Leksiyon 206: Pagpangandam alang sa Templo

Sa Templo, Kita Nakigsaad nga Tumanon ang Balaod sa Pagpahinungod

Ang Pagpuyo uyon sa Balaod sa Pagpahinungod Makatabang Nato nga Mahisama sa Dios

Ingon nga bahin sa gasa, o pagtuga, nga madawat nato gikan sa Ginoo diha sa Iyang mga templo, kita naghimo og balaang mga pakigsaad. Usa sa mga pakigsaad nga atong gihimo uban sa Langitnong Amahan mao ang pagtuman sa balaod sa pagpahinungod. Ang natugahan nga mga miyembro nanaad nga ipahinungod nila ang ilang panahon, mga talento, ug uban nga mga panalangin nga ilang madawat sa pagtukod sa Simbahan ni Jesukristo sa yuta. Kini nga leksyon makatabang sa mga estudyante nga masabtan ang balaang balaod sa pagpahinungod, nga kita nakigsaad sa Dios nga tumanon.

Posibleng mga Kalihokan sa Pagkat-on

Pagsunod og risipi

Timan-i: Gipaila niini nga leksiyon ang mga pakigsaad nga atong gihimo ingon nga bahin sa ordinansa sa pagtuga sa templo ug nagtutok sa balaod sa pagpahinungod. Hisgotan sa ubang mga leksiyon sa seminary ang ubang balaod.

Dapita ang mga estudyante nga mangita sa risipi sa pagkaon nga ganahan nila. Awhaga sila nga mangitag mga imahe sa resulta gikan sa pagsunod sa risipi. Pwede nimong hangyoon ang mga estudyante nga mangita og moreport isip usa ka gamayng grupo. Kon walay makita ang mga estudyante nga mga risipi ug mga imahe diha sa klase, pwede nimong ipakita ang mosunod nga imahe ug mangutana sa mga estudyante kon sa unsang paagi ang pagkakita sa resulta nakadasig nila nga sundon ang risipi.

• Unsay imong nahimo dihang imong gisunod ang risipi?

• Sa unsang paagi makatabang ang litrato o bidyo uban sa risipi?

Kita mohimo og mga pakigsaad sa Dios diha sa balaang mga templo

Parehas sa litrato o bidyo sa kompletong risipi, makatabang ang pagkahibalo sa gusto nimong resulta sa pagdawat sa atong pagtuga. Ingon nga bahin sa ordinansa sa pagtuga, kita nakigsaad sa Dios nga sundon ang lima ka lainlaing balaod. Ang pagpuyo uyon niini nga mga balaod maoy sama sa pagsunod sa importanteng mga lakang sa usa ka recipe. Makatabang nato ang mga balaod nga kita nakigsaad nga sundon diha sa templo aron mas mahisama kita sa Dios ug moandam kanato sa pagpangandam sa pagkinabuhi uban niya sa celestial nga gingharian.

Ikonsiderar ang pagsulat sa mosunod diha sa pisara (nga dili iapil ang mga pulong diha sa parentheses) ug hangyoa ang mga estudyante nga isulat ang kada balaod nga atong gipakigsaad nga sundon dihang nadawat nato ang atong pagtuga diha sa mga templo. Kon nagkinahaglan og tabang ang mga estudyante, pwede nimo silang tultolan sa 27.2, “Ang Pagtuga,” diha sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, nga anaa sa ChurchofJesusChrist.org.

1. Balaod sa (pagkamasulundon)

2. Balaod sa (pagsakripisyo)

3. Balaod sa (ebanghelyo ni Jesukristo)

4. Balaod sa (kaputli)

5. Balaod sa (pagpahinungod)

   Isulat ang mosunod nga kamatuoran diha sa pisara: Ingon nga bahin sa pagtuga diha sa templo, nakigsaad kita sa Dios nga magpuyo uyon sa balaod sa pagpahinungod.

   Nakakat-on na tingali ang mga estudyante bahin sa balaod sa pagpahinungod sa nag-unang leksiyon. (Tan-awa sa “Leksyon 57: Doktrina ug mga Pakigsaad 42:29–39: Gipahinungod ngadto sa Ginoo”)

   Dapita ang mga estudyante nga ipakigbahin ang ilang nahibaloan bahin niini nga balaod. Makatabang nimo ang pagsusi sa nag-unang kahibalo sa mga estudyante aron matabangan ang mga estudyante nga tutokan ang leksiyon. Pwede na pod kang mangutana og pipila ka pangutana sa kataposan sa leksiyon aron tabangan ang mga estudyante nga mapahayag unsa ang ilang nakat-onan.

   • Unsay imong nahibaloan bahin sa balaod sa pagpahinungod?

   • Unsa pay imong mga pangutana bahin sa balaod sa pagpahinungod?

Dasiga ang mga estudyante nga tinguhaon ang tabang sa Espiritu Santo aron masabtan ang balaod sa pagpahinungod ug kon sa unsang paagi ang pagpangandam sa paghimog mga pakigsaad sa Dios didto sa templo magpanalangin nila.

Hatagi ang mga estudyante sa mosunod nga handout ug dapita sila sa pagpangita kon unsa ang balaod sa pagpahinungod ug kon sa unsang paagi kini nga balaod makatabang nato nga mas mahisama sa Dios. Para sa dugang nga Impormasyon, pwedeng tan-awon sa mga estudyante ang Mga Hilisgotan ug mga Pangutana, “Pagpahinungod.”

Ang Balaod sa Ginoo sa Pagpahinungod

• Doktrina ug mga Pakigsaad 42:30, 38–39

• Doktrina ug mga Pakigsaad 78:3–7

• Doktrina ug mga Pakigsaad 105:1–5

Si Elder D. Todd Christofferson sa Korum sa Napulog Duha ka Apostoles mipasabot:

Ang balaod sa pagpahinungod sa Ginoo (tan-awa, pananglitan, sa D&P 42:32, 53) … adunay ekonomikanhong bahin apan, labaw pa niana, mao ang paggamit sa balaod sa celestial nga kinabuhi dinhi ug karon (tan-awa sa D&P 105:5). Ang pagpahinungod mao ang paggahin o paghalad og usa ka butang nga ingon ka sagrado, gihalad alang sa balaanong mga katuyoan. Ang tinuod nga kalamposan sa kinabuhi moabot sa pagpahinungod sa atong kinabuhi—kana mao, ang atong panahon ug mga pagpili—ngadto sa mga katuyoan sa Dios (tan-awa sa Juan 17:1, 4; D&P 19:19). Sa pagbuhat niini, gitugotan nato Siya sa pagdala nato ngadto sa atong kinatas-ang kapaingnan. (D. Todd Christofferson, “Mga Hulagway sa Gipahinungod nga Kinabuhi,” Liahona, Nob. 2010, 16)

Si Elder Dieter F. Uchtdorf sa Korum sa Napulog Duha ka Apostoles mitudlo:

Ang sakripisyo ug pagpahinungod mao ang duha ka langitnong balaod nga atong gisaad nga tumanon diha sa balaan nga templo. Kining duha ka balaod managsama apan dili pareho. …

Ang pagpahinungod lahi gikan sa sakripisyo sa dili moubos sa usa ka importante nga paagi. Kon kita mopahinungod og butang, dili nato kini biyaan ug kalimtan. Kondili, gamiton nato kini diha sa pagserbisyo sa Ginoo. Gipahinungod nato kini ngadto Kaniya ug sa Iyang balaan nga mga katuyoan. Kita makadawat sa mga talento nga gihatag sa Ginoo kanato ug maningkamot sa pagpalambo niini, pilopiloon, aron mas makatabang pa sa pagtukod sa gingharian sa Ginoo.

Gamay ra kaayo nato ang hangyoon sa pagsakripisyo sa atong kinabuhi alang sa Manluluwas. Apan kitang tanan gidapit sa pagpahinungod sa atong kinabuhi ngadto Kaniya. (Dieter F. Uchtdorf, “Kinasingkasing ang Tanan,” Liahona, Mayo 2022, 124)

Unsa man ang balaod sa pagpahinungod? Sa unsa nga paagi kini makaapekto kanako?

Karon, nagsunod kita niini nga balaod sa lain-laing mga paagi. Sama pananglit, moserbisyo kita sa uban, modawat og mga calling ug mga buluhaton sa Simbahan ug mohimo sa atong labing maayo niini, ug mobayad og hingpit nga ikapulo ug ubay-ubay nga halad sa puasa. Kon kita mobuhat sa unsay gisugo kanato sa mga propeta ug sa Espiritu Santo aron sa pagtukod sa gingharian sa Dios ug sa pagtabang sa nanginahanglan, nagpuyo kita sa balaod sa pagpahinungod. (“Unsa man ang balaod sa pagpahinungod? Sa unsa nga paagi kini makaapekto kanako?,” Alang sa Kalig-on sa mga Kabatan-onan, Abr. 2021, 31)

• Base sa imong pagsabot sa balaod sa pagpahinungod, sa unsang paagi kini usa ka panalangin gikan sa Dios?

• Sa imong hunahuna, sa unsang paagi ang balaod sa pagpahinungod makatabang nato nga mahisama sa Langitnong Amahan ug ni Jesukristo?

Unsay ipasabot sa pagpuyo uyon sa balaod sa pagpahinungod

Aron tabangan ang mga estudyante sa pagpakita unsa ang ilang nakat-onan, pwede nimo silang dapiton nga indibidwal nga himoon ang mosunod nga kalihokan, uban ang usa ka pares, o sa gamayng grupo. Kon pilion nimo ang usa sa unang duha ka sugyot, awhaga sila nga iapil ang mga imahe o mga ilustrasyon.

Kon kinahanglan og tabang ang mga estudyante sa pagpangita og mga ehemplo gikan sa kasulatan para sa unang opsiyon, pwede nimong irekomendar ang Mateo 4:23; 26:36–44; Lucas 8:1–3; 10:30–37; Mga Buhat 3:2–8; 4:32.

Gamita ang usa sa mosunod nga mga opsiyon sa paghimog usa ka butang nga makatabang nimo sa pagpasabot sa importanteng mga detalye bahin sa balaod sa pagpahinungod. Ang imong gihimo magsilbi usab nga pahinumdom samtang mangandam ka sa pagdawat sa imong pagtuga gikan sa Ginoo.

1. Pagsulat og duha o tulo ka kapahayag nga magpasabot sa balaod sa pagpahinungod ngadto sa usa ka tin-edyer. Apila ang pipila ka ehemplo gikan sa mga kasulatan diin nagpakita nga si Jesukristo o ang Iyang mga disipulo nagpuyo uyon niini nga balaod pinaagi sa pagpakigbahin sa ilang panahon, mga talento, o uban pang panalangin ngadto sa uban.

2. Pagsulat og mubong artikulo para sa magasin nga Alang sa Kalig-on sa mga Kabatan-onan. Mahimo nimong pilion nga ipunting ang imong mensahe sa pagtabang sa mga tin-edyer kinsa nangandam sa pagdawat sa ilang pagtuga gikan sa Ginoo.

3. Pag-organisar og mubong drama-drama o skit aron ipakita ang mga paagi sa pagpuyo uyon sa balaod sa pagpahinungod. Sulayi ang pag-apil og mga ehemplo nga may kalabotan sa mga tin-edyer nga mopili sa pagpuyo uyon niini nga balaod.

   Hatagig higayon ang mga estudyante nga ipakita ang ilang pagsabot sa balaod sa pagpahinungod pinaagi sa pagpakigbahin sa ilang giandam. Pwede nimong dapiton ang mga estudyante nga magreport sa klase, o gusto tingali nilang kining ipakigbahin sa usag usa uban ang gagmayng grupo.

   Ikonsiderar ang pagdapit sa mga estudyante nga ipakigbahin kon sa unsang paagi ang pagsugod sa pagpuyo uyon sa mga baroganan sa balaod sa pagpahinungod mahimong panalangin na ngadto kanila ug sa uban karon. Pwede nimong dapiton ang klase nga maghisgot pinaagi sa pagpakita sa mosunod nga mga pangutana ug hangyoa ang mga estudyante nga tubagon ang usa niini. Pwede pod nimong idugang ang imong pagpamatuod sa unsa ang gipakigbahin sa mga estudyante.

   • Unsay imong nakat-onan karong adlawa nga makatabang nimo sa pagpangandam sa pagtambong sa templo ug pagdawat sa imong pagtuga gikan sa Ginoo?

   • Sa imong hunahuna, unsay epekto sa pagpuyo uyon sa balaod sa pagpahinungod diha sa imong relasyon sa Langitnong Amahan ug kang Jesukristo?

Dugang nga mga Kapanguhaan

Asa ko makakat-on og dugang bahin sa pagtuga diha sa templo?

Pangita dinhi og impormasyon: “Mahitungod sa Pagtuga diha sa Templo.”

Sa unsang paagi kita magpuyo uyon sa balaod sa pagpahinungod karon?

Si Elder David A. Bednar sa Korum sa Napulog Duha ka Apostoles mitudlo:

Kon sundon nato ang balaod sa pagpahinungod, andam kita dili lang sa paghalad sa bisan unsa nga anaa kanato tungod og alang sa ebanghelyo, apan mosaad usab kita nga palamboon ug ihalad ang atong pinakamaayo—atong panahon, atong [mga talento], ug ang [nagtubo natong kapasidad]—sa katukoran sa gingharian sa Dios dinhi sa yuta.

Ang atong saad mao: Akong ihatag ang akong kaugalingon ug ang tanan nga akong maabot, ug ako magpakabuhi alang sa ebanghelyo ni Jesukristo. …

Ang tinuod nga pagpahinungod dinasig gikan sa gugmang putli ug magbunga og dugang tinguha sa pagserbisyo. …

… Niining ulahing mga adlaw, … mas daghan ang gikinahanglan kanato isip mga anak sa pakigsaad kaysa atong [kwarta, butang, ug panahon. Kita kinahanglan nga mopahinungod sa atong tibuok nga kalag ngadto sa Ginoo.] (David A. Bednar, “Your Whole Souls as an Offering unto Him” [Ricks College devotional, Ene. 5, 1999], byui.edu)

Si Presidente Ezra Taft Benson (1899–1994) mitudlo:

Kita nakigsaad nga mosunod sa balaod sa pagpahinungod. Niini nga balaod kita mopahinungod sa atong panahon, mga talento, kalig-on, katigayonan, ug kwarta alang sa pagpalig-on sa gingharian sa Dios dinhi sa yuta ug sa pag-establisar sa Zion. Hangtod nga ang usa ka tawo mosunod sa mga balaod sa pagkamasulundon, sa sakripisyo, sa ebanghelyo, ug sa kaputli, siya dili makasunod sa balaod sa pagpahinungod, nga mao ang balaod nga may kalabotan sa celestial nga gingharian. “Kay kon kamo buot nga Ako mohatag nganha kaninyo og usa ka dapit diha sa celestial nga kalibotan, kamo kinahanglan gayod moandam sa inyong mga kaugalingon pinaagi sa pagbuhat sa mga butang nga Ako misugo kaninyo ug nagkinahanglan gikan kaninyo” (Doktrina ug mga Pakigsaad 78:7). (Teachings of Ezra Taft Benson [1988], 121)

Unsay atong makat-onan bahin sa balaod sa pagpahinungod gikan sa kasaysayan sa Simbahan?

Ang mga tigtipig sa kasaysayan sa Simbahan nga si Steven Harper ug Kate Holbrook naghisgot sa kasaysayan sa balaod sa pagpahinungod sukad nga napahiuli kini niadtong 1831 pinaagi ni Propeta Joseph Smith.

Usa ka ehemplo gikan sa kasaysayan sa Simbahan: “Treasure in Heaven: The John Tanner Story”

“Pagpahinungod ug Pagkatinugyanan,” Mga Hisgotanan sa Kasaysayan sa Simbahan

Dugang nga mga Kalihokan sa Pagkat-on

Pagtinabangay uban ang gipahinungod nga paningkamot

Ikonsiderar ang pagpaila sa balaod sa pagpahinungod pinaagi sa pagdapit sa mga estudyante sa paghimog buluhaton diin ang matag estudyante makatabang sa pipila ka paagi. Pwede nimong hatagan ang matag estudyante og usa o duha ka piraso sa puzzle ug dapita silang magtinabangay aron makompleto ang puzzle. Dapita ang mga estudyante sa paghisgot sa mosunod nga mga pangutana:

• Unsay mahitabo kon ang tanan magtinabangay aron makab-ot ang nauyonang resulta?

• Unsay imong nakat-onan sa kaimportante sa natampo sa matag usa?

Tabangi ang mga estudyante nga makasabot nga ang pagpuyo uyon sa balaod sa pagpahinungod magtugot sa tanang disipulo sa Ginoo nga makatabang sa pagtukod sa Iyang gingharian sa yuta. Dapita ang mga estudyante nga ipakigbahin diha sa gagmayng grupo ang ilang mga panabot sa tahas nga ilang nakompleto ug kon unsay koneksyon niini sa pagpuyo uyon sa balaod sa pagpahinungod.

Makatabang nato ang mga pagtulun-an ni Jesukristo aron masabtan ang pagpahinungod

Makabenepisyo tingali ang mga estudyante gikan sa pagtuon sa mga pulong sa Manluluwas ug kon sa unsang paagi kini nila maggamit sa balaod sa pagpahinungod. Pwede nimong ipakita ang mosunod nga mga pakisayran para matun-an sa mga estudyante:

Mateo 25:34–40

Marcos 12:41–44

Aron matabangan ang mga estudyante nga makakat-on og dugang gikan sa mga pagtulun-an sa Manluluwas bahin sa diyot sa biyuda, pwede nimong ipakita ug hisgotan ang mosunod nga pamahayag ni Elder Dieter F. Uchtdorf:

Alang sa Ginoo, ang bili sa donasyon gisukod dili pinaagi sa epekto niini sa panudlanan apan pinaagi sa epekto niini diha sa kasingkasing sa naghatag.

Sa pagdayeg niining matinud-anong biyuda, ang Manluluwas mihatag nato og sumbanan sa pagsukod sa atong pagkadisipulo sa tanang daghan nga mga pagpahayag niini. Si Jesus mitudlo nga ang atong halad mahimong dako o mahimong gamay, apan bisan hain niini, kinahanglan nga kinasingkasing ang tanan. …

… Sama sa biyuda sa Jerusalem, kinahanglan nga kita mohalad Kaniya sa atong tibuok nga mga kalag. Tingali ang atong halad gamay ra, apan kinahanglan nga kini gikan sa atong kasingkasing ug kalag. (Dieter F. Uchtdorf, “Kinasingkasing ang Tanan,” Liahona, Mayo 2022, 122–23)

Mga pagtulun-an sa Basahon ni Mormon nga makatabang nga masabtan ang pagpahinungod

Dapita ang mga estudyante nga tun-an ang lainlaing tudling gikan sa Basahon ni Mormon aron matabangan sila nga mas masabtan ang kahulogan sa pagpahinungod sa atong panahon, mga talento, ug uban pang panalangin. Tabangi ang mga estudyante nga madiskobrehan ang tinguha sa Ginoo para nato nga atimanon ang usag usa. Pwede nimong ipakita ang mga pakisayran ug hangyoon ang mga estudyante nga makigtinabangay sa ilang pares sa pagpangitag mga panabot. Ikonsiderar ang pagdapit sa mga estudyante nga ipakigbahin ang ilang nakat-onan bahin ni Ginoong Jesukristo ug kon unsay atong mahimo aron mas mahisama Kaniya.

• Jacob 2:18–19

• Mosiah 4:21

• Mosiah 18:27–29

• Alma 1:26–30

• 4 Nephi 1:3