Leksiyon 205: Pagpangandam alang sa Templo

Paghimo sa Pagsimba sa Templo nga usa ka Tibuok Kinabuhi nga Paningkamot

Pagtambong sa Templo sa tibuok Natong Kinabuhi

Nagkinabuhi kita sa makapahinam nga panahon sa wala pa mahitabo nga pagtukod sa templo. Gihimo sa Ginoo ang mga panalangin sa Iyang balaan nga balay nga mas daling maakses kay sa kaniadto. Kini nga leksiyon makatabang sa mga estudyante nga mabati ang kaimportante sa pagsimba sa Ginoo diha sa mga templo sa tibuok nilang kinabuhi.

Posibleng mga Kalihokan sa Pagkat-on

Gipatas-an nga oras diha sa templo

Gigamit ang usa ka case study sa tibuok leksiyon aron tabangan ang mga estudyante nga makita kon sa unsang paagi ang pagsimba sa mga templo makapanalangin nila sa tibuok nilang kinabuhi. Dapita ang mga estudyante sa paghunahuna sa ilang mga kinabuhi samtang ilang ikonsiderar ang case study. Ipahaom ang sitwasyon nga pagatun-an [case study] kon mahimo aron makasabot ang imong mga estudyante. Ang usa ka paagi sa paghimo niini mao ang pagdapit sa mga estudyante nga ilisan ang naa sa parenthesis sa kon unsay angay para sa mga estudyante.

Si (Joses) (16 anyos). Miyembro siya sa Simbahan sulod sa (lima ka tuig). Naa na siyay mga espirituhanong mga kasinatian pero gusto siya og mas lig-on nga pagpamatuod sa Manluluwas ug sa Iyang gipahiuli nga Simbahan. Mobati usahay si (Joses) og (grabeng presyur nga mahimong maayo sa eskwelahan). Nabalaka siya sa (iyang kaugmaon ug kon sa unsang paagi magkinabuhi nga matarong niining daotan nga kalibotan).

• Imagina nga nangayo og tambag nimo si (Joses) bahin sa usa sa iyang mga gikabalak-an. Nganong ang pagsimba sa Ginoo diha sa Iyang templo usa ka maayong tambag?

Basaha ang mosunod nga pamahayag ni Presidente Russell M. Nelson, nga pangitaon ang tabang nga gihatag kanato sa Ginoo:

Dili nato kalimtan kon unsa ang gibuhat sa Ginoo alang kanato karon. Iyang gibuhat ang Iyang mga templo nga mas dali nga maadtoan. Iyang gipaspasan ang gikusgon sa atong pagtukod og mga templo. Iyang gipalambo ang atong abilidad sa pagtabang sa pagpundok sa Israel. Iya usab nga gihimong mas sayon alang sa matag usa kanato nga mahimong malamboon sa espirituhanon nga paagi. Ako mosaad nga ang paggahin og mas dako nga oras diha sa templo mopanalangin sa inyong kinabuhi sa mga paagi nga walay laing makahimo. …

Akong minahal nga mga kaigsoonan, hinaot nga kamo magpunting sa templo sa mga paagi nga wala pa ninyo mabuhat sukad. Ako mopanalangin kaninyo nga mas mapaduol ngadto sa Dios ug kang Jesukristo matag adlaw. (Russell M. Nelson, “Magpunting sa Templo,” Liahona, Nob. 2022, 121)

• Unsay nakadani nimo gikan niini nga pamahayag?

• Unsa nga saad ang gihatag sa Ginoo pinaagi sa Iyang propeta?

  Samtang motubag ang mga estudyante, tabangi sila nga mailhan ang kamatuoran nga sama sa mosunod: Ang Ginoo misaad nga panalanginan kita sa paagi nga wala nato masinati samtang atong dugangan ang panahon nga atong gigahin diha sa Iyang templo.

  Kon limitado ang pag-akses sa imong mga estudyante sa usa ka templo, pwede nimong hisgotan ang mga paagi nga makapunting sila ngadto sa templo. Pananglitan, pwedeng maningkamot ang mga estudyante nga mahimong takos sa templo ug moapil sa buluhaton sa family history.

• Sa imong hunahuna, sa unsang paagi ang paggahin og dugang panahon sa templo sa Ginoo makapanalangin nato sa mga paagi nga labaw kay sa uban?

  Ang mosunod nga mga pangutana gituyo alang sa kaugalingon nga pagpamalandong. Makabenepisyo tingali ang mga estudyante sa pagsulat diha sa ilang mga journal sa pagtuon. Dapita ang mga estudyante nga gustong mopakigbahin sa ilang mga tubag diha sa klase.

• Unsa ka dako ang posibilidad nga kanunay kang motambong sa templo sa tibuok nimong kinabuhi? Ngano man?

• Unsa nga mga babag ang kinahanglan nimong buntogon aron makatambong sa templo sa tibuok nimong kinabuhi?

Gisaad nga mga panalangin

Hunahunaa kon sa unsang paagi nimo matabangan ang imong mga estudyante aron madugangan ang ilang tinguha sa pagsimba sa Ginoo diha sa Iyang mga templo. Ang usa ka paagi sa paghimo niini mao ang pagtabang sa mga estudyante nga mailhan ang daghang panalangin sa pagsimba sa Ginoo sa Iyang mga templo. Pwedeng maghimo og listahan ang mga estudyante diha sa pisara sa unsay ilang makaplagan sa mosunod nga mga kasulatan ug mga pamahayag.

Basaha ang mosunod nga mga kasulatan ug mga pamahayag, nga pangitaon ang mga panalangin nga gisaad sa Ginoo niadtong nagsimba Kaniya diha sa Iyang balay:

• Doktrina ug mga Pakigsaad 95:8

• Doktrina ug mga Pakigsaad 109:22–26

Si Presidente Russell M. Nelson mipahayag:

Palihog paggahin og panahon sa Ginoo diha sa Iyang balaan nga balay. Walay lain nga makapalig-on sa inyong espirituwal nga pundasyon sama sa pagserbisyo sa templo ug pagsimba sa templo. (Russell M. Nelson, “Paggahin og Panahon alang sa Ginoo,” Liahona, Nob. 2021, 121)

Palihog tuohi ko kon ako moingon nga kon ang inyong espirituwal nga pundasyon natukod nga lig-on diha ni Jesukristo kamo dili kinahanglan nga mahadlok. Kon kamo magmatinud-anon sa inyong mga pakigsaad nga gihimo didto sa templo, kamo lig-unon pinaagi sa Iyang gahom. Dayon, kon ang espirituhanon nga mga linog mahitabo, kamo makabarog nga lig-on tungod kay ang inyong espirituwal nga pundasyon lig-on ug dili matarog. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 96)

Si Presidente Henry B. Eyring mitudlo:

Nadiskubrihan sa daghang batan-on nga ang paggahin og panahon sa pagsiksik sa family history ug buhat sa templo mipalawom sa ilang pagpamatuod sa plano sa kaluwasan. Midugang kini sa impluwensya sa Espiritu diha sa ilang kinabuhi ug mipaus-os sa impluwensya sa kaaway. Nakatabang kini nga bation nila nga masuod sa ilang mga pamilya ug mas maduol sa Ginoo. Nakat-unan nila nga kining trabahoa wala lang magluwas sa mga patay na; nagluwas kini natong tanan (tan-awa sa D&P 128:18). (Henry B. Eyring, “Pagpundok sa Pamilya sa Dios,” Liahona, Mayo 2017, 22)

• Unsay gitudlo niini nga mga panalangin kanimo bahin sa Langitnong Amahan ug kang Jesukristo?

• Sa unsang paagi ka gipanalanginan sa Ginoo sa pag-apil sa buluhaton sa templo ug family history?

• Sa unsang paagi kini nga mga panalangin nagdasig nimo sa pagsimba sa Ginoo diha sa templo karon? Sa tibuok nimong kinabuhi?

Pagsimba diha sa templo sa tibuok natong kinabuhi

Ang mosunod nga case study makatabang sa mga estudyante nga masabtan ang kaimportante sa pagsimba sa Ginoo diha sa mga templo sa tibuok nilang kinabuhi. Panahon sa case study, awhaga ang mga estudyante nga maghunahuna bahin sa ilang mga kaugmaon ug kon unsaon nila pagsimba ang Ginoo diha sa mga templo sa tibuok nilang kinabuhi.

Pwede kang mogamit og lainlaing opsiyon sa pagtuon uban sa lainlaing bahin sa case study. Pwedeng tun-an sa mga estudyante ang mga bahin isip usa ka klase, tagsa-tagsa, ug diha sa mga grupo.

Human sa kada seksiyon, hunong kadiyot og hisgoti ang mosunod nga mga pangutana:

• Unsa nga mga pasangil ang pwedeng himoon ni (Joses) ug (Isabel) aron dili himoong prayoridad ang pagsimba diha sa templo?

• Unsa nga mga panalangin tungod sa pagsimba sa Ginoo diha sa Iyang balay ang makatabang kang (Joses) ug (Isabel)?

• Unsa nga mga sakripisyo ang kinahanglan tingaling himoon ni (Joses) ug (Isabel) aron makanunayon silang makasimba sa Ginoo diha sa templo?

Edad nga naa sa mga 20

Human makauli gikan sa pagserbisyo og full-time nga misyon, gitinguha ni (Joses) nga padayonon ang iyang edukasyon diha sa (usa ka trade school sa ilang lugar). Samtang (nagtambong sa institute), nahimamat niya ang usa ka batan-ong babaye nga si (Isabel), ug nagminyo sila. Human sa gradwasyon, si (Joses) (nagsugod sa iyang kaugalingong negosyo). Nabalaka siya (bahin sa pagsangkap sa iyang pamilya). Siya ug si (Isabel) nagsugod sa ilang pamilya ug gipanalanginan og (tulo) ka himsog nga anak. Naningkamot si (Joses) ug (Isabel) nga mahimo ang ilang labing maayo aron mabalanse ang ilang panahon para sa ilang pamilya, (sa ilang negosyo), ug sa mga calling sa Simbahan. Sa edad nga (kwatro), usa sa ilang mga anak (ang grabeng naangol tungod sa usa ka aksidente).

Edad nga naa sa mga 30

Naningkamot si (Joses) ug (Isabel) sa pagsangkap sa ilang pamilya pinaagi sa (pagpadagan sa ilang negosyo). Giatubang nila ang mga hagit sa pagpadako sa ilang mga anak ug pagtabang nila sa (pagbaton sa kaugalingon nilang mga pagpamatuod kang Jesukristo). Naningkamot si (Joses) nga mabalanse ang iyang gigahin nga panahon diha sa iyang pamilya, (iyang negosyo), ug sa iyang calling isip (usa ka tigtambag sa korum sa mga teacher). Nagserbisyo si Isabel isip (ang presidente sa Primary), naningkamot nga makatabang (sa negosyo sa pamilya), ug naningkamot nga maanaa alang sa iyang mga anak.

Edad nga naa sa mga 60 kapin

Ang mga anak nila ni (Joses) ug Isabel (naa nay kaugalingon nilang pamilya). Gimahal ni (Joses) ug (Isabel) ang ilang pamilya pero nabalaka gihapon sa (ilang mga apo nga nagsunod kang Jesukristo ug naghimo og maayong mga desisyon). Samtang sila nagkatigulang, (nagkaluya ang panglawas ni Joses).

Ikonsiderar ang pagbasa sa pamahayag ni Presidente Russell M. Nelson diha sa “Dugang nga mga Kapanguhaan” nga nagtubag sa pangutana nga “Sa unsang paagi nato nga mahimong prayoridad ang pagsimba diha sa templo karon ug sa umaabot?” Hisgoti kon sa unsang paagi magamit ang pamahayag diha sa case study ug sa kaugalingon natong kinabuhi.

Usa ka sulat para sa imong kaugalingon

Ikonsiderar ang pagdapit sa mga estudyante nga maghimo og sulat sa pag-awhag sa ilang umaabot nga kaugalingon bahin sa kaimportante sa pagsimba sa Ginoo diha sa Iyang mga templo. Pwedeng butangan og petsa sa mga estudyante ang ilang sulat diha sa sobre ug tagoan ang sulat niana nga sobre ug abrehan kana sa maong petsa.

Pwede silang magsulat bahin sa:

• Kasamtangan nilang mga kasinatian diha sa templo.

• Kon sa unsang paagi maapektohan ang ilang kinabuhi sa desisyon nga motambong kanunay sa templo.

• Kon sa unsang paagi maapektohan ang ilang relasyon sa Langitnong Amahan ug kang Jesukristo sa desisyon nga motambong kanunay sa templo.

• Mga paagi aron himoong prayoridad ang pagsimba sa templo karon ug sa umaabot.

Pahinumdomi ang mga estudyante nga molihok sa bisan unsang mga pag-aghat nga ila tingaling madawat gikan sa Espiritu Santo ug sa pagsulat bahin sa uban pa nilang gihunahuna.

Dugang nga mga Kapanguhaan

Unsa kaha kon dili ko ganahan nga motambong sa templo?

Si Presidente Russell M. Nelson mitudlo:

Kon kamo dili pa ganahan nga motambong sa templo, adto og kadaghan—dili lang pipila. Tugoti ang Ginoo, pinaagi sa Iyang Espiritu, motudlo ug modasig kaninyo didto. Ako mosaad kaninyo nga sa kadugayan, ang templo mahimong usa ka dapit sa kasiguroan, kahupayan, ug pagpadayag. (Russell M. Nelson, “Ang Templo ug ang Inyong Espirituwal nga Pundasyon,” Liahona, Nob. 2021, 95)

Sa unsang paagi nato mahimong prayoridad ang pagsimba sa templo karon ug sa umaabot?

Si Presidente Russell M. Nelson mitambag:

Akong minahal nga mga kaigsoonan, ang mga pagpangatake sa kaaway paspas kaayo, sa gikusgon ug sa matang. Ang atong panginahanglan nga maanaa sa templo kanunay wala sukad pa nga mas labaw nga gikinahanglan. Mohangyo ko kaninyo nga mainampoong motan-aw kon giunsa ninyo paggamit ang inyong oras. Pagpahinungod og oras alang sa inyong kaugmaon ug diha sa inyong pamilya. Kon adunay templo nga dili kaayo layo kaninyo, giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon. Ako mosaad kaninyo nga ang Ginoo mohatag og mga milagro nga Siya nasayod nga inyong gikinahanglan samtang kamo naghimo og mga sakripisyo sa pagserbisyo ug pagsimba diha sa Iyang mga templo. (Russell M. Nelson, “Ang Mahimong Labing Dalaygon nga mga Santos sa Ulahing mga Adlaw,” Liahona, Nob. 2018, 114)

Si Elder Richard G. Scott (1928–2015) sa Korum sa Napulog Duha ka Apostoles mipahayag:

Tungod kay ako nahigugma kaninyo, ako kinasingkasing nga makigsulti kaninyo, nga walay paglipodlipod. Akong nakita nga sa daghang mga higayon ang mga indibidwal mihimo og dakong mga sakripisyo sa pag-adto sa lagyo nga templo. Apan kon ang usa ka templo natukod na sa duol, sulod sa mubo nga panahon, daghan ang dili kanunay nga mobisita niini. Ako adunay sugyot: Kon ang templo duol na kaayo, ang gagmay nga mga butang mahimo nga mobalda sa inyong mga plano sa pag-adto sa templo. Paghimo og piho nga mga tumong, hunahunaa ang inyong mga kahimtang, kon kanus-a kamo makaapil sa mga ordinansa sa templo. Dayon ayaw itugot nga may bisan unsang butang nga makabalda niana nga plano. Kini nga sundanan makasiguro nga kadtong kinsa nagpuyo duol sa templo mahimo nga mapanalanginan sama niadtong kinsa nagplano nang daan ug mihimo og taas nga biyahe aron makaadto sa templo. …

Ako moawhag kaninyo sa paghimo sa inyong kaugalingon nga tumong kon unsa ka sagad kamo makahimo sa mga ordinansa nga gitanyag sa atong magamit nga mga templo. Unsa man ang anaa diha nga mas importante kay sa pagtambong ug pag-apil sa mga ordinansa diha sa templo? Unsa man nga kalihokan ang may mas dako pa nga epekto ug mohatag og labaw nga kamaya ug hingpit nga kalipay alang sa usa ka magtiayon kay sa mag-uban nga moadto sa templo? (Richard G. Scott, “Pagsimba diha sa Templo: Ang Tinubdan sa Kalig-on ug Gahum sa mga Panahon sa Panginahanglan,” Liahona, Mayo 2009, 43)

Si Elder Neil L. Andersen sa Korum sa Napulog Duha ka Apostoles mitudlo:

Kita karon aduna nay mga templo nga mas duol ug mas daling maadto kaysa kaniadto. Apan niining mga panahon sa kagubot ang Ginoo nagpaabot kanato nga usbon nato ang atong mga naandan nga gawi ug moadto sa Iyang balay nga mas kanunay. (Neil L. Andersen, “A Compensatory Spiritual Power for the Righteous” [Brigham Young University Education Week devotional, Aug. 18, 2015], speeches.byu.edu)

Si Elder David A. Bednar sa Korum sa Napulog Duha ka Apostoles mitudlo:

Maabot sa akong tingog mao ang daghang batan-ong mga babaye, batan-ong mga lalaki, ug mga bata. Mangamuyo ako kaninyo nga magmahimong takos, nga magmakanunayon, ug sa pagtan-aw sa unahan uban sa hilabihan nga pagpaabot sa adlaw nga inyong madawat ang mga ordinansa ug mga panalangin sa templo. (David A. Bednar, “Madungganon nga Paghupot og usa ka Pangalan ug Katungdanan,” Liahona, Mayo 2009, 100)

Dugang nga mga Kalihokan sa Pagkat-on

Alternatibo sa case study

Imbes gamiton ang case study, pwede nimong hatagan og gagmayng piraso sa papel ang mga estudyante ug dapita sila nga isulat ang importanteng mga desisyon ug lainlaing mga hagit nga para nila ilang maatubang sa umaabot. Hisgoti kon sa unsang paagi makatabang nila ang kanunay nga pagsimba sa Ginoo diha sa Iyang balay aron makahimo og mga desisyon ug makaatubang og mga hagit. Pwede usab nimong hisgotan ang mga babag nga ila tingaling maatubang sa makanunayong pagsimba sa Ginoo diha sa templo ug ang mga sakripisyo nga kinahanglan nilang himoon aron mahimo kana.

Si Jesus miadto sa templo sa tibuok Niyang kinabuhi

Aron tabangan ang mga estudyante nga makakat-on gikan sa ehemplo sa Manluluwas, pwede nimo silang tabangan nga madiskobrehan kon giunsa ni Jesus pag-una ang templo. Pwedeng tun-an sa mga estudyante ang lainlaing okasyon dihang miadto si Jesus sa templo sa Jerusalem. Pwede nimong isulti nga mibiyahe og igong gilay-on ang Manluluwas nga nagbaktas (mga 100 ka milya o mga 160 kilometros) gikan sa Galilea paingon sa Jerusalem. Ikonsiderar ang pagdapit sa mga estudyante sa pagbasa og usa o kapin pa sa mosunod nga mga kasulatan ug hisgoti kon sa unsang paagi migahin og panahon ang Manluluwas diha sa templo panahon sa Iyang pagpangalagad. Dayon, pwedeng hisgotan sa mga estudyante ang mga paagi sa paghatag og prayoridad sa templo sa ilang kinabuhi.

• Lucas 2:41–47

• Juan 2:13–16

• Mateo 21:12–14

• Lucas 20:1; Juan 8:2

Bidyo

Aron tabangan ang mga estudyante nga makakita og ehemplo kon sa unsang paagi ang usa ka batan-ong babaye nalig-on tungod sa pagtambong sa templo, pwede nimong ipasalida ang bidyo nga “Ang Templo Timailhan alang sa Kahangtoran: Karen” (3:48). Pwede nimong ipasalida ang bidyo sa dili pa ipakigbahin sa mga estudyante kon sa unsang paagi sila napanalanginan pinaagi sa pagtambong sa templo.

Atong mga prayoridad

Ikonsiderar ang paggamit og butang nga kakuhaan og leksiyon aron tabangan ang mga estudyante nga pamalandongan ang ilang mga prayoridad ug kon sa unsang paagi nila mahimong prayoridad ang templo. Pagdala og bildo nga garapon; balas, graba, o bugas; ug dako-dakong bato nga masulod sa garapon. Ang mga bato ug balas nagrepresentar sa lainlaing paagi diin atong gigahin ang atong panahon. Kon ang garapon unang gisudlan og balas, ang mga bato dili maigo. Kon ang mga bato ang unang mabutang sa garapon, ang mga balas maigo. Hisgoti kon sa unsang paagi ang pagsimba sa templo sama sa mga bato ug kon sa unsang paagi mahimong prayoridad sa mga estudyante diha sa ilang kinabuhi ang pagsimba diha sa templo. Ang artikulo nga “Maayong Paggamit sa Inyong Panahon” (New Era, Hulyo 2020, 34–35) nagpasabot kon unsaon ni nimo paghimo.