Leksiyon 204: Pagpangandam alang sa Templo

Si Jesukristo Anaa sa Sentro sa Tanang Pagsimba diha sa Templo

“Si Jesukristo Mao ang Rason nga Kita Nagtukod og mga Templo”

Sa tanang kapanahonan, ang Ginoo misugo sa Iyang mga katawhan sa pagtukod og mga templo. Sa atong panahon, nakita nato ang pagdaghan sa gitukod nga templo. Si Jesukristo naa sa sentro sa tanan natong gihimo sa templo. Kini nga leksiyon makatabang sa mga estudyante nga mobati og dakong tinguha sa pagsimba kang Jesukristo diha sa Iyang balay.

Posibleng mga Kalihokan sa Pagkat-on

Ang Maluluwas anaa sa sentro sa atong pagsimba

Ikonsiderar ang pagpakita sa mga litrato sa mga tawo nga miambit sa sakramento, kabatan-onan nga mitambong sa simbahan, ug mga young adult nga nagserbisyo isip full-time nga mga misyonaryo.

• Sa imong hunahuna, sa unsang paagi si Jesukristo naa sa sentro sa atong pag-ambit sa sakramento, pagtambong sa Simbahan, o pagserbisyo og full-time nga misyon?

• Sa unsang paagi maapektohan ang kasinatian sa usa ka tawo kon wala siya magpunting sa Manluluwas samtang miapil niini nga mga kalihokan?

Ipakita sa mga estudyante ang imahe sa usa ka templo duol nimo uban ang litrato sa Manluluwas. Dapita ang mga estudyante nga pamalandongan ang mosunod nga mga pangutana. Makabenepisyo tingali sila sa pagsulat sa ilang mga tubag diha sa ilang mga journal sa pagtuon.

Pamalandonga ang kaugalingon nimong mga kasinatian diha sa templo o samtang nangandam alang sa templo.

• Sa unsa nga ang-ang ang Manluluwas anaa sa sentro sa imong pagpangandam aron moapil diha sa templo ug diha sa imong mga kasinatian dihang anaa ka didto?

• Sa unsang paagi ang pagpunting sa Manluluwas makaapektar sa imong kasinatian sa templo?

Dasiga ang mga estudyante nga dapiton ang Espiritu nga giyahan sila samtang nagtinguha sila sa pagkat-on og dugang bahin kon sa unsang paagi ang Manluluwas anaa sa sentro sa pagsimba sa templo.

Gisugo sa Ginoo ang Iyang katawhan sa pagtukod og mga templo

Gipakita sa mosunod nga mga litrato ang pipila sa balaang mga dapit ug mga templo nga gipatukod sa Dios sa Iyang katawhan kaniadto. Ikonsiderar ang pagpakita niini ug pangutan-a ang mga estudyante kon kaya nilang ilhon ang gipakita nga mga bilding (ang tabernakulo ni Moises nga gitukod sa kamingawan [tan-awa sa Exodo 25:8], templo ni Solomon diha sa Jerusalem [tan-awa sa 1 Mga Hari 6:12–13], ang templo sa katawhan ni Nephi sa siyudad sa Bountiful [tan-awa sa 3 Nephi 11:1]).

Sa Doktrina ug mga Pakigsaad, gisugo sa Ginoo ang mga Santos sa pagtukod og mga templo (tan-awa sa Doktrina ug mga Pakigsaad 57:3; 109:2; 115:7–8; 124:26–27). Kini nga sugo nagsunod sa sumbanan nga giestablisar sa Ginoo kaniadto.

Ang Unang Kapangulohan mipahayag:

Sa matag higayon ang Ginoo adunay mga katawhan dinhi sa yuta kinsa mosunod sa Iyang mga pulong, sila gimandoan sa pagtukod og mga templo. (“First Presidency Releases Statement on Temples,” Jan. 2, 2019, ChurchofJesusChrist.org)

Basaha ang Doktrina ug mga Pakigsaad 109:2, 5, 12–13, nga pangitaon kon unsay gitudlo sa Ginoo bahin sa templo.

• Unsay imong nadiskobrehan?

• Unsaon nimo paghulagway ang bersikulo 13 sa kaugalingon nimong mga pulong?

  Ang usa ka kamatuoran nga mailhan tingali sa mga estudyante mao nga ang templo mao ang balay sa Ginoo, ang lugar sa Iyang pagkabalaan.

• Unsa nga mga panalangin ang moabot kanato tungod sa pagkahibalo niini nga kamatuoran sa atong kaugalingon?

Kon haom, awhaga ang mga estudyante nga ipakigbahin ang ilang mga kasinatian diin gibati nila nga duol sa Ginoo diha sa templo o gibati nila nga usa ka balaang dapit ang templo. Ang pagpakigbahin sa kaugalingon nimong mga kasinatian makatabang sa mga estudyante sa pagpakigbahin usab sa ilang mga kasinatian.

Ang Manluluwas anaa sa sentro sa templo

Ang mosunod nga mga pamahayag makatabang sa mga estudyante nga masabtan kon sa unsang paagi ang Manluluwas anaa sa sentro sa templo. Samtang basahon sa mga estudyante ang mga pamahayag, dapita sila nga pangitaon ang kinatibuk-ang katuyoan sa templo.

Si Presidente Russell M. Nelson mitudlo:

Ang templo mao ang labing importante nga bahin sa pagpalig-on sa atong hugot nga pagtuo ug espirituwal nga kalig-on tungod kay ang Manluluwas ug ang Iyang doktrina mao ang sentro nga bahin sa templo. Ang tanan nga gitudlo diha sa templo, pinaagi sa instruksiyon ug pinaagi sa Espiritu, makadugang sa atong pagsabot ni Jesukristo. Ang Iyang mahinungdanon nga mga ordinansa nagbugkos nato ngadto Kaniya pinaagi sa sagrado nga mga pakigsaad sa pagkapari. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 93-94)

Si Elder David A. Bednar sa Korum sa Napulog Duha ka Apostoles mipamatuod:

Ang tanang nakat-onan ug tanang gibuhat diha sa templo naghatag og gibug-aton sa kabalaan ni Jesukristo ug sa Iyang tahas diha sa mahinungdanong plano sa kalipay sa Langitnong Amahan. (David A. Bednar, “Himoa Kini nga Balay nga Matukod ngadto sa Akong Ngalan,” Liahona, Mayo 2020, 86)

• Para nimo, unsay importante niini nga mga pamahayag?

• Sa imong hunahuna, nganong importante ang pagkahibalo nga makatabang ang templo aron mas masabtan ug mas mailhan nato si Jesukristo?

Kon posible, dapita ang mga estudyante sa pagpangita sa mga litrato sa templo sa temples.ChurchofJesusChrist.org ug sa pagpasabot kon sa unsang paagi ang usa ka piho nga imahe nagpahinumdom nila kang Jesukristo. Pwede pod nimong hisgotan ang kaimportante sa hugpong sa mga pulong nga “Pagkabalaan ngadto sa Ginoo” ug “Ang Balay sa Ginoo,” nga naa sa kada templo.

Ang mosunod nga mga pag-aghat gituyo aron tabangan ang mga estudyante nga hisgotan ang mga paagi nga makita nila ang Manluluwas diha sa sentro sa ilang kasinatian sa templo. Dapita ang mga estudyante sa pagkompleto niini nga mga pag-aghat nga magkauban isip gamayng grupo. Mahimong kompletohon sa kada grupo kini nga mga pag-aghat nga magkauban diha sa usa ka piraso sa papel.

Samtang imong kompletohon kini nga mga pag-aghat, hunahunaa kon sa unsang paagi ang templo nagpahinumdom kanimo kang Jesukristo.

1. Ang puti nga sinina nga atong gisuot diha sa templo nagpahinumdom nato kang Jesukristo kay …

2. Ang atong makita diha templo magpahinumdom nato kang Jesukristo kay …

3. Ang atong gihimo sa templo nagpahinumdom nato kang Jesukristo kay …

4. Ang akong pagpangandam sa pag-adto sa templo nagpahinumdom nako kang Jesukristo kay …

Dihang mahuman na ang mga grupo, pwede nimo silang dapiton sa pagpakigbahin sa ilang gisulat ngadto sa laing grupo diha sa klase. Pinaagi sa pagpakigbahin sa ilang nakat-onan, mapalawom nila ang ilang pagsabot ug mapalig-on ang ilang mga pagpamatuod sa Manluluwas.

Usa ka tinguha nga makauban si Jesukristo diha sa templo

Ikonsiderar ang pagdapit sa mga estudyante sa pagtubag sa mosunod nga mga pangutana diha sa ilang mga journal sa pagtuon. Kon posible, pwede kang magpatukar og hinay nga musika nga makatabang sa mga estudyante sa paghunahuna bahin sa templo. Makatabang ang musika nga dapiton ang Espiritu sa pagkat-on sa ebanghelyo. Pwede kang magpatukar og musika gikan sa himno bahin sa templo. O pwede nimong ipasalida ang bidyo sa choir sa young women nga nagkanta sa “In That Holy Place,” nga available sa ChurchofJesusChrist.org.

• Unsay imong nadiskobrehan o gibati karon bahin sa Manluluwas isip ang sentro sa atong pagsimba sa templo?

• Sa unsang paagi makaimpluwensiya ang imong nakat-onan og gibati sa paagi sa imong pagpangandam ug pagsimba sa Ginoo diha sa Iyang balay?

Seguroa nga naay igong panahon ang mga estudyante sa pagtubag ayha dapiton ang mga estudyante nga ipakigbahin ang ilang mga hunahuna. Pwede usab nimong ipakigbahin ang mga paagi nga gihimo nimong sentro sa imong kasinatian sa templo ang Manluluwas.

Dugang nga mga Kapanguhaan

Nganong gisugo sa Ginoo ang Iyang mga Santos sa pagtukod og mga templo?

Si Propeta Joseph Smith (1805–44) mitudlo:

Kami gimandoan sa Ginoo didto sa Kirtland, sa pagtukod og balay sa Dios; … kini ang pulong sa Ginoo kanamo, ug kami kinahanglan, oo, ang Ginoo magtabang kanamo, kami mosunod: tungod sa matang sa among pagkamasulundon siya misaad kanamo og mahinungdanong mga butang; oo, gani usa ka bisita gikan sa langit aron pagpasidungog kanamo uban sa Iyang presensya. Kami nahadlok kaayo atubangan sa Ginoo kay tingali og kami mapakyas sa pagdawat niining dako nga pasidungog, nga gisugyot sa atong Agalon nga ihatag kanamo; kami nagtinguha alang sa mapainubsanon ug hugot nga pagtuo kay tingali og kami maulaw diha sa Iyang presensya. (Mga Pagtulun-an sa mga Presidente sa Simbahan: Joseph Smith [2007], 502)

Si Presidente Russell M. Nelson mipasabot:

Si Jesukristo mao ang rason nga kita nagtukod og mga templo. Ang matag usa Iyang balaan nga balay. Ang paghimo og mga pakigsaad ug pagdawat sa gikinahanglan nga mga ordinansa diha sa templo, ingon man ang pagtinguha sa pagpaduol ngadto Kaniya didto, makapanalangin sa inyong kinabuhi sa mga paagi nga walay bisan unsa nga matang sa pagsimba ang makahimo. Tungod niini nga rason, among gibuhat ang tanan namong mahimo aron sa paghimo sa mga panalangin sa templo nga mas sayon ngadto sa atong mga miyembro sa tibuok kalibotan. (Russell M. Nelson, “Ang Tubag sa Kanunay Mao si Jesukristo,” Liahona, Mayo 2023, 127–28)

Sa unsang paagi makatabang ang templo aron modangop kita kang Jesukristo?

Si Elder David E. Sorensen (1933–2014) sa Kapangulohan sa Seventy mipasabot:

Ang mga templo adunay dakong bili kanato tungod kay motabang kini nato sa pagpahayag sa atong kinauyokan nga teolohiya, nga mao ang pagdangop kang Kristo.

Gihimo kini sa mga templo sa labing menos duha ka paagi. Una, kini simbolikanhon ug literal nga nagpahinumdom ug nagtudlo nato bahin kang Kristo ug sa Iyang Amahan. … Ang atong pagsimba sa templo karon naay daghang simbolikanhon nga mga reperensiya kang Kristo, gikan sa kinatumyan nga estruktura sa gawas sa templo nga nagtudlo sa atong hunahuna paingon sa langit, ngadto sa puti nga sinina nga atong gisul-ob sulod sa templo. …

Gawas pa sa pisikal nga presensya niini ug panggawas nga mga simbolismo, ang mga templo makadasig kanato sa pagdangop kang Kristo sa ikaduhang paagi—nga mao, pinaagi sa mga ordinansa nga atong gihimo diha niini. Ang tanang ordinansa sa templo nakasentro kang Jesukristo ug sa Iyang balaang misyon, ug gipahigayon kini sa awtoridad sa Melchizedek nga Pagkapari. (David E. Sorensen, “Small Temples—Large Blessings,” Liahona, Nov. 1998, 64–65)

Unsaon nako pagpunting ngadto sa Manluluwas kon motambong sa templo?

Si Elder Richard G. Scott (1928–2015) sa Korum sa Napulog Duha ka Apostoles mipakigbahin:

Samtang nag-apil sa mga ordinansa sa templo, hunahunaa ang inyong relasyon ngadto ni Jesukristo ug ang Iyang relasyon ngadto sa atong Langitnong Amahan. Kining yano nga buhat mosangpot ngadto sa mas dako nga pagsabot sa balaanong kinaiyahan sa mga ordinansa sa templo. (Richard G. Scott, “Pagsimba diha sa Templo: Ang Tinubdan sa Kalig-on ug Gahum sa mga Panahon sa Panginahanglan,” Liahona, Mayo 2009, 43)

Dugang nga mga Kalihokan sa Pagkat-on

Mapakita sa Manluluwas ang Iyang kaugalingon kanato pinaagi sa mga panalangin sa templo

Sa Doktrina ug mga Pakigsaad 109:5, mitudlo ang Manluluwas nga mahimo Niyang ipakita ang Iyang kaugalingon ngadto sa Iyang katawhan diha sa templo. Aron tabangan ang mga estudyante nga makita kon sa unsang paagi ang mga panalangin mahimong ebidensiya sa pagpakita sa Manluluwas ngadto kanila, ikonsiderar ang paghimo sa mosunod nga kalihokan.

Pwede nimong dapiton ang mga estudyante sa paghimo og listahan sa mga panalangin nga moresulta gikan sa pagtambong sa templo. Aron himoon kini, pwedeng tan-awon sa mga estudyante ang “Ang Gisaad nga mga Panalangin sa Buluhaton sa Templo ug Family History 2” (4:04) samtang gihimo ang ilang lista.

Tupad sa pipila ka panalangin nga ilang gilista, pwedeng isulat sa mga estudyante kon sa unsang paagi ang maong panalangin makonsiderar nga ebidensiya sa pagpakita sa Manluluwas sa Iyang kaugalingon ngadto kanila.

Ang kalinaw sa Manluluwas diha sa templo

Ang usa ka paagi nga mapakita sa Manluluwas ang Iyang kaugalingon nganhi kanato diha sa templo mao ang pinaagi sa kalinaw nga Iyang gihatag kanato. Aron tabangan ang mga estudyante nga makita kon sa unsang paagi gipanalanginan ang usa ka batan-ong lalaki pinaagi sa kalinaw sa Manluluwas, ikonsiderar ang pagbasa sa mosunod nga pahayag ug dayon pagtan-aw sa “Ang mga Panalangin sa Templo,” gikan sa time code 4:14 hangtod 9:02.

Kon motambong kita sa templo, dunay moabot nato nga matang sa pagkaespirituhanon ug pagbati sa kalinaw nga molabaw pa sa bisan unsang pagbati nga moabot sa kasingkasing sa tawo. Masabtan nato ang tinuod nga kahulogan sa mga pulong sa Manluluwas sa dihang Siya miingon: “Kaninyo ibilin ko ang kalinaw, kaninyo ihatag ko ang akong kalinaw. … Kinahanglan dili magkaguol ang inyong kasingkasing, ni magtalaw” [Juan 14:27]. (Thomas S. Monson, “Ang mga Panalangin sa Templo,” Liahona, Mayo 2015, 91–92)

Pagpaduol ngadto kang Kristo

Aron tabangan ang mga estudyante nga makita kon sa unsang paagi ang templo makatabang nila nga mas mapaduol ngadto kang Jesukristo, pwede nimo silang dapiton nga bisitahon ang pahina nga “Pakigsuod pa kang Kristo” sa temples.ChurchofJesusChrist.org. Pwedeng basahon sa mga estudyante ang mga bahin sa artikulo, nga pangitaon kon sa unsang paagi nakasentro ngadto sa Manluluwas ang templo. Pwede nimo silang dasigon nga basahon ang kataposang parapo sa seksiyon nga giulohan og “Tigpataliwala tali sa Dios ug sa Tawo” aron makat-onan kon giunsa pagpapunting sa Langitnong Amahan ang atong atensyon ngadto sa Manluluwas diha sa templo.

Mga kapilian nga bidyo

Aron tabangan ang mga estudyante nga mobati og dako nga tinguha sa pagsimba kang Jesukristo diha sa templo, ikonsiderar ang pagpasalida sa usa sa mosunod nga mga bidyo:

Gipakigbahin sa mga indibidwal kon sa unsang paagi ang karaan ug modernong mga templo makatabang nato nga makabaton og koneksyon sa langit.

Gidapit ni Elder Gerrit W. Gong ang mga young adult sa pagpakigbahin kon sa unsang paagi ang pagserbisyo sa templo nakatabang nila nga mas mapaduol sa Manluluwas. Pwede nimong tabangan ang mga estudyante nga mahibaloan nga posible kining mahitabo nila human sila matugahi.

Isip kabahin sa pagpahinungod pag-usab sa Washington D.C. Temple, si Presidente Russell M. Nelson mipasabot kon sa unsang paagi ang templo maoy usa ka simbolo ni Jesukristo.

“Usa ka Simbolo ni Jesukristo”