199-р хичээл: Номлогчийн бэлтгэл

Сайн мэдээг Христийнхтэй адил хайраар хуваалцах

Бурханыг болон бусдыг хайрлах хайр

Есүс хувь хүнд тохинуулж буй нь

Есүс Христийн сайн мэдээг бусадтай хуваалцах олон шалтгаан байдаг. Бид Бурханыг болон эргэн тойрныхоо хүмүүсийг хайрлаж сурснаар сайн мэдээг хуваалцах хүсэл маань өсдөг. Энэ хичээл Тэнгэрлэг Эцэг, Есүс Христ хоёрыг болон бусад хүнийг хайрлах хайр нь тэдэнд хэрхэн сайн мэдээг хуваалцах сэдэл төрүүлж чадахыг ойлгоход суралцагчдад тусална.

Боломжит суралцах үйл ажиллагаа

Үйлчлэх сэдэл

Янз бүрийн нөхцөл байдалд үйлчилж буй өсвөр үеийнхний зургийг үзүүлэх талаар бод. Зураг бүр дээрх өсвөр үеийнхний үйлчлэхээр сонгосон байж болох шалтгаануудыг хуваалцахад суралцагчдыг урь. (Боломжит шалтгаанууд нь үүрэг, хайр, эцэг эхийн хүлээлт, гэмшил эсвэл олон нийттэй харилцах зэрэг байж болно.)

Бусдад үйлчилж буй өсвөр үеийнхэн 1

Бусдад үйлчилж буй өсвөр үеийнхэн 2

Бусдад үйлчилж буй өсвөр үеийнхэн 3

• Хэдийгээр бусдад үйлчлэх олон шалтгаан байдаг ч ямар шалтгаан биднийг Аврагчтай адил болоход хамгийн их туслах магадлалтай вэ? Яагаад?

Дараа нь та дараах асуултуудыг ярилцахад суралцагчдыг урихдаа сайн мэдээг хуваалцаж буй хэн нэгний зургийг үзүүлж болно.

Мормоны Номыг хэн нэгэнд үзүүлж буй залуу эрэгтэй

• Хэн нэгний найзтайгаа сайн мэдээг хуваалцах эсвэл бүр бүрэн цагийн номлолд үйлчлэхээр сонгож болох зарим шалтгаан юу вэ?

• Ямар ямар шалтгаан бусдыг Бурханд авчрах ажилд үр дүнтэй байхад нь тэдэнд туслах хамгийн их магадлалтай вэ?

Дараах зүйлсийн талаар тунгаан бодох, мэдэрсэн зүйлээ судлах тэмдэглэлдээ бичих хугацааг суралцагчдад өг.

• Та нар Есүс Христийн сайн мэдээг бусадтай хуваалцах талаар ямар бодолтой байдаг вэ? Та нар яагаад ингэж бодож байна вэ?

• Та нар бүрэн цагийн номлолд үйлчлэхээр төлөвлөж байна уу? Хэрэв тийм бол юу та нарт сэдэл төрүүлсэн бэ?

Хичээлийн үеэр Есүс Христийн сайн мэдээг хуваалцах хүсэл эрмэлзлийнхээ талаар бодох үедээ Ариун Сүнсний удирдамжийг эрэлхийлэхэд суралцагчдыг урь.

Бурханы сэдэл

Тэнгэрлэг Эцэг, Есүс Христ хоёрыг бидэнд үйлчлэхэд юу сэдэл, түлхэц өгч байгааг мэдсэн үедээ бид Тэдний үлгэр жишээг илүү сайн дуурайж чадна гэдгийг суралцагчдад тайлбарла.

Үүнийг ойлгоход нь суралцагчдад туслахын тулд та дараах эшлэлүүдийг үзүүлж болно. Уншиж, тунгаан бодох нэг юм уу хоёр судрын хэсгийг сонгоход суралцагч бүрийг урь.

Дараах судрын хэсгүүдээс нэг эсвэл хоёрыг уншиж, Тэнгэрлэг Эцэг, Есүс Христ хоёрын талаар юу зааж байгааг олж мэд.

• Иохан 3:16–17

• Иoхан 15:12–13

• 2 Нифай 26:24

• Сургаал ба Гэрээнүүд 18:10–13

• Сургаал ба Гэрээнүүд 34:1–3

• Сургаал ба Гэрээнүүд 95:1

• Сургаал ба Гэрээнүүд 138:1–4

Ангийг тойрч, Тэнгэрлэг Эцэг, Есүс Христ хоёрын талаар сурсан зүйлээ өөр судрын хэсэг сонгосон ангийн суралцагчидтайгаа хуваалцахад суралцагчдыг урь.

Суралцагчдыг хуваалцаж дууссаны дараа цөөн суралцагчаас сайн дураараа Тэнгэрлэг Эцэг, Есүс Христ хоёрын талаар сурсан зүйлээ нэгтгэн дүгнэхийг хүс.

Тэнгэрлэг Эцэг, Есүс Христ хоёр хайраар үйлчлэх эрмэлзэл сэдэлтэй гэдгийг танин мэдэхэд нь суралцагчдад тусал.

Суралцагчдыг чанга хэлж хариулахад бэлэн болохоос өмнө тэдэнд дараах асуултуудыг тунгаан бодох цаг гаргах хэрэгтэй байж болно. Та тэднээс сайн дураараа хуваалцахыг хүсэхээсээ өмнө тэдэнд хариултуудаа судлах тэмдэглэлдээ бичих цаг гаргаж өгч болно.

• Тэнгэрлэг Эцэг, Есүс Христ хоёрын та нарыг гэх хайрыг мэдрэхэд та нарт ямар туршлага тусалсан бэ?

• Тэнгэрлэг Эцэг, Есүс Христ хоёр яагаад бидэнд үйлчилдгийг ойлгох нь бусадтай сайн мэдээг хуваалцах та нарын хүсэлд хэрхэн нөлөөлөх вэ?

Хайр бидэнд сайн мэдээг хуваалцах сэдэл төрүүлж чадна

Хичээлийн энэ хэсэг Иохан 21-д заасан Аврагчийн сургаалуудыг ашиглан, хайр бидэнд сайн мэдээг хуваалцах сэдэл төрүүлж чадна гэдгийг ойлгоход суралцагчдад тусална.

Үүнийг гүйцэтгэх өөр нэг арга бол Миний сайн мэдээг номло: Есүс Христийн сайн мэдээг хуваалцах удирдамж (2023)-ийн 127-р хуудасны “Судраас судлах” санааг багтаасан “Энэрэл ба хайр” хэсгийг судлахад хамтрагчдыг урьж, хайр хэрхэн бидэнд сайн мэдээг хуваалцах сэдэл төрүүлж чадахыг олж мэдэх явдал юм.

Есүс Христийг цовдлуулсны дараахан Түүний хэд хэдэн шавь загасчлахаар явав. Тэднийг загасчилж байх үед эрэг дээр байсан нэг хүн тэднийг завиныхаа баруун талд тороо шидэхийг хүсжээ. Шавь нар хэлсэн ёсоор нь үйлдэж, олон загас барьсныхаа дараа тэр хүн бол амилсан Аврагч байжээ гэдгийг ойлгов. Тэднийг эрэгт ирэхэд Есүс тэдэнд хоол өгч, зааж сургах замаар тэдэнд үйлчилжээ.

Иохан 21:15–17-г хамтдаа уншаад, Петрийг дахин дахин урьсан Аврагчийн урилгыг олж мэдэхэд суралцагчдыг урь эсвэл ChurchofJesusChrist.org дээрх “Feed My Sheep” (5:47) видеог цагийн код 2:46-аас 4:29 хүртэл үзнэ үү. (15-р шүлэг дэх эднээс гэдэг үг нь шавь нарын барьсан бүх загасыг хэлж болно гэдгийг мэдэх нь суралцагчдад тустай байж болох юм.)

• Есүс Петрийг хайраа хэрхэн харуулахыг хүссэнээс та нар юу сурч мэдсэн бэ?

Бошиглогч Иосеф Смитийн (1805–1844) дараах мэдэгдлийг уншаад, энэ нь Иохан 21 дэх Есүсийн урилгын талаарх та нарын ойлголт дээр юу нэмж байгааг олж мэд.

Бошиглогч Иосеф Смит

Хайр бол Бурханы гол шинж чанаруудын нэг бөгөөд Бурханы хүүхдүүд байхыг хүсдэг хүмүүс хайрыг харуулах ёстой. Бурханы хайраар дүүрэн хүн зөвхөн өөрийнх нь гэр бүл адислагдсанд сэтгэл ханадаггүй, харин бүх хүн төрөлхтнийг адислахад санаа тавин дэлхий даяар явдаг. (Сүмийн ерөнхийлөгчдийн сургаалаас: Иосеф Смит [2007], 426)

• Иосеф Смитийн мэдэгдлээс та нарт юу нь онцгой санагдаж байна вэ?

• Та нар Иохан 21 болон Иосеф Смитийн мэдэгдлээс сайн мэдээг хуваалцах эсвэл номлолд үйлчлэх сэдэл төрүүлж болох юуг сурч мэдсэн бэ?

• Ямар ямар арга зам Бурханыг хайрлах хайраа мөн бусдыг хайрлах хайраа гүнзгийрүүлэхэд үр дүнтэй гэж та нар бодож байна вэ?

Сайн мэдээг хуваалцах эргэлзээг даван туулах

Дараах үйл ажиллагааг гүйцэтгэхийн тулд суралцагчдыг бүлгүүд болгож болно. Бүлэг бүрд цаас тараах нь тустай байж болох юм.

1. Бүрэн цагийн номлолд үйлчлэхдээ эргэлзэж буй залуу эрэгтэйн эсвэл найзтайгаа сайн мэдээг хуваалцахдаа эргэлзэж буй өсвөр насны хүүхдийн жишээг бүлгээрээ зохио. Жишээгээ цаасан дээр бичих бичээчийг сонго. Жишээн дээрх хүний эргэлзэж байгаа шалтгааныг заавал оруулаарай.

   Бүлгүүдийн зохиож болох жишээг харуулав: “Антонио саяхан илүү олон өсвөр үеийнхнийг Их Эзэний номлогчоор үйлчлэхээр бэлтгэхэд урамшуулан дэмжсэн чуулганы үг сонссон. Энэ бол түүний хувьд хийх зөв зүйл гэдгийг тэр мэднэ. Гэвч тэр танихгүй хүмүүстэй ярих гэж зүдэрч, судруудыг бусад хүнд заах хэмжээний хангалттай сайн мэддэггүй юм шиг санагддаг. Тэр өөрийгөө сайн номлогч болохгүй байх гэж санаа зовж байна.”

   Бүлгүүдийг зохиосон жишээгээ бичиж дууссаны дараа, дараах алхмыг гүйцэтгэхийн өмнө бусад бүлэгтэй жишээгээ солилцохыг тэднээс хүс.

2. Өнөөдөр сурч, мэдэрсэн зүйлсээ ашиглан танай бүлэг тухайн жишээн дээрх хүнд туслахын тулд хуваалцахыг хүссэн зүйлээ бичихийг бичээчээс хүс. Тухайн хүн Аврагчийг болон бусдыг улам их хайрладаг болохын тулд юу хийж болох тухай зөвлөмжийг багтаа. Та нар Аврагчийн хайрыг мэдрэх нь уг хүний үйлчлэх хүсэл эрмэлзлийг нэмэгдүүлэхэд хэрхэн тусалж болох талаар ямар нэг зүйлийг оруулж болно.

Нөгөө бүлгийн жишээнд юу гэж хариулснаа ангийнхантай хуваалцахад бүлгүүдийг урь.

Хичээлээ дуусгахын тулд Бурханыг болон бусдыг хайрлах хайр нь Есүс Христийн сайн мэдээг хуваалцахад эргэлзэхэд хүргэж болох аливаа саад бэрхшээлийг даван туулахад хэрхэн тусалж болохыг судлах тэмдэглэл дээрээ бичих цагийг суралцагчдад гаргаж өг.

Нэмэлт эх сурвалж

Сайн мэдээг хуваалцах айдсаа даван туулахад надад юу тусалж чадах вэ?

Арван хоёр төлөөлөгчийн чуулгын ахлагч Л.Том Пэрри (1922–2015) ийн тайлбарлажээ.

Ахлагч Л.Том Пэрри

Зарим гишүүн Сүмд явдаг гэдгээ нуухыг хүсдэг юм шиг санагддаг. Тэд ингэж нуух өөрийн гэсэн учир шалтгаануудтай байдаг. Жишээлбэл: Зарим гишүүн итгэлээ хуваалцах шаардлагагүй гэж үздэг. Магадгүй тэд ямар нэгэн алдаа гаргах юм уу эсвэл асуултад нь унах вий гэж болгоомжилдог байх. Хэрэв танд ингэж санагдах юм бол би та нарт нэг зүйлийг зөвлөе. Та Иоханы хэлсэн “Хайрын дотор айдас байдаггүй, харин төгс хайр нь айдсыг хөөн зайлуулдаг” (1 Иохан 4:18) гэсэн үгсийг санаарай. Бид Бурхан болон хөршдөө хайртай байх аваас айдсаа дарах болно хэмээн амлагдсан билээ. …

Хэрэв та бүгд Есүс Христийн сайн мэдээний сэргээлт, итгэлийнхээ талаар өөрсдийн бодол санааг хуваалцах урилгыг хүлээн авбал “төгс хайр нь айдсыг хөөн зайлуулна” (1 Иохан 4:18) гэдэг учир хайр болон урам зоригийн сүнс та бүгдтэй үргэлж хамт байх болно гэдгийг би гэрчилж байна. (Л.Том Пэрри, “Төгс хайр айдсыг зайлуулдаг,” 2011 оны 10-р сарын Ерөнхий чуулган, 51, 52)

Хайр, Есүс Христийн сайн мэдээг хуваалцах хоёр хоорондоо ямар холбоотой вэ?

Тэргүүн зөвлөлийн ерөнхийлөгч Даллин Х.Өүкс ийн заасан.

Ерөнхийлөгч Даллин Х.Өүкс

Сэргээгдсэн сайн мэдээний үнэн, ач холбогдлын тухай гэрчлэлээс бид бидэнд өгөгдсөн зүйлийн үнэ цэнийг ойлгодог. Бид Бурханыг болон хөршөө хайрласнаар энэхүү агуу бэлгийг хүн бүртэй хуваалцах хүсэлтэй болдог. …

Гишүүн бөгөөд бүрэн цагаар ажилладаг хамгийн үр дүнтэй номлогчид үргэлж хайрын учир шалтгаанаар үйлддэг. (Dallin H. Oaks, “Sharing the Gospel,” Ensign, Nov. 2001, 7, 8)

Арван хоёр төлөөлөгчийн чуулгын ахлагч Квинтин Л.Күк ийн заасан.

Ахлагч Квинтин Л.Күк

Израилыг цуглуулах тал дээр … зүгээр л нэг үүрэг хариуцлага гэсэн үзэл бодол эсвэл гэм буруутай гэсэн мэдрэмжээс зайлсхийж, оронд нь хайрыг мэдэрч, Аврагчийн захиас, тохинуулал, үйл хэргийг дэлхийтэй хуваалцах бурханлаг түншлэлд оролцож байна гэдгээ мэдрэх хэрэгтэй.

Гишүүний хувьд бид энгийн урилга өгснөөр Аврагчид болон дэлхий даяарх ах, эгч нартаа тэднийг гэсэн хайраа үзүүлж болно. (Квинтин Л.Күк, “Эцэгийнхээ хүүхдүүдийг гэх бидний агуу хайр”, 2019 оны 4-р сарын Ерөнхий чуулган, 94)

Хайраас номлолд үйлчлэх урам зориг авахын ач холбогдлыг мэдрэхэд нь суралцагчдад туслахын тулд “Face to Face with Elder Rasband, Sister Oscarson, and Brother Owen” (1:20:41) видеог цагийн код 33:58-аас 35:43 хүртэл үзүүл.

Нэмэлт суралцах үйл ажиллагаа

Хичээлийг эхлүүлэх өөр хувилбар: Сайн самари хүн

Та Лук 10:30–37-д гардаг сайн самари хүний түүхийг унших юм уу жүжигчлэн үзүүлэхийг суралцагчдаас хүссэнээр хичээлээ эхлүүлж болно. Та тахилч, леви, самари хүмүүс юунаас тийм үйлдэл гаргах болсон шалтгааны тухай ярилцаж болох юм. Та Бурханыг болон бусдыг хайрлах хайр нь хэрхэн самари хүнийг үйлдэл хийхэд хүргэсэн сэдэл, урам байсныг ярилцаж болно. Дараа нь суралцагчид бусдад үйлчлэх өөрсдийн эрмэлзэл сэдлийн талаар тунгаан бодож болно.

Хайраар хүрч үйлчил

“Reach Out with Love” (8:31) видеог үзүүлээд, бишоп нь Стивтэй уулзахыг хүссэний дараа Стивтэй холбогдох болсон Гиллермогийн шалтгааныг олж тогтооход суралцагчдыг урь. Гиллермогийн жишээ болоод тэдний бусадтай сайн мэдээг хуваалцах хүсэл эрмэлзэл хоёрын хооронд уялдаа холбоо бий болгоход суралцагчдыг урамшуулан дэмж.

Номлолд үйлчлэхийн тулд анхаарал сарниулах зүйлсийг даван туулах

Хэн нэгнийг номлолд үйлчлэхэд саад болж болох анхаарал сарниулах зүйлсийг олж тогтооход нь суралцагчдад туслахын тулд Далын ахлагч Маркос А.Айдукайтисын дараах мэдэгдлийг хуваалц.

Ахлагч Маркос А.Айдукайтис

Цугларалтад бид маш олон арга замаар тусалж чадах ч би нэг зүйлийн талаар онцолж хэлмээр байна. Энэ бол бүрэн цагийн номлогчоор үйлчлэх явдал юм. Та нарын олон нь заах номлогчоор үйлчилж болно. Мөн зарим нь үйлчлэлийн номлогч болж болно гэсэн үг. Харин дэлхий ертөнц айдас, өөртөө итгэлгүй байдлыг ашиглан өсвөр үеийнхнийг энэхүү ариун нандин үүрэг хариуцлагаас анхаарлыг нь сарниулахыг оролдож байна.

Мөн цар тахал гарах, боломжийн ажлаа орхих, сурч боловсрохоо хойшлуулах эсвэл хэн нэгэнтэй хайр сэтгэлийн харилцаатай байхад илүү анхаарах гэх мэт анхаарал сарниулах зүйлс байна. Эрэгтэй, эмэгтэй хүн бүр өөр, өөрийн сорилт бэрхшээлтэй тулгарах болно. Иймэрхүү сорилтууд яг Их Эзэнд үйлчилж эхлэх үед чинь тохиолдож болно. Эргээд харахад алийг сонгох нь тодорхой байсан ч тухайн үедээ амаргүй байдаг. (Маркос А.Айдукайтис, “Зүрх сэтгэлээ өргөж мөн баясагтун,” Лиахона, 2022 оны 5-р сар, 41)

Номлолд үйлчлэхэд саад болж болох анхаарал сарниулах нийтлэг зүйлсийг жагсаан бичихэд суралцагчдыг урь. Дараа нь суралцагчид эдгээр анхаарал сарниулах зүйлийг хэрхэн даван туулах санаануудыг хуваалцаж болно.

Иохан 21 дэх цэдгийг танилцуулах өөр арга

Та “Эхний агуу зарлиг” (19:48) видеог 6:52-оос 11:26 хүртэл үзүүлж болно. Видеон дээр Арван хоёр төлөөлөгчийн чуулгын ахлагч Жэффри Р.Холланд Есүс Петрийг хонио хариулахад урьсан тухай цэдгийг өөрийн үгээр ярьж байна.