202-р хичээл: Номлогчийн бэлтгэл

Мормоны Ном бол хөрвүүлэх хэрэгсэл

Сайн мэдээг хуваалцахад бэлтгэхдээ Мормоны Номыг ашиглах

Судар уншиж буй найзууд

Мормоны Ном бол хожмын үед Израилыг Есүс Христэд цуглуулахад туслах Бурханы бидэнд өгсөн бэлэг юм. Суралцагчид бусдыг цуглуулахад энэ бэлгийг ашиглахдаа энэ нь үнэн гэсэн хувийн гэрчлэлээ Бурханаас хүлээн авах нь чухал. Энэ хичээл Аврагчийн сайн мэдээг хуваалцахад бэлтгэхдээ Мормоны Номын тухай гэрчлэлээ хүчирхэгжүүлэхийн ач холбогдлыг мэдрэхэд суралцагчдад тусална.

Боломжит суралцах үйл ажиллагаа

Израилыг цуглуулах зэмсэг

Суралцагчдынхаа сайн мэдэх олон янзын хэрэгслийг самбарт жагсаан бич эсвэл үзүүл. Тэдгээр нь алх, халив, шүдний сойз, үдээсний машин гэх мэт зүйлс байж болно. Дараахтай адил асуултуудыг ашиглан тус хэрэгслүүдийн гүйцэтгэдэг үүргийн талаар ярилцахад суралцагчдыг урь.

Хэрэгслүүд

• Та нар хамгийн сүүлд хэзээ эдгээр хэрэгслийг ашигласан бэ? Үүнийг хэрхэн ашигласан бэ?

• Үүнтэй ижил үүрэг гүйцэтгэхийн тулд өөр хэрэгслүүд хэрхэн ажиллаж болох вэ?

  Зарим хэрэгслийг ямар нэгэн тодорхой ажлыг гүйцэтгэхэд ашиглах нь илүү тохиромжтой гэдгийг ойлгоход нь суралцагчдад туслахын тулд халив юм уу шүдний сойз ашиглан цаасыг үдэх гэж оролдохыг нэг суралцагчаас хүс.

  Эдгээр багаж хэрэгсэл өөр өөрийн тодорхой ажлыг л хийдэг гэдгийг ойлгоход суралцагчдад тусал. Үүнтэй адил Бурхан хүмүүсийг Есүс Христэд цуглуулах Өөрийн ажлын тодорхой хэсгийг гүйцэтгэх хэрэгслүүдийг өгсөн.

• Тэнгэрлэг Эцэг, Есүс Христ хоёр хүмүүсийг цуглуулах ямар ямар хэрэгслийг өгсөн бэ?

Суралцагчид өмнөх асуултын хариултыг бататгах эсвэл нэмэлт хариултыг харахын тулд дараах мэдэгдлийг уншиж болно.

Далын ахлагч Шэйн М.Бөүэн ийн заасан.

Ахлагч Шэйн М.Бөүэн

Бид Израилыг хамгийн сүүлчийн удаа цуглуулж байгаа бөгөөд үүнийг Их Эзэний Сүнстэй нэгдсэн, хөрвөлтийн хамгийн хүчтэй зэмсгүүдийн нэг болох Мормоны Номын хамт гүйцэтгэж байна. (Шэйн М.Бөүэн, “Мормоны Номын хөрвөлтөд гүйцэтгэдэг үүрэг,” 2018 оны 10-р сарын Ерөнхий чуулган, 83)

• Яагаад Мормоны Ном Есүс Христэд хүмүүсийг хөрвүүлж, цуглуулах хүчирхэг хэрэгсэл байж чадна гэж та нар бодож байна вэ?

Суралцагчдыг хариулж байхад анхааралтай сонсож, шаардлагатай гэж үзвэл яагаад тэгж бодож байгаагаа хуваалцахад тэднийг урь.

Суралцагчдад тустай гэж үзвэл, ChurchofJesusChrist.org дээрх “A Book of Mormon Story” (5:15) видеог үзүүлэн, Мормоны Ном хэрхэн нэгэн хүнийг Бурханд ойртуулах хэрэгсэл болсон тухай жишээг харуул.

Моронай 10:3–5-ыг болон дараах мэдэгдлийг уншихад суралцагчдыг урь. Мормоны Номыг бусадтай хуваалцахад бэлтгэж болох чухал арга замыг олж мэдэхийг тэднээс хүс.

Тэргүүн зөвлөлийн ерөнхийлөгч Хэнри Б.Айринг ийн заасан.

Ерөнхийлөгч Хэнри Б.Айринг

Мормоны Ном үнэн гэдгийг мэдэхийн тулд бид үүнийг уншиж, энэ ном үнэн гэдгийг мэдэхийн тулд залбир гэсэн Моронайн номд заасанчлан сонгох ёстой. Ингэснээр бид хувийн туршлагаа найзууддаа гэрчилж, тэд ийнхүү сонгож, мөнхүү үнэнийг мэдэж чадна. (Henry B. Eyring, “A Voice of Warning,” Ensign, Nov. 1998, 34)

• Та нар ерөнхийлөгч Айрингийн мэдэгдэл болон Моронай 10:3–5-аас юу сурч мэдсэн бэ?

Суралцагчид сурч мэдсэн зүйлээ хуваалцаж байхдаа дараахтай адил үнэнийг тодорхойлж болох юм. Мормоны Номын талаар өөрийн гэсэн гэрчлэлтэй болох нь энэ бол үнэн гэдгийг мэдэж авахад бусдад туслах боломжийг бидэнд олгодог.

Та энэ үнэнтэй холбоотой өөрсдийн туршлагыг бодож үзэхэд нь туслахын тулд суралцагчдыг дараах мэдэгдэлд өгөх хариултаа дотроо үнэлэхэд урьж болно.

Нэгээс тав хүртэлх оноог ашиглан, нэг нь “миний хувьд огт үгүй,” тав нь “миний хувьд үнэхээр тийм” гэх байдлаар дараах мэдэгдлүүдийг үнэл.

• Би найздаа Мормоны Ном гэж юу болох, энэ ном хүмүүсийг Христэд хэрхэн авчирч чадах талаар тайлбарлаж чадна.

• Би Есүс Христэд хөрвөх хувийн хөрвөлтөө гүнзгийрүүлэх замаар Мормоны Номыг судалж байгаа.

• Мормоны Ном үнэн гэдгийг бусдад гэрчлэх боломжийг олгодог туршлага надад бий.

Мормоны Номоор дамжуулан Бурханы хүчийг өөрсдийн болон бусдын амьдралд хэрхэн урин авчрах талаар сүнслэг өдөөлтийг эрэлхийлэхэд суралцагчдыг урь.

Мормоны Ном гэх Бурханы бэлгийн үнэ цэнийг ойлгох

Иосеф Смитэд өгсөн илчлэлдээ Их Эзэн Мормоны Номд хүмүүс хэт хөнгөн хуумгай хандахад ямар санагддагаа хуваалцсанаар уг номын ач холбогдлыг онцолсон юм.

Сургаал ба Гэрээнүүд 84:54–57-г уншаад, эдгээр шүлэг нь Түүний сайн мэдээг хуваалцахаар бэлтгэж байгаа Их Эзэний Сүмийн гишүүдэд хэрхэн хамаатай талаар бод.

• Аврагчийн сайн мэдээг хуваалцахыг хүсдэг хүмүүст хамаатай юуг та нар олж мэдсэн бэ?

• Мормоны Ном бидний амьдралд хэчнээн чухал гэдгийг бид ямар арга замаар харуулж болох вэ?

Мормоны Номын тухай хувийн мэдлэг ба гэрч

Дараах эсвэл таны зохиосон өөр жишээ нь хичээлийн үеэр сурч мэдсэн, мэдэрсэн зүйлээ илэрхийлэхэд суралцагчдад тусална. Доорх жишээг ангиараа уншаад, Аннитай юу хуваалцаж болох талаар бодох цагийг суралцагчдад гаргаж өг.

Анни дөнгөж сая номлогчид бэлтгэх хичээлд суужээ. Тэрээр саяхан буцаж ирсэн номлогч багш нараас сайн мэдээг хуваалцахад хэрхэн бэлтгэх талаар зөвлөгөө хүсэв. Хоёр багш хоёулаа түүнд Мормоны Номын тухай мэдлэг, гэрчлэлээ хүчирхэгжүүлэхийг зөвлөжээ. Тэдний өгч болох байсан олон хариултын нэг нь Мормоны Номыг судлах байсан нь Аннигийн хүсэн хүлээж байсан хариулт байсангүй.

Анги дотуур тойрч яван, Аннитай юу хуваалцахаа дор хаяж хоёр өөр суралцагчид хэлэхэд суралцагчдыг урь.

Ариун Сүнсэнд Мормоны Номыг суралцагчдад тань гэрчлэх боломжийг хэрхэн олгох талаар бод. Та Мормоны Номын дуртай судрын хэсгээ эсвэл Мормоны Номын талаар гэрчлэлтэй болсон туршлагаасаа хуваалцах хүсэлтэй хэдэн суралцагчийг ангийнхантайгаа хуваалцахад урьж болно. Мөн та Аврагчийг илүү сайн таньж мэдэхэд тусалсан судрын хэсгээ хуваалцаж болох юм. Суралцагчдад бэлтгэх цаг гаргаж өг. Хэрэв олон суралцагч хуваалцахыг хүсвэл, тэднийг жижиг бүлгээр ажиллахад урин бүгдэд нь хуваалцах боломж олго.

Амьдралдаа хэрэгжүүлэх

Судлах тэмдэглэлдээ дараах асуултад чимээгүйхэн хариулахад суралцагчдыг урь.

• Та нар Мормоны Номоор дамжуулан Есүс Христтэй харилцах харилцаагаа гүнзгийрүүлэхийн тулд юу хийж болох вэ?

  Та Мормоны Номыг тодорхой хугацаанд бүхэлд нь унших, бусадтай хуваалцах шүлгүүдийг хайж олох, энэ ном үнэн гэсэн гэрчлэлийг Ариун Сүнсээр дамжуулан өгөхийг Тэнгэрлэг Эцэгээс хүсэх гэх мэт хувилбаруудыг санал болгож болно. .

  Мөн ChurchofJesusChrist.org дээрх “The Book of Mormon” (2:10) видеог үзүүлж болно. Энэ видеонд Арван хоёр төлөөлөгчийн чуулгын ахлагч Жэффри Р.Холланд, Квинтин Л.Күк нар номлолын ерөнхийлөгч нь хэрхэн тэднийг Мормоны Номоор дамжуулан Христийн талаар судлахад урьсныг хуваалцдаг. Суралцагчид мөн энэ урилгыг хүлээн авч болно.

• Бичсэн зүйлийнхээ дагуу үйлдэх нь хэрхэн өдөр тутмын амьдралдаа эсвэл бүрэн цагийн номлогчийн хувиар Мормоны Номыг хуваалцахад бэлтгэж болох вэ?

Мормоны Ном хэрхэн танд Есүс Христэд илүү ойртоход тусалсан гэрчлэлээ хуваалцах нь тустай байж болох юм.

Нэмэлт эх сурвалж

Би Мормоны Номыг хэрхэн мөн яагаад хуваалцах ёстой вэ?

Арван хоёр төлөөлөгчийн чуулгын ахлагч Роналд А.Расбанд ийн хуваалцсан.

Ахлагч Роналд А.Расбанд

Би таныг “энэ өдөр” Мормоны Номыг найз нөхөд, гэр бүл, ажлын хамтрагчид, хөл бөмбөгийн дасгалжуулагч, эсвэл ногооны дэлгүүрийн худалдагчдаа өгөхөд урьж байна. Тэдэнд энэ ном дээрх Их Эзэний үгс хэрэгтэй. Тэдэнд өдөр өдрийн амьдралын асуултаас гадна ирэх мөнх амьдралын асуултад нь хариулт хэрэгтэй. Тэд өмнө нь зурайх гэрээний зам, тэдний төлөөх Их Эзэний дуусашгүй хайрын тухай мэдэх хэрэгтэй. Энэ бүгд Мормоны Номд агуулагдаж байна.

Тэдэнд Мормоны Номыг өгөхдөө та тэдний оюун бодол, зүрх сэтгэлийг Бурханы үгэнд нээж өгч байгаа юм. Та номын хэвлэсэн хувийг өөртөө авч явах шаардлагагүй. Та Gospel Library аппликэйшны судрын хэсгээс гар утаснаасаа хялбархан хуваалцаж болно.

Сайн мэдээгээр амьдрал нь адислагдаж болох байсан тэр хүмүүсийн тухай бодоод үзээрэй. Дараа нь Мормоны Номын дижитал хувийг гар утаснаасаа тэдэн рүү илгээгээрэй. Ингэхдээ энэ ном амьдралыг тань хэрхэн адисалсан тухай гэрчлэлээ хуваалцаарай. (Роналд А.Расбанд, “Энэ өдөр,” Лиахона, 2022 оны 11-р сар, 27)

Мормоны Ном хэрхэн биднийг Есүс Христ рүү хөтлөх вэ?

Арван хоёр төлөөлөгчийн чуулгын ахлагч Үлиссэс Соарэс ийн хуваалцсан.

Ахлагч Үлиссэс Соарэс

Би семинарын долоо хоног тутмын даалгавраа гүйцэтгэхдээ Мормоны Номыг бага багаар судалдаг байсан. Алма хүмүүстээ Бурханы үгийг номлож байхдаа түүний дүрсэлсэн шиг нэгэн дулаахан мэдрэмж аажмаар бодгальд минь өсөж эхлэн, зүрх сэтгэлийг минь дүүргэж, ойлголтыг маань гэгээрүүлж мөн илүү баяр баясгалантай болгож байсан нь өчигдөрхөн мэт санагдаж байна. Энэ мэдрэмж яваандаа зүрх сэтгэлд минь үндэс болсон мэдлэг болж хувирсан бөгөөд энэхүү ариун нандин номд агуулагдсан сургаал, чухал үйл явдлуудын гэрчлэлийн минь суурь болсон юм.

Эдгээр болон бусад үнэлж баршгүй хувийн туршлагаар дамжуулан Мормоны Ном үнэхээр Есүс Христэд итгэх итгэл болон Түүний сайн мэдээний сургаалтай холбоотой гэрчлэлийг маань батлах булангийн чулуу болсон юм. Мөн энэ нь Христийн тэнгэрлэг цагаатгах золиослолын талаар надад гэрчилдэг багануудын нэг болсон билээ. Энэ нь итгэл сулруулж, дайсны бидний оюун санаанд шингээх гэж оролддог итгэлгүй байдлаас амьдралын минь туршид хамгаалах бамбай болж, надад Аврагчийн талаарх гэрчлэлээ дэлхийд зоригтой тунхаглах эр зоригийг өгсөн. (Үлиссэс Соарэс, “Мормоны Ном ирсэн нь,” 2020 оны 4-р сарын Ерөнхий чуулган, 37)

Нэмэлт суралцах үйл ажиллагаа

Мормоны Номоор дамжуулан Есүс Христэд ирэхэд нь бусдад туслах

Суралцагчдын хувьд сайн мэдээг бусадтай хуваалцах хэцүү санагдаж магадгүй. Найзтайгаа Мормоны Номыг хуваалцсан залуугийн тухай дараах видеог үзүүлэх нь тус болж болно. Эсвэл суралцагчид хэн нэгэнд Мормоны Номыг хуваалцсаны дараа уг хүн нь номыг уншсанаар адислагдаж байсан үеийнхээ талаар ярьж болно.

Суралцагчид Мормоны Номыг хуваалцах нь хэрхэн хэн нэгэнтэй сайн мэдээний талаар ярилцах оновчтой арга зам байж болох талаар ярилцаж болно.

Та Мормоны Номыг цахим хэлбэрээр хуваалцах янз бүрийн арга замыг суралцагчдад үзүүлж болно. Тэд Gospel Library аппликэйшн дээрх судрууд табыг нээгээд, хуудасны дээд талд байх “Share” эсвэл “Share Now” дээр дарах замаар үүнийг хийж болно. Эсвэл Book of Mormon аппликэйшныг хуваалцаж болно. Энэ хоёр сонголт нь хоёулаа Мормоны Номыг 100 гаруй хэлээр үнэ төлбөргүй авах боломжийг олгодог. Дараах вэбсайтад уг аппликэйшныг татаж авах заавар байгаа бөгөөд үүнийг хэрхэн хуваалцахыг суралцагчдад заасан видео багтсан болно.

Book of Mormon аппликэйшныг хуваалцах

Мормоны Номыг хуваалцаж буйг жүжигчлэн тоглох

Мормоны Номыг номлогчийн хувиар хуваалцах боломжийг суралцагчдад олгох нь тустай байж болох юм. Суралцагчид хамтрагчтайгаа жүжигчлэн тоглож болно. Хамтрагч бүр өөр шашинтай найзтайгаа ярилцаж байгаа мэтээр ээлжлэн дараах үйл явдлыг харуулж болно Үүнд:

• Мормоны Ном гэж юу болохыг тайлбарлах

• Найзаа уг номыг уншихад урих

• Яагаад уг номыг уншаасай гэж хүсэж байгаагаа найздаа хэлэх зэрэг.

2023 оны Миний сайн мэдээг номло: Номлогчийн үйлчлэлд зориулсан удирдамж гарын авлагын 42-р хуудас дээрх “Заах санаа” гэсэн хэсэгт байгаа Мормоны Номыг хуваалцах зөвлөмжүүдийг уншиж, дагах нь суралцагчдад тустай байж болох юм.

Мормоны Номын удиртгал. “Үүний зааврыг мөрдөх”

Мормоны Номын удиртгалын зургаа дахь догол мөрийг уншихыг суралцагчдаас хүс. Энэ нь Мормоны Номын адислалуудыг амьдралдаа урин авчрах чухал арга замыг олж харахад тэдэнд тусална. Өгөгдсөн амлалтыг олж мэдэхийг тэднээс хүс. Дараах хэлэлцүүлгийн асуултууд тустай байж болно. Үүнд:

• Бид Мормоны Номыг уншихаас гадна Бурханд илүү ойртохын тулд юу хийх хэрэгтэй вэ?

• Та нар хэзээ Мормоны Номоос сурсан зүйлийнхээ дагуу үйлдэж байсан бэ?

Мормоны Ном үнэн гэдгээ өөрөө баталдаг

Хүмүүсийг Тэнгэрлэг Эцэг, Есүс Христ хоёр луу чиглүүлдэг Мормоны Номын хүчийг илүү сайн ойлгоход нь суралцагчдад туслахын тулд та дараах видеог үзүүлж болно. Энэ видео нь дэлхий даяарх өөр өөр шашин шүтлэгтэй хүмүүс Мормоны Номын аль ч хуудсыг уншсан бай, тэр нь Бурханы тухай хэрхэн гэрчилж буйг олж мэдэж байгааг харуулдаг.