Leksiyon 201: Misyonaryo nga Pagpangandam

Pagpili nga Moserbisyo og usa ka Misyon

Mga Panalangin sa Misyonaryo nga Pagserbisyo

Usa sa mga paagi nga mopanalangin ang Langitnong Amahan sa Iyang mga anak pinaagi sa misyonaryo nga buhat. Gipanalanginan niya ang mga misyonaryo samtang sila nagserbisyo ug nagtudlo sa mga tawo diha sa ilang mga komunidad ug sa tibuok kalibotan. Gipanalanginan usab Niya kadtong modawat sa mensahe sa ebanghelyo ug modawat sa serbisyong gitanyag sa mga misyonaryo. Kini nga leksiyon makatabang sa mga estudyante nga mobati og tinguha sa pagserbisyo sa Ginoo ingon nga Iyang mga misyonaryo.

Posibleng mga Kalihokan sa Pagkat-on

Atong responsiblidad ang pagserbisyo ingon nga mga misyonaryo

Ikonsiderar ang pagpasabot atol niini nga leksiyon bahin sa misyonaryo nga buhat, makigtinabangay ang mga estudyante sa usa ka kompanyon. Usa ka paagi aron makahimo og mga kompanyon mao ang pag-andam og usa ka basket nga naay mga sampol sa mga assignment sa misyon nga gisulat diha sa mga piraso sa papel. Kini nag-apil sa mga lokasyon diin pwedeng madistino ang mga misyonaryo nga magtudlo, sama sa Guatemala o Hungary. Pwedeng apil pod ani ang posibleng mga asaynment sa mga pangserbisyo nga mga misyon, sama sa mga worker sa ordinansa sa templo o sa lokal nga fpundohanan sa pagkaon. Seguroa nga adunay duha ka kopya sa matag assignment diha sa basket. Dapita ang matag estudyante nga magkuha og usa ka papel gikan sa basket ug dayon motapad sa klasmeyt nga nakahulbot og parehas nga assignment.

Hatagi ang matag managkompanyon og kopya sa mosunod nga pamahayag ug ipakita ang tulo ka instruksiyon nga mosunod.

Gipanghimatud-an pag-usab ni Presidente Russell M. Nelson ang tawag sa Ginoo sa pagserbisyo isip mga misyonaryo:

Karong adlawa ako kusganong mopanghimatuod og balik nga ang Ginoo miawhag sa matag takos, makahimo nga batan-ong lalaki sa pagpangandam ug pagserbisyo sa misyon. Alang sa batan-ong kalalakin-an nga mga Santos sa Ulahing mga Adlaw, ang misyonaryo nga pagserbisyo usa ka responsibilidad sa pagkapari. Kamong mga batan-ong lalaki gitagana alang niini nga panahon diin ang gisaad nga pagpundok sa Israel mahitabo. Samtang kamo nagserbisyo og mga misyon, kamo adunay importante kaayo nga papel niining wala pa sukad mabuhat nga panghitabo!

Alang kaninyo batan-on ug makahimo nga mga sister, ang usa ka misyon gamhanan usab, apan opsiyonal, nga oportunidad. Among gihigugma ang sister nga mga misyonaryo ug tibuok kasingkasing namo silang gihangop. Ang ilang matampo niini nga buhat nindot kaayo! Pag-ampo aron masayod kon ang Ginoo buot ba nga moserbisyo kamo og misyon, ug ang Espiritu Santo motubag sa inyong kasingkasing ug hunahuna. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6)

1. Basaha ang pamahayag uban sa imong kompanyon.

2. Hisgoti kon unsay ganahan nimo sa maong pamahayag.

3. Pangandam sa pagpakigbahin sa imong mga panabot diha sa klase.

Pagdapit og pipila ka managkompanyon sa pagpakigbahin sa ilang mga panabot diha sa klase. Kon adunay pangutana ang mga estudyante bahin sa pamahayag, ikonsiderar ang pagtabang nila nga makaplagan ang mga tubag o sa paggiya kanila aron hisgotan ang ilang mga pangutana uban sa Ginoo, sa ilang mga ginikanan, o sa mga lider sa Simbahan. Seguroa nga masabtan sa mga estudyante ang mga gidahoman sa Ginoo para sa batan-ong mga lalaki ug batan-ong mga babaye bahin sa misyonaryo nga pagserbisyo.

Personal nga pagpamalandong

Ipakita ang mosunod nga pamahayag ug mga pangutana ug dapita ang mga estudyante sa pagpamalandong sa ilang personal nga pagbati bahin sa misyonaryo nga pagserbisyo. Ang paghatag og panahon sa mga estudyante sa pagpamalandong ug pagtubag sa mga pangutana makadapit sa Espiritu Santo ug makaandam sa ilang mga hunahuna ug mga kasingkasing nga madasig samtang nagtuon sila.

Si Presidente Russell M. Nelson mitudlo:

Minahal nga batan-ong mga higala, ang matag usa kaninyo importante ngadto sa Ginoo. Siya migahin kaninyo hangtod niining higayona aron sa pagtabang sa pagpundok sa Israel. Ang inyong desisyon sa pagserbisyo og misyon, pangsangyaw man o pangserbisyo nga misyon, makapanalangin kaninyo ug sa daghan pang uban. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7)

Pamalandong ug isulat ang imong mga tubag sa mosunod nga mga pangutana diha sa imong journal sa pagtuon:

• Asang bahina niini nga pamahayag ang labing makahuloganon para nimo? Ngano man?

• Unsay gitudlo ni Presidente Nelson nga makaapektar sa imong tinguha nga moserbisyo og usa ka misyon?

Dapita ang pipila ka boluntaryo sa pagpakigbahin sa ilang mga tubag. Samtang nakigbahin ang mga estudyante, ipahayag tingali sa pipila ang mosunod nga kamatuoran sa kaugalingon nilang mga pulong: Panalanginan kita sa Ginoo ug ang daghang uban pa samtang pilion natong moserbisyo isip Iyang mga misyonaryo. Ikonsiderar ang pagsulat niini nga kamatuoran diha sa pisara. Dasiga ang mga estudyante nga tinguhaon ang tabang sa Espiritu Santo aron mahibaloan kon unsay gusto sa Langitnong Amahan aron ilang maggamit kini nga kamatuoran sa ilang mga kinabuhi.

Kon para nimo makabenepisyo ang mga estudyante sa pagkat-on og dugang bahin sa pangserbisyo nga mga misyon, ikonsiderar ang paggamit sa materyal nga anaa sa “Dugang nga mga Kalihokan sa Pagkat-on.”

Mga panalangin sa misyonaryo nga pagserbisyo

Ang mosunod nga kalihokan makatabang sa mga estudyante nga mas masabtan ang mga panalangin nga mahatag sa Ginoo kanila ug sa uban samtang ilang pilion ang pagserbisyo og usa ka misyon.

Ingon nga managkompanyon, pangita og mga kasulatan, mga pakigpulong sa kinatibuk-ang mga komperensiya, mga himno, o sa Librarya sa Ebanghelyo, nga mangita sa mosunod:

1. Mga panalangin nga mahatag sa Ginoo ngadto sa uban pinaagi sa atong misyonaryo nga mga paningkamot.

2. Mga panalangin nga mahatag sa Ginoo kanato tungod sa pagserbisyo og usa ka misyon.

Kon para nimo makatabang sa mga estudyante ang mas pihong giya, ikonsiderar ang paghatag sa matag managkompanyon sa handout nga nag-ulohan og “Mga Panalangin sa Misyonaryo nga Pagserbisyo.”

Mga Panalangin sa Misyonaryo nga Pagserbisyo

Tun-i ang mosunod nga mga tudling sa kasulatan ug mga pamahayag. Samtang magtuon ka, pangitaa ang mosunod:

1. Mga panalangin nga mahatag sa Ginoo ngadto sa uban pinaagi sa atong misyonaryo nga mga paningkamot.

2. Mga panalangin nga mahatag sa Ginoo kanato tungod sa pagserbisyo og usa ka misyon.

• Doktrina ug mga Pakigsaad 4:1–4

• Doktrina ug mga Pakigsaad 15:6

• Doktrina ug mga Pakigsaad 18:14–16

• Doktrina ug mga Pakigsaad 31:3–8

• Doktrina ug mga Pakigsaad 50:22

Si Presidente Russell M. Nelson mitudlo:

Mga kaigsoonan, ang ebanghelyo ni Jesukristo wala pa sukad mas gikinahanglan kaysa karon. Ang panagbingkil milapas sa tanang gibarogan ug gitudlo sa Manluluwas. Gihigugma nako si Ginoong Jesukristo ug nagpamatuod nga ang Iyang ebanghelyo mao lamang ang malahutayong kasulbaran alang sa kalinaw. Ang Iyang ebanghelyo usa ka ebanghelyo sa kalinaw [tan-awa sa Doktrina ug mga Pakigsaad 27:16]. …

Ang tanang misyonaryo nagtudlo ug nagpamatuod sa Manluluwas. Ang espirituhanon nga kangitngit sa kalibotan nakapahimo sa kahayag ni Jesukristo nga wala pa sukad mas gikinahanglan kaysa karon. Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga “dili matugkad sa tawo” [Mga Taga Filipos 4:7]. (Russell M. Nelson, “Pagsangyaw sa Ebanghelyo sa Kalinaw,” Liahona, Mayo 2022, 6–7)

Si Elder Marcus B. Nash sa Seventy mitudlo:

Ang pagpakigbahin sa ebanghelyo mopukaw sa hingpit nga kalipay ug paglaom sa mga kalag sa tighatag ug sa tigdawat. Sa tinuod, “unsa ka dako ang imong hingpit nga kalipay” [Doktrina ug mga Pakigsaad 18:15] samtang ikaw mopakigbahin sa ebanghelyo! Ang pagpakigbahin sa ebanghelyo modugang og hingpit nga kalipay ngadto sa hingpit nga kalipay, paglaom ngadto sa paglaom. …

Ang pagpili nga dili mopakita sa kahayag sa ebanghelyo modala kanato ngadto sa ngiob nga mga dapit, diin kita mas dali nga madutlan sa tentasyon. Labing mahinungdanon, ang sukwahi tinuod: ang pagpili nga mopakita sa kahayag sa ebanghelyo mas mopaduol kanato ngadto niana nga kahayag ug sa proteksyon nga ihatag niini batok sa tentasyon. Pagkadako niini nga panalangin sa kalibotan karon! (Marcus B. Nash, “Ipakita Ninyo ang Inyong Kahayag,” Liahona, Nob. 2021, 71–72)

Dihang mahuman na og tuon ang mga estudyante, dapita ang matag pares nga isulat palibot sa kamatuoran diha sa pisara ang dili moubos sa usa ka panalangin sa misyonaryo nga buhat. Human malista ang daghang panalangin, ikonsiderar ang pagpangutana og sama sa mosunod aron hatagag higayon ang mga estudyante nga ipakigbahin o magpamatuodsa ilang nakat-onan:

• Hain sa mga panalangin diha sa pisara ang nadawat nimo o sa imong kaila pinaagi sa misyonaryo nga buhat?

• Unsa ang usa ka kasulatan o pamahayag ang imong nabasa nga nakatabang nga modako ang imong tinguha sa pagserbisyo sa Ginoo isip usa ka misyonaryo?

• Sa imong hunahuna, sa unsang paagi makaimpluwensiya ang misyonaryo nga buhat sa imong relasyon sa Ginoo? Ngano man?

Ikonsiderar ang pagpakigbahin sa imong mga kasinatian o magpamatuod kabahin sa misyonaryo nga buhat. Pwede sab nimong ipasalida ang bidyo nga “Value of a Full-Time Mission” (5:22), nga anaa sa ChurchofJesusChrist.org, ug dapita ang mga estudyante nga mangitag mga rason kon nganong pilion sa usa ka tawo ang paserbisyo og usa ka misyon.

Ikonsiderar ang pagdirekta sa mga estudyante balik sa pamahayag ni Presidente Nelson sa sinugdanan sa leksiyon. Dapita ang batan-ong mga lalaki nga padayong iampo nga dugangan sa Ginoo ang ilang tinguha ug abilidad sa pagserbisyo og full-time nga misyon. Dapita ang batan-ong mga babaye nga mag-ampo aron mahibaloan kon gusto ba ang Ginoo nga moserbisyo sila og full-time nga misyon.

Dugang nga mga Kapanguhaan

Sa unsang paagi ako mapanalanginan sa Ginoo tungod sa pagserbisyo og usa ka misyon?

Si Elder Marcos A. Aidukaitis sa Seventy mipakigbahin:

Taliwala sa daghan kaayong panalangin nga Iyang gihatag kanako tungod sa pagserbisyo Kaniya isip usa ka full-time nga misyonaryo mao ang mas dako nga pagtuo kang Jesukristo ug sa Iyang Pag-ula ug mas lig-on nga kahibalo ug pagpamatuod sa Iyang mga pagtulon-an, aron nga ako dili sayon nga “mapadpad ngadto-nganhi sa nagbalibali nga hangin sa pagtulon-an” (Mga Taga-Efeso 4:14). Nawala ang akong kahadlok sa pagtudlo. Ang akong kapasidad sa pag-atubang og mga hagit uban ang kamalaomon midako. Pinaagi sa pag-obserbar sa mga indibidwal ug mga pamilya nga akong gikahimamat o gitudloan isip usa ka misyonaryo, akong nakat-onan nga ang mga pagtulon-an sa Dios tinuod sa dihang Siya miingon nga ang sala dili makahatag og tinuod nga kalipay ug nga ang pagsunod sa mga sugo sa Dios makatabang nato nga mouswag sa temporal ug sa espirituwal nga paagi (tan-awa sa Mosiah 2:41; Alma 41:10). Ug ako nakakat-on sa akong kaugalingon nga ang Dios mao ang Dios sa mga milagro (tan-awa sa Mormon 9).

Kining tanan nga butang nakatabang sa akong pagpangandam alang sa hamtong nga kinabuhi, lakip sa posible nga kaminyoon ug pagkaginikanan, pagserbisyo sa Simbahan, ug propesyonal nga kinabuhi ug kinabuhi sa komunidad. …

Ang akong misyon nakaimpluwensiya sa hingpit sa akong kinabuhi. Akong nakat-onan nga dili mausik ang paningkamot nga mosalig sa Dios, nga mosalig sa Iyang kaalam ug kalooy ug sa Iyang mga saad. Human sa tanan, Siya ang atong Amahan, ug sa walay bisan unsang pagduha-duha, Siya buot sa labing maayo alang kanato. (Marcos A. Aidukaitis, “Ipataas ang Imong Kasingkasing ug Pagmaya,” Liahona, Mayo 2022, 42–43)

Nganong ang paserbisyo og usa ka misyon importanteng responsibilidad?

Si Elder David A. Bednar sa Korum sa Napulog Duha ka Apostoles mitudlo:

Ang pagsangyaw sa ebanghelyo dili usa ka obligasyon sa pagkapari kon may panahon lang. Dili kay ordinaryo lang kini nga kalihokan nga moapil-apil kita sa mubo nga panahon o usa ka buluhaton nga kinahanglang kompletohon isip mga miyembro sa Ang Simbahan ni Jesukristo sa mga Santos sa Ulahing mga Adlaw. Kondili, ang misyonaryong buhat usa ka pagpakita sa atong espirituhanong pagkakita ug panulundon. Kita giordinahan nang daan didto sa pre-mortal nga kahimtang ug natawo dinhi nga mortal aron matuman ang pakigsaad ug saad sa Dios ngadto ni Abraham. Ania kita karon dinhi sa kalibutan niining panahona aron sa pagpadayag sa priesthood ug sa pagsangyaw sa ebanghelyo. Mao kini kita, ug kana mao ang hinungdan nganong ania kita dinhi—karon ug sa kanunay. (David A. Bednar, “Pagkahimong usa ka Misyonaryo,” Liahona, Nob. 2005, 47)

Dugang nga mga Kalihokan sa Pagkat-on

Tawag sa misyon

Dapita ang mga estudyante nga ipakigbahin kon nakasaksi ba sila sa usa ka tawo nga nag-abli og usa ka tawag sa misyon.

• Unsa nga matang kana nga kasinatian?

• Unsay imong nahinumdoman gikan sa sulat sa tawag sa misyon gawas sa kon asa idestino ang usa ka tawo ug kon unsang pinulongan ang iyang gamiton?

Ipasabot nga usahay malimtan nato ang gisaad nga mga panalangin nga nakalista sa usa ka tawag sa misyon. Hatagi og kopya ang mga estudyante sa bag-ohay lang nga sulat sa tawag sa misyon. Dapita silang pangitaon ang mga panalangin nga gisaad sa Ginoo pinaagi sa Iyang propeta alang niadtong gitawag sa pagserbisyo.

Pangserbisyo nga mga misyon

Ipasabot nga kadtong takos nga batan-ong mga lalaki ug batan-ong mga babaye nga dili makahimo sa pagserbisyo og pangsangyaw nga misyon tungod sa pisikal, mental, emosyonal, o uban pang mga rason, pwedeng tawagon sa usa ka pangserbisyo nga misyon. Ang mga pangserbisyo nga mga misyonaryo mahimong moserbisyo sa Ginoo diha sa daghang buluhaton, lakip ang matinabangon nga mga organisasyon, pinaagi sa mga kalihokan sa Simbahan, ug sa mga oportunidad nga gitahas sa stake. Aron makakitag ehemplo, ikonsiderar ang pagtan-aw sa “Service Missions: Elder Quade’s Story” (5:19), nga anaa sa ChurchofJesusChrist.org.

Dapita ang mga estudyante nga basahon ang mosunod gikan sa mga giya nga gihatag para sa pangserbisyo nga mga misyonaryo, nga mangita sa mga panabot bahin sa pangserbisyo nga mga misyon:

Ang Unang Kapangulohan mihatag og katuyoan sa pangserbisyo nga misyonaryo aron mogiya nimo diha sa imong sagrado nga tawag sa pagserbisyo:

• “Ang atong katuyoan mao ang pagtabang sa uban nga moduol ngadto kang Kristo pinaagi sa pagserbisyo kanila sama sa buhaton sa Manluluwas. Kita boluntaryo nga moserbisyo diha sa manggihatagon nga mga organisasyon, mga kalihokan sa Simbahan, ug sulod sa komunidad. Kita mangalagad diha sa Iyang ngalan ngadto sa usa ka tawo, sama sa Iyang gibuhat, nga nagpahayag sa Iyang mahigugmaong pagkamabination.”

Hinumdomi nga kon giunsa nimo sa pagserbisyo ang Manluluwas maoy mas importante kay sa asa ka nagserbisyo o unsa ang imong gihimo. Si Presidente Russell M. Nelson namahayag: “Pinaagi sa tibuok kinabuhi nga pagserbisyo niining Simbahan, akong nakat-onan nga dili gayod kana igsapayan asa moserbisyo ang usa ka tawo. Ang gipakabanaan pag-ayo sa Ginoo mao ang giunsa pagserbisyo sa usa ka tawo” (“Ang Pagpangalagad uban sa Gahom ug Katungod sa Dios,” Liahona,, Mayo 2018, 68). Ang imong pagserbisyo alang sa Agalon, ug ikaw gidapit sa pagserbisyo sama Niya! (Mga Sumbanan sa Misyonaryo alang sa mga Disipulo ni Jesukristo—Pangserbisyo nga mga Misyon, 1.3)

• Unsay naganahan nimo?

• Unsang mga panabot ang imong nakuha bahin sa pagrepresentar kang Jesukristo ingon nga usa ka misyonaryo?

• Sa unsang paagi kini nga impormasyon makapalapad sa atong panan-aw sa misyonaryo nga buhat?

Para sa dugang impormasyon, pwede nimong dapiton ang mga estudyante sa pagpangita og mga detalye nga anaa sa ChurchofJesusChrist.org/service-missionary o diha sa Librarya sa Ebanghelyo nga app.