“200-р хичээл—Хайрла, хуваалц, урь: Бусдыг Есүс Христэд цуглуулах,” Сургаал ба Гэрээний семинарын багшийн гарын авлага (2025)
“Хайрла, хуваалц, урь,” Сургаал ба Гэрээний семинарын багшийн гарын авлага
200-р хичээл: Номлогчийг бэлтгэх
Хайрла, хуваалц, урь
Бусдыг Есүс Христэд цуглуулах
Есүс Христийн Хожмын Үеийн Гэгээнтнүүдийн Сүмийн гишүүдийн хувьд Аврагчийн сайн мэдээг “дэлхийн хязгааруудад хүртэл” хуваалцах нь бидний гэрээний үүрэг юм (Сургаал ба Гэрээ 1:23). Бид бусдыг хайрлаж, Есүс Христийн захиасыг хуваалцаж, бидэнтэй нэгдэн Аврагчид ирэхэд урих замаар энэхүү гайхамшигт ажилд оролцож чадна. Энэ хичээл нь хайрлах, хуваалцах, урих зарчмаар Есүс Христийн сайн мэдээг түгээх төлөвлөгөө гаргахад суралцагчдад тусална.
Боломжит суралцах үйл ажиллагаа
Сайн мэдээний гэрлээ нуух хэрэггүй
Хичээлийн эхэнд сайтар өнгөлөн далдлагдаж нуугдсан амьтны зургийг суралцагчдад үзүүл. Яагаад ийн нуугдах нь амьтанд тустай болохыг хуваалцахад суралцагчдыг урь.
-
Ямар тохиолдолд хүн нуугдахыг хүсэж болох вэ?
Арван хоёр төлөөлөгчийн чуулгын ахлагч Квинтин Л.Күк өөрсдийнхөө нууцлахыг хүсдэггүй зүйлийн талаар ийн хуваалцсан.
Энэхүү номлогчийн ажлын нэг чухал хэсэг бол гишүүд чиглүүлэгч гэрлийн жишээ болж амьдрах явдал юм. Бид нуугдаж болохгүй. …
… Их Эзэн Өөрийнх нь сайн мэдээг хүлээн авсан хүмүүс бусдад Бурхан руу ирэхэд нь туслах чиглүүлэгч гэрлийн жишээ болохоор яаравчлан зүтгэнэ хэмээн найддаг. Үүний ачаар дэлхий даяарх ах, эгч, дүүс маань Есүс Христийн сэргээгдсэн сайн мэдээний тэнгэрлэг адислал, ёслолуудыг хүртэж, гэртээ аюулгүй цуглуулагдана. (Квинтин Л.Күк, “Гэртээ аюулгүй цуглах нь,” Лиахона, 2023 оны 5-р сар, 20–24)
-
Ахлагч Күкийн захиаснаас юу нь таны хувьд ач холбогдолтой байсан бэ?
Суралцагчдын зүрх сэтгэл, оюун санааг энэ хичээлд чиглүүлэхийн тулд та тэднийг Есүс Христийн Хожмын Үеийн Гэгээнтнүүдийн Сүмд нэгдсэн гэр бүлийн гишүүнийхээ эсвэл найзынхаа түүхийг ярихад урьж болно. Тэд мөн өөрсдийн хөрвөлтийн түүхийг хуваалцаж болно. Хэрэв хэд хэдэн суралцагч хуваалцахыг хүсвэл та тэднийг хамтрагчтайгаа эсвэл жижиг бүлэг дотроо хуваалцахад урьж болно.
Судлах тэмдэглэлдээ ямар ямар арга замаар “нуугдаж” байгаагаа мөн хувь хүний хувьд номлох нь хэрхэн “чиглүүлэгч гэрлийн жишээ” байж болохыг бичихэд суралцагчдыг урь.
Аврагчийн сайн мэдээний гэрлийг хэрхэн нээлттэй хуваалцаж болохоо ойлгоход нь суралцагчдад туслахын тулд залбиран Сүнсийг урин авчрахыг урамшуул.
Аврагчийн номлогчийн бүрэн эрх
Арван хоёр төлөөлөгчийн чуулгын ахлагч Квинтин Л.Күкийн дараах мэдэгдлийг үзүүлэхийг бод. Есүс Христийн сайн мэдээг хэрхэн үр дүнтэй хуваалцах зөвлөгөөг олж авахад суралцагчдыг урь.
Ахлагч Күк мөн ийн заасан.
Аврагч биднийг Өөрийнх нь дуу хоолой мөн мутар байхад найрсгаар урьдаг. Аврагчийн хайр бидний чиглүүлэгч гэрэл байх болно. Аврагч шавь нартаа “Иймээс та нар яв, бүх үндэстнийг дагалдуулагтун” [Матай 28:19] хэмээн заасан. …
Сайн мэдээг хуваалцах Аврагчийн өгсөн эрхийг өөрсдийн нэгэн хэсэг болгохын тулд, … бид хөршүүдээ хайрлаж, Есүс Христийн сэргээгдсэн сайн мэдээг хуваалцаж, бүгдийг ирж үзэхэд урих ёстой. (Квинтин Л.Күк, “Бурханы таалалд хөрвөгдөх нь,” Лиахона, 2022 оны 5-р сар, 55)
-
Та ахлагч Күкийн захиасыг өөрийн үгээр хэрхэн тайлбарлах вэ?
Бид хөршүүдээ хайрлаж, Аврагчийн сайн мэдээг хуваалцаж, бусдыг Түүнд ирэхэд урих замаар Түүний номлолын ажилд тусалдаг гэсэн үнэнийг тодорхойлоход суралцагчдад тусал.
Та самбар дээрх гурван баганын дээр хайрла, хуваалц, урь гэж бичиж болно. Суралцагчдыг дараах асуултуудын хариултыг хуваалцах үед хайрлаж, хуваалцаж, урих замаар бусдыг Аврагч руу хэрхэн авчрах тухай санаануудыг жагсаахад тэднийг урь.
-
Бусад хүн Есүс Христийн сайн мэдээг ямар үр дүнтэй аргуудаар хуваалцахыг та харж байсан бэ?
-
Аврагчийн сайн мэдээг бусадтай хуваалцаж байсан ямар туршлага танд байдаг вэ?
Хайрла, хуваалц, урь
“Хайрла, хуваалц, урь” гэсэн гарчигтай тараах материалын хувийг суралцагчдад өгөх нь тэдэнд хайрлах, хуваалцах, урих зарчмуудыг илүү сайн ойлгоход туслана. Жижиг судлах бүлгүүдэд хувааж, “Хайрлах” гэсэн доорх сургалтын материалыг суралцагчдаар судлуул. Тэд өөр бүлэгт орж “Хуваалцах” гэх сэдвийг судлан, дахин өөр бүлэгт орж “Урих” гэсэн сэдвийг судалж болно.
Эсвэл суралцагчид 2023 оны Миний сайн мэдээг номло гарын авлагын 223-р хуудас дээрх “Судраас судлах” санаан дахь судрын хэсгүүдийг судалж болно.
Суралцагчдыг бүлгээрээ судалж байхдаа ярилцах дараах асуултуудыг самбарт үзүүлэхийг бод.
-
Та сайн мэдээг хуваалцах талаар ямар ойлголттой болсон бэ?
-
Аврагч бусадтай харилцахдаа энэ зарчмыг хэрхэн харуулсан бэ?
-
Өсвөр үеийнхэн Аврагчийн сайн мэдээг хуваалцахыг хичээхдээ ямар ямар арга замаар энэ зарчмын дагуу ажиллах болох вэ?
Хайрла, хуваалц, урь
Хайрлах
Иохан 13:34–35; Мозая 18:20–22; Сургаал ба Гэрээ 12:7–9; 121:41–42
Арван хоёр төлөөлөгчийн чуулгын ахлагч Гари Э.Стивэнсон ийн заасан.
Бид хөршдөө нэг ч үг хэлээгүй байсан ч Христийнхтэй адил хайрыг харуулах бүрдээ сайн мэдээг номлож байдаг.
Бусдыг хайрлах нь хөршөө хайрлах хоёр дахь агуу тушаалын тод томруун илэрхийлэл бөгөөд энэ нь бидний сэтгэл дотор явагдаж буй Ариун Сүнсний цэвэршүүлэх үйл явцыг харуулдаг. Бид Христтэй адил бусдыг хайрласнаар бидний сайн үйлсийг хардаг хүмүүсийг “тэнгэр дэх [бидний] Эцэгийг алдаршуулахад” [Матай 5:16] хүргэж чадна. (Гари Э.Стивэнсон, “Хайрла, хуваалц, урь,” Лиахона, 2022 оны 5-р сар, 84–87)
Хуваалцах
2 Нифай 2:6–8; Мозая 28:1–3; Алма 31:5; Сургаал ба Гэрээ 60:2
Арван хоёр төлөөлөгчийн чуулгын ахлагч Дийтр Ф.Угдорф ийн заасан.
Хэрэв хэн нэгэн танаас амралтын өдрөөрөө юу хийснийг тань асуувал сүм дээр юу тохиолдсоноо хуваалцахаас бүү татгалз. Хүмүүсийн өмнө гараад Есүстэй адилхан болохыг хэрхэн хичээж байгаа тухай дуулсан хүүхдүүдийн талаар хэлээрэй. Та мөн ахмадын асрамжийн газарт очиж нас дээр гарсан хүмүүст хувийн түүхийг нь эмхэтгэн цуглуулахаар цаг гарган тусалсан өсвөр үеийнхний талаар яриарай. …
Өөрийнхөө хувьд хамгийн энгийн, эвтэйхэн гэсэн байдлаар Есүс Христ болон Түүний Сүм яагаад танд чухал болохыг хүмүүстэй хуваалц. (Дийтр Ф.Угдорф, “Номлолын ажил бол зүрх сэтгэл доторхоо хуваалцах явдал юм,” 2019 оны 4-р сарын Ерөнхий чуулган, 17)
Урих
Иохан 1:35–46; 4:28–30, 39–41; Aлма 5:62; Moронай 10:3–5
Арван хоёр төлөөлөгчийн чуулгын ахлагч Гари Э.Стивэнсон ийн заасан.
Бидэнд бусдад өгч чадах олон зуун урилга байдаг. Бид бусдыг Есүс Христийн сайн мэдээг тайлбарладаг онлайн видео, ариун ёслолын цуглаан, тойргийн үйл ажиллагаа зэргийг “ирээд, харахад” урьж болно. Мөн “ирээд, харах” гэдэгт ариун сүмийг онцгойлон адислахаас өмнөх нээлттэй хаалганы өдөрлөгт зочлох, Мормоны Номыг унших зэрэг урилгууд орж болно. Зарим тохиолдолд өөрсдөдөө байгаа, тухайлбал эргэн тойронд байгаа боломжуудаа анхаарч хараад, тэдгээрийн дагуу үйлдэхийг сануулах замаар урилга өгдөг. (Гари Э.Стивэнсон, “Хайрла, хуваалц, урь,” Лиахона, 2022 оны 5-р сар, 84–87)
Хайрлах, хуваалцах, урих үр дүнтэй арга замууд
Хайрлах, хуваалцах, урих зарчмаар хэрхэн сайн мэдээг хуваалцах нэмэлт санааг уураг тархиа уралдуулан гаргахад нь суралцагчдад тусал. Тэдний санааг самбарт зохих баганынх нь доор бич. Дараах эх сурвалжуудын зарим нь санаа авахад нь тусална. Үүнд:
-
Нийтлэл—“20 Easy Ways to ‘Love, Share, Invite’ Your Neighbors,” newsroom.ChurchofJesusChrist.org
-
Видео—“Simple Ways to Love, Share, and Invite,” (2:45) ChurchofJesusChrist.org дээр байгаа.
ХАЙРЛАХ, ХУВААЛЦАХ, УРИХ ЭНГИЙН АРГА
Аврагч хайрлах, хуваалцах, урих үлгэр жишээг үзүүлсэн. Та эдгээр үлгэр жишээг хэрхэн дагах талаар санаа, сүнслэг удирдамжийг share.churchofjesuschrist.org-оос авах боломжтой.
-
Видео—“2021 Broadcast: Principles of Love, Share, and Invite,” цагийн код 0:00-ээс 1:35 хүртэл ChurchofJesusChrist.org дээрээс үзэх боломжтой
2021 Broadcast: Principles of Love, Share, and Invite
Ward and stake leaders are invited to a special worldwide broadcast focused on sharing the gospel through the principles of love, share, and invite.
Сурч мэдсэн зүйлсээ амьдралд хэрэгжүүлэх
Хайрлах, хуваалцах, урих зарчмаар хэн нэгэнд тусалж байсан үеийнхээ талаар хуваалцахыг бод. Эсвэл эдгээр зарчмыг ашиглан хэн нэгэн таны амьдралыг адисалж байсан үеийнхээ талаар хуваалцаж болно.
Өнөөдөр мэдэрч буй өдөөлтөө дагаж, сайн мэдээг хуваалцах төлөвлөгөө гаргахад суралцагчдыг урь. Тэд төлөвлөгөөндөө самбарт бичсэн нэг эсвэл хэд хэдэн санааг хэрэгжүүлэхээр оруулж болно. Төлөвлөгөөгөө дэлгэрэнгүй бичихэд нь туслах үүднээс та судлах тэмдэглэлдээ хийж гүйцэтгэх дараах заавар, өгүүлбэрийг суралцагчдад зориулан үзүүлж болно.
Судлах тэмдэглэлдээ дараах санааны нэгийг эсвэл нэгээс олныг сонгон гүйцээж бич. Үүнд:
-
Би хэн нэгэнд замаар хайраа харуулах болно.
-
Би Аврагчийн сайн мэдээний талаар мэддэг эсвэл боддог зүйлээ замаар хуваалцах болно.
-
Би (хэн нэгний нэр)-ийг -д/т урина.
Хариулахаар сонгосон санаануудын хувьд та дараахыг судлах тэмдэглэлдээ гүйцээж бич.
-
Төлөвлөгөөгөө биелүүлэхийн тулд миний хийх дараагийн алхам бол .
-
Би үүнийг (огноо) гэхэд хийсэн байна.
Зарим суралцагч сайн мэдээг чин сэтгэлээсээ хуваалцахын тулд гаргасан хичээл зүтгэлийг нь ойшоон хүлээж аваагүй байгаад сэтгэлээр унаж магад. Яг одоо амжилт олоогүй мэт санагдаж байсан ч Их Эзэн таны гаргаж буй хичээл зүтгэлд талархдаг гэдгийг ойлгоход нь суралцагчдад тусал. Үр дүн нь шууд гарахгүй байсан ч үргэлжлүүлэн итгэлээр үйлдэхэд тэднийг урь.