկանալ Տիրոջ խորհուրդը, կարող եք առաջարկել նրանց ուսումնասիրության համար ընտրել ստորև նշված հատվածներից մեկը: Երբ նրանք ավարտեն, տարբեր հատվածներ ուսումնասիրած ուսանողները կարող են կիսվել իրենց սովորածով:

Կարդացեք հետևյալ հատվածները և նշեք այն սկզբունքները, որոնք Տերն ուսուցանում է և որոնք կարող են օգնել դեռահասներին պատրաստվել իրենց ֆինանսական ապագային:

• Մաղաքիա 3.8–10

• Ա Տիմոթեոս 6․10

• 2 Նեփի 9․51

• Հակոբ 2.18–19

• Վարդապետություն և Ուխտեր 48․4 (Այդ պահին Սրբերին անհրաժեշտ էր հող գնել, բայց մենք կարող ենք սա կիրառել մեր ապագա պարտականությունների համար:)

Երբ ուսանողներն ավարտեն միմյանց հետ կիսվելը, կարող եք տալ հետևյալ հարցերը.

• Այս սուրբ գրությունների սկզբունքներն ինչպե՞ս կարող են օգնել ձեզ դրսևորել հավատք առ Հիսուս Քրիստոս, երբ դուք պատրաստվում եք ապահովել ձեր ֆինանսական կարիքները:

• Ձեր կարծիքով, տասանորդ վճարելն ինչո՞ւ է մեր ֆինանսները կառավարելու կարևոր մաս հանդիսանում (տես Մաղաքիա 3․8–10):

• Բացի տասանորդ վճարելուց, ի՞նչ եղանակներով մենք կարող ենք առաջնահերթություն տալ Աստծո արքայությունը փնտրելուն, այլ ոչ՝ հարստություն փնտրելուն:

• Երիտասարդ տարիքում գումար խնայելու սովորություն ձևավորելն ինչպե՞ս կարող է օրհնել ձեզ ողջ կյանքում:

Ֆինանսական առաջնահերթություններ

Հետևյալ նկարները ներկայացնում են ֆինանսների հետ կապված իրադարձություններ կամ որոշումներ: Ուսանողներին հնարավորություն տալով ուսումնասիրել այս իրադարձությունների կամ որոշումների հաջորդականությունը՝ կարող եք օգնել նրանց որոշել իրենց առաջնահերթությունները՝ ֆինանսական որոշումներ կայացնելիս: Կարող եք տպել պատկերները, կտրել հինգ կատեգորիաներից յուրաքանչյուրը և պատահական կարգով փակցնել դրանք գրատախտակին: Առաջարկեք ուսանողներին քննարկել, թե իրենց կարծիքով ինչ հերթականությամբ պետք է դասավորված լինեն այդ կատեգորիաները: Մեկ այլ տարբերակ է տպել և կտրել այս նկարի օրինակները բավարար քանակով, որպեսզի ուսանողների փոքր խմբերում դասավորեն դրանք և միասին քննարկեն: Օգտակար կլինի նշել, որ թեև թվում է, թե ակնհայտ է, որ իրական կյանքում եկամուտ ստանալը պետք է առաջնային լինի, շատ մարդիկ պարտք են վերցնում և գումար ծախսում՝ նախքան եկամուտ ստանալը: Դա կոչվում է պարտք, և մենք պետք է ձգտենք խուսափել դրանից։

Որպես այլընտրանք, կարող եք առաջարկել ուսանողներին գրատախտակին գրել այն ընդհանուր ծախսերը, որոնք իրենք ներկայումս ունեն կամ կարող են ունենալ ապագայում: Ուսանողներին կարող եք առաջարկել դասարանով կամ խմբերով ծախսերը դասակարգել ըստ առաջնահերթության՝ ամենակարևորից մինչև քիչ կարևորը՝ օգտագործելով այն սկզբունքները, որ իրենք նոր սովորեցին վերը նշված սուրբգրային վարժության ընթացքում:

• Ինչպիսի՞ առաջնահերթությամբ կդասավորեք այս ֆինանսական իրադարձությունները կամ որոշումները: Ի՞նչ սովորեցիք սուրբ գրություններում պարունակվող Տիրոջ ուսմունքներից՝ ձեր պատասխանը կազմելու համար:

• Ի՞նչ խնդիրներ կարող են առաջանալ մեր ֆինանսական առաջնահերթությունները խախտելու արդյունքում:

• Ի՞նչ կարող եք ասել այն մարդուն, որը կարծում է, որ իր ընթացիկ կեցության ծախսերը պետք է տասանորդ վճարելուց առաջնահերթ լինեն:

Խնդրեք ուսանողներին կիսվել, թե ինչպես է Տերն օրհնել իրենց կամ իրենց ընտանիքի անդամներին, որոնք տասանորդի վճարումն այլ ծախսերից առաջնահերթ են համարել։ Որպես մեկ այլ օրինակ, դուք կարող եք կիսվել Յոթանասունից երեց Վալերի Վ. Քորդոնի փորձառությամբ, որը ներկայացված է իր՝ «Ավետարանի լեզուն» ելույթում, 6:10-7:40, հասանելի է ChurchofJesusChrist.org կայքում։

Ավետարանի լեզուն

Քննարկեք երեց Սթենլի Գ. Էլիսի՝ ստորև բերված խոսքերը:

Եթե օգտակար լինի, կարող եք ժամանակ հատկացնել՝ ուսանողներին ուսուցանելու, թե ինչպես վճարել տասանորդը և կատարել նվիրաբերություններ տասանորդի ձևաթղթով կամ առցանց՝ donations.ChurchofJesusChrist.org կայքում։

Յոթանասունից երեց Սթենլի Գ. Էլիսը հետևյալ հարցն է տվել տասանորդ վճարելու վերաբերյալ․

Արդյո՞ք մենք ունենք հավատք՝ վստահելու [Տիրոջ] խոստումներին տասանորդի հետ կապված՝ ընդունելով, որ մեր եկամտի 90 տոկոսով և Տիրոջ օգնությամբ մենք ավելին կստանանք, քան մեր վաստակած 100 տոկոսով։ (Ստենլի Ջ. Էլիս, «Արդյոք մենք վստահո՞ւմ ենք Նրան Որքան դժվար, այնքան լավ», Լիահոնա, նոյեմբեր 2017, 114)

Ուսանողներին այս դասի սկզբունքներով ապրող մարդկանց օրինակ ցույց տալու համար կիսվեք «Sedrick’s Journey» տեսանյութով (2:32), որը հասանելի է ChurchofJesusChrist.org կայքում:

Sedrick’s Journey

Կարող եք օգնել ուսանողներին հասկանալ, որ մեր ֆինանսական ապագայի ապահովմանն օգնելու համար Տերը տրամադրել է եղանակներ, որոնք ներկայացված չեն այս դասում: Օրինակ, Նա կարող է ոգեշնչել մեզ գումար վաստակել կամ խնայել այլ եղանակներով: Երիտասարդները կարող են խոսել իրենց եպիսկոպոսի կամ ղեկավարների հետ՝ միսիայի համար ֆինանսական օգնության կամ բարձրագույն կրթություն ստանալու հասանելի եղանակների մասին:

Եզրափակում

Ուսանողներին կարող եք առաջարկել իրենց ուսումնասիրության օրագրերում պատասխանել հետևյալ հարցերին կամ քննարկել դրանք դասընկերոջ հետ.

• Ինչպե՞ս կամփոփեիք այն, ինչ դուք սովորեցիք ձեր ֆինանսները խելամիտ կառավարելու մասին։

• Ձեր կարծիքով, ի՞նչ է Տերն ուզում, որ դուք սովորեք այսօր:

Մի քանի ուսանողների առաջարկեք կիսվել իրենց պատասխաններով։ Կիսվեք ձեր վկայությամբ՝ Իր Սրբերին ապահովելու Տիրոջ ցանկության մասին (տես Վարդապետություն և Ուխտեր 104․15)։ Խրախուսեք ուսանողներին նայել Աստծուն և ողջ կյանքի ընթացքում ներգրավել Նրան իրենց ֆինանսական որոշումներում:

Լրացուցիչ նյութեր

Որտեղի՞ց կարող եմ ավելին իմանալ ֆինանսները խելամիտ կառավարելու մասին։

• Personal Finances for Self-Reliance (2016), ChurchofJesusChrist.org

• «Finances», ChurchofJesusChrist.org

• Թեմաներ և հարցեր, «Family Finances», topics.ChurchofJesusChrist.org

Արդյո՞ք ինձնից ակնկալվում է, որ ես վճարեմ տնից հեռու միսիա ծառայելու ծախսերը:

Ֆինանսական զոհաբերությունը միսիոներական ծառայության մի մասն է (տես Մարկոս 1․17–18, Ալմա 15․16): Միսիոներները և նրանց ընտանիքները միսիոներական ծառայությանը ֆինանսապես նպաստելու առաջնային պատասխանատվություն են կրում: Նրանք պետք է համապատասխան պատրաստություն և զոհաբերություն կատարեն։ Նրանք պետք է ֆինանսապես ինքնապահով լինեն որքանով հնարավոր է՝ կատարելու ներդրումների պարտավորությունները։ …

Նրանք, ովքեր ֆինանսական օգնության կարիք ունեն՝ ակնկալվող ներդրումների պարտավորությունները կատարելու համար, կարող են այն ստանալ հարազատների և ընկերների կողմից:

Եթե դեռ կարիք կլինի, եպիսկոպոսը կամ ցցի նախագահը կարող է խնդրել ծխի կամ ցցի անդամներին ներդրում անել ծխի միսիոներական ֆոնդում: (Ընդհանուր ձեռնարկ. Ծառայել Հիսուս Քրիստոսի Վերջին Օրերի Սրբերի Եկեղեցում, 24.3.4, 24.3.4.1, ChurchofJesusChrist.org)

Ինչպե՞ս կարող եմ ավելի խելամիտ ծախսել իմ գումարը:

Տասներկու Առաքյալների Քվորումից երեց Ռոբերտ Դ. Հեյլսը (1932–2017) ուսուցանել է.

Ամեն անգամ, երբ մենք ցանկանում ենք անել կամ ունենալ որևէ բան, որը ազդեցություն է ունենալու մեզ և մեր ռեսուրսների վրա, կարող ենք հարցնել ինքներս մեզ. «Արդյո՞ք օգուտը ժամանակավոր է, թե՞ այն կունենա հավերժական արժեք և նշանակություն»: Այս հարցերին ճշմարիտ պատասխանելը կօգնի մեզ խուսափել ավելորդ պարտքերից և կախվածություն առաջացնող այլ գործողություններից: (Ռոբերտ Դ․ Հեյլս, «Becoming Provident Providers», Լիահոնա, մայիս 2009, 10)

Նախագահ Գորդոն Բ. Հինքլին (1910–2008) ուսուցանել է.

Նայեք ձեր ֆինանսական վիճակին: Ես հորդորում եմ ձեզ համեստ լինել ձեր ծախսերի մեջ, կարգապահ լինել գնումների մեջ և հնարավորինս խուսափել պարտքերից: Վճարեք ձեր պարտքերը որքան կարող եք արագ և ազատեք ձեզ գերությունից: (Գորդոն Բ. Հինքլի, «To the Boys and to the Men», Ensign, նոյեմբեր 1998, 54)

Կա՞ն դեպքեր, երբ ես պետք է մտածեմ պարտքեր անելու մասին:

Կախված հանգամանքներից, պարտքը կարող է ընդունելի լինել հետևյալ ծախսերի համար.

• Համեստ և մատչելի տան համար

• Խելամիտ ծախսեր կրթության վրա, որի արդյունքում ավելի լավ աշխատանք կունենաք

• Համեստ, հիմնական տրանսպորտային միջոցի համար (միայն անհրաժեշտության դեպքում)

Դուք պետք է հնարավորինս խուսափեք այս կետերում նշվածներից բացի այլ բաների համար պարտք վերցնելուց։ Փոխարենը՝ խնայողաբար ծախսեր կատարեք։ (Personal Finances for Self-Reliance [2016], 114)

Օժանդակ ուսումնական վարժություններ

Հասկանալ պարտքը

Առաջարկեք ուսանողներին պատմել Մորմոնի Գրքի առաջին հրատարակության մանրամասները: Անհրաժեշտության դեպքում հիշեցրեք նրանց, որ Մարտին Հարրիսը պարտքով գումար վերցրեց, որպեսզի օգնի վճարել Մորմոնի Գրքի տպագրության համար:

Առաջարկեք ուսանողներին կարդալ Վարդապետություն և Ուխտեր 19․35 հատվածը՝ փնտրելով այն հրահանգները, որոնք Տերն այդ ժամանակ տվեց Մարտին Հարրիսին:

• Ձեր կարծիքով, ինչպե՞ս է պարտքը մեզ գերության մեջ գցում:

Անհրաժեշտության դեպքում օգնեք ուսանողներին հասկանալ, որ պարտքը փոխառված գումար է, որը ձերը չէ: Սովորաբար, այն ուղեկցվում է ծախսերով, որոնք կոչվում են տոկոսներ։ Տոկոսները կազմում են վերցված պարտքի գումարի որոշակի տոկոսային մասը։ Պարտք վերցնելիս ակնկալվում է կատարել վճարումներ, իսկ ընդհանուր ակնկալիքն այն է, որ դուք կվերադարձնեք պարտքի ողջ գումարը՝ գումարած տոկոսները։ Վերջում, դուք ձեր փոխառած գումարից ավելի եք վճարում, երբեմն շատ ավելի։ Երբ պարտքերը մարված են, մենք ազատություն ունենք ընտրելու, թե ինչպես ծախսել մեր գումարը, և ավելի շատ հնարավորություն ունենք օգնելու ինքներս մեզ, մեր ընտանիքներին կամ կարիքավորներին:

Կիսվեք Տասներկու Առաքյալների Քվորումից երեց Ուլիսես Սոարեսի հետևյալ պատմությունով․

Տիրոջ հետ գործընկերության մեջ

Մեր ամուսնության առաջին մի քանի ամիսների ընթացքում սիրելի կինս ցանկություն հայտնեց նվագել սովորել։ Նպատակ ունենալով գոհացնել նրան՝ ես որոշեցի մի մեծ, սրտառուչ անակնկալ կազմակերպել իմ սիրելիի համար: Ես գնացի երաժշտական գործիքների խանութ և նրա համար մի դաշնամուր գնեցի՝ որպես նվեր։ Գնման անդորրագիրը ոգևորված դրեցի գեղեցիկ ժապավենով տուփի մեջ և տվեցի նրան՝ ակնկալելով, որ նա շատ շնորհակալ կլինի իր չափազանց սիրող և ուշադիր ամուսնուց:

Երբ նա բացեց այդ փոքրիկ տուփը և տեսավ դրա պարունակությունը, սիրով նայեց ինձ և ասաց. «Օ, սիրելիս, դու հրաշալի ես: Բայց մի հարց տամ՝ սա նվե՞ր է, թե՞ պարտք»։ Անակնկալի մասին միասին խորհրդակցելուց հետո մենք որոշեցինք չեղարկել գնումը: Մենք ապրում էինք ուսանողական բյուջեով, ինչպես շատ երիտասարդ նորապսակներ։ (Ուլիսես Սոարես «Տիրոջ հետ գործընկերության մեջ», Լիահոնա, նոյ․ 2022, 42)

• Ի՞նչ ընտրություններ կարող են անել երիտասարդները հիմա, որոնք թույլ կտան նրանց խուսափել անհարկի պարտքերից ապագայում:

Տերը ճանապարհ կպատրաստի

Եթե ուսանողները անվստահ են իրենց ֆինանսական ապագայի հանդեպ, կարող եք առաջարկել նրանց կարդալ 1 Նեփի 3․7 հատվածը։

• Ինչպե՞ս կարող են այս հատվածի ուսմունքները կիրառվել այն ֆինանսների վերաբերյալ, որոնք անհրաժեշտ են՝ իրականացնելու այն, ինչ Տերը պատվիրել է մեզ:

Կարող եք կիսվել ձեր վկայությամբ կամ պատմությունով, որպեսզի ցույց տաք Տիրոջ կարողությունը՝ ճանապարհ պատրաստելու մեզ համար, որպեսզի կատարենք մեր ֆինանսական պարտականությունները: