Lesson 195: Pagtatagumpay sa Paaralan

Pagsali sa Panginoon sa Iyong Pagkatuto

“Ako ay Mapapasaiyo”

Nais tayong tulungan ng Ama sa Langit at ni Jesucristo sa bawat aspeto ng ating buhay, kabilang na ang ating pagsisikap na matuto at magtamo ng pormal na edukasyon. Ang lesson na ito ay makatutulong sa mga estudyante na isali ang Panginoon sa bawat aspeto ng kanilang edukasyon habang naghahangad silang matuto sa pamamagitan ng pag-aaral at pananampalataya.

Mga Posibleng Aktibidad sa Pag-aaral

Mahihirap na sitwasyon

Maaari mong simulan ang klase sa pagbabahagi ng mga sumusunod na sitwasyon at pagtalakay sa mga ito bilang klase. Kung kinakailangan, iakma ang mga sitwasyon upang higit na matugunan ang mga pangangailangan ng iyong mga estudyante.

Isipin kunwari na kayo ay nasa isa sa mga sumusunod na sitwasyon:

• Pinanghihinaan ka ng loob sa isang klase sa paaralan at nais mong sumuko.

• May mga tanong ka tungkol sa pagpapatuloy ng iyong pag-aaral kapag young adult ka na. Hindi mo alam kung saan ka dapat magpatuloy ng pag-aaral o kung dapat ka mang magpatuloy.

• Ito ang una mong linggo sa bagong trabaho, at sa palagay mo ay hindi sapat ang iyong kakayahan para sa trabaho o gawain.

Ano ang gagawin ninyo kung kayo ang nakararanas ng isa sa mga sitwasyong ito? Kanino kayo hihingi ng tulong?

Maaari mong tanungin ang mga estudyante kung nakaranas na sila o ang mga kakilala nila ng mga sitwasyong tulad ng mga ito. Maaari mo silang anyayahang ibahagi ang ginawa nila o ng iba upang makatanggap ng tulong.

Ipaliwanag na sa lesson na ito, matututuhan ng mga estudyante ang kahalagahan ng pagsali sa Panginoon sa bawat aspeto ng kanilang buhay, maging sa kanilang edukasyon. Upang matulungan silang maghanda sa pag-aaral sa paksang ito, ipakita ang mga sumusunod na tanong at anyayahan ang mga estudyante na sagutin ang mga ito sa kanilang study journal.

Maglaan ng oras upang pagnilayan ang mga sumusunod na pahayag gamit ang scale na 1 (hindi kailanman) hanggang 5 (napakadalas):

1. Nananalangin ako sa Ama sa Langit na tulungan ako bago ako mag-aral o magsimula ng proyekto para sa paaralan.

2. Sa aking mga personal na panalangin, ipinahahayag ko sa aking Ama sa Langit ang hangarin kong mapasaakin ang Espiritu habang natututo ako sa paaralan.

3. Regular kong sinisikap na pagbutihin ang aking pagsisikap na matuto sa tulong ni Jesucristo.

4. Umaasa ako at kinikilala ko ang tulong ng Espiritu sa aking pagkatuto at pag-aaral.

Sabihin sa mga estudyante na hanapin ang mga turo na makatutulong sa kanila na higit na maisali ang Panginoon sa kanilang pagkatuto at pag-aaral.

Pagkatuto mula sa mga mag-aaral sa mga banal na kasulatan

Ipaliwanag na ang mga banal na kasulatan ay naglalaman ng maraming halimbawa ng mga taong isinali ang Panginoon upang tulungan sila na magkaroon ng pag-unawa at madaig ang mga hamon. Maaari mong hatiin ang klase sa maliliit na grupo upang gawin ang sumusunod na aktibidad sa pag-aaral. Magtalaga sa bawat grupo ng isa sa sumusunod na mga halimbawa na pag-aaralan, at pagkatapos ay talakayin ang dalawang kasunod na tanong.

Pag-aralan ang mga sumusunod na banal na kasulatan tungkol sa mga taong nakaranas ng mahihirap at alanganing sitwasyon. Maghanap ng mga halimbawa kung paano isinali ng mga indibiduwal na ito ang Panginoon sa kanilang paghahanap ng pang-unawa.

• Joseph Smith (Joseph Smith—Kasaysayan 1:10–18)

• Nephi (1 Nephi 11:1–9)

• Ang kapatid ni Jared (Eter 1:38–42; 2:22–25; 3:1–6)

• Paano isinali ng mga taong ito ang Panginoon sa kanilang pagkatuto?

• Sa anong mga paraan sila tinulungan ng Panginoon?

  Matapos magkaroon ng sapat na oras ang mga estudyante upang mag-aral at magtalakayan, anyayahan ang mga miyembro ng bawat grupo na mag-ulat tungkol sa kanilang tinalakay sa pamamagitan ng pagbabahagi ng kanilang mga sagot sa mga naunang tanong.

• Batay sa natutuhan ninyo, paano ninyo kukumpletuhin ang sumusunod na pahayag? Kapag isinasali natin ang Panginoon sa ating pagkatuto, magagawa Niyang …

  Maaaring kumpletuhin ng mga estudyante ang pahayag na ito sa mga paraan na tulad ng sumusunod: Kapag isinasali natin ang Panginoon sa ating pagkatuto, mabibigyan Niya tayo ng pang-unawa na hindi natin matatamo nang mag-isa.

• Ano ang alam ninyo tungkol sa Panginoon na nagbibigay sa inyo ng kumpiyansa na tutulungan Niya kayo sa inyong pag-aaral?

Mga paraan para maisali ang Panginoon sa inyong pagkatuto

• Kapag tungkol sa inyong mga gawain sa paaralan, kailan makatutulong na isali ang Panginoon?

Kung kinakailangan, tulungan ang mga estudyante na mag-isip ng mga sagot sa naunang tanong. Maaaring kabilang sa mga halimbawa ang kapag gumagawa ng homework, kumukuha ng mga pagsusulit, natututo sa klase, at gumagawa ng mga takdang-aralin o proyekto sa klase. Maaari mong ilista sa pisara ang mga ideya ng mga estudyante.

Pagkatapos ay ibigay sa mga estudyante ang mga sumusunod na tagubilin na tutulong sa kanila na mag-isip ng mga paraan kung paano nila maisasali ang Panginoon sa mga halimbawang tinukoy nila. Maaaring sagutin ng mga estudyante ang mga ito nang mag-isa, kasama ang isang kapartner, o sa maliit na grupo.

Isulat ang pariralang Maisasali ko ang Panginoon sa aking pagkatuto sa pamamagitan ng … sa isang pahina sa inyong study journal. Maglista ng kahit ilang ideya na maiisip ninyo para sa pagsali sa Panginoon sa mga aktibidad na may kaugnayan sa paaralan na natukoy mo.

Matapos gumawa ng mga estudyante ng mga listahan, sabihin sa kanila na ibahagi sa klase ang mga ideya nila. Maaari kang gumawa ng listahan sa pisara at idagdag doon ang mga ideya ng mga estudyante.

Kung kinakailangan, maaari kang magbigay ng ilang halimbawa ng mga ideya: manalangin na tulungan kayo na matandaan ang inyong pinag-aralan bago ang mga pagsusulit, proyekto, o takdang-aralin; magpasalamat sa tulong ng Diyos at sa mga pagkakataong ibinigay Niya sa inyo na matuto; isulat ang mga karanasan ninyo nang isinali ninyo ang Panginoon sa inyong pagkatuto; mag-ayuno at manalangin para sa mas matinding hangaring matuto; unahin ang Diyos sa pamamagitan ng pagbibigay ng oras para sa araw-araw na panalangin at pag-aaral ng mga banal na kasulatan.

• Ano ang mga naranasan ninyo nang isinali ninyo ang Panginoon sa inyong pag-aaral?

Bilang bahagi ng talakayan, maaari mong ipanood ang “Mas May Mararating kay Cristo: Ang Talinghaga ng Slope” mula sa time code na 0:00 hanggang 1:05. Makikita ang video na ito sa ChurchofJesusChrist.org. Sa video, inilarawan ni Elder Clark G. Gilbert ng Pitumpu ang kanyang karanasan sa pagsali sa Panginoon sa kanyang pagkatuto.

Magnilay at kumilos ayon sa mga katotohanan

Maaari mong anyayahan ang mga estudyante na pagnilayan ang mga paraan kung paano nila maiaangkop ang natutuhan nila tungkol sa kung paano isali ang Panginoon sa kanilang pagkatuto. Maaari nilang sagutin ang mga sumusunod sa kanilang study journal.

• Ano ang natutuhan o nadama mo tungkol sa Panginoon na naghihikayat sa iyo na isali Siya sa iyong pagkatuto?

• Ano ang isa o dalawang bagay na magagawa mo upang maisali ang Panginoon sa iyong pagkatuto?

Maaari mong anyayahan ang mga estudyante na ibahagi ang nadama at natutuhan nila. Magpatotoo tungkol sa mga katotohanang tinalakay ninyo, at hikayatin ang mga estudyante na gawin ang kanilang mga plano at kumilos ayon sa mga impresyong natatanggap nila mula sa Espiritu.

Karagdagang Resources

Paano ako matutulungan na magtagumpay sa aking pag-aaral ng pagsali sa Panginoon sa aking pag-aaral?

Itinuro ni Elder D. Todd Christofferson ng Korum ng Labindalawang Apostol:

Kailangan ninyong tandaan palagi na hindi kayo nag-iisa rito. May mga taong minamahal at ipinagdarasal kayo. Maaaring may ilang mapagduda na magsasabi sa inyo na hindi ninyo magagawa ito o, sa ilang kadahilanan, ay gusto nila na mabigo kayo. Ngunit hindi nila kayo mapipigilan, at mas marami ang sumusuporta sa inyo. Higit sa lahat, kilala kayo ng inyong Ama sa Langit at ng inyong Tagapagligtas at kaya nila at magagawa nilang bigyan kayo ng tulong. Gawin ninyong katuwang ang Diyos. …

Mahal kayo ng inyong Ama sa Langit at ng Kanyang Pinakamamahal na Anak tulad ng pagmamahal Nila sa akin, at nararapat kayong tumanggap ng tulong Nila tulad ko. Sa tulong Nila, magtatagumpay kayo sa [inyong pag-aaral] at sa lahat ng iba pang karapat-dapat na gawain sa inyong buhay. Hindi kayo mag-isang nagsisikap at nag-aaral. (D. Todd Christofferson, “The Will to Prepare” [BYU–Pathway Worldwide devotional, Nob. 12, 2019])

Itinuro ni Elder Kim B. Clark ng Pitumpu:

Kung titigil kayo sa pag-aaral, hindi kayo maaaring maging mas maalam, mas epektibo, mas kapaki-pakinabang, mas matapat, o mas katulad ng inyong Ama sa Langit.

Ang inyong karanasan sa pag-aaral sa mga taon ng inyong kabataan at pagiging young adult ang nagtatakda ng pundasyon para sa habambuhay na pag-aaral. Kung magkakaroon kayo ng kakayahang mag-aral nang malalim sa paraan ng Panginoon—sa pamamagitan ng Espiritu at sa masigasig at aktibong pag-aaral—magiging malaking pagpapala ito sa inyo. (Kim B. Clark, “Pagkatuto para sa Buong Kaluluwa,” Liahona, Ago. 2017, 29).

Anong uri ng pagkatuto ang dapat kong gawing pinakapriyoridad?

Itinuro ni Pangulong Russell M. Nelson:

Sa pagtatamo ninyo ng kaalaman, dapat ninyong malaman na ang pinakamahalagang katotohanang matututuhan ninyo ay nagmumula sa Panginoon. Sa Kanyang Panalangin ng Pamamagitan sa Kanyang Ama, pinagtibay ito ng Tagapagligtas mismo. Sinabi Niya, “At ito ang buhay na walang hanggan, na ikaw ay makilala nila na iisang Dios na tunay, at siyang iyong sinugo, sa makatuwid baga’y si Jesucristo” (Juan 17:3). Higit pa sa lahat ng bagay na nais ninyong malaman, hangaring makilala ang Diyos, ang inyong Ama sa Langit, at ang Kanyang Anak na si Jesucristo. Kilalanin Sila at mahalin Sila, tulad ng ginagawa ko. (Russell M. Nelson, “Ano ang Pipiliin Ninyo?,” Liahona, Ene. 2015, 32)

Mga Karagdagang Aktibidad sa Pag-aaral

Pag-una sa Panginoon

Matapos gumawa ang mga estudyante ng listahan ng mga paraan kung paano nila maisasali ang Panginoon sa kanilang pagkatuto, maaari mong ipanood ang “The Soul’s Sincere Desire” (3:28), na makikita sa ChurchofJesusChrist.org. Sabihin sa mga estudyante na maghanap ng mga halimbawa kung paano isinali ng dalagita sa video ang Panginoon sa kanyang pagkatuto.

Gumawa ng mga personal na huwaran ng pag-aaral upang maisali ang Panginoon

Sa pagtatapos ng lesson, maaari mong bigyan ng pagkakataon ang mga estudyante na gumawa ng biswal na representasyon na nagbubuod sa natutuhan nila tungkol sa pagsali sa Panginoon sa kanilang pag-aaral. Maaari mong anyayahan ang mga estudyante na isulat sa gitna ng isang piraso ng papel ang Pagsali sa Panginoon sa Iyong Pagkatuto. Pagkatapos ay anyayahan silang maglista ng mga partikular na gawi at pag-uugali na naglalarawan sa kung paano nila maisasali ang Panginoon sa kanilang pagkatuto at pag-aaral. Sabihin sa kanila na magdrowing o gumawa ng digital na huwaran ng pag-aaral na ibabahagi sa kanilang mga kaklase sa oras ng lesson. (Tingnan ang sumusunod na graphic mula sa Liahona ng Oktubre 2016 para sa isang halimbawa.)

Sabihin sa mga estudyante na gumawa ng personal na pahayag tungkol sa pagkatuto

Maaring makinabang ang mga estudyante sa paggawa ng “personal na pahayag tungkol sa pagkatuto” na magagamit nila sa buong buhay nila upang matulungan silang maalala ang kanilang mga mithiin sa pag-aaral. Maaaring magsimula ang kanilang mga pahayag sa pariralang tulad ng “Gagawin ko …” o “Ako ay …” o “Umaasa akong …”

Upang matulungan ang mga estudyante na gumawa ng mga pahayag, maaari mo silang anyayahang pagnilayan ang mga aspeto ng kanilang pagkatuto na nais nilang pahusayin o paunlarin. Magtanong ng tulad ng “Paano ninyo maisasali ang Panginoon sa inyong pagkatuto?” o “Paano kayo matutulungan ng Panginoon sa inyong plano?” Maaaring tumukoy ang mga estudyante ng mga gagawin nila at ng mga pag-uugali na nais nilang isama sa kanilang mga pahayag.

Ang mga pahayag tungkol sa pagkatuto ay karaniwang maikli at makapangyarihan. Maaaring isama ng mga estudyante ang mga mithiin o kahilingan sa pag-aaral at mga bagay na gagawin nila upang makamit ang kanilang mga mithiin.

Narito ang dalawang halimbawa ng pahayag tungkol sa pagkatuto ng mga estudyante:

• Magpapakumbaba ako at magiging madaling turuan habang hinahangad ko ang tulong ng Panginoon upang umunlad bilang mag-aaral.

• Bago pumasok sa paaralan, magdarasal ako sa aking Ama sa Langit at ipahahayag ko ang aking hangaring mapasaakin ang Espiritu sa aking pagkatuto.