Lesona 203: Sauniuniga a le Faifeautalai

Filiga i le Galuega Faafaifeautalai

Saunia e Avea ma se Faifeautalai Filiga

Na tuuina mai e Iesu Keriso ia i tatou le faataitaiga sili o le filiga e tatau ona tatou taumafai e faataitai i ai a o tatou auauna atu i isi. O lenei lesona e fesoasoani i tagata aoga e saili le fesoasoani a le Alii ina ia filiga atili i o latou olaga ma a latou sauniuniga e auauna atu o ni Ana faifeautalai.

Gaoioiga E Ono Mafai Ona Aoao Ai

Fogafale fa, faitotoa mulimuli

Mafaufau e amata le lesona i le fesoasoani i tagata aoga e mafaufau loloto i le taua o le filiga i le galuega faafaifeautalai. E mafai ona e faaali atu le ata lenei ma faasoa atu le tala o loo i lalo. Pe mafai foi ona e faaali atu le vitio “Fogafale Fa, Faitotoa Mulimuli,” o loo maua i le ChurchofJesusChrist.org, mai le faailo taimi 14:17 i le 17:27. E mafai ona e taofi le vitio i le faailo taimi 16:03 mo tagata aoga e mafaufau ai pe na faapefea ona latou tali atu i le taimi lea. Ona faaali atoa lea o le vitio.

Na faasoa mai e Elder Dieter F. Uchtdorf o le Korama a Aposetolo e Toasefululua le aafiaga lenei o faifeautalai i Europa o e na lagona le uunaiga e faasoa atu le talalelei i tagata o se fale mautotogi e fa fogafale.

Sa la amata i le fogafale muamua ma sa tu’itu’i i faitotoa taitasi, ma tuu atu i ai le savali lavea’i a Iesu Keriso ma le Toefuataiga o Lana Ekalesia.

Sa leai ma se tasi i le fogafale muamua na faalogo ia i laua. …

… Sa laua tu’itu’i i faitotoa uma i le fogafale lona lua.

Sa faapena foi, na leai se tasi na faalogo.

Sa faapena foi ma le fogafale tolu. (Dieter F. Uchtdorf, “Fogafale Fa, Faitotoa Mulimuli,” Liahona, Nov. 2016, 17)

• O a ni mafaufauga atonu na i ai i nei faifeautalai i le taimi lea?

Sa faaauau le saunoaga a Elder Uchtdorf:

Ma sa faapena foi ma le [lona fa]—seia oo ina la tu’itu’i le faitotoa mulimuli o le fogafale fa.

Ina ua matala mai lena faitotoa, sa ataata mai se teineitiiti ia i laua ma fai mai ia i laua e faatali ae se’i talanoa atu i lona tina. …

… Sa tuu atu e faifeautalai le la savali ma tauaao atu i ai se tusi i le tina e faitau—le Tusi a Mamona.

Ina ua la o ese, sa tonu i le tina o le a ia faitaua na o ni nai itulau.

Sa ia faaumaina le tusi atoa i totonu i ni nai aso.

Sa lei pine, ae ulu atu lenei aiga ma le tina nofotoatasi i vai o le papatisoga. (Dieter F. Uchtdorf, “Fogafale Fa, Faitotoa Mulimuli,” Liahona, Nov. 2016, 17–18)

• O a uiga faa-Keriso ua e vaaia i nei faifeautalai?

Uiga faaKeriso i faifeautalai

Mafaufau e tofi le afa o le vasega e faitau fuaiupu o loo i lalo i le Mataupu Faavae ma Feagaiga vaega 4 ma le afa o le vasega e faitau fuaiupu o loo i le vaega 75. A uma ona faitau, e mafai e tagata aoga ona faasoa mai a latou tali i fesili o loo i lalo i se tasi e faitauina le isi mau faasino.

I le isi itu, e mafai ona e valaaulia paga e suesue i le vaega o le “Filiga”, e aofia ai manatu o le “Suesueina o Tusitusiga Paia”, i itulau e 132–33 o le Tala’i La’u Talalelei: O Se Taiala i le Faasoaina Atu o le Talalelei a Iesu Keriso (2023).

Faitau le Mataupu Faavae ma Feagaiga 4:2–6; 75:2–5, 29, vaavaai mo upu ma fasifuaitau na faaaoga e le Alii e faamatala ai i latou o e mananao e auauna atu ia te Ia, e aofia ai ma Ana faifeautalai.

• O le a le mea o faamoemoeina e le Faaola mai ia i latou o e mananao e auauna atu ia te Ia o ni faifeautalai faamisiona? Aisea?

• E mafai faapefea e nei uiga ma faatinoga ona fesoasoani ia i tatou i tulaga faigata tatou te ono feagai?

Faatasi ai ma upumoni ua faasoa mai e tagata aoga, atonu latou te faailoa mai ai e faamoemoe le Alii i Ana faifeautalai e galulue ma le filiga i le faasoaina atu o Lana talalelei.

O le a le filiga?

Tusi amataga lenei i luga o le laupapa, ma valaaulia tagata aoga e faasoa mai pe faapefea ona latou faaumaina.

O le filiga o le …

Afai e manaomia e tagata aoga le fesoasoani e faauigaina ai le filiga, e mafai ona e faasoa atu, o se tasi o faauigaga e ono i ai o le “taumafaiga faifai pea ma le faamaoni” (Tala’i La’u Talalelei: O Se Taiala i le Faasoaina Atu o le Talalelei a Iesu Keriso [2023], 132).

• O a nisi o tulaga e ono feagai ma oe po o isi o lau tupulaga e manaomia ai le filiga?

Atonu e te manao e lisi tali a tagata aoga i luga o le laupapa. A uma ona tuufaatasia ni nai manatu mai tagata aoga, tuu atu ia i latou se avanoa e mafaufau atili ai ma le faaeteete i le auala latou te faaalia ai le filiga i o latou olaga.

O se tasi o auala e faia ai lenei mea o le faaali atu lea o le iloiloga faaletagata lava ia lenei ma tuu atu i tagata aoga se taimi e mafaufau filemu ai i le auala o le a latou tali atu ai. Mafaufau e faamalamalama atu i tagata aoga a o latou faamaeaina lenei iloiloga faaletagata lava ia, e mafai e le Agaga Paia ona fesoasoani ia i latou ia iloa mea o loo latou faia lelei ma le auala e mafai ona latou faaleleia atili ai. E ono aoga mo tagata aoga le tali o fesili nei i totonu o a latou api faamaumau mo suesuega. (Manatua: E mafai ona e filifili e toe faaali atu nei faamatalaga i le faaiuga o le lesona.)

Mafaufau lemu i le lelei o faamatalaga taitasi nei o loo faamatalaina ai oe:

• Ou te galue malosi seia maea lelei se galuega, e tusa lava pe faigata.

• Ou te galue ma le mataalia, e tusa lava pe le o vaavaaia ma le toto’a a’u.

• E mafai ona faalagolago tagata ia te a’u ma a’u taumafaiga e faataunuu se galuega.

• Ou te maua le olioli i le faia o le mea sili ou te mafaia.

Mafaufau e faaali atu faatonuga nei ma valaaulia tagata aoga e galulue faatasi i ni vaega toalaiti e faauma ai le gaoioiga. A uma ona faamae’a e vaega le gaoioiga, valaaulia i latou e faasoa i isi vaega mea na latou aoaoina.

1. Saili se mau faasino po o se faamatalaga faaperofeta e faaalia ai le taua o le filiga.

2. Talanoa pe faapefea ona avea Iesu Keriso ma faataitaiga o le filiga.

3. Faasoa atu se aafiaga na faamanuiaina ai oe po o se tasi e te iloa e ala i le filiga.

4. Talanoa pe aisea e te manatu ai e taua mo faifeautalai ona filiga.

5. Talanoa isi vaega o lou olaga e taua ai le filiga.

E mafai e le Agaga Paia ona fesoasoani i upumoni ia goto ifo i loto o tagata aoga ma saunia ai tagata aoga e faaaoga na upumoni. O se tasi o auala e mafai ona e fesoasoani ai i tagata aoga e valaaulia le Agaga Paia o le tuuina atu lea o avanoa mo i latou e vaai ai pe na faapefea ona faaalia e le Faaola ma isi le filiga. Mo ni faataitaiga o le auala na faaalia ai e le Faaola le filiga, e mafai e tagata aoga ona faitau le Mataupu Faavae ma Feagaiga 19:16–19 po o le Luka 22:39–44. Mo se faataitaiga o se isi tagata o loo faaalia le filiga, mafaufau e faaali atu “Sauniuniga a Gordon B. Hinckley: Faagalo Oe Lava ma Alu e Galue” (2:03), o loo maua i le ChurchofJesusChrist.org.

Faamanuiaga o le filiga

Faamanatu i tagata aoga le tala a Elder Dieter F. Uchtdorf e uiga i faifeautalai e toalua i Europa o e na tu’itu’i atu i le faitotoa mulimuli o le fogafale lona fa. Faamalamalama atu o a laua taumafaiga filiga na iu ina faamanuiaina ai Elder Uchtdorf. Mafaufau e faaali atu le ata lenei o faifeautalai ma le aiga sa nonofo i le fale mautotogi i tua atu o le faitotoa mulimuli i le fogafale lona fa. Faailoa atu o se tasi o teineiti talavou e toalua o Harriet, le faletua o Elder Uchtdorf.

Na faasoa mai e Elder Dieter F. Uchtdorf ona lagona e uiga i nei faifeautalai e toalua:

Ua faafia ona ou siia’e lo’u loto i le faafetai mo faifeautalai e toalua sa le’i taofi i le faitotoa muamua! E masani ona oo atu lo’u agaga faafetai mo lo la faatuatua ma galuega. Ua faatele ona ou faafetai i lo la faaauau pea—ma oo atu ai i le fogafale fa, ma le faitotoa mulimuli. (Dieter F. Uchtdorf, “Fogafale Fa, Faitotoa Mulimuli,” Liahona, Nov. 2016, 18)

• Afai e mafai e na faifeautalai ona faasoa atu se mea e uiga i le filiga i la tatou vasega, o le a se mea e te manatu o le a laua fai mai ai?

Filiga i lo’u olaga

Mafaufau e faaali atu faamatalaga e uiga i le filiga patino lea na toe mafaufau i ai tagata aoga i le amataga o le lesona. Atonu na lagona e tagata aoga le uunaia e le Agaga e taulai atu i se faamatalaga se tasi e sili atu nai lo isi. Valaaulia tagata aoga e mafaufau i lena faamatalaga ao tusi a latou tali i fesili nei i a latou api faamaumau mo suesuega.

• O a ni suiga e mafai ona ou faia ina ia avea atili ai ma se tagata filiga?

• E faapefea ona saunia lelei au e le filiga e faasoa atu le talalelei a Iesu Keriso o se faifeautalai faamisiona ma i lo’u olaga i aso uma?

• E faapefea e le filiga ona fesoasoani ia te a’u ia avea atili ai e faapei o le Faaola?

A o tusifaamaumau e tagata aoga a latou tali, uunaia i latou ia aua nei faatuai e fai se fuafuaga e fai se mea o le a faalauteleina ai i latou ma manaomia ai le galue malosi ma le filiga faifai pea.

Punaoa Faaopoopo

Aisea e manaomia ai e le galuega faafaifeautalai a tatou taumafaiga filiga?

Sa faamalamalama mai e Elder Jeffrey R. Holland o le Korama a Aposetolo e Toasefululua:

Soo se tasi lava e faia soo se ituaiga o galuega faafaifeautalai o le a i ai se avanoa e fesili ai, Aisea e matua faigata ai lenei mea? Aisea e le alu lelei ai? Aisea e le mafai ai ona vave lo tatou faamanuiaina? Aisea ua le toatele ai tagata ua auai i le Ekalesia? … Aisea e le lolofi atu ai tagata i le tusi? Aisea e le na o le pau ai le tulaga lamatia i le galuega faafaifeautalai o le niumonia mai le susū i le ao atoa ma le po atoa i le faatanoa papatisoga?

O le a e maua le avanoa e fai atu ai na fesili. Sa ou mafaufau soo i lenei tulaga. Ou te ofoina atu lenei mea o se lagona patino. Ua faatalitonuina aūu e faapea, o le galuega faafaifeautalai e le faigofie aua o le faaolataga e le o se aafiaga taugofie. O le faaolataga sa le’i faigofie lava. O i tatou o le Ekalesia a Iesu Keriso, o le upumoni lenei, ma o Ia o lo tatou Faaao Sili e Faavavau. E faapefea la ona tatou talitonu o le a faigofie mo i tatou pe afai sa le’i, faigofie lava mo Ia? E foliga mai ia te a’u, ua faaalu e faifeautalai ma taitai o misiona e le itiiti ifo ma ni nai taimi i Ketesemane. E tatau i faifeautalai ma taitai o misiona ona faia ia le itiiti ifo ma se sitepu se tasi pe lua agai atu i le tumutumu o Kalevaria. (Jeffrey R. Holland, “Galuega Faafaifeautalai ma le Togiola,” Ensign, Mat. 2001, 14–15)

E mafai faapefea ona avea au ma se faifeautalai faamanuiaina?

Sa aoao mai Peresitene Ezra Taft Benson (1899–1994):

E masani ona ou fai atu o se tasi o mealilo silisili o le galuega faafaifeautalai, o le galue. Afai e galue se faifeautalai, o le a ia maua le Agaga; afai o le a ia maua le Agaga, o le a ia aoao atu e ala i le Agaga; ma afai o le a ia aoao atu e ala i le Agaga, o le a ia pa’i atu i loto o tagata ma o le a fiafia o ia. … Galue, galue, galue—e leai se isi tulaga faamalieloto e mafai ona suitulaga ai, aemaise lava i le galuega faafaifeautalai. (Aoaoga a Peresitene o le Ekalesia: Ezra Taft Benson [2014], 284)

O le a le uiga o le avea ma faifeautalai filiga?

Na faasoa mai e Uso Craig B. Ballard se fautuaga na tuuina atu e lona tamā, o Peresitene M. Russell Ballard o le Korama a Aposetolo e Toasefululua, ia te ia a o avea o ia ma se faifeautalai talavou:

Ia mulimuli pea i tulafono, ia filiga ma faaauau pea ona galue malosi. Afai e mafai ona e lipoti atu i le Alii i au tatalo i po taitasi ae e te lei moe, sa e faia le mea sili e te mafaia ina ia usiusitai ma filiga ma galue malosi o le a e lagonaina Lona alofa ma le taliaina o au taumafaiga. A o e faia lena mea i aso uma mo lau misiona atoa, o le a e iloa ma alofa i lou Faaola e lei i ai muamua. (M. Russell Ballard, i le Craig B. Ballard,“What President M. Russell Ballard Taught His Son about Being a ‘Diligent Missionary,’” Church News, 21 Ape., 2021, thechurchnews.com)

Gaoioiga Faaopoopo e Aoao Ai

Tala faafaifeautalai

Ina ia fesoasoani i tagata aoga ia iloa pe na faapefea ona aafia faifeautalai i le lalolagi atoa i le filiga ma le finafinau, e mafai ona e faasoa atu nisi o tala nei. E mafai ona faailoa mai e tagata aoga le auala na faamanuiaina ai faifeautalai i uiga o le filiga ma le finafinau a o latou faia le galuega a le Alii.

• O le filiga o Elizabeth McCune na saofaga i le faaiuga a le Au Peresitene Sili i le aso 11 o Mati, 1898, e valaau atu i faifeautalai tuafafine. Faitau le “I Could Have Gone into Every House” (Aok. 24, 2018, history.ChurchofJesusChrist.org), pe matamata i le “This Grand Opportunity: Elizabeth McCune and the First Sister Missionaries.”

• Na faasoa mai e Elder Ulisses Soares o le Korama a Aposetolo e Toasefululua le auala na tumau ai le filiga o se faifeautalai i le galuega faafaifeautalai e ui lava ina ua iloa ua maliu lona uso (tagai Ulisses Soares, “Ia Faamatala Atu i le Atua ma le Le Maluelue,” Liahona, Me 2017, 35). Mafaufau e faaali atu le fuaitau mai le “Ia Faamatala Atu i le Atua ma le Le Maluelue.”

• Sa faasoa mai e Uso M. Joseph Brough, o lē sa auauna atu i le Au Peresitene Aoao o Alii Talavou, mea na aoaoina e lona afafine e uiga i le filiga ma mea faigata (tagai M. Joseph Brough, “Ea I Luga Lou Ulu ma Olioli,” Liahona, Nov. 2018, 14). Mafaufau e matamata i le fuaitau mai le “Ea i Luga Lou Ulu ma Olioli.”

Vitiō

Ina ia fesoasoani i tagata aoga ia malamalama pe faapefea e luitau o le olaga faafaifeautalai ona fesoasoani ia i latou e saunia ai mo luitau i le lumanai, mafaufau e faaali atu le “Aoao e Feagai ma Faigata” (2:37). Ua faasoa mai e Elder Jeffrey R. Holland ma Quentin L. Cook o le Korama a Aposetolo e Toasefululua o laua manatu i lenei autu.