“Lēsoni 196—Angatonu ʻi Heʻetau Akó: ‘ʻOku Mau Tui ʻOku Totonu Ke Faitotonu,’” Tokāteline mo e Ngaahi Fuakavá – Tohi Lēsoni ʻa e Faiako Seminelí (2025)
“Angatonu ʻi Heʻetau Akó,” Tokāteline mo e Ngaahi Fuakavá – Tohi Lēsoni ʻa e Faiako Seminelí
Lēsoni 196: Ko e Lavameʻa ʻi he Akó
Angatonu ʻi Heʻetau Akó
“ʻOku Mau Tui ʻOku Totonu ke Faitotonu”
ʻI heʻetau fāifeinga ke hoko ko e kau ākonga lavameʻa mo falalaʻanga ʻo Sīsū Kalaisí, ʻoku mahuʻinga ke tau faitotonu mo angatonu ʻi hotau lotó. ʻE lava ke tokoniʻi ʻe he lēsoni ko ʻení ʻa e kau akó ke nau ngāue lelei ange ʻi he faitotonu mo angatonu ʻi heʻenau akó.
Ngaahi ʻEkitivitī Ako ʻOku Ala Fakahokó
Ko e fili ki he angatonú mo e faitotonú
Fakaafeʻi e kau akó ke nau vahevahe ha ngaahi tūkunga ʻi he akó ʻe lava ke siviʻi ai e angatonu ʻa ha taha. Vahevahe ʻa e ngaahi sīpinga ko ʻení ʻo ka fiemaʻu.
-
ʻOku ʻi ai haʻo sivi mahuʻinga ʻokú ke hanganaki atu ki ai. ʻOku fakatokangaʻi ʻe ha kaungā ako ha tatau ʻo e ngaahi tali ki he siví ʻi he tesi ʻo e faiakó peá ne faitaaʻi ia ʻaki ʻene telefoní. ʻOkú ne ʻoatu kiate koe mo ha kau ako kehe ha tatau ʻo e fakatātaá.
-
ʻOku fiemaʻu ke ke faʻu ha ʻēsei ki ha kalasi ka ʻoku teʻeki ʻi ai haʻo taimi ke fakahoko ia. ʻOku fokotuʻu atu ʻe ha kaungāmeʻa te ke lava ʻo fakaʻaongaʻi ʻa e polokalama fakakomipiuta ʻi he ʻinitanetí ʻa ia te ne faʻu hoʻo fakamatalá maʻau. Pe ko hoʻo fakapipiki ha ngaahi konga mei he ngaahi fakamatala kehekehe mei he ʻinitanetí pea fakakau ai ha niʻihi ʻo hoʻo ngaahi sētesí ke hangē pē naʻá ke faʻú. ʻOku talaatu ho kaungāmeʻá kuó ne fai e ngaahi meʻá ni kimuʻa pea naʻe ʻikai teitei fakatokangaʻi ia ʻe he faiakó.
-
Ko e hā ha meʻa te ne ala tataki ha taha ke fakakaukau ko ha fakakaukau lelei ʻa e ngaahi angafai ko ʻení?
-
Ko e hā ha meʻa ʻe lava ʻo tokoni atu ke ke ʻiloʻi e meʻa ke fai ʻi he ngaahi tūkunga pehení?
-
Fakamatalaʻi ange ʻe nofotaha ʻa e lēsoni ko ʻení ʻi he mahuʻinga ʻo e faitotonu mo e angatonu ʻi heʻetau akó. Fakaafeʻi e kau akó ke vahevahe e meʻa ʻoku nau ʻilo fekauʻaki mo e angatonú. ʻE lava ke hoko ʻa e lea ko ʻeni ʻa ʻEletā Siosefa B. Uefilini ko ha maʻuʻanga tokoni ʻaonga.
Naʻe fakaʻuhingaʻi ʻe ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e angatonú ʻi he foungá ni:
ʻOku ʻuhinga ʻa e angatonú ke fakahoko maʻu pē ʻa e meʻa ʻoku totonu mo leleí, tatau ai pē pe ko e hā hono ngaahi nunuʻá. ʻOku ʻuhinga ia ke anga māʻoniʻoni ʻo kamata mei he takele ʻo hotau lotó, ʻo ʻikai ngata pē ʻi heʻetau ngaahi ngāué, kae mahuʻinga tahá, ʻi heʻetau ngaahi fakakaukaú pea ʻi hotau lotó. ʻOku ʻuhinga ʻa e angatonu fakatāutahá ki he falalaʻanga mo e haohaoa ʻa ia ʻoku ʻikai ke tau lava ʻo loi ki ha falala pe fuakava. …
ʻOku fuʻu fiemaʻu moʻoni ʻe he māmaní ha kakai tangata mo fafine angatonu. ʻOku meimei ke tau fanongo he ʻaho kotoa pē ki he kākaá, ngāue hala ʻaki e paʻangá, tuʻuaki loí, pe ngaahi fengāueʻaki kehe naʻe fakataumuʻa ke maʻu ha tupu ʻi he kākaá pe faihalá. ʻOku ʻikai hoifua ʻa e ʻEikí ki he faʻahinga tōʻonga peheé. (Joseph B. Wirthlin, “Personal Integrity,” Ensign, May 1990, 30, 32)
-
Kuó ke fakatokangaʻi fēfē ʻa e fiemaʻu ki he angatonú ʻi he māmani ʻo e ʻaho ní?
ʻE lava ke tokoni ʻa e fokotuʻu ko ʻení ke vakaiʻi ʻe he kau akó ʻenau ngaahi fakakaukau fekauʻaki mo e mahuʻinga ʻo e ngāue angatonu ʻi heʻenau akó: Fakaafeʻi kinautolu ke kumi ha peesi ʻatā ʻi heʻenau tohinoa akó pea fakahingoa ia “Ko e ʻuhinga ʻoku mahuʻinga ai kiate au ʻa e angatonu ʻi he akó.” Kole ki he kau akó ke hiki kotoa e ngaahi ʻuhinga ʻoku mahuʻinga ai ʻa e angatonú kiate kinautolú. ʻI heʻenau ʻosí, ʻe lava ke vahevahe ʻe ha niʻihi ʻe loto-fiemālié ha niʻihi ʻo ʻenau ngaahi ʻuhingá mo e kalasí.
Poupouʻi e kau akó ke hokohoko atu hono tānaki ha ngaahi fakakaukau, ngaahi moʻoni, mo ha ngaahi potufolofola ki heʻenau lisí lolotonga e lēsoní.
ʻOku finangalo ʻa e Tamai Hēvaní mo Sīsū Kalaisi ke tau angatonu
Fakamatalaʻi ange ʻe lava ke fakaʻaiʻai ʻe he mahino kiate kitautolu e ʻulungaanga mo e ngaahi akonaki ʻa e Tamai Hēvaní mo Sīsū Kalaisí ke tau ngāue ʻi he angatonu. Fakakaukau ke fakaafeʻi e kau akó ke fakahoko ʻa e ʻekitivitī ako ko ʻení mo ha hoa pe ʻi ha kulupu tokosiʻi.
Lau ʻa e ngaahi potufolofola ko ʻení, ʻo kumi ha ngaahi akonaki ʻe lava ʻo tokoni ke tau ongoʻi ha holi lahi ange ke ngāue ʻi he angatonu: 3 Nīfai 27:18; ʻEta 3:11–12; Tokāteline mo e Ngaahi Fuakava 3:2; 51:9; 124:15, 20; Ngaahi Tefito ʻo e Tuí 1:13.
-
Ko e hā ha ngaahi moʻoni naʻá ke ako mei he ngaahi veesi ko ʻení fekauʻaki mo e mahuʻinga ʻo e faitotonú mo e angatonú?
Fakaafeʻi e kau akó ke vahevahe ha ngaahi moʻoni naʻa nau ako. Te nau lava ʻo ʻiloʻi ha ngaahi moʻoni hangē ko ʻení: ʻOku faitotonu haohaoa ʻa e Tamai Hēvaní mo Sīsū Kalaisi. ʻI he taimi ʻoku tau ngāue ai ʻi he faitotonu mo e angatonú, ʻoku tau hoko ai ʻo hangē ange ko Kinauá.
-
Ko e hā ha meʻa te ne lava ʻo ʻai ke faingataʻa ʻa e ngāue faitotonu mo angatonu ʻi heʻetau akó?
Naʻe akonaki ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá fekauʻaki mo e lelei ʻo e angatonú ʻi heʻetau tupulaki fakalaumālié:
ʻOku ʻi ai ha mālohi fakalaumālie lahi ʻi he tuʻu maʻu he moʻoní mo e faitotonú, ʻi he taimi ʻe hangē ai ʻoku fakamamahi e ola hoʻo faitotonú. Te mou fehangahangai kotoa mo ha fili pehē. ʻE siviʻi hoʻo angatonú ʻi he ngaahi momeniti mahuʻinga ko ʻení. ʻI hoʻo fili ʻa e faitotonú mo e moʻoní—tatau ai pē pe ʻoku fenāpasi ʻa e tūkungá mo e meʻa ʻokú ke fakaʻamu ki aí—te ke ʻiloʻi ʻoku hoko ʻa e ngaahi vaaʻi hala mahuʻinga ko ʻení ko e ngaahi poutuliki mahuʻinga ia ʻo e ivi ʻi hoʻo tupulaki fakalaumālié. (Neil L. Andersen, “Ko e Tuʻunga Fakalangi ʻo e Faitotonú,” Liahona, ʻAokosi 2017, 40)
-
Ko e hā ha ngaahi lelei mo ha ngaahi tāpuaki ʻo e faitotonú mo e angatonu ʻi he ngāué mo e akó?
Fakaafeʻi e kau akó ke vahevahe ha ngaahi aʻusia kuo nau maʻu ʻi haʻanau vakai ki he ngaahi tāpuaki ʻa e ʻEikí ʻi hono fakahaaʻi ʻo e angatonú ʻi heʻenau akó. Te ke lava ʻo huluʻi ʻa e vitiō “Honesty: You Better Believe It!” (4:46), ʻoku maʻu ʻi he ChurchofJesusChrist.org, ke tokoniʻi ke ʻilo ʻe he kau akó e ngaahi sīpinga ʻo e angatonú.
Fakaʻaongaʻi e meʻa kuó ke akó
Fakamanatu ki he kau akó honau tuʻunga fakalangi ko e fānau ʻa ha ongomātuʻa fakalangí. Ko ha konga ʻeni ʻo honau tuʻungá, ʻo kau ai ʻenau ʻi he akó. ʻI heʻenau muimui ʻia Sīsū Kalaisi mo ngāue faitotonu mo e angatonú, ʻe fakafaikehekeheʻi kinautolu ʻe he ngaahi tōʻonga ko ʻení mei he toenga ʻo e māmaní.
Naʻe akonaki ʻa Palesiteni Lāsolo M. Nalesoni ʻo pehē:
ʻOku taau mo ho tuʻunga mahuʻingá ʻa hoʻo angatonu mahuʻingá! Maluʻi ia ʻo hangē ko hono mahuʻingá. (Russell M. Nelson, “Integrity of Heart” [fakataha lotu ʻi he ʻUnivēsiti Pilikihami ʻIongí, 23 Fēpueli, 1993], 7, speeches.byu.edu)
Ke tokoni ki he kau akó ke fakakaukau ki he founga te nau maluʻi pe fakatupulaki ai ʻenau faitotonú mo e angatonú, kole ange ke nau tali ha niʻihi pe kotoa ʻo e ngaahi fehuʻi ko ʻení ʻi heʻenau tohinoa akó.
-
Ko e hā e meʻa kuó ke ongoʻi he ʻahó ni fekauʻaki mo e angatonu ʻi he akó ʻokú ke loto ke manatuʻí?
-
Ko e hā e meʻa naʻá ke ako fekauʻaki mo e Tamai Hēvaní mo Sīsū Kalaisi te ne tokoniʻi koe ʻi he taimi ʻoku ʻahiʻahiʻi ai koe ke ke ngāue taʻefaitotonú?
-
Ko e hā ha ngāue ʻe taha pe ua te ke fai ke fakatupulaki hoʻo faitotonu mo e angatonu ʻi he akó?
Fakakaukau ke fakaafeʻi ha kau ako ʻe niʻihi ʻoku nau fie vahevahe ʻenau talí. Fakamoʻoni ki he ngaahi moʻoni kuo mou aleaʻí, pea poupouʻi e kau akó ke ngāueʻi ʻenau palaní.