192-р хичээл: Ирээдүйн боловсрол, ажил эрхлэлтэд бэлтгэх нь

Бүхэл бодгальд зориулсан боловсрол

Сүнслэг болон шашны бус боловсролыг хамтад нь эрэлхийлэх

Сайн мэдээний орчинд буй өсвөр үеийнхэн

Их Эзэн “[биднийг] бүх зүйлд бэлтгэхийн тулд” сүнслэг болон шашны бус боловсролыг хамтад нь эрэлхийлэхэд биднийг урьдаг (Сургаал ба Гэрээнүүд 88:80). Энэ хичээл нь ирээдүйд шашны бус боловсролыг эзэмшихийн зэрэгцээ шашны боловсролоо үргэлжлүүлэх төлөвлөгөөг гаргахад суралцагчдад тусална.

Боломжит суралцах үйл ажиллагаа

Боловсрол эзэмшихдээ Их Эзэнд цаг гарга

Дараах жишээг хуваалцах замаар хичээлийг эхлүүлэхийг бод.

Нэг найздаа семинарт явж байгаагаа хэлж байна гэж төсөөл. Таныг семинар гэж юу байдгийг тайлбарласны дараа найз тань “Яагаад хүн ийм зүйлд цаг зав гаргахыг хүсдэг юм бэ?” гэж танаас асуув.

• Та найздаа юу гэж хэлэх байсан бэ?

  Семинарт хамрагдах нь тэдний амьдралыг хэрхэн адисалсныг ойлгоход суралцагчдад туслахын тулд дараахтай адил нэмэлт асуултуудыг тавих талаар бодож үз.

• Та боловсрол эзэмшихэд Их Эзэнд цаг гарган семинарт хамрагдсанаар хэрхэн адислагдсан бэ?

• Семинарт хамрагдсанаар таны сургуулийн сурлагад ямар өөрчлөлт гарсан бэ?

Суралцагчдад семинарын сургалтаа дүүргэсний дараа залуу насандаа шашны боловсрол үргэлжлүүлэн эзэмших боломжтой гэдгийг тайлбарла. Энэ хичээлээр эдгээр боломжийг суралцагчдад танилцуулах болно.

Сургуулийн сургалтын зэрэгцээ сүнслэг боловсрол эзэмшихийн ач холбогдлыг ойлгоход туслах Сүнсний өдөөлтүүдэд анхаарлаа хандуулахад суралцагчдыг урамшуул. Та мөн ирээдүйд шашны боловсрол эзэмшихийн тулд ямар сонголтыг сонгох талаар Тэнгэрлэг Эцэгээс удирдамж эрэлхийлэхэд суралцагчдыг урьж болно.

Сүнслэг суралцахуйн ач холбогдол

Сургаал ба Гэрээнүүдэд Их Эзэн биднийг бусдад үйлчлэхэд бэлтгэгдсэн байхын тулд өргөн хүрээний мэдлэгийг эрэлхийлж, олон сэдвийг судлах ёстой гэж заадаг. Сургаал ба Гэрээнүүд 88:78–80, 118-ыг уншаад, Их Эзэний зөвлөгөөг олж мэд.

• Эдгээр шүлгээс сурч мэдсэн зүйлдээ үндэслэн бусдад үйлчлэхэд бэлтгэгдсэн байхын тулд юу сурахыг Их Эзэн биднээс хүсдэг вэ?

  Суралцагчид дараахтай адил үнэнийг тодорхойлж болно. Их Эзэн биднийг суралцахаар эрэлхийлэхдээ сүнслэг болон шашны бус мэдлэгт хоёуланд нь анхаарал хандуулахад урьдаг. Шашны бус боловсрол бол сайн мэдээний сургаалтай шууд холбоогүй боловсрол гэдгийг тайлбарлах нь тустай байж болох юм.

• Шашны бус боловсролдоо хэт анхаарсны улмаас шашны боловсролд зарцуулах цаг завгүй гэж бодож байгаа хүнд та юу гэж хэлэх вэ?

  Өмнөх асуулттай холбоотой хэлэлцүүлгийн нэг хэсэгт Сургаал ба Гэрээнүүд 29:34-ийг судлахад суралцагчдыг урих нь тустай байж болно. Суралцагчид Их Эзэн яагаад шашны болон шашны бус боловсролд хоёуланд нь анхаарал хандуулахыг хүсдэгийг илүү сайн ойлгоход туслах сургаалыг хайж олж болох юм.

• Сургуулийн сурлагадаа шамдахын зэрэгцээ шашны боловсролд анхаарлаа хандуулах нь Тэнгэрлэг Эцэг, Есүс Христ хоёртой харилцах харилцааг тань хэрхэн бэхжүүлэх вэ?

Суралцагчдыг өмнөх асуултуудыг авч ярилцсаны дараа ерөнхийлөгч Хэнри Б.Айрингийн дараах үгсийг үзүүлж, хуваалцах талаар бодож үз.

Тэргүүн зөвлөлийн ерөнхийлөгч Хэнри Б.Айринг сүнслэг болон шашны бус суралцахуйг тэнцвэржүүлэхийг хичээх үед бидэнд тохиолдож болох адислалуудыг ийн тайлбарлажээ.

Ерөнхийлөгч Хэнри Б.Айринг

Бидний хамгийн түрүүнд анхаарах ёстой зүйл бол сүнслэг суралцахуй юм. … Сүнслэг боловсролыг эн тэргүүнд тавих нь шашны бус зүйлсэд суралцахаас биднийг чөлөөлөхгүй нь тодорхой. Эсрэгээрээ, энэ нь бидэнд шашны бус боловсрол эзэмших зорилгыг өгч, илүү хичээнгүйлэн ажиллах сэдлийг төрүүлдэг.

Хэрэв бид сүнслэг боловсролыг зохих газарт нь авч үлдвээс цагаа хэрхэн ашиглах тал дээр хэцүү сонголт хийхэд хүрдэг. Гэвч сүнслэг байдлыг амьдралдаа хоёрт тавихыг ухамсартайгаар сонгож болохгүй. Хэзээ ч үгүй. Энэ нь эмгэнэлт байдалд хүргэнэ. Эмгэнэлт байдал эхэндээ илэрхий биш мөн мөнх бус амьдралд хэзээ ч тодорхойгүй байж болно. Гэвч та бүхэн зөвхөн мөнх бусаас гадна мөнх амьдралын төлөө боловсрол хүссэн гэдгээ сана. Та энэхүү бодит үнэнийг сүнслэг талаас нь харсан үедээ сүнслэгээр суралцахыг нэгдүгээрт тавих ба шашны бус боловсролдоо ч анхаарлаа хандуулахаа болихгүй. Үнэндээ, сүнслэг алсын хараатай байх юм бол та шашны бус боловсролдоо илүү их анхаардаг байх болно. (Хэнри Б. Айринг, “Education for Real Life,” Ensign, 2002 оны 10-р сар, 17–18).

Сүмийн боловсролын систем дэх шашны боловсролын сонголтууд

Тэнгэрлэг Эцэг биднийг Сүмийн ивээн тэтгэдэг боловсролын байгууллагуудаар адисалсан бөгөөд эдгээр институт бидэнд сүнслэг боловсролыг эн тэргүүнд тавихад тусалдаг. Эдгээр сүнслэг нөлөө бүхий институт нь Бурханы хүүхдүүдийг адислахын тулд бүтээгдсэн юм.

Бага залуу насандаа шашны боловсролын сонголтуудтай танилцахад нь суралцагчдад тусал. Үүний тулд “Сүмийн боловсролын системийн өсөлт ба хөгжил” видеог үзүүлж болно.

Та мөн “Сүмийн боловсролын систем” гарчигтай тараах материалыг өгч, өөр өөр сонголтуудтай уншиж танилцах, суралцах цагийг суралцагчдад гаргаж өгч болно.

Ангиараа “Шашны институт” гэсэн хэсгийг уншиж, ярилцахад цаг гарга. Институтийн талаар асуулт тавих боломжийг суралцагчдад олго. Орон нутгийн институтийн багш юм уу суралцагчийг институтийн талаар ярьж, асуултуудад хариулуулахаар урих нь тустай байж болох юм.

Шашны институтийн талаар ярилцаж дуусмагц тараах материал дахь бусад сонголттой уншиж танилцах цагийг суралцагчдад гаргаж өг. Бусад сонголттой танилцах явцдаа бидэнд зориулсан Бурханы хайр ба Түүний хүслийн нотолгоог хайж олоход суралцагчдыг урь. Дэлхийн өнцөг булан бүрээс ирсэн суралцагчид Сүмийн боловсролын системийн (СБС) институт бүрд суралцдаг боловч танай бүс нутагт хамгийн их хамааралтай сонголтуудыг суралцагчдад харуулах нь тустай байж болох юм. Дараах хүснэгт үүнд тусална.

Газарзүйн зорилтот бүс нутгууд	Сүмийн боловсролын систем (СБС)-ийн институтууд
Газарзүйн зорилтот бүс нутгууд Дэлхий даяар	Сүмийн боловсролын систем (СБС)-ийн институтууд Шашны институт; BYU–Pathway Worldwide
Газарзүйн зорилтот бүс нутгууд Америкийн Нэгдсэн Улс болон Канад	Сүмийн боловсролын систем (СБС)-ийн институтууд Бригам Янгийн Их Сургууль; Айдахо дахь БЯИС
Газарзүйн зорилтот бүс нутгууд Ази, Номхон далайн арлууд	Сүмийн боловсролын систем (СБС)-ийн институтууд Хавай дахь БЯИС
Газарзүйн зорилтот бүс нутгууд Юта болон хөрш зэргэлдээх мужууд	Сүмийн боловсролын систем (СБС)-ийн институтууд Энзайн коллеж

СБС-ийн бусад институтийн талаар суралцахад урихаас өмнө аль институт өөрт хамгийн тохиромжтой гэдгийг үнэлэхэд нь суралцагчдад туслах талаар бодож үз.

Үүний тулд институт бүрд төгс тохирох хүмүүсийг дүрсэлсэн цөөн хэдэн нөхцөл байдлын судалгааг боловсруулан үзүүлж болно. “СБС-ийн аль институт надад тохирох вэ?” гэсэн гарчигтай материалыг суралцагчдад тарааж өгөх өөр нэг сонголт байж болно. Тараах материалтай танилцаад, хэрэгцээ шаардлага, хүслээ тодорхойлсны дараа өөрт тохирох институтийг хайж олоход суралцагчдыг урь.

СБС-ийн аль институт надад тохирох вэ?

Таныг хамгийн сайн тодорхойлж чадаж байгаа үгсийг тэмдэглэ.

1. Ажил, бусад үүрэг хариуцлагын улмаас би уян хатан хуваарьтай байх шаардлагатай.

2. Өнгөрсөн хугацаанд би сайн дүн авсан.

3. Боловсролын зөвлөхтэй байх нь надад хэрэгтэй.

4. Их сургуульд сурахад шаардлагатай мөнгө олоход надад хэцүү байх болно.

5. Ихэнх коллеж, их дээд сургуульд тэнцэхэд надад хэцүү байж магадгүй.

6. Би сургалтын чанд хатуу туршлага олж авахыг сонирхож байна.

7. Би цөөн суралцагчтай ангийг сонирхож байна.

8. Би их, дээд сургуульд суралцахаар төлөвлөж байгаа боловч Сүмийн коллеж, их дээд сургуульд орохгүй.

Сүмийн боловсролын систем

СБС-ийн эрхэм зорилго: Өөрсдийн гэр орон, Сүм, орон нутагт удирдагч болох Есүс Христийн шавь нарыг төрүүлэх.

[1-р хуудас]

Израилын цугларалт:

“Өнөөдөр энэ Сүмд болж буй Израилын агуу цугларалтад Их Эзэн боловсролыг ашиглаж байна. Тэрээр эргэн ирэхдээ зориулж дэлхийг бэлтгэж байгаа бөгөөд Сүмийн боловсролын систем бол Түүний энэхүү хүчин чармайлтад зориулагдсан олон эх сурвалжийн нэг билээ. Институт бүр дэлхий даяарх Сүмийг адислахын тулд өөр өөр зүйлийг хийдэг. Институт бүр Сүмийн удирдлагыг дэлхийгээс ялгаатай байлгахыг зорьдог ба сонирхолтой нь бие биеэсээ ялгарах өөрийн зорилго, үүрэг хариуцлагатай байдаг.”

—Ахлагч Кларк Г.Гилбэрт, Сүмийн боловсролын системийн бүрэн эрхт төлөөлөгч

• Боломж тус бүрийн талаар дэлгэрэнгүй мэдээлэл авахыг хүсвэл cesinfo.byu.edu руу орж БҮРТГҮҮЛНЭ ҮҮ.

• Эдгээр сонголтын аль нэгд хандаж ХҮСЭЛТ ГАРГАХ БОЛ apply.ChurchofJesusChrist.org вэбсайтад зочил.

• Энэхүү тараах материалын дараагийн хуудаснаас институт бүрийн талаарх ДЭЛГЭРЭНГҮЙ мэдээллийг авна уу.

[2-р хуудас]

Шашны институт

Институт бол сургуульд сурдаг эсэхээсээ үл хамааран өдөр тутмын амьдралын эгэл жирийн бодит үнэнтэй нүүр тулахын зэрэгцээ мөнхийн үнэнээр амьдрах хүсэлтэй найз нөхөдтэйгөө уулзахаар хуран цуглардаг газар билээ. Есүс Христтэй илүү адилхан болох бодит арга замуудыг залуучуудад нээж өгч, тэдгээрийг хэрэгжүүлэхэд туслах нь институтийн зорилго юм.

Институт бол итгэлийн аялалдаа яваа суралцагчдыг уулзуулдаг газар. Институт бол:

• Судар болон бошиглолын сургаалаас авсан Христэд төвлөрсөн сургалтын хөтөлбөр.

• Амьдралын сүнслэг болон бодит нөхцөл байдлыг хэрхэн удирдан чиглүүлэх талаар туршлага судлах газар.

• Хүндэтгэл, харилцан ойлголцол, аюулгүй байдал, асуултын хариулт, хэтийн төлөвийг олж авах газар.

• Онлайнаар болон биечлэн өгөх зааварчилгаа, семинар, харилцан ярилцах хэлэлцүүлэгт хамрагдах газар юм.

institute.ChurchofJesusChrist.org хаягаас дэлгэрэнгүй мэдээлэл авна уу.

BYU–Pathway Worldwide

BYU–Pathway Worldwide нь их сургуулийн боловсролын зэрэг авах боломжийг хүн бүрд олгодог.

Онлайнаар боловсрол эзэмшихийн уян хатан байдлыг хүсдэг болон боловсролдоо сэтгэл хангалуун байхыг хүсдэг эсвэл ахлах болон дунд сургуулиа төгсөөд юу хийхийг хүсэж байгаагаа олж мэдэхэд илүү их цаг зарцуулах хүсэлтэй суралцагчид BYU–Pathway Worldwide хөтөлбөрийн давуу талыг ашиглах боломжтой.

• BYU–Pathway Worldwide нь дэлхийн 180 гаруй орны суралцагчдад үйлчилдэг.

• Бүх хичээл онлайн бөгөөд бусад сургуультай харьцуулахад сургалтын төлбөр хямд төсөр байдаг.

• Суралцагчид хөдөлмөрийн зах зээлийн шаардлага хангасан гэрчилгээтэй төгсөх ба Айдахо дахь БЯИС болон Энзайн коллежоор дамжуулан онлайн сургалтаар боловсролын зэрэг авах боломжтой.

• Тус их сургуулийн санал болгодог гэрчилгээг авахад нэг жил болон түүнээс бага хугацаа шаардагдана.

cesinfo.byu.edu хаягаас дэлгэрэнгүй мэдээлэл авна уу.

Бригам Янгийн Их Сургууль

Бригам Янгийн Их Сургуулийн (БЯИС) эрхэм зорилго нь хувь хүмүүст төгс төгөлдөр байдал, мөнх амьдралыг эрэлхийлэхэд дэмжлэг үзүүлэхэд чиглэдэг. БЯИС нь амжилтад хүрэх хичээл зүтгэлийг гаргах, хүний бүрэн чадавхаа ашиглах урам зоригоор дүүрэн орчинд эрчимтэй сургалтуудыг явуулдаг. БЯИС нь насан туршдаа тасралтгүй суралцах, бусдад үйлчлэх тэмүүлэл болон ур чадвартай оюутнуудад итгэл, оюун ухаан, зан төлөвийг төлөвшүүлэхийг эрмэлздэг.

• БЯИС нь оюутан бүрд сүнслэг үнэн, эрдэм шинжилгээний судалгаа, практикт суурилсан сургалтуудыг хослуулан; эрч хүч, тэмүүлэл дүүрэн суралцах орчин, нөхцөлийг бүрдүүлдэг.

• Мөн хоёр дахь шатны сургалтад хамрагдах, ажил мэргэжлээрээ ахиж дэвших боломжийн суурь болдог.

• Тус сургууль нь Үндэсний Коллежийн Атлетикийн Холбооны хөнгөн атлетикийн уралдаан тэмцээн, дэлхийн жишигт нийцсэн соёл урлаг, хөгжмийн тоглолтуудыг уламжлал болгон зохион байгуулдаг.

cesinfo.byu.edu хаягаас дэлгэрэнгүй мэдээлэл авна уу.

Айдахо дахь БЯИС

Айдахо дахь БЯИС нь Есүс Христийн сэргээгдсэн сайн мэдээний талаар гэрчлэлтэй болгож, түүний зарчмуудыг боловсролын түвшинд, соёлын хийгээд нийгмийн таатай орчинд хөгжүүлдэг. Хичээлээр янз бүрийн сонирхол, ур чадвартай оюутнуудад насан туршийн боловсрол, ажил хөдөлмөр эрхлэх чадвар олгоход чиглэсэн бодит туршлагуудыг санал болгодог. Айдахо дахь БЯИС нь чанартай боловсролыг бага зардлаар аль болох олон оюутанд олгохыг эрмэлздэг.

• 100 гаруй мэргэжлээр эрдмийн зэрэг олгодог.

• Багш нар тус тусын чиглэлээр мэргэшсэн бөгөөд оюутнуудад заан сургах, зөвлөн туслах ажлыг эн тэргүүнд тавьдаг.

• Анги дүүргэлтийн хувьд дунджаар 30 оюутантай.

cesinfo.byu.edu хаягаас дэлгэрэнгүй мэдээлэл авна уу.

Хавай дахь БЯИС

Далайн болон Азийн бүс нутгийн оюутнуудад төвлөрдөг Хавай дахь БЯИС нь оюутнуудыг Есүс Христийн сургаалын дагуу амьдарч, соёл хоорондын эв нэгдэл, энх тайван байдлын үлгэр жишээ үзүүлэгчдийг бэлтгэдэг. Хавай дахь БЯИС-ийн төгсөгчид насан туршдаа үйлчлэхэд бэлтгэгдсэн байдаг. Тэд сэтгэн бодох оюуны чадвар, үйлчлэгч удирдагчийн зан чанар, төлөвийг нотлон харуулдаг.

• Оюутнууд өөр өөр чиглэлээр үндсэн нэг болон дагалдах хоёр мэргэжлийг сонгон суралцах эсвэл гэрчилгээ авахыг сонгож өөрсдийн эрдмийн зам мөрийг төлөвлөдөг.

cesinfo.byu.edu хаягаас дэлгэрэнгүй мэдээлэл авна уу.

Энзайн коллеж

Энзайн коллеж нь Юта мужаас ирсэн оюутнуудад төвлөрч, Есүс Христийн чадварлаг, итгэлтэй шавь нарыг бэлтгэдэг. Ур чадварт суурилсан сургалтын хөтөлбөр нь нэгээс дөрвөн жилийн хугацаанд өрсөлдөхүйц цалинд хүрэхэд шаардлагатай туршлага хуримтлуулах боломжийг оюутнуудад олгодог. Сүнслэгээр тэжээгддэг оюун санааны орчин нь анги танхимд гүнзгий суралцах нөхцөлийг бүрдүүлдэг.

• Хүн бүр элсэх боломжтой.

• Тусгай дунд боловсрол, бакалаврын зэрэгтэй 25 гаруй гэрчилгээний сонголттой.

• BYU–Pathway Worldwide их сургуулиас онлайн гэрчилгээ, боловсролын зэрэг авах боломжтой.

• Оюутны холбоо нь олон талыг хамарсан оюутнуудаас бүрдсэн.

cesinfo.byu.edu хаягаас дэлгэрэнгүй мэдээлэл авна уу.

Эдгээр сонголттой танилцах, судлах хангалттай хугацаа өнгөрсний дараа дараах асуултын дагуу ярилцаж, олж мэдсэн зүйлээ хуваалцах цагийг суралцагчдад гаргаж өг.

• Эдгээр сонголтыг судалснаар та нар ямар ойлголт олж авсан бэ?

• Та нар Бурханы хүүхдүүдээ хайрлах хайр, хүслийн талаар ямар нотолгоог олсон бэ?

• Танд ямар асуулт байна вэ?

Төлөвлөгөө гарга

Одоо болон ирээдүйд сүнслэг боловсролоо эн тэргүүнд тавих төлөвлөгөө гарга.

• Хэрэв танд семинарт хамрагдах хэдэн жил үлдсэн байгаа бол сүнслэг боловсролыг эн тэргүүнд үргэлжлүүлэн тавих зорилгоо бич.

• Хэрэв семинараа төгсөх гэж байгаа бол дараагийн алхмаа бич.

• Гаргасан төлөвлөгөө тань Аврагчтай ойртоход хэрхэн үргэлжлүүлэн туслах вэ?

Ангийнхантайгаа төлөвлөгөөгөө хуваалцах хүсэлтэй суралцагчдыг урь. Тэднийг эцэг эх, Сүмийн удирдагч, зөвлөгчтэй ирээдүйн төлөвлөгөө, итгэл найдварынхаа талаар ярилцахад урамшуулан дэмж.

Сүнслэг суралцахуйг эн тэргүүнд тавихын ач холбогдлын талаар гэрчлэлээ хуваалц.

Нэмэлт эх сурвалж

Би яагаад сүнслэг болон шашны бус боловсролоо тэнцвэртэй байлгах ёстой вэ?

Ерөнхийлөгч Гордон Б.Хинкли (1910–2008) шашны боловсролыг амьдралдаа эн тэргүүнд тавихын чухлыг ийн тайлбарласан.

Ерөнхийлөгч Гордон Б.Хинкли

Бүхий л зүйлдээ түүнээс суралц. Бүхий л суралцах үйл явцдаа Эзэний мэдлэгийг эрэлхийл. Энэхүү мэдлэг нь амьдрал, зан төлөвт тань өөр ямар ч аргаар олж авч чадамгүй бүрэн дүүрэн байдлыг өгөх бөгөөд олж авсан шашны бус боловсролыг тань гайхалтайгаар нөхөх болно. (Гордон Б.Хинкли, in Conference Report, 1964 оны 10-р сар, 118)

Арван хоёр төлөөлөгчийн чуулгын ерөнхийлөгч М.Рассэлл Баллард ийн заасан.

Ерөнхийлөгч М.Рассэлл Баллард

Залуучууд та нар шашны институтэд бүртгүүлсэн байх хэрэгтэй. Хэрэв та Сүмийн ямар нэгэн сургуульд сурч байгаа бол улирал болгонд шашны боловсролын нэг хичээлийг оруулж бай. Нас бие хүрсэн хүний хувьд номлол, мөнхийн гэрлэлт, амьдралд бэлтгэх энэ чухал үедээ та суралцаж, өсөж хөгжих мөн Ариун Сүнсээр дамжуулан илчлэлт, удирдамж хүлээн авах арга замуудыг үргэлжлүүлэн хайж олох ёстой. Институт, семинарын эсвэл шашны боловсролын ангиудаар дамжуулан сайн мэдээний талаар хичээнгүйлэн, залбирч судлах нь зорилгодоо хүрэхэд тань та нарт туслах болно.

Та Сүмийн сургуульд болон коллежид сурдаг ч бай, үгүй ч бай, сайн мэдээнээс судлах цаг зав гарахгүй байна гэж бүү бод. Институт, семинар эсвэл шашны боловсролын ангиуд нь судраас болон бошиглогч, төлөөлөгчдийн сургаалаас судлах өөр нэгэн боломжийг танд гаргаж өгснөөр амьдралыг тань тэнцвэртэй болгон, таны иргэний боловсролд тус болно. (М.Рассэлл Баллард, “Залуучуудын хамгийн агуу үеийнхэн,” 2015 оны 4-р сарын Ерөнхий чуулган, 55)

Институт болон бусад СБС-ийн сонголт миний амьдралыг хэрхэн адислах вэ?

Ерөнхийлөгч Рассэлл М.Нэлсон ийн амласан.

Ерөнхийлөгч Рассэлл М.Нэлсон

Их Эзэний танд илчлэхэд бэлэн байгаа бүхнийг хүлээн авах нь миний зүрх сэтгэлийн чанд дахь хүслийн нэг юм. Семинар, институт танд туслах болно.

Институт, семинарыг төгсөх нь таны амьдралдаа хийж болох хамгийн чухал зүйлсэд амжилт гаргах чадварыг чинь сайжруулах болно. Та жинхэнэ баяр хөөрийг олох болно! (Рассэлл М.Нэлсон, “A Personal Invitation to Participate in Seminary and Institute,” 2019 оны 2-р сарын 4, ChurchofJesusChrist.org)

Нэмэлт суралцах үйл ажиллагаа

Институт танд таарах уу?

Суралцагчид институтийн талаар нэмэлт мэдээлэл авах бол “Институт надад зориулагдсан” видео цуглуулгаас нэг юм уу хэд хэдэн видеог үзүүлэх талаар бодож үз. Эдгээр видеонд дэлхийн өнцөг булан бүрээс ирж суралцаж буй залуучууд институтийн ач холбогдлыг гэрчилдэг.

“Яагаад” гэсэн мэдэгдэл үүсгэ

Сүнслэг боловсрол эзэмших нь тэдний хувьд яагаад чухлыг тайлбарласан “яагаад” гэсэн мэдэгдлийг үүсгэх нь суралцагчдад тустай байж болно. Жишээлбэл: Суралцагчид судлах тэмдэглэлдээ дараах өгүүлбэрийг гүйцээж бичиж болно. “Сүнслэг боловсрол эрэлхийлэх нь миний хувьд чухал, учир нь …”

Мөн сүнслэг боловсрол яагаад чухал гэдгийг эргэцүүлэн бодоход суралцагчдад туслах үүднээс дараах асуултыг тавьж болно.

• Шашны бус мэдлэгийг эрэлхийлэхийн зэрэгцээ сүнслэг мэдлэг олж авах нь яагаад чухал вэ?

• Таны сүнслэг байдлын хөгжил дэвшилд шашны бус боловсролоос гадна сүнслэг боловсрол яагаад амин чухал вэ?

Сүнслэг алсын хараа

Суралцагчдыг хичээл дээр ерөнхийлөгч Хэнри Б.Айрингийн хэлсэн үгийг уншсаны дараа түүний үгсээс онцгой, ач холбогдолтой санагдсан зүйлийг хуваалцахад урих талаар бодож үз. Дараах асуултыг тавих талаар бодож үз.

• Сүнслэг боловсролоо эн тэргүүнд тавьснаар та хэтийн төлөв, сүнслэг алсын хараагаа хэрхэн нэмэгдүүлж чадна гэж бодож байна вэ?

Одоогийн суралцахуйн эн тэргүүнд тавих зүйлсийн талаар тунгааж, үүнд ямар нэгэн өөрчлөлт гаргах нь ашиг тустай эсэх талаар эргэцүүлэн бодоход суралцагчдыг урь.

СБС-ийн аль институт надад тохирох вэ?

Сүмийн боловсролын систем