Lesona 202: Sauniuniga a le Faifeautalai

O Le Tusi a Mamona o se Meafaigaluega e Liua ai

Faaaogaina o le Tusi a Mamona e Saunia e Faasoa Atu ai le Talalelei

O le Tusi a Mamona o se meaalofa ua tuuina mai e le Atua ia i tatou e faapotopoto ai Isaraelu o aso e gata ai ia Iesu Keriso. Mo tagata aoga e faaaoga lenei meaalofa e fesoasoani ai e faapotopoto isi, e taua lo latou mauaina o a latou lava molimau mai le Atua e moni. O lenei lesona e mafai ona fesoasoani i tagata aoga ia lagonaina le taua o le faamalosia o a latou molimau o le Tusi a Mamona e sauniuni ai e faasoa atu le talalelei a le Faaola.

Gaoioiga E Ono Mafai Ona Aoao Ai

O se meafaigaluega e faapotopoto ai Isaraelu

Mafaufau e lisi i luga o le laupapa pe faaali atu ni meafaigaluega eseese e masani ai au tagata aoga. O nisi o faataitaiga o se samala, faovilivili, pulumu fufulu nifo, mea faapipii pepa, ma isi mea faapena. Valaaulia tagata aoga e talanoa e uiga i le aogā o meafaigaluega e faaaoga ai fesili e pei o fesili nei.

• O anafea le taimi mulimuli na e faaaogaina ai se tasi o nei meafaigaluega? Na faapefea ona e faaaogaina?

• E faapefea ona galulue nisi o meafaigaluega e faatino ai lea lava matafaioi e tasi?

  Ina ia fesoasoani i tagata aoga ia malamalama o nisi meafaigaluega e sili atu ona lelei i le faatinoina o ni galuega patino, mafaufau e fai atu i se tagata aoga e fai se galuega e pei o le faapipiiina faatasi o nisi o pepa e faaaoga ai se faovilivili po o se pulumu fufulu nifo.

  Fesoasoani i tagata aoga ia malamalama o nei meafaigaluega e ausia ai ni galuega patino. E faapena foi, ua saunia e le Atua meafaigaluega e faataunuu ai vaega patino o Lana galuega, o se tasi o na vaega o le faapotopotoina lea o tagata ia Iesu Keriso.

• O a nisi o meafaigaluega ua saunia e le Tama Faalelagi ma Iesu Keriso e faapotopoto atu ai tagata ia i Laua?

E mafai e tagata aoga ona faitau le faamatalaga lenei e faamautu ai a latou tali i le fesili na muamua atu pe vaai foi i ni tali faaopoopo.

Na aoao mai Elder Shayne M. Bowen o le Fitugafulu:

O loo tatou faapotopotoina Isaraelu mo le taimi mulimuli ma o loo faia e ala i le Tusi a Mamona—o se tusi, pe a tuufaatasia ma le Agaga o le Alii, o se meafaigaluega sili ona mamana o le liuaina. (Shayne M. Bowen, “O Le Matafaioi a le Tusi a Mamona i le Liua,” Liahona, Nov. 2018, 83)

• Aisea e te manatu ai e mafai ona avea le Tusi a Mamona ma se meafaigaluega mamana tele mo le faaliliuina ma le faapotopotoina o tagata ia Iesu Keriso?

Faalogologo ma le toto’a a o tali mai tagata aoga, ma pe a talafeagai ai, valaaulia i latou e faasoa mai pe aisea latou te lagona ai lea lagona.

Afai o le a fesoasoani i tagata aoga e vaai i se faataitaiga o le auala na avea ai le Tusi a Mamona ma se meafaigaluega i le aumaia o se tagata e toatasi e latalata atili atu i le Atua, mafaufau e faaali atu le “O Se Tala o le Tusi a Mamona” (5:15), o loo maua i le ChurchofJesusChrist.org.

Valaaulia tagata aoga e faitau le Moronae 10:3–5 ma le faamatalaga lenei. Fai atu ia i latou e vaavaai mo se auala taua e mafai ona tatou saunia ai e faasoa atu le Tusi a Mamona i isi.

Sa aoao mai Peresitene Henry B. Eyring o le Au Peresitene Sili:

Ina ia tatou iloa e moni le Tusi a Mamona, e tatau ona tatou faitauina ma faia le filifiliga o loo maua i le Moronae: tatalo e iloa ai pe moni. Pe a tatou faia lena mea, e mafai ona tatou molimau atu mai aafiaga patino i a tatou uo e faapea, e mafai ona latou faia lena filifiliga ma latou iloa ai lena lava upumoni e tasi. (Henry B. Eyring, “A Voice of Warning,” Ensign, Nov. 1998, 34)

• O le a se mea na e aoaoina mai le saunoaga a Peresitene Eyring ma le Moronae 10:3–5?

A o faasoa mai e tagata aoga mea na latou aoaoina, atonu latou te faailoa mai se upumoni e pei o lenei: O le mauaina o la tatou lava molimau i le Tusi a Mamona e mafai ai ona tatou fesoasoani i isi ia iloa lona moni.

Ina ia fesoasoani i tagata aoga e mafaufau i o latou lava aafiaga i lenei upumoni, e mafai ona e valaaulia i latou e iloilo le leoa a latou tali i faamatalaga nei.

I le faaaogaina o se fua o le tasi i le lima, faatasi ai ma le tasi e “le moni ia te au” ma le lima e “matua moni lava ia te au,” faatulaga ia faamatalaga nei:

• E mafai ona ou faamatala atu i se uo po o le a le Tusi a Mamona ma pe faapefea ona aumaia tagata ia Keriso.

• O loo ou suesueina le Tusi a Mamona i se auala ua faalolotoina ai lo’u liua patino ia Iesu Keriso.

• Sa ou maua ni aafiaga na mafai ai ona ou molimau atu i isi e moni le Tusi a Mamona.

Mafaufau e valaaulia tagata aoga e saili musumusuga i le auala e valaaulia ai le mana o le Atua i o latou olaga ma olaga o isi e ala i le Tusi a Mamona.

Faatauaina o le mealofa a le Atua o le Tusi a Mamona

I se faaaliga na tuuina atu ia Iosefa Samita, na faamamafa mai ai e le Alii le taua o le Tusi a Mamona e ala i le faasoaina atu o ona lagona pe a manatu mama tele tagata i ai.

Faitau le Mataupu Faavae ma Feagaiga 84:54–57, ma mafaufau pe faapefea ona faatatau nei fuaiupu i tagata o le Ekalesia a le Alii o e o loo sauniuni e faasoa atu Lana talalelei.

• O le a se mea na e maua e mafai ona faatatau ia i latou o e mananao e faasoa atu le talalelei a le Faaola?

• O a nisi o auala e mafai ona tatou faaalia ai le taua o le Tusi a Mamona i o tatou olaga?

Atamai patino ma le molimau o le Tusi a Mamona

O le vaaiga lenei, po o se isi vaaiga e te fatuina, e mafai ona fesoasoani i tagata aoga e faailoa mai ai mea na latou aoaoina ma lagonaina i le taimi o le lesona. Mafaufau e faitau faatasi o se vasega le vaaiga ma tuu atu i tagata aoga se taimi e mafaufau ai i mea latou te ono faasoa atu ia Annie.

Faatoa auai Annie i se vasega sauniuni mo faifeautalai. Sa ia fesili atu i faiaoga faifeautalai faatoa foi mai mo ni fautuaga i le sauniuni e faasoa atu le talalelei. Sa fautuaina o ia e faiaoga uma e lua ina ia faamalosia lona malamalama ma le molimau i le Tusi a Mamona. Mai auala uma sa mafai ona laua tali atu ai, o le suesueina o le Tusi a Mamona sa le o le tali lea sa faamoemoeina e Annie.

Valaaulia tagata aoga e feoai solo i le potu ma ta’u atu ia le itiiti ifo ma le toalua isi tagata aoga ia mea latou te ono faasoa atu ia Annie.

Mafaufau pe faapefea ona fatuina se avanoa mo le Agaga Paia e molimau atu ai i au tagata aoga e uiga i le Tusi a Mamona. E mafai ona e valaaulia ni volenitia e faasoa atu i le vasega ni fuaitau e sili ona fiafia i ai o le Tusi a Mamona po o latou aafiaga i le mauaina o se molimau i le Tusi a Mamona. E mafai ona e faasoa atu se fuaitau na fesoasoani ia te oe e te iloa atili ai le Faaola. Tuu atu i tagata aoga se taimi e sauni ai. Afai e toatele tagata aoga e mananao e faasoa mai, valaaulia i latou e faia i ni vaega toalaiti ina ia maua e tagata uma se avanoa.

Faaaogaina

Mafaufau e valaaulia tagata aoga e tali filemu i fesili nei i totonu o a latou api faamaumau mo suesuega.

• O le a se mea e mafai ona e faia e faaloloto ai lau sootaga ma Iesu Keriso e ala i le Tusi a Mamona?

  E mafai ona e fautuaina atu ni nai filifiliga, e pei o lenei: faitauina atoa o le Tusi a Mamona i se vaitaimi faapitoa, vaavaai mo fuaiupu e faasoa atu i isi, po o le ole atu i le Tama Faalelagi mo se molimau e ala i le Agaga Paia e moni le tusi.

  E mafai foi ona e faaali atu le vitio “O Le Tusi a Mamona” (2:10), o loo maua i le ChurchofJesusChrist.org. I le vitio lenei, o loo faasoa mai ai e Elder Jeffrey R. Holland ma Quentin L. Cook o le Korama a Aposetolo e Toasefululua le auala na valaaulia ai i laua e lo la peresitene misiona e aoao e uiga ia Keriso e ala i le Tusi a Mamona. Atonu e filifili tagata aoga e mulimuli i lena lava valaaulia.

• E mafai faapefea e le faia o mea na e tusia ona saunia ai oe e faasoa atu le Tusi a Mamona i le olaga i aso uma po o le avea ai ma se faifeautalai faamisiona?

Valaaulia tagata aoga e faasoa mai a latou molimau pe na faapefea ona fesoasoani le Tusi a Mamona ia i latou e faalatalata atili ia Iesu Keriso.

Punaoa Faaopoopo

E faapefea ma aisea e tatau ai ona ou faasoa atu le Tusi a Mamona?

Na faasoa mai Elder Ronald A. Rasband o le Korama a Aposetolo e Toasefululua:

Ou te valaaulia outou i le asō, e tuu atu se Tusi a Mamona i au uo ma aiga, o au uo mamae i le galuega, o lou faiaoga soka, po o le tamaloa o faatau fua o faatoaga i le tou maketi. Latou te manaomia afioga a le Alii o loo maua i lenei tusi. Latou te manaomia tali i fesili o le olaga i aso faisoo ma le ola e faavavau a sau. Latou te manaomia ona iloa le ala o feagaiga ua faataatia i o latou luma ma le alofa tumau o le Alii mo i latou. O loo i ai uma i le Tusi a Mamona.

Pe a e tuu atu ia i latou se Tusi a Mamona, ua e tatalaina o latou mafaufau ma loto i le afioga a le Atua. E le tau manaomia ona e feaveaʼia ni kopi lolomi o le tusi. E faigofie lava lou faasoa atu mai lau telefoni feaveaʼi mai le vaega o tusitusiga paia i le polokalama o le Potutusi o le Talalelei.

Mafaufau ia i latou uma e mafai ona faamanuiaina e ala i le talalelei i o latou olaga, ona auina atu lea ia i latou o se kopi o le Tusi a Mamona mai lau telefoni. Manatua ia faaaofia ai lau molimau ma le auala ua faamanuia ai e lenei tusi lou olaga. (Ronald A. Rasband, “I Le Aso,” Liahona,, Nov. 2022, 27)

E faapefea e le Tusi a Mamona ona taitai i tatou ia Iesu Keriso?

Na faasoa mai Elder Ulisses Soares o le Korama a Aposetolo e Toasefululua:

Sa ou suesueina le Tusi a Mamona, o si mea itiiti, ma si mea itiiti, a o ou faamaeaina lesona faalevaiaso na atofaina i le seminare. Ou te manatuaina, e pei na tupu ananafi, se lagona mafanafana na amata faasolosolo maēna i lo’u agaga ma faatumulia ai lo’u loto, faamaninoina lo’u malamalamaaga, ma oo ina ou fiafia atili ai, e pei ona faamatalaina e Alema i lona tala’iina o le afioga a le Atua i ona tagata. O lena lagona na iu lava ina liua i le malamalama lea na mautu i lou loto ma avea ma faavae o la’u molimau i mea taua na tutupu ma aoaoga o loo maua i lenei tusi paia.

E ala i nei aafiaga patino lemafaatauina, na avea moni ai le Tusi a Mamona ma ma’a au’au na lagolagoina lo’u faatuatua ia Iesu Keriso ma la’u molimau o le aoaoga faavae o Lana talalelei. Na avea ma se tasi o poutu na molimau mai ia te a’u e uiga i le taulaga togiola paia a Keriso. Na avea ma o’u talita i lo’u olaga atoa e tetee atu ai i taumafaiga a le fili e faavaivaia lo’u faatuatua ma faaofi mai i lo’u mafaufau le lē talitonu ma tuuina mai ia te a’u le lototele e tautino atu ai ma le toa la’u molimau o le Faaola i le lalolagi. (Tagai i le Ulisses Soares, “O Le Oo Mai o le Tusi a Mamona,” Liahona, Me 2020, 34)

Gaoioiga Faaopoopo e Aoao Ai

Fesoasoani i isi ia o mai ia Iesu Keriso e ala i le Tusi a Mamona

Atonu e faigata i tagata aoga ona faasoa atu le talalelei i isi. Atonu e aoga le faaali atu o le vitio lenei o se alii talavou o lē na faasoaina atu le Tusi a Mamona i se uo. Ae, e mafai foi e tagata aoga ona faamatala mai ni taimi na latou faasoa atu ai le Tusi a Mamona i se tasi sa faapea ona faamanuiaina i le faitauina.

E mafai ona talanoaina e tagata aoga le mafuaaga o le faasoaina atu o le Tusi a Mamona o se auala lelei lea e talanoaina ai le talalelei ma se tasi.

E mafai ona e faaali atu i tagata aoga ni auala eseese e faasoa atu ai le Tusi a Mamona i le faaeletonika. E mafai ona latou faia lenei mea i le polokalama o le Potutusi o le Talalelei e ala i le tatalaina o le faailoga o tusitusiga paia ma oomi le “Faasoa Atu” po o le “Faasoa Atu Nei” i le pito i luga o le itulau. Pe mafai foi ona latou faasoa atu le polokalama o le Tusi a Mamona. O filifiliga uma e lua ua ofoina atu ai le Tusi a Mamona i le silia ma le 100 gagana e le totogia. O loo i ai i le upega tafailagi lenei faatonuga mo le kopiina mai o le polokalama ma e aofia ai se vitio e fesoasoani ai i tagata aoga ia iloa le auala e faasoa atu ai:

Faasoa Atu le Polokalama o le Tusi a Mamona

Faatino le faasoaina atu o le Tusi a Mamona

E mafai ona fesoasoani le tuuina atu i tamaiti aoga o se avanoa e faasoa atu ai le Tusi a Mamona i se faatulagaa e pei o se faifeautalai. E mafai e tagata aoga ona faatino ni faigapaaga. E mafai e paaga taitasi ona feauauai i le faia o mea nei e pei o loo latou talanoa i se uo o se isi faatuatuaga:

• Faamatala po o le a le Tusi a Mamona.

• Valaaulia lau uo e faitau.

• Tau atu i lau uo le mafuaaga e te manao ai e faitau.

Atonu e fesoasoani mo tagata aoga le faitau ma mulimuli i fautuaga mo le faasoaina atu o le Tusi a Mamona o loo maua i lalo o le “Malamalamaaga Faafaiaoga” i le itulau e 42 o le Tala’i La’u Talalelei: O Se Taiala mo le Galuega Faafaifeautalai (2023).

Faatomuaga i le Tusi a Mamona. “Ia tumau i ona mataupu”

Valaaulia tagata aoga e faitau le parakalafa lona ono o le faatomuaga o le Tusi a Mamona. E mafai ona fesoasoani lenei mea ia i latou e iloa ai se auala taua e valaaulia ai faamanuiaga o le Tusi a Mamona i o latou olaga. Fai atu i ai e vaavaai mo le folafolaga ua aumai ai. E mafai ona fesoasoani fesili nei mo talanoaga:

• E le gata i le faitauina o le Tusi a Mamona, o le a se mea e tatau ona tatou faia ina ia latalata atili atu ai i le Atua?

• O anafea na e faatinoina ai se mea na e aoaoina mai le Tusi a Mamona?

Ua talanoa mai le Tusi a Mamona mo ia lava

Ina ia fesoasoani i tagata aoga ia malamalama lelei i le mana o le Tusi a Mamona e faasino atu ai tagata i le Tama Faalelagi ma Iesu Keriso, e mafai ona e matamata i le vitio lenei. O loo faaalia ai tagata o lotu eseese i le salafa o le lalolagi o faitauina se itulau e lei fuafuaina o le Tusi a Mamona ma vaavaai pe faapefea ona molimau mai i le Atua.