Դաս 195. Հաջողության հասնել դպրոցում

Ներգրավեք Տիրոջը ձեր ուսումնառության մեջ

«Ես քեզ հետ կլինեմ»

Երկնային Հայրը և Հիսուս Քրիստոսը ցանկանում են օգնել մեզ մեր կյանքի բոլոր ոլորտներում, ներառյալ՝ սովորելու և միջնակարգ կրթություն ստանալու մեր ջանքերը: Այս դասը կօգնի ուսանողներին ներգրավել Տիրոջը իրենց ուսումնառության բոլոր ոլորտներում՝ ուսումնասիրությամբ և հավատքով ուսում փնտրելիս:

Հնարավոր ուսումնական վարժություններ

Դժվարին իրավիճակներ

Կարող եք սկսել դասը՝ կիսվելով հետևյալ իրավիճակներով և քննարկելով դրանք ամբողջ դասարանով: Անհրաժեշտության դեպքում հարմարեցրեք իրավիճակները՝ դրանք ավելի համապատասխանեցնելու ձեր ուսանողների կարիքներին:

Պատկերացրեք ձեզ հետևյալ իրավիճակներից մեկում կամ մի քանիսում.

• Դպրոցում դասի ժամանակ դուք ձեզ հուսալքված եք զգում և պատրաստ եք հանձնվել:

• Դուք հարցեր ունեք՝ երիտասարդ չափահաս տարիքում ձեր ուսումնառությունը շարունակելու վերաբերյալ: Դուք չգիտեք, թե որտեղ պետք է շարունակեք հաճախել դպրոց կամ պետք է դա արդյոք:

• Սա ձեր առաջին աշխատանքային շաբաթն է նոր աշխատավայրում և դուք անհամապատասխանություն եք զգում աշխատանքի կամ առաջադրանքների վերաբերյալ:

Ի՞նչ կանեիք, եթե հայտնվեիք այդ իրավիճակներից մեկում: Ո՞ւմ կդիմեք օգնության համար:

Ուսանողներին հարցրեք, թե արդյոք իրենք կամ իրենց ծանոթ մարդիկ ունեցել են նման իրավիճակներում հայտնվելու փորձառություն: Առաջարկեք նրանց կիսվել, թե ինչ են արել իրենք կամ ուրիշները՝ օգնություն ստանալու համար:

Բացատրեք, որ այս դասի ընթացքում ուսանողները կսովորեն իրենց կյանքի բոլոր ոլորտներում Տիրոջը ներգրավելու կարևորության մասին, ներառյալ իրենց ուսումնառությունը: Որպեսզի ուսանողներին օգնեք նախապատրաստվել ուսումնասիրելու այդ թեման, ցուցադրեք հետևյալ հարցերը և առաջարկեք նրանց պատասխանել հարցերին իրենց օրագրերում:

Ժամանակ տրամադրեք խորհելու հետևյալ պնդումների շուրջ՝ օգտագործելով 1-ից (երբեք) 5-ը (շատ հաճախ) սանդղակը.

1. Ես աղոթում եմ Երկնային Հորը իմ ուսումնասիրությունից կամ դպրոցական նախագիծ սկսելուց առաջ, որպեսզի Նա օգնի ինձ:

2. Իմ անձնական աղոթքներում ես ցանկություն եմ հայտնում իմ Երկնային Հորը, որպեսզի Հոգին լինի ինձ հետ դպրոցում՝ սովորելու ժամանակ:

3. Ես պարբերաբար փորձում եմ կատարելագործվել Հիսուս Քրիստոսի օգնությամբ սովորելու իմ ջանքերում:

4. Ես ապավինում և ընդունում եմ Հոգու օգնությունն իմ ուսումնառության և կրթության մեջ:

Ուսանողներին առաջարկեք փնտրել ուսմունքներ, որոնք կարող են օգնել իրենց ավելի լիարժեք ներգրավել Տիրոջը իրենց ուսումնառության և կրթության մեջ:

Սովորեք սուրբ գրությունների սովորող մարդկանց օրինակից

Բացատրեք, որ սուրբ գրությունները պարունակում են բազմաթիվ մարդկանց օրինակներ, որոնք ներգրավել են Տիրոջը՝ օգնելու իրենց ձեռք բերել հասկացողություն և հաղթահարել դժվարությունները: Ուսանողներին բաժանեք խմբերի և կատարեք հետևյալ ուսումնական վարժությունը։ Յուրաքանչյուր խմբի հանձնարարեք ուսումնասիրել հետևյալ օրինակներից մեկը, այնուհետև քննարկեք հաջորդող երկու հարցերը:

Ուսումնասիրեք հետևյալ սուրբ գրությունները, որտեղ նկարագրված են այն մարդիկ, որոնք հայտնվել են դժվար և անորոշ իրավիճակներում: Փնտրեք օրինակներ, թե ինչպես են այդ մարդիկ ներգրավում Տիրոջը՝ հասկացողություն փնտրելիս:

• Ջոզեֆ Սմիթ (Ջոզեֆ Սմիթ—Պատմություն 1.10–18)

• Նեփի (1 Նեփի 11․1–9)

• Հարեդի եղբայրը (Եթեր 1․38–42, 2․22–25, 3․1–6)

• Ինչպե՞ս են այդ մարդիկ ներգրավել Տիրոջը իրենց ուսումնառության մեջ:

• Տերը ինչպե՞ս օգնեց նրանց:

  Ուսանողներին ուսումնասիրելու և քննարկելու համար բավարար ժամանակ տրամադրելուց հետո յուրաքանչյուր խմբի անդամներին առաջարկեք պատմել, թե ինչ են իրենք քննարկել՝ կիսվելով նախորդ հարցերի իրենց պատասխաններով:

• Հիմնվելով ձեր սովորածի վրա՝ ինչպե՞ս կավարտեք հետևյալ արտահայտությունը: Երբ մենք ներգրավենք Տիրոջը մեր ուսումնառության մեջ, Նա կարող է …

  Ուսանողները կարող են ավարտել այդ արտահայտությունը հետևյալ կերպ. Երբ մենք ներգրավենք Տիրոջը մեր ուսումնառության մեջ, Նա կարող է մեզ տալ այն հասկացողությունը, որը մենք ինքնուրույն չենք կարող ձեռք բերել:

• Ի՞նչ գիտեք Տիրոջ մասին, որը ձեզ վստահություն է տալիս, որ Նա կօգնի ձեզ կրթություն ստանալու ընթացքում:

Տիրոջը ձեր ուսումնառության մեջ ներգրավելու եղանակներ

• Ե՞րբ է օգտակար ներգրավել Տիրոջը, երբ խոսքը վերաբերում է ձեր դպրոցական աշխատանքներին:

Անհրաժեշտության դեպքում օգնեք ուսանողներին խորհել նախորդ հարցի պատասխանների շուրջ: Օրինակները կարող են ներառել տնային առաջադրանքների կատարումը, ստուգարքների հանձնումը, ուսումնառությունը դասարանում և աշխատանքը դասարանական առաջադրանքների կամ նախագծերի վրա: Կարող եք գրատախտակին գրել ուսանողների գաղափարները։

Այնուհետև ուսանողներին տվեք հետևյալ հրահանգները, որոնք կօգնեն նրանց մտածել, թե իրենք ինչպես կարող են ներգրավել Տիրոջը իրենց նշած օրինակներում: Ուսանողները կարող են դա անել անհատապես, զուգընկերոջ հետ կամ փոքր խմբով:

Ձեր օրագրի էջերից որևէ մեկի վրա գրեք Ես կարող եմ Տիրոջը ներգրավել իմ ուսումնառության մեջ … արտահայտությունը: Գրեք հնարավորինս շատ գաղափարներ, թե ինչպես ներգրավել Տիրոջը դպրոցին վերաբերող այն աշխատանքներում, որոնք նշել եք:

Երբ ուսանողներն ավարտեն, խնդրեք նրանց կիսվել իրենց գաղափարներով դասարանի հետ: Կարող եք գրատախտակին գրել ցուցակ և դրան ավելացնել ուսանողների գաղափարները:

Անհրաժեշտության դեպքում առաջարկեք հետևյալ գաղափարներից մի քանիսը. աղոթել օգնության համար ստուգարքներից, նախագծերից կամ առաջադրանքներից առաջ՝ հիշելու այն, ինչ ուսումնասիրել եք, երախտագիտություն հայտնել Աստծուն՝ ձեր ուսումնառության համար Իր կողմից տրված օգնության և հնարավորությունների համար, գրել այն փորձառությունները, որոնք դուք ունեցել եք՝ Տիրոջը ձեր ուսումնառության մեջ ներգրավելու շնորհիվ, ծոմ պահել և աղոթել՝ սովորելու ավելի մեծ ցանկություն ունենալու համար, Աստծուն դնել առաջին տեղում՝ ժամանակ հատկացնելով ամենօրյա աղոթքի և սուրբ գրությունների ուսումնասիրության համար:

• Ի՞նչ փորձառություններ եք ունեցել՝ Տիրոջը ձեր կրթության մեջ ներգրավելու շնորհիվ:

Քննարկելու համար կարող եք ցուցադրել «Ավելին դառնալ Քրիստոսում`թեք գծի առակը» տեսանյութը 0:00-1:05։ Այդ տեսանյութը հասանելի է ChurchofJesusChrist.org կայքում: Տեսանյութում Յոթանասունից երեց Քլարկ Գ. Գիլբերտը նկարագրում է Տիրոջը իր ուսումնառության մեջ ներգրավելու փորձառությունը:

Խորհեք և գործեք ըստ ճշմարտությունների

Ուսանողներին առաջարկեք խորհել, թե ինչպես կարող են կիրառել այն, ինչ սովորել են՝ Տիրոջը իրենց ուսումնառության մեջ ներգրավելու մասին: Նրանք կարող են պատասխանել հետևյալ հարցերին իրենց օրագրերում։

• Ի՞նչ սովորեցիք կամ զգացիք Տիրոջ մասին, որը ձեզ մոտ ցանկություն է առաջացնում ներգրավել Նրան ձեր ուսումնառության մեջ:

• Որո՞նք են այն մեկ կամ երկու գործողությունները, որոնք կարող եք անել՝ Տիրոջը ձեր ուսումնառության մեջ ներգրավելու համար:

Ուսանողներին առաջարկեք կիսվել, թե իրենք ինչ զգացին և սովորեցին։ Վկայեք ձեր քննարկած ճշմարտությունների մասին և խրախուսեք ուսանողներին աշխատել իրենց ծրագրերի վրա և գործել ըստ այն տպավորությունների, որոնք ստանում են Հոգուց:

Լրացուցիչ նյութեր

Տիրոջը իմ ուսումնառության մեջ ներգրավելն ինչպե՞ս կօգնի ինձ հաջողության հասնել իմ կրթության մեջ:

Տասներկու Առաքյալների Քվորումից երեց Դ․ Թոդ Քրիստոֆերսոնն ուսուցանել է.

Դուք պետք է միշտ հիշեք, որ միայնակ չեք այս հարցում: Կան մարդիկ, որոնք սիրում են ձեզ և աղոթում են ձեզ համար: Գուցե կան թերահավատ մարդիկ, որոնք ասում են ձեզ, որ դուք չեք կարող այսինչ բանն անել, կամ նրանք, ովքեր ինչ-որ պատճառներով չեն ցանկանում, որ դուք հաջողության հասնեք: Բայց նրանք չեն կարող կանգնեցնել ձեզ և կան նաև այնպիսի մարդիկ, որոնք աջակցում են ձեզ: Ամենակարևորը, ձեր Երկնային Հայրը և ձեր Փրկիչը ճանաչում են ձեզ և կարող են տալ ու կտան ձեզ երկնային օգնությունը: Աստծուն դարձրեք ձեր զուգընկերը: …

Ձեր Երկնային Հայրը և Նրա սիրելի Որդին սիրում են ձեզ նույնքան, որքան ինձ, և դուք իրավունք ունեք ստանալու նրանց օգնությունը նույնքան, որքան ես: Նրանց օգնությամբ դուք կարող եք հաջողության հասնել [ձեր կրթության] և ձեր կյանքի ցանկացած արժանավոր գործունեության մեջ: Դուք միայնակ չեք ձեր աշխատանքում և ուսման մեջ։ (Դ. Թոդ Քրիստոֆերսոն, «The Will to Prepare», [ԲՅՀ–Pathway Worldwide devotional, նոյ. 12, 2019])

Յոթանասունից երեց Քիմ Բ. Քլարկն ուսուցանել է․

Եթե ​​դադարեք սովորել, դուք չեք կարող դառնալ ավելի բանիմաց, ավելի արդյունավետ, ավելի օգտակար, ավելի հավատարիմ կամ ավելի նմանվել ձեր Երկնային Հորը:

Պատանեկության և երիտասարդության տարիներին սովորելու ձեր փորձառությունը հիմք է ստեղծում ողջ կյանքի ընթացքում սովորելու համար: Եթե զարգացնեք Տիրոջ ձևով խորապես սովորելու ձեր կարողությունը՝ Հոգու միջոցով և ջանասեր ու ակտիվ ուսումնասիրությամբ, դա մեծ օրհնություն կլինի ձեզ համար: (Քիմ Բ. Քլարկ, «Learning for the Whole Soul», Ensign, օգոստոս. 2017, 29)։

Ուսումնառության ո՞ր տեսակը պետք է լինի իմ մեծագույն առաջնահերթությունը:

Նախագահ Ռասսել Մ. Նելսոնն ուսուցանել է․

Երբ ձգտում եք ձեռք բերել գիտելիքներ, իմացեք, որ ամենակարևոր ճշմարտությունը, որը դուք կարող եք սովորել, գալիս է Տիրոջից: Իր Հորն ուղղված Իր բարեխոսական աղոթքում Փրկիչը ինքն է հաստատել դա: Նա ասել է․ «Այս է հավիտենական կյանքը, որ ճանաչեն քեզ իբրև միակ ճշմարիտ Աստծու և նրան, որին ուղարկել ես՝ Հիսուս Քրիստոսին» (Հովհաննես 17.3)։ Երբ ձգտում եք սովորել, ամեն բանից առաջ ձգտեք ճանաչել Աստծուն, ձեր Երկնային Հորը և Նրա Որդուն՝ Հիսուս Քրիստոսին: Ճանաչեք Նրանց և սիրեք Նրանց, ինչպես ես: (Ռասսել Մ. Նելսոն, «What Will You Choose?», Ensign, հունվար 2015, 32)

Օժանդակ ուսումնական վարժություններ

Տիրոջը դրեք առաջին տեղում

Երբ ուսանողները գրեն այն եղանակները, որոնցով իրենք կարող են ներգրավել Տիրոջը իրենց ուսումնառության մեջ, կարող եք ցուցադրել «The Soul’s Sincere Desire» (3:28) տեսանյութը, որը հասանելի է ChurchofJesusChrist.org կայքում։ Ուսանողներին առաջարկեք փնտրել օրինակներ, թե տեսանյութում ներկայացված երիտասարդ կինն ինչպես է Տիրոջը ներգրավել իր ուսումնառության մեջ:

Տիրոջը ներգրավելու համար ստեղծեք ուսումնառության անձնական մոդելներ

Դասի վերջում ուսանողներին հնարավորություն տվեք ստեղծել պատկերավոր ներկայացում, որն ամփոփում է այն, ինչ իրենք սովորել են՝ Տիրոջը իրենց կրթության մեջ ներգրավելու մասին: Ուսանողներին առաջարկեք թղթի մեջտեղում գրել Ներգրավել Տիրոջը ձեր ուսումնառության մեջ արտահայտությունը։ Այնուհետև առաջարկեք նրանց գրել վարքագծի և մոտեցման որոշակի մոդելները, որոնք ներկայացնում են, թե իրենք ինչպես կարող են ներգրավել Տիրոջը իրենց ուսումնառության և կրթության մեջ: Առաջարկեք նրանց պատկերավոր նկար նկարել կամ ստեղծել ուսումնառության թվային մոդել՝ դասի ընթացքում իրենց դասընկերների հետ կիսվելու համար: (Օրինակ՝ տես հետևյալ գծապատկերը 2016 թվականի հոկտեմբեր ամսվա Լիահոնա ամսագրում։)

Ուսանողներին առաջարկեք ստեղծել ուսումնառության անհատական պնդում

Ուսանողների համար օգտակար կլինի ստեղծել «ուսումնառության անհատական պնդում», որը կարող են օգտագործել իրենց կյանքի ընթացքում՝ հիշելու իրենց կրթական նպատակների մասին: Նրանց պնդումները կարող են սկսվել «Ես կլինեմ…», «Ես … եմ» կամ «Իմ հույսն է…» արտահայտությամբ:

Օգնելու համար ուսանողներին կսզմել իրենց պնդումները, առաջարկեք նրանց խորհել իրենց ուսումնառության բնագավառների մասին, որոնք ցանկանում են բարելավել կամ զարգացնել: Կարող եք տալ հետևյալ հարցերը․ «Ինչպե՞ս կարող եք ներգրավել Տիրոջը ձեր ուսումնառության մեջ», կամ «Ինչպե՞ս կարող է Տերը օգնել ձեզ իրագործել ձեր ծրագրերը»: Ուսանողները կարող են նշել այն գործողություններն ու մոտեցումները, որոնք կցանկանային ներառել իրենց պնդումներում:

Ուսումնառության պնդումները սովորաբար լինում են կարճ և զորեղ: Ուսանողները կարող են ներառել կրթական նպատակներ կամ ցանկություններ և այն, թե իրենք ինչ կարող են անել՝ իրենց նպատակներին հասնելու համար:

Ահա ուսանողների ուսումնառության պնդումների երկու օրինակ․

• Ես խոնարհ և ընկալունակ կլինեմ, եթե խնդրեմ Տիրոջ օգնությունը՝ որպես ուսանող կատարելագործվելու համար:

• Դպրոց գնալուց առաջ ես կաղոթեմ իմ Երկնային Հորը և կհայտնեմ իմ ցանկությունը, որ իմ ուսումնառության ընթացքում Հոգին ինձ հետ լինի: