«Դաս 191. Կրթության կարևորությունը. Կրթությունը կենսականորեն կարևոր է մեր առաջընթացի համար», Վարդապետություն և Ուխտեր․ Սեմինարիայի ուսուցչի ձեռնարկ (2025)
«Կրթության կարևորությունը», Վարդապետություն և Ուխտեր․ Սեմինարիայի ուսուցչի ձեռնարկ
Դաս 191. Նախապատրաստվեք ապագա կրթությանը և աշխատանքին
Կրթության կարևորությունը
Կրթությունը կենսականորեն կարևոր է մեր առաջընթացի համար
Երկնային Հայրը և Հիսուս Քրիստոսը ցանկանում են, որ մենք սովորենք և կրթություն ստանանք մեր ողջ կյանքում: Դա կենսականորեն կարևոր է մեր առաջընթացի համար երկրի վրա և ողջ հավերժության ընթացքում: Այս դասը կօգնի ուսանողներին հասկանալ կրթության կարևորությունը:
Հնարավոր ուսումնական վարժություններ
Ինչո՞ւ է կրթությունը կարևոր
Որպեսզի օգնեք ուսանողներին մտածել կրթության կարևորության մասին, կիսվեք հետևյալ սցենարով.
Պատկերացրեք, որ կա Սառա անունով մի ուսանող, որին դուր չի գալիս դպրոցը: Նա կարծում է, որ դա ժամանակի վատնում է, և իրեն չափազանց մեծ սթրես է պատճառում։ Բացի այդ, նա սովորելու մեծ մղում չունի, քանի որ նա երբեք լավ չի սովորել դպրոցում: Նա նախընտրում է շփվել ընկերների հետ, հանգստանալ տանը կամ գնալ աշխատանքի:
Ուսանողներին առաջարկեք մտածել, թե արդյոք իրենք երբևէ ունեցել են այն մտահոգությունները, որոնք ունի Սառան: Բացատրեք, որ այս դասը կօգնի նրանց սովորել, թե Երկնային Հայրը և Հիսուս Քրիստոսն ինչու են ցանկանում, որ մենք կրթություն ստանանք:
Օգտակար կլինի հիշեցնել ուսանողներին, որ կրթությունը կարող է ներառել ուսուցում, որը տեղի է ունենում պաշտոնական միջավայրում, օրինակ՝ դպրոցում: Կրթությունը կարող է ներառել նաև ուսուցում, որը տեղի է ունենում ոչ պաշտոնական միջավայրում, օրինակ՝ տանը կամ այլ առօրյա գործունեության ընթացքում:
Ձեր օրագրի էջի վերևի մասում գրեք «Ինչո՞ւ է կրթությունը կարևոր» վերնագիրը: Այսօր ուսումնասիրելիս Սուրբ Հոգու միջոցով հայտնություն խնդրեք Երկնային Հորից, որպեսզի տեսնեք կրթության արժեքը ձեր կյանքում: Ավելացրեք ձեր գաղափարներն ու հոգևոր տպավորությունները ձեր օրագրում արված գրառումներին:
Ուսումնասիրեք կրթության կարևորությունը
Ուսանողներին ժամանակ տրամադրեք՝ ուսումնասիրելու սուրբ գրություններն ու Եկեղեցու ղեկավարների ուղերձները, որոնք ուսուցանում են սովորելու և կրթություն ստանալու կարևորության մասին: Ուսանողները կարող են ուսումնասիրել «Կրթության կարևորությունը» վերնագրով աշխատաթերթի մի քանի կամ բոլոր նյութերը: Խրախուսեք ուսանողներին իրենց օրագրերում գրել իրենց բացահայտած ցանկացած գաղափար:
Կարող եք ուսանողներին բաժանել փոքր խմբերի և հանձնարարել խմբի յուրաքանչյուր անդամին ուսումանասիրել որևէ սուրբ գրություն և ուղերձ: Խնդրեք ուսանողներին իրենց խմբի մյուս անդամներին բացատրել, թե ինչ սովորեցին իրենց հանձնարարված նյութերը կարդալիս:
Կրթության կարևորությունը
Եկեղեցու ղեկավարների հետևյալ ուղերձները և սուրբ գրությունները կարող են օգնել ձեզ ավելին հասկանալ ձեր կրթության վերաբերյալ Տիրոջ ակնկալիքների և ցանկությունների մասին: Ուսումնասիրելիս փնտրեք ճշմարտություններ կրթության կարևորության մասին:
Սուրբ գրություններ ուսումնասիրության համար․
Վարդապետություն և Ուխտեր 88․77–80, 118; 130․18–19
Եկեղեցու ղեկավարների ուսմունքները․
Նախագահ Ռասսել Մ. Նելսոնն ուսուցանել է․
Կրթություն ստանալը ձեր ձեռքերում է: Ոչ ոք չի կարող անել դա ձեր փոխարեն: Որտեղ էլ լինեք, զարգացրեք սովորելու խոր ցանկությունը: Մեզ համար՝ որպես Վերջին Օրերի Սրբերի, կրթություն ստանալը պարզապես արտոնություն չէ, դա կրոնական պատասխանատվություն է: «Աստծո փառքը բանականությունն է» (տես Վարդապետություն և Ուխտեր 93․36)։ Հիրավի, մեր կրթությունը հավերժության համար է: …
Նման երկարաժամկետ հեռանկարը կօգնի ձեզ ճիշտ ընտրություններ կատարել սովորելու հարցում:
Մի վախեցեք հասնել ձեր նպատակներին, նույնիսկ ձեր երազանքներին: Բայց իմացեք, որ դեպի գերազանց գիտելիքներ և իրազեկություն տանող կարճ ճանապարհ չկա: Կրթությունը՝ մարդկանց օգնելու ցանկության և նրանց օգնելու կարողության միջև տարբերությունն է։ (Ռասսել Մ. Նելսոն, «Դուք ի՞նչ կընտրեք» Ensign, հունվար 2015, 32)
Տասներկու Առաքյալների Քվորումից երեց Դեյվիդ Ա. Բեդնարն ասել է.
Ես և դուք այստեղ՝ երկրի վրա ենք, որպեսզի պատրաստվենք հավերժության համար՝ սովորելու, թե ինչպես սովորել, սովորելու բաներ, որոնք կարևոր են աշխարհիկ կյանքում և հավերժության համար, նաև օգնելու ուրիշներին՝ սովորել իմաստություն և ճշմարտություն (տես Վարդապետություն և Ուխտեր 97.1): Հասկացողությունը, թե ով ենք մենք, որտեղից ենք եկել և ինչու ենք մենք երկրի վրա, մեզանից յուրաքանչյուրի վրա մեծ պատասխանատվություն է դնում՝ սովորելու, թե ինչպես սովորել և ինչպես սիրել սովորելը: (Դեյվիդ Ա. Բեդնար, «Սովորեք սիրել ուսումը», Ensign, փետրվար 2010, 27)
Սփոփող միության գերագույն նախագահ Քամիլ Ն. Ջոնսոնը կիսվել է.
Մենք պետք է հնարավորինս ստանանք ամբողջական կրթություն ու ուսուցում, որպեսզի պատրաստված լինենք: Պատրաստված լինենք՝ ծառայելու աշխարհիկ կյանքում և Եկեղեցում: Պատրաստված լինենք՝ լինելու իմաստուն խորհրդատուներ և կողակիցներ մեր ամուսինների համար: Պատրաստված լինենք՝ լինելու արդյունավետ ուսուցիչներ մեր երեխաների և այն երիտասարդների համար, որոնց վրա մենք ազդեցություն ունենք: Որքան շատ ենք սովորում, այնքան ավելի մեծ ազդեցություն կարող ենք ունենալ ի բարին»: (Քամիլ Ն. Ջոնսոն «Seek Learning by Study and by Faith» [BYU–Pathway Worldwide devotional, հոկտեմբեր 19, 2021], byupathway.org):
Երիտասարդներին զորացնելու համար. ընտրություն կատարելու ուղեցույցից.
Երկնային Հայրը ցանկանում է, որ Իր դուստրերն ու որդիները միշտ սովորեն: Դուք ունեք և նյութական, և հոգևոր պատճառներ՝ ուսման ձգտելու և այն սիրելու համար: Կրթություն ստանում ենք ոչ միայն գումար վաստակելու համար: Այն ձեր հավերժական նպատակի մի մասն է՝ ավելի շատ նմանվել Երկնային Հորը: …
Փնտրեք հնարավորություններ՝ ընդլայնելու ձեր միտքն ու ձեր հմտությունները: Այդ հնարավորությունները կարող են ներառել միջնակարգ կրթություն դպրոցում կամ մասնագիտական ուսուցում, ինչպես նաև ոչ պաշտոնական ուսուցում այն աղբյուրներից, որոնց վստահում եք: Ներգրավեք Տիրոջը ձեր ջանքերում և Նա կառաջնորդի ձեզ: Երբ սովորեք ձեզ շրջապատող աշխարհի մասին, սովորեք նաև Փրկչի մասին, որը ստեղծել է աշխարհը: Ուսումնասիրեք Նրա կյանքն ու ուսմունքները: Սեմինարիան, ինստիտուտը և ավետարանի անհատական ուսումնասիրությունը դարձրեք ձեր ողջ կյանքի ուսումնառության մասը: (Երիտասարդներին զորացնելու համար. Ընտրություններ կատարելու ուղեցույց [2022], 31)
Եթե ուսանողներին բաժանել եք խմբերի, առաջարկեք նրանց կիսվել իրենց գտածով իրենց խմբի անդամների հետ: Երբ նրանք կիսվեն, բացատրեք, որ քննադատաբար մտածելու կարողությունը կարևոր հմտություն է, որը կօգնի նրանց ողջ կյանքում։ Քննադատական մտածողությունը գաղափարների միջև կապեր հաստատելու և դրանք գնահատելու կարողությունն է: Ցուցադրեք հետևյալ հրահանգները, որոնք կօգնեն ուսանողներին խմբային քննարկման ընթացքում կիրառել քննադատական մտածողությունը.
-
Ամփոփ ներկայացրեք, թե ինչ սովորեցիք՝ սուրբ գրությունը և ուղերձն ուսումնասիրելիս:
-
Երբ բոլոր ուսանողները ներկայացնեն իրենց ամփոփումները, քննարկեք հետևյալ հարցերը.
-
Ի՞նչ նմանություններ եք գտնում ձեր սովորած ուղերձների և սուրբ գրությունների միջև:
-
Ինչո՞վ են մեկը մյուսից տարբերվում ձեր ուսումնասիրած սուրբ գրությունները կամ ուղերձները:
-
Կա՞ որևէ բան մեկ մեջբերման կամ սուրբ գրության մեջ, որը ձեզ գաղափարներ է տալիս որևէ բանի վերաբերյալ մեկ այլ մեջբերման կամ սուրբ գրության մեջ:
Ճշմարտություններ կրթության կարևորության մասին
Ուսանողներին հնարավորություն տվեք կիսվելու իրենց ուսումնասիրության և քննարկման ժամանակ գտած ճշմարտություններով։ Կարող եք գրատախտակին գրել դասի սկզբում տրված հարցը․ «Ինչո՞ւ է կրթությունը կարևոր», և առաջարկել ուսանողներին գրել այդ հարցի վերաբերյալ իրենց սովորած ճշմարտությունները: Ուսանողները կարող են կիսվել նմանատիպ ճշմարտություններով.
-
Կրթությունն օգնում է մեզ պատրաստվել ծառայելու Աստծո արքայությունում (տես Վարդապետություն և Ուխտեր 88.77–80):
-
Տերը պատվիրում է մեզ ուսման ձգտել (տես Վարդապետություն և Ուխտեր 88.118):
-
Գիտելիքն ու բանականությունը, որը մենք ձեռք ենք բերում այս կյանքում, կբարձրանան մեզ հետ հարության ժամանակ (տես Վարդապետություն և Ուխտեր 130.18–19):
-
Կրթությունը կարող է նախապատրաստել մեզ, որպեսզի կարողանանք ավելի մեծ ազդեցություն ունենալ աշխարհում ի բարին (տես Քամիլ Ն. Ջոնսոն, «Seek Learning by Study and by Faith», [BYU–Pathway Worldwide devotional, հոկ․ 19, 2021], byupathway.org):
Քննարկեք ուսանողների գաղափարներն իրենց կողմից նշված ճշմարտությունների վերաբերյալ՝ տալով հետևյալ հարցերը.
-
Ձեր նշած ճշմարտություններից ո՞րն է առավել կարևոր ձեզ համար: Ինչո՞ւ։
-
Ըստ ձեզ, ինչպե՞ս կարող է կրթությունն ազդել Երկնային Հոր և Հիսուս Քրիստոսի հետ ձեր հարաբերությունների վրա:
-
Ինչպե՞ս եք տեսել կրթություն ստանալու օրհնությունները ձեր կամ ուրիշների կյանքում:
Բացատրեք ձեր բառերով
Հիշեցրեք ուսանողներին դասի սկզբում ներկայացված՝ Սառայի վերաբերյալ սցենարի մասին։ Հետևյալ հրահանգները ներկայացնելուց հետո ուսանողներին ժամանակ տվեք՝ պատասխաններն իրենց օրագրերում գրելու համար:
Օգտագործելով ձեր այսօրվա սովորածը և զգացածը՝ գրեք պատասխան, որով կարող եք կիսվել Սառայի հետ՝ օգնելու նրան ավելի լավ հասկանալ կրթության կարևորությունը: Ձեր պատասխանում ներառեք Եկեղեցու ղեկավարի ուղերձի կամ սուրբ գրության առնվազն մեկ հղում: Կարող եք նաև ներառել ձեր վկայությունը կամ նկարագրել ձեր ունեցած փորձառությունները:
Ուսանողներին հնարավորություն տվեք կիսվել իրենց պատասխաններով գործընկերոջ հետ: Մի քանի պատրաստակամ ուսանողի առաջարկեք կիսվել իրենց պատասխաններով դասարանի հետ:
Ավարտեք դասը՝ առաջարկելով ուսանողներին կիսվել իրենց սովորածով և ասել, թե ինչ կցանկանային հիշել: Նրանք կարող են իրենց մտքերն ու գաղափարները գրել իրենց օրագրերում: Կարող եք կիսվել կրթության կարևորության վերաբերյալ ձեր վկայությամբ: