Ko e Lavameʻa ʻi he Akó

Ko e Lavameʻa ʻi he Akó

Vakai Fakalūkufuá

ʻI heʻetau fakakau ʻa e ʻEikí ʻi heʻetau akó, te Ne lava ʻo tokoniʻi kitautolu ke tau lavameʻa ʻi he akó. Te tau lava ʻo muimui ki he sīpinga ʻa Sīsū Kalaisí ʻaki ʻetau ngāue angatonu ʻi heʻetau ngāue fakaakó. ʻOku ʻomi ʻe hono manatuʻi ʻo e ʻEikí mo e meʻa te Ne lava ʻo fai maʻatautolú ha loto-falala ke tau ikunaʻi ʻa e ngaahi faingataʻa ʻi he akó.

Fokotuʻu ki he vave hono akoʻí: Fakakaukau ke akoʻi ha konga pe kotoa ʻo e ngaahi lēsoni ko ʻení ʻi he kamataʻanga ʻo e taʻu fakaakó. ʻE lava ke tokoni hono fai iá ke ako ʻe he kau akó ha ngaahi taukei mahuʻinga ʻe tokoni ke nau aʻusia ha lavameʻa ʻi heʻenau ako fakaʻatamai ʻi he taʻú kakato.

Teuteu ke akoʻí

ʻOku ʻoatu ʻe he fakamatala ko ʻení ha ngaahi fakakaukau ki he meʻa ʻe ala fiemaʻu ke teuteuʻi kimuʻa ‘i he lēsoni takitaha.

Ko Hono Fakakau ʻa e ʻEikí ʻi Hoʻo Akó

Taumuʻa ʻo e lēsoní: Ke tokoni ke fakakau ʻe he kau akó ʻa e ʻEikí ʻi he tafaʻaki kotoa pē ʻo ʻenau ako fakaʻatamaí ʻi heʻenau fekumi ki he ʻiló ʻi he ako pea ʻi he tui.

• Teuteu ʻa e tokotaha akó: Fakaafeʻi ʻa e kau akó ke nau fakakaukau ki ha taimi pau naʻe pau ai ke nau ako ha meʻa foʻou pe faingataʻa. ʻAi ke nau omi mateuteu ke vahevahe ʻa e founga kuo nau fakakau ai ʻa e Tamai Hēvaní mo Sīsū Kalaisi ʻi heʻenau akó.

• Meʻa ke fakaʻaliʻalí: Ko e fakamatala vakaiʻi fakaekita ʻe fā ʻi he kamataʻanga ʻo e lēsoní

• Vitiō: “Tupulaki Lahi Ange ʻia Kalaisi: Ko e Talanoa Fakatātā ʻo e Lainé” (10:01; mamata mei he taimi 0:00 ki he 1:05)

Faitotonu ʻi Heʻetau Akó

Taumuʻa ʻo e lēsoní: Ke tokoni ke ngāue lelei ange e kau akó ʻi he faitotonu mo e angatonu ʻi heʻenau akó.

• Teuteu ʻa e tokotaha akó: Fakaafeʻi e kau akó ke fakakaukau ki heʻenau ngāue fakaako ʻi he kuohilí ʻa ia naʻa nau fehangahangai ai mo ha fili ke kākā pe taʻefaitotonu pea nau fili ke ʻoua ʻe fakahoko ia. Fakaafeʻi ke nau fakalaulauloto ki he ʻuhinga naʻe ʻaonga aí pea mo e meʻa naʻá ne ʻoange kiate kinautolu ʻa e mālohi ke fai ʻa e fili ko ʻení.

• Vitiō: “Honesty: You Better Believe It!” (4:46)

Ko e Teuteu ki he Ngaahi Siví mo e Ngaahi Ngāue Faingataʻá

Taumuʻa ʻo e lēsoní: Ke tokoni ke mahino ki he kau akó ʻa e ngaahi founga ke teuteu lelei ai ki he ngaahi siví mo e ngaahi ngāue faingataʻá.

• Teuteu ʻa e tokotaha akó: Fakakaukau ke fakaafeʻi ʻa e kau akó ke fakakaukau ki ha taimi naʻa nau ongoʻi ne tokoniʻi ai kinautolu ʻe he Fakamoʻuí ʻi ha sivi pe ko ha ngāue fakaako faingataʻa. Poupouʻi kinautolu ke nau fakalaulauloto pea omi mateuteu ke vahevahe ʻa e ongo mei hono maʻu iá.

• Meʻa ke fakaʻaliʻalí: Ngaahi fehuʻi ke fakakaukau ki ai e kau akó ʻi lalo ʻi he ʻuluʻi tohi “Fai ha faleʻí”

Fakakaukau ʻOku Tupulaki

Taumuʻa ʻo e lēsoní: Ke tokoni ke fakatupulaki ʻe he kau akó ha fakakaukau ʻoku tupulakí ke ikunaʻi ʻa e ngaahi fakafeʻātungia ʻi he akó.

• Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi faingataʻa ʻoku nau fehangahangai mo ia ʻi he akó pe ʻi heʻenau akó. Poupouʻi kinautolu ke fakakaukau ki he anga ʻo ʻenau talí ʻi he taimi ʻoku nau fehangahangai ai mo e ngaahi fakafeʻātungia ko ʻení.

• Meʻa ke fakaʻaliʻalí: ʻUhinga ʻo e ngaahi fakakaukau ʻoku tupulakí mo e ngaahi fakakaukau tuʻu maʻú; saati ʻoku fakaʻaliʻali ai ha ngaahi fakamatala ki he ngaahi fakakaukau ʻoku tupulakí mo e ngaahi fakakaukau tuʻu maʻú