“Lesona 200—Alofa, Faasoa Atu, ma Valaaulia: Faapotopotoina o Isi ia Iesu Keriso,” Tusi Lesona a le Faiaoga Seminare o le Mataupu Faavae ma Feagaiga (2025)
“Alofa, Faasoa Atu, ma Valaaulia,” Tusi Lesona a le Faiaoga Seminare o le Mataupu Faavae ma Feagaiga
Lesona 200: Sauniuniga mo Faifeautalai
Alofa, Faasoa, ma Valaaulia
Faapotopotoina o Isi ia Iesu Keriso
I le avea ai ma tagata O le Ekalesia a Iesu Keriso o le Au Paia o Aso e Gata Ai, o lo tatou tiutetauave o le feagaiga le faasoa atu o le talalelei a le Faaola “i tuluiga o le lalolagi” (Mataupu Faavae ma Feagaiga 1:23). E mafai ona tatou auai i lenei galuega matagofie e ala i le alofa atu i isi, faasoa atu le savali a Iesu Keriso, ma valaaulia i latou e auai faatasi ma i tatou i le o mai i le Faaola. O lenei lesona e mafai ona fesoasoani i tagata aoga e faia se fuafuaga e faasalalau atu ai le talalelei a Iesu Keriso e ala i le faaaogaina o mataupu faavae o le alofa, faasoa atu, ma le valaaulia.
Gaoioiga E Ono Mafai Ona Aoao Ai
Aua le faalafiina lou malamalama o le talalelei
Ina ia amata le vasega, faaali atu i tagata aoga se ata o se manu e lelei ona faalafiina. Valaaulia tagata aoga e faasoa mai pe aisea e aoga ai le lafi faapenei i lea manu.
-
O a tulaga e ono manao ai se tagata ina ia lafi?
Na faasoa mai e Elder Quentin L. Cook o le Korama a Aposetolo e Toasefululua se mea tatou te le mananao e faalafi ia i tatou lava:
O se vaega e tatau ai o lenei taumafaiga faafaifeautalai e mo tagata taitasi o au paia ia avea o ni faataitaiga iloga o le malamalama i soo se mea tatou te nonofo ai. E le mafai ona tatou faalafi. …
… Ua faamoemoeina e le Alii i latou ua mauaina Lana talalelei e taumafai vave ia avea o se malamalama iloga o le a fesoasoani lea i isi ia o mai i le Atua. O lea mea o le a mafai ai e o tatou uso ma tuafafine i le lalolagi atoa ona olioli i faamanuiaga faalelagi ma sauniga o le talalelei toefuataiina a Iesu Keriso ma faapotopotoina saogalemu ai i le aiga. (Quentin L. Cook, “Faapotopotoina Saogalemu i le Aiga,”,” Liahona, Me 2023, 23)
-
O le a se mea sa tulaga ese ia te oe mai le savali a Elder Cook?
Ina ia fesoasoani e saunia loto ma mafaufau o tagata aoga mo lenei lesona, e mafai ona e valaaulia i latou e faasoa mai le tala i se tagata o le aiga po o se uo na auai O le Ekalesia a Iesu Keriso o le Au Paia o Aso e Gata Ai. E mafai foi ona latou faasoa mai a latou lava tala o le liua. Afai e i ai ni nai tagata aoga e i ai ni tala e faasoa mai, e mafai ona e valaaulia i latou e faasoa atu i paga po o ni vaega toalaiti.
Valaaulia tagata aoga e tusi ia latou api talaaga mo suesuega ni auala atonu latou te “faalafi ai” ma auala e mafai ai ona avea a latou taumafaiga faa faifeautalai patino ma “faataitaiga o le malamalama i le sulu.”
Uunaia tagata aoga e valaaulia ma le agaga tatalo le Agaga e fesoasoani ia i latou ia iloa pe mafai faapefea ona latou faasoa atu le malamalama o le talalelei a le Faaola.
O le poloaiga faafaifeautalai a le Faaola
Mafaufau e faasoa atu le faamatalaga lenei a Elder QuentinL. Cook. Valaaulia tagata aoga e vaavaai mo fautuaga i le auala e faasoa lelei atu ai le talalelei a Iesu Keriso.
Sa aoao mai foi Elder Cook:
Ua valaaulia ma le alofatunoa e le Faaola i tatou ina ia avea ma Ona siufofoga ma Ona aao. O le alofa o le Faaola o le a avea ma o tatou sulu taiala. Sa aoao e le Faaola Ona soo, “Ia outou o atu e fai nuu uma lava ma soo.” [Mataio 28:19]. …
Mo le poloaiga a le Faaola e faasoa atu le talalelei ina ia avea ai ma se vaega o tagata e i ai i tatou, … e manaomia ona tatou alolofa i o tatou tuaoi, faasoa atu le talalelei toefuataiina a Iesu Keriso, ma valaaulia tagata uma ia o mai ma vaai. (Quentin L. Cook, “Liua i le Finagalo o le Atua,” Liahona, Me 2022, 56)
-
E faapefea ona e faamatalaina le savali a Elder Cook i au lava upu?
Fesoasoani i tagata aoga e faailoa mai se upumoni faapenei: Tatou te fesoasoani i taumafaiga faafaifeautalai a le Faaola e ala i le alolofa i o tatou tuaoi, faasoa atu Lana talalelei, ma valaaulia isi e o mai ia te Ia.
Atonu e te manao e tusi upu o le alofa,, faasoa, ma valaaulia i le pito i luga o koluma e tolu i luga o le laupapa. A o faasoa mai e tagata aoga a latou tali i fesili nei, valaaulia i latou e amata se lisi i koluma taitasi o manatu mo auala e aumai ai isi i le Faaola e ala i le alofa, faasoa atu, ma le valaaulia.
-
O a nisi o auala lelei ua e vaai ai i isi o faasoa atu le talalelei a Iesu Keriso?
-
O a ni aafiaga na e maua i le faasoaina atu o le talalelei o le Faaola i isi?
Alofa, faasoa, ma valaaulia
O se tasi auala e fesoasoani ai i tagata aoga ia malamalama atili i mataupu faavae o le alofa, faasoa, ma valaaulia o le tuu atu lea ia i latou o kopi o le pepa e tufa atu ua faaautuina “Alofa, Faasoa Atu, Valaaulia.” Fai atu i tagata aoga e fai ni vaega toalaiti e suesue ai anomea i lalo o le “Alofa.” E mafai ona latou faatuina ni vaega fou e suesue le “Faasoa” ona suesue lea e vaega fou le “Valaaulia.”
I se isi itu, e mafai e tagata aoga ona suesue fuaitau o mau i le manatu “Suesueina o Tusitusiga Paia” i le itulau e 223 o le Tala’i La’u Talalelei (2023).
Mafaufau e faaali atu fesili nei i luga o le laupapa mo tagata aoga e talanoaina ma a latou vaega a o latou suesue.
-
O a ni mea lelei na e mauaina e uiga i le faasoa atu o le talalelei?
-
Na faapefea ona faaalia e le Faaola le mataupu faavae i Ana fegalegaleaiga ma isi?
-
O a nisi o auala e mafai ai e tupulaga talavou ona galulue i le mataupu faavae a o latou taumafai e faasoa atu le talalelei a le Faaola?
Alofa, Faasoa Atu, Valaaulia
Alofa
Ioane 13:34–35; Mosaea 18:20–22; Mataupu Faavae ma Feagaiga 12:7–9; 121:41–42
Na aoao mai Elder Gary E. Stevenson o le Korama a Aposetolo e Toasefululua e faapea:
Soo se taimi lava tatou te faaalia ai le alofa faaKeriso i o tatou tuaoi, ua tatou talai atu le talalelei—e tusa lava pe tatou te le faaleoina se upu se tasi.
O le alofa mo isi o le faailoaga mamana lea o le poloaiga sili lona lua ia alofa atu i o tatou tuaoi; o loo faaalia ai le faagasologa o le faaatoatoaina a le Agaga Paia o loo galue i totonu o o tatou lava agaga. O le faaalia o le alofa o Keriso i isi, e mafai ai ona tatou faamatua’ia i latou o e vaai ia tatou galuega lelei e “vivii atu [i lo tatou] Tama o i le lagi.” [Mataio 5:16]. (Gary E. Stevenson, “Alofa, Faasoa Atu, Valaaulia,” Liahona, Me 2022, 85)
Faasoa atu
2 Nifae 2:6–8; Mosaea 28:1–3; Alema 31:5; Mataupu Faavae ma Feagaiga 60:2
Na aoao mai Elder Dieter F. Uchtdorf o le Korama a Aposetolo e Toasefululua:
Afai e fesili se tasi e uiga i le faaiuga o lou vaiaso, aua le faatuai ona talanoa i ai e uiga i mea e te lagonaina i le lotu. Faamatala i ai le fanau iti o ē tutū i luma o se faapotopotoga ma pepese ma le naunautai i le auala o loo latou taumafai ai ia pei o Iesu. Talanoa e uiga i le vaega o talavou o ē faaalu le taimi e fesoasoani ai i tagata matutua i nofoaga e tausia ai tagata matutua e tuufaatasi ni talaaga faaletagata lava ia. …
Po o a lava auala e foliga mai e tupu fua ma masani ai ia te oe, faasoa atu i tagata pe aisea e taua ai Iesu Keriso ma Lana Ekalesia ia te oe. (Dieter F. Uchtdorf, “Galuega Faafaifeautalai: Faasoaina atu o Mea o Loo i Totonu o Lou Loto,” Liahona, Me 2019, 17)
Valaaulia
Ioane 1:35–46; 4:28–30, 39–41; Alema 5:62; Moronae 10:3–5
Na aoao mai Elder Gary E. Stevenson o le Korama a Aposetolo e Toasefululua e faapea:
E faitau fia selau valaaulia e mafai ona tatou tuuina atu i isi. E mafai ona tatou valaaulia isi e “o mai ma vaai” i se sauniga faamanatuga, se gaoioiga a le uarota, se vitio i luga o le initoneti e faamatala ai le talalelei a Iesu Keriso. O le “O mai ma vaai” e mafai ona avea o se valaaulia e faitau le Tusi a Mamona pe asiasi i se malumalu fou i le taimi o maimoaga a o lei faapaiaina. O nisi taimi o le valaaulia o se mea tatou te tuuina atu i totonu—o se valaaulia ia i tatou lava, e tuuina mai ai ia i tatou le mataalia ma le vaaiga mamao o avanoa o loo siomia ai i tatou, e faatino ai. (Gary E. Stevenson, “Alofa, Faasoa Atu, Valaaulia,” Liahona, Me 2022, 86)
O auala Faigofie e alolofa ai, faasoa atu, ma valaaulia
Fesoasoani i tagata aoga e mafaufau i ni manatu faaopoopo pe faapefea ona faasoa atu le talalelei e faaaoga ai mataupu faavae o le alofa, faasoa atu, ma valaaulia. Ia aofia ai o latou manatu i luga o le laupapa i lalo o koluma e fesootai. O nisi o punaoa nei e mafai ona fesoasoani e faatupuina ai manatu:
-
Tusiga—”20 Auala Faigofie e ‘Alofa Ai, Faasoa Atu, Valaaulia’ Ou Tuaoi,” newsroom.ChurchofJesusChrist.org
-
Vitio—“Auala Faigofie e Alofa ai, Faasoa atu ma Valaaulia” (2:45), o loo maua ChurchofJesusChrist.org
Auala faigofie aigofie e alofa, Faasoa, Ma valaaulia
Na faatuina e le Faaola le faataitaiga o le alofa, faasoa atu, ma le valaauliaina. Saili manatu ma musumusuga pe faapefea ona e mulimuli i lena faataitaiga i le share.churchofjesuschrist.org.
-
Vitio—”Faasalalauga o le 2021: Mataupu Faavae o le Alofa, Faasoa Atu, ma Valaaulia” mai le faailo taimi 0:00 i le 1:35, o loo maua i le ChurchofJesusChrist.org
Alofa, Faasoa, Valaaulia
Ua valaaulia taitai o uarota ma siteki i se faasalalauga faapitoa i le lalolagi atoa e taula’i atu i le faasoaina atu o le talalelei e ala i mataupu faavae o le alofa, faasoa, ma le valaaulia.
Faaaoga mea na e aoaoina
Mafaufau e faasoa atu se taimi na e fesoasoani ai i se tasi e ala i le faaaogaina o mataupu faavae o le alofa, faasoa atu, ma valaaulia. Pe e mafai foi ona e faasoa atu se taimi na faamanuiaina ai lou olaga e se tasi e ala i le faaaogaina o nei mataupu faavae.
Valaaulia tagata aoga e mulimuli i soo se uunaiga na latou lagonaina i le aso e saunia ai se fuafuaga e faasoa atu le talalelei. O a latou fuafuaga e mafai ona aofia ai le faatinoina o se manatu se tasi pe sili atu o loo lisiina i luga o le laupapa. Ina ia fesoasoani i auiliiliga o a latou fuafuaga, e mafai ona e faaali atu faatonuga ma uunaiga nei mo tagata aoga e faamaea ia latou api talaaga mo suesuega.
Filifili se tasi o gaoioiga nei e faatumu i lau api talaaga mo suesuega:
-
O le a ou faaali atu le alofa i se tasi e ala i le .
-
O le a ou faasoa atu mea ou te iloa pe lagonaina e uiga i le talalelei a le Faaola e ala i le .
-
O le a ou valaaulia (igoa o se tasi) ia .
Mo (le) uunaiga na e filifili e tali, faamaea mea nei i lau api talaaga mo suesuega:
-
O le isi laasaga o le a ou faia mo le faamaeaina o la’u fuafuaga o le .
-
O le a ou taumafai e faia lenei mea e ala i le (aso).
Atonu e lagona e nisi tagata aoga le lotovaivai pe afai e le talia lelei ni taumafaiga faamaoni e faasoa atu le talalelei. Fesoasoani i tagata aoga ia malamalama e alofa le Alii i taumafaiga o loo latou faia, e tusa lava pe foliga mai e le manuia i le taimi nei. Valaaulia i latou e faaauau pea ona galulue i le faatuatua e tusa lava po o a taunuuga o maua vave mai.