Սեմինարիա
Դաս 196․ Շիտակ լինենք մեր կրթության մեջ. «Մենք հավատում ենք ազնիվ լինելուն»

«Դաս 196․ Շիտակ լինենք մեր կրթության մեջ. «Մենք հավատում ենք ազնիվ լինելուն»», Վարդապետություն և Ուխտեր․ Սեմինարիայի ուսուցչի ձեռնարկ (2025)

«Շիտակ լինենք մեր կրթության մեջ», Վարդապետություն և Ուխտեր․ Սեմինարիայի ուսուցչի ձեռնարկ

Դաս 196. Հաջողության հասնել դպրոցում

Շիտակ լինենք մեր կրթության մեջ

«Մենք հավատում ենք ազնիվ լինելուն»

երիտասարդները կատարում են դպրոցական առաջադրանքները

Երբ մենք ձգտում ենք դառնալ Հիսուս Քրիստոսի ընդունակ և վստահելի աշակերտներ, կարևոր է ունենալ ազնվություն և շիտակություն մեր սրտերում: Այս դասը կօգնի ուսանողներին գործել ավելի ազնվ և շիտակ իրենց կրթության մեջ:

Հնարավոր ուսումնական վարժություններ

Ընտրենք ազնվությունը և շիտակությունը

Ուսանողներին առաջարկեք կիսվել դպրոցին վերաբերող սցենարներով կամ իրավիճակներով, որոնցում կարող է ստուգվել մարդու ազնվությունը: Անհրաժեշտության դեպքում կիսվեք հետևյալ օրինակներով:

  1. Դուք կարևոր քննություն ունեք հանձնելու: Ձեր դասընկերներից մեկը նկատում է քննության պատասխանների օրինակներն ուսուցչի սեղանին և լուսանկարում է այն ​​իր հեռախոսով: Նա ձեզ և մի քանի այլ ուսանողի ուղարկում է այդ նկարները:

  2. Դուք պետք է ակնարկ գրեք՝ դասին ներկայացնելու համար, բայց ժամանակ չունեք անելու դա: Ձեր ընկերներից մեկն առաջարկում է օգտվել առցանց ծրագրից, որը ձեր փոխարեն կգրի ձեր ակնարկը: Կամ իրար միացնել համացանցից վերցված տարբեր հոդվածների մասերը և ձեր կողմից ավելացնել մի քանի նախադասություն, որպեսզի տպավորություն ստեղծվի, թե այն դուք եք գրել: Ձեր ընկերը նշում է, որ նա նախկինում նման բան արել է, և ուսուցիչը ոչ մի անգամ չի նկատել:

    • Ի՞նչը կարող է ստիպել մարդուն մտածել, որ այդ գործողությունները լավ գաղափար են:

    • Ի՞նչը կարող է օգնել ձեզ իմանալ, թե ինչպես վարվել նման իրավիճակներում:

Բացատրեք, որ այս դասը կկենտրոնանա մեր կրթության մեջ ազնվության և շիտակության կարևորության վրա: Ուսանողներին առաջարկեք կիսվել, թե ինչ գիտեն շիտակության մասին: Երեց Ջոզեֆ Բ. Վիրթլինի հետևյալ խոսքերը կարող են օգտակար լինել:

Տասներկու Առաքյալների Քվորումից երեց Ջոզեֆ Բ. Վիրթլինը (1917–2008) շիտակությունը սահմանել է հետևյալ կերպ.

Երեց Ջոզեֆ Բ. Վիրթլին

Շիտակությունը նշանակում է անել այն, ինչը ճիշտ է և բարի՝ անկախ դրա անմիջական հետևանքներից: Դա նշանակում է լինել արդարակյաց մինչև մեր հոգու խորքը՝ ոչ միայն մեր գործերով, այլ որ ավելի կարևոր է՝ մեր մտքերով ու սրտով: Անձնական շիտակությունը ենթադրում է այնպիսի արժանահավատություն և անկաշառություն, որ մենք անընդունակ ենք ստել վստահությանը կամ ուխտին …

Աշխարհին անհրաժեշտ են շիտակ տղամարդիկ և կանայք: Գրեթե ամեն օր մենք լսում ենք խարդախության, միջոցների ոչ նպատակային օգտագործման, կեղծ գովազդի կամ այլ գործարքների մասին, որոնց նպատակը խաբեությամբ և խարդախությամբ շահույթ ստանալն է: Տիրոջ համար նման բաներն անընդունելի են: (Ջոզեֆ Բ. Վիրթլին, «Personal Integrity», Ensign, մայիս 1990, 30, 32)

  • Ինչպե՞ս եք նկատել, որ այսօրվա աշխարհը շիտակության անհրաժեշտություն ունի։

Հետևյալ առաջարկը կարող է օգնել ուսանողներին գնահատել իրենց կրթության մեջ շիտակությամբ գործելու կարևորության վերաբերյալ իրենց անձնական մտքերը. առաջարկեք նրանց իրենց օրագրերի որևէ դատարկ էջում գրել «Ինչու է ինձ համար կարևոր շիտակությունը կրթության մեջ» վերնագիրը։ Ուսանողներին խնդրեք գրել բոլոր պատճառները, թե ինչու է շիտակությունը կարևոր իրենց համար: Երբ նրանք ավարտեն, մի քանի պատրաստակամ ուսանող կարող են դասարանի հետ կիսվել իրենց նշած պատճառներից մի քանիսով:

Խրախուսեք ուսանողներին դասի ընթացքում շարունակել իրենց գրածին ավելացնել գաղափարներ, ճշմարտություններ և սուրբ գրություններ:

Երկնային Հայրը և Հիսուս Քրիստոսը ցանկանում են, որ մենք գործենք շիտակությամբ

Բացատրեք, որ Երկնային Հոր և Հիսուս Քրիստոսի էության և ուսմունքների մասին հասկացողությունը կարող է ոգեշնչել մեզ գործել շիտակությամբ: Ուսանողներին առաջարկեք կատարել հետևյալ ուսումնական վարժությունը զուգընկերոջ հետ կամ փոքր խմբերով:

Կարդացեք հետևյալ սուրբ գրությունները՝ փնտրելով ուսմունքներ, որոնք կարող են օգնել մեզ շիտակությամբ գործելու ավելի մեծ ցանկություն զգալ. 3 Նեփի 27.18, Եթեր 3.11–12, Վարդապետություն և Ուխտեր 3.2, 51․9, 124․15, 20, Հավատո Հանգանակը 1․13։

  • Ի՞նչ ճշմարտություններ սովորեցիք այդ հատվածներից ազնվության և շիտակության կարևորության մասին մեր կյանքում:

    Ուսանողներին առաջարկեք կիսվել իրենց սովորած մի քանի ճշմարտությամբ։ Նրանք կարող են նշել նմանատիպ ճշմարտություններ. Երկնային Հայրը և Հիսուս Քրիստոսը կատարելապես ազնիվ են: Ազնվությամբ և շիտակությամբ գործելիս մենք ավելի ենք նմանվում Նրանց:

  • Ի՞նչը կարող է խանգարել մեզ ազնվությամբ և շիտակությամբ գործել մեր կրթության մեջ:

Տասներկու Առաքյալների Քվորումից երեց Նիլ Լ. Անդերսենն ուսուցանել է, թե շիտակությունն ինչպիսի ազդեցություն կարող է ունենալ մեր հոգևոր աճի վրա.

Երեց Նիլ Լ. Անդերսեն

Հավատարիմ և ազնիվ մնալը հսկայական հոգևոր ուժ է տալիս, երբ ձեր ազնվության հետևանքները կարող են թերություններ թվալ: Ձեզանից յուրաքանչյուրը կբախվի նման որոշումների հետ: Այդ որոշիչ պահերը կստուգեն ձեր շիտակությունը: Երբ դուք ընտրեք ազնվությունն ու ճշմարտությունը, անկախ նրանից, իրավիճակն աշխատում է ձեր օգտին, թե ոչ, դուք կգիտակցեք, որ այս կարևոր խաչմերուկները դառնում են ձեր հոգևոր աճի հիմնարար սյուները: (Նիլ Լ. Անդերսեն, «The Divine Standard of Honesty», Ensign, օգօստ. 2017, 40)

  • Որո՞նք են աշխատավայրում և դպրոցում ազնիվ և շիտակ լինելու օգուտներն ու օրհնությունները:

Ուսանողներին առաջարկեք կիսվել իրենց ունեցած փորձառություններով, երբ տեսնել են Տիրոջ օրհնությունները՝ իրենց կրթության մեջ ազնվություն դրսևորելիս: Որպեսզի օգնեք ուսանողներին տեսնել շիտակության օրինակները, ցուցադրեք «Honesty: You Better Believe It!» (4:46) տեսանյութը, որը հասանելի է ChurchofJesusChrist.org։

4:46

Կիրառեք ձեր սովորածը

Հիշեցրեք ուսանողներին իրենց աստվածային ինքնության մասին՝ որպես սիրող երկնային ծնողների զավակներ: Դա նրանց ով լինելու մի մասն է, այդ թվում՝ դպրոցում: Երբ նրանք հետևեն Հիսուս Քրիստոսին և գործեն ազնվությամբ և շիտակությամբ, այդ հատկանիշների շնորհիվ կտարբերվեն աշխարհի մյուս մարդկանցից:

Նախագահ Ռասսել Մ. Նելսոնն ուսուցանել է․

Նախագահ Ռասսել Մ. Նելսոն

Ձեր արժեքավոր ինքնությունն արժանի է ձեր արժեքավոր շիտակությանը: Պահպանեք այն որպես անգին մրցանակ: (Ռասսել Մ. Նելսոն, «Integrity of Heart» [Բրիգամ Յանգ Համալսարանի հոգևոր հավաք, փետրվար 23, 1993], 7, speeches.byu.edu)

Որպեսզի օգնեք ուսանողներին մտածել, թե իրենք ինչպես կարող են պաշտպանել կամ մեծացնել իրենց ազնվությունն ու շիտակությունը, խնդրեք նրանց իրենց օրագրերում պատասխանել հետևյալ հարցերից մի քանիսին կամ բոլորին:

  • Ի՞նչ զգացիք այսօր կրթության մեջ շիտակության մասին, որը կցանկանայիք հիշել:

  • Ի՞նչ սովորեցիք Երկնային Հոր և Հիսուս Քրիստոսի մասին, որը կօգնի ձեզ, երբ գայթակղվեք և գործեք անազնիվ:

  • Որո՞նք են այն մեկ կամ երկու գործողությունները, որոնք դուք կարող եք կատարել դպրոցում՝ ձեր ազնվությունն ու շիտակությունը մեծացնելու համար:

Մի քանի պատրաստակամ ուսանողի առաջարկեք կիսվել իրենց պատասխաններով։ Վկայեք ձեր քննարկած ճշմարտությունների մասին և ուսանողներին հորդորեք գործել իրենց ծրագրերի համաձայն։