“Lēsoni 195—Ko Hono Fakakau ʻa e ʻEikí ʻi Hoʻo Akó: ‘Te u ʻIate Koe,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Ko Hono Fakakau ʻa e ʻEikí ʻi Hoʻo Akó,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 195: Ko e Lavameʻa ʻi he Akó
Ko Hono Fakakau ʻa e ʻEikí ʻi Hoʻo Akó
“Te u ʻIate Koe”
ʻOku fie tokoniʻi kitautolu ʻe he Tamai Hēvaní mo Sīsū Kalaisi ʻi he tapa kotoa pē ʻo ʻetau moʻuí, kau ai ʻetau feinga ke ako mo maʻu ha ako fakaʻatamai. ʻE lava ke tokoni ʻa e lēsoni ko ʻení ki he kau akó ke fakakau ʻa e ʻEikí ʻi he tafaʻaki kotoa pē ʻo ʻenau ako fakaʻatamaí ʻi heʻenau fekumi ki he ʻiló ʻi he ako pea ʻi he tui.
Ngaahi ʻEkitivitī Ako ʻOku Ala Fakahokó
Ngaahi tūkunga faingataʻá
Te ke lava ʻo kamata e kalasí ʻaki hano vahevahe e ngaahi tūkunga ko ʻení pea aleaʻi fakakalasi kinautolu. ʻO ka fiemaʻu, fulihi ʻa e ngaahi tūkungá ke feʻunga lelei ange mo e ngaahi fiemaʻu hoʻo kau akó.
Fakakaukauloto ʻokú ke ʻi ha taha pe lahi ange ʻo e ngaahi tūkunga ko ‘ení:
-
ʻOkú ke lotofoʻi ʻi ha lēsoni ʻi he akó pea ʻokú ke fie tukuange ia.
-
ʻOku ʻi ai haʻo ngaahi fehuʻi fekauʻaki mo e hoko atu hoʻo akó ʻi hoʻo kei talavoú. ʻOku ʻikai te ke ʻilo ʻa e feituʻu ʻoku totonu ke hoko atu ai hoʻo akó pe ʻoku totonu nai ke hoko atu hoʻo akó.
-
Ko ho ʻuluaki uiké ʻeni ʻi ha ngāueʻanga foʻou pea ʻoku ʻikai ke ke ongoʻi feʻunga mo e ngāué pe ngaahi fatongiá.
Ko e hā ha meʻa te ke fai kapau naʻá ke ʻi he taha ʻo e ngaahi tūkunga ko ʻení? Ko hai te ke kumi tokoni ki aí?
Fakakaukau ke fehuʻi ki he kau akó pe kuo nau aʻusia pe ko ha kakai ʻoku nau ʻilo ha ngaahi tūkunga tatau mo ʻeni. Te ke lava ʻo fakaafeʻi kinautolu ke vahevahe ʻa e meʻa naʻa nau fai pe ko e niʻihi kehé ke maʻu ha tokoní.
Fakamatalaʻi ange ʻe ako ʻe he kau akó ʻi he lēsoni ko ʻení ʻa e mahuʻinga ʻo hono fakakau ʻa e ʻEikí ʻi he tapa kotoa pē ʻo ʻenau moʻuí, kau ai ʻenau akó. Ke tokoniʻi kinautolu ke nau teuteu ke ako ʻa e tefito ko ʻení, fakaʻaliʻali ʻa e ngaahi fehuʻi ko ʻení pea fakaafeʻi e kau akó ke tali kinautolu ʻi heʻenau tohinoa akó.
Tuku ha taimi ke ke fakakaukau ai ki he ngaahi fakamatala ko ʻení ʻo fakaʻaongaʻi ha meʻafua ʻo e 1 (teʻeki ai ʻaupito) ki he 5 (tuʻo lahi ʻaupito):
-
ʻOku ou lotua ha tokoni ki he Tamai Hēvaní kimuʻa peá u ako pe kamata ha ngāue ki he akó.
-
ʻI heʻeku ngaahi lotu fakatāutahá, ʻoku ou fakahā ki he Tamai Hēvaní ke Ne ʻafioʻi ʻa ʻeku holi ke maʻu ʻa e Laumālié ʻi heʻeku ako ʻi ʻapiakó.
-
ʻOku ou feinga maʻu pē ke fakalakalaka ʻeku feinga ke ako ʻi he tokoni ʻa Sīsū Kalaisí.
-
ʻOku ou falala mo ʻiloʻi ʻa e tokoni ʻa e Laumālié ʻi heʻeku akó mo e ako fakaʻatamaí.
Fakaafeʻi e kau akó ke kumi ha ngaahi akonaki ʻe lava ʻo tokoni kiate kinautolu ke nau fakakau kakato ange ʻa e ʻEikí ʻi heʻenau akó mo e ako fakaʻatamaí.
Ako mei he kau ako ʻi he folofolá
Fakamatalaʻi ange ʻoku ʻi he folofolá ha ngaahi sīpinga lahi ʻo ha kakai naʻa nau fakakau ʻa e ʻEikí ke tokoni ke nau maʻu ha mahino mo ikunaʻi ʻa e ngaahi faingataʻá. Fakakaukau ke vahevahe e kau akó ki ha fanga kiʻi kulupu iiki ke fakakakato ʻa e ʻekitivitī ako ko ʻení. Vahe ki he kulupu takitaha ha taha ʻo e ngaahi sīpinga ko ʻení ke nau ako, pea aleaʻi leva ʻa e ongo fehuʻi ʻoku hoko maí.
Ako e ngaahi potufolofola ko ʻení fekauʻaki mo ha kakai ne nau fehangahangai mo ha ngaahi tūkunga faingataʻa mo taʻepau. Kumi ha ngaahi sīpinga ʻo e founga naʻe fakakau ai ʻe he niʻihi fakafoʻituitui ko ʻení ʻa e ʻEikí ʻi heʻenau fekumi ki ha mahinó.
-
Siosefa Sāmita (Siosefa Sāmita—Hisitōlia 1:10–18)
-
Nīfai (1 Nīfai 11:1–9)
-
Ko e Tokoua ʻo Sēletí (ʻEta 1:38–42; 2:22–25; 3:1–6)
-
Naʻe fakakau fēfē ʻe he kakai ko ʻení ʻa e ʻEikí ʻi heʻenau akó?
-
Ko e hā ha ngaahi founga naʻe tokoniʻi ai kinautolu ʻe he ʻEikí?
Hili hono maʻu ʻe he kau akó ha taimi feʻunga ke ako mo alēlea aí, fakaafeʻi e kau mēmipa ʻo e kulupu takitaha ke lipooti e meʻa ne nau aleaʻí ʻaki hono vahevahe ʻenau tali ki he ngaahi fehuʻi kimuʻá.
-
Makatuʻunga ʻi he meʻa kuó ke akó, te ke fakakakato fēfē ʻa e fakamatala ko ʻení? ʻI heʻetau fakakau ʻa e ʻEikí ʻi heʻetau akó, te Ne lava …
ʻE lava ke fakakakato ʻe he kau akó ʻa e fakamatala ko ʻení ʻi ha ngaahi founga tatau mo ʻení: ʻI heʻetau fakakau ʻa e ʻEikí ʻi heʻetau akó, te Ne lava ʻo ʻomi kiate kitautolu ha mahino naʻe ʻikai ke tau mei lava ʻo maʻu ʻiate kitautolu pē.
-
Ko e hā e meʻa ʻokú ke ʻilo fekauʻaki mo e ʻEikí ʻokú ne ʻoatu ha loto-falala te Ne tokoniʻi koe ʻi hoʻo akó?
Ngaahi founga ke fakakau ai ʻa e ʻEikí ʻi hoʻo akó
-
ʻI hoʻo ngāue fakaakó, ko e fē taimi ʻe tokoni ai ke fakakau mai ʻa e ʻEikí?
Kapau ʻe fiemaʻu, tokoni ki he kau akó ke fakakaukau ki he ngaahi tali ki he fehuʻi kimuʻá. ʻE lava ke kau ʻi he ngaahi sīpingá ʻa hono fai ʻo e ngāue fakaako mei ʻapí, fai ha ngaahi sivi, ako ʻi he kalasí, mo ngāue ʻi he ngaahi ngāue pe ngāue fakakalasí. ʻE lava ke ke hiki e ngaahi fakakaukau ʻa e kau akó ʻi he palakipoé.
Hili iá pea ʻoange ki he kau akó ʻa e ngaahi fakahinohino ko ʻení ke tokoni ke nau fakakaukau ki ha ngaahi founga te nau lava ai ʻo fakakau ʻa e ʻEikí ʻi he ngaahi sīpinga naʻa nau ʻiló. ʻE lava ke fakahoko fakafoʻituitui ʻeni ʻe he kau akó, mo ha hoa, pe ʻi ha kulupu tokosiʻi.
Hiki ʻa e kupuʻi lea te u lava ʻo fakakau ʻa e ʻEikí ʻi heʻeku akó ʻaki … ʻi ha peesi ʻi hoʻo tohinoa akó. Hiki ki he lahi tahá ʻa e ngaahi fakakaukau te ke lava ʻo fakakaukau ki ai ki hono fakakau ʻo e ʻEikí ʻi he ngaahi ʻekitivitī fekauʻaki mo e akó naʻá ke ʻiló.
Hili hono hiki ʻe he kau akó ʻenau lisí, fakaafeʻi kinautolu ke vahevahe ʻenau ngaahi fakakaukaú mo e kalasí. Te ke lava ʻo faʻu ha lisi ʻi he palakipoé pea tānaki atu ki ai e ngaahi fakakaukau ʻa e kau akó.
Kapau ʻe fiemaʻu, te ke lava ʻo ʻoange ha ngaahi sīpinga ʻo ha ngaahi fakakaukau: lotua ha tokoni ʻi hono manatuʻi ʻo e ngaahi meʻa kuó ke ako kimuʻa he ngaahi siví, ngaahi ngāué, pe ngaahi ngāue ke faí; fakahaaʻi hoʻo houngaʻia ʻi he tokoni ʻa e ʻOtuá mo e ngaahi faingamālie kuó Ne foaki atu ke ke ako aí; lekooti e ngaahi aʻusia kuó ke maʻu ʻi hoʻo fakakau ʻa e ʻEikí ʻi hoʻo akó; ʻaukai mo lotua ha holi lahi ange ke ako; fakamuʻomuʻa ʻa e ʻOtuá ʻaki hono tuku ha taimi ke fai ai ʻa e lotu mo e ako folofola fakaʻahó.
-
Ko e hā ha ngaahi sīpinga kuó ke maʻu ʻi hoʻo fakakau ʻa e ʻEikí ʻi hoʻo akó?
Fakakaukau ke fakakau ʻi he alēleá hono huluʻi ʻo e “Tupulaki Lahi Ange ʻia Kalaisi: Ko e Talanoa Fakatātā ʻo e Lainé” mei he taimi 0:00 ki he 1:05. ʻOku maʻu ʻa e vitioó ni ʻi he ChurchofJesusChrist.org. ʻI he vitioó, ʻoku fakamatalaʻi ai ʻe ʻEletā Kalake G. Kilipati ʻo e Kau Fitungofulú ʻa ʻene aʻusia ʻi heʻene fakakau ʻa e ʻEikí ʻi heʻene akó.
Fakakaukauloto pea ngāueʻi e ngaahi moʻoní
Fakakaukau ke fakaafeʻi ʻa e kau akó ke nau fakakaukau ki ha ngaahi founga te nau lava ʻo fakaʻaongaʻi ʻa e meʻa kuo nau ako fekauʻaki mo e founga ke fakakau ai ʻa e ʻEikí ʻi heʻenau akó. ‘E lava ke nau tali e ongo fehuʻi ko ʻení ‘i heʻenau tohinoa akó.
-
Ko e hā ha meʻa kuó ke ako pe ongoʻi fekauʻaki mo e ʻEikí ʻokú ne ʻai ke ke fie fakakau Ia ʻi hoʻo akó?
-
Ko e hā ha ngāue ʻe taha pe ua te ke lava ʻo fai ke fakakau ʻa e ʻEikí ʻi hoʻo akó?
Fakakaukau ke fakaafeʻi e kau akó ke vahevahe mo e kalasí ʻa e meʻa kuo nau ongoʻi mo akó. Fakamoʻoni ki he ngaahi moʻoni kuo mou aleaʻí, pea poupouʻi e kau akó ke ngāueʻi ʻenau ngaahi palaní pea ngāueʻi e ngaahi ongo ʻoku nau maʻu mei he Laumālié.