“Lesona 199—Faasoaina Atu o le Talalelei ona o le Alofa FaaKeriso: Alofa o le Atua ma Isi,” Tusi Lesona a le Faiaoga Seminare o le Mataupu Faavae ma Feagaiga (2025)
“Faasoaina Atu o le Talalelei ona o le Alofa FaaKeriso,” Tusi Lesona a le Faiaoga Seminare o le Mataupu Faavae ma Feagaiga
Lesona 199: Sauniuniga mo Faifeautalai
Faasoaina Atu o le Talalelei ona o le Alofa FaaKeriso
Alofa o le Atua ma Isi
E tele mafuaaga e mafai ona tatou filifili ai e faasoa atu le talalelei a Iesu Keriso i isi. E faateleina lo tatou manao e faasoa atu le talalelei a o tatou aoao e alolofa i le Atua ma i latou o loo siomia i tatou. E mafai ona fesoasoani lenei lesona i tagata aoga ia malamalama i le auala e mafai ai e lo latou alofa mo le Tama Faalelagi, Iesu Keriso, ma isi tagata ona uunaia i latou e faasoa atu le talalelei.
Gaoioiga E Ono Mafai Ona Aoao Ai
faaosofiaga e auauna atu
Mafaufau e faaali atu ata o le autalavou o loo auauna atu i tulaga eseese. Valaaulia tagata aoga e faasoa mai ni mafuaaga se tele e ono filifili ai le autalavou i ata taitasi e auauna atu. (O mafuaaga e ono i ai e ono aofia ai tiute, alofa, faamoemoega o matua, tausalaina, po o fegalegaleaiga faaagafesootai.)
-
E ui lava e tele mafuaaga e auauna atu ai i isi, o a mafuaaga e sili ona fesoasoani ia i tatou e avea ai e faapei o le Faaola? Aisea?
Ona mafai lea ona e faaali atu se ata o se tasi o loo faasoaina atu le talalelei a o e valaaulia tagata aoga e talanoaina fesili nei:
-
O a nisi o mafuaaga e ono filifili ai se tasi e faasoa atu le talalelei i se uo pe filifili foi e auauna atu i se misiona talai?
-
O a mafuaaga e sili ona fesoasoani ia i latou ia mataalia i le aumaia o isi i le Atua?
Mafaufau e tuu atu i tagata aoga se taimi e mafaufau loloto ai ma faamaumau o latou lagona i a latou api talaaga mo suesuega e uiga i mea nei:
-
O a ni ou lagona e uiga i le faasoa atu o le talalelei a Iesu Keriso i isi? Aisea e te faalogoina ai lagona e pei ona e iai?
-
O e fuafua e galue faamisiona tala’i sauatoa? Afai o lea, o le a se mea faaosofia ai oe?
Valaaulia tagata aoga e saili le taitaiga a le Agaga Paia i le taimi o le lesona a o latou mafaufau e uiga i o latou manaoga e faasoa atu le talalelei a Iesu Keriso.
Faamoemoega o le Atua
Mafaufau e faamalamalama atu i tagata aoga, a tatou iloa le mea e uunaia ai le Tama Faalelagi ma Iesu Keriso e auauna mai ia i tatou, e mafai ona tatou faataitai atili i a La faataitaiga.
Ina ia fesoasoani i tagata aoga ia malamalama i lenei mea, e mafai ona e faailoa atu ai faasinoga nei. Valaaulia tagata aoga taitasi e filifili se fuaitau se tasi pe lua e faitau ma mafaufau loloto i ai.
Faitau se tasi pe lua o fuaitau nei, ma vaavaai mo mea o loo latou aoao mai e uiga i le Tama Faalelagi ma Iesu Keriso:
Valaaulia tagata aoga e feoai solo i le potuaoga ma faasoa atu i tamaiti o le vasega o e na filifilia ni fuaitau eseese mea na latou aoaoina e uiga i le Tama Faalelagi ma Iesu Keriso.
A uma ona faasoa atu e tagata aoga, fai atu mo ni volenitia e aotele mea na latou aoaoina e uiga i le Tama Faalelagi ma Iesu Keriso.
Fesoasoani i tagata aoga ia iloa o le Tama Faalelagi ma Iesu Keriso ua uunaia e auauna atu i le alofa.
Atonu e manaomia e tagata aoga se taimi e mafaufau loloto ai i fesili nei ae latou te lei lagonaina le saunia e tali leotele. Atonu e te manao e tuu atu ia i latou se taimi e tusi ai a latou tali i a latou api faamaumau mo suesuega a o lei fai atu i volenitia e faasoa mai.
-
O a aafiaga na fesoasoani ia oe e te lagona ai le alofa o le Tama Faalelagi ma Iesu Keriso mo oe?
-
E mafai faapefea e le malamalama pe aisea e auauna mai ai le Tama Faalelagi ma Iesu Keriso ia i tatou, ona uunaia ai lou manao e faasoa atu le talalelei i isi?
E mafai e le alofa ona uunaia i tatou e faasoa atu le talalelei
O le vaega lenei o le lesona o loo faaaoga ai aoaoga a le Faaola i le Ioane 21 e fesoasoani ai i tagata aoga ia iloa o le alofa e mafai ona uunaia ai i tatou e faasoa atu le talalelei.
O se isi auala e ausia ai lenei mea o le valaaulia lea o paga e suesue le vaega o le “Alofa Mama ma le Alofa” e aofia ai manatu o le “Suesueina o Tusitusiga Paia” i le itulau e 127 o le Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023), ma vaavaai pe faapefea e le alofa ona uunaia i tatou e faasoa atu le talalelei.
E lei leva ona mavae le Faasatauroga o Iesu Keriso, ae o nisi o Ona soo e fagogota. A o latou fagogota, sa valaaulia i latou e se tamaloa i le matafaga e lafo a latou upega i le itu taumatau o a latou vaa. Ina ua uma ona faia faapea ma maua ai le tele o ia, sa iloa ai e le au soo o le tamaloa o le Faaola ua toetu. Ina ua latou o mai i le matafaga, sa auauna atu Iesu ia i latou e ala i le fafagaina o i latou i se taumafataga ma aoaoina i latou.
Mafaufau e valaaulia tagata aoga e vaavaai mo valaaulia faifai pea a le Faaola ia Peteru e ala i le faitauina faatasi o le Ioane 21:15–17 pe matamata le vitio “Fafaga A’u Mamoe” (5:47), o loo maua i ChurchofJesusChrist.org, mai le faailo taimi 2:46 i le 4:29. (Atonu e fesoasoani mo tagata aoga le iloa o le upu nei i le fuaiupu e 15 e mafai ona faasino i ia uma na maua e soo.)
Feed My Sheep
Jesus shows Himself to His disciples and implores Peter to feed His sheep. John 21:1–22
-
O le a se mea ua e aoaoina mai le auala na finagalo ai Iesu ia Peteru e faaali atu lona alofa?
Faitau le saunoaga lenei mai le Perofeta o Iosefa Samita (1805–44), ma vaavaai mo mea e faaopoopo atu i lou malamalamaaga i valaaulia a Iesu i le Ioane 21.
O le alofa o se tasi o uiga autu o le Atua, ma e tatau ona faailoa e i latou e mananao e avea ma atalii o le Atua. O se tagata e faatumulia i le alofa o le Atua, e le faamalieina i le faamanuiaina na o lona lava aiga, a e ia faasalalau atu i le lalolagi atoa, e naunautai e faamanuia tagata uma lava. (Aoaoga a Peresitene o le Ekalesia: Iosefa Samita [2007], 426)
-
O le a se mea e tulagaese ia te oe mai le saunoaga a Iosefa Samita?
-
O le a se mea na e aoaoina mai le Ioane 21 ma le saunoaga a Iosefa Samita e mafai ona uunaia ai oe e faasoa atu le talalelei pe atonu foi e auauna atu i se misiona?
-
O a ni auala aoga e faaloloto ai lo tatou alofa mo le Atua? Ina ia faalolotoina lo tatou alofa mo isi tagata?
Foia o le le naunau e faasoa atu le talalelei
E mafai e tagata aoga ona faatulaga ni vaega e faamaea ai le gaoioiga lenei. Atonu e aoga le tuuina atu i vaega taitasi o pepa.
-
Fatu faatasi o se vaega se tulaga e faatuai ai se alii talavou e auauna atu i se misiona faamisiona po o se talavou e faatuai e faasoa atu le talalelei i se uo. Filifili se tusiupu e tusi le vaaiga i luga o se fasi pepa. Ia mautinoa e aofia ai mafuaaga ua taofiofi ai le tagata o loo i le vaaiga.
O se faataitaiga lenei o se tulaga e ono fatuina e vaega: “Sa faalogo talu ai nei Antonio i se lauga o le konafesi lea na uunaia ai le toatele o le autalavou e sauni e auauna atu o ni faifeautalai mo le Alii. Na te iloa o le mea sao lea mo ia e fai. Ae peitai, e tauivi o ia e talanoa i tagata na te le iloa, ma e lagona e pei e le lava lona iloa lelei o tusitusiga paia e aoao ai isi tagata. E popole o ia o le a le avea o ia ma se faifeautalai lelei.”
A uma ona tusia i lalo e vaega ia tulaga na latou fatuina, mafaufau e fai atu ia i latou e faafesuiai tulaga ma isi vaega a o lei faamaeaina le laasaga lenei.
-
I le faaaogaina o mea na e aoaoina ma lagonaina i le aso, fai atu i se tusiupu e tusi i lalo mea o le a faasoa mai e lau vaega e fesoasoani ai i le tagata o loo i le vaaiga. Ia aofia ai fautuaga i mea e mafai ona faia e le tagata e faateleina ai lona alofa mo le Faaola ma isi. Atonu e te manao e faaaofia ai se mea e uiga i le auala e mafai ai e le lagonaina o le alofa o le Faaola ona fesoasoani e faateleina ai le manao o lenei tagata e auauna atu.
Mafaufau e valaaulia ni vaega e faasoa atu i le vasega le auala na latou tali atu ai i le vaaiga a le isi vaega.
Ina ia faaiu le lesona, mafaufau e tuu atu i tagata aoga se taimi e faamaumau ai i a latou api faamaumau mo suesuega pe faapefea e le alofa mo le Atua ma isi ona fesoasoani ia i latou e faatoilalo ai soo se musua latou te ono lagonaina e uiga i le faasoaina atu o le talalelei a Iesu Keriso.