Lesson 192: Paghahanda para sa Edukasyon at Trabaho sa Hinaharap

Edukasyon para sa Buong Kaluluwa

Paghahangad ng Espirituwal at Sekular na Edukasyon

Inaanyayahan tayo ng Panginoon na magsumikap na makamit ang espirituwal at sekular na edukasyon “upang [tayo] ay maging handa sa lahat ng bagay” (Doktrina at mga Tipan 88:80). Ang lesson na ito ay makatutulong sa mga estudyante na gumawa ng plano para maipagpatuloy ang kanilang edukasyong panrelihiyon habang tinatamo ang kanilang sekular na edukasyon sa hinaharap.

Mga Posibleng Aktibidad sa Pag-aaral

Maglaan ng oras para sa Panginoon sa inyong pag-aaral

Maaari mong simulan ang lesson sa pamamagitan ng pagbabahagi ng sumusunod na sitwasyon:

Isipin kunwari na sinabi mo sa isa sa mga kaibigan mo na dumadalo ka sa seminary. Pagkatapos mong ipaliwanag kung ano ang seminary, itinanong ng kaibigan mo, “Bakit nanaisin ng isang tao na maglaan ng oras para sa ganoong klase?”

• Ano ang ibabahagi mo sa iyong kaibigan?

  Maaari mong itanong pa ang tulad ng mga sumusunod upang matulungan ang mga estudyante na makita kung paano napagpala ng pagdalo sa seminary ang kanilang buhay.

• Paano kayo pinagpala sa paglalaan ng oras para sa Panginoon sa inyong pag-aaral sa pamamagitan ng pagdalo sa seminary?

• Paano nakagawa ng kaibhan ang pagdalo ninyo sa seminary sa inyong akademikong pag-aaral?

Ipaliwanag na matapos makumpleto ng mga estudyante ang kanilang karanasan sa seminary, magkakaroon sila ng mga oportunidad kapag young adult na sila na ipagpatuloy ang kanilang edukasyong panrelihiyon. Ituturo sa lesson na ito ang mga oportunidad na ito sa mga estudyante.

Hikayatin ang mga estudyante na bigyang-pansin ang mga pahiwatig ng Espiritu, na makatutulong sa kanila na malaman ang kahalagahan ng pagtatamo ng espirituwal na edukasyon sa buong akademikong pag-aaral nila. Maaari mo ring anyayahan ang mga estudyante na humingi ng patnubay sa Ama sa Langit sa kung aling mga opsiyon sa edukasyong panrelihiyon ang dapat kunin sa hinaharap.

Ang kahalagahan ng espirituwal na pagkatuto

Sa Doktrina at mga Tipan, itinuturo ng Panginoon na dapat nating matutuhan ang maraming paksa ng kaalaman upang maging handa tayong maglingkod sa iba. Basahin ang Doktrina at mga Tipan 88:78–80, 118, at alamin ang payo ng Panginoon.

• Batay sa natutuhan ninyo sa mga talatang ito, ano ang iniuutos ng Panginoon na matutuhan natin para maging handa tayong maglingkod sa iba?

  Maaaring matukoy ng mga estudyante ang katotohanang tulad ng sumusunod: Inaanyayahan tayo ng Panginoon na magtuon sa espirituwal at sekular na kaalaman sa paghahangad nating matuto. Maaaring makatulong na ipaliwanag na ang sekular na edukasyon ay tumutukoy sa pag-aaral na hindi direktang nauugnay sa mga turo ng ebanghelyo.

• Ano ang sasabihin ninyo sa isang tao na nakadaramang wala siyang oras para sa edukasyong panrelihiyon dahil masyado siyang nakatuon sa kanyang sekular na edukasyon?

  Bilang bahagi ng inyong talakayan tungkol sa naunang tanong, makatutulong na anyayahan ang mga estudyante na pag-aralan ang Doktrina at mga Tipan 29:34. Maaari silang maghanap ng mga turo na tutulong sa kanila na mas maunawaan kung bakit nais ng Panginoon na pagtuunan ang edukasyong panrelihiyon at sekular na edukasyon.

• Paano mapatitibay ng pagtuon sa edukasyong panrelihiyon kasabay ng iba pa ninyong akademikong pag-aaral ang inyong ugnayan sa Ama sa Langit at kay Jesucristo?

Matapos talakayin ng mga estudyante ang mga naunang tanong, maaari mong ipakita at ibahagi ang sumusunod na pahayag ni Pangulong Henry B. Eyring.

Inilarawan ni Pangulong Henry B. Eyring ng Unang Panguluhan ang mga pagpapalang mararanasan natin kapag nagsikap tayong balansehin ang espirituwal at sekular na pag-aaral:

Dapat nating unahing matutuhan ang mga bagay na espirituwal. … Ang unahing matutuhan ang mga bagay na espirituwal ay hindi nag-aalis sa atin sa pag-aaral ng mga sekular na bagay. Sa halip, ito ang nagbibigay sa atin ng layuning pag-aralan ang mga sekular na bagay at hinihikayat tayong pagsikapan pa ito.

Para mabigyan ng tamang priyoridad ang espirituwal na pag-aaral, kailangan nating gumawa ng ilang mahihirap na desisyon kung paano gagamitin ang ating oras. Ngunit hindi dapat sadyain na hindi unahin ang espirituwal na pag-aaral bilang huwaran ng ating buhay. Huwag itong gawin kailanman. Hahantong iyan sa kapahamakan. Ang trahedya ay maaaring hindi malinaw sa una, ni hindi rin ito malinaw sa buhay na ito. Ngunit tandaan, interesado kayong matuto, hindi lamang para sa buhay na ito kundi para sa buhay na walang hanggan. Kapag malinaw ninyong naunawaan ang espirituwal na kahalagahan ng pagkatuto, uunahin ninyo ang espirituwal na pagkatuto nang hindi kinaliligtaan ang sekular na pagkatuto. Katunayan, mas mahihirapan kayo sa inyong sekular na pag-aaral kung wala ang espirituwal na pananaw na iyan. (Henry B. Eyring, “Education for Real Life,” Ensign, Okt. 2002, 17–18).

Mga opsiyon para sa edukasyong panrelihiyon sa Church Educational System

Biniyayaan tayo ng Ama sa Langit ng mga institusyong itinataguyod ng Simbahan na makatutulong sa atin na bigyang-priyoridad ang espirituwal na pagkatuto. Ang mga inspiradong institusyong ito ay nilikha upang pagpalain ang mga anak ng Diyos.

Tulungan ang mga estudyante na maging pamilyar sa mga opsiyon sa edukasyong panrelihiyon kapag young adult na sila. Maaari mo itong gawin sa pamamagitan ng pagpapalabas ng video na “The Growth and Momentum of the Church Educational System.”

Maaari mo ring ipamahagi ang handout na may pamagat na “Church Educational System” at bigyan ang mga estudyante ng oras para basahin at alamin ang iba’t ibang opsiyon.

Bilang isang klase, maglaan ng oras na basahin at talakayin ang bahaging may pamagat na ”Mga Institute of Religion.” Bigyan ang mga estudyante ng pagkakataong magtanong tungkol sa institute. Maaaring makatulong na anyayahan ang isang lokal na titser o estudyante sa institute na magsalita tungkol sa institute at sagutin ang mga tanong.

Matapos talakayin ang institute, bigyan ng oras ang mga estudyante na basahin at alamin ang iba pang opsiyon na nakalista sa handout. Sabihin sa mga estudyante na maghanap ng katibayan ng pagmamahal ng Diyos at ng Kanyang mga hangarin para sa atin habang pinag-aaralan nila ang iba’t ibang opsiyon. Bagama’t dumadalo ang mga estudyante mula sa iba’t ibang panig ng mundo sa bawat isa sa mga institusyon ng Church Educational System (CES), makatutulong na ipakita sa mga estudyante ang mga opsiyon na pinakanaaangkop sa inyong lugar. Maaaring makatulong ang sumusunod na chart:

Tinukoy na Lugar sa Heograpiya	Mga Institusyon ng Church Educational System (CES)
Tinukoy na Lugar sa Heograpiya Pandaigdigan	Mga Institusyon ng Church Educational System (CES) Institute of Religion; BYU–Pathway Worldwide
Tinukoy na Lugar sa Heograpiya Estados Unidos at Canada	Mga Institusyon ng Church Educational System (CES) Brigham Young University; BYU–Idaho
Tinukoy na Lugar sa Heograpiya Asia at Pacific Islands	Mga Institusyon ng Church Educational System (CES) BYU–Hawaii
Tinukoy na Lugar sa Heograpiya Utah at mga karatig na estado	Mga Institusyon ng Church Educational System (CES) Ensign College

Bago anyayahan ang mga estudyante na alamin ang iba pang institusyon ng CES, maaari mong tulungan ang mga estudyante na suriin kung alin sa mga institusyon ang pinakanaaangkop sa kanila.

Ang isang paraan na magagawa mo ito ay sa paglikha ng ilang case study na naglalarawan sa mga taong naaangkop para sa bawat institusyon. Ang isa pang opsiyon ay bigyan ang mga estudyante ng handout na may pamagat na “Aling Institusyon ng CES ang Angkop para sa Akin?” Matapos basahin ng mga estudyante ang handout at matukoy ang kanilang mga pangangailangan at hangarin, sabihin sa kanila na alamin ang mga institusyon na maaaring angkop para sa kanila.

Aling Institusyon ng CES ang Angkop para sa Akin?

Markahan ang mga pahayag na sa palagay mo ay pinakanaglalarawan sa iyo:

1. Dahil sa trabaho o iba pang mga responsibilidad, kailangang flexible ang iskedyul ko.

2. Matataas ang grado ko noon.

3. Makatutulong sa akin kung mayroon akong mentor sa akademya.

4. Mahihirapan akong magkaroon ng perang kailangan para mabayaran ang pag-aaral sa kolehiyo.

5. Maaaring mahirapan akong maging kwalipikado para sa karamihan sa mga kolehiyo o unibersidad.

6. Interesado ako sa mahigpit na karanasan sa akademya.

7. Interesado ako sa mga klaseng kaunti lang ang estudyante.

8. Pinaplano kong mag-aral sa kolehiyo ngunit hindi sa isa sa mga kolehiyo o unibersidad ng Simbahan.

Church Educational System

Misyon ng CES: Magkaroon ng mga disipulo ni Jesucristo na mga lider sa kanilang tahanan, Simbahan, at sa kanilang komunidad.

[Pahina 1]

Pagtitipon ng Israel:

“Ginagamit ng Panginoon ang edukasyon sa dakilang pagtitipon ng Israel na nangyayari sa Simbahan ngayon. Inihahanda Niya ang mundo para sa Kanyang pagbabalik, at ang Church Educational System ay isa sa maraming resources na gagamitin Niya sa pagsisikap na iyon. Gumagawa ang bawat institusyon ng isang bagay na naiiba para pagpalain ang pandaigdigang Simbahan. Ang bawat institusyon ay may iba’t ibang layunin at tungkulin mula sa pamunuan ng Simbahan na maging kaiba sa mundo at, kapansin-pansin, naiiba ang mga ito sa isa’t isa.”

—Elder Clark G. Gilbert, Commissioner ng Church Educational System

• MAG-SIGN UP para makatanggap ng karagdagang impormasyon tungkol sa bawat oportunidad: cesinfo.byu.edu.

• PARA MAG-APPLY sa isa sa mga opsiyong ito, pumunta sa apply.ChurchofJesusChrist.org.

• ALAMIN ANG IBA PA tungkol sa bawat institusyon sa susunod na pahina ng handout na ito.

[Pahina 2]

Mga Institute of Religion

Ang institute ay isang lugar kung saan maaaring magtipon ang mga young adult at kanilang mga kaibigan—sa paaralan man o hindi—na may hangaring ipamuhay ang mga walang-hanggang katotohanan habang nahaharap sa mga katotohanan ng buhay sa mundo sa araw-araw. Ang layunin ng institute ay tulungan ang mga young adult na malaman at maipamuhay ang mga praktikal na paraan upang maging higit na katulad ni Jesucristo.

Nakatutulong ang institute sa mga estudyante sa kanilang paglalakbay sa pananampalataya. Mararanasan nila sa lugar na ito ang:

• Kurikulum na nakasentro kay Cristo mula sa mga turo sa banal na kasulatan at mga turo ng propeta.

• Pagtuklas kung paano harapin ang mga espirituwal at praktikal na sitwasyon sa buhay.

• Isang lugar ng paggalang, pag-unawa, at kaligtasan kung saan maaaring makilahok, magtanong, at magkaroon ng mga pananaw.

• Online at in-person na pag-aaral, mga workshop, at interaktibong talakayan.

Alamin ang iba pa sa institute.ChurchofJesusChrist.org.

BYU–Pathway Worldwide

Sa tulong ng BYU–Pathway Worldwide, posibleng magkaroon ng degree sa unibersidad ang lahat.

Maaaring mainam ang BYU–Pathway Worldwide sa mga estudyante na gusto ang flexibility ng online na pag-aaral, gustong magkaroon ng kumpiyansa sa akademya, o nangangailangan pa ng oras upang alamin ang dapat gawin pagkatapos ng high school o paaralang sekondarya.

• Nagsisilbi ang BYU–Pathway Worldwide sa mga estudyante sa mahigit 180 bansa.

• Ang mga kurso ay ganap na online, at ang presyo ng matrikula ay mas mababa kaysa sa iba pang paaralan.

• Ang mga estudynate ay maaaring magtamo ng mga sertipikong magagamit at makakalipat sa mga online degree sa pamamagitan ng BYU–Idaho at Ensign College.

• Ang bawat sertipiko ay matatanggap pagkatapos mag-aral nang isang taon o wala pang isang taon.

Alamin ang iba pa sa cesinfo.byu.edu.

Brigham Young University

Ang misyon ng Brigham Young University (BYU) ay tulungan ang mga indibiduwal sa kanilang hangarin na maging ganap at magkaroon ng buhay na walang hanggan. Nagbibigay ang BYU ng panahon ng masinsinang pag-aaral sa isang nakakapanghikayat na lugar kung saan inaasahan ang pagtuon sa kahusayan at pagsisikap na abutin ang buong potensyal ng tao. Hangad ng BYU na magkaroon ang mga estudyante na may pananampalataya, katalinuhan, at integridad, at may mga kasanayan at hangaring patuloy na matuto at maglingkod sa iba habambuhay.

• Ang BYU ay may mga nakakapanghikayat na oportunidad sa pag-aaral kung saan pinagsasama-sama ang mga espirituwal na katotohanan, karanasan sa pananaliksik, at tutok na pag-aaral para sa lahat ng estudyante.

• Dito nagsisimula ang pag-aaral sa graduate school at pagkakaroon ng propesyon.

• Nagbibigay ito ng tradisyonal na karanasan sa unibersidad sa pamamagitan ng NCAA athletics at isa sa mga pinakamahusay sa sining at mga musikal na pagtatanghal.

Alamin ang iba pa sa cesinfo.byu.edu.

BYU–Idaho

Ang BYU–Idaho ay nagpapalakas ng patotoo tungkol sa ipinanumbalik na ebanghelyo ni Jesucristo at nagtataguyod ng mga alituntunin nito sa isang kanais-nais na kapaligiran para sa akademya, kultura, at lipunan. Layunin ng mga klase na magbigay ng makatotohanang karanasan upang maihanda ang mga estudyanteng may iba’t ibang interes at kakayahan sa habambuhay na pagkatuto at pagtatrabaho. Hangad ng BYU–Idaho na magbigay ng de-kalidad na edukasyon sa murang halaga sa maraming estudyante hangga‘t maaari.

• Maaaring magkaroon ng degree sa mahigit 100 major.

• Ang mga faculty member ay mga eksperto sa kani-kanilang mga larangan at pinakapriyoridad nila ang pagtuturo at paggabay sa mga estudyante.

• Ang average na bilang ng mga estudyante sa klase ay 30.

Alamin ang iba pa sa cesinfo.byu.edu.

BYU–Hawaii

Sa pagtuon sa mga estudyante mula sa Oceania at sa Asian Rim, inihahanda ng BYU–Hawaii ang mga estudyante na maging halimbawa ng kapayapaan at pagkakaisa sa pagitan ng mga kultura sa mundo sa pamamagitan ng pagsasabuhay ng mga turo ni Jesucristo. Ang mga nagtapos sa BYU–Hawaii ay inihanda para sa habambuhay na paglilingkod. Nagpapakita sila ng mga kasanayan sa pag-iisip at ng katangian ng pagiging isang tagapaglingkod at lider.

• Pinaplano ng mga estudyante ang sarili nilang mga natatanging landas sa akademya sa pamamagitan ng pagpili ng isang major at dalawang minor o mga sertipiko sa iba’t ibang larangan ng pag-aaral.

Alamin ang iba pa sa cesinfo.byu.edu.

Ensign College

Ang Ensign College, na nakatuon sa mga estudyante mula sa greater Utah area, ay lumilikha ng mga may kakayahan at mapagkakatiwalaang disipulo ni Jesucristo. Tinitiyak ng kurikulum na batay sa kasanayan na magkakaroon ang mga estudyante ng karanasang maghahanda sa kanila na magkaroon ng sapat o malaking sahod sa loob ng isa hanggang apat na taon. Napapaganda ng kapaligirang nag-aanyaya sa Espiritu ang malalimang pag-aaral sa silid-aralan.

• Maaaring mag-apply ang sinuman.

• Mayroong mahigit sa 25 opsiyon sa sertipiko, na maaaring isama sa pagkuha ng degree sa associate o bachelor.

• Ang mga online na sertipiko at degree ay makukuha sa BYU–Pathway Worldwide.

• Maraming iba’t ibang estudyante ang naka-enroll.

Alamin ang iba pa sa cesinfo.byu.edu.

Pagkatapos magkaroon ang mga estudyante ng sapat na oras para basahin at pag-aralan ang mga opsiyon, bigyan sila ng oras upang ibahagi ang kanilang natutuhan sa pamamagitan ng pagtalakay sa mga tanong na gaya ng mga sumusunod:

• Anong mga ideya ang nakuha ninyo habang pinag-aaralan ninyo ang mga opsiyong ito?

• Anong katibayan ang nakita ninyo tungkol sa pagmamahal at hangarin ng Diyos para sa Kanyang mga anak?

• May mga tanong pa ba kayo?

Gumawa ng plano

Gumawa ng plano para bigyang-priyoridad ang inyong espirituwal na edukasyon ngayon at sa hinaharap.

• Kung mayroon pa kayong natitirang ilang taon sa seminary, magsulat ng isang mithiin upang patuloy na bigyang-priyoridad ang espirituwal na edukasyon.

• Kung malapit na kayong magtapos sa seminary, isulat kung ano ang susunod ninyong hakbang.

• Paano kayo matutulungan ng inyong plano na patuloy na mas mapalapit sa Tagapagligtas?

Anyahahan ang mga handang estudyante na ibahagi ang kanilang plano sa klase. Hikayatin silang makipag-usap sa isang magulang, lider ng Simbahan, o mentor tungkol sa kanilang mga plano at pag-asa sa hinaharap.

Ibahagi ang iyong patotoo tungkol sa kahalagahan ng pagbibigay-priyoridad sa espirituwal na pag-aaral.

Karagdagang Resources

Bakit kailangan kong balansehin ang aking espirituwal at sekular na edukasyon?

Inilarawan ni Pangulong Gordon B. Hinckley (1910–2008) ang kahalagahan ng pagbibigay-priyoridad sa edukasyong panrelihiyon sa iyong buhay.

Sa lahat ng inyong pag-aaral, matuto sa kanya. Sa lahat ng inyong pag-aaral, kailangan ninyong hangarin ang kaalaman ng Panginoon. Daragdagan ng kaalamang iyan ang inyong sekular na pag-aaral sa napakagandang paraan at bibigyan kayo ng katangian at kaganapan sa buhay na hindi matatamo sa ibang paraan. (Gordon B. Hinckley, sa Conference Report, Okt. 1964, 118)

Itinuro ni Pangulong M. Russell Ballard ng Korum ng Labindalawang Apostol:

Kayong mga young adult ay dapat mag-enrol sa institute of religion. Kung dumadalo kayo sa isang paaralan ng Simbahan, magsama ng isang klase sa religious education bawat semestre. Sa mahalagang panahong ito ng paghahanda para sa misyon, kasal na pangwalang-hanggan, at buhay bilang adult, kailangan ay patuloy kayong maghanap ng mga paraan para matuto at lumago at tumanggap ng inspirasyon at patnubay ng Espiritu Santo. Ang maingat at mapanalanging pag-aaral ng ebanghelyo sa pamamagitan ng mga klase sa seminary, institute, o religious education ay makakatulong sa inyo na makamit ang mithiing iyon.

Pumapasok man kayo sa isang paaralan ng Simbahan o hindi, nag-aaral man kayo sa kolehiyo o hindi, huwag ninyong isipin na masyado na kayong abala para pag-aralan ang ebanghelyo. Ang mga klase sa seminary, institute, o religion ay maglalaan ng balanse sa inyong buhay at magdaragdag sa inyong sekular na edukasyon sa pagbibigay sa inyo ng isa pang oportunidad na mag-ukol ng oras sa pag-aaral ng mga banal na kasulatan at mga turo ng mga propeta at apostol. (M. Russell Ballard, “Ang Pinakadakilang Henerasyon ng mga Young Adult,” Liahona, Mayo 2015, 69)

Paano mapagpapala ang buhay ko ng institute at iba pang opsiyon sa CES?

Ipinangako ni Pangulong Russell M. Nelson:

Isa sa matitinding hangarin ng puso ko ang matanggap ninyo ang lahat ng handang ihayag sa inyo ng Panginoon. Tutulungan kayo ng seminary at institute.

Ang pagtatapos mula sa seminary at institute ay magpapaibayo sa kakayahan ninyong magpakahusay sa pinakamahahalagang bagay na gagawin ninyo sa buhay. Tunay na kagalakan ang mapapasainyo! (Russell M. Nelson, “A Personal Invitation to Participate in Seminary and Institute,” Peb. 4, 2019, ChurchofJesusChrist.org)

Mga Karagdagang Aktibidad sa Pag-aaral

Ang institute ba ay para sa inyo?

Kung makikinabang ang mga estudyante mula sa karagdagang impormasyon tungkol sa institute, maaari mong ipanood ang isa o mahigit pa sa mga video mula sa koleksyon ng video na “Institute Is for Me.” Sa mga video na ito, patototohanan ng mga young adult mula sa iba’t ibang panig ng mundo ang kahalagahan ng institute.

Gumawa ng pahayag na “bakit”

Maaaring makinabang ang mga estudyante sa paggawa ng pahayag na “bakit” na naglalarawan kung bakit mahalaga sa kanila ang pagkakaroon ng espirituwal na edukasyon. Halimbawa, maaaring kumpletuhin ng mga estudyante ang sumusunod na pangungusap sa kanilang study journal: “Ang paghahangad ng espirituwal na edukasyon ay mahalaga sa akin dahil …”

Maaari mo ring itanong ang mga sumusunod upang matulungan ang mga estudyante na pag-isipan kung bakit mahalaga sa kanila ang espirituwal na edukasyon.

• Bakit mahalaga sa inyo na magtamo ng espirituwal na kaalaman habang naghahangad kayo ng sekular na kaalaman?

• Bakit mahalaga sa inyong espirituwal na pag-unlad na magtamo ng espirituwal na edukasyon kasabay ng sekular na edukasyon?

Espirituwal na pangitain

Matapos basahin ng mga estudyante ang pahayag ni Pangulong Henry B. Eyring sa lesson, maaari mong sabihin sa kanila na ibahagi kung ano ang naging pinakamakabuluhan sa kanila mula sa kanyang mga salita. Pagkatapos ay itanong ang sumusunod:

• Sa inyong palagay, paano makadaragdag ng pananaw at espirituwal na pangitain ang pagbibigay-priyoridad sa inyong espirituwal na pag-aaral?

Sabihin sa mga estudyante na isipin ang kasalukuyan nilang mga priyoridad sa pag-aaral at isipin kung makikinabang sila sa paggawa ng anumang pagbabago.