Lesson 196: Pagtatagumpay sa Paaralan

Integridad sa Ating Pag-aaral

“Naniniwala Kami sa Pagiging Matapat”

Habang sinisikap nating maging mga may kakayahan at pinagkakatiwalaang disipulo ni Jesucristo, mahalagang magkaroon ng katapatan at integridad sa ating puso. Ang lesson na ito ay makatutulong sa mga estudyante na mas kumilos nang may katapatan at integridad sa kanilang pag-aaral.

Mga Posibleng Aktibidad sa Pag-aaral

Pagpili sa katapatan at integridad

Sabihin sa mga estudyante na magbahagi ng mga pangyayari o sitwasyon sa paaralan kung saan maaaring masubukan ang integridad ng isang tao. Ibahagi ang mga sumusunod na halimbawa kung kinakailangan.

1. Mayroon kang paparating na mahalagang pagsusulit. Napansin ng isang kaklase ang kopya ng mga sagot sa pagsusulit sa mesa ng guro at kinunan niya ito ng retrato gamit ang kanyang telepono. Nagpadala siya sa iyo at sa ilan pang estudyante ng kopya ng larawan.

2. Kailangan mong magsulat ng essay para sa isang klase pero wala ka pang oras na gawin ito. Nagmungkahi ang isang kaibigan na maaari kang gumamit ng online software na magsusulat ng iyong artikulo para sa iyo. O maaari kang mag-paste ng mga bahagi ng iba’t ibang artikulo mula sa internet at maglagay ng ilan sa sarili mong pangungusap upang magmukhang gawa mo ito. Nabanggit ng iyong kaibigan na nagawa na niya ang mga bagay na ito noon at hindi ito kailanman napansin ng guro.

   • Ano ang maaaring magtulak sa isang tao na isipin na magandang ideya ang mga gawaing ito?

   • Ano ang makatutulong sa inyo para malaman kung ano ang gagawin sa mga ganitong sitwasyon?

Ipaliwanag na ang lesson na ito ay magtutuon sa kahalagahan ng katapatan at integridad sa ating pag-aaral. Anyayahan ang mga estudyante na ibahagi ang nalalaman nila tungkol sa integridad. Ang sumusunod na pahayag ni Elder Joseph B. Wirthlin ay maaaring maging kapaki-pakinabang na resource.

Inilarawan ni Elder Joseph B. Wirthlin (1917-2008) ng Korum ng Labindalawang Apostol ang integridad sa sumusunod na paraan:

Ang ibig sabihin ng integridad ay laging gawin ang tama at mabuti, anuman ang ibunga nito. Ibig sabihin ay pagiging mabuti mula sa kaibuturan ng ating kaluluwa, hindi lamang sa ating mga kilos kundi, ang pinakamahalaga, sa ating isipan at puso. Ang katapatan ay nangangahulugang pagiging mapagkakatiwalaan at may integridad na hindi tayo sisira sa tiwala o tipang ibinigay sa atin. …

Kailangang-kailangan ng mundo ang kalalakihan at kababaihang may integridad. Halos araw-araw ay may nababalitaan tayong pandaraya, maling paggamit ng pondo, false advertising, o iba pang pamamaraan na idinisenyo upang makakuha ng pakinabang sa pamamagitan ng pandaraya o panlilinlang. Kinasusuklaman ng Panginoon ang gayong mga gawain. (Joseph B. Wirthlin, “Personal Integrity,” Ensign, Mayo 1990, 30, 32)

• Paano ninyo napansin ang pangangailangan sa integridad sa mundo ngayon?

Ang sumusunod na mungkahi ay makatutulong sa mga estudyante na suriin ang sarili nilang saloobin tungkol sa kahalagahan ng pagkilos nang may integridad sa kanilang pag-aaral: Sabihin sa kanila na maghanap ng blangkong pahina sa kanilang study journal at lagyan ito ng label na “Bakit mahalaga sa akin ang integridad sa pag-aaral.” Sabihin sa mga estudyante na ilista ang lahat ng dahilan kung bakit mahalaga sa kanila ang integridad. Kapag natapos na sila, maaaring ibahagi ng ilang boluntaryo sa klase ang ilan sa kanilang mga dahilan.

Hikayatin ang mga estudyante na patuloy na magdagdag sa kanilang listahan ng mga ideya, katotohanan, at banal na kasulatan sa buong lesson.

Nais ng Ama sa Langit at ni Jesucristo na kumilos tayo nang may integridad

Ipaliwanag na ang pag-unawa sa katangian at mga turo ng Ama sa Langit at ni Jesucristo ay makahihikayat sa atin na kumilos nang may integridad. Maaari mong anyayahan ang mga estudyante na gawin ang mga sumusunod na aktibidad sa pag-aaral kasama ang isang kapartner o sa maliit na grupo.

Basahin ang mga sumusunod na banal na kasulatan, at alamin ang mga turo na makatutulong sa atin na makadama ng mas matinding hangaring kumilos nang may integridad: 3 Nephi 27:18; Eter 3:11–12; Doktrina at mga Tipan 3:2; 51:9; 124:15, 20; Mga Saligan ng Pananampalataya 1:13.

• Anong mga katotohanan ang natutuhan ninyo mula sa mga talatang ito tungkol sa kahalagahan ng katapatan at integridad sa ating buhay?

  Sabihin sa mga estudyante na ibahagi ang maraming katotohanang natutuhan nila. Maaari nilang matukoy ang mga katotohanang tulad ng sumusunod: Ang Ama sa Langit at si Jesucristo ay lubos na matapat. Kapag kumikilos tayo nang may katapatan at integridad, tayo ay mas nagiging katulad Nila.

• Ano ang maaaring magpahirap sa pagkilos nang may katapatan at integridad sa ating pag-aaral?

Itinuro ni Elder Neil L. Andersen ng Korum ng Labindalawang Apostol ang maaaring maging epekto ng integridad sa ating espirituwal na pag-unlad:

May malaking espirituwal na lakas sa pananatiling tunay at matapat kapag ang mga bunga ng inyong katapatan ay tila walang kabuluhan. Bawat isa sa inyo ay mahaharap sa gayong mga desisyon. Sa mahahalagang sandaling ito masusubukan ang inyong integridad. Kapag pinili ninyo ang katapatan at katotohanan—umaayon man ang sitwasyon sa inaasahan ninyo o hindi—matatanto ninyo na ang mahahalagang pagpapasiyang ito ay nagiging mga pangunahing sandigan ng lakas sa inyong espirituwal na paglago. (Neil L. Andersen, “Ang Banal na Pamantayan ng Katapatan,” Liahona, Ago. 2017, 40)

• Ano ang mga pakinabang at pagpapala ng pagiging matapat at pagkakaroon ng integridad sa trabaho at paaralan?

Sabihin sa mga estudyante na ibahagi ang mga karanasan nila nang matamo nila ang mga pagpapala ng Panginoon sa pagpapakita ng integridad sa kanilang pag-aaral. Maaari mong ipanood ang video na “Honesty: You Better Believe It!” (4:46), na makikita sa ChurchofJesusChrist.org, upang matulungan ang mga estudyante na makakita ng mga halimbawa ng integridad.

Ipamuhay ang natutuhan mo

Ipaalala sa mga estudyante ang kanilang banal na identidad bilang mga anak ng mapagmahal na mga magulang sa langit. Bahagi ito ng kung sino sila, kabilang ang sa paaralan. Kapag sinunod nila si Jesucristo at kumilos nang may katapatan at integridad, ang mga katangiang ito ang magiging kaibahan nila sa iba pang tao sa mundo.

Itinuro ni Pangulong Russell M. Nelson:

Ang inyong mahalagang pagkatao ay karapat-dapat sa inyong mahalagang integridad! Pangalagaan ito dahil napakahalagang gantimpala nito. (Russell M. Nelson, “Integrity of Heart” [Brigham Young University devotional, Peb. 23, 1993], 7, speeches.byu.edu)

Upang matulungan ang mga estudyante na pag-isipan kung paano nila poprotektahan o dadagdagan ang kanilang katapatan at integridad, sabihin sa kanila na sagutin ang ilan o ang lahat ng sumusunod na tanong sa kanilang study journal.

• Ano ang naramdaman mo ngayon tungkol sa integridad sa pag-aaral na gusto mong alalahanin?

• Ano ang natutuhan mo tungkol sa Ama sa Langit at kay Jesucristo na tutulong sa iyo kapag natutukso kang kumilos nang hindi matapat?

• Ano ang isa o dalawang bagay na gagawin mo upang madagdagan ang iyong katapatan at integridad sa paaralan?

Maaari mong anyayahan ang ilang nakahandang estudyante na ibahagi ang kanilang sagot. Patotohanan ang mga katotohanang tinalakay ninyo, at hikayatin ang mga estudyante na gawin ang kanilang mga plano.

Karagdagang Resources

Paano nauugnay ang katapatan sa pagkatuto?

Nais ng Ama sa Langit na laging natututo ang Kanyang mga anak na babae at lalaki. Mayroon kayo ng kapwa temporal at espirituwal na mga dahilan para hangarin at gustuhing matuto. Ang edukasyon ay hindi lamang tungkol sa pagkita ng pera. Bahagi ng inyong walang-hanggang mithiin ang maging higit na katulad ng Ama sa Langit.

Ang pamumuhay nang may integridad ay nangangahulugan na mahal ninyo ang katotohanan nang buong puso—nang higit kaysa pagmamahal ninyo sa personal na kapanatagan, katanyagan, o kaginhawahan. Nangangahulugan ito ng paggawa ng tama dahil lang sa tama iyon. (Para sa Lakas ng mga Kabataan: Isang Gabay sa Paggawa ng mga Pagpili [2022], 31)

Paano ko patuloy na mapagbubuti ang personal na integridad?

Itinuro ni Pangulong Russell M. Nelson:

Ang magandang panahon para sa pagsusuri sa sarili ay sa oras ng pribadong personal na panalangin. Sa umaga, maaaring kabilang dito ang panalangin para sa katapatan, kalinisang-puri, kabanalan, o simpleng paglilingkod sa iba. Sa gabi ay maaaring magkaroon ng isa pang mabilisang pagsusuri sa lahat ng mga katangiang iyon. Una, ipinagdarasal ninyo na mapanatili ang inyong espirituwal na integridad, at pagkatapos ay pagsisikapan ninyo ito. Kung sakaling may makitang anumang kamalian, dapat mong simulan na ayusin agad ito na magpoprotekta para hindi masira ang ating integridad. (Russell M. Nelson, “Integrity of Heart” [Brigham Young University devotional, Peb. 23, 1993], 4, speeches.byu.edu)

Bakit ako dapat na kumilos nang may katapatan at integridad sa mga gawain ko sa paaralan?

Itinuro ni Elder David A. Bednar ng Korum ng Labindalawang Apostol kung paano makaaapekto sa atin ang kawalan ng katapatan sa gawain sa akademya:

Ang pandaraya sa akademikong gawain ay kawalan ng prinsipyo, hindi tapat, at isang uri ng panlilinlang sa sarili at pagtataksil. Walang estudyante ang maaaring umasa na sa huli ay magtatagumpay siya sa isang karera o propesyon kung siya ay nakasalig sa pundasyon ng pandaraya. (David A. Bednar, “Be Honest,” New Era, Okt. 2005, 6)

Ipinaliwanag ni Pangulong James E. Faust (1920–2007) ng Unang Panguluhan:

Kailangan nating lahat na malaman kung ano ang ibig sabihin ng pagiging matapat. Ang katapatan ay higit pa sa hindi pagsisinungaling. Ito ay pagsasabi at pagsasalita ng katotohanan, at pamumuhay at pagmamahal sa katotohanan. …

Gusto kong magsalita sa inyo ngayon tungkol pagiging matapat. Ang katapatan ay isang moral na patnubay na gagabay sa ating buhay. … Gayunpaman, ang matinding hangaring maging mahusay sa sekular na pag-aaral kung minsan ay tumutukso sa mga tao na ikompromiso … ang kanilang katapatan at integridad.

Ang pandaraya sa paaralan ay isang uri ng panlilinlang sa sarili. Pumapasok tayo sa paaralan para matuto. Dinaraya natin ang ating sarili kapag umaasa tayo sa pagsisikap at katalinuhan ng iba. (James E. Faust, “Honesty—a Moral Compass,” Ensign, Nob. 1996, 41, 42)

Mga Karagdagang Aktibidad sa Pag-aaral

Pagtindig nang may integridad

Upang matulungan ang mga estudyante na maunawaan ang kahalagahan ng pagtindig nang may integridad, maaari mong ipakita ang sumusunod.

Itinuro ni Elder Ronald A. Rasband ng Korum ng Labindalawang Apostol:

Saan kayo tumitindig ngayon? Makaaasa ba ang Panginoon sa inyo at sa inyong integridad bilang tunay na miyembro ng Kanyang Simbahan? …

Kapag nakikita natin ang mga pamantayan ng mundo na gumuguho sa lahat ng direksyon, madalas kailangan nating manindigan nang matatag, ipagtanggol ang ating pananampalataya, at itaguyod ang integridad ng ebanghelyo. Tandaan ang babala sa Helaman na kapag ikaw ay nakatayo “sa bato na ating Manunubos, na si Cristo, ang Anak ng Diyos,” ang paparating na “malakas na bagyo … hindi ito magkakaroon ng kapangyarihan sa inyo na hilahin kayong pababa … , dahil sa bato kung saan kayo nakasandig [Helaman 5:12]. (Ronald A. Rasband, “Integrity of Heart,” [debosyonal sa Brigham Young University, Marso 13, 2018], 4, speeches.byu.edu)

Hikayatin ang mga estudyante na talakayin ang tungkol sa mga paraan kung paano sila maaaring manatiling matatag nang may integridad sa mundo ngayon.

Magdrowing ng stick figure o larawan ng isang estudyante sa pisara, o ipadrowing ito sa isang estudyante na handang ibahagi ang kanyang talento sa pagdrowing. Ipaliwanag na ang figure na ito ay maaaring kumatawan sa mga estudyante.

Itanong sa mga estudyante:

• Ano ang ilan sa mga pamantayan na nawawala sa mundo ngayon ang kinakaharap ninyo? (Isulat ang kanilang mga sagot sa paligid ng drowing ng estudyante at lagyan ng mga arrow na tumuturo sa drowing na estudyante upang ipakita ang maraming bagay na kinakaharap ng mga estudyante ngayon.)

• Anong mga katangian ni Jesucristo ang makatutulong sa inyo na tumindig nang may integridad? (Isulat ang kanilang mga sagot sa paanan o sa ibaba ng drowing na estudyante sa pisara.)

Hikayatin ang mga estudyante na tularan ang halimbawa ni Jesucristo habang humaharap sila sa mga hamon na sumusubok sa kanilang integridad.

Ano ang plagiarism?

Kung kailangan ng mga estudyante ng tulong para maunawaan kung ano ang plagiarism at kung paano ito nauugnay sa integridad sa pag-aaral, maaari mong ibahagi ang sumusunod na paliwanag at chart.

Ang paggamit ng mga salita ng ibang tao bilang iyong sarili nang hindi nagbibigay sa kanila ng kredito o nang hindi binabanggit ang orihinal na may-akda ay tinatawag na plagiarism. Ang plagiarism ay hindi tapat at isang uri ng pandaraya. May mga estudyanteng nakatanggap ng mga bagsak na grado o kaya naman ay pinaaalis na sa paaralan dahil sa plagiarism. Nawalan din ng trabaho ang mga tao dahil sa plagiarism.

Gumawa ng dalawang column sa pisara. Lagyan ng label na Maituturing na Plagiarism ang isang column at ang isa pa ng Hindi Maituturing na Plagiarism. Maaari mong i-print ang sumusunod na chart at gupitin nang parisukat ang bawat isa sa mga sitwasyon. Ipalagay sa mga estudyante ang mga parisukat sa mga naaangkop na column.

Maituturing na Plagiarism	Hindi Maituturing na Plagiarism
Maituturing na Plagiarism Pagkopya ng isang bagay na makikita mo sa internet o sa takdang-aralin ng iba at pagsasabi ikaw ang nagsulat nito.	Hindi Maituturing na Plagiarism Paggamit ng mga salita ng ibang tao at pagbanggit kung sino ang nagsabi ng mga ito.
Maituturing na Plagiarism Pagkopya ng mga salita ng isang tao at pagpapalit ng isa o dalawang salita sa talata.	Hindi Maituturing na Plagiarism Pagbabasa tungkol sa isang paksa at pagsusulat ng mga natutuhan mo sa sarili mong mga salita, kabilang ang pagbanggit sa orihinal na may-akda.
Maituturing na Plagiarism Pagsasama ng mga partikular na impormasyon o istatistika na matatagpuan mo sa iba pang source nang hindi binabanggit ang sources na iyon.	Hindi Maituturing na Plagiarism Mga pangkalahatang pahayag na hindi partikular na mga salita na sinabi ng isang tao, tulad ng: Asul ang langit. Mahal ka ng Diyos.
Maituturing na Plagiarism Paggamit lang ng mga ideya at kaisipan ng ibang tao sa iyong isinusulat.	Hindi Maituturing na Plagiarism Paggamit ng karamihan sa iyong mga sariling saloobin o ideya.