Lesson 182: Pagkakaroon ng Pag-asa sa Sariling Kakayahan o Self-Reliance

Matalinong Pamamahala ng Pinansyal na Resources

Pagsisikap na Maging Self-Reliant sa Pinansyal

Ang kabataan ay maraming pagkakataon sa hinaharap kung saan magkakaroon sila ng pinansyal na mga responsibilidad, tulad ng paglilingkod sa isang misyon, pag-aaral, o pagsisimula ng pamilya. Habang umaasa sila kay Jesucristo at sinusunod ang matalinong mga alituntunin sa pananalapi, inaanyayahan nila ang pagpapala ng Diyos na maglaan para sa kanilang mga pangangailangan (tingnan sa Doktrina at mga Tipan 104:15). Ang lesson na ito ay makatutulong sa mga estudyante na maunawaan kung paano sumampalataya sa Diyos habang nagsisikap sila na maging self-reliant sa pinansyal.

Mga Posibleng Aktibidad sa Pag-aaral

Pagtingin sa hinaharap

Nang magkakapartner o sa maliliit na grupo, anyayahan ang mga estudyante na magbahagi ng mga pangunahing mithiin na maaaring mayroon sila sa susunod na 10 o 15 taon. Halimbawa, maaari nilang ibahagi kung plano nilang magmisyon, kung saan nila gustong ipagpatuloy ang kanilang pag-aaral, o ang kanilang mga hangarin hinggil sa kasal at pamilya. Matapos magbahagi ang mga estudyante, maaari mong talakayin sa klase ang mga sumusunod na tanong:

• Alin sa inyong mga mithiin ang nangangailangan ng pinansyal na paghahanda?

• Sa inyong palagay, kailan ang pinakamainam na panahon upang simulan ang paggawa ng mga plano sa pananalapi para sa inyong hinaharap? Bakit?

  Maaari kang maghanda na maikling ibahagi ang mga karaniwang gastusin sa pagmimisyon, pag-aaral at paninirahan sa inyong lugar. (Tandaan na ang layunin ng lesson na ito ay hindi para kwentahin kung magkano ang lahat ng gagastusin kundi tulungan ang mga estudyante na matapat na umasa kay Jesucristo at malaman ang ilang pangunahing alituntunin ng pangangasiwa sa pananalapi.)

  Anyayahan ang mga estudyante na sagutin ang mga sumusunod na tanong sa kanilang study journal:

• Gaano kalaki ang kumpiyansa mo tungkol sa iyong pinansyal sa hinaharap? Bakit?

Sa buong lesson na ito, mapanalanging hingin ang tulong ng Ama sa Langit upang maunawaan ang mga alituntunin na makatutulong sa inyo ngayon at sa hinaharap upang matalinong mapamahalaan ang inyong pananalapi.

Mga pangako mula sa Panginoon

Noong 1834, kinakapos sa salapi ang Simbahan, at isa sa mga dahilan nito ang pagtatayo ng Kirtland Temple at iba pang matwid na gawain. Pinayuhan sila ng Panginoon na naaangkop din sa atin kapag nahaharap tayo sa pinansyal na mga obligasyon sa pagkamit ng ating mga matwid na hangarin.

Basahin ang Doktrina at mga Tipan 104:13–17, 78–79. Isipin kung paano nauugnay ang mga turo ng Panginoon sa inyong pananalapi.

• Ano ang natutuhan ninyo na maiaangkop sa ating mga pangangailangang pinansyal?

• Anong mga salita o parirala ang makatutulong sa isang tao na magtiwala sa Panginoon habang pinamamahalaan nila ang kanilang pinansyal na resources?

  Maaaring magbahagi ang mga estudyante ng iba’t ibang ideya, kabilang na ang sumusunod na katotohanan: Ibibigay ng Panginoon ang ating mga pangangailangan kung tapat nating susundin ang Kanyang payo.

• Bakit maaaring nakahihikayat ang katotohanang ito habang sinisikap ninyong maghanda sa pinansyal para sa inyong hinaharap?

Kung kinakailangan, tulungan ang mga estudyante na maunawaan na hindi nangangako ang Panginoon na hindi natin mararanasan ang pinansiyal na kagipitan o iba pang paghihirap. Gayunpaman, alam ng Panginoon kung ano ang kailangan natin; kapag tayo ay tapat, maglalaan Siya para sa atin ayon sa Kanyang kalooban at takdang panahon.

Ang mga alituntunin ng Panginoon sa pananalapi

Ipaliwanag na sa pamamagitan ng mga banal na kasulatan at lider ng Kanyang Simbahan, nagbigay ang Panginoon ng payo upang tulungan tayong matalinong gamitin ang ating mga pagpapala sa lupa, kabilang na ang ating pinansyal resources. Upang matulungan ang mga estudyante na maunawaan ang payo ng Panginoon, maaari mo silang anyayahang pumili ng isa sa mga sumusunod na scripture passage na pag-aaralan. Kapag tapos na sila, maaari silang magtipon kasama ang ibang estudyante na pinag-aralan ang ibang passage at ibahagi ang natutuhan nila.

Basahin ang mga sumusunod na talata at tukuyin ang mga alituntuning itinuturo ng Panginoon na makatutulong sa isang tinedyer na maghanda sa pinansyal sa kanyang hinaharap.

• Malakias 3:8–10

• 1 Timoteo 6:10

• 2 Nephi 9:51

• Jacob 2:18–19

• Doktrina at mga Tipan 48:4 (Sa panahong ito, kinailangang bumili ng lupain ang mga Banal, ngunit maaari natin itong ihalintulad sa sarili nating mga responsibilidad sa hinaharap.)

Kapag natapos nang magbahagi ang mga estudyante sa isa’t isa, maaari mong itanong ang tulad ng mga sumusunod:

• Paano makatutulong sa inyo ang mga alituntuning ito sa mga banal na kasulatan na sumampalataya kay Jesucristo habang naghahanda kayo para sa inyong mga pangangailangang pinansyal?

• Sa inyong palagay, bakit mahalagang bahagi ng pamamahala ng ating pananalapi ang pagbabayad ng ikapu? (tingnan sa Malakias 3:8–10).

• Bukod sa pagbabayad ng ikapu, ano ang ilang paraan na maaari nating unahin ang paghahangad ng kaharian ng Diyos kaysa sa paghahangad ng mga kayamanan?

• Paano kayo mapagpapala sa buong buhay ninyo ng pagkakaroon ng ugaling pag-iimpok ng pera habang tinedyer pa kayo?

Mga priyoridad sa pananalapi

Ang mga sumusunod na larawan ay kumakatawan sa mga pangyayari o desisyong may kaugnayan sa pananalapi. Ang pagbibigay ng pagkakataon sa mga estudyante na pag-isipan ang pagkakasunud-sunod ng mga pangyayari o desisyong ito ay makatutulong sa kanila na mahiwatigan ang mga priyoridad kapag gumagawa ng mga desisyon sa pananalapi. Maaari mong i-print ang mga larawan, gupitin ang bawat isa sa limang kategorya, at idikit ang mga ito sa pisara nang hindi sunud-sunod. Sabihin sa mga estudyante na talakayin ang sa palagay nilang dapat na pagkakasunud-sunod ng mga kategorya. Ang isa pang opsiyon ay mag-print at gumupit ng sapat na kopya ng graphic na ito na aayusin ayon sa pagkakasunud-sunod at tatalakayin nang magkakasama ng maliliit na grupo ng mga estudyante. Maaaring makatulong na ipaliwanag na bagama’t malinaw na dapat matanggap muna ang suweldo sa tunay na buhay, maraming tao ang nanghihiram at gumagastos na ng pera bago pa sumuweldo. Utang ang tawag dito, at dapat nating sikaping iwasan ito.

Bilang alternatibo, maaari mong sabihin sa mga estudyante na ilista sa pisara ang mga karaniwang gastusin nila ngayon o maaari gastusin sa hinaharap. Bilang isang klase o grupo, maaaring anyayahan ang mga estudyante na isaayos ang mga gastusin mula sa pinakamahalaga hanggang sa pinakahindi mahalaga, gamit ang mga alituntuning natutuhan nila sa naunang aktibidad sa pag-aaral ng banal na kasulatan.

• Paano ninyo ipaprayoridad ang mga kaganapan o desisyong ito tungkol sa pananalapi? Ano ang natutuhan ninyo sa mga turo ng Panginoon sa mga banal na kasulatan na susuporta sa inyong sagot?

• Anong mga hamon ang maaaring idulot ng hindi pagkakasunod-sunod ng ating mga priyoridad sa pananalapi?

• Ano ang maaari ninyong sabihin sa isang tao na nakadarama na dapat niyang unahing bayaran ang mga gastusin kaysa sa pagbabayad ng ikapu?

Maaari mong hilingin sa mga estudyante na ibahagi kung paano sila napagpala ng Panginoon o ang kanilang mga kapamilya nang unahin nila ang ikapu kaysa sa iba pang gastusin. Bilang isa pang halimbawa, maaari mong ibahagi ang karanasan ni Elder Valeri V. Cordón ng Pitumpu sa kanyang mensaheng “Ang Wika ng Ebanghelyo” mula sa time code na 6:10 hanggang 7:40, na makikita sa ChurchofJesusChrist.org.

Maaari mong talakayin ang pahayag sa ibaba mula kay Elder Stanley G. Ellis.

Kung makatutulong, maaari kang maglaan ng oras na turuan ang mga estudyante kung paano magbayad ng ikapu at mga handog gamit ang tithing slip o online sa donations.ChurchofJesusChrist.org.

Tinanong ni Elder Stanley G. Ellis ng Pitumpu ang sumusunod tungkol sa pagbabayad ng ikapu:

May pananampalataya ba tayong magtiwala sa mga pangako [ng Panginoon] tungkol sa ikapu na ang 90 porsiyento ng ating kita na dinagdagan ng tulong ng Panginoon ay mas makakabuti sa atin kaysa 100 porsiyento ng ating taunang kita na tayo lang mag-isa? (Stanley G. Ellis, “Nagtitiwala ba Tayo sa Kanya? Ang Mahirap ay Mabuti,” Liahona, Nob. 2017, 114.)

Upang maipakita sa mga estudyante ang isang halimbawa ng mga taong namumuhay ayon sa mga alituntunin sa lesson na ito, maaari mong ibahagi ang “Sedrick’s Journey” (2:32) na makikita sa ChurchofJesusChrist.org.

Maaari mong tulungan ang mga estudyante na maunawaan na ang Panginoon ay nagbigay ng mga paraan upang makatulong sa ating pananalapi sa hinaharap na hindi inilarawan sa lesson na ito. Halimbawa, maaari Niya tayong bigyan ng inspirasyon sa iba pang paraan upang kumita o mag-impok ng pera. Maaaring kausapin ng kabataan ang kanilang bishop o mga lider para sa tulong-pinansyal para sa misyon o abot-kayang mga paraan upang magpatuloy sa pag-aaral sa kolehiyo o unibersidad.

Pangwakas

Maaaring anyayahan ang mga estudyante na sagutin ang mga sumusunod na tanong sa kanilang study journal o talakayin ang mga ito sa isang kapartner:

• Paano mo ibubuod ang natutuhan mo tungkol sa matalinong pamamahala ng iyong pananalapi o pinansyal na resources?

• Ano ang isang bagay na sa palagay mo ay nais ng Panginoon na matutuhan mo ngayon?

Maaari mong anyayahan ang ilang estudyante na ibahagi ang kanilang mga sagot. Ibahagi ang iyong patotoo tungkol sa hangarin ng Panginoon na maglaan para sa Kanyang mga Banal (tingnan sa Doktrina at mga Tipan 104:15). Hikayatin ang mga estudyante na umasa sa Diyos at isali Siya sa mga desisyon tungkol sa pananalapi sa buong buhay nila.

Karagdagang Resources

Saan ko malalaman pa ang tungkol sa matalinong pamamahala ng pananalapi o pinansyal na resources?

• Personal na Pera para Maging Self-Reliant (2016), ChurchofJesusChrist.org

• “Pananalapi,” ChurchofJesusChrist.org

• Topics and Questions, “Family Finances,” topics.ChurchofJesusChrist.org

Inaasahan bang ako ang magbabayad ng mga gastusin sa pagmimisyon na malayo sa tahanan?

Ang sakripisyong pinansyal ay bahagi ng paglilingkod bilang missionary (tingnan sa Marcos 1:17–18; Alma 15:16). Ang mga missionary at kanilang mga pamilya ang may pangunahing responsibilidad na mag-ambag ng salapi para sa kanilang paglilingkod bilang missionary. Dapat silang gumawa ng angkop na paghahanda at sakripisyo. Dapat silang maging self-reliant sa pinansiyal [hangga’t makakaya nila] upang matugunan ang kanilang mga ipinangakong kontribusyon. …

Ang mga nangangailangan ng tulong pinansiyal para magtugunan ang inaasahang pangakong kontribusyon ay maaaring makakuha ng tulong mula sa mga kamag-anak at mga kaibigan.

Kung kailangan pa rin, maaaring hilingin ng bishop o stake president sa mga miyembro ng ward o stake na mag-ambag sa ward missionary fund. (Pangkalahatang Hanbuk: Paglilingkod sa Ang Simbahan ni Jesucristo ng mga Banal sa mga Huling Araw, 24.3.4, 24.3.4.1, ChurchofJesusChrist.org)

Paano ko magagastos ang pera ko sa mas matalinong paraan?

Itinuro ni Elder Robert D. Hales (1932–2017) ng Korum ng Labindalawang Apostol:

Kapag nais nating magdanas o magkaroon ng isang bagay na makakaapekto sa atin at sa ating kabuhayan, maaari nating itanong sa sarili, “Pansamantala lang kaya ang pakinabang nito, o walang hanggan ang kahalagahan at kabuluhan nito?” Ang pagsagot nang tapat sa mga tanong na ito ay makakatulong na maiwasan natin ang labis na pag-utang at iba pang nakalululong na gawi. (Robert D. Hales, “Pagiging Masisinop na Tagapaglaan sa Temporal at sa Espirituwal,” Liahona, Mayo 2009, 10)

Itinuro ni Pangulong Gordon B. Hinckley (1910–2008):

Tingnan ang kalagayan ng iyong pananalapi. Hinihimok ko kayo na maging matipid sa inyong paggastos; disiplinahin ang inyong sarili sa pamimili para makaiwas sa utang hangga’t maaari. Agad bayaran ang inyong utang nang mabilis hangga’t kaya ninyo, at palayain ang inyong sarili sa pagkaalipin. (Gordon B. Hinckley, “To the Boys and to the Men,” Ensign, Nob. 1998, 54)

May mga pagkakataon ba na dapat kong isaalang-alang ang pangungutang?

Depende sa sitwasyon, ang utang ay maaaring katanggap-tanggap para sa sumusunod na mga gastusin:

• Isang disenteng bahay na abot-kayang bayaran

• Makatwirang mga gastusin sa pag-aaral na hahantong sa mas magandang trabaho

• Simple at pangunahing transportasyon (kung kailangan lamang)

Dapat mong iwasang mangutang para sa iba pang mga bagay bukod pa rito. Sa halip, mag-impok para sa mga gastusin. (Personal na Pera para Maging Self-Reliant [2016], 114)

Mga Karagdagang Aktibidad sa Pag-aaral

Pag-unawa sa utang

Sabihin sa mga estudyante na isalaysay ang mga detalye ng unang paglalathala ng Aklat ni Mormon. Kung kinakailangan, ipaalala sa kanila na nanghiram si Martin Harris ng pera upang makatulong sa pagbabayad ng pagpapalimbag ng Aklat ni Mormon.

Sabihin sa mga estudyante na basahin ang Doktrina at mga Tipan 19:35, at alamin ang mga tagubilin na ibinigay ng Panginoon kay Martin Harris sa panahong ito.

• Sa inyong palagay, paano tayo inaalipin ng utang?

Kung kinakailangan, tulungan ang mga estudyante na maunawaan na ang utang ay paghiram ng perang hindi sa iyo. Ito ay karaniwang may dagdag na halaga, na tinatawag na interes. Ang interes ay porsiyento ng halagang inutang. Ang mga utang ay may kalakip na inaasahang mga pagbabayad, at kabuuang pag-asam na babayaran mo ang lahat ng hiniram mo pati na ang interes. Sa huli ay magbabayad ka nang mas malaki kaysa sa halagang hiniram mo—kung minsan ay higit na mas malaki pa. Kapag nabayaran ang mga utang, may kalayaan tayong piliin kung paano gagastusin ang ating pera at mas may kakayahang tulungan ang ating sarili, ating pamilya, o iba pang nangangailangan.

Maaari mong ibahagi ang sumusunod na kwento ni Elder Ulisses Soares ng Korum ng Labindalawang Apostol:

Sa mga unang buwan namin bilang mag-asawa, sinabi ng mahal kong asawa na nais niyang mag-aral ng musika. Dahil gusto kong mapasaya siya, nagpasiya akong maghanda ng isang malaki at taos-pusong sorpresa para sa mahal ko. Pumunta ako sa tindahan ng mga instrumentong pangmusika at ibinili siya ng piyano bilang regalo. Nasasabik kong inilagay ang resibo ng pagbili sa isang kahon na may magandang laso at ibinigay ito sa kanya, inaasahan ang nag-uumapaw na pasasalamat para sa kanyang mapagmahal at maasikasong asawa.

Nang buksan niya ang maliit na kahon at nakita ang laman nito, buong giliw siyang tumingin sa akin at nagsabing, “O, mahal ko, napakabait mo! Pero matanong nga kita: Regalo ba ito o utang?” Matapos mag-usap tungkol sa sorpresa, nagpasiya kaming ikansela ang pagbili. Ang badyet namin ay pang-estudyante, gaya rin ng maraming young adult na bagong kasal. (Ulisses Soares, “Katuwang ang Panginoon,” Liahona, Nob. 2022, 42)

• Anong mga pagpili ang magagawa ng kabataan ngayon upang tulungan sila na maiwasan ang pangungutang na hindi kailangan sa hinaharap?

Maghahanda ng paraan ang Panginoon

Kung hindi nakatitiyak ang mga estudyante tungkol sa kanilang pananalapi para sa kinabukasan, maaari mo silang anyayahang basahin ang 1 Nephi 3:7.

• Paano maiaangkop ang mga turo ng talatang ito sa pananalapi na kailangan upang maisakatuparan ang iniutos sa atin ng Panginoon?

Maaari mong ibahagi ang iyong patotoo o ang isang kuwento upang ilarawan ang kakayahan ng Panginoon na maghanda ng paraan para matugunan natin ang ating pinansyal na mga responsibilidad.